Capítulo 143
1 שְׁבָחָא לְדָוִד יְיָ שְׁמַע צְלוֹתִי אֲצֵית לְתַחֲנוּנָי בְּקוּשְׁטָךְ עֲנֵי יָתִי בְּצִדְקָתָךְ:
2 וְלָא תֵעוּל לְבֵית דִינָא עִם עַבְדָךְ אֲרוּם לָא יִזְכֵי קֳדָמָךְ כָּל דְחָי:
3 אֲרוּם רָדֵף בְּעֵל דְבָבָא נַפְשִׁי דִכְדֵךְ לְאַרְעָא חַיָתִי אוֹתְבַנִי בַּחֲשׁוֹכַיָא הֵיךְ שְׁכִיבֵי עַלְמָא הָדֵין:
4 בְּאִשְׁתַּלְהֲיוֹת עֲלַי רוּחִי בְּגוּשְׁמִי יִשְׁתַּעֲמֵם לִבִּי:
5 אִדְכַּרִית יוֹמִין מִלְקַדְמִין רְנַנֵית בְּכוּלְהוֹן עוֹבָדָךְ בְּעוֹבָדֵי אַיְדָךְ אֲמַלֵל:
6 פְּרִיסֵית אַיְדִי בִצְלוֹ קֳדָמָךְ נַפְשִׁי הֵיךְ אַרְעָא דְצַחֲיָא לְמַיָא מוֹדִיקָא לָךְ לְעָלְמִין:
7 סַרְהַב עֲנֵי יָתִי יְיָ רְגִיגַת לָךְ רוּחִי לָא תְסַלֵק שְׁכִנְתָּךְ מִנִי וְאִתְמְתִילֵית עִם נָחֲתֵי גוֹב בֵית קְבוּרְתָּא:
8 אַשְׁמִיעַ יָתִי בִּצְפַר טוּבָךְ אֲרוּם בְּמֵימְרָךְ סִבְרֵית אוֹדַע יְתִי אוֹרַח דְנָן דַאֲהַלֵךְ אֲרוּם לְוָתָךְ זְקַפֵית נַפְשִׁי בִּצְלוֹ:
9 פְּצֵי יָתִי מִבַּעֲלֵי דְבָבַי יְיָ מֵימְרָךְ מַנֵיתִי לְפָרִיק:
10 אַלֵף יָתִי לְמֶעְבַּד רְעוּתָךְ אֲרוּם אַנְתְּ אֱלָהִי רוּחַ קוּדְשָׁךְ טָבָא תְּדַבֵּר יָתִי בְּאַרְעָא תְּרִיץ:
11 מִן בִּגְלַל שְׁמָךְ יְיָ תְּקַיְמִנַנִי בְּצִדְקָךְ אַפֵּק מִן עָקְתָא נַפְשִׁי:
12 וּבְחַסְדָךְ תְּמַגֵר בַּעֲלֵי דְבָבִי וּתְהוֹבַד כָּל מְעִיקֵי נַפְשִׁי אֲרוּם אֲנָא עַבְדָךְ: