Oedipus
Oedipus Iocasta
1 Iam nocte Titan dubius expulsa redit
2 et nube maestus squalida exoritur iubar,
3 lumenque flamma triste luctifica gerens
4 prospiciet avida peste solatas domos,
5 stragemque quam nox fecit ostendet dies.
6 Quisquamne regno gaudet? O fallax bonum,
7 quantum malorum fronte quam blanda tegis!
8 ut alta ventos semper excipiunt iuga
9 rupemque saxis vasta dirimentem freta
10 quamvis quieti verberat fluctus maris,
11 imperia sic excelsa Fortunae obiacent.
12 quam bene parentis sceptra Polybi fugerant!
13 curis solutus exul, intrepidus, vagans
14 (caelum deosque testor) in regnum incidi:
15 infanda timeo: ne mea genitor manu
16 perimatur; hoc me Delphicae laurus monent,
17 aliudque nobis maius indicunt scelus.
18 est maius aliquod patre mactato nefas?
19 pro misera pietas (eloqui fatum pudet»,
20 thalamos parentis Phoebus et diros toros
21 gnato minatur impia incestos face;
22 hic me paternis expulit regnis timor.
23 non ego penates profugus excessi meos:
24 parum ipse fidens mihimet in tuto tua,
25 natura, posui iura. cum magna horreas,
26 quod posse fieri non putes metuas tamen:
27 cuncta expavesco meque non credo mihi.
28 Iam iam aliquid in nos fata moliri parant,
29 nam quid rear quod ista Cadmeae lues
30 infesta genti strage tam late edita
31 mihi parcit uni? cui reservamur malo?
32 inter ruinas urbis et semper novis
33 deflenda lacrimis funera ac populi struem
34 incolumis asto— scilicet Phoebi reus.
35 sperare poteras sceleribus tantis dari
36 regnum salubre? fecimus caelum nocens.
37 Non aura gelido lenis afflatu fovet
38 anhela flammis corda, non Zephyri leves
39 spirant, sed ignes auget aestiferi canis
40 Titan, leonis terga Nemeaei premens.
41 deseruit amnes umor atque herbas color
42 aretque Dirce, tenuis Ismenos fluit
43 et tinguit inopi nuda vix unda vada.
44 obscura caelo labitur Phoebi soror,
45 tristisque mundus nubilo pallet die.
46 nullum serenis noctibus sidus micat,
47 sed gravis et ater incubat terris vapor:
48 obtexit arces caelitum ac summas domos
49 inferna facies, denegat fructum Ceres
50 adulta, et altis flava cum spicis tremat,
51 arente culmo sterilis emoritur seges,
52 nec ulla pars immunis exitio vacat,
53 sed omnis aetas pariter et sexus ruit,
54 iuvenesque senibus iungit et gnatis patres
55 funesta pestis, una fax thalamos cremat
56 fletuque acerbo funera et questu carent,
57 quin ipsa tanti pervicax clades mali
58 siccavit oculos, quodque in extremis solet
59 periere lacrimae: portat hunc aeger parens
60 supremum ad ignem, mater hunc amens gerit
61 properatque ut alium repetat in eundem rogum,
62 quin luctu in ipso luctus exoritur novus
63 novaeque circa funus exsequiae cadunt,
64 tum propria flammis corpora alienis cremant;
65 diripitur ignis: nullus est miseris pudor.
66 non ossa tumuli sancta discreti tegunt:
67 arsisse satis est— pars quota in cineres abit?
68 dest terra tumulis, iam rogos silvae negant,
69 non vota, non ars ulla correptos levant:
70 cadunt medentes, morbus auxilium trahit.
71 Adfusus aris supplices tendo manus
72 matura poscens fata, praecurram ut prior
73 patriam ruentem neve post omnis cadam
74 fiamque regni funus extremum mei.
75 o saeva nimium numina, o fatum grave!
76 negatur uni nempe in hoc populo mihi
77 mors tam parata? sperne letali manu
78 contacta regna, linque lacrimas, funera,
79 tabifica caeli vitia quae tecum invehis
80 infaustus hospes, profuge iamdudum ocius —
81 vel ad parentes.
Ioc.
81b Quid iuvat, coniunx, mala
82 gravare questu? regium hoc ipsum reor:
83 adversa capere, quoque sit dubius magis
84 status et cadentis imperi moles labet,
85 hoc stare certo pressius fortem gradu;
86 haud est virile terga Fortunae dare.
Oed.
87 Abest pavoris crimen ac probrum procul,
88 virtusque nostra nescit ignavos metus:
89 si tela contra stricta, si vis horrida
90 Mavortis in me rueret— adversus feros
91 audax Gigantas obvias ferrem manus.
92 nec Sphinga caecis verba nectentem modis
93 fugi: cruentos vatis infandae tuli
94 rictus et albens ossibus sparsis solum;
95 cumque e superna rupe iam praedae imminens
96 aptaret alas verbera et caudae movens
97 saevi leonis more conciperet minas,
98 carmen poposci: sonuit horrendum insuper,
99 crepuere malae, saxaque impatiens morae
100 revulsit ungui viscera expectans mea;
101 nodosa sortis verba et implexos dolos
102 ac triste carmen alitis solvi ferae.
Ioc.
103 Quid sera mortis vota nunc demens facis?
104 licuit perire, laudis hoc pretium tibi
105 sceptrum et peremptae Sphingis haec merces datur.
Oed.
106 Ille, ille dirus callidi monstri cinis
107 in nos rebellat, illa nunc Thebas lues
108 perempta perdit, una iam superest salus,
109 si quam salutis Phoebus ostendit viam.
Chorus Thebanorvm
110 Occidis, Cadmi generosa proles,
111 urbe cum tota; viduas colonis
112 respicis terras, miseranda Thebe.
113 carpitur leto tuus ille, Bacche,
114 miles, extremos comes usque ad Indos,
115 ausus Eois equitare campis
116 figere et mundo tua signa primo:
117 cinnami silvis Arabas beatos
118 vidit et versos equites, sagittis'
119 terga fallacis metuenda Parthi;
120 litus intravit pelagi rubentis:
121 promit hinc ortus aperitque lucem
122 Phoebus et flamma propiore nudos
123 inficit Indos.
124 Stirpis invictae genus interimus,
125 labimur saevo rapiente fato;
126 ducitur semper nova pompa Morti:
127 longus ad manes properatur ordo
128 agminis maesti, seriesque tristis
129 haeret et turbae tumulos petenti
130 non satis septem patuere portae.
131 stat gravis strages premiturque iuncto
132 funere funus.
135 Colla facturus steterat sacerdos:
136 dum manus certum parat alta vulnus,
137 aureo taurus rutilante cornu
138 labitur segnis; patuit sub ictu
139 ponderis vasti resoluta cervix:
140 nec cruor ferrum maculavit: alta
141 turpis est plaga sanies profusa.
142 segnior cursu sonipes in ipso
143 concidit gyro dominumque prono
144 prodidit armo.
133 Prima vis tardas tetigit bidentes:
134 laniger pingues male carpsit herbas;
146 taurus armento pereunte marcet:
147 deficit pastor grege deminuto
148 tabidos inter moriens iuvencos.
145 incubant agris pecudes relictae;
149 non lupos cervi metuunt rapaces,
150 cessat irati fremitus leonis,
151 nulla villosis feritas in ursis;
152 perdidit pestem latebrosa serpens:
153 aret et sicco moritur veneno.
154 Non silva sua decorata coma
155 fundit opacas montibus umbras,
156 non rura virent ubere glebae,
157 non plena suo vitis Baccho
158 bracchia curvat:
159 omnia nostrum sensere malum.
160 Rupere Erebi claustra profundi
161 turba sororum face Tartarea
162 Phlegethonque suam mutat ripam:
163 miscuit undis Styga Sidoniis.
164 Mors atra avidos oris hiatus
165 pandit et omnis explicat alas;
166 quique capaci turbida cumba
167 flumina servat durus senio
168 navita crudo vix assiduo
169 bracchia conto lassata refert,
170 fessus turbam vectare novam.
171 quin Taenarii vincula ferri
172 rupisse canem fama et nostris
173 errare locis, mugisse solum,
174 vaga per lucos simulacra virum
174l * […]
175 maiora viris, bis Cadmeum
176 nive discussa tremuisse nemus,
177 bis turbatam sanguine Dircen,
178 nocte silenti
179 Amphionios ululasse canes.
180 O dira novi facies leti,
181 gravior leto:
182 piger ignavos alligat artus
183 languor, et aegro rubor in vultu,
184 maculaeque cutem sparsere leves;
184b tum vapor ipsam
185 corporis arcem flammeus urit
186 multoque genas sanguine tendit,
187 oculique rigent, resonant aures
188 stilla tque niger naris aduncae
190 cruor et venas rumpit hiantes;
191 intima creber viscera quassat
187b gemitus stridens, et sacer ignis
192b pascitur artus iamque amplexu
193 frigida presso saxa fatigant;
194 quos liberior domus elato
195 custode sinit, petits fontes
196 aliturque sitis latice ingesto.
197 prostrata iacet turba per aras
198 oratque mori: solum hoc faciles
199 tribuere dei; delubra petunt
200 haut ut voto numina placent,
201 sed iuvat ipsos satiare deos.
Oedipus Chorus Creo
202 Quisnam ille propero regiam gressu petit?
203 adestne clarus anguine ac factis Creo
204 an aeger animus falsa pro veris videt?
Chor.
205 Adest petitus omnibus votis Creo.
Oed.
206 Horrore quatior, fata quo vergant timens,
207 trepidumque gemino pectus affectu labat:
208 ubi laeta duris mixta in ambiguo iacent,
209 incertus animus scire cum cupiat timet.
210 Germane nostrae coniugis, fessis opem
211 si quam reportas, voce properata edoce.
Cr.
212 Responsa dubia sorte perplexa iacent.
Oed.
213 Dubiam salutem qui dat adflictis negat.
Cr.
214 Ambage flexa Delphico mos est deo
215 arcana tegere.
Oed.
215b Fare, sit dubium licet:
216 ambigua soli noscere Oedipodae datur.
Cr.
217 Caedem expiari regiam exilio deus,
218 et interemptum Laium ulcisci iubet:
219 non ante caelo lucidus curret dies
220 haustusque tutos aetheris puri dabit.
Oed.
221 Et quis peremptor induti regis fuit?
222 quem memoret ede Phoebus, ut poenas luat.
Cr.
223 Sit precor dixisse tutum visu et auditu horrida;
224 torpor insedit per artus, frigidus sanguis coit.
225 ut sacrata templa Phoebi supplici intravi pede
226 et pias numen precatus rite summisi manus,
227 gemina Parnasi nivalis arx trucem fremitum dedit;
228 imminens Phoebea laurus tremuit et movit comam
229 ac repente sancta fontis lympha Castalii stetit,
230 incipit Letoa vates spargere horrentes comas
231 et pati commota Phoebum; contigit nondum specum,
232 emicat vasto fragore maior humano sonus:
233 mitia Cadmeis remeabunt sidera Thebis,
234 si profugus Dircen Ismenida liqueris hospes
235 regis caede nocens, Phoebo iam notus et infans.
236 nec tibi longa manent sceleratae gaudia caedis:
237 tecum bella geres, natis quoque bella relinquens
238 turpia, maternos iterum revolutus in ortus.
Oed.
239 Quod facere monitu caelitum iussus paro,
240 functi cineribus regis hoc decuit dari,
241 ne sancta quisquam sceptra violaret dolo.
242 regi tuenda maxime regum est salus:
243 curat peremptum nemo quem incolumem timet.
Cr.
244 Curam perempti maior excussit timor.
Oed.
245 Pium prohibuit ullus officium metus?
Cr.
246 Sphinx et nefandi carminis tristes minae.
Oed.
247 Nunc expietur numinum imperio scelus.
248 Quisquis deorum regna placatus vides:
249 tu, tu penes quem iura praecipitis poli
250 tuque, o sereni maximum mundi decus,
251 bis sena cursu signa qui vario legis,
252 qui tarda celeri saecula evolvis rota,
253 sororque fratri semper occurrens tuo,
254 noctivaga Phoebe, quique ventorum potens
255 aequor per altum caerulos currus agis,
256 et qui carentis luce disponis domos,
257 adeste: cuius Laius dextra occidit,
258 hunc non quieta tecta, non fidi lares,
259 non hospitalis exulem tellus ferat;
260 thalamis pudendis doleat et prole impia;
261 hic et parentem dextera perimat sua, ,
262 faciatque (num quid gravius optari potest?)
263 quicquid ego fugi— non erit veniae locus:
264 per regna iuro quaeque nunc hospes gero
265 et quae reliqui perque penetrales deos,
266 per te, pater Neptune, qui fluctu brevi
267 utrimque nostro geminus alludis solo;
268 et ipse nostris vocibus testis veni,
269 fatidica vatis ora Cirrhaeae movens:
270 ita molle senium ducat et summum diem
271 securus alto reddat in solio parens
272 solasque Merope noverit Polybi faces,
273 ut nulla sontem gratia eripiet mihi.
274 Sed quo nefandum facinus admissum loco est,
275 memorate: aperto Marte an insidiis iacet?
Cr.
276 Frondifera sanctae nemora Castaliae petens
277 calcavit artis obsitum dumis iter,
278 trigemina qua se spargit in campos via.
279 secat una gratum Phocidos Baccho solum,
280 unde altus arva deserit, caelum petens,
281 clementer acto colle Parnasos biceps;
282 at una bimaris Sisyphi terras adit;
283 Olenia in arva tertius trames cava
284 convalle serpens tangit errantes aquas
285 gelidumque dirimit amnis i Elei vadum:
286 hic pace fretum subita praedonum manus
287 aggressa ferro facinus occultum tulit.
288 In tempore ipso sorte Phoebea excitus
289 Tiresia tremulo tardus accelerat genu
290 comesque Manto luce viduatum trahens.
Oedipus Tiresias Manto
Oed.
291 Sacrate di vis, proximum Phoebo caput,
292 responsa solve; fare, quem poenae petant.
Teir.
293 Quod tarda fatu est lingua, quod quaerit moras
294 haut te quidem, magnanime, mirari addecet:
295 visu carent! magna pars veri latet.
296 sed quo vocat me patria, quo Phoebus, sequar:
297 fata eruantur; si foret viridis mihi
298 calidusque sanguis, pectore exciperem deum.
299 appellite aris candidum tergo bovem
300 curvoque numquam colla depressam iugo.
301 tu lucis inopem, gnata, genitorem regens
302 manifesta sacri signa fatidici refer.
Man.
303 Opima sanctas victima ante aras stetit.
Tir.
304 In vota superos voce sollemni voca
305 arasque dono turis Eoi extrue.
Man.
306 Iam tura sacris caelitum ingessi focis.
Tir.
307 Quid flamma? largas iamne comprendit dapes?
Man.
308 Subito refulsit lumine et subito occidit.
Tir.
309 Vtrumne clarus ignis et nitidus stetit
310 rectusque purum verticem caelo tulit
311 et summam in auras fusus explicuit comam?
312 an latera circa serpit incertus viae
313 et fluctuante turbidus fumo labat?
Man.
314 Non una facies mobilis flammae fuit:
315 imbrifera qualis implicat varios sibi
316 Iris colores, parte quae magna poli
317 curvata picto nuntiat nimbos sinu
318 (quis desit illi quive sit dubites color).
319 caerulea fulvis mixta oberravit notis,
320 sanguinea rursus; ultima in tenebras abit.
321 sed ecce pugnax ignis in partes duas
322 discedit et se scindit unius sacri
323 discors favilla— genitor, horresco intuens:
324 libata Bacchi dona permutat cruor
325 ambitque densus regium fumus caput
326 ipsosque circa spissior vultus sedet
327 et nube densa sordidam lucem abdidit.
328 quid sit, parens, effare.
Tir.
328b Quid fari queam
329 inter tumultus mentis attonitae vagus?
330 quidnam loquar? sunt dira, sed in alto mala;
331 solet ira certis numinum ostendi notis:
332 quid istud est quod esse prolatum volunt
333 iterumque nolunt et truces iras tegunt?
334 pudet deos nescio quid. huc propere admove
335 et sparge salsa colla taurorum mola.
336 placidone vultu sacra et admotas manus
337 patiuntur?
Man.
337b Altum taurus attollens caput
338 primos ad ortus positus expavit diem
339 trepidusque vultum obliquat et radios fugit.
Tir.
340 Vnone terram vulnere afflicti petunt?
Man.
341 Iuvenca ferro semet imposito induit
342 et vulnere uno cecidit, at taurus duos
343 perpessus ictus huc et huc dubius ruit
344 animamque fessus vix reluctantem exprimit.
345 TIR. Vtrum citatus vulnere angusto micat
346 an lentus altas irrigat plagas cruor?
Man.
347 Huius per ipsam qua patet pectus viam
348 effusus amnis, huius exiguo graves
349 maculantur ictus imbre; sed versus retro
350 per ora multus sanguis atque oculos redit.
Tir.
351 Infausta magnos sacra terrores cient.
352 sed ede certas viscerum nobis notas.
Man.
353 Genitor, quid hoc est? non levi motu, ut solent,
354 agitata trepidant exta, sed totas manus
355 quatiunt novusque prosilit venis cruor.
356 cor marcet aegrum penitus ac mersum latet
357 liventque venae; magna pars fibris abest
358 et felle nigro tabidum spumat iecur,
359 ac (semper omen unico imperio grave)
360 en capita paribus bina consurgunt toris;
361 sed utrumque caesum tenuis abscondit caput
362 membrana: latebram rebus occultis negans
363 hostile valido robore insurgit latus
364 septemque venas tendit; has omnis retro
365 prohibens reverti limes oblicus secat.
366 mutatus ordo est, sede nil propria iacet,
367 sed acta retro cuncta: non animae capax
368 in parte dextra pulmo sanguineus iacet,
369 non laeva cordi regio, non molli ambitu
370 omenta pingues visceri obtendunt sinus:
371 natura versa est, nulla lex utero manet,
372 scrutemur, unde tantus hic extis rigor.
373 quod hoc nefas? conceptus innuptae bovis..
374 nec more solito positus alieno in loco,
375 implet parentem; membra cum gemitu movet,
376 rigore tremulo debiles artus micant;
377 infecit atras lividus fibras cruor
378 temptantque turpes mobilem trunci gradum,
379 et inane surgit corpus ac sacros petit
380 cornu ministros; viscera effugiunt manum.
381 neque ista, quae te pepulit, armenti gravis
382 vox est nec usquam territi resonant greges:
383 immugit aris ignis et trepidant foci.
Oed.
384 Quid ista sacri signa terrifici ferant
385 exprome: voces aure non timida hauriam.
386 [solent extrema facere securos mala.]
Tir.
387 His invidebis quibus opem quaeris malis.
Oed.
388 Memora quod unum scire caelicolae volunt,
389 contaminarit rege quis caeso manus.
Tir.
390 Nec alta caeli quae levi pinna secant
391 nec fibra vivis rapta pectoribus potest
392 ciere nomen; alia temptanda est via:
393 ipse evocandus noctis aeternae plagis,
394 emissus Erebo ut caedis auctorem indicet.
395 reseranda tellus, Ditis inplacabile
396 numen precandum, populus infernae Stygia
397 huc extrahendus: ede cui mandes sacrum;
398 nam te, penes quem summa regnorum, nefas
399 invisere umbras.
Oed.
399b Te, Creo, hic poscit labor,
400 ad quem secundum regna respiciunt mea.
Tir.
401 Dum nos profundae claustra laxamus Stygis,
402 populare Bacchi laudibus carmen sonet.
Chorus
403 Effusam redimite comam nutante corymbo,
404 mollia Nysaeis armati bracchia thyrsis!
405 Lucidum caeli decus, huc ades
406 votis quae tibi nobiles
407 Thebae, Bacche, tuae
408 palmis supplicibus ferunt.
409 Huc adverte favens virgineum caput,
410 vultu sidereo discute nubila
411 et tristes Erebi minas
412 avidumque fatum.
413 Te decet cingi comam floribus vernis,
414 te caput Tyria cohibere mitra
415 hederave mollem
415b bacifera religare frontem.
416 Spargere effusos sine lege crines,
417 rursus adducto revocare nodo;
418 qualis iratam metuens novercam
419 creveras falsos imitatus artus,
420 crine flaventi simulata virgo,
421 lutea vestem retinente zona:
422 inde tam molles placuere cultus
423 et sinus laxi fluidumque syrma.
424 Vidit aurato residere curru,
425 veste cum longa tegeres leones,
426 omnis Eoae plaga vasta terrae,
427 qui bibit Gangen niveumque quisquis
428 frangit Araxen.
429 Te senior turpi sequitur Silenus asello,
430 turgida pampineis redimitus tempora sortis;
431 condita lascivi deducunt orgia mystae.
432 Te Bassaridum comitata cohors
433 nunc Edono pede pulsavit
434 sola Pangaeo, nunc Threicio
435 vertice Pindi; nunc Cadmeas
436 inter matres impia maenas
437 comes Ogygio venit laccho,
438 nebride sacra praecincta latus
441 thyrsumque levem vibrante manu,
439 tibi commotae pectora matres
439b fudere comam.
440 iam post laceros Pentheos artus
442 thyades, oestro membra remissae,
443 velut ignotum videre nefas.
445 Ponti regna tenet nitidi matertera Bacchi
446 Nereidumque choris Cadmeia cingitur Ino;
447 ius habet in fluctus magni puer advena ponti,
448 cognatus Bacchi, numen non vile Palaemon.
449 Te Tyrrhena, puer, rapuit manus,
450 at tumidum Nereus posuit mare,
451 caerula cum pratis mutat freta:
452 hinc verno platanus folio viret
453 et Phoebo laurus carum nemus;
454 garrula per ramos avis obstrepit;
455 vivaces hederas remus tenet,
456 summa ligat vitis carchesia..
457 Idaeus prora fremuit leo,
458 tigris puppe sedet Gangetica.
459 Tum pirata freto pavidus natat,
460 et nova demersos facies habet:
461 bracchia prima cadunt praedonibus
462 inlisumque utero pectus coit,
463 parvula dependet lateri manus
464 et dorso fluctum curvo subit,
465 lunata scindit cauda mare:
466a et sequitur curvus fugientia
466b carbasa delphin.
467 Divite Pactolos vexit te Lydius unda,
468 aurea torrenti deducens flumina ripa;
469 laxavit victos arcus Geticasque sagittas
470 lactea Massagetes qui pocula sanguine miscet;
471 regna securigeri Bacchum sensere Lycurgi;
472 sensere terrae † Zalacum feroces
473 et quos vicinus Boreas ferit
474 arva mutantes quasque Maeotis
475 alluit gentes frigido fluctu
476 quasque despectat
476b vertice summo
477 sidus Arcadium geminumque plaustrum.
478 Ille dispersos domuit Gelonos.
479 arma detraxit trucibus puellis:
480 ore deiecto petiere terram
481 Thermodontiacae catervae.
482 positisque tandem levibus sagittis
483 Maenades factae.
484 sacer Cithaeron sanguine undavit
485 Ophioniaque caede;
486 Proetides silvas petiere, et Argos
487 praesente Bacchum coluit noverca.
488 Naxos Aegaeo redimita ponto
489 tradidit thalamis relictam
490 virginem, meliore pensans
490b damnum marito:
491 pumice ex sicco […]
492 fluxit Nyctelius latex;
493 garruli gramen secuere rivi,
494 conbibit dulces humus alta sucos
495 niveique lactis candidos fontes
496 et mixta odoro Lesbia cum thymo.
497 Ducitur magno nova nupta caelo:
498 solemne Phoebus carmen
499 infusis humero capillis
500 cantat et geminus Cupido
501 concutit taedas.
502 telum deposuit Iuppiter igneum
503 oditque Baccho veniente fulmen.
504 Lucida dum current annosi sidera mundi,
505 Oceanus clausum dum fluctibus ambiet orbem
506 Lunaque dimissos dum plena recolliget ignes,
507 dum matutinos praedicet Lucifer ortus
508 altaque caeruleum dum Nerea nesciet Arctos,
509 candida formonsi venerabimur ora Lyaei.
Oedipus Creo
510 Etsi ipse vultus flebiles praefert notas,
510b exprome cuius capite placemus deos.
Cr.
511 Fari iubes tacere quae suadet metus.
Oed.
512 Si te luentes non satis Thebae movent,
513 at sceptra moveant lapsa cognatae domus.
Cr.
514 Nescisse cupies nosse quae nimium expetis.
Oed.
515 Iners malorum remedium ignorantia est.
516 itane et salutis publicae indicium obrues?
Cr.
517 Vbi turpis est medicina, sanari piget.
Oed.
518 Audita fare, vel malo domitus gravi
519 quid arma possint regis irati scies.
Cr.
520 Odere reges dicta quae dici iubent.
Oed.
521 Mittens Erebo vile pro cunctis caput,
522 arcana sacri voce ni retegis tua.
Cr.
523 Tacere liceat, ulla libertas minor
524 a rege petitur?
Oed.
524b Saepe vel lingua magis
525 regi atque regno muta libertas obest.
Cr.
526 Vbi non licet tacere, quid cuiquam licet?
Oed.
527 Imperia solvit qui tacet iussus loqui.
Cr.
528 Coacta verba placidus accipias precor.
Oed.
529 Vlline poena vocis expressae fuit?
Cr.
530 Est procul ab urbe lucus ilicibus niger,
531 Dircaea circa vallis inriguae loca.
532 cupressus altis exerens silvis caput
533 virente semper alligat trunco nemus,
534 curvosque tendit quercus et putres situ
535 annosa ramos: huius abrupit latus
536 edax vetustas; illa, iam fessa cadens
537 radice, fulta pendet aliena trabe,
538 amara bacas laurus et tiliae leves
539 et Paphia myrtus et per immensum mare
540 motura remos alnus et Phoebo obvia
541 enode Zephyris pinus opponens latus:
542 medio stat ingens arbor atque umbra gravi
543 silvas minores urguet et magno ambitu
544 diffusa ramos una defendit nemus,
545 tristis sub illa, lucis et Phoebi inscius,
546 restagnat umor frigore aeterno rigens;
547 limosa pigrum circumit fontem palus.
548 Huc ut sacerdos intulit senior gradum,
549 haut est moratus: praestitit noctem locus,
550 tum effossa tellus, et super rapti rogis
551 iaciuntur ignes, ipse funesto integit
552 vates amictu corpus et frondem quatit,
553 lugubris imos palla perfundit pedes,
554 squalente cultu maestus ingreditur senex,
555 mortifera canam taxus adstringit comam.
556 nigro bidentes vellere atque atrae boves
557 intro trahuntur, flamma praedatur dapes,
558 vivumque trepidat igne ferali pecus,
559 vocat inde manes teque qui manes regis
560 " et obsidentem claustra Lethaei lacus,
561 carmenque magicum volvit et rabido minax
562 decantat ore quicquid aut placat leves
563 aut cogit umbras; sanguinem libat focis
564 solidasque pecudes urit et multo specum
565 saturat cruore; libat et niveum insuper
566 lactis liquorem, fundit et Bacchum manu
567 laeva canitque rursus ac terram intuens
568 graviore manes voce et attonita citat.
569 latravit Hecates turba; ter valles cavae
570 sonuere maestum, tota succusso solo
571 pulsata tellus. 'audior' vates ait,
572 'rata verba fudi: rumpitur caecum chaos
573 iterque populis Ditis ad superos datur'
574 subsedit omnis silva et erexit comas,
575 duxere rimas robora et totum nemus
576 concussit horror, terra se retro dedit
577 gemuitque penitus: sive temptari abditum
578 Acheron profundum mente non aequa tulit,
579 sive ipsa tellus, ut daret functis viam,
580 compage rupta sonuit; aut ira furens
581 triceps catenas Cerberus movit graves.
582 subito dehiscit terra et immenso sinu
583 laxata patuit— ipse torpentes lacus
584 vidi inter umbras, ipse pallentes deos
585 noctemque veram; gelidus in venis stetit
586 haesitque sanguis, saeva prosiluit cohors
587 et stetit in armis omne vipereum genus,
588 fratrum catervae dente Dircaeo satae.
590 tum torva Erinys sonuit et caecus Furor
591 Horrorque et una quicquid aeternae creant
592 celantque tenebrae: Luctus avellens comam
593 aegreque lassum sustinens Morbus caput,
594 gravis Senectus sibimet et pendens Metus
589 avidumque populi Pestis Ogygii malum.
595 nos liquit animus, ipse quae ritus senis
596 artesque norat stupuit, intrepidus parens
597 audaxque damno convocat Ditis feri
598 exangue vulgus, ilico ut nebulae leves
599 volitant et auras libero caelo trahunt.
600 non tot caducas educat frondes Eryx
601 nec vere flores Hybla tot medio creat,
602 cum examen arto nectitur densum globo,
603 fluctusque non tot frangit Ionium mare,
604 nec tanta gelidi Strymonis fugiens minas
605 permutat hiemes ales et caelum secans
606 tepente Nilo pensat Arctoas nives
607 quot ille populos vatis eduxit sonus.
608 avide latebras nemoris umbrosi petunt
609 animae trementes.; primus emergit solo,
610 dextra ferocem cornibus taurum premens,
611 Zethus, manuque sustinens laeva chelyn
612 qui saxa dulci traxit Amphion sono;
613 interque natos Tantalis tandem suos
614 tuto superba fert caput fastu grave
615 et numerat umbras, peior hac genetrix adest
616 furibunda Agaue, tota quam sequitur manus
617 partita regem: sequitur et Bacchas lacer
618 Pentheus tenetque saevus etiam nunc minas,
619 tandem, vocatus saepe pudibundum extulit
620 caput atque ab omni dissidet turba procul
621 celatque semet (instat et Stygias preces
622 geminat sacerdos, donec in apertum efferat
623 vultus opertos) Laius— fari horreo:
624 stetit per artus sanguine effuso horridus,
625 paedore foedo squalidam obtectus comam,
626 et ore rabido fatur: 'O Cadmi effera,
627 cruore semper laeta cognato domus,
628 vibrate thyrsos, enthea gnatos manu
629 lacerate potius— maximum Thebis scelus
630 maternus amor est. patria, non ira deum
631 sed scelere raperis: non gravi flatu tibi
632 luctificus Auster nec parum pluvio aethere
633 satiata tellus halitu sicco nocet,
634 sed rex cruentus, pretia qui saevae necis
635 sceptra et nefandos occupat thalamos patris
638 egitque in ortus semet et matri impios
639 fetus regessit, quique, vix mos est feris,
640 fratres sibi ipse genuit— implicitum malum
641 magisque monstrum Sphinge perplexum sua.
636 invisa proles: sed tamen peior parens
637 quam gnatus, utero rursus infausto gravis.
642 te, te cruenta sceptra qui dextra geris,
643 te pater inultus urbe cum tota petam
644 et mecum Erinyn pronubam thalami traham,
645 traham sonantis verbera, incestam domum
646 vertam et penates impio Marte obteram.
647 proinde pulsum finibus regem ocius
648 agite exulem quocumque funesto gradu;
649 solum relinquat: vere florifero virens
650 reparabit herbas, spiritus puros dabit
651 vitalis aura, veniet et silvis decor;
652 Letum Luesque, Mors Labor Tabes Dolor,
653 comitatus illo dignus, excedent simul;
654 et ipse rapidis gressibus sedes volet
655 effugere nostras, sed graves pedibus moras
656 addam et tenebo: reptet incertus viae,
657 baculo senili triste praetemptans iter:
658 eripite terras, auferam caelum pater.'
Oed.
659 Et ossa et artus gelidus invasit tremor;
660 quicquid timebam facere fecisse arguor—
661 tori iugalis abnuit Merope nefas,
662 sociata Polybo; sospes absolvit manus
663 Polybus meas: uterque defendit parens
664 caedem stuprumque. quis locus culpae est super?
665 multo ante Thebae Laium amissum gemunt,
666 Bocota gressu quam meo tetigi loca.
667 falsusne senior an deus Thebis gravis?—
668 iam iam tenemus callidi socios doli:
669 mentitur ista praeferens fraudi deos
670 vates, tibique sceptra despondet mea.
Cr.
671 Egone ut sororem regia expelli velim?
672 si me fides sacrata cognati laris
673 non contineret in meo certum statu:
674 tamen ipsa me fortuna terreret nimis
675 sollicita semper, liceat hoc tuto tibi
676 exuere pondus nec recedentem opprimat:
677 iam te minore tutior pones loco.
Oed.
678 Hortaris etiam, sponte deponam ut mea
679 tam gravia regna?
Cr.
679b Suadeam hoc illis ego,
680 in utrumque quis., est liber etiamnum status:
681 tibi iam necesse est ferre fortunam tuam.
Oed.
682 Certissima est regnare cupienti via
683 laudare modica et otium ac somnum loqui;
684 ab inquieto saepe simulatur quies.
Cr.
685 Parumne me tam longa defendit fides?
Oed.
686 Aditum nocendi perfido praestat fides.
Cr.
687 Solutus onere regio regni bonis
688 fruor domusque civium coetu viget,
689 nec ulla vicibus surgit alternis dies
690 qua non propinqui munera ad nostros lares
691 sceptri redundent; cultus, opulentae dapes,
692 donata multis gratia nostra salus:
693 quid tam beatae desse fortunae rear?
Oed.
694 Quod dest: secunda non habent umquam modum.
Cr.
695 Incognita igitur ut nocens causa cadam?
Oed.
696 Num ratio vobis reddita est vitae meae?
697 num audita causa est nostra Tiresiae? tamen
698 sontes videmur, facitis exemplum: sequor.
Cr.
699 Quid si innocens sum?
Oed.
699b Dubia pro certis solent
700 timere reges.
Cr.
700b Qui pavet vanos metus,
701 veros moretur.
Oed.
701b Quisquis in culpa fuit,
702 dimissus odit: omne quod dubium est cadat.
Cr.
703 Sic odia fiunt.
Oed.
703b Odia qui nimium timet
704 regnare nescit: regna custodit metus.
Cr.
705 Qui sceptra duro saevus imperio regit,
706 timet timentes: metus in auctorem redit.
Oed.
707 Servate sontem saxeo. inclusum specu,
708 ipse ad penates regios referam gradum.
Chorus
709 Non tu tantis causa periclis,
710 non hinc Labdacidos petunt
711 fata, sed veteres deum
712 irae secuntur: Castalium nemus
713 umbram Sidonio praebuit hospiti
714 lavitque Dirce Tyrios colonos,
715 ut primum magni natus Agenoris
716 fessus per urbem furta sequi Iovis,
717 sub nostra pavidus constitit arbore
718 praedonem venerans suum
719 monituque Phoebi
720 iussus erranti comes ire vaccae,
721 quam non flexerat
722 vomer aut tardi iuga curva plaustri,
723 deseruit fugas nomenque genti
724 inauspicata de bove tradidit.
725 Tempore ex illo nova monstra semper protulit tellus:
726 aut anguis imis vallibus editus
727 annosa supra robora sibilat
728 superatque pinus:
728b supra Chaonias celsior arbores
729 erexit caeruleum caput,
730 cum maiore sui parte recumberet;
731 aut feta tellus impio partu
732 effudit arma: sonuit reflexo
733 classicum cornu lituusque adunco
734 stridulos cantus elisit aere,
734l * […]
735 ante non linguas agiles et ora
736 vocis ignotae clamore primum
737 hostico experti:
738 Agmina campos cognata tenent,
739 dignaque iacto semine proles,
740 uno aetatem permensa die,
741 post Luciferi nata meatus
742 ante Hesperios occidit ortus,
743 horret tantis advena monstris
744 populique timet bella recentis,
745 donec cecidit saeva iuventus
746 genetrixque suo reddi gremio
747 modo productos vidit alumnos.
748 hac transierit civile nefas!
749 illa Herculeae norint Thebae
750 proelia fratrum.
751 Quid Cadmei fata nepotis,
752 cum vivacis cornua cervi
753 frontem ramis texere novis
754 dominumque canes egere suum?
755 praeceps silvas montesque fugit
756 citus Actaeon agilique magis
757 pede per saltus ac saxa vagus
758 metuit motas zephyris plumas
759 et quae posuit retia vitat:
760 donec placidi fontis in unda
761 cornua vidit vultusque feros;
762 ibi virgineos foverat artus
763 nimium saevi diva pudoris.
Oedipus Iocasta
764 C aras revolvit animus et repetit metus,
765 obisse nostro Laium scelere autumant
766 superi inferique, sed animus contra innocens
767 sibique melius quam deis notus negat,
768 redit memoria tenue per vestigium,
769 cecidisse nostri stipitis pulsu obvium
770 datumque Diti cum prior iuvenem senex,
771 curru superbus, pelleret, Thebis procul
772 Phocasaea trifidas regio qua scindit vias.
773 unanima coniunx, explica errores precor:
774 quae spatia moriens Laius vitae tulit?
775 primone in aevo viridis an fracto occidit?
Ioc.
776 Inter senem iuvenemque, sed propior seni.
Oed.
777 Frequensne turba regium cinxit latus?
Ioc.
778 Plures fefellit error ancipitis viae,
779 paucos fidelis curribus iunxit labor.
Oed.
780 Aliquisne cecidit regio fato comes?
781 ioc. Vnum fides virtusque consortem addidit.
Oed.
782 Teneo nocentem, convenit numerus, locus:
783 sed tempus adde.
Ioc.
783n Decima iam metitur seges.
Senex Corinthius Iocasta
784 Corinthius te populus in regnum vocat
785 patrium: quietem Polybus aeternam obtinet.
Oed.
786 Vt undique in me saeva Fortuna irruit!
787 edissere agedum, quo cadat fato parens.
Sen.
788 Animam senilem mollis exsolvit sopor.
Oed.
789 Genitor sine ulla caede defunctus iacet,
790 testor, licet iam tollere ad caelum pie
791 puras nec ulla scelera metuentes manus,
792 sed pars magis metuenda fatorum manet.
Sen.
793 Omnem paterna regna discutient metum.
Oed.
794 Repetam paterna regna; sed matrem horreo.
Sen.
795 Metuis parentem, quae tuum reditum expetens
796 sollicita pendet?
Oed.
796b Ipsa me pietas fugat.
Sen.
797 Viduam relinques?
Oed.
797b Tangis en ipsos metus.—
Sen.
798 Effare morsus quis premat mentem timor;
799 praestare tacitam regibus soleo fidem.
Oed.
800 Conubia matris Delphico admonitu tremo.
Sen.
801 Timere vana desine et turpes metus
802 depone: Merope vera non fuerat parens.
Oed.
803 Quod subditi vi praemium gnati petit?
Sen.
804 Regum superbam liberi astringunt fidem.
Oed.
805 Secreta thalami fare quo excipias modo.
Sen.
806 Hae te parenti parvulum tradunt manus.
Oed.
807 Tu me parenti tradis; at quis me tibi?
Sen.
808 Pastor nivoso sub Cithaeronis iugo.
Oed.
809 In illa temet nemora quis casus tulit?
Sen.
810 Illo sequebar monte cornigeros greges.
Oed.
811 Nunc adice certas corporis nostri notas.
Sen.
812 Forata ferro gesseras vestigia,
813 tumore nactus nomen ac vitio pedum.
Oed.
814 Quis fuerit ille qui meum dono dedit
815 corpus requiro.
Sen.
815b Regios pavit greges;
816 minor sub illo turba pastorum fuit.
Oed.
817 Eloquere nomen.
Sen.
817b Prima languescit senum
818 memoria longo lassa sublabens situ.
Oed.
819 Potesne facie noscere ac vultu virum?
Sen.
820 Fortasse noscam: saepe iam spatio Obrutam
821 levis exoletam memoriam revocat nota.
Oed.
822 Ad sacra et aras omne compulsum pecus
823 duces sequantur; ite, propere accersite,
824 famuli, penes quos summa consistit gregum.
Sen.
825 Sive ista ratio sive fortuna occulit,
826 latere semper patere quod latuit diu:
827 saepe eruentis veritas patuit malo.
Oed.
828 Malum timeri maius bis aliquod potest?
Sen.
829 Magnum esse magna mole quod petitur scias,
830 concurrit illinc publica, hinc regis salus:
831 utrimque paria; contine medias manus,
832 nihil lacessas, ipsa se fata explicent.
Oed.
833 Non expedit concutere felicem statum:
834 tuto movetur quicquid extremo in loco est.
Sen.
835 Nobilius aliquid genere regali appetis?
836 ne te parentis pigeat inventi vide.
Oed.
837 Vel paenitendi sanguinis quaeram fidem,
838 si nosse certum est. ecce grandaevus senex,
839 arbitria sub quo regii fuerant gregis,
840 Phorbas. refersne nomen aut vultum senis?
Sen.
841 Adlidet animo forma; nec notus satis,
842 nec rursus iste vultus ignotus mihi.
Oed.
843 Regnum optinente Laio famulus greges
844 agitasti opimos sub Cithaeronis plaga?
Phorbas Oedipus
845 Laetus Cithaeron pabulo semper novo
846 aestiva nostro prata summittit gregi.
847 SEN, Noscisne memet?
Phor.
847b Dubitat anceps memoria.
Oed.
848 Huic aliquis a te traditur quondam puer?
849 effare. dubitas? cur genas mutat color?
850 quid verba quaeris? veritas odit moras.
Phor.
851 Obducta longo temporum tractu moves.
Oed.
852 Fatere, ne te .cogat ad verum dolor.
Phor.
853 Inutile isti munus infantis dedi:
854 non potuit ille luce, non caelo frui.
Sen.
855 Procul sit omen. vivit et vivat precor.
Oed.
856 Superesse quare traditum infantem negas?
Phor.
857 Ferrum per ambos tenue transactum pedes
858 ligabat artus, vulneri innatus tumor
859 puerile foeda corpus urebat lue.
Oed.
860 Quid quaeris ultra? fata iam accedunt prope.
861 quis fuerit infans edoce.
Phor.
861b Prohibet fides.
Oed.
862 Huc aliquis ignem! flamma iam excutiet fidem.
Phor.
863 Per tam cruentas vera quaerentur vias?
864 ignosce quaeso.
Oed.
864b Si ferus videor tibi
865 et impotens, parata vindicta in manu est:
866 dic vera: quisnam? quove generatus patre?
867 qua matre genitus?
Phor.
867b coniuge est genitus tua.
Oed.
868 Dehisce, tellus, tuque tenebrarum potens,
869 m Tartara ima, rector umbrarum, rape
870 retro reversus generis ac stirpis vices.
871 congerite, cives, saxa in infandum caput,
872 mactate telis: me petat ferro parens,
873 me gnatus, in me coniuges arment manus
874 fratresque, et aeger populus ereptos rogis
875 iaculetur ignes, saeculi crimen vagor,
876 odium deorum, iuris exitium sacri,
877 qua luce primum spiritus hausi rudes
878 iam morte dignus, redde nunc animos † acres,
879 nunc aliquid aude sceleribus dignum tuis.
880 i, perge, propero regiam gressu pete:
881 gratare matri liberis auctam domum.
Chorus
882 Fata si liceat mihi
883 fingere arbitrio meo,
884 temperem zephyro levi
885 vela, ne pressae gravi
886 spiritu antennae tremant:
887 lenis et modice fluens
888 aura nec vergens latus
889 ducat intrepidam ratem;
890 tuta me media vehat
891 vita decurrens via.
892 Gnosium regem timens
893 astra dum demens petit
894 artibus fisus novis,
895 certat et veras aves
896 vincere ac falsis nimis
897 imperat pinnis puer,
898 nomen eripuit freto;
899 callidus medium senex
900 Daedalus librans iter
901 nube sub media stetit,
902 alitem expectans suum
903 (qualis accipitris minas
904 fugit et sparsos metu
905 conligit fetus avis),
906 donec in ponto manus
907 movit implicitas puer
908 compede audacis viae.
909 quicquid excessit modum
910 pendet instabili loco.
911 Sed quid hoc? postes sonant;
912 maestus en famulus manu
913 regius quassat caput,
914 ede quid portes novi.
Nuntius
915 Praedicta postquam fata et infandum genus
916 deprendit ac se scelere convictum Oedipus
917 damnavit ipse, regiam infestus petens
918 invisa propero tecta penetravit gradu
919 qualis per arva Libycus insanit leo,
920 fulvam minaci fronte concutiens iubam;
921 vultus furore torvus atque oculi truces,
922 gemitus et altum murmur, et gelidus fluit
923 sudor per artus, spumat et volvit minas
924 ac mersus alte magnus exundat dolor.
925 secum ipse saevus grande nescio quid parat
926 suisque fatis simile, 'quid poenas moror?'
927 ait 'hoc scelestum pectus aut ferro petat,
928 aut fervido aliquis igne vel saxo domet.
929 quae tigris aut quae saeva visceribus meis
930 incurret ales? ipse tu scelerum capax,
931 sacer Cithaeron, vel feras in me tuas
932 emitte silvis, mitte vel rabidos canes—
933 nunc redde Agauen. anime, quid mortem times?
934 mors innocentem sola Fortunae eripit.'
935 haec fatus aptat impiam capulo manum
936 ensemque ducit, 'itane? tam magnis breves
937 poenas sceleribus solvis atque uno omnia
938 pensabis ictu? moreris: hoc patri sat est;
939 quid deinde matri, quid male in lucem editis
940 gnatis, quid ipsi, quae tuum magna luit
941 scelus ruina, flebili patriae dabis?
942 solvendo non es: illa quae leges ratas
943 Natura in uno vertit Oedipoda, novos
944 commenta partus, supplices eadem meis
945 novetur. iterum vivere atque iterum mori
946 liceat, renasci semper ut totiens nova
947 supplicia pendas— utere ingenio, miser:
948 quod saepe fieri non potest fiat diu;
949 mors eligatur longa, quaeratur via
950 qua nec sepultis mixtus et vivis tamen
951 exemptus erres: morere, sed citra patrem.
952 cunctaris, anime?' subitus en vultus gravat
953 profusus imber ac rigat fletu genas.
954 'et flere satis est? hactenus fundent levem
955 oculi liquorem? sedibus pulsi suis
956 lacrimas sequantur: di maritales. satin?
957 fodiantur oculi!' dixit atque ira furit:
958 ardent minaces igne truculento genae
959 oculique vix se sedibus retinent suis;
960 violentus audax vultus, iratus ferox,
961 tantum furentis; gemuit et dirum fremens
962 manus in ora torsit, at contra truces
963 oculi steterunt et suam intenti manum
964 ultro insecuntur, vulneri occurrunt suo.
965 scrutatur avidus manibus uncis lumina,
966 radice ab ima funditus vulsos simul
967 evolvit orbes; haeret in vacuo manus
968 et fixa penitus unguibus lacerat cavos
969 alte recessus luminum et inanes sinus,
970 saevitque frustra plusque quam satis est furit.
971 Factum est periclum lucis; attollit caput
972 cavisque lustrans orbibus caeli plagas
973 noctem experitur. quicquid effossis male
974 dependet oculis rumpit, et victor deos
975 conclamat omnis: 'parcite, en, patriae precor:
976 iam iusta feci, debitas poenas tuli;
977 inventa thalamis digna nox tandem meis.
978 rigat ora foedus imber et lacerum caput
979 largum revulsis sanguinem venis vomit.
Chorus
980 Fatis agimur: cedite fatis;
981 non sollicitae possunt curae
982 mutare rati stamina fusi.
983 quicquid patimur mortale genus,
984 quicquid facimus venit ex alto,
985 servatque suae decreta colus.
986 Lachesis nulla revoluta manu.
987 omnia secto tramite vadunt
988 primusque dies dedit extremum:
989 non illa deo vertisse licet
990 quae nexa suis currunt causis.
991 it cuique ratus prece non ulla
992 mobilis ordo: multis ipsum
993 metuisse nocet, multi ad fatum
994 venere suum dum fata timent.
995 Sonuere fores atque ipse suum.
996 duce non ullo molitur iter
997 luminis orbus.
Oedipus Chorus Iocasta
998 Bene habet, peractum est: iusta persolvi patri,
999 iuvant tenebrae, quis deus tandem mihi
1000 placatus atra nube perfundit caput?
1001 quis scelera donat? conscium evasi diem.
1002 nil, parricida, dexterae debes tuae:
1003 lux te refugit, vultus Oedipodam hic decet.
Chor.
1004 En ecce, rapido saeva prosiluit gradu
1005 Iocasta vaecors, qualis attonita et furens
1006 Cadmea mater abstulit gnato caput
1007 sensitque raptum, dubitat afflictum alioqui,
1008 cupit pavetque. iam malis cessit pudor,
1009 set haeret ore prima vox. ioc. Quid te vocem?
1010 gnatumue? dubitas? gnatus es: gnatum pudet?
1011 invite loquere gnate— quo avertis caput
1012 vacuosque vultus?
Oed.
1012b Quis frui tenebris vetat?
1013 quis reddit oculos? matris, en matris sonus!
1014 perdidimus operam, congredi fas amplius
1015 haut est. nefandos dividat vastum mare
1016 dirimatque tellus abdita et quisquis sub hoc
1017 in alia versus sidera ac solem avium
1018 dependet orbis alterum ex nobis ferat.
Ioc.
1019 Fati ista culpa est: nemo fit fato nocens.
Oed.
1020 Iam parce verbis, mater, et parce auribus:
1021 per has reliquias corporis trunci peto,
1022 per inauspicatum sanguinis pignus mei,
1023 per omne nostri nominis fas ac nefas.
Ioc.
1024 Quid, anime, torpes? socia cur scelerum dare
1025 poenas recusas? omne confusum' perit,
1026 , incesta, per te iuris humani decus:
1027 morere et nefastum spiritum ferro exige.
1028 non si ipse mundum concitans divum sator
1029 corusca saeva tela iaculetur manu,
1030 umquam rependam sceleribus poenas pares
1031 mater nefanda, mors placet: mortis via
1032 quaeratur, age dum, commoda matri manum,
1033 si parricida es. restat hoc operae ultimum:
1034 rapiatur ensis; hoc iacet ferro meus
1035 coniunx— quid illum nomine haud vero vocas?
1036 socer est. utrumne pectori infigam meo
1037 telum an patenti conditum iugulo inprimam?
1038 eligere nescis vulnus: hunc, dextra, hunc pete
1039 .uterum capacem, qui virum et gnatos tulit.
Chor.
1040 Iacet perempta. vulneri immoritur manus
1041 ferrumque secum nimius eiecit cruor.
Oed.
1042 Fatidice te, te praesidem et veri deum
1043 compello: solum debui fatis patrem;
1044 bis parricida plusque quam timui nocens
1045 matrem peremi: scelere confecta est meo.
1046 0 Phoebe mendax, fata superavi impia.
1047 Pavitante gressu sequere pallentes vias;
1048 suspensa plantis efferens vestigia
1049 caecam tremente dextera noctem rege.
1050 ingredere praeceps, lubricos ponens gradus,
1051 1 profuge vade— siste, ne in matrem incidas,
1052 quicumque fessi corpore et morbo graves
1053 semanima trahitis pectora, en fugio exeo:
1054 relevate colla, mitior caeli status
1055 posterga sequitur: quisquis exilem iacens ,
1056 animam retentat, vividos haustus levis
1057 concipiat. ite, ferte depositis opem:
1058 mortifera mecum vitia terrarum extraho.
1059 violenta Fata et horridus Morbi tremor,
1060 Maciesque et atra Pestis et rabidus Dolor,
1061 mecum ite, mecum, ducibus his uti libet.