---
id: vulgata-clementina-os-lat-tweedale-2005
type: texto_primario
title: "Osee (Vulgata Clementina)"
subtitle: null
original_title: "Osee"
author: null
year_original: 1592
language: lat
translation:
  - Hieronymus Stridonensis
editor:
  - Michael Tweedale
publisher: null
publication_year: 2005
area: Escrituras
era: século IV d.C. (recensão de 1592)
sistema_referencia: versiculo
abrev: "Os"
livro_numero: 35
secao: "Profetas"
canon: "católico (73 livros), sem o apêndice clementino"
scope: "198 versículos em 14 capítulos"
tags:
  - latim
  - vulgata
  - biblia
  - clementina
  - profetas
coautoria:
  - Διαφορεύς
  - Claude Opus 5
status: rascunho
project: pedra_angular
source: "Biblia Sacra juxta Vulgatam Clementinam. Editio electronica: Michael Tweedale et al., The Clementine Text Project (2005; correções posteriores). Arquivo Text/Os.lat do repositório bitbucket.org/clementinetextproject/text."
license: "domínio público"
publishable: true
related: []
---

# Osee

## Capítulo 1

**1** Verbum Domini, quod factum est ad Osee, filium Beeri, in diebus Oziae, Joathan, Achaz, Ezechiae, regum Juda ; et in diebus Jeroboam, filii Joas, regis Israël. ^os-1-1

**2** Principium loquendi Domino in Osee. Et dixit Dominus ad Osee : Vade, sume tibi uxorem fornicationum, et fac tibi filios fornicationum, quia fornicans fornicabitur terra a Domino. ^os-1-2

**3** Et abiit, et accepit Gomer, filiam Debelaim : et concepit, et peperit ei filium. ^os-1-3

**4** Et dixit Dominus ad eum : Voca nomen ejus Jezrahel, quoniam adhuc modicum, et visitabo sanguinem Jezrahel super domum Jehu, et quiescere faciam regnum domus Israël. ^os-1-4

**5** Et in illa die conteram arcum Israël in valle Jezrahel. ^os-1-5

**6** Et concepit adhuc, et peperit filiam. Et dixit ei : Voca nomen ejus, Absque misericordia, quia non addam ultra misereri domui Israël, sed oblivione obliviscar eorum. ^os-1-6

**7** Et domui Juda miserebor, et salvabo eos in Domino Deo suo ; et non salvabo eos in arcu et gladio, et in bello, et in equis, et in equitibus. ^os-1-7

**8** Et ablactavit eam quae erat Absque misericordia. Et concepit, et peperit filium. ^os-1-8

**9** Et dixit : Voca nomen ejus, Non populus meus, quia vos non populus meus, et ego non ero vester. ^os-1-9

**10** Et erit numerus filiorum Israël quasi arena maris, quae sine mensura est, et non numerabitur. Et erit in loco ubi dicetur eis : Non populus meus vos : dicetur eis : Filii Dei viventis. ^os-1-10

**11** Et congregabuntur filii Juda et filii Israël pariter ; et ponent sibimet caput unum, et ascendent de terra, quia magnus dies Jezrahel. ^os-1-11

## Capítulo 2

**1** Dicite fratribus vestris : Populus meus ; et sorori vestrae : Misericordiam consecuta. ^os-2-1

**2** Judicate matrem vestram, judicate,  
quoniam ipsa non uxor mea,  
et ego non vir ejus.  
Auferat fornicationes suas a facie sua,  
et adulteria sua de medio uberum suorum ; ^os-2-2

**3** ne forte expoliem eam nudam,  
et statuam eam secundum diem nativitatis suae,  
et ponam eam quasi solitudinem,  
et statuam eam velut terram inviam,  
et interficiam eam siti. ^os-2-3

**4** Et filiorum illius non miserebor,  
quoniam filii fornicationum sunt. ^os-2-4

**5** Quia fornicata est mater eorum,  
confusa est quae concepit eos ;  
quia dixit : Vadam post amatores meos,  
qui dant panes mihi, et aquas meas,  
lanam meam, et linum meum,  
oleum meum, et potum meum. ^os-2-5

**6** Propter hoc ecce ego sepiam viam tuam spinis,  
et sepiam eam maceria, et semitas suas non inveniet. ^os-2-6

**7** Et sequetur amatores suos, et non apprehendet eos ;  
et quaeret eos, et non inveniet :  
et dicet : Vadam, et revertar ad virum meum priorem,  
quia bene mihi erat tunc magis quam nunc. ^os-2-7

**8** Et haec nescivit, quia ego dedi ei frumentum, et vinum, et oleum,  
et argentum multiplicavi ei, et aurum,  
quae fecerunt Baal. ^os-2-8

**9** Idcirco convertar, et sumam frumentum meum in tempore suo,  
et vinum meum in tempore suo.  
Et liberabo lanam meam et linum meum,  
quae operiebant ignominiam ejus. ^os-2-9

**10** Et nunc revelabo stultitiam ejus in oculis amatorum ejus ;  
et vir non eruet eam de manu mea ; ^os-2-10

**11** et cessare faciam omne gaudium ejus,  
solemnitatem ejus, neomeniam ejus, sabbatum ejus,  
et omnia festa tempora ejus. ^os-2-11

**12** Et corrumpam vineam ejus, et ficum ejus,  
de quibus dixit : Mercedes hae meae sunt,  
quas dederunt mihi amatores mei ;  
et ponam eam in saltum,  
et comedet eam bestia agri. ^os-2-12

**13** Et visitabo super eam dies Baalim,  
quibus accendebat incensum,  
et ornabatur inaure sua, et monili suo.  
Et ibat post amatores suos,  
et mei obliviscebatur, dicit Dominus. ^os-2-13

**14** Propter hoc ecce ego lactabo eam,  
et ducam eam in solitudinem,  
et loquar ad cor ejus. ^os-2-14

**15** Et dabo ei vinitores ejus ex eodem loco,  
et vallem Achor, ad aperiendam spem ;  
et canet ibi juxta dies juventutis suae,  
et juxta dies ascensionis suae de terra Aegypti. ^os-2-15

**16** Et erit in die illa, ait Dominus :  
vocabit me, Vir meus,  
et non vocabit me ultra Baali. ^os-2-16

**17** Et auferam nomina Baalim de ore ejus,  
et non recordabitur ultra nominis eorum. ^os-2-17

**18** Et percutiam cum eis foedus in die illa, cum bestia agri,  
et cum volucre caeli, et cum reptili terrae ;  
et arcum, et gladium, et bellum conteram de terra,  
et dormire eos faciam fiducialiter. ^os-2-18

**19** Et sponsabo te mihi in sempiternum ;  
et sponsabo te mihi in justitia, et judicio,  
et in misericordia, et in miserationibus. ^os-2-19

**20** Et sponsabo te mihi in fide ;  
et scies quia ego Dominus. ^os-2-20

**21** Et erit in die illa :  
exaudiam, dicit Dominus, exaudiam caelos,  
et illi exaudient terram. ^os-2-21

**22** Et terra exaudiet triticum, et vinum, et oleum,  
et haec exaudient Jezrahel. ^os-2-22

**23** Et seminabo eam mihi in terra,  
et miserebor ejus quae fuit Absque misericordia. ^os-2-23

**24** Et dicam Non populo meo : Populus meus es tu ;  
et ipse dicet : Deus meus es tu. ^os-2-24

## Capítulo 3

**1** Et dixit Dominus ad me : Adhuc vade, et dilige mulierem dilectam amico et adulteram, sicut diligit Dominus filios Israël, et ipsi respiciunt ad deos alienos, et diligunt vinacia uvarum. ^os-3-1

**2** Et fodi eam mihi quindecim argenteis, et coro hordei, et dimidio coro hordei. ^os-3-2

**3** Et dixi ad eam : Dies multos exspectabis me ; non fornicaberis, et non eris viro ; sed et ego exspectabo te. ^os-3-3

**4** Quia dies multos sedebunt filii Israël sine rege, et sine principe, et sine sacrificio, et sine altari, et sine ephod, et sine theraphim. ^os-3-4

**5** Et post haec revertentur filii Israël, et quaerent Dominum Deum suum, et David regem suum : et pavebunt ad Dominum, et ad bonum ejus, in novissimo dierum. ^os-3-5

## Capítulo 4

**1** Audite verbum Domini, filii Israël,  
quia judicium Domino cum habitatoribus terrae :  
non est enim veritas, et non est misericordia,  
et non est scientia Dei in terra. ^os-4-1

**2** Maledictum, et mendacium,  
et homicidium, et furtum, et adulterium inundaverunt,  
et sanguis sanguinem tetigit. ^os-4-2

**3** Propter hoc lugebit terra,  
et infirmabitur omnis qui habitat in ea,  
in bestia agri, et in volucre caeli ;  
sed et pisces maris congregabuntur. ^os-4-3

**4** Verumtamen unusquisque non judicet,  
et non arguatur vir :  
populus enim tuus sicut hi qui contradicunt sacerdoti. ^os-4-4

**5** Et corrues hodie,  
et corruet etiam propheta tecum.  
Nocte tacere feci matrem tuam. ^os-4-5

**6** Conticuit populus meus,  
eo quod non habuerit scientiam :  
quia tu scientiam repulisti,  
repellam te, ne sacerdotio fungaris mihi ;  
et oblita es legis Dei tui,  
obliviscar filiorum tuorum et ego. ^os-4-6

**7** Secundum multitudinem eorum sic peccaverunt mihi :  
gloriam eorum in ignominiam commutabo. ^os-4-7

**8** Peccata populi mei comedent,  
et ad iniquitatem eorum sublevabunt animas eorum. ^os-4-8

**9** Et erit sicut populus, sic sacerdos ;  
et visitabo super eum vias ejus,  
et cogitationes ejus reddam ei. ^os-4-9

**10** Et comedent, et non saturabuntur ;  
fornicati sunt, et non cessaverunt :  
quoniam Dominum dereliquerunt in non custodiendo. ^os-4-10

**11** Fornicatio, et vinum, et ebrietas auferunt cor. ^os-4-11

**12** Populus meus in ligno suo interrogavit,  
et baculus ejus annuntiavit ei ;  
spiritus enim fornicationum decepit eos,  
et fornicati sunt a Deo suo. ^os-4-12

**13** Super capita montium sacrificabant,  
et super colles accendebant thymiama ;  
subtus quercum, et populum, et terebinthum,  
quia bona erat umbra ejus ;  
ideo fornicabuntur filiae vestrae,  
et sponsae vestrae adulterae erunt. ^os-4-13

**14** Non visitabo super filias vestras cum fuerint fornicatae,  
et super sponsas vestras cum adulteraverint,  
quoniam ipsi cum meretricibus conversabantur,  
et cum effeminatis sacrificabant ;  
et populus non intelligens vapulabit. ^os-4-14

**15** Si fornicaris tu, Israël,  
non delinquat saltem Juda ;  
et nolite ingredi in Galgala,  
et ne ascenderitis in Bethaven,  
neque juraveritis : Vivit Dominus ! ^os-4-15

**16** Quoniam sicut vacca lasciviens declinavit Israël ;  
nunc pascet eos Dominus, quasi agnum in latitudine. ^os-4-16

**17** Particeps idolorum Ephraim : dimitte eum. ^os-4-17

**18** Separatum est convivium eorum ;  
fornicatione fornicati sunt :  
dilexerunt afferre ignominiam protectores ejus. ^os-4-18

**19** Ligavit eum spiritus in alis suis,  
et confundentur a sacrificiis suis. ^os-4-19

## Capítulo 5

**1** Audite hoc, sacerdotes,  
et attendite, domus Israël,  
et domus regis, auscultate :  
quia vobis judicium est,  
quoniam laqueus facti estis speculationi,  
et rete expansum super Thabor. ^os-5-1

**2** Et victimas declinastis in profundum ;  
et ego eruditor omnium eorum. ^os-5-2

**3** Ego scio Ephraim,  
et Israël non est absconditus a me :  
quia nunc fornicatus est Ephraim ;  
contaminatus est Israël. ^os-5-3

**4** Non dabunt cogitationes suas ut revertantur ad Deum suum,  
quia spiritus fornicationum in medio eorum,  
et Dominum non cognoverunt. ^os-5-4

**5** Et respondebit arrogantia Israël in facie ejus,  
et Israël et Ephraim ruent in iniquitate sua :  
ruet etiam Judas cum eis. ^os-5-5

**6** In gregibus suis et in armentis suis vadent ad quaerendum Dominum,  
et non invenient :  
ablatus est ab eis. ^os-5-6

**7** In Dominum praevaricati sunt,  
quia filios alienos genuerunt :  
nunc devorabit eos mensis, cum partibus suis. ^os-5-7

**8** Clangite buccina in Gabaa,  
tuba in Rama ;  
ululate in Bethaven,  
post tergum tuum, Benjamin. ^os-5-8

**9** Ephraim in desolatione erit in die correptionis ;  
in tribubus Israël ostendi fidem. ^os-5-9

**10** Facti sunt principes Juda quasi assumentes terminum ;  
super eos effundam quasi aquam iram meam. ^os-5-10

**11** Calumniam patiens est Ephraim, fractus judicio,  
quoniam coepit abire post sordes. ^os-5-11

**12** Et ego quasi tinea Ephraim,  
et quasi putredo domui Juda. ^os-5-12

**13** Et vidit Ephraim languorem suum,  
et Juda vinculum suum ;  
et abiit Ephraim ad Assur,  
et misit ad regem ultorem :  
et ipse non poterit sanare vos,  
nec solvere poterit a vobis vinculum. ^os-5-13

**14** Quoniam ego quasi leaena Ephraim,  
et quasi catulus leonis domui Juda.  
Ego, ego capiam, et vadam ;  
tollam, et non est qui eruat. ^os-5-14

**15** Vadens revertar ad locum meum,  
donec deficiatis, et quaeratis faciem meam. ^os-5-15

## Capítulo 6

**1** In tribulatione sua mane consurgent ad me :  
Venite, et revertamur ad Dominum, ^os-6-1

**2** quia ipse cepit, et sanabit nos ;  
percutiet, et curabit nos. ^os-6-2

**3** Vivificabit nos post duos dies ;  
in die tertia suscitabit nos,  
et vivemus in conspectu ejus.  
Sciemus, sequemurque ut cognoscamus Dominum :  
quasi diluculum praeparatus est egressus ejus,  
et veniet quasi imber nobis temporaneus et serotinus terrae. ^os-6-3

**4** Quid faciam tibi, Ephraim ?  
quid faciam tibi, Juda ?  
misericordia vestra quasi nubes matutina,  
et quasi ros mane pertransiens. ^os-6-4

**5** Propter hoc dolavi in prophetis ;  
occidi eos in verbis oris mei :  
et judicia tua quasi lux egredientur. ^os-6-5

**6** Quia misericordiam volui, et non sacrificium ;  
et scientiam Dei plus quam holocausta. ^os-6-6

**7** Ipsi autem sicut Adam transgressi sunt pactum :  
ibi praevaricati sunt in me. ^os-6-7

**8** Galaad civitas operantium idolum,  
supplantata sanguine. ^os-6-8

**9** Et quasi fauces virorum latronum,  
particeps sacerdotum, in via interficientium pergentes de Sichem :  
quia scelus operati sunt. ^os-6-9

**10** In domo Israël vidi horrendum :  
ibi fornicationes Ephraim,  
contaminatus est Israël. ^os-6-10

**11** Sed et Juda, pone messem tibi,  
cum convertero captivitatem populi mei. ^os-6-11

## Capítulo 7

**1** Cum sanare vellem Israël,  
revelata est iniquitas Ephraim,  
et malitia Samariae,  
quia operati sunt mendacium ;  
et fur ingressus est spolians,  
latrunculus foris. ^os-7-1

**2** Et ne forte dicant in cordibus suis,  
omnem malitiam eorum me recordatum,  
nunc circumdederunt eos adinventiones suae :  
coram facie mea factae sunt. ^os-7-2

**3** In malitia sua laetificaverunt regem,  
et in mendaciis suis principes. ^os-7-3

**4** Omnes adulterantes,  
quasi clibanus succensus a coquente ;  
quievit paululum civitas a commistione fermenti,  
donec fermentaretur totum. ^os-7-4

**5** Dies regis nostri : coeperunt principes furere a vino ;  
extendit manum suam cum illusoribus. ^os-7-5

**6** Quia applicuerunt quasi clibanum cor suum,  
cum insidiaretur eis ;  
tota nocte dormivit coquens eos :  
mane ipse succensus quasi ignis flammae. ^os-7-6

**7** Omnes calefacti sunt quasi clibanus,  
et devoraverunt judices suos :  
omnes reges eorum ceciderunt ;  
non est qui clamet in eis ad me. ^os-7-7

**8** Ephraim in populis ipse commiscebatur ;  
Ephraim factus est subcinericius panis, qui non reversatur. ^os-7-8

**9** Comederunt alieni robur ejus, et ipse nescivit ;  
sed et cani effusi sunt in eo, et ipse ignoravit. ^os-7-9

**10** Et humiliabitur superbia Israël in facie ejus ;  
nec reversi sunt ad Dominum Deum suum,  
et non quaesierunt eum in omnibus his. ^os-7-10

**11** Et factus est Ephraim quasi columba seducta non habens cor.  
Aegyptum invocabant ; ad Assyrios abierunt. ^os-7-11

**12** Et cum profecti fuerint,  
expandam super eos rete meum :  
quasi volucrem caeli detraham eos ;  
caedam eos secundum auditionem coetus eorum. ^os-7-12

**13** Vae eis, quoniam recesserunt a me !  
vastabuntur, quia praevaricati sunt in me,  
et ego redemi eos,  
et ipsi locuti sunt contra me mendacia. ^os-7-13

**14** Et non clamaverunt ad me in corde suo,  
sed ululabant in cubilibus suis :  
super triticum et vinum ruminabant ;  
recesserunt a me. ^os-7-14

**15** Et ego erudivi eos, et confortavi brachia eorum,  
et in me cogitaverunt malitiam. ^os-7-15

**16** Reversi sunt ut essent absque jugo ;  
facti sunt quasi arcus dolosus :  
cadent in gladio principes eorum, a furore linguae suae.  
Ista subsannatio eorum in terra Aegypti. ^os-7-16

## Capítulo 8

**1** In gutture tuo sit tuba  
quasi aquila super domum Domini,  
pro eo quod transgressi sunt foedus meum,  
et legem meam praevaricati sunt. ^os-8-1

**2** Me invocabunt : Deus meus,  
cognovimus te Israël. ^os-8-2

**3** Projecit Israël bonum :  
inimicus persequetur eum. ^os-8-3

**4** Ipsi regnaverunt, et non ex me ;  
principes exstiterunt, et non cognovi :  
argentum suum et aurum suum fecerunt sibi idola,  
ut interirent. ^os-8-4

**5** Projectus est vitulus tuus, Samaria ;  
iratus est furor meus in eos.  
Usquequo non poterunt emundari ? ^os-8-5

**6** Quia ex Israël et ipse est :  
artifex fecit illum, et non est deus ;  
quoniam in aranearum telas erit vitulus Samariae. ^os-8-6

**7** Quia ventum seminabunt,  
et turbinem metent :  
culmus stans non est in eo ;  
germen non faciet farinam :  
quod etsi fecerit, alieni comedent eam. ^os-8-7

**8** Devoratus est Israël ;  
nunc factus est in nationibus quasi vas immundum. ^os-8-8

**9** Quia ipsi ascenderunt ad Assur,  
onager solitarius sibi ;  
Ephraim munera dederunt amatoribus. ^os-8-9

**10** Sed et cum mercede conduxerint nationes,  
nunc congregabo eos,  
et quiescent paulisper ab onere regis et principum. ^os-8-10

**11** Quia multiplicavit Ephraim altaria ad peccandum ;  
factae sunt ei arae in delictum. ^os-8-11

**12** Scribam ei multiplices leges meas,  
quae velut alienae computatae sunt. ^os-8-12

**13** Hostias offerent,  
immolabunt carnes et comedent,  
et Dominus non suscipiet eas :  
nunc recordabitur iniquitatis eorum,  
et visitabit peccata eorum :  
ipsi in Aegyptum convertentur. ^os-8-13

**14** Et oblitus est Israël factoris sui,  
et aedificavit delubra ;  
et Judas multiplicavit urbes munitas ;  
et mittam ignem in civitates ejus,  
et devorabit aedes illius. ^os-8-14

## Capítulo 9

**1** Noli laetari, Israël ;  
noli exsultare sicut populi :  
quia fornicatus es a Deo tuo ;  
dilexisti mercedem super omnes areas tritici. ^os-9-1

**2** Area et torcular non pascet eos,  
et vinum mentietur eis : ^os-9-2

**3** non habitabunt in terra Domini.  
Reversus est Ephraim in Aegyptum,  
et in Assyriis pollutum comedit. ^os-9-3

**4** Non libabunt Domino vinum,  
et non placebunt ei.  
Sacrificia eorum quasi panis lugentium ;  
omnes qui comedent eum, contaminabuntur :  
quia panis eorum animae ipsorum :  
non intrabit in domum Domini. ^os-9-4

**5** Quid facietis in die solemni,  
in die festivitatis Domini ? ^os-9-5

**6** Ecce enim profecti sunt a vastitate :  
Aegyptus congregabit eos ;  
Memphis sepeliet eos :  
desiderabile argentum eorum urtica haereditabit,  
lappa in tabernaculis eorum. ^os-9-6

**7** Venerunt dies visitationis,  
venerunt dies retributionis.  
Scitote, Israël,  
stultum prophetam,  
insanum virum spiritualem,  
propter multitudinem iniquitatis tuae,  
et multitudinem amentiae. ^os-9-7

**8** Speculator Ephraim cum Deo meo,  
propheta laqueus ruinae factus est super omnes vias ejus ;  
insania in domo Dei ejus. ^os-9-8

**9** Profunde peccaverunt, sicut in diebus Gabaa.  
Recordabitur iniquitatis eorum,  
et visitabit peccata eorum. ^os-9-9

**10** Quasi uvas in deserto inveni Israël,  
quasi prima poma ficulneae in cacumine ejus vidi patres eorum :  
ipsi autem intraverunt ad Beelphegor,  
et abalienati sunt in confusionem,  
et facti sunt abominabiles sicut ea quae dilexerunt. ^os-9-10

**11** Ephraim quasi avis avolavit ;  
gloria eorum a partu, et ab utero, et a conceptu. ^os-9-11

**12** Quod etsi enutrierint filios suos,  
absque liberis eos faciam in hominibus ;  
sed et vae eis cum recessero ab eis ! ^os-9-12

**13** Ephraim, ut vidi, Tyrus erat fundata in pulchritudine ;  
et Ephraim educet ad interfectorem filios suos. ^os-9-13

**14** Da eis, Domine. Quid dabis eis ?  
da eis vulvam sine liberis, et ubera arentia. ^os-9-14

**15** Omnes nequitiae eorum in Galgal,  
quia ibi exosos habui eos.  
Propter malitiam adinventionum eorum,  
de domo mea ejiciam eos ;  
non addam ut diligam eos :  
omnes principes eorum recedentes. ^os-9-15

**16** Percussus est Ephraim ;  
radix eorum exsiccata est :  
fructum nequaquam facient,  
quod etsi genuerint,  
interficiam amantissima uteri eorum. ^os-9-16

**17** Abjiciet eos Deus meus, quia non audierunt eum,  
et erunt vagi in nationibus. ^os-9-17

## Capítulo 10

**1** Vitis frondosa Israël,  
fructus adaequatus est ei :  
secundum multitudinem fructus sui multiplicavit altaria,  
juxta ubertatem terrae suae exuberavit simulacris. ^os-10-1

**2** Divisum est cor eorum, nunc interibunt ;  
ipse confringet simulacra eorum,  
depopulabitur aras eorum. ^os-10-2

**3** Quia nunc dicent : Non est rex nobis,  
non enim timemus Dominum ;  
et rex quid faciet nobis ? ^os-10-3

**4** Loquimini verba visionis inutilis, et ferietis foedus ;  
et germinabit quasi amaritudo judicium super sulcos agri. ^os-10-4

**5** Vaccas Bethaven coluerunt habitatores Samariae ;  
quia luxit super eum populus ejus,  
et aeditui ejus super eum exsultaverunt  
in gloria ejus, quia migravit ab eo. ^os-10-5

**6** Siquidem et ipse in Assur delatus est,  
munus regi ultori.  
Confusio Ephraim capiet,  
et confundetur Israël in voluntate sua. ^os-10-6

**7** Transire fecit Samaria regem suum  
quasi spumam super faciem aquae. ^os-10-7

**8** Et disperdentur excelsa idoli, peccatum Israël ;  
lappa et tribulus ascendet super aras eorum :  
et dicent montibus : Operite nos,  
et collibus : Cadite super nos. ^os-10-8

**9** Ex diebus Gabaa peccavit Israël ;  
ibi steterunt.  
Non comprehendet eos in Gabaa  
praelium super filios iniquitatis. ^os-10-9

**10** Juxta desiderium meum corripiam eos :  
congregabuntur super eos populi,  
cum corripientur propter duas iniquitates suas. ^os-10-10

**11** Ephraim vitula docta diligere trituram,  
et ego transivi super pulchritudinem colli ejus :  
ascendam super Ephraim,  
arabit Judas ;  
confringet sibi sulcos Jacob. ^os-10-11

**12** Seminate vobis in justitia,  
et metite in ore misericordiae.  
Innovate vobis novale ;  
tempus autem requirendi Dominum,  
cum venerit qui docebit vos justitiam. ^os-10-12

**13** Arastis impietatem,  
iniquitatem messuistis :  
comedistis frugem mendacii,  
quia confisus es in viis tuis,  
in multitudine fortium tuorum. ^os-10-13

**14** Consurget tumultus in populo tuo ;  
et omnes munitiones tuae vastabuntur,  
sicut vastatus est Salmana a domo ejus qui judicavit Baal  
in die praelii, matre super filios allisa. ^os-10-14

**15** Sic fecit vobis Bethel,  
a facie malitiae nequitiarum vestrarum. ^os-10-15

## Capítulo 11

**1** Sicut mane transiit, pertransiit rex Israël.  
Quia puer Israël, et dilexi eum ;  
et ex Aegypto vocavi filium meum. ^os-11-1

**2** Vocaverunt eos, sic abierunt a facie eorum ;  
Baalim immolabant, et simulacris sacrificabant. ^os-11-2

**3** Et ego quasi nutritius Ephraim :  
portabam eos in brachiis meis,  
et nescierunt quod curarem eos. ^os-11-3

**4** In funiculis Adam traham eos,  
in vinculis caritatis ;  
et ero eis quasi exaltans jugum super maxillas eorum,  
et declinavi ad eum ut vesceretur. ^os-11-4

**5** Non revertetur in terram Aegypti, et Assur ipse rex ejus,  
quoniam noluerunt converti. ^os-11-5

**6** Coepit gladius in civitatibus ejus,  
et consumet electos ejus,  
et comedet capita eorum. ^os-11-6

**7** Et populus meus pendebit ad reditum meum ;  
jugum autem imponetur eis simul, quod non auferetur. ^os-11-7

**8** Quomodo dabo te, Ephraim ?  
protegam te, Israël ?  
Quomodo dabo te sicut Adama,  
ponam te ut Seboim ?  
Conversum est in me cor meum,  
pariter conturbata est poenitudo mea. ^os-11-8

**9** Non faciam furorem irae meae ;  
non convertar ut disperdam Ephraim,  
quoniam Deus ego, et non homo ;  
in medio tui sanctus,  
et non ingrediar civitatem. ^os-11-9

**10** Post Dominum ambulabunt ;  
quasi leo rugiet,  
quia ipse rugiet,  
et formidabunt filii maris. ^os-11-10

**11** Et avolabunt quasi avis ex Aegypto,  
et quasi columba de terra Assyriorum :  
et collocabo eos in domibus suis, dicit Dominus. ^os-11-11

**12** Circumdedit me in negatione Ephraim,  
et in dolo domus Israël ;  
Judas autem testis descendit cum Deo,  
et cum sanctis fidelis. ^os-11-12

## Capítulo 12

**1** Ephraim pascit ventum,  
et sequitur aestum ;  
tota die mendacium et vastitatem multiplicat :  
et foedus cum Assyriis iniit,  
et oleum in Aegyptum ferebat. ^os-12-1

**2** Judicium ergo Domini cum Juda,  
et visitatio super Jacob :  
juxta vias ejus, et juxta adinventiones ejus reddet ei. ^os-12-2

**3** In utero supplantavit fratrem suum,  
et in fortitudine sua directus est cum angelo. ^os-12-3

**4** Et invaluit ad angelum, et confortatus est ;  
flevit, et rogavit eum.  
In Bethel invenit eum,  
et ibi locutus est nobiscum. ^os-12-4

**5** Et Dominus Deus exercituum,  
Dominus memoriale ejus. ^os-12-5

**6** Et tu ad Deum tuum converteris ;  
misericordiam et judicium custodi,  
et spera in Deo tuo semper. ^os-12-6

**7** Chanaan, in manu ejus statera dolosa,  
calumniam dilexit. ^os-12-7

**8** Et dixit Ephraim : Verumtamen dives effectus sum ;  
inveni idolum mihi :  
omnes labores mei non invenient mihi iniquitatem quam peccavi. ^os-12-8

**9** Et ego Dominus Deus tuus ex terra Aegypti :  
adhuc sedere te faciam in tabernaculis, sicut in diebus festivitatis. ^os-12-9

**10** Et locutus sum super prophetas,  
et ego visionem multiplicavi,  
et in manu prophetarum assimilatus sum. ^os-12-10

**11** Si Galaad idolum, ergo frustra erant in Galgal bobus immolantes ;  
nam et altaria eorum quasi acervi super sulcos agri. ^os-12-11

**12** Fugit Jacob in regionem Syriae,  
et servivit Israël in uxorem,  
et in uxorem servavit. ^os-12-12

**13** In propheta autem eduxit Dominus Israël de Aegypto,  
et in propheta servatus est. ^os-12-13

**14** Ad iracundiam me provocavit Ephraim in amaritudinibus suis :  
et sanguis ejus super eum veniet,  
et opprobrium ejus restituet ei Dominus suus. ^os-12-14

## Capítulo 13

**1** Loquente Ephraim, horror invasit Israël ;  
et deliquit in Baal, et mortuus est. ^os-13-1

**2** Et nunc addiderunt ad peccandum ;  
feceruntque sibi conflatile de argento suo  
quasi similitudinem idolorum :  
factura artificum totum est :  
his ipsi dicunt : Immolate homines, vitulos adorantes. ^os-13-2

**3** Idcirco erunt quasi nubes matutina,  
et sicut ros matutinus praeteriens ;  
sicut pulvis turbine raptus ex area,  
et sicut fumus de fumario. ^os-13-3

**4** Ego autem Dominus Deus tuus, ex terra Aegypti ;  
et Deum absque me nescies,  
et salvator non est praeter me. ^os-13-4

**5** Ego cognovi te in deserto,  
in terra solitudinis. ^os-13-5

**6** Juxta pascua sua adimpleti sunt et saturati sunt ;  
et levaverunt cor suum, et obliti sunt mei. ^os-13-6

**7** Et ego ero eis quasi leaena,  
sicut pardus in via Assyriorum. ^os-13-7

**8** Occurram eis quasi ursa raptis catulis,  
et dirumpam interiora jecoris eorum,  
et consumam eos ibi quasi leo :  
bestia agri scindet eos. ^os-13-8

**9** Perditio tua, Israël : tantummodo in me auxilium tuum. ^os-13-9

**10** Ubi est rex tuus ?  
maxime nunc salvet te in omnibus urbibus tuis ;  
et judices tui, de quibus dixisti :  
Da mihi regem et principes. ^os-13-10

**11** Dabo tibi regem in furore meo,  
et auferam in indignatione mea. ^os-13-11

**12** Colligata est iniquitas Ephraim ;  
absconditum peccatum ejus. ^os-13-12

**13** Dolores parturientis venient ei :  
ipse filius non sapiens :  
nunc enim non stabit in contritione filiorum. ^os-13-13

**14** De manu mortis liberabo eos ;  
de morte redimam eos.  
Ero mors tua, o mors !  
morsus tuus ero, inferne !  
consolatio abscondita est ab oculis meis. ^os-13-14

**15** Quia ipse inter fratres dividet :  
adducet urentem ventum Dominus de deserto ascendentem,  
et siccabit venas ejus,  
et desolabit fontem ejus :  
et ipse diripiet thesaurum omnis vasis desiderabilis. ^os-13-15

## Capítulo 14

**1** Pereat Samaria, quoniam ad amaritudinem concitavit Deum suum !  
in gladio pereant,  
parvuli eorum elidantur,  
et foetae ejus discindantur ! ^os-14-1

**2** Convertere, Israël, ad Dominum Deum tuum,  
quoniam corruisti in iniquitate tua. ^os-14-2

**3** Tollite vobiscum verba,  
et convertimini ad Dominum ; et dicite ei :  
Omnem aufer iniquitatem, accipe bonum,  
et reddemus vitulos labiorum nostrorum. ^os-14-3

**4** Assur non salvabit nos :  
super equum non ascendemus,  
nec dicemus ultra, Dii nostri opera manuum nostrarum :  
quia ejus, qui in te est, misereberis pupilli. ^os-14-4

**5** Sanabo contritiones eorum ;  
diligam eos spontanee :  
quia aversus est furor meus ab eis. ^os-14-5

**6** Ero quasi ros ;  
Israël germinabit sicut lilium,  
et erumpet radix ejus ut Libani. ^os-14-6

**7** Ibunt rami ejus,  
et erit quasi oliva gloria ejus,  
et odor ejus ut Libani. ^os-14-7

**8** Convertentur sedentes in umbra ejus ;  
vivent tritico, et germinabunt quasi vinea ;  
memoriale ejus sicut vinum Libani. ^os-14-8

**9** Ephraim, quid mihi ultra idola ?  
Ego exaudiam, et dirigam eum ego ut abietem virentem ;  
ex me fructus tuus inventus est. ^os-14-9

**10** Quis sapiens, et intelliget ista ? intelligens, et sciet haec ?  
quia rectae viae Domini,  
et justi ambulabunt in eis ;  
praevaricatores vero corruent in eis. ^os-14-10