---
id: vulgata-clementina-lam-lat-tweedale-2005
type: texto_primario
title: "Lamentationes (Vulgata Clementina)"
subtitle: null
original_title: "Lamentationes"
author: null
year_original: 1592
language: lat
translation:
  - Hieronymus Stridonensis
editor:
  - Michael Tweedale
publisher: null
publication_year: 2005
area: Escrituras
era: século IV d.C. (recensão de 1592)
sistema_referencia: versiculo
abrev: "Lam"
livro_numero: 31
secao: "Profetas"
canon: "católico (73 livros), sem o apêndice clementino"
scope: "154 versículos em 5 capítulos"
tags:
  - latim
  - vulgata
  - biblia
  - clementina
  - profetas
coautoria:
  - Διαφορεύς
  - Claude Opus 5
status: rascunho
project: pedra_angular
source: "Biblia Sacra juxta Vulgatam Clementinam. Editio electronica: Michael Tweedale et al., The Clementine Text Project (2005; correções posteriores). Arquivo Text/Lam.lat do repositório bitbucket.org/clementinetextproject/text."
license: "domínio público"
publishable: true
related: []
---

# Lamentationes

## Prologus

Et factum est, postquam in captivitatem redactus est Israël, et Jerusalem deserta est, sedit Jeremias propheta flens, et planxit lamentatione hac in Jerusalem : et amaro animo suspirans et ejulans, dixit :

## Capítulo 1

**1** **Aleph** Quomodo sedet sola  
civitas plena populo !  
Facta est quasi vidua  
domina gentium ;  
princeps provinciarum  
facta est sub tributo. ^lam-1-1

**2** **Beth** Plorans ploravit in nocte,  
et lacrimae ejus in maxillis ejus :  
non est qui consoletur eam  
ex omnibus caris ejus ;  
omnes amici ejus spreverunt eam,  
et facti sunt ei inimici. ^lam-1-2

**3** **Ghimel** Migravit Judas propter afflictionem,  
et multitudinem servitutis ;  
habitavit inter gentes,  
nec invenit requiem :  
omnes persecutores ejus apprehenderunt eam  
inter angustias. ^lam-1-3

**4** **Daleth** Viae Sion lugent, eo quod non sint  
qui veniant ad solemnitatem :  
omnes portae ejus destructae,  
sacerdotes ejus gementes ;  
virgines ejus squalidae,  
et ipsa oppressa amaritudine. ^lam-1-4

**5** **He** Facti sunt hostes ejus in capite ;  
inimici ejus locupletati sunt :  
quia Dominus locutus est super eam  
propter multitudinem iniquitatum ejus.  
Parvuli ejus ducti sunt in captivitatem  
ante faciem tribulantis. ^lam-1-5

**6** **Vau** Et egressus est a filia Sion  
omnis decor ejus ;  
facti sunt principes ejus velut arietes  
non invenientes pascua,  
et abierunt absque fortitudine  
ante faciem subsequentis. ^lam-1-6

**7** **Zain** Recordata est Jerusalem dierum afflictionis suae,  
et praevaricationis,  
omnium desiderabilium suorum,  
quae habuerat a diebus antiquis,  
cum caderet populus ejus in manu hostili,  
et non esset auxiliator :  
viderunt eam hostes,  
et deriserunt sabbata ejus. ^lam-1-7

**8** **Heth** Peccatum peccavit Jerusalem,  
propterea instabilis facta est ;  
omnes qui glorificabant eam spreverunt illam,  
quia viderunt ignominiam ejus :  
ipsa autem gemens  
conversa est retrorsum. ^lam-1-8

**9** **Teth** Sordes ejus in pedibus ejus,  
nec recordata est finis sui ;  
deposita est vehementer,  
non habens consolatorem.  
Vide, Domine, afflictionem meam,  
quoniam erectus est inimicus. ^lam-1-9

**10** **Jod** Manum suam misit hostis  
ad omnia desiderabilia ejus,  
quia vidit gentes  
ingressas sanctuarium suum,  
de quibus praeceperas  
ne intrarent in ecclesiam tuam. ^lam-1-10

**11** **Caph** Omnis populus ejus gemens,  
et quaerens panem ;  
dederunt pretiosa quaeque pro cibo  
ad refocillandam animam.  
Vide, Domine, et considera  
quoniam facta sum vilis ! ^lam-1-11

**12** **Lamed** O vos omnes qui transitis per viam,  
attendite, et videte  
si est dolor sicut dolor meus !  
quoniam vindemiavit me,  
ut locutus est Dominus,  
in die irae furoris sui. ^lam-1-12

**13** **Mem** De excelso misit ignem in ossibus meis,  
et erudivit me :  
expandit rete pedibus meis,  
convertit me retrorsum ;  
posuit me desolatam,  
tota die moerore confectam. ^lam-1-13

**14** **Nun** Vigilavit jugum iniquitatum mearum ;  
in manu ejus convolutae sunt,  
et impositae collo meo.  
Infirmata est virtus mea :  
dedit me Dominus in manu  
de qua non potero surgere. ^lam-1-14

**15** **Samech** Abstulit omnes magnificos meos Dominus  
de medio mei ;  
vocavit adversum me tempus  
ut contereret electos meos.  
Torcular calcavit Dominus  
virgini filiae Juda. ^lam-1-15

**16** **Ain** Idcirco ego plorans,  
et oculus meus deducens aquas,  
quia longe factus est a me consolator,  
convertens animam meam.  
Facti sunt filii mei perditi,  
quoniam invaluit inimicus. ^lam-1-16

**17** **Phe** Expandit Sion manus suas ;  
non est qui consoletur eam.  
Mandavit Dominus adversum Jacob  
in circuitu ejus hostes ejus ;  
facta est Jerusalem  
quasi polluta menstruis inter eos. ^lam-1-17

**18** **Sade** Justus est Dominus,  
quia os ejus ad iracundiam provocavi.  
Audite, obsecro, universi populi,  
et videte dolorem meum :  
virgines meae et juvenes mei abierunt  
in captivitatem. ^lam-1-18

**19** **Coph** Vocavi amicos meos,  
et ipsi deceperunt me ;  
sacerdotes mei et senes mei  
in urbe consumpti sunt,  
quia quaesierunt cibum sibi  
ut refocillarent animam suam. ^lam-1-19

**20** **Res** Vide, Domine, quoniam tribulor :  
conturbatus est venter meus,  
subversum est cor meum in memetipsa,  
quoniam amaritudine plena sum.  
Foris interfecit gladius,  
et domi mors similis est. ^lam-1-20

**21** **Sin** Audierunt quia ingemisco ego,  
et non est qui consoletur me ;  
omnes inimici mei audierunt malum meum,  
laetati sunt quoniam tu fecisti :  
adduxisti diem consolationis,  
et fient similes mei. ^lam-1-21

**22** **Thau** Ingrediatur omne malum eorum coram te :  
et vindemia eos, sicut vindemiasti me  
propter omnes iniquitates meas :  
multi enim gemitus mei,  
et cor meum moerens. ^lam-1-22

## Capítulo 2

**1** **Aleph** Quomodo obtexit caligine in furore suo  
Dominus filiam Sion ;  
projecit de caelo in terram  
inclytam Israël,  
et non est recordatus scabelli pedum suorum  
in die furoris sui ! ^lam-2-1

**2** **Beth** Praecipitavit Dominus, nec pepercit  
omnia speciosa Jacob :  
destruxit in furore suo  
munitiones virginis Juda,  
et dejecit in terram ;  
polluit regnum et principes ejus. ^lam-2-2

**3** **Ghimel** Confregit in ira furoris sui  
omne cornu Israël ;  
avertit retrorsum dexteram suam  
a facie inimici,  
et succendit in Jacob quasi ignem  
flammae devorantis in gyro. ^lam-2-3

**4** **Daleth** Tetendit arcum suum quasi inimicus,  
firmavit dexteram suam quasi hostis,  
et occidit omne quod pulchrum erat visu  
in tabernaculo filiae Sion ;  
effudit quasi ignem  
indignationem suam. ^lam-2-4

**5** **He** Factus est Dominus velut inimicus,  
praecipitavit Israël :  
praecipitavit omnia moenia ejus,  
dissipavit munitiones ejus,  
et replevit in filia Juda  
humiliatum et humiliatam. ^lam-2-5

**6** **Vau** Et dissipavit quasi hortum tentorium suum ;  
demolitus est tabernaculum suum.  
Oblivioni tradidit Dominus in Sion  
festivitatem et sabbatum ;  
et in opprobrium, et in indignationem furoris sui,  
regem et sacerdotem. ^lam-2-6

**7** **Zain** Repulit Dominus altare suum ;  
maledixit sanctificationi suae :  
tradidit in manu inimici  
muros turrium ejus.  
Vocem dederunt in domo Domini  
sicut in die solemni. ^lam-2-7

**8** **Heth** Cogitavit Dominus dissipare  
murum filiae Sion ;  
tetendit funiculum suum,  
et non avertit manum suam a perditione :  
luxitque antemurale,  
et murus pariter dissipatus est. ^lam-2-8

**9** **Teth** Defixae sunt in terra portae ejus,  
perdidit et contrivit vectes ejus ;  
regem ejus et principes ejus in gentibus :  
non est lex,  
et prophetae ejus non invenerunt  
visionem a Domino. ^lam-2-9

**10** **Jod** Sederunt in terra, conticuerunt  
senes filiae Sion ;  
consperserunt cinere capita sua,  
accincti sunt ciliciis :  
abjecerunt in terram capita sua  
virgines Jerusalem. ^lam-2-10

**11** **Caph** Defecerunt prae lacrimis oculi mei,  
conturbata sunt viscera mea ;  
effusum est in terra jecur meum  
super contritione filiae populi mei,  
cum deficeret parvulus et lactens  
in plateis oppidi. ^lam-2-11

**12** **Lamed** Matribus suis dixerunt :  
Ubi est triticum et vinum ?  
cum deficerent quasi vulnerati  
in plateis civitatis,  
cum exhalarent animas suas  
in sinu matrum suarum. ^lam-2-12

**13** **Mem** Cui comparabo te, vel cui assimilabo te,  
filia Jerusalem ?  
cui exaequabo te, et consolabor te,  
virgo, filia Sion ?  
magna est enim velut mare contritio tua :  
quis medebitur tui ? ^lam-2-13

**14** **Nun** Prophetae tui viderunt tibi  
falsa et stulta ;  
nec aperiebant iniquitatem tuam,  
ut te ad poenitentiam provocarent ;  
viderunt autem tibi assumptiones falsas,  
et ejectiones. ^lam-2-14

**15** **Samech** Plauserunt super te manibus  
omnes transeuntes per viam ;  
sibilaverunt et moverunt caput suum  
super filiam Jerusalem :  
Haeccine est urbs, dicentes, perfecti decoris,  
gaudium universae terrae ? ^lam-2-15

**16** **Phe** Aperuerunt super te os suum  
omnes inimici tui :  
sibilaverunt, et fremuerunt dentibus,  
et dixerunt : Devorabimus :  
en ista est dies quam exspectabamus ;  
invenimus, vidimus. ^lam-2-16

**17** **Ain** Fecit Dominus quae cogitavit ;  
complevit sermonem suum,  
quem praeceperat a diebus antiquis :  
destruxit, et non pepercit,  
et laetificavit super te inimicum,  
et exaltavit cornu hostium tuorum. ^lam-2-17

**18** **Sade** Clamavit cor eorum ad Dominum  
super muros filiae Sion :  
Deduc quasi torrentem lacrimas  
per diem et noctem ;  
non des requiem tibi,  
neque taceat pupilla oculi tui. ^lam-2-18

**19** **Coph** Consurge, lauda in nocte,  
in principio vigiliarum ;  
effunde sicut aquam cor tuum  
ante conspectum Domini :  
leva ad eum manus tuas  
pro anima parvulorum tuorum,  
qui defecerunt in fame  
in capite omnium compitorum. ^lam-2-19

**20** **Res** Vide, Domine, et considera  
quem vindemiaveris ita.  
Ergone comedent mulieres fructum suum,  
parvulos ad mensuram palmae ?  
si occiditur in sanctuario Domini  
sacerdos et propheta ? ^lam-2-20

**21** **Sin** Jacuerunt in terra foris  
puer et senex ;  
virgines meae et juvenes mei  
ceciderunt in gladio :  
interfecisti in die furoris tui,  
percussisti, nec misertus es. ^lam-2-21

**22** **Thau** Vocasti quasi ad diem solemnem,  
qui terrerent me de circuitu ;  
et non fuit in die furoris Domini qui effugeret,  
et relinqueretur :  
quos educavi et enutrivi,  
inimicus meus consumpsit eos. ^lam-2-22

## Capítulo 3

**1** **Aleph** Ego vir videns paupertatem meam  
in virga indignationis ejus. ^lam-3-1

**2** **Aleph** Me minavit, et adduxit in tenebras,  
et non in lucem. ^lam-3-2

**3** **Aleph** Tantum in me vertit et convertit  
manum suam tota die. ^lam-3-3

**4** **Beth** Vetustam fecit pellem meam et carnem meam ;  
contrivit ossa mea. ^lam-3-4

**5** **Beth** Aedificavit in gyro meo, et circumdedit me  
felle et labore. ^lam-3-5

**6** **Beth** In tenebrosis collocavit me,  
quasi mortuos sempiternos. ^lam-3-6

**7** **Ghimel** Circumaedificavit adversum me, ut non egrediar ;  
aggravavit compedem meum. ^lam-3-7

**8** **Ghimel** Sed et cum clamavero, et rogavero,  
exclusit orationem meam. ^lam-3-8

**9** **Ghimel** Conclusit vias meas lapidibus quadris ;  
semitas meas subvertit. ^lam-3-9

**10** **Daleth** Ursus insidians factus est mihi,  
leo in absconditis. ^lam-3-10

**11** **Daleth** Semitas meas subvertit, et confregit me ;  
posuit me desolatam. ^lam-3-11

**12** **Daleth** Tetendit arcum suum, et posuit me  
quasi signum ad sagittam. ^lam-3-12

**13** **He** Misit in renibus meis  
filias pharetrae suae. ^lam-3-13

**14** **He** Factus sum in derisum omni populo meo,  
canticum eorum tota die. ^lam-3-14

**15** **He** Replevit me amaritudinibus ;  
inebriavit me absinthio. ^lam-3-15

**16** **Vau** Et fregit ad numerum dentes meos ;  
cibavit me cinere. ^lam-3-16

**17** **Vau** Et repulsa est a pace anima mea ;  
oblitus sum bonorum. ^lam-3-17

**18** **Vau** Et dixi : Periit finis meus,  
et spes mea a Domino. ^lam-3-18

**19** **Zain** Recordare paupertatis, et transgressionis meae,  
absinthii et fellis. ^lam-3-19

**20** **Zain** Memoria memor ero, et tabescet  
in me anima mea. ^lam-3-20

**21** **Zain** Haec recolens in corde meo,  
ideo sperabo. ^lam-3-21

**22** **Heth** Misericordiae Domini, quia non sumus consumpti ;  
quia non defecerunt miserationes ejus. ^lam-3-22

**23** **Heth** Novi diluculo,  
multa est fides tua. ^lam-3-23

**24** **Heth** Pars mea Dominus, dixit anima mea ;  
propterea exspectabo eum. ^lam-3-24

**25** **Teth** Bonus est Dominus sperantibus in eum,  
animae quaerenti illum. ^lam-3-25

**26** **Teth** Bonum est praestolari cum silentio  
salutare Dei. ^lam-3-26

**27** **Teth** Bonum est viro cum portaverit jugum  
ab adolescentia sua. ^lam-3-27

**28** **Jod** Sedebit solitarius, et tacebit,  
quia levavit super se. ^lam-3-28

**29** **Jod** Ponet in pulvere os suum,  
si forte sit spes. ^lam-3-29

**30** **Jod** Dabit percutienti se maxillam :  
saturabitur opprobriis. ^lam-3-30

**31** **Caph** Quia non repellet  
in sempiternum Dominus. ^lam-3-31

**32** **Caph** Quia si abjecit, et miserebitur,  
secundum multitudinem misericordiarum suarum. ^lam-3-32

**33** **Caph** Non enim humiliavit ex corde suo  
et abjecit filios hominum. ^lam-3-33

**34** **Lamed** Ut conteret sub pedibus suis  
omnes vinctos terrae. ^lam-3-34

**35** **Lamed** Ut declinaret judicium viri  
in conspectu vultus Altissimi. ^lam-3-35

**36** **Lamed** Ut perverteret hominem in judicio suo ;  
Dominus ignoravit. ^lam-3-36

**37** **Mem** Quis est iste qui dixit ut fieret,  
Domino non jubente ? ^lam-3-37

**38** **Mem** Ex ore Altissimi non egredientur  
nec mala nec bona ? ^lam-3-38

**39** **Mem** Quid murmuravit homo vivens,  
vir pro peccatis suis ? ^lam-3-39

**40** **Nun** Scrutemur vias nostras, et quaeramus,  
et revertamur ad Dominum. ^lam-3-40

**41** **Nun** Levemus corda nostra cum manibus  
ad Dominum in caelos. ^lam-3-41

**42** **Nun** Nos inique egimus, et ad iracundiam provocavimus ;  
idcirco tu inexorabilis es. ^lam-3-42

**43** **Samech** Operuisti in furore, et percussisti nos ;  
occidisti, nec pepercisti. ^lam-3-43

**44** **Samech** Opposuisti nubem tibi,  
ne transeat oratio. ^lam-3-44

**45** **Samech** Eradicationem et abjectionem posuisti me  
in medio populorum. ^lam-3-45

**46** **Phe** Aperuerunt super nos os suum  
omnes inimici. ^lam-3-46

**47** **Phe** Formido et laqueus facta est nobis  
vaticinatio, et contritio. ^lam-3-47

**48** **Phe** Divisiones aquarum deduxit oculus meus,  
in contritione filiae populi mei. ^lam-3-48

**49** **Ain** Oculus meus afflictus est, nec tacuit,  
eo quod non esset requies. ^lam-3-49

**50** **Ain** Donec respiceret et videret  
Dominus de caelis. ^lam-3-50

**51** **Ain** Oculus meus depraedatus est animam meam  
in cunctis filiabus urbis meae. ^lam-3-51

**52** **Sade** Venatione ceperunt me quasi avem  
inimici mei gratis. ^lam-3-52

**53** **Sade** Lapsa est in lacum vita mea,  
et posuerunt lapidem super me. ^lam-3-53

**54** **Sade** Inundaverunt aquae super caput meum ;  
dixi : Perii. ^lam-3-54

**55** **Coph** Invocavi nomen tuum, Domine,  
de lacu novissimo. ^lam-3-55

**56** **Coph** Vocem meam audisti ; ne avertas aurem tuam  
a singultu meo et clamoribus. ^lam-3-56

**57** **Coph** Appropinquasti in die quando invocavi te ;  
dixisti : Ne timeas. ^lam-3-57

**58** **Res** Judicasti, Domine, causam animae meae,  
redemptor vitae meae. ^lam-3-58

**59** **Res** Vidisti, Domine, iniquitatem illorum adversum me :  
judica judicium meum. ^lam-3-59

**60** **Res** Vidisti omnem furorem,  
universas cogitationes eorum adversum me. ^lam-3-60

**61** **Sin** Audisti opprobrium eorum, Domine,  
omnes cogitationes eorum adversum me. ^lam-3-61

**62** **Sin** Labia insurgentium mihi, et meditationes eorum  
adversum me tota die. ^lam-3-62

**63** **Sin** Sessionem eorum et resurrectionem eorum vide ;  
ego sum psalmus eorum. ^lam-3-63

**64** **Thau** Reddes eis vicem, Domine,  
juxta opera manuum suarum. ^lam-3-64

**65** **Thau** Dabis eis scutum cordis,  
laborem tuum. ^lam-3-65

**66** **Thau** Persequeris in furore, et conteres eos  
sub caelis, Domine. ^lam-3-66

## Capítulo 4

**1** **Aleph** Quomodo obscuratum est aurum,  
mutatus est color optimus !  
dispersi sunt lapides sanctuarii  
in capite omnium platearum ! ^lam-4-1

**2** **Beth** Filii Sion inclyti,  
et amicti auro primo :  
quomodo reputati sunt in vasa testea,  
opus manuum figuli ! ^lam-4-2

**3** **Ghimel** Sed et lamiae nudaverunt mammam,  
lactaverunt catulos suos :  
filia populi mei crudelis  
quasi struthio in deserto. ^lam-4-3

**4** **Daleth** Adhaesit lingua lactentis  
ad palatum ejus in siti ;  
parvuli petierunt panem,  
et non erat qui frangeret eis. ^lam-4-4

**5** **He** Qui vescebantur voluptuose,  
interierunt in viis ;  
qui nutriebantur in croceis,  
amplexati sunt stercora. ^lam-4-5

**6** **Vau** Et major effecta est iniquitas filiae populi mei  
peccato Sodomorum,  
quae subversa est in momento,  
et non ceperunt in ea manus. ^lam-4-6

**7** **Zain** Candidiores Nazaraei ejus nive,  
nitidiores lacte,  
rubicundiores ebore antiquo,  
sapphiro pulchriores. ^lam-4-7

**8** **Heth** Denigrata est super carbones facies eorum  
et non sunt cogniti in plateis ;  
adhaesit cutis eorum ossibus :  
aruit, et facta est quasi lignum. ^lam-4-8

**9** **Teth** Melius fuit occisis gladio  
quam interfectis fame,  
quoniam isti extabuerunt consumpti  
a sterilitate terrae. ^lam-4-9

**10** **Jod** Manus mulierum misericordium  
coxerunt filios suos ;  
facti sunt cibus earum  
in contritione filiae populi mei. ^lam-4-10

**11** **Caph** Complevit Dominus furorem suum,  
effudit iram indignationis suae :  
et succendit ignem in Sion,  
et devoravit fundamenta ejus. ^lam-4-11

**12** **Lamed** Non crediderunt reges terrae,  
et universi habitatores orbis,  
quoniam ingrederetur hostis et inimicus  
per portas Jerusalem. ^lam-4-12

**13** **Mem** Propter peccata prophetarum ejus,  
et iniquitates sacerdotum ejus,  
qui effuderunt in medio ejus  
sanguinem justorum. ^lam-4-13

**14** **Nun** Erraverunt caeci in plateis,  
polluti sunt in sanguine ;  
cumque non possent,  
tenuerunt lacinias suas. ^lam-4-14

**15** **Samech** Recedite polluti, clamaverunt eis ;  
recedite, abite, nolite tangere :  
jurgati quippe sunt, et commoti dixerunt inter gentes :  
Non addet ultra ut habitet in eis. ^lam-4-15

**16** **Phe** Facies Domini divisit eos,  
non addet ut respiciat eos ;  
facies sacerdotum non erubuerunt,  
neque senum miserti sunt. ^lam-4-16

**17** **Ain** Cum adhuc subsisteremus, defecerunt oculi nostri  
ad auxilium nostrum vanum ;  
cum respiceremus attenti ad gentem  
quae salvare non poterat. ^lam-4-17

**18** **Sade** Lubricaverunt vestigia nostra  
in itinere platearum nostrarum ;  
appropinquavit finis noster, completi sunt dies nostri,  
quia venit finis noster. ^lam-4-18

**19** **Coph** Velociores fuerunt persecutores nostri  
aquilis caeli ;  
super montes persecuti sunt nos,  
in deserto insidiati sunt nobis. ^lam-4-19

**20** **Res** Spiritus oris nostri, christus Dominus,  
captus est in peccatis nostris,  
cui diximus : In umbra tua  
vivemus in gentibus. ^lam-4-20

**21** **Sin** Gaude et laetare, filia Edom,  
quae habitas in terra Hus !  
ad te quoque perveniet calix : inebriaberis,  
atque nudaberis. ^lam-4-21

**22** **Thau** Completa est iniquitas tua, filia Sion :  
non addet ultra ut transmigret te.  
Visitavit iniquitatem tuam, filia Edom ;  
discooperuit peccata tua. ^lam-4-22

## Capítulo 5

*Oratio Jeremiae prophetae*

**1** Recordare, Domine, quid acciderit nobis ;  
intuere et respice opprobrium nostrum. ^lam-5-1

**2** Haereditas nostra versa est ad alienos,  
domus nostrae ad extraneos. ^lam-5-2

**3** Pupilli facti sumus absque patre,  
matres nostrae quasi viduae. ^lam-5-3

**4** Aquam nostram pecunia bibimus ;  
ligna nostra pretio comparavimus. ^lam-5-4

**5** Cervicibus nostris minabamur,  
lassis non dabatur requies. ^lam-5-5

**6** Aegypto dedimus manum et Assyriis,  
ut saturaremur pane. ^lam-5-6

**7** Patres nostri peccaverunt, et non sunt :  
et nos iniquitates eorum portavimus. ^lam-5-7

**8** Servi dominati sunt nostri :  
non fuit qui redimeret de manu eorum. ^lam-5-8

**9** In animabus nostris afferebamus panem nobis,  
a facie gladii in deserto. ^lam-5-9

**10** Pellis nostra quasi clibanus exusta est,  
a facie tempestatum famis. ^lam-5-10

**11** Mulieres in Sion humiliaverunt,  
et virgines in civitatibus Juda. ^lam-5-11

**12** Principes manu suspensi sunt ;  
facies senum non erubuerunt. ^lam-5-12

**13** Adolescentibus impudice abusi sunt,  
et pueri in ligno corruerunt. ^lam-5-13

**14** Senes defecerunt de portis,  
juvenes de choro psallentium. ^lam-5-14

**15** Defecit gaudium cordis nostri ;  
versus est in luctum chorus noster. ^lam-5-15

**16** Cecidit corona capitis nostri :  
vae nobis, quia peccavimus ! ^lam-5-16

**17** Propterea moestum factum est cor nostrum ;  
ideo contenebrati sunt oculi nostri, ^lam-5-17

**18** propter montem Sion quia disperiit ;  
vulpes ambulaverunt in eo. ^lam-5-18

**19** Tu autem, Domine, in aeternum permanebis,  
solium tuum in generationem et generationem. ^lam-5-19

**20** Quare in perpetuum oblivisceris nostri,  
derelinques nos in longitudine dierum ? ^lam-5-20

**21** Converte nos, Domine, ad te, et convertemur ;  
innova dies nostros, sicut a principio. ^lam-5-21

**22** Sed projiciens repulisti nos :  
iratus es contra nos vehementer. ^lam-5-22