Capítulo 116
1 רְחִימֵת אֲרוּם שְׁמַע יְיָ יַת קָלִי בָּעוּתִי:
2 אֲרוּם אַצְלֵי אוּדְנֵיהּ לִי וּבְיוֹמַי אֲנָא קָרֵי:
3 אַקִיפוּ יָתִי מְרָעֵי מוֹתָא וְעִיקְתִין דְשֵׁיוֹל אַשְׁכְּחוּנִי עִיקְתָא וְדָבוֹנָא אֶשְׁכָּח:
4 וּבִשְׁמָא דַייָ אֶקְרֵי בְּבָעוּ יְיָ שַׁזִיב נַפְשִׁי:
5 חַנָנָא יְיָ וְזַכָּאָה וֵאלָהָנָא מְרַחֵם:
6 נָטֵר שַׁרְגוּגַיָא יְיָ אִתְמַסְכְּנֵית וְלִי חֲמֵי לְמִפְרוֹק:
7 תּוּבִי נַפְשִׁי לְבֵית מְנֻחַיְכִי אֲרוּם מֵימְרָא דַייָ גְמַל טוּבָא עֲלַיְכִי:
8 אֲרוּם פְּצִיתָא נַפְשִׁי מִקְטוֹל יַת עַיְנִי מִן דִמְעֲתָא יַת רִגְלִי מִן לְאִדָחָיָא:
9 אֶתְהַלֵךְ קֳדָם יְיָ בְּאַרְעַת חַיַיָא:
10 הֵימְנֵית אֲרוּם אֲמַלֵל בִּכְנִישַׁת צַדִיקֵי אֲנָא שַׁבְּחִית לַחֲדָא:
11 אֲנָא אֲמַרֵית בְּמֶעֱרְקִי כָּל בְּנֵי נָשָׁא מְכַדְבִין:
12 מָה אֲתִיב קֳדָם יְיָ כָּל גְמוּלָן טָבָן דִילֵיהּ גְמִילִין חִנוּן עֲלָי:
13 כַּסָא דְפוּרְקָנַיָא אֲסוֹבַר לְעַלְמָא דְאָתֵי וּבִשְׁמָא דַייָ אֶקְרֵי:
14 נִדְרַי קֳדָם יְיָ אֲשַׁלֵם אֲתַנֵי כְדוֹן נִסוֹי לְכָל עַמֵיהּ:
15 יַקִיר קֳדָם יְיָ מִיתוּתָא דְמִשְׁתַּלְחָא לַחֲסִידוֹי:
16 בְּבָעוּ יְיָ אֲרוּם אֲנָא עַבְדָךְ אֲנָא עַבְדָךְ בַּר אַמְתָךְ שֵׁרִיתָא לְשׁוּלְשְׁלְוָתָי:
17 לָךְ אֶדְבַּח דְבַח נִכְסְתָא וּבִשְׁמָא דַייָ אֶקְרֵי:
18 נִדְרַי קֳדָם יְיָ אֲשַׁלֵם אֲתַנֵי כְדוּן נִסוֹי לְכָל עַמֵיהּ:
19 בְּדָרָתָא דִי בְּבֵית מַקְדַשׁ אֱלָהָנָא בִּמְצָעַיְכִי יְרוּשְׁלֵם הַלְלוּיָהּ: