Capítulo 136
1 שַׁבַּחוּ קֳדָם יְיָ אֲרוּם טָב אֲרוּם לַעֲלַם טוּבֵיהּ:
2 שַׁבַּחוּ לֶאֱלָהֵי אֳלָהַיָא אֲרוּם לַעֲלַם טוּבֵיהּ:
3 שַׁבַּחוּ לְמָרֵי מָרַיָא אֲרוּם לַעֲלַם טוּבֵיהּ:
4 לַעֲבַד פְּרִישָׁן רַבְרְבָן בִּלְחוֹדֵיהּ אֲרוּם לַעֲלַם טוּבֵיהּ:
5 לַעֲבַד שְׁמַיָא בְּסוּכְלְתָנוּ אֲרוּם לַעֲלַם טוּבֵיהּ:
6 לְרָדֵיד אַרְעָא עֲלַוֵי דְמַיָא אֲרוּם לַעֲלַם טוּבֵיהּ:
7 לַעֲבַד נְהוֹרִין רַבְרְבִין אֲרוּם לַעֲלַם טוּבֵיהּ:
8 יַת שִׁמְשָׁא לְמִשְׁלַט בִּימָמָא אֲרוּם לַעֲלַם טוּבֵיהּ:
9 יַת סִיהֲרָא וְכוֹכְבַיָא לְמִשְׁלַט בְּלֵילְיָא אֲרוּם לַעֲלַם טוּבֵיהּ:
10 לְמָחֵי מִצְרָאֵי בְּמַכְתָּשִׁין קְטַל אֲרוּם לַעֲלַם טוּבֵיהּ:
11 וְאַפֵּיק יִשְׂרָאֵל פָּרִיקִין מִבֵּינֵיהוֹן אֲרוּם לַעֲלַם טוּבֵיהּ:
12 בְּאַיְדָא תַּקִיפָא וּבִדְרַע מְרַמְמָא אֲרוּם לַעֲלַם טוּבֵיהּ:
13 לְצָלַח יַמָא דְסוּף לְצָלוּחָא אֲרוּם לַעֲלַם טוּבֵיהּ:
14 וְאַעְבַר יִשְׂרָאֵל בִּמְצִיעֵיהּ אֲרוּם לַעֲלַם טוּבֵיהּ:
15 וְשַׁנֵק פַּרְעֹה וְחֵילְוָתֵיהּ בְּיַמָא דְסוּף אֲרוּם לַעֲלַם טוּבֵיהּ:
16 לִמְהַלֵךְ עַמֵיהּ בְּמַדְבְּרָא אֲרוּם לַעֲלַם טוּבֵיהּ:
17 לְמָחֵי מַלְכִין רַבְרְבִין אֲרוּם לַעֲלַם טוּבֵיהּ:
18 וּקְטַל מַלְכִין גֵיוְתָנִין אֲרוּם לַעֲלַם טוּבֵיהּ:
19 לְסִיחוֹן מַלְכָּא אֱמוֹרָאָה אֲרוּם לַעֲלַם טוּבֵיהּ:
20 וּלְעוֹג מַלְכָּא דְמַתְנָן אֲרוּם לַעֲלַם טוּבֵיהּ:
21 וִיהַב אַרְעֲהוֹן לְאַחְסָנָא אֲרוּם לַעֲלַם טוּבֵיהּ:
22 אַחְסַנְתָּא לְיִשְׂרָאֵל עַבְדֵיהּ אֲרוּם לַעֲלַם טוּבֵיהּ:
23 בְּאִתְמַכְּכוּתָנָא דְכַר לָנָא קְיָמֵיהּ אֲרוּם לַעֲלַם טוּבֵיהּ:
24 וּפְרִיקָנָא מִן מְעִיקָנָא אֲרוּם לַעֲלַם טוּבֵיהּ:
25 דִיהַב מְזוֹנֵיהּ לְכָל בִּסְרָא אֲרוּם לַעֲלַם טוּבֵיהּ:
26 שַׁבַּחוּ לֵאלָהָא שְׁמַיָא אֲרוּם לַעֲלַם טוּבֵיהּ: