Brutus

M. Tvlli Ciceronis Brvtvs

SIGLA

F = codex Florentinus Magliabecchianus

B = cod. Ottobonianus 1592

O = cod. Ottobonianus 2057 O2 = vetus corrector

G = cod. Neapolitanus iv B 43

H = cod. Neapolitanus iv B 36

M = cod. Mutinensis vi D 6

L = consensus codicum FBOGHM

N = Venetus prior (Ellendt) Nannianus

D = Parisinus 7704

codd. dett. =codices inferioris notae, sive omnes sive plures

vulg. = vulgata lectio

[1] [cap.1] Cum e Cilicia decedens Rhodum venissem et eo mihi de Q. Hortensi morte esset adlatum, opinione omnium maiorem animo cepi dolorem. Nam et amico amisso cum consuetudine iucunda tum multorum officiorum coniunctione me privatum videbam et interitu talis auguris dignitatem nostri conlegi deminutam dolebam; qua in cogitatione et cooptatum me ab eo in conlegium recordabar, in quo iuratus iudicium dignitatis meae fecerat, et inauguratum ab eodem, ex quo augurum institutis in parentis eum loco colere debebam.