Capítulo 52
1 לְשַׁבָּחָא שִׂכְלָא טָבָא עַל יְדוֹי דְדָוִד:
2 כַּד אֱתֵי דוֹאֵג אֱדוֹמָאָה וְתַנֵי לְשָׁאוּל וַאֲמַר לֵיהּ אֲתָא דָוִד לְבֵית אֲחִימֶלֶךְ:
3 מַה תִּשְׁתַּבַּח בְּלִישָׁנָא בִישָׁא גִבַּר לְמִשְׁדֵי אֲדַם זַכָּאָה חִסְדָא דֶאֱלָהָא כָּל יוֹמָא:
4 אִתְרְגוּשְׁתָּא תְּחַשֵׁב בְּלִיבְבָךְ לִישְׁנָךְ הֵיךְ אִזְמֵל חָרִיף עָבִיד מִלֵי מַלְשִׁינוּתָא:
5 רְחֵימְתָּא בִּישׁ מִן טַב שִׁקְרָא מַלְמַלְלָא צִדְקְתָא לְעַלְמִין:
6 רְחַמְתָּא כָּל מִלֵי סַלְעֲמִיתָא לִישְׁנָא דִנְכִילוּ:
7 לְחוֹד אֱלָהָא יִתְרְעִינָךְ לְעַלְמִין יִתְבְּרִינָךְ וִיטַלְטְלִינָךְ מִלְמִיתַּב בְּמַשְׁכְּנָא וְיִתְלְשִׁינָךְ מִן אֲרַע חַיַיָא לְעָלְמִין:
8 וְיֶחְמוּן צַדִיקַיָא בְּפוּרְעָנוּתָא דְרַשִׁיעַיָא וִידַחֲלוּ מִן קֳדָם יְיָ וְאַמְטוּלְתֵּיהּ יִגְחֲכוּן:
9 וְיֵימְרוּן הָא גַבְרָא דְלָא שַׁוֵי מֵימְרָא דַייָ עוּשְׁנֵיהּ סְבַר בְּעָתְרֵיהּ עֲשִׁין בְּמָמוֹנֵיהּ:
10 וַאֲנָא הֵיךְ אִילָן זֵיתָא עַבּוּף בְּבֵית מַקְדַשׁ אֱלָהָא סַבְרֵת בְּחִסְדָא דֶאֱלָהָא לְעָלְמֵי עָלְמִין:
11 אוֹדֵי קֳדָמָךְ לַעֲלַם אֲרוּם עֲבַדְתָּ פּוּרְעָנוּת דִינִי וְאַמְתִּין שְׁמָךְ אֲרוּם טָב קֳבֵל חֲסִידָיִךְ: