Capítulo 138
1 עַל יַד דָוִד אוֹדֵי קֳדָמָךְ יְיָ בְּכָל לִבִּי קֳבֵל דַיָנַיָא אֲזַמְרִנָךְ:
2 אֶסְגוֹד קֳדָם הֵיכְלָא דְקוּדְשָׁךְ וְאוֹדֵי יַת שְׁמָךְ מְטוּל טוּבָךְ וּמְטוּל קוּשְׁטָךְ אֲרוּם אַסְגֵיתָא עַל כָּל שְׁמָךְ מֵימְרֵי תוּשְׁבַּחְתָּךְ:
3 בְּיוֹמָא דִי קְרֵית עֲנֵי יָתִי אַסְגַעְתָּנִי בְּנַפְשִׁי עוּשְׁנָא:
4 יוֹדוּן קֳדָמָךְ יְיָ כָּל מַלְכֵי אַרְעָא אֲרוּם שְׁמַעוּ מֵימְרֵי תוּשְׁבַּחְתָּךְ:
5 וִישַׁבְּחוּן עַל כְּבִישֵׁי יְיָ אֲרוּם רַב אַיְקָרָא דַיָי:
6 אֲרוּם רָמָא יְיָ וּמַכִּיךְ יֶחֱמֵי לְטָב וְגֵיוְתָנָא מִן שְׁמַיָא רְחִיקִין יַמְאֵיךְ:
7 אִין אֲהַלֵךְ בִּמְצַע עָקְתָא תְּחַיִנַנִי עַל נְחִירָא בַּעֲלֵי דְבָבַי תּוֹשִׁיט אַיְדָךְ לְחַבָּלוּתְהוֹן וְתִפְרְקִנַנִי יְמִינָךְ:
8 יְיָ יַשְׁלִים בִּישָׁא עֲלַוֵיהוֹן אַמְטוּלְתִּי יְיָ טוּבָךְ לַעֲלַם עוֹבָדֵי אַיְדָךְ לָא תִשְׁבּוֹק: