---
id: vulgata-clementina-jac-lat-tweedale-2005
type: texto_primario
title: "Epistola Jacobi (Vulgata Clementina)"
subtitle: null
original_title: "Epistola Jacobi"
author: null
year_original: 1592
language: lat
translation:
  - Hieronymus Stridonensis
editor:
  - Michael Tweedale
publisher: null
publication_year: 2005
area: Escrituras
era: século IV d.C. (recensão de 1592)
sistema_referencia: versiculo
abrev: "Jac"
livro_numero: 66
secao: "Epístolas católicas"
canon: "católico (73 livros), sem o apêndice clementino"
scope: "108 versículos em 5 capítulos"
tags:
  - latim
  - vulgata
  - biblia
  - clementina
  - ep-stolas-cat-licas
coautoria:
  - Διαφορεύς
  - Claude Opus 5
status: rascunho
project: pedra_angular
source: "Biblia Sacra juxta Vulgatam Clementinam. Editio electronica: Michael Tweedale et al., The Clementine Text Project (2005; correções posteriores). Arquivo Text/Jac.lat do repositório bitbucket.org/clementinetextproject/text."
license: "domínio público"
publishable: true
related: []
---

# Epistola Jacobi

## Capítulo 1

**1** Jacobus, Dei et Domini nostri Jesu Christi servus, duodecim tribubus, quae sunt in dispersione, salutem. ^jac-1-1

**2** Omne gaudium existimate fratres mei, cum in tentationes varias incideritis : ^jac-1-2

**3** scientes quod probatio fidei vestrae patientiam operatur. ^jac-1-3

**4** Patientia autem opus perfectum habet : ut sitis perfecti et integri in nullo deficientes. ^jac-1-4

**5** Si quis autem vestrum indiget sapientia, postulet a Deo, qui dat omnibus affluenter, et non improperat : et dabitur ei. ^jac-1-5

**6** Postulet autem in fide nihil haesitans : qui enim haesitat, similis est fluctui maris, qui a vento movetur et circumfertur : ^jac-1-6

**7** non ergo aestimet homo ille quod accipiat aliquid a Domino. ^jac-1-7

**8** Vir duplex animo inconstans est in omnibus viis suis. ^jac-1-8

**9** Glorietur autem frater humilis in exaltatione sua : ^jac-1-9

**10** dives autem in humilitate sua, quoniam sicut flos foeni transibit ; ^jac-1-10

**11** exortus est enim sol cum ardore, et arefecit foenum, et flos ejus decidit, et decor vultus ejus deperiit : ita et dives in itineribus suis marcescet. ^jac-1-11

**12** Beatus vir qui suffert tentationem : quoniam cum probatus fuerit, accipiet coronam vitae, quam repromisit Deus diligentibus se. ^jac-1-12

**13** Nemo cum tentatur, dicat quoniam a Deo tentatur : Deus enim intentator malorum est : ipse autem neminem tentat. ^jac-1-13

**14** Unusquisque vero tentatur a concupiscentia sua abstractus, et illectus. ^jac-1-14

**15** Deinde concupiscentia cum conceperit, parit peccatum : peccatum vero cum consummatum fuerit, generat mortem. ^jac-1-15

**16** Nolite itaque errare, fratres mei dilectissimi. ^jac-1-16

**17** Omne datum optimum, et omne donum perfectum desursum est, descendens a Patre luminum, apud quem non est transmutatio, nec vicissitudinis obumbratio. ^jac-1-17

**18** Voluntarie enim genuit nos verbo veritatis, ut simus initium aliquod creaturae ejus. ^jac-1-18

**19** Scitis, fratres mei dilectissimi. Sit autem omnis homo velox ad audiendum : tardus autem ad loquendum, et tardus ad iram. ^jac-1-19

**20** Ira enim viri justitiam Dei non operatur. ^jac-1-20

**21** Propter quod abjicientes omnem immunditiam, et abundantiam malitiae, in mansuetudine suscipite insitum verbum, quod potest salvare animas vestras. ^jac-1-21

**22** Estote autem factores verbi, et non auditores tantum : fallentes vosmetipsos. ^jac-1-22

**23** Quia si quis auditor est verbi, et non factor, hic comparabitur viro consideranti vultum nativitatis suae in speculo : ^jac-1-23

**24** consideravit enim se, et abiit, et statim oblitus est qualis fuerit. ^jac-1-24

**25** Qui autem perspexerit in legem perfectam libertatis, et permanserit in ea, non auditor obliviosus factus, sed factor operis : hic beatus in facto suo erit. ^jac-1-25

**26** Si quis autem putat se religiosum esse, non refrenans linguam suam, sed seducens cor suum, hujus vana est religio. ^jac-1-26

**27** Religio munda et immaculata apud Deum et Patrem, haec est : visitare pupillos et viduas in tribulatione eorum, et immaculatum se custodire ab hoc saeculo. ^jac-1-27

## Capítulo 2

**1** Fratres mei, nolite in personarum acceptione habere fidem Domini nostri Jesu Christi gloriae. ^jac-2-1

**2** Etenim si introierit in conventum vestrum vir aureum annulum habens in veste candida, introierit autem et pauper in sordido habitu, ^jac-2-2

**3** et intendatis in eum qui indutus est veste praeclara, et dixeritis ei : Tu sede hic bene : pauperi autem dicatis : Tu sta illic ; aut sede sub scabello pedum meorum : ^jac-2-3

**4** nonne judicatis apud vosmetipsos, et facti estis judices cogitationum iniquarum ? ^jac-2-4

**5** Audite, fratres mei dilectissimi : nonne Deus elegit pauperes in hoc mundo, divites in fide, et haeredes regni, quod repromisit Deus diligentibus se ? ^jac-2-5

**6** vos autem exhonorastis pauperem. Nonne divites per potentiam opprimunt vos, et ipsi trahunt vos ad judicia ? ^jac-2-6

**7** nonne ipsi blasphemant bonum nomen, quod invocatum est super vos ? ^jac-2-7

**8** Si tamen legem perficitis regalem secundum Scripturas : Diliges proximum tuum sicut teipsum : bene facitis : ^jac-2-8

**9** si autem personas accipitis, peccatum operamini, redarguti a lege quasi transgressores. ^jac-2-9

**10** Quicumque autem totam legem servaverit, offendat autem in uno, factus est omnium reus. ^jac-2-10

**11** Qui enim dixit : Non moechaberis, dixit et : Non occides. Quod si non moechaberis, occides autem, factus es transgressor legis. ^jac-2-11

**12** Sic loquimini, et sic facite sicut per legem libertatis incipientes judicari. ^jac-2-12

**13** Judicium enim sine misericordia illi qui non fecit misericordiam : superexaltat autem misericordia judicium. ^jac-2-13

**14** Quid proderit, fratres mei, si fidem quis dicat se habere, opera autem non habeat ? numquid poterit fides salvare eum ? ^jac-2-14

**15** Si autem frater et soror nudi sint, et indigeant victu quotidiano, ^jac-2-15

**16** dicat autem aliquis ex vobis illis : Ite in pace, calefacimini et saturamini : non dederitis autem eis quae necessaria sunt corpori, quid proderit ? ^jac-2-16

**17** Sic et fides, si non habeat opera, mortua est in semetipsa. ^jac-2-17

**18** Sed dicet quis : Tu fidem habes, et ego opera habeo : ostende mihi fidem tuam sine operibus : et ego ostendam tibi ex operibus fidem meam. ^jac-2-18

**19** Tu credis quoniam unus est Deus : bene facis : et daemones credunt, et contremiscunt. ^jac-2-19

**20** Vis autem scire, o homo inanis, quoniam fides sine operibus mortua est ? ^jac-2-20

**21** Abraham pater noster nonne ex operibus justificatus est, offerens Isaac filium suum super altare ? ^jac-2-21

**22** Vides quoniam fides cooperabatur operibus illius : et ex operibus fides consummata est ? ^jac-2-22

**23** Et suppleta est Scriptura, dicens : Credidit Abraham Deo, et reputatum est illi ad justitiam, et amicus Dei appellatus est. ^jac-2-23

**24** Videtis quoniam ex operibus justificatur homo, et non ex fide tantum ? ^jac-2-24

**25** Similiter et Rahab meretrix, nonne ex operibus justificata est, suscipiens nuntios, et alia via ejiciens ? ^jac-2-25

**26** Sicut enim corpus sine spiritu mortuum est, ita et fides sine operibus mortua est. ^jac-2-26

## Capítulo 3

**1** Nolite plures magistri fieri fratres mei, scientes quoniam majus judicium sumitis. ^jac-3-1

**2** In multis enim offendimus omnes. Si quis in verbo non offendit, hic perfectus est vir : potest etiam freno circumducere totum corpus. ^jac-3-2

**3** Si autem equis frena in ora mittimus ad consentiendum nobis, et omne corpus illorum circumferimus. ^jac-3-3

**4** Ecce et naves, cum magnae sint, et a ventis validis minentur, circumferuntur a modico gubernaculo ubi impetus dirigentis voluerit. ^jac-3-4

**5** Ita et lingua modicum quidem membrum est, et magna exaltat. Ecce quantus ignis quam magnam silvam incendit ! ^jac-3-5

**6** Et lingua ignis est, universitas iniquitatis. Lingua constituitur in membris nostris, quae maculat totum corpus, et inflammat rotam nativitatis nostrae inflammata a gehenna. ^jac-3-6

**7** Omnis enim natura bestiarum, et volucrum, et serpentium, et ceterorum domantur, et domita sunt a natura humana : ^jac-3-7

**8** linguam autem nullus hominum domare potest : inquietum malum, plena veneno mortifero. ^jac-3-8

**9** In ipsa benedicimus Deum et Patrem : et in ipsa maledicimus homines, qui ad similitudinem Dei facti sunt. ^jac-3-9

**10** Ex ipso ore procedit benedictio et maledictio. Non oportet, fratres mei, haec ita fieri. ^jac-3-10

**11** Numquid fons de eodem foramine emanat dulcem et amaram aquam ? ^jac-3-11

**12** Numquid potest, fratres mei, ficus uvas facere, aut vitis ficus ? Sic neque salsa dulcem potest facere aquam. ^jac-3-12

**13** Quis sapiens et disciplinatus inter vos ? Ostendat ex bona conversatione operationem suam in mansuetudine sapientiae. ^jac-3-13

**14** Quod si zelum amarum habetis, et contentiones sint in cordibus vestris : nolite gloriari, et mendaces esse adversus veritatem : ^jac-3-14

**15** non est enim ista sapientia desursum descendens : sed terrena, animalis, diabolica. ^jac-3-15

**16** Ubi enim zelus et contentio, ibi inconstantia et omne opus pravum. ^jac-3-16

**17** Quae autem desursum est sapientia, primum quidem pudica est, deinde pacifica, modesta, suadibilis, bonis consentiens, plena misericordia et fructibus bonis, non judicans, sine simulatione. ^jac-3-17

**18** Fructus autem justitiae, in pace seminatur, facientibus pacem. ^jac-3-18

## Capítulo 4

**1** Unde bella et lites in vobis ? nonne hinc : ex concupiscentiis vestris, quae militant in membris vestris ? ^jac-4-1

**2** concupiscitis, et non habetis : occiditis, et zelatis : et non potestis adipisci : litigatis, et belligeratis, et non habetis, propter quod non postulatis. ^jac-4-2

**3** Petitis, et non accipitis : eo quod male petatis : ut in concupiscentiis vestris insumatis. ^jac-4-3

**4** Adulteri, nescitis quia amicitia hujus mundi inimica est Dei ? quicumque ergo voluerit amicus esse saeculi hujus, inimicus Dei constituitur. ^jac-4-4

**5** An putatis quia inaniter Scriptura dicat : Ad invidiam concupiscit spiritus qui habitat in vobis ? ^jac-4-5

**6** majorem autem dat gratiam. Propter quod dicit : Deus superbis resistit, humilibus autem dat gratiam. ^jac-4-6

**7** Subditi ergo estote Deo, resistite autem diabolo, et fugiet a vobis. ^jac-4-7

**8** Appropinquate Deo, et appropinquabit vobis. Emundate manus, peccatores : et purificate corda, duplices animo. ^jac-4-8

**9** Miseri estote, et lugete, et plorate : risus vester in luctum convertatur, et gaudium in moerorem. ^jac-4-9

**10** Humiliamini in conspectu Domini, et exaltabit vos. ^jac-4-10

**11** Nolite detrahere alterutrum fratres. Qui detrahit fratri, aut qui judicat fratrem suum, detrahit legi, et judicat legem. Si autem judicas legem, non es factor legis, sed judex. ^jac-4-11

**12** Unus est legislator et judex, qui potest perdere et liberare. ^jac-4-12

**13** Tu autem quis es, qui judicas proximum ? Ecce nunc qui dicitis : Hodie, aut crastino ibimus in illam civitatem, et faciemus ibi quidem annum, et mercabimur, et lucrum faciemus : ^jac-4-13

**14** qui ignoratis quid erit in crastino. ^jac-4-14

**15** Quae est enim vita vestra ? vapor est ad modicum parens, et deinceps exterminabitur ; pro eo ut dicatis : Si Dominus voluerit. Et : Si vixerimus, faciemus hoc, aut illud. ^jac-4-15

**16** Nunc autem exsultatis in superbiis vestris. Omnis exsultatio talis, maligna est. ^jac-4-16

**17** Scienti igitur bonum facere, et non facienti, peccatum est illi. ^jac-4-17

## Capítulo 5

**1** Agite nunc divites, plorate ululantes in miseriis vestris, quae advenient vobis. ^jac-5-1

**2** Divitiae vestrae putrefactae sunt, et vestimenta vestra a tineis comesta sunt. ^jac-5-2

**3** Aurum et argentum vestrum aeruginavit : et aerugo eorum in testimonium vobis erit, et manducabit carnes vestras sicut ignis. Thesaurizastis vobis iram in novissimis diebus. ^jac-5-3

**4** Ecce merces operariorum, qui messuerunt regiones vestras, quae fraudata est a vobis, clamat : et clamor eorum in aures Domini Sabaoth introivit. ^jac-5-4

**5** Epulati estis super terram, et in luxuriis enutristis corda vestra in die occisionis. ^jac-5-5

**6** Addixistis, et occidistis justum, et non restitit vobis. ^jac-5-6

**7** Patientes igitur estote, fratres, usque ad adventum Domini. Ecce agricola exspectat pretiosum fructum terrae, patienter ferens donec accipiat temporaneum et serotinum. ^jac-5-7

**8** Patientes igitur estote et vos, et confirmate corda vestra : quoniam adventus Domini appropinquavit. ^jac-5-8

**9** Nolite ingemiscere, fratres, in alterutrum, ut non judicemini. Ecce judex ante januam assistit. ^jac-5-9

**10** Exemplum accipite, fratres, exitus mali, laboris, et patientiae, prophetas qui locuti sunt in nomine Domini. ^jac-5-10

**11** Ecce beatificamus eos qui sustinuerunt. Sufferentiam Job audistis, et finem Domini vidistis, quoniam misericors Dominus est, et miserator. ^jac-5-11

**12** Ante omnia autem, fratres mei, nolite jurare, neque per caelum, neque per terram, neque aliud quodcumque juramentum. Sit autem sermo vester : Est, est : Non, non : ut non sub judicio decidatis. ^jac-5-12

**13** Tristatur aliquis vestrum ? oret. Aequo animo est ? psallat. ^jac-5-13

**14** Infirmatur quis in vobis ? inducat presbyteros ecclesiae, et orent super eum, ungentes eum oleo in nomine Domini : ^jac-5-14

**15** et oratio fidei salvabit infirmum, et alleviabit eum Dominus : et si in peccatis sit, remittentur ei. ^jac-5-15

**16** Confitemini ergo alterutrum peccata vestra, et orate pro invicem ut salvemini : multum enim valet deprecatio justi assidua. ^jac-5-16

**17** Elias homo erat similis nobis passibilis : et oratione oravit ut non plueret super terram, et non pluit annos tres, et menses sex. ^jac-5-17

**18** Et rursum oravit : et caelum dedit pluviam, et terra dedit fructum suum. ^jac-5-18

**19** Fratres mei, si quis ex vobis erraverit a veritate, et converterit quis eum : ^jac-5-19

**20** scire debet quoniam qui converti fecerit peccatorem ab errore viae suae, salvabit animam ejus a morte, et operiet multitudinem peccatorum. ^jac-5-20