---
id: vulgata-clementina-abd-lat-tweedale-2005
type: texto_primario
title: "Abdias (Vulgata Clementina)"
subtitle: null
original_title: "Abdias"
author: null
year_original: 1592
language: lat
translation:
  - Hieronymus Stridonensis
editor:
  - Michael Tweedale
publisher: null
publication_year: 2005
area: Escrituras
era: século IV d.C. (recensão de 1592)
sistema_referencia: versiculo
abrev: "Abd"
livro_numero: 38
secao: "Profetas"
canon: "católico (73 livros), sem o apêndice clementino"
scope: "21 versículos em 1 capítulos"
tags:
  - latim
  - vulgata
  - biblia
  - clementina
  - profetas
coautoria:
  - Διαφορεύς
  - Claude Opus 5
status: rascunho
project: pedra_angular
source: "Biblia Sacra juxta Vulgatam Clementinam. Editio electronica: Michael Tweedale et al., The Clementine Text Project (2005; correções posteriores). Arquivo Text/Abd.lat do repositório bitbucket.org/clementinetextproject/text."
license: "domínio público"
publishable: true
related: []
---

# Abdias

## Capítulo 1

**1** Visio Abdiae. Haec dicit Dominus Deus ad Edom :  
Auditum audivimus a Domino,  
et legatum ad gentes misit :  
surgite, et consurgamus adversus eum in praelium. ^abd-1-1

**2** Ecce parvulum dedi te in gentibus :  
contemptibilis tu es valde. ^abd-1-2

**3** Superbia cordis tui extulit te,  
habitantem in scissuris petrarum,  
exaltantem solium tuum ;  
qui dicis in corde tuo :  
Quis detrahet me in terram ? ^abd-1-3

**4** Si exaltatus fueris ut aquila,  
et si inter sidera posueris nidum tuum,  
inde detraham te, dicit Dominus. ^abd-1-4

**5** Si fures introissent ad te,  
si latrones per noctem,  
quomodo conticuisses ?  
nonne furati essent sufficientia sibi ?  
Si vindemiatores introissent ad te,  
numquid saltem racemum reliquissent tibi ? ^abd-1-5

**6** Quomodo scrutati sunt Esau ;  
investigaverunt abscondita ejus ? ^abd-1-6

**7** Usque ad terminum emiserunt te :  
omnes viri foederis tui illuserunt tibi :  
invaluerunt adversum te viri pacis tuae,  
qui comedunt tecum, ponent insidias subter te ;  
non est prudentia in eo. ^abd-1-7

**8** Numquid non in die illa, dicit Dominus,  
perdam sapientes de Idumaea,  
et prudentiam de monte Esau ? ^abd-1-8

**9** Et timebunt fortes tui a meridie,  
ut intereat vir de monte Esau. ^abd-1-9

**10** Propter interfectionem,  
et propter iniquitatem in fratrem tuum Jacob,  
operiet te confusio, et peribis in aeternum. ^abd-1-10

**11** In die cum stares adversus eum,  
quando capiebant alieni exercitum ejus,  
et extranei ingrediebantur portas ejus,  
et super Jerusalem mittebant sortem,  
tu quoque eras quasi unus ex eis. ^abd-1-11

**12** Et non despicies in die fratris tui,  
in die peregrinationis ejus :  
et non laetaberis super filios Juda  
in die perditionis eorum :  
et non magnificabis os tuum  
in die angustiae. ^abd-1-12

**13** Neque ingredieris portam populi mei  
in die ruinae eorum ;  
neque despicies et tu in malis ejus  
in die vastitatis illius.  
Et non emitteris adversus exercitum ejus  
in die vastitatis illius, ^abd-1-13

**14** neque stabis in exitibus  
ut interficias eos qui fugerint,  
et non concludes reliquos ejus  
in die tribulationis. ^abd-1-14

**15** Quoniam juxta est dies Domini super omnes gentes :  
sicut fecisti, fiet tibi ;  
retributionem tuam convertet in caput tuum. ^abd-1-15

**16** Quomodo enim bibistis super montem sanctum meum,  
bibent omnes gentes jugiter :  
et bibent, et absorbebunt,  
et erunt quasi non sint. ^abd-1-16

**17** Et in monte Sion erit salvatio, et erit sanctus ;  
et possidebit domus Jacob eos qui se possederant. ^abd-1-17

**18** Et erit domus Jacob ignis,  
et domus Joseph flamma,  
et domus Esau stipula :  
et succendentur in eis, et devorabunt eos,  
et non erunt reliquiae domus Esau,  
quia Dominus locutus est. ^abd-1-18

**19** Et haereditabunt hi, qui ad austrum sunt, montem Esau,  
et qui in campestribus, Philisthiim :  
et possidebunt regionem Ephraim et regionem Samariae,  
et Benjamin possidebit Galaad. ^abd-1-19

**20** Et transmigratio exercitus hujus filiorum Israël,  
omnia loca Chananaeorum usque ad Sareptam :  
et transmigratio Jerusalem, quae in Bosphoro est,  
possidebit civitates austri. ^abd-1-20

**21** Et ascendent salvatores in montem Sion judicare montem Esau,  
et erit Domino regnum. ^abd-1-21