---
id: vulgata-clementina-ps-lat-tweedale-2005
type: texto_primario
title: "Psalmi (Vulgata Clementina)"
subtitle: null
original_title: "Psalmi"
author: null
year_original: 1592
language: lat
translation:
  - Hieronymus Stridonensis
editor:
  - Michael Tweedale
publisher: null
publication_year: 2005
area: Escrituras
era: século IV d.C. (recensão de 1592)
sistema_referencia: versiculo
abrev: "Ps"
livro_numero: 23
secao: "Livros sapienciais"
canon: "católico (73 livros), sem o apêndice clementino"
scope: "2527 versículos em 150 capítulos"
tags:
  - latim
  - vulgata
  - biblia
  - clementina
  - livros-sapienciais
coautoria:
  - Διαφορεύς
  - Claude Opus 5
status: rascunho
project: pedra_angular
source: "Biblia Sacra juxta Vulgatam Clementinam. Editio electronica: Michael Tweedale et al., The Clementine Text Project (2005; correções posteriores). Arquivo Text/Ps.lat do repositório bitbucket.org/clementinetextproject/text."
license: "domínio público"
publishable: true
related: []
---

# Psalmi

## Capítulo 1

**1** Beatus vir qui non abiit in consilio impiorum,  
et in via peccatorum non stetit,  
et in cathedra pestilentiae non sedit ; ^ps-1-1

**2** sed in lege Domini voluntas ejus,  
et in lege ejus meditabitur die ac nocte. ^ps-1-2

**3** Et erit tamquam lignum quod plantatum est secus decursus aquarum,  
quod fructum suum dabit in tempore suo :  
et folium ejus non defluet ;  
et omnia quaecumque faciet prosperabuntur. ^ps-1-3

**4** Non sic impii, non sic ;  
sed tamquam pulvis quem projicit ventus a facie terrae. ^ps-1-4

**5** Ideo non resurgent impii in judicio,  
neque peccatores in concilio justorum : ^ps-1-5

**6** quoniam novit Dominus viam justorum,  
et iter impiorum peribit. ^ps-1-6

## Capítulo 2

**1** Quare fremuerunt gentes,  
et populi meditati sunt inania ? ^ps-2-1

**2** Astiterunt reges terrae,  
et principes convenerunt in unum  
adversus Dominum, et adversus christum ejus. ^ps-2-2

**3** Dirumpamus vincula eorum,  
et projiciamus a nobis jugum ipsorum. ^ps-2-3

**4** Qui habitat in caelis irridebit eos,  
et Dominus subsannabit eos. ^ps-2-4

**5** Tunc loquetur ad eos in ira sua,  
et in furore suo conturbabit eos. ^ps-2-5

**6** Ego autem constitutus sum rex ab eo  
super Sion, montem sanctum ejus,  
praedicans praeceptum ejus. ^ps-2-6

**7** Dominus dixit ad me : Filius meus es tu ;  
ego hodie genui te. ^ps-2-7

**8** Postula a me, et dabo tibi gentes haereditatem tuam,  
et possessionem tuam terminos terrae. ^ps-2-8

**9** Reges eos in virga ferrea,  
et tamquam vas figuli confringes eos. ^ps-2-9

**10** Et nunc, reges, intelligite ;  
erudimini, qui judicatis terram. ^ps-2-10

**11** Servite Domino in timore,  
et exsultate ei cum tremore. ^ps-2-11

**12** Apprehendite disciplinam, nequando irascatur Dominus,  
et pereatis de via justa. ^ps-2-12

**13** Cum exarserit in brevi ira ejus,  
beati omnes qui confidunt in eo. ^ps-2-13

## Capítulo 3

**1** Psalmus David, cum fugeret a facie Absalom filii sui. ^ps-3-1

**2** Domine, quid multiplicati sunt qui tribulant me ?  
Multi insurgunt adversum me ; ^ps-3-2

**3** multi dicunt animae meae :  
Non est salus ipsi in Deo ejus. ^ps-3-3

**4** Tu autem Domine, susceptor meus es,  
gloria mea, et exaltans caput meum. ^ps-3-4

**5** Voce mea ad Dominum clamavi ;  
et exaudivit me de monte sancto suo. ^ps-3-5

**6** Ego dormivi, et soporatus sum ;  
et exsurrexi, quia Dominus suscepit me. ^ps-3-6

**7** Non timebo millia populi circumdantis me.  
Exsurge, Domine ; salvum me fac, Deus meus. ^ps-3-7

**8** Quoniam tu percussisti omnes adversantes mihi sine causa ;  
dentes peccatorum contrivisti. ^ps-3-8

**9** Domini est salus ;  
et super populum tuum benedictio tua. ^ps-3-9

## Capítulo 4

**1** In finem, in carminibus. Psalmus David. ^ps-4-1

**2** Cum invocarem exaudivit me Deus justitiae meae,  
in tribulatione dilatasti mihi.  
Miserere mei, et exaudi orationem meam. ^ps-4-2

**3** Filii hominum, usquequo gravi corde ?  
ut quid diligitis vanitatem, et quaeritis mendacium ? ^ps-4-3

**4** Et scitote quoniam mirificavit Dominus sanctum suum ;  
Dominus exaudiet me cum clamavero ad eum. ^ps-4-4

**5** Irascimini, et nolite peccare ;  
quae dicitis in cordibus vestris, in cubilibus vestris compungimini. ^ps-4-5

**6** Sacrificate sacrificium justitiae, et sperate in Domino.  
Multi dicunt : Quis ostendit nobis bona ? ^ps-4-6

**7** Signatum est super nos lumen vultus tui, Domine :  
dedisti laetitiam in corde meo. ^ps-4-7

**8** A fructu frumenti, vini, et olei sui, multiplicati sunt. ^ps-4-8

**9** In pace in idipsum dormiam, et requiescam ; ^ps-4-9

**10** quoniam tu, Domine, singulariter in spe constituisti me. ^ps-4-10

## Capítulo 5

**1** In finem, pro ea quae haereditatem consequitur. Psalmus David. ^ps-5-1

**2** Verba mea auribus percipe, Domine ;  
intellige clamorem meum. ^ps-5-2

**3** Intende voci orationis meae,  
rex meus et Deus meus. ^ps-5-3

**4** Quoniam ad te orabo, Domine :  
mane exaudies vocem meam. ^ps-5-4

**5** Mane astabo tibi, et videbo  
quoniam non Deus volens iniquitatem tu es. ^ps-5-5

**6** Neque habitabit juxta te malignus,  
neque permanebunt injusti ante oculos tuos. ^ps-5-6

**7** Odisti omnes qui operantur iniquitatem ;  
perdes omnes qui loquuntur mendacium.  
Virum sanguinum et dolosum abominabitur Dominus. ^ps-5-7

**8** Ego autem in multitudine misericordiae tuae  
introibo in domum tuam ;  
adorabo ad templum sanctum tuum in timore tuo. ^ps-5-8

**9** Domine, deduc me in justitia tua :  
propter inimicos meos dirige in conspectu tuo viam meam. ^ps-5-9

**10** Quoniam non est in ore eorum veritas ;  
cor eorum vanum est. ^ps-5-10

**11** Sepulchrum patens est guttur eorum ;  
linguis suis dolose agebant :  
judica illos, Deus.  
Decidant a cogitationibus suis ;  
secundum multitudinem impietatum eorum expelle eos,  
quoniam irritaverunt te, Domine. ^ps-5-11

**12** Et laetentur omnes qui sperant in te ;  
in aeternum exsultabunt, et habitabis in eis.  
Et gloriabuntur in te omnes qui diligunt nomen tuum, ^ps-5-12

**13** quoniam tu benedices justo.  
Domine, ut scuto bonae voluntatis tuae coronasti nos. ^ps-5-13

## Capítulo 6

**1** In finem, in carminibus. Psalmus David. Pro octava. ^ps-6-1

**2** Domine, ne in furore tuo arguas me,  
neque in ira tua corripias me. ^ps-6-2

**3** Miserere mei, Domine, quoniam infirmus sum ;  
sana me, Domine, quoniam conturbata sunt ossa mea. ^ps-6-3

**4** Et anima mea turbata est valde ;  
sed tu, Domine, usquequo ? ^ps-6-4

**5** Convertere, Domine, et eripe animam meam ;  
salvum me fac propter misericordiam tuam. ^ps-6-5

**6** Quoniam non est in morte qui memor sit tui ;  
in inferno autem quis confitebitur tibi ? ^ps-6-6

**7** Laboravi in gemitu meo ;  
lavabo per singulas noctes lectum meum :  
lacrimis meis stratum meum rigabo. ^ps-6-7

**8** Turbatus est a furore oculus meus ;  
inveteravi inter omnes inimicos meos. ^ps-6-8

**9** Discedite a me omnes qui operamini iniquitatem,  
quoniam exaudivit Dominus vocem fletus mei. ^ps-6-9

**10** Exaudivit Dominus deprecationem meam ;  
Dominus orationem meam suscepit. ^ps-6-10

**11** Erubescant, et conturbentur vehementer, omnes inimici mei ;  
convertantur, et erubescant valde velociter. ^ps-6-11

## Capítulo 7

**1** Psalmus David, quem cantavit Domino pro verbis Chusi, filii Jemini. ^ps-7-1

**2** Domine Deus meus, in te speravi ;  
salvum me fac ex omnibus persequentibus me, et libera me : ^ps-7-2

**3** nequando rapiat ut leo animam meam,  
dum non est qui redimat, neque qui salvum faciat. ^ps-7-3

**4** Domine Deus meus, si feci istud,  
si est iniquitas in manibus meis, ^ps-7-4

**5** si reddidi retribuentibus mihi mala,  
decidam merito ab inimicis meis inanis. ^ps-7-5

**6** Persequatur inimicus animam meam, et comprehendat ;  
et conculcet in terra vitam meam,  
et gloriam meam in pulverem deducat. ^ps-7-6

**7** Exsurge, Domine, in ira tua,  
et exaltare in finibus inimicorum meorum :  
et exsurge, Domine Deus meus, in praecepto quod mandasti, ^ps-7-7

**8** et synagoga populorum circumdabit te :  
et propter hanc in altum regredere : ^ps-7-8

**9** Dominus judicat populos.  
Judica me, Domine, secundum justitiam meam,  
et secundum innocentiam meam super me. ^ps-7-9

**10** Consumetur nequitia peccatorum, et diriges justum,  
scrutans corda et renes, Deus. ^ps-7-10

**11** Justum adjutorium meum a Domino,  
qui salvos facit rectos corde. ^ps-7-11

**12** Deus judex justus, fortis, et patiens ;  
numquid irascitur per singulos dies ? ^ps-7-12

**13** Nisi conversi fueritis, gladium suum vibrabit ;  
arcum suum tetendit, et paravit illum. ^ps-7-13

**14** Et in eo paravit vasa mortis,  
sagittas suas ardentibus effecit. ^ps-7-14

**15** Ecce parturiit injustitiam ;  
concepit dolorem, et peperit iniquitatem. ^ps-7-15

**16** Lacum aperuit, et effodit eum ;  
et incidit in foveam quam fecit. ^ps-7-16

**17** Convertetur dolor ejus in caput ejus,  
et in verticem ipsius iniquitas ejus descendet. ^ps-7-17

**18** Confitebor Domino secundum justitiam ejus,  
et psallam nomini Domini altissimi. ^ps-7-18

## Capítulo 8

**1** In finem, pro torcularibus. Psalmus David. ^ps-8-1

**2** Domine, Dominus noster,  
quam admirabile est nomen tuum in universa terra !  
quoniam elevata est magnificentia tua super caelos. ^ps-8-2

**3** Ex ore infantium et lactentium perfecisti laudem propter inimicos tuos,  
ut destruas inimicum et ultorem. ^ps-8-3

**4** Quoniam videbo caelos tuos, opera digitorum tuorum,  
lunam et stellas quae tu fundasti. ^ps-8-4

**5** Quid est homo, quod memor es ejus ?  
aut filius hominis, quoniam visitas eum ? ^ps-8-5

**6** Minuisti eum paulominus ab angelis ;  
gloria et honore coronasti eum ; ^ps-8-6

**7** et constituisti eum super opera manuum tuarum. ^ps-8-7

**8** Omnia subjecisti sub pedibus ejus,  
oves et boves universas,  
insuper et pecora campi, ^ps-8-8

**9** volucres caeli, et pisces maris  
qui perambulant semitas maris. ^ps-8-9

**10** Domine, Dominus noster,  
quam admirabile est nomen tuum in universa terra ! ^ps-8-10

## Capítulo 9

**1** In finem, pro occultis filii. Psalmus David. ^ps-9-1

**2** Confitebor tibi, Domine, in toto corde meo ;  
narrabo omnia mirabilia tua. ^ps-9-2

**3** Laetabor et exsultabo in te ;  
psallam nomini tuo, Altissime. ^ps-9-3

**4** In convertendo inimicum meum retrorsum ;  
infirmabuntur, et peribunt a facie tua. ^ps-9-4

**5** Quoniam fecisti judicium meum et causam meam ;  
sedisti super thronum, qui judicas justitiam. ^ps-9-5

**6** Increpasti gentes, et periit impius :  
nomen eorum delesti in aeternum, et in saeculum saeculi. ^ps-9-6

**7** Inimici defecerunt frameae in finem,  
et civitates eorum destruxisti.  
Periit memoria eorum cum sonitu ; ^ps-9-7

**8** et Dominus in aeternum permanet.  
Paravit in judicio thronum suum, ^ps-9-8

**9** et ipse judicabit orbem terrae in aequitate :  
judicabit populos in justitia. ^ps-9-9

**10** Et factus est Dominus refugium pauperi ;  
adjutor in opportunitatibus, in tribulatione. ^ps-9-10

**11** Et sperent in te qui noverunt nomen tuum,  
quoniam non dereliquisti quaerentes te, Domine. ^ps-9-11

**12** Psallite Domino qui habitat in Sion ;  
annuntiate inter gentes studia ejus : ^ps-9-12

**13** quoniam requirens sanguinem eorum recordatus est ;  
non est oblitus clamorem pauperum. ^ps-9-13

**14** Miserere mei, Domine :  
vide humilitatem meam de inimicis meis, ^ps-9-14

**15** qui exaltas me de portis mortis,  
ut annuntiem omnes laudationes tuas in portis filiae Sion : ^ps-9-15

**16** exsultabo in salutari tuo.  
Infixae sunt gentes in interitu quem fecerunt ;  
in laqueo isto quem absconderunt  
comprehensus est pes eorum. ^ps-9-16

**17** Cognoscetur Dominus judicia faciens ;  
in operibus manuum suarum comprehensus est peccator. ^ps-9-17

**18** Convertantur peccatores in infernum,  
omnes gentes quae obliviscuntur Deum. ^ps-9-18

**19** Quoniam non in finem oblivio erit pauperis ;  
patientia pauperum non peribit in finem. ^ps-9-19

**20** Exsurge, Domine ; non confortetur homo :  
judicentur gentes in conspectu tuo. ^ps-9-20

**21** Constitue, Domine, legislatorem super eos,  
ut sciant gentes quoniam homines sunt. ^ps-9-21

**22** Ut quid, Domine, recessisti longe ;  
despicis in opportunitatibus, in tribulatione ? ^ps-9-22

**23** Dum superbit impius, incenditur pauper :  
comprehenduntur in consiliis quibus cogitant. ^ps-9-23

**24** Quoniam laudatur peccator in desideriis animae suae,  
et iniquus benedicitur. ^ps-9-24

**25** Exacerbavit Dominum peccator :  
secundum multitudinem irae suae, non quaeret. ^ps-9-25

**26** Non est Deus in conspectu ejus ;  
inquinatae sunt viae illius in omni tempore.  
Auferuntur judicia tua a facie ejus ;  
omnium inimicorum suorum dominabitur. ^ps-9-26

**27** Dixit enim in corde suo : Non movebor  
a generatione in generationem, sine malo. ^ps-9-27

**28** Cujus maledictione os plenum est, et amaritudine, et dolo ;  
sub lingua ejus labor et dolor. ^ps-9-28

**29** Sedet in insidiis cum divitibus in occultis,  
ut interficiat innocentem. ^ps-9-29

**30** Oculi ejus in pauperem respiciunt ;  
insidiatur in abscondito, quasi leo in spelunca sua.  
Insidiatur ut rapiat pauperem ;  
rapere pauperem dum attrahit eum. ^ps-9-30

**31** In laqueo suo humiliabit eum ;  
inclinabit se, et cadet cum dominatus fuerit pauperum. ^ps-9-31

**32** Dixit enim in corde suo : Oblitus est Deus ;  
avertit faciem suam, ne videat in finem. ^ps-9-32

**33** Exsurge, Domine Deus, exaltetur manus tua ;  
ne obliviscaris pauperum. ^ps-9-33

**34** Propter quid irritavit impius Deum ?  
dixit enim in corde suo : Non requiret. ^ps-9-34

**35** Vides, quoniam tu laborem et dolorem consideras,  
ut tradas eos in manus tuas.  
Tibi derelictus est pauper ;  
orphano tu eris adjutor. ^ps-9-35

**36** Contere brachium peccatoris et maligni ;  
quaeretur peccatum illius, et non invenietur. ^ps-9-36

**37** Dominus regnabit in aeternum, et in saeculum saeculi ;  
peribitis, gentes, de terra illius. ^ps-9-37

**38** Desiderium pauperum exaudivit Dominus ;  
praeparationem cordis eorum audivit auris tua : ^ps-9-38

**39** judicare pupillo et humili,  
ut non apponat ultra magnificare se homo super terram. ^ps-9-39

## Capítulo 10

**1** In finem. Psalmus David. ^ps-10-1

**2** In Domino confido ; quomodo dicitis animae meae :  
Transmigra in montem sicut passer ? ^ps-10-2

**3** Quoniam ecce peccatores intenderunt arcum ;  
paraverunt sagittas suas in pharetra,  
ut sagittent in obscuro rectos corde : ^ps-10-3

**4** quoniam quae perfecisti destruxerunt ;  
justus autem, quid fecit ? ^ps-10-4

**5** Dominus in templo sancto suo ;  
Dominus in caelo sedes ejus.  
Oculi ejus in pauperem respiciunt ;  
palpebrae ejus interrogant filios hominum. ^ps-10-5

**6** Dominus interrogat justum et impium ;  
qui autem diligit iniquitatem, odit animam suam. ^ps-10-6

**7** Pluet super peccatores laqueos ;  
ignis et sulphur, et spiritus procellarum, pars calicis eorum. ^ps-10-7

**8** Quoniam justus Dominus, et justitias dilexit :  
aequitatem vidit vultus ejus. ^ps-10-8

## Capítulo 11

**1** In finem, pro octava. Psalmus David. ^ps-11-1

**2** Salvum me fac, Domine, quoniam defecit sanctus,  
quoniam diminutae sunt veritates a filiis hominum. ^ps-11-2

**3** Vana locuti sunt unusquisque ad proximum suum ;  
labia dolosa, in corde et corde locuti sunt. ^ps-11-3

**4** Disperdat Dominus universa labia dolosa,  
et linguam magniloquam. ^ps-11-4

**5** Qui dixerunt : Linguam nostram magnificabimus ;  
labia nostra a nobis sunt.  
Quis noster dominus est ? ^ps-11-5

**6** Propter miseriam inopum, et gemitum pauperum,  
nunc exsurgam, dicit Dominus.  
Ponam in salutari ;  
fiducialiter agam in eo. ^ps-11-6

**7** Eloquia Domini, eloquia casta ; argentum igne examinatum,  
probatum terrae, purgatum septuplum. ^ps-11-7

**8** Tu, Domine, servabis nos,  
et custodies nos a generatione hac in aeternum. ^ps-11-8

**9** In circuitu impii ambulant :  
secundum altitudinem tuam multiplicasti filios hominum. ^ps-11-9

## Capítulo 12

**1** In finem. Psalmus David. Usquequo, Domine, oblivisceris me in finem ?  
usquequo avertis faciem tuam a me ? ^ps-12-1

**2** quamdiu ponam consilia in anima mea ;  
dolorem in corde meo per diem ? ^ps-12-2

**3** usquequo exaltabitur inimicus meus super me ? ^ps-12-3

**4** Respice, et exaudi me, Domine Deus meus.  
Illumina oculos meos, ne umquam obdormiam in morte ; ^ps-12-4

**5** nequando dicat inimicus meus : Praevalui adversus eum.  
Qui tribulant me exsultabunt si motus fuero ; ^ps-12-5

**6** ego autem in misericordia tua speravi.  
Exsultabit cor meum in salutari tuo.  
Cantabo Domino qui bona tribuit mihi ;  
et psallam nomini Domini altissimi. ^ps-12-6

## Capítulo 13

**1** In finem. Psalmus David. Dixit insipiens in corde suo : Non est Deus.  
Corrupti sunt, et abominabiles facti sunt in studiis suis ;  
non est qui faciat bonum, non est usque ad unum. ^ps-13-1

**2** Dominus de caelo prospexit super filios hominum,  
ut videat si est intelligens, aut requirens Deum. ^ps-13-2

**3** Omnes declinaverunt, simul inutiles facti sunt.  
Non est qui faciat bonum, non est usque ad unum.  
Sepulchrum patens est guttur eorum ;  
linguis suis dolose agebant.  
Venenum aspidum sub labiis eorum,  
quorum os maledictione et amaritudine plenum est ;  
veloces pedes eorum ad effundendum sanguinem.  
Contritio et infelicitas in viis eorum,  
et viam pacis non cognoverunt ;  
non est timor Dei ante oculos eorum. ^ps-13-3

**4** Nonne cognoscent omnes qui operantur iniquitatem,  
qui devorant plebem meam sicut escam panis ? ^ps-13-4

**5** Dominum non invocaverunt ;  
illic trepidaverunt timore, ubi non erat timor. ^ps-13-5

**6** Quoniam Dominus in generatione justa est :  
consilium inopis confudistis,  
quoniam Dominus spes ejus est. ^ps-13-6

**7** Quis dabit ex Sion salutare Israël ?  
Cum averterit Dominus captivitatem plebis suae,  
exsultabit Jacob, et laetabitur Israël. ^ps-13-7

## Capítulo 14

**1** Psalmus David. Domine, quis habitabit in tabernaculo tuo ?  
aut quis requiescet in monte sancto tuo ? ^ps-14-1

**2** Qui ingreditur sine macula,  
et operatur justitiam ; ^ps-14-2

**3** qui loquitur veritatem in corde suo :  
qui non egit dolum in lingua sua,  
nec fecit proximo suo malum,  
et opprobrium non accepit adversus proximos suos. ^ps-14-3

**4** Ad nihilum deductus est in conspectu ejus malignus ;  
timentes autem Dominum glorificat.  
Qui jurat proximo suo, et non decipit ; ^ps-14-4

**5** qui pecuniam suam non dedit ad usuram,  
et munera super innocentem non accepit :  
qui facit haec non movebitur in aeternum. ^ps-14-5

## Capítulo 15

**1** Tituli inscriptio, ipsi David. Conserva me, Domine, quoniam speravi in te. ^ps-15-1

**2** Dixi Domino : Deus meus es tu,  
quoniam bonorum meorum non eges. ^ps-15-2

**3** Sanctis qui sunt in terra ejus,  
mirificavit omnes voluntates meas in eis. ^ps-15-3

**4** Multiplicatae sunt infirmitates eorum :  
postea acceleraverunt.  
Non congregabo conventicula eorum de sanguinibus,  
nec memor ero nominum eorum per labia mea. ^ps-15-4

**5** Dominus pars haereditatis meae, et calicis mei :  
tu es qui restitues haereditatem meam mihi. ^ps-15-5

**6** Funes ceciderunt mihi in praeclaris ;  
etenim haereditas mea praeclara est mihi. ^ps-15-6

**7** Benedicam Dominum qui tribuit mihi intellectum ;  
insuper et usque ad noctem increpuerunt me renes mei. ^ps-15-7

**8** Providebam Dominum in conspectu meo semper :  
quoniam a dextris est mihi, ne commovear. ^ps-15-8

**9** Propter hoc laetatum est cor meum, et exsultavit lingua mea ;  
insuper et caro mea requiescet in spe. ^ps-15-9

**10** Quoniam non derelinques animam meam in inferno,  
nec dabis sanctum tuum videre corruptionem.  
Notas mihi fecisti vias vitae ;  
adimplebis me laetitia cum vultu tuo :  
delectationes in dextera tua usque in finem. ^ps-15-10

## Capítulo 16

**1** Oratio David. Exaudi, Domine, justitiam meam ;  
intende deprecationem meam.  
Auribus percipe orationem meam,  
non in labiis dolosis. ^ps-16-1

**2** De vultu tuo judicium meum prodeat ;  
oculi tui videant aequitates. ^ps-16-2

**3** Probasti cor meum, et visitasti nocte ;  
igne me examinasti, et non est inventa in me iniquitas. ^ps-16-3

**4** Ut non loquatur os meum opera hominum :  
propter verba labiorum tuorum, ego custodivi vias duras. ^ps-16-4

**5** Perfice gressus meos in semitis tuis,  
ut non moveantur vestigia mea. ^ps-16-5

**6** Ego clamavi, quoniam exaudisti me, Deus ;  
inclina aurem tuam mihi, et exaudi verba mea. ^ps-16-6

**7** Mirifica misericordias tuas,  
qui salvos facis sperantes in te. ^ps-16-7

**8** A resistentibus dexterae tuae custodi me  
ut pupillam oculi.  
Sub umbra alarum tuarum protege me ^ps-16-8

**9** a facie impiorum qui me afflixerunt.  
Inimici mei animam meam circumdederunt ; ^ps-16-9

**10** adipem suum concluserunt :  
os eorum locutum est superbiam. ^ps-16-10

**11** Projicientes me nunc circumdederunt me ;  
oculos suos statuerunt declinare in terram. ^ps-16-11

**12** Susceperunt me sicut leo paratus ad praedam,  
et sicut catulus leonis habitans in abditis. ^ps-16-12

**13** Exsurge, Domine : praeveni eum, et supplanta eum :  
eripe animam meam ab impio ;  
frameam tuam ^ps-16-13

**14** ab inimicis manus tuae.  
Domine, a paucis de terra divide eos in vita eorum ;  
de absconditis tuis adimpletus est venter eorum.  
Saturati sunt filiis,  
et dimiserunt reliquias suas parvulis suis. ^ps-16-14

**15** Ego autem in justitia apparebo conspectui tuo ;  
satiabor cum apparuerit gloria tua. ^ps-16-15

## Capítulo 17

**1** In finem. Puero Domini David, qui locutus est Domino verba cantici hujus, in die qua eripuit eum Dominus de manu omnium inimicorum ejus, et de manu Saul, et dixit : ^ps-17-1

**2** Diligam te, Domine, fortitudo mea. ^ps-17-2

**3** Dominus firmamentum meum, et refugium meum, et liberator meus.  
Deus meus adjutor meus, et sperabo in eum ;  
protector meus, et cornu salutis meae, et susceptor meus. ^ps-17-3

**4** Laudans invocabo Dominum,  
et ab inimicis meis salvus ero. ^ps-17-4

**5** Circumdederunt me dolores mortis,  
et torrentes iniquitatis conturbaverunt me. ^ps-17-5

**6** Dolores inferni circumdederunt me ;  
praeoccupaverunt me laquei mortis. ^ps-17-6

**7** In tribulatione mea invocavi Dominum,  
et ad Deum meum clamavi :  
et exaudivit de templo sancto suo vocem meam ;  
et clamor meus in conspectu ejus introivit in aures ejus. ^ps-17-7

**8** Commota est, et contremuit terra ;  
fundamenta montium conturbata sunt, et commota sunt :  
quoniam iratus est eis. ^ps-17-8

**9** Ascendit fumus in ira ejus,  
et ignis a facie ejus exarsit ;  
carbones succensi sunt ab eo. ^ps-17-9

**10** Inclinavit caelos, et descendit,  
et caligo sub pedibus ejus. ^ps-17-10

**11** Et ascendit super cherubim, et volavit ;  
volavit super pennas ventorum. ^ps-17-11

**12** Et posuit tenebras latibulum suum ;  
in circuitu ejus tabernaculum ejus,  
tenebrosa aqua in nubibus aëris. ^ps-17-12

**13** Prae fulgore in conspectu ejus nubes transierunt ;  
grando et carbones ignis. ^ps-17-13

**14** Et intonuit de caelo Dominus,  
et Altissimus dedit vocem suam :  
grando et carbones ignis. ^ps-17-14

**15** Et misit sagittas suas, et dissipavit eos ;  
fulgura multiplicavit, et conturbavit eos. ^ps-17-15

**16** Et apparuerunt fontes aquarum,  
et revelata sunt fundamenta orbis terrarum,  
ab increpatione tua, Domine,  
ab inspiratione spiritus irae tuae. ^ps-17-16

**17** Misit de summo, et accepit me ;  
et assumpsit me de aquis multis. ^ps-17-17

**18** Eripuit me de inimicis meis fortissimis, et ab his qui oderunt me.  
Quoniam confortati sunt super me ; ^ps-17-18

**19** praevenerunt me in die afflictionis meae :  
et factus est Dominus protector meus. ^ps-17-19

**20** Et eduxit me in latitudinem ;  
salvum me fecit, quoniam voluit me, ^ps-17-20

**21** et retribuet mihi Dominus secundum justitiam meam,  
et secundum puritatem manuum mearum retribuet mihi : ^ps-17-21

**22** quia custodivi vias Domini,  
nec impie gessi a Deo meo ; ^ps-17-22

**23** quoniam omnia judicia ejus in conspectu meo,  
et justitias ejus non repuli a me. ^ps-17-23

**24** Et ero immaculatus cum eo ;  
et observabo me ab iniquitate mea. ^ps-17-24

**25** Et retribuet mihi Dominus secundum justitiam meam,  
et secundum puritatem manuum mearum in conspectu oculorum ejus. ^ps-17-25

**26** Cum sancto sanctus eris,  
et cum viro innocente innocens eris, ^ps-17-26

**27** et cum electo electus eris,  
et cum perverso perverteris. ^ps-17-27

**28** Quoniam tu populum humilem salvum facies,  
et oculos superborum humiliabis. ^ps-17-28

**29** Quoniam tu illuminas lucernam meam, Domine ;  
Deus meus, illumina tenebras meas. ^ps-17-29

**30** Quoniam in te eripiar a tentatione ;  
et in Deo meo transgrediar murum. ^ps-17-30

**31** Deus meus, impolluta via ejus ;  
eloquia Domini igne examinata :  
protector est omnium sperantium in se. ^ps-17-31

**32** Quoniam quis deus praeter Dominum ?  
aut quis deus praeter Deum nostrum ? ^ps-17-32

**33** Deus qui praecinxit me virtute,  
et posuit immaculatam viam meam ; ^ps-17-33

**34** qui perfecit pedes meos tamquam cervorum,  
et super excelsa statuens me ; ^ps-17-34

**35** qui docet manus meas ad praelium.  
Et posuisti, ut arcum aereum, brachia mea, ^ps-17-35

**36** et dedisti mihi protectionem salutis tuae :  
et dextera tua suscepit me,  
et disciplina tua correxit me in finem,  
et disciplina tua ipsa me docebit. ^ps-17-36

**37** Dilatasti gressus meos subtus me,  
et non sunt infirmata vestigia mea. ^ps-17-37

**38** Persequar inimicos meos, et comprehendam illos ;  
et non convertar donec deficiant. ^ps-17-38

**39** Confringam illos, nec poterunt stare ;  
cadent subtus pedes meos. ^ps-17-39

**40** Et praecinxisti me virtute ad bellum,  
et supplantasti insurgentes in me subtus me. ^ps-17-40

**41** Et inimicos meos dedisti mihi dorsum,  
et odientes me disperdidisti. ^ps-17-41

**42** Clamaverunt, nec erat qui salvos faceret ;  
ad Dominum, nec exaudivit eos. ^ps-17-42

**43** Et comminuam eos ut pulverem ante faciem venti ;  
ut lutum platearum delebo eos. ^ps-17-43

**44** Eripies me de contradictionibus populi ;  
constitues me in caput gentium. ^ps-17-44

**45** Populus quem non cognovi servivit mihi ;  
in auditu auris obedivit mihi. ^ps-17-45

**46** Filii alieni mentiti sunt mihi,  
filii alieni inveterati sunt,  
et claudicaverunt a semitis suis. ^ps-17-46

**47** Vivit Dominus, et benedictus Deus meus,  
et exaltetur Deus salutis meae. ^ps-17-47

**48** Deus qui das vindictas mihi,  
et subdis populos sub me ;  
liberator meus de inimicis meis iracundis. ^ps-17-48

**49** Et ab insurgentibus in me exaltabis me ;  
a viro iniquo eripies me. ^ps-17-49

**50** Propterea confitebor tibi in nationibus, Domine,  
et nomini tuo psalmum dicam ; ^ps-17-50

**51** magnificans salutes regis ejus,  
et faciens misericordiam christo suo David,  
et semini ejus usque in saeculum. ^ps-17-51

## Capítulo 18

**1** In finem. Psalmus David. ^ps-18-1

**2** Caeli enarrant gloriam Dei,  
et opera manuum ejus annuntiat firmamentum. ^ps-18-2

**3** Dies diei eructat verbum,  
et nox nocti indicat scientiam. ^ps-18-3

**4** Non sunt loquelae, neque sermones,  
quorum non audiantur voces eorum. ^ps-18-4

**5** In omnem terram exivit sonus eorum,  
et in fines orbis terrae verba eorum. ^ps-18-5

**6** In sole posuit tabernaculum suum ;  
et ipse tamquam sponsus procedens de thalamo suo.  
Exsultavit ut gigas ad currendam viam ; ^ps-18-6

**7** a summo caelo egressio ejus.  
Et occursus ejus usque ad summum ejus ;  
nec est qui se abscondat a calore ejus. ^ps-18-7

**8** Lex Domini immaculata, convertens animas ;  
testimonium Domini fidele, sapientiam praestans parvulis. ^ps-18-8

**9** Justitiae Domini rectae, laetificantes corda ;  
praeceptum Domini lucidum, illuminans oculos. ^ps-18-9

**10** Timor Domini sanctus, permanens in saeculum saeculi ;  
judicia Domini vera, justificata in semetipsa, ^ps-18-10

**11** desiderabilia super aurum et lapidem pretiosum multum,  
et dulciora super mel et favum. ^ps-18-11

**12** Etenim servus tuus custodit ea ;  
in custodiendis illis retributio multa. ^ps-18-12

**13** Delicta quis intelligit ?  
ab occultis meis munda me ; ^ps-18-13

**14** et ab alienis parce servo tuo.  
Si mei non fuerint dominati, tunc immaculatus ero,  
et emundabor a delicto maximo. ^ps-18-14

**15** Et erunt ut complaceant eloquia oris mei,  
et meditatio cordis mei in conspectu tuo semper.  
Domine, adjutor meus, et redemptor meus. ^ps-18-15

## Capítulo 19

**1** In finem. Psalmus David. ^ps-19-1

**2** Exaudiat te Dominus in die tribulationis ;  
protegat te nomen Dei Jacob. ^ps-19-2

**3** Mittat tibi auxilium de sancto,  
et de Sion tueatur te. ^ps-19-3

**4** Memor sit omnis sacrificii tui,  
et holocaustum tuum pingue fiat. ^ps-19-4

**5** Tribuat tibi secundum cor tuum,  
et omne consilium tuum confirmet. ^ps-19-5

**6** Laetabimur in salutari tuo ;  
et in nomine Dei nostri magnificabimur. ^ps-19-6

**7** Impleat Dominus omnes petitiones tuas ;  
nunc cognovi quoniam salvum fecit Dominus christum suum.  
Exaudiet illum de caelo sancto suo,  
in potentatibus salus dexterae ejus. ^ps-19-7

**8** Hi in curribus, et hi in equis ;  
nos autem in nomine Domini Dei nostri invocabimus. ^ps-19-8

**9** Ipsi obligati sunt, et ceciderunt ;  
nos autem surreximus, et erecti sumus. ^ps-19-9

**10** Domine, salvum fac regem,  
et exaudi nos in die qua invocaverimus te. ^ps-19-10

## Capítulo 20

**1** In finem. Psalmus David. ^ps-20-1

**2** Domine, in virtute tua laetabitur rex,  
et super salutare tuum exsultabit vehementer. ^ps-20-2

**3** Desiderium cordis ejus tribuisti ei,  
et voluntate labiorum ejus non fraudasti eum. ^ps-20-3

**4** Quoniam praevenisti eum in benedictionibus dulcedinis ;  
posuisti in capite ejus coronam de lapide pretioso. ^ps-20-4

**5** Vitam petiit a te, et tribuisti ei longitudinem dierum,  
in saeculum, et in saeculum saeculi. ^ps-20-5

**6** Magna est gloria ejus in salutari tuo ;  
gloriam et magnum decorem impones super eum. ^ps-20-6

**7** Quoniam dabis eum in benedictionem in saeculum saeculi ;  
laetificabis eum in gaudio cum vultu tuo. ^ps-20-7

**8** Quoniam rex sperat in Domino,  
et in misericordia Altissimi non commovebitur. ^ps-20-8

**9** Inveniatur manus tua omnibus inimicis tuis ;  
dextera tua inveniat omnes qui te oderunt. ^ps-20-9

**10** Pones eos ut clibanum ignis in tempore vultus tui :  
Dominus in ira sua conturbabit eos,  
et devorabit eos ignis. ^ps-20-10

**11** Fructum eorum de terra perdes,  
et semen eorum a filiis hominum, ^ps-20-11

**12** quoniam declinaverunt in te mala ;  
cogitaverunt consilia quae non potuerunt stabilire. ^ps-20-12

**13** Quoniam pones eos dorsum ;  
in reliquiis tuis praeparabis vultum eorum. ^ps-20-13

**14** Exaltare, Domine, in virtute tua ;  
cantabimus et psallemus virtutes tuas. ^ps-20-14

## Capítulo 21

**1** In finem, pro susceptione matutina. Psalmus David. ^ps-21-1

**2** Deus, Deus meus, respice in me : quare me dereliquisti ?  
longe a salute mea verba delictorum meorum. ^ps-21-2

**3** Deus meus, clamabo per diem, et non exaudies ;  
et nocte, et non ad insipientiam mihi. ^ps-21-3

**4** Tu autem in sancto habitas, laus Israël. ^ps-21-4

**5** In te speraverunt patres nostri ;  
speraverunt, et liberasti eos. ^ps-21-5

**6** Ad te clamaverunt, et salvi facti sunt ;  
in te speraverunt, et non sunt confusi. ^ps-21-6

**7** Ego autem sum vermis, et non homo ;  
opprobrium hominum, et abjectio plebis. ^ps-21-7

**8** Omnes videntes me deriserunt me ;  
locuti sunt labiis, et moverunt caput. ^ps-21-8

**9** Speravit in Domino, eripiat eum :  
salvum faciat eum, quoniam vult eum. ^ps-21-9

**10** Quoniam tu es qui extraxisti me de ventre,  
spes mea ab uberibus matris meae. ^ps-21-10

**11** In te projectus sum ex utero ;  
de ventre matris meae Deus meus es tu : ^ps-21-11

**12** ne discesseris a me,  
quoniam tribulatio proxima est,  
quoniam non est qui adjuvet. ^ps-21-12

**13** Circumdederunt me vituli multi ;  
tauri pingues obsederunt me. ^ps-21-13

**14** Aperuerunt super me os suum,  
sicut leo rapiens et rugiens. ^ps-21-14

**15** Sicut aqua effusus sum,  
et dispersa sunt omnia ossa mea :  
factum est cor meum tamquam cera liquescens in medio ventris mei. ^ps-21-15

**16** Aruit tamquam testa virtus mea,  
et lingua mea adhaesit faucibus meis :  
et in pulverem mortis deduxisti me. ^ps-21-16

**17** Quoniam circumdederunt me canes multi ;  
concilium malignantium obsedit me.  
Foderunt manus meas et pedes meos ; ^ps-21-17

**18** dinumeraverunt omnia ossa mea.  
Ipsi vero consideraverunt et inspexerunt me. ^ps-21-18

**19** Diviserunt sibi vestimenta mea,  
et super vestem meam miserunt sortem. ^ps-21-19

**20** Tu autem, Domine, ne elongaveris auxilium tuum a me ;  
ad defensionem meam conspice. ^ps-21-20

**21** Erue a framea, Deus, animam meam,  
et de manu canis unicam meam. ^ps-21-21

**22** Salva me ex ore leonis,  
et a cornibus unicornium humilitatem meam. ^ps-21-22

**23** Narrabo nomen tuum fratribus meis ;  
in medio ecclesiae laudabo te. ^ps-21-23

**24** Qui timetis Dominum, laudate eum ;  
universum semen Jacob, glorificate eum. ^ps-21-24

**25** Timeat eum omne semen Israël,  
quoniam non sprevit, neque despexit deprecationem pauperis,  
nec avertit faciem suam a me :  
et cum clamarem ad eum, exaudivit me. ^ps-21-25

**26** Apud te laus mea in ecclesia magna ;  
vota mea reddam in conspectu timentium eum. ^ps-21-26

**27** Edent pauperes, et saturabuntur,  
et laudabunt Dominum qui requirunt eum :  
vivent corda eorum in saeculum saeculi. ^ps-21-27

**28** Reminiscentur et convertentur ad Dominum universi fines terrae ;  
et adorabunt in conspectu ejus universae familiae gentium : ^ps-21-28

**29** quoniam Domini est regnum,  
et ipse dominabitur gentium. ^ps-21-29

**30** Manducaverunt et adoraverunt omnes pingues terrae ;  
in conspectu ejus cadent omnes qui descendunt in terram. ^ps-21-30

**31** Et anima mea illi vivet ;  
et semen meum serviet ipsi. ^ps-21-31

**32** Annuntiabitur Domino generatio ventura ;  
et annuntiabunt caeli justitiam ejus  
populo qui nascetur, quem fecit Dominus. ^ps-21-32

## Capítulo 22

**1** Psalmus David. Dominus regit me, et nihil mihi deerit : ^ps-22-1

**2** in loco pascuae, ibi me collocavit.  
Super aquam refectionis educavit me ; ^ps-22-2

**3** animam meam convertit.  
Deduxit me super semitas justitiae  
propter nomen suum. ^ps-22-3

**4** Nam etsi ambulavero in medio umbrae mortis,  
non timebo mala, quoniam tu mecum es.  
Virga tua, et baculus tuus,  
ipsa me consolata sunt. ^ps-22-4

**5** Parasti in conspectu meo mensam  
adversus eos qui tribulant me ;  
impinguasti in oleo caput meum :  
et calix meus inebrians, quam praeclarus est ! ^ps-22-5

**6** Et misericordia tua subsequetur me  
omnibus diebus vitae meae ;  
et ut inhabitem in domo Domini  
in longitudinem dierum. ^ps-22-6

## Capítulo 23

**1** Prima sabbati. Psalmus David. Domini est terra, et plenitudo ejus ;  
orbis terrarum, et universi qui habitant in eo. ^ps-23-1

**2** Quia ipse super maria fundavit eum,  
et super flumina praeparavit eum. ^ps-23-2

**3** Quis ascendet in montem Domini ?  
aut quis stabit in loco sancto ejus ? ^ps-23-3

**4** Innocens manibus et mundo corde,  
qui non accepit in vano animam suam,  
nec juravit in dolo proximo suo : ^ps-23-4

**5** hic accipiet benedictionem a Domino,  
et misericordiam a Deo salutari suo. ^ps-23-5

**6** Haec est generatio quaerentium eum,  
quaerentium faciem Dei Jacob. ^ps-23-6

**7** Attollite portas, principes, vestras,  
et elevamini, portae aeternales,  
et introibit rex gloriae. ^ps-23-7

**8** Quis est iste rex gloriae ?  
Dominus fortis et potens,  
Dominus potens in praelio. ^ps-23-8

**9** Attollite portas, principes, vestras,  
et elevamini, portae aeternales,  
et introibit rex gloriae. ^ps-23-9

**10** Quis est iste rex gloriae ?  
Dominus virtutum ipse est rex gloriae. ^ps-23-10

## Capítulo 24

**1** In finem. Psalmus David. Ad te, Domine, levavi animam meam : ^ps-24-1

**2** Deus meus, in te confido ; non erubescam. ^ps-24-2

**3** Neque irrideant me inimici mei :  
etenim universi qui sustinent te, non confundentur. ^ps-24-3

**4** Confundantur omnes iniqua agentes supervacue.  
Vias tuas, Domine, demonstra mihi,  
et semitas tuas edoce me. ^ps-24-4

**5** Dirige me in veritate tua, et doce me,  
quia tu es Deus salvator meus,  
et te sustinui tota die. ^ps-24-5

**6** Reminiscere miserationum tuarum, Domine,  
et misericordiarum tuarum quae a saeculo sunt. ^ps-24-6

**7** Delicta juventutis meae, et ignorantias meas, ne memineris.  
Secundum misericordiam tuam memento mei tu,  
propter bonitatem tuam, Domine. ^ps-24-7

**8** Dulcis et rectus Dominus ;  
propter hoc legem dabit delinquentibus in via. ^ps-24-8

**9** Diriget mansuetos in judicio ;  
docebit mites vias suas. ^ps-24-9

**10** Universae viae Domini, misericordia et veritas,  
requirentibus testamentum ejus et testimonia ejus. ^ps-24-10

**11** Propter nomen tuum, Domine,  
propitiaberis peccato meo ; multum est enim. ^ps-24-11

**12** Quis est homo qui timet Dominum ?  
legem statuit ei in via quam elegit. ^ps-24-12

**13** Anima ejus in bonis demorabitur,  
et semen ejus haereditabit terram. ^ps-24-13

**14** Firmamentum est Dominus timentibus eum ;  
et testamentum ipsius ut manifestetur illis. ^ps-24-14

**15** Oculi mei semper ad Dominum,  
quoniam ipse evellet de laqueo pedes meos. ^ps-24-15

**16** Respice in me, et miserere mei,  
quia unicus et pauper sum ego. ^ps-24-16

**17** Tribulationes cordis mei multiplicatae sunt :  
de necessitatibus meis erue me. ^ps-24-17

**18** Vide humilitatem meam et laborem meum,  
et dimitte universa delicta mea. ^ps-24-18

**19** Respice inimicos meos, quoniam multiplicati sunt,  
et odio iniquo oderunt me. ^ps-24-19

**20** Custodi animam meam, et erue me :  
non erubescam, quoniam speravi in te. ^ps-24-20

**21** Innocentes et recti adhaeserunt mihi,  
quia sustinui te. ^ps-24-21

**22** Libera, Deus, Israël  
ex omnibus tribulationibus suis. ^ps-24-22

## Capítulo 25

**1** In finem. Psalmus David. Judica me, Domine, quoniam ego in innocentia mea ingressus sum,  
et in Domino sperans non infirmabor. ^ps-25-1

**2** Proba me, Domine, et tenta me ;  
ure renes meos et cor meum. ^ps-25-2

**3** Quoniam misericordia tua ante oculos meos est,  
et complacui in veritate tua. ^ps-25-3

**4** Non sedi cum concilio vanitatis,  
et cum iniqua gerentibus non introibo. ^ps-25-4

**5** Odivi ecclesiam malignantium,  
et cum impiis non sedebo. ^ps-25-5

**6** Lavabo inter innocentes manus meas,  
et circumdabo altare tuum, Domine : ^ps-25-6

**7** ut audiam vocem laudis,  
et enarrem universa mirabilia tua. ^ps-25-7

**8** Domine, dilexi decorem domus tuae,  
et locum habitationis gloriae tuae. ^ps-25-8

**9** Ne perdas cum impiis, Deus, animam meam,  
et cum viris sanguinum vitam meam : ^ps-25-9

**10** in quorum manibus iniquitates sunt ;  
dextera eorum repleta est muneribus. ^ps-25-10

**11** Ego autem in innocentia mea ingressus sum ;  
redime me, et miserere mei. ^ps-25-11

**12** Pes meus stetit in directo ;  
in ecclesiis benedicam te, Domine. ^ps-25-12

## Capítulo 26

**1** Psalmus David, priusquam liniretur. Dominus illuminatio mea et salus mea : quem timebo ?  
Dominus protector vitae meae :  
a quo trepidabo ? ^ps-26-1

**2** Dum appropiant super me nocentes ut edant carnes meas,  
qui tribulant me inimici mei,  
ipsi infirmati sunt et ceciderunt. ^ps-26-2

**3** Si consistant adversum me castra, non timebit cor meum ;  
si exsurgat adversum me praelium, in hoc ego sperabo. ^ps-26-3

**4** Unam petii a Domino, hanc requiram,  
ut inhabitem in domo Domini omnibus diebus vitae meae ;  
ut videam voluptatem Domini, et visitem templum ejus. ^ps-26-4

**5** Quoniam abscondit me in tabernaculo suo ;  
in die malorum protexit me in abscondito tabernaculi sui. ^ps-26-5

**6** In petra exaltavit me,  
et nunc exaltavit caput meum super inimicos meos.  
Circuivi, et immolavi in tabernaculo ejus hostiam vociferationis ;  
cantabo, et psalmum dicam Domino. ^ps-26-6

**7** Exaudi, Domine, vocem meam, qua clamavi ad te ;  
miserere mei, et exaudi me. ^ps-26-7

**8** Tibi dixit cor meum : Exquisivit te facies mea ;  
faciem tuam, Domine, requiram. ^ps-26-8

**9** Ne avertas faciem tuam a me ;  
ne declines in ira a servo tuo.  
Adjutor meus esto ; ne derelinquas me,  
neque despicias me, Deus salutaris meus. ^ps-26-9

**10** Quoniam pater meus et mater mea dereliquerunt me ;  
Dominus autem assumpsit me. ^ps-26-10

**11** Legem pone mihi, Domine, in via tua,  
et dirige me in semitam rectam, propter inimicos meos. ^ps-26-11

**12** Ne tradideris me in animas tribulantium me,  
quoniam insurrexerunt in me testes iniqui,  
et mentita est iniquitas sibi. ^ps-26-12

**13** Credo videre bona Domini in terra viventium. ^ps-26-13

**14** Expecta Dominum, viriliter age :  
et confortetur cor tuum, et sustine Dominum. ^ps-26-14

## Capítulo 27

**1** Psalmus ipsi David. Ad te, Domine, clamabo ; Deus meus, ne sileas a me :  
nequando taceas a me, et assimilabor descendentibus in lacum. ^ps-27-1

**2** Exaudi, Domine, vocem deprecationis meae dum oro ad te ;  
dum extollo manus meas ad templum sanctum tuum. ^ps-27-2

**3** Ne simul trahas me cum peccatoribus,  
et cum operantibus iniquitatem ne perdas me ;  
qui loquuntur pacem cum proximo suo,  
mala autem in cordibus eorum. ^ps-27-3

**4** Da illis secundum opera eorum,  
et secundum nequitiam adinventionum ipsorum.  
Secundum opera manuum eorum tribue illis ;  
redde retributionem eorum ipsis. ^ps-27-4

**5** Quoniam non intellexerunt opera Domini,  
et in opera manuum ejus destrues illos,  
et non aedificabis eos. ^ps-27-5

**6** Benedictus Dominus,  
quoniam exaudivit vocem deprecationis meae. ^ps-27-6

**7** Dominus adjutor meus et protector meus ;  
in ipso speravit cor meum, et adjutus sum :  
et refloruit caro mea,  
et ex voluntate mea confitebor ei. ^ps-27-7

**8** Dominus fortitudo plebis suae,  
et protector salvationum christi sui est. ^ps-27-8

**9** Salvum fac populum tuum, Domine, et benedic haereditati tuae ;  
et rege eos, et extolle illos usque in aeternum. ^ps-27-9

## Capítulo 28

**1** Psalmus David, in consummatione tabernaculi. Afferte Domino, filii Dei,  
afferte Domino filios arietum. ^ps-28-1

**2** Afferte Domino gloriam et honorem ;  
afferte Domino gloriam nomini ejus ;  
adorate Dominum in atrio sancto ejus. ^ps-28-2

**3** Vox Domini super aquas ;  
Deus majestatis intonuit :  
Dominus super aquas multas. ^ps-28-3

**4** Vox Domini in virtute ;  
vox Domini in magnificentia. ^ps-28-4

**5** Vox Domini confringentis cedros,  
et confringet Dominus cedros Libani : ^ps-28-5

**6** et comminuet eas, tamquam vitulum Libani,  
et dilectus quemadmodum filius unicornium. ^ps-28-6

**7** Vox Domini intercidentis flammam ignis ; ^ps-28-7

**8** vox Domini concutientis desertum :  
et commovebit Dominus desertum Cades. ^ps-28-8

**9** Vox Domini praeparantis cervos :  
et revelabit condensa,  
et in templo ejus omnes dicent gloriam. ^ps-28-9

**10** Dominus diluvium inhabitare facit,  
et sedebit Dominus rex in aeternum. ^ps-28-10

**11** Dominus virtutem populo suo dabit ;  
Dominus benedicet populo suo in pace. ^ps-28-11

## Capítulo 29

**1** Psalmus cantici, in dedicatione domus David. ^ps-29-1

**2** Exaltabo te, Domine, quoniam suscepisti me,  
nec delectasti inimicos meos super me. ^ps-29-2

**3** Domine Deus meus, clamavi ad te, et sanasti me. ^ps-29-3

**4** Domine, eduxisti ab inferno animam meam ;  
salvasti me a descendentibus in lacum. ^ps-29-4

**5** Psallite Domino, sancti ejus ;  
et confitemini memoriae sanctitatis ejus. ^ps-29-5

**6** Quoniam ira in indignatione ejus,  
et vita in voluntate ejus :  
ad vesperum demorabitur fletus,  
et ad matutinum laetitia. ^ps-29-6

**7** Ego autem dixi in abundantia mea :  
Non movebor in aeternum. ^ps-29-7

**8** Domine, in voluntate tua praestitisti decori meo virtutem ;  
avertisti faciem tuam a me, et factus sum conturbatus. ^ps-29-8

**9** Ad te, Domine, clamabo,  
et ad Deum meum deprecabor. ^ps-29-9

**10** Quae utilitas in sanguine meo,  
dum descendo in corruptionem ?  
numquid confitebitur tibi pulvis,  
aut annuntiabit veritatem tuam ? ^ps-29-10

**11** Audivit Dominus, et misertus est mei ;  
Dominus factus est adjutor meus. ^ps-29-11

**12** Convertisti planctum meum in gaudium mihi ;  
conscidisti saccum meum, et circumdedisti me laetitia : ^ps-29-12

**13** ut cantet tibi gloria mea, et non compungar.  
Domine Deus meus, in aeternum confitebor tibi. ^ps-29-13

## Capítulo 30

**1** In finem. Psalmus David, pro extasi. ^ps-30-1

**2** In te, Domine, speravi ;  
non confundar in aeternum :  
in justitia tua libera me. ^ps-30-2

**3** Inclina ad me aurem tuam ;  
accelera ut eruas me.  
Esto mihi in Deum protectorem,  
et in domum refugii, ut salvum me facias : ^ps-30-3

**4** quoniam fortitudo mea et refugium meum es tu ;  
et propter nomen tuum deduces me et enutries me. ^ps-30-4

**5** Educes me de laqueo hoc quem absconderunt mihi,  
quoniam tu es protector meus. ^ps-30-5

**6** In manus tuas commendo spiritum meum ;  
redemisti me, Domine Deus veritatis. ^ps-30-6

**7** Odisti observantes vanitates supervacue ;  
ego autem in Domino speravi. ^ps-30-7

**8** Exsultabo, et laetabor in misericordia tua,  
quoniam respexisti humilitatem meam ;  
salvasti de necessitatibus animam meam. ^ps-30-8

**9** Nec conclusisti me in manibus inimici :  
statuisti in loco spatioso pedes meos. ^ps-30-9

**10** Miserere mei, Domine, quoniam tribulor ;  
conturbatus est in ira oculus meus, anima mea, et venter meus. ^ps-30-10

**11** Quoniam defecit in dolore vita mea,  
et anni mei in gemitibus.  
Infirmata est in paupertate virtus mea,  
et ossa mea conturbata sunt. ^ps-30-11

**12** Super omnes inimicos meos factus sum opprobrium,  
et vicinis meis valde, et timor notis meis ;  
qui videbant me foras fugerunt a me. ^ps-30-12

**13** Oblivioni datus sum, tamquam mortuus a corde ;  
factus sum tamquam vas perditum : ^ps-30-13

**14** quoniam audivi vituperationem multorum commorantium in circuitu.  
In eo dum convenirent simul adversum me,  
accipere animam meam consiliati sunt. ^ps-30-14

**15** Ego autem in te speravi, Domine ;  
dixi : Deus meus es tu ; ^ps-30-15

**16** in manibus tuis sortes meae :  
eripe me de manu inimicorum meorum, et a persequentibus me. ^ps-30-16

**17** Illustra faciem tuam super servum tuum ;  
salvum me fac in misericordia tua. ^ps-30-17

**18** Domine, non confundar, quoniam invocavi te.  
Erubescant impii, et deducantur in infernum ; ^ps-30-18

**19** muta fiant labia dolosa,  
quae loquuntur adversus justum iniquitatem,  
in superbia, et in abusione. ^ps-30-19

**20** Quam magna multitudo dulcedinis tuae, Domine,  
quam abscondisti timentibus te ;  
perfecisti eis qui sperant in te in conspectu filiorum hominum ! ^ps-30-20

**21** Abscondes eos in abscondito faciei tuae a conturbatione hominum ;  
proteges eos in tabernaculo tuo, a contradictione linguarum. ^ps-30-21

**22** Benedictus Dominus,  
quoniam mirificavit misericordiam suam mihi in civitate munita. ^ps-30-22

**23** Ego autem dixi in excessu mentis meae :  
Projectus sum a facie oculorum tuorum :  
ideo exaudisti vocem orationis meae, dum clamarem ad te. ^ps-30-23

**24** Diligite Dominum, omnes sancti ejus,  
quoniam veritatem requiret Dominus,  
et retribuet abundanter facientibus superbiam. ^ps-30-24

**25** Viriliter agite, et confortetur cor vestrum,  
omnes qui speratis in Domino. ^ps-30-25

## Capítulo 31

**1** Ipsi David intellectus. Beati quorum remissae sunt iniquitates,  
et quorum tecta sunt peccata. ^ps-31-1

**2** Beatus vir cui non imputavit Dominus peccatum,  
nec est in spiritu ejus dolus. ^ps-31-2

**3** Quoniam tacui, inveteraverunt ossa mea,  
dum clamarem tota die. ^ps-31-3

**4** Quoniam die ac nocte gravata est super me manus tua,  
conversus sum in aerumna mea, dum configitur spina. ^ps-31-4

**5** Delictum meum cognitum tibi feci,  
et injustitiam meam non abscondi.  
Dixi : Confitebor adversum me injustitiam meam Domino ;  
et tu remisisti impietatem peccati mei. ^ps-31-5

**6** Pro hac orabit ad te omnis sanctus  
in tempore opportuno.  
Verumtamen in diluvio aquarum multarum,  
ad eum non approximabunt. ^ps-31-6

**7** Tu es refugium meum a tribulatione quae circumdedit me ;  
exsultatio mea, erue me a circumdantibus me. ^ps-31-7

**8** Intellectum tibi dabo, et instruam te in via hac qua gradieris ;  
firmabo super te oculos meos. ^ps-31-8

**9** Nolite fieri sicut equus et mulus,  
quibus non est intellectus.  
In camo et freno maxillas eorum constringe,  
qui non approximant ad te. ^ps-31-9

**10** Multa flagella peccatoris ;  
sperantem autem in Domino misericordia circumdabit. ^ps-31-10

**11** Laetamini in Domino, et exsultate, justi ;  
et gloriamini, omnes recti corde. ^ps-31-11

## Capítulo 32

**1** Psalmus David. Exsultate, justi, in Domino ;  
rectos decet collaudatio. ^ps-32-1

**2** Confitemini Domino in cithara ;  
in psalterio decem chordarum psallite illi. ^ps-32-2

**3** Cantate ei canticum novum ;  
bene psallite ei in vociferatione. ^ps-32-3

**4** Quia rectum est verbum Domini,  
et omnia opera ejus in fide. ^ps-32-4

**5** Diligit misericordiam et judicium ;  
misericordia Domini plena est terra. ^ps-32-5

**6** Verbo Domini caeli firmati sunt,  
et spiritu oris ejus omnis virtus eorum. ^ps-32-6

**7** Congregans sicut in utre aquas maris ;  
ponens in thesauris abyssos. ^ps-32-7

**8** Timeat Dominum omnis terra ;  
ab eo autem commoveantur omnes inhabitantes orbem. ^ps-32-8

**9** Quoniam ipse dixit, et facta sunt ;  
ipse mandavit et creata sunt. ^ps-32-9

**10** Dominus dissipat consilia gentium ;  
reprobat autem cogitationes populorum,  
et reprobat consilia principum. ^ps-32-10

**11** Consilium autem Domini in aeternum manet ;  
cogitationes cordis ejus in generatione et generationem. ^ps-32-11

**12** Beata gens cujus est Dominus Deus ejus ;  
populus quem elegit in haereditatem sibi. ^ps-32-12

**13** De caelo respexit Dominus ;  
vidit omnes filios hominum. ^ps-32-13

**14** De praeparato habitaculo suo  
respexit super omnes qui habitant terram : ^ps-32-14

**15** qui finxit sigillatim corda eorum ;  
qui intelligit omnia opera eorum. ^ps-32-15

**16** Non salvatur rex per multam virtutem,  
et gigas non salvabitur in multitudine virtutis suae. ^ps-32-16

**17** Fallax equus ad salutem ;  
in abundantia autem virtutis suae non salvabitur. ^ps-32-17

**18** Ecce oculi Domini super metuentes eum,  
et in eis qui sperant super misericordia ejus : ^ps-32-18

**19** ut eruat a morte animas eorum,  
et alat eos in fame. ^ps-32-19

**20** Anima nostra sustinet Dominum,  
quoniam adjutor et protector noster est. ^ps-32-20

**21** Quia in eo laetabitur cor nostrum,  
et in nomine sancto ejus speravimus. ^ps-32-21

**22** Fiat misericordia tua, Domine, super nos,  
quemadmodum speravimus in te. ^ps-32-22

## Capítulo 33

**1** Davidi, cum immutavit vultum suum coram Achimelech, et dimisit eum, et abiit. ^ps-33-1

**2** Benedicam Dominum in omni tempore ;  
semper laus ejus in ore meo. ^ps-33-2

**3** In Domino laudabitur anima mea :  
audiant mansueti, et laetentur. ^ps-33-3

**4** Magnificate Dominum mecum,  
et exaltemus nomen ejus in idipsum. ^ps-33-4

**5** Exquisivi Dominum, et exaudivit me ;  
et ex omnibus tribulationibus meis eripuit me. ^ps-33-5

**6** Accedite ad eum, et illuminamini ;  
et facies vestrae non confundentur. ^ps-33-6

**7** Iste pauper clamavit, et Dominus exaudivit eum,  
et de omnibus tribulationibus ejus salvavit eum. ^ps-33-7

**8** Immittet angelus Domini in circuitu timentium eum,  
et eripiet eos. ^ps-33-8

**9** Gustate et videte quoniam suavis est Dominus ;  
beatus vir qui sperat in eo. ^ps-33-9

**10** Timete Dominum, omnes sancti ejus,  
quoniam non est inopia timentibus eum. ^ps-33-10

**11** Divites eguerunt, et esurierunt ;  
inquirentes autem Dominum non minuentur omni bono. ^ps-33-11

**12** Venite, filii ; audite me :  
timorem Domini docebo vos. ^ps-33-12

**13** Quis est homo qui vult vitam ;  
diligit dies videre bonos ? ^ps-33-13

**14** Prohibe linguam tuam a malo,  
et labia tua ne loquantur dolum. ^ps-33-14

**15** Diverte a malo, et fac bonum ;  
inquire pacem, et persequere eam. ^ps-33-15

**16** Oculi Domini super justos,  
et aures ejus in preces eorum. ^ps-33-16

**17** Vultus autem Domini super facientes mala,  
ut perdat de terra memoriam eorum. ^ps-33-17

**18** Clamaverunt justi, et Dominus exaudivit eos ;  
et ex omnibus tribulationibus eorum liberavit eos. ^ps-33-18

**19** Juxta est Dominus iis qui tribulato sunt corde,  
et humiles spiritu salvabit. ^ps-33-19

**20** Multae tribulationes justorum ;  
et de omnibus his liberabit eos Dominus. ^ps-33-20

**21** Custodit Dominus omnia ossa eorum :  
unum ex his non conteretur. ^ps-33-21

**22** Mors peccatorum pessima ;  
et qui oderunt justum delinquent. ^ps-33-22

**23** Redimet Dominus animas servorum suorum,  
et non delinquent omnes qui sperant in eo. ^ps-33-23

## Capítulo 34

**1** Ipsi David. Judica, Domine, nocentes me ;  
expugna impugnantes me. ^ps-34-1

**2** Apprehende arma et scutum,  
et exsurge in adjutorium mihi. ^ps-34-2

**3** Effunde frameam, et conclude adversus eos qui persequuntur me ;  
dic animae meae : Salus tua ego sum. ^ps-34-3

**4** Confundantur et revereantur quaerentes animam meam ;  
avertantur retrorsum et confundantur cogitantes mihi mala. ^ps-34-4

**5** Fiant tamquam pulvis ante faciem venti,  
et angelus Domini coarctans eos. ^ps-34-5

**6** Fiat via illorum tenebrae et lubricum,  
et angelus Domini persequens eos. ^ps-34-6

**7** Quoniam gratis absconderunt mihi interitum laquei sui ; supervacue exprobraverunt animam meam. ^ps-34-7

**8** Veniat illi laqueus quem ignorat,  
et captio quam abscondit apprehendat eum,  
et in laqueum cadat in ipsum. ^ps-34-8

**9** Anima autem mea exsultabit in Domino,  
et delectabitur super salutari suo. ^ps-34-9

**10** Omnia ossa mea dicent :  
Domine, quis similis tibi ?  
eripiens inopem de manu fortiorum ejus ;  
egenum et pauperem a diripientibus eum. ^ps-34-10

**11** Surgentes testes iniqui,  
quae ignorabam interrogabant me. ^ps-34-11

**12** Retribuebant mihi mala pro bonis,  
sterilitatem animae meae. ^ps-34-12

**13** Ego autem, cum mihi molesti essent, induebar cilicio ;  
humiliabam in jejunio animam meam,  
et oratio mea in sinu meo convertetur. ^ps-34-13

**14** Quasi proximum et quasi fratrem nostrum sic complacebam ;  
quasi lugens et contristatus sic humiliabar. ^ps-34-14

**15** Et adversum me laetati sunt, et convenerunt ;  
congregata sunt super me flagella, et ignoravi. ^ps-34-15

**16** Dissipati sunt, nec compuncti ;  
tentaverunt me, subsannaverunt me subsannatione ;  
frenduerunt super me dentibus suis. ^ps-34-16

**17** Domine, quando respicies ?  
Restitue animam meam a malignitate eorum ;  
a leonibus unicam meam. ^ps-34-17

**18** Confitebor tibi in ecclesia magna ; in populo gravi laudabo te. ^ps-34-18

**19** Non supergaudeant mihi qui adversantur mihi inique,  
qui oderunt me gratis, et annuunt oculis. ^ps-34-19

**20** Quoniam mihi quidem pacifice loquebantur ;  
et in iracundia terrae loquentes, dolos cogitabant. ^ps-34-20

**21** Et dilataverunt super me os suum ;  
dixerunt : Euge, euge ! viderunt oculi nostri. ^ps-34-21

**22** Vidisti, Domine : ne sileas ;  
Domine, ne discedas a me. ^ps-34-22

**23** Exsurge et intende judicio meo, Deus meus ;  
et Dominus meus, in causam meam. ^ps-34-23

**24** Judica me secundum justitiam tuam, Domine Deus meus,  
et non supergaudeant mihi. ^ps-34-24

**25** Non dicant in cordibus suis : Euge, euge, animae nostrae ;  
nec dicant : Devoravimus eum. ^ps-34-25

**26** Erubescant et revereantur simul qui gratulantur malis meis ;  
induantur confusione et reverentia qui magna loquuntur super me. ^ps-34-26

**27** Exsultent et laetentur qui volunt justitiam meam ;  
et dicant semper : Magnificetur Dominus, qui volunt pacem servi ejus. ^ps-34-27

**28** Et lingua mea meditabitur justitiam tuam ;  
tota die laudem tuam. ^ps-34-28

## Capítulo 35

**1** In finem. Servo Domini ipsi David. ^ps-35-1

**2** Dixit injustus ut delinquat in semetipso :  
non est timor Dei ante oculos ejus. ^ps-35-2

**3** Quoniam dolose egit in conspectu ejus,  
ut inveniatur iniquitas ejus ad odium. ^ps-35-3

**4** Verba oris ejus iniquitas, et dolus ;  
noluit intelligere ut bene ageret. ^ps-35-4

**5** Iniquitatem meditatus est in cubili suo ;  
astitit omni viae non bonae :  
malitiam autem non odivit. ^ps-35-5

**6** Domine, in caelo misericordia tua,  
et veritas tua usque ad nubes. ^ps-35-6

**7** Justitia tua sicut montes Dei ;  
judicia tua abyssus multa.  
Homines et jumenta salvabis, Domine, ^ps-35-7

**8** quemadmodum multiplicasti misericordiam tuam, Deus.  
Filii autem hominum in tegmine alarum tuarum sperabunt. ^ps-35-8

**9** Inebriabuntur ab ubertate domus tuae,  
et torrente voluptatis tuae potabis eos : ^ps-35-9

**10** quoniam apud te est fons vitae,  
et in lumine tuo videbimus lumen. ^ps-35-10

**11** Praetende misericordiam tuam scientibus te,  
et justitiam tuam his qui recto sunt corde. ^ps-35-11

**12** Non veniat mihi pes superbiae,  
et manus peccatoris non moveat me. ^ps-35-12

**13** Ibi ceciderunt qui operantur iniquitatem ;  
expulsi sunt, nec potuerunt stare. ^ps-35-13

## Capítulo 36

**1** Psalmus ipsi David. Noli aemulari in malignantibus,  
neque zelaveris facientes iniquitatem : ^ps-36-1

**2** quoniam tamquam foenum velociter arescent,  
et quemadmodum olera herbarum cito decident. ^ps-36-2

**3** Spera in Domino, et fac bonitatem ;  
et inhabita terram, et pasceris in divitiis ejus. ^ps-36-3

**4** Delectare in Domino,  
et dabit tibi petitiones cordis tui. ^ps-36-4

**5** Revela Domino viam tuam,  
et spera in eo, et ipse faciet. ^ps-36-5

**6** Et educet quasi lumen justitiam tuam,  
et judicium tuum tamquam meridiem. ^ps-36-6

**7** Subditus esto Domino, et ora eum.  
Noli aemulari in eo qui prosperatur in via sua ;  
in homine faciente injustitias. ^ps-36-7

**8** Desine ab ira, et derelinque furorem ;  
noli aemulari ut maligneris. ^ps-36-8

**9** Quoniam qui malignantur exterminabuntur ;  
sustinentes autem Dominum, ipsi haereditabunt terram. ^ps-36-9

**10** Et adhuc pusillum, et non erit peccator ;  
et quaeres locum ejus, et non invenies. ^ps-36-10

**11** Mansueti autem haereditabunt terram,  
et delectabuntur in multitudine pacis. ^ps-36-11

**12** Observabit peccator justum,  
et stridebit super eum dentibus suis. ^ps-36-12

**13** Dominus autem irridebit eum,  
quoniam prospicit quod veniet dies ejus. ^ps-36-13

**14** Gladium evaginaverunt peccatores ;  
intenderunt arcum suum :  
ut dejiciant pauperem et inopem,  
ut trucident rectos corde. ^ps-36-14

**15** Gladius eorum intret in corda ipsorum,  
et arcus eorum confringatur. ^ps-36-15

**16** Melius est modicum justo,  
super divitias peccatorum multas : ^ps-36-16

**17** quoniam brachia peccatorum conterentur :  
confirmat autem justos Dominus. ^ps-36-17

**18** Novit Dominus dies immaculatorum,  
et haereditas eorum in aeternum erit. ^ps-36-18

**19** Non confundentur in tempore malo,  
et in diebus famis saturabuntur : ^ps-36-19

**20** quia peccatores peribunt.  
Inimici vero Domini mox ut honorificati fuerint et exaltati,  
deficientes quemadmodum fumus deficient. ^ps-36-20

**21** Mutuabitur peccator, et non solvet ;  
justus autem miseretur et tribuet : ^ps-36-21

**22** quia benedicentes ei haereditabunt terram ;  
maledicentes autem ei disperibunt. ^ps-36-22

**23** Apud Dominum gressus hominis dirigentur,  
et viam ejus volet. ^ps-36-23

**24** Cum ceciderit, non collidetur,  
quia Dominus supponit manum suam. ^ps-36-24

**25** Junior fui, etenim senui ;  
et non vidi justum derelictum,  
nec semen ejus quaerens panem. ^ps-36-25

**26** Tota die miseretur et commodat ;  
et semen illius in benedictione erit. ^ps-36-26

**27** Declina a malo, et fac bonum,  
et inhabita in saeculum saeculi : ^ps-36-27

**28** quia Dominus amat judicium,  
et non derelinquet sanctos suos :  
in aeternum conservabuntur.  
Injusti punientur,  
et semen impiorum peribit. ^ps-36-28

**29** Justi autem haereditabunt terram,  
et inhabitabunt in saeculum saeculi super eam. ^ps-36-29

**30** Os justi meditabitur sapientiam,  
et lingua ejus loquetur judicium. ^ps-36-30

**31** Lex Dei ejus in corde ipsius,  
et non supplantabuntur gressus ejus. ^ps-36-31

**32** Considerat peccator justum,  
et quaerit mortificare eum. ^ps-36-32

**33** Dominus autem non derelinquet eum in manibus ejus,  
nec damnabit eum cum judicabitur illi. ^ps-36-33

**34** Expecta Dominum, et custodi viam ejus,  
et exaltabit te ut haereditate capias terram :  
cum perierint peccatores, videbis. ^ps-36-34

**35** Vidi impium superexaltatum,  
et elevatum sicut cedros Libani : ^ps-36-35

**36** et transivi, et ecce non erat ;  
et quaesivi eum, et non est inventus locus ejus. ^ps-36-36

**37** Custodi innocentiam, et vide aequitatem,  
quoniam sunt reliquiae homini pacifico. ^ps-36-37

**38** Injusti autem disperibunt simul ;  
reliquiae impiorum interibunt. ^ps-36-38

**39** Salus autem justorum a Domino ;  
et protector eorum in tempore tribulationis. ^ps-36-39

**40** Et adjuvabit eos Dominus, et liberabit eos ;  
et eruet eos a peccatoribus, et salvabit eos,  
quia speraverunt in eo. ^ps-36-40

## Capítulo 37

**1** Psalmus David, in rememorationem de sabbato. ^ps-37-1

**2** Domine, ne in furore tuo arguas me,  
neque in ira tua corripias me : ^ps-37-2

**3** quoniam sagittae tuae infixae sunt mihi,  
et confirmasti super me manum tuam. ^ps-37-3

**4** Non est sanitas in carne mea, a facie irae tuae ;  
non est pax ossibus meis, a facie peccatorum meorum : ^ps-37-4

**5** quoniam iniquitates meae supergressae sunt caput meum,  
et sicut onus grave gravatae sunt super me. ^ps-37-5

**6** Putruerunt et corruptae sunt cicatrices meae,  
a facie insipientiae meae. ^ps-37-6

**7** Miser factus sum et curvatus sum usque in finem ;  
tota die contristatus ingrediebar. ^ps-37-7

**8** Quoniam lumbi mei impleti sunt illusionibus,  
et non est sanitas in carne mea. ^ps-37-8

**9** Afflictus sum, et humiliatus sum nimis ;  
rugiebam a gemitu cordis mei. ^ps-37-9

**10** Domine, ante te omne desiderium meum,  
et gemitus meus a te non est absconditus. ^ps-37-10

**11** Cor meum conturbatum est ;  
dereliquit me virtus mea, et lumen oculorum meorum,  
et ipsum non est mecum. ^ps-37-11

**12** Amici mei et proximi mei adversum me appropinquaverunt, et steterunt ;  
et qui juxta me erant, de longe steterunt :  
et vim faciebant qui quaerebant animam meam. ^ps-37-12

**13** Et qui inquirebant mala mihi, locuti sunt vanitates,  
et dolos tota die meditabantur. ^ps-37-13

**14** Ego autem, tamquam surdus, non audiebam ;  
et sicut mutus non aperiens os suum. ^ps-37-14

**15** Et factus sum sicut homo non audiens,  
et non habens in ore suo redargutiones. ^ps-37-15

**16** Quoniam in te, Domine, speravi ;  
tu exaudies me, Domine Deus meus. ^ps-37-16

**17** Quia dixi : Nequando supergaudeant mihi inimici mei ;  
et dum commoventur pedes mei, super me magna locuti sunt. ^ps-37-17

**18** Quoniam ego in flagella paratus sum,  
et dolor meus in conspectu meo semper. ^ps-37-18

**19** Quoniam iniquitatem meam annuntiabo,  
et cogitabo pro peccato meo. ^ps-37-19

**20** Inimici autem mei vivunt, et confirmati sunt super me :  
et multiplicati sunt qui oderunt me inique. ^ps-37-20

**21** Qui retribuunt mala pro bonis detrahebant mihi,  
quoniam sequebar bonitatem. ^ps-37-21

**22** Ne derelinquas me, Domine Deus meus ;  
ne discesseris a me. ^ps-37-22

**23** Intende in adjutorium meum,  
Domine Deus salutis meae. ^ps-37-23

## Capítulo 38

**1** In finem, ipsi Idithun. Canticum David. ^ps-38-1

**2** Dixi : Custodiam vias meas :  
ut non delinquam in lingua mea.  
Posui ori meo custodiam,  
cum consisteret peccator adversum me. ^ps-38-2

**3** Obmutui, et humiliatus sum, et silui a bonis ;  
et dolor meus renovatus est. ^ps-38-3

**4** Concaluit cor meum intra me ;  
et in meditatione mea exardescet ignis. ^ps-38-4

**5** Locutus sum in lingua mea :  
Notum fac mihi, Domine, finem meum,  
et numerum dierum meorum quis est,  
ut sciam quid desit mihi. ^ps-38-5

**6** Ecce mensurabiles posuisti dies meos,  
et substantia mea tamquam nihilum ante te.  
Verumtamen universa vanitas, omnis homo vivens. ^ps-38-6

**7** Verumtamen in imagine pertransit homo ;  
sed et frustra conturbatur :  
thesaurizat, et ignorat cui congregabit ea. ^ps-38-7

**8** Et nunc quae est exspectatio mea : nonne Dominus ?  
et substantia mea apud te est. ^ps-38-8

**9** Ab omnibus iniquitatibus meis erue me :  
opprobrium insipienti dedisti me. ^ps-38-9

**10** Obmutui, et non aperui os meum,  
quoniam tu fecisti ; ^ps-38-10

**11** amove a me plagas tuas. ^ps-38-11

**12** A fortitudine manus tuae ego defeci in increpationibus :  
propter iniquitatem corripuisti hominem.  
Et tabescere fecisti sicut araneam animam ejus :  
verumtamen vane conturbatur omnis homo. ^ps-38-12

**13** Exaudi orationem meam, Domine, et deprecationem meam ;  
auribus percipe lacrimas meas.  
Ne sileas, quoniam advena ego sum apud te,  
et peregrinus sicut omnes patres mei. ^ps-38-13

**14** Remitte mihi, ut refrigerer  
priusquam abeam et amplius non ero. ^ps-38-14

## Capítulo 39

**1** In finem. Psalmus ipsi David. ^ps-39-1

**2** Exspectans exspectavi Dominum,  
et intendit mihi. ^ps-39-2

**3** Et exaudivit preces meas,  
et eduxit me de lacu miseriae et de luto faecis.  
Et statuit super petram pedes meos,  
et direxit gressus meos. ^ps-39-3

**4** Et immisit in os meum canticum novum,  
carmen Deo nostro.  
Videbunt multi, et timebunt,  
et sperabunt in Domino. ^ps-39-4

**5** Beatus vir cujus est nomen Domini spes ejus,  
et non respexit in vanitates et insanias falsas. ^ps-39-5

**6** Multa fecisti tu, Domine Deus meus, mirabilia tua ;  
et cogitationibus tuis non est qui similis sit tibi.  
Annuntiavi et locutus sum :  
multiplicati sunt super numerum. ^ps-39-6

**7** Sacrificium et oblationem noluisti ;  
aures autem perfecisti mihi.  
Holocaustum et pro peccato non postulasti ; ^ps-39-7

**8** tunc dixi : Ecce venio.  
In capite libri scriptum est de me, ^ps-39-8

**9** ut facerem voluntatem tuam.  
Deus meus, volui,  
et legem tuam in medio cordis mei. ^ps-39-9

**10** Annuntiavi justitiam tuam in ecclesia magna ;  
ecce labia mea non prohibebo : Domine, tu scisti. ^ps-39-10

**11** Justitiam tuam non abscondi in corde meo ;  
veritatem tuam et salutare tuum dixi ;  
non abscondi misericordiam tuam et veritatem tuam a concilio multo. ^ps-39-11

**12** Tu autem, Domine, ne longe facias miserationes tuas a me ;  
misericordia tua et veritas tua semper susceperunt me. ^ps-39-12

**13** Quoniam circumdederunt me mala quorum non est numerus ;  
comprehenderunt me iniquitates meae, et non potui ut viderem.  
Multiplicatae sunt super capillos capitis mei,  
et cor meum dereliquit me. ^ps-39-13

**14** Complaceat tibi, Domine, ut eruas me ;  
Domine, ad adjuvandum me respice. ^ps-39-14

**15** Confundantur et revereantur simul,  
qui quaerunt animam meam ut auferant eam ;  
convertantur retrorsum et revereantur,  
qui volunt mihi mala. ^ps-39-15

**16** Ferant confestim confusionem suam,  
qui dicunt mihi : Euge, euge ! ^ps-39-16

**17** Exsultent et laetentur super te omnes quaerentes te ;  
et dicant semper : Magnificetur Dominus, qui diligunt salutare tuum. ^ps-39-17

**18** Ego autem mendicus sum et pauper ;  
Dominus sollicitus est mei.  
Adjutor meus et protector meus tu es ;  
Deus meus, ne tardaveris. ^ps-39-18

## Capítulo 40

**1** In finem. Psalmus ipsi David. ^ps-40-1

**2** Beatus qui intelligit super egenum et pauperem :  
in die mala liberabit eum Dominus. ^ps-40-2

**3** Dominus conservet eum, et vivificet eum,  
et beatum faciat eum in terra,  
et non tradat eum in animam inimicorum ejus. ^ps-40-3

**4** Dominus opem ferat illi super lectum doloris ejus ;  
universum stratum ejus versasti in infirmitate ejus. ^ps-40-4

**5** Ego dixi : Domine, miserere mei ;  
sana animam meam, quia peccavi tibi. ^ps-40-5

**6** Inimici mei dixerunt mala mihi :  
Quando morietur, et peribit nomen ejus ? ^ps-40-6

**7** Et si ingrediebatur ut videret, vana loquebatur ;  
cor ejus congregavit iniquitatem sibi.  
Egrediebatur foras et loquebatur. ^ps-40-7

**8** In idipsum adversum me susurrabant omnes inimici mei ;  
adversum me cogitabant mala mihi. ^ps-40-8

**9** Verbum iniquum constituerunt adversum me :  
Numquid qui dormit non adjiciet ut resurgat ? ^ps-40-9

**10** Etenim homo pacis meae in quo speravi,  
qui edebat panes meos,  
magnificavit super me supplantationem. ^ps-40-10

**11** Tu autem, Domine, miserere mei,  
et resuscita me ; et retribuam eis. ^ps-40-11

**12** In hoc cognovi quoniam voluisti me,  
quoniam non gaudebit inimicus meus super me. ^ps-40-12

**13** Me autem propter innocentiam suscepisti ;  
et confirmasti me in conspectu tuo in aeternum. ^ps-40-13

**14** Benedictus Dominus Deus Israël  
a saeculo et usque in saeculum. Fiat, fiat. ^ps-40-14

## Capítulo 41

**1** In finem. Intellectus filiis Core. ^ps-41-1

**2** Quemadmodum desiderat cervus ad fontes aquarum,  
ita desiderat anima mea ad te, Deus. ^ps-41-2

**3** Sitivit anima mea ad Deum fortem, vivum ;  
quando veniam, et apparebo ante faciem Dei ? ^ps-41-3

**4** Fuerunt mihi lacrimae meae panes die ac nocte,  
dum dicitur mihi quotidie : Ubi est Deus tuus ? ^ps-41-4

**5** Haec recordatus sum, et effudi in me animam meam,  
quoniam transibo in locum tabernaculi admirabilis, usque ad domum Dei,  
in voce exsultationis et confessionis, sonus epulantis. ^ps-41-5

**6** Quare tristis es, anima mea ?  
et quare conturbas me ?  
Spera in Deo, quoniam adhuc confitebor illi,  
salutare vultus mei, ^ps-41-6

**7** et Deus meus.  
Ad meipsum anima mea conturbata est :  
propterea memor ero tui de terra Jordanis et Hermoniim a monte modico. ^ps-41-7

**8** Abyssus abyssum invocat, in voce cataractarum tuarum ;  
omnia excelsa tua, et fluctus tui super me transierunt. ^ps-41-8

**9** In die mandavit Dominus misericordiam suam,  
et nocte canticum ejus ;  
apud me oratio Deo vitae meae. ^ps-41-9

**10** Dicam Deo : Susceptor meus es ;  
quare oblitus es mei ?  
et quare contristatus incedo, dum affligit me inimicus ? ^ps-41-10

**11** Dum confringuntur ossa mea,  
exprobraverunt mihi qui tribulant me inimici mei,  
dum dicunt mihi per singulos dies : Ubi est Deus tuus ? ^ps-41-11

**12** Quare tristis es, anima mea ?  
et quare conturbas me ?  
Spera in Deo, quoniam adhuc confitebor illi,  
salutare vultus mei, et Deus meus. ^ps-41-12

## Capítulo 42

**1** Psalmus David. Judica me, Deus, et discerne causam meam de gente non sancta :  
ab homine iniquo et doloso erue me. ^ps-42-1

**2** Quia tu es, Deus, fortitudo mea : quare me repulisti ?  
et quare tristis incedo, dum affligit me inimicus ? ^ps-42-2

**3** Emitte lucem tuam et veritatem tuam :  
ipsa me deduxerunt, et adduxerunt  
in montem sanctum tuum, et in tabernacula tua. ^ps-42-3

**4** Et introibo ad altare Dei,  
ad Deum qui laetificat juventutem meam.  
Confitebor tibi in cithara, Deus, Deus meus. ^ps-42-4

**5** Quare tristis es, anima mea ?  
et quare conturbas me ?  
Spera in Deo, quoniam adhuc confitebor illi,  
salutare vultus mei, et Deus meus. ^ps-42-5

## Capítulo 43

**1** In finem. Filiis Core ad intellectum. ^ps-43-1

**2** Deus, auribus nostris audivimus,  
patres nostri annuntiaverunt nobis,  
opus quod operatus es in diebus eorum,  
et in diebus antiquis. ^ps-43-2

**3** Manus tua gentes disperdidit, et plantasti eos ;  
afflixisti populos, et expulisti eos. ^ps-43-3

**4** Nec enim in gladio suo possederunt terram,  
et brachium eorum non salvavit eos :  
sed dextera tua et brachium tuum,  
et illuminatio vultus tui, quoniam complacuisti in eis. ^ps-43-4

**5** Tu es ipse rex meus et Deus meus,  
qui mandas salutes Jacob. ^ps-43-5

**6** In te inimicos nostros ventilabimus cornu,  
et in nomine tuo spernemus insurgentes in nobis. ^ps-43-6

**7** Non enim in arcu meo sperabo,  
et gladius meus non salvabit me : ^ps-43-7

**8** salvasti enim nos de affligentibus nos,  
et odientes nos confudisti. ^ps-43-8

**9** In Deo laudabimur tota die,  
et in nomine tuo confitebimur in saeculum. ^ps-43-9

**10** Nunc autem repulisti et confudisti nos,  
et non egredieris, Deus, in virtutibus nostris. ^ps-43-10

**11** Avertisti nos retrorsum post inimicos nostros,  
et qui oderunt nos diripiebant sibi. ^ps-43-11

**12** Dedisti nos tamquam oves escarum,  
et in gentibus dispersisti nos. ^ps-43-12

**13** Vendidisti populum tuum sine pretio,  
et non fuit multitudo in commutationibus eorum. ^ps-43-13

**14** Posuisti nos opprobrium vicinis nostris ;  
subsannationem et derisum his qui sunt in circuitu nostro. ^ps-43-14

**15** Posuisti nos in similitudinem gentibus ;  
commotionem capitis in populis. ^ps-43-15

**16** Tota die verecundia mea contra me est,  
et confusio faciei meae cooperuit me : ^ps-43-16

**17** a voce exprobrantis et obloquentis,  
a facie inimici et persequentis. ^ps-43-17

**18** Haec omnia venerunt super nos ; nec obliti sumus te,  
et inique non egimus in testamento tuo. ^ps-43-18

**19** Et non recessit retro cor nostrum ;  
et declinasti semitas nostras a via tua : ^ps-43-19

**20** quoniam humiliasti nos in loco afflictionis,  
et cooperuit nos umbra mortis. ^ps-43-20

**21** Si obliti sumus nomen Dei nostri,  
et si expandimus manus nostras ad deum alienum, ^ps-43-21

**22** nonne Deus requiret ista ?  
ipse enim novit abscondita cordis.  
Quoniam propter te mortificamur tota die ;  
aestimati sumus sicut oves occisionis. ^ps-43-22

**23** Exsurge ; quare obdormis, Domine ?  
exsurge, et ne repellas in finem. ^ps-43-23

**24** Quare faciem tuam avertis ?  
oblivisceris inopiae nostrae et tribulationis nostrae ? ^ps-43-24

**25** Quoniam humiliata est in pulvere anima nostra ;  
conglutinatus est in terra venter noster. ^ps-43-25

**26** Exsurge, Domine, adjuva nos,  
et redime nos propter nomen tuum. ^ps-43-26

## Capítulo 44

**1** In finem, pro iis qui commutabuntur. Filiis Core, ad intellectum. Canticum pro dilecto. ^ps-44-1

**2** Eructavit cor meum verbum bonum :  
dico ego opera mea regi.  
Lingua mea calamus scribae  
velociter scribentis. ^ps-44-2

**3** Speciosus forma prae filiis hominum,  
diffusa est gratia in labiis tuis :  
propterea benedixit te Deus in aeternum. ^ps-44-3

**4** Accingere gladio tuo super femur tuum, potentissime. ^ps-44-4

**5** Specie tua et pulchritudine tua  
intende, prospere procede, et regna,  
propter veritatem, et mansuetudinem, et justitiam ;  
et deducet te mirabiliter dextera tua. ^ps-44-5

**6** Sagittae tuae acutae :  
populi sub te cadent,  
in corda inimicorum regis. ^ps-44-6

**7** Sedes tua, Deus, in saeculum saeculi ;  
virga directionis virga regni tui. ^ps-44-7

**8** Dilexisti justitiam, et odisti iniquitatem ;  
propterea unxit te Deus, Deus tuus,  
oleo laetitiae, prae consortibus tuis. ^ps-44-8

**9** Myrrha, et gutta, et casia a vestimentis tuis,  
a domibus eburneis ; ex quibus delectaverunt te ^ps-44-9

**10** filiae regum in honore tuo.  
Astitit regina a dextris tuis  
in vestitu deaurato, circumdata varietate. ^ps-44-10

**11** Audi, filia, et vide, et inclina aurem tuam ;  
et obliviscere populum tuum, et domum patris tui. ^ps-44-11

**12** Et concupiscet rex decorem tuum,  
quoniam ipse est Dominus Deus tuus, et adorabunt eum. ^ps-44-12

**13** Et filiae Tyri in muneribus vultum tuum deprecabuntur ;  
omnes divites plebis. ^ps-44-13

**14** Omnis gloria ejus filiae regis ab intus,  
in fimbriis aureis, ^ps-44-14

**15** circumamicta varietatibus.  
Adducentur regi virgines post eam ;  
proximae ejus afferentur tibi. ^ps-44-15

**16** Afferentur in laetitia et exsultatione ;  
adducentur in templum regis. ^ps-44-16

**17** Pro patribus tuis nati sunt tibi filii ;  
constitues eos principes super omnem terram. ^ps-44-17

**18** Memores erunt nominis tui in omni generatione et generationem :  
propterea populi confitebuntur tibi in aeternum, et in saeculum saeculi. ^ps-44-18

## Capítulo 45

**1** In finem, filiis Core, pro arcanis. Psalmus. ^ps-45-1

**2** Deus noster refugium et virtus ;  
adjutor in tribulationibus quae invenerunt nos nimis. ^ps-45-2

**3** Propterea non timebimus dum turbabitur terra,  
et transferentur montes in cor maris. ^ps-45-3

**4** Sonuerunt, et turbatae sunt aquae eorum ;  
conturbati sunt montes in fortitudine ejus. ^ps-45-4

**5** Fluminis impetus laetificat civitatem Dei :  
sanctificavit tabernaculum suum Altissimus. ^ps-45-5

**6** Deus in medio ejus, non commovebitur ;  
adjuvabit eam Deus mane diluculo. ^ps-45-6

**7** Conturbatae sunt gentes, et inclinata sunt regna :  
dedit vocem suam, mota est terra. ^ps-45-7

**8** Dominus virtutum nobiscum ;  
susceptor noster Deus Jacob. ^ps-45-8

**9** Venite, et videte opera Domini,  
quae posuit prodigia super terram, ^ps-45-9

**10** auferens bella usque ad finem terrae.  
Arcum conteret, et confringet arma,  
et scuta comburet igni. ^ps-45-10

**11** Vacate, et videte quoniam ego sum Deus ;  
exaltabor in gentibus, et exaltabor in terra. ^ps-45-11

**12** Dominus virtutum nobiscum ;  
susceptor noster Deus Jacob. ^ps-45-12

## Capítulo 46

**1** In finem, pro filiis Core. Psalmus. ^ps-46-1

**2** Omnes gentes, plaudite manibus ;  
jubilate Deo in voce exsultationis : ^ps-46-2

**3** quoniam Dominus excelsus, terribilis,  
rex magnus super omnem terram. ^ps-46-3

**4** Subjecit populos nobis,  
et gentes sub pedibus nostris. ^ps-46-4

**5** Elegit nobis haereditatem suam ;  
speciem Jacob quam dilexit. ^ps-46-5

**6** Ascendit Deus in jubilo,  
et Dominus in voce tubae. ^ps-46-6

**7** Psallite Deo nostro, psallite ;  
psallite regi nostro, psallite : ^ps-46-7

**8** quoniam rex omnis terrae Deus,  
psallite sapienter. ^ps-46-8

**9** Regnabit Deus super gentes ;  
Deus sedet super sedem sanctam suam. ^ps-46-9

**10** Principes populorum congregati sunt cum Deo Abraham,  
quoniam dii fortes terrae vehementer elevati sunt. ^ps-46-10

## Capítulo 47

**1** Psalmus cantici. Filiis Core, secunda sabbati. ^ps-47-1

**2** Magnus Dominus et laudabilis nimis,  
in civitate Dei nostri, in monte sancto ejus. ^ps-47-2

**3** Fundatur exsultatione universae terrae mons Sion ;  
latera aquilonis, civitas regis magni. ^ps-47-3

**4** Deus in domibus ejus cognoscetur  
cum suscipiet eam. ^ps-47-4

**5** Quoniam ecce reges terrae congregati sunt ;  
convenerunt in unum. ^ps-47-5

**6** Ipsi videntes, sic admirati sunt,  
conturbati sunt, commoti sunt. ^ps-47-6

**7** Tremor apprehendit eos ;  
ibi dolores ut parturientis : ^ps-47-7

**8** in spiritu vehementi conteres naves Tharsis. ^ps-47-8

**9** Sicut audivimus, sic vidimus,  
in civitate Domini virtutum, in civitate Dei nostri :  
Deus fundavit eam in aeternum. ^ps-47-9

**10** Suscepimus, Deus, misericordiam tuam  
in medio templi tui. ^ps-47-10

**11** Secundum nomen tuum, Deus,  
sic et laus tua in fines terrae ;  
justitia plena est dextera tua. ^ps-47-11

**12** Laetetur mons Sion,  
et exsultent filiae Judae,  
propter judicia tua, Domine. ^ps-47-12

**13** Circumdate Sion, et complectimini eam ;  
narrate in turribus ejus. ^ps-47-13

**14** Ponite corda vestra in virtute ejus,  
et distribuite domos ejus, ut enarretis in progenie altera. ^ps-47-14

**15** Quoniam hic est Deus,  
Deus noster in aeternum, et in saeculum saeculi :  
ipse reget nos in saecula. ^ps-47-15

## Capítulo 48

**1** In finem, filiis Core. Psalmus. ^ps-48-1

**2** Audite haec, omnes gentes ;  
auribus percipite, omnes qui habitatis orbem : ^ps-48-2

**3** quique terrigenae et filii hominum,  
simul in unum dives et pauper. ^ps-48-3

**4** Os meum loquetur sapientiam,  
et meditatio cordis mei prudentiam. ^ps-48-4

**5** Inclinabo in parabolam aurem meam ;  
aperiam in psalterio propositionem meam. ^ps-48-5

**6** Cur timebo in die mala ?  
iniquitas calcanei mei circumdabit me. ^ps-48-6

**7** Qui confidunt in virtute sua,  
et in multitudine divitiarum suarum, gloriantur. ^ps-48-7

**8** Frater non redimit, redimet homo :  
non dabit Deo placationem suam, ^ps-48-8

**9** et pretium redemptionis animae suae.  
Et laborabit in aeternum ; ^ps-48-9

**10** et vivet adhuc in finem. ^ps-48-10

**11** Non videbit interitum,  
cum viderit sapientes morientes :  
simul insipiens et stultus peribunt.  
Et relinquent alienis divitias suas, ^ps-48-11

**12** et sepulchra eorum domus illorum in aeternum ;  
tabernacula eorum in progenie et progenie :  
vocaverunt nomina sua in terris suis. ^ps-48-12

**13** Et homo, cum in honore esset, non intellexit.  
Comparatus est jumentis insipientibus,  
et similis factus est illis. ^ps-48-13

**14** Haec via illorum scandalum ipsis ;  
et postea in ore suo complacebunt. ^ps-48-14

**15** Sicut oves in inferno positi sunt :  
mors depascet eos.  
Et dominabuntur eorum justi in matutino ;  
et auxilium eorum veterascet in inferno a gloria eorum. ^ps-48-15

**16** Verumtamen Deus redimet animam meam de manu inferi,  
cum acceperit me. ^ps-48-16

**17** Ne timueris cum dives factus fuerit homo,  
et cum multiplicata fuerit gloria domus ejus : ^ps-48-17

**18** quoniam, cum interierit, non sumet omnia,  
neque descendet cum eo gloria ejus. ^ps-48-18

**19** Quia anima ejus in vita ipsius benedicetur ;  
confitebitur tibi cum benefeceris ei. ^ps-48-19

**20** Introibit usque in progenies patrum suorum ;  
et usque in aeternum non videbit lumen. ^ps-48-20

**21** Homo, cum in honore esset, non intellexit.  
Comparatus est jumentis insipientibus,  
et similis factus est illis. ^ps-48-21

## Capítulo 49

**1** Psalmus Asaph. Deus deorum Dominus locutus est,  
et vocavit terram a solis ortu usque ad occasum. ^ps-49-1

**2** Ex Sion species decoris ejus : ^ps-49-2

**3** Deus manifeste veniet ;  
Deus noster, et non silebit.  
Ignis in conspectu ejus exardescet ;  
et in circuitu ejus tempestas valida. ^ps-49-3

**4** Advocabit caelum desursum, et terram,  
discernere populum suum. ^ps-49-4

**5** Congregate illi sanctos ejus,  
qui ordinant testamentum ejus super sacrificia. ^ps-49-5

**6** Et annuntiabunt caeli justitiam ejus,  
quoniam Deus judex est. ^ps-49-6

**7** Audi, populus meus, et loquar ;  
Israël, et testificabor tibi :  
Deus, Deus tuus ego sum. ^ps-49-7

**8** Non in sacrificiis tuis arguam te ;  
holocausta autem tua in conspectu meo sunt semper. ^ps-49-8

**9** Non accipiam de domo tua vitulos,  
neque de gregibus tuis hircos : ^ps-49-9

**10** quoniam meae sunt omnes ferae silvarum,  
jumenta in montibus, et boves. ^ps-49-10

**11** Cognovi omnia volatilia caeli,  
et pulchritudo agri mecum est. ^ps-49-11

**12** Si esuriero, non dicam tibi :  
meus est enim orbis terrae et plenitudo ejus. ^ps-49-12

**13** Numquid manducabo carnes taurorum ?  
aut sanguinem hircorum potabo ? ^ps-49-13

**14** Immola Deo sacrificium laudis,  
et redde Altissimo vota tua. ^ps-49-14

**15** Et invoca me in die tribulationis :  
eruam te, et honorificabis me. ^ps-49-15

**16** Peccatori autem dixit Deus : Quare tu enarras justitias meas ?  
et assumis testamentum meum per os tuum ? ^ps-49-16

**17** Tu vero odisti disciplinam,  
et projecisti sermones meos retrorsum. ^ps-49-17

**18** Si videbas furem, currebas cum eo ;  
et cum adulteris portionem tuam ponebas. ^ps-49-18

**19** Os tuum abundavit malitia,  
et lingua tua concinnabat dolos. ^ps-49-19

**20** Sedens adversus fratrem tuum loquebaris,  
et adversus filium matris tuae ponebas scandalum. ^ps-49-20

**21** Haec fecisti, et tacui.  
Existimasti inique quod ero tui similis :  
arguam te, et statuam contra faciem tuam. ^ps-49-21

**22** Intelligite haec, qui obliviscimini Deum,  
nequando rapiat, et non sit qui eripiat. ^ps-49-22

**23** Sacrificium laudis honorificabit me,  
et illic iter quo ostendam illi salutare Dei. ^ps-49-23

## Capítulo 50

**1** In finem. Psalmus David, ^ps-50-1

**2** cum venit ad eum Nathan propheta, quando intravit ad Bethsabee. ^ps-50-2

**3** Miserere mei, Deus, secundum magnam misericordiam tuam ;  
et secundum multitudinem miserationum tuarum, dele iniquitatem meam. ^ps-50-3

**4** Amplius lava me ab iniquitate mea,  
et a peccato meo munda me. ^ps-50-4

**5** Quoniam iniquitatem meam ego cognosco,  
et peccatum meum contra me est semper. ^ps-50-5

**6** Tibi soli peccavi, et malum coram te feci ;  
ut justificeris in sermonibus tuis,  
et vincas cum judicaris. ^ps-50-6

**7** Ecce enim in iniquitatibus conceptus sum,  
et in peccatis concepit me mater mea. ^ps-50-7

**8** Ecce enim veritatem dilexisti ;  
incerta et occulta sapientiae tuae manifestasti mihi. ^ps-50-8

**9** Asperges me hyssopo, et mundabor ;  
lavabis me, et super nivem dealbabor. ^ps-50-9

**10** Auditui meo dabis gaudium et laetitiam,  
et exsultabunt ossa humiliata. ^ps-50-10

**11** Averte faciem tuam a peccatis meis,  
et omnes iniquitates meas dele. ^ps-50-11

**12** Cor mundum crea in me, Deus,  
et spiritum rectum innova in visceribus meis. ^ps-50-12

**13** Ne projicias me a facie tua,  
et spiritum sanctum tuum ne auferas a me. ^ps-50-13

**14** Redde mihi laetitiam salutaris tui,  
et spiritu principali confirma me. ^ps-50-14

**15** Docebo iniquos vias tuas,  
et impii ad te convertentur. ^ps-50-15

**16** Libera me de sanguinibus, Deus, Deus salutis meae,  
et exsultabit lingua mea justitiam tuam. ^ps-50-16

**17** Domine, labia mea aperies,  
et os meum annuntiabit laudem tuam. ^ps-50-17

**18** Quoniam si voluisses sacrificium, dedissem utique ;  
holocaustis non delectaberis. ^ps-50-18

**19** Sacrificium Deo spiritus contribulatus ;  
cor contritum et humiliatum, Deus, non despicies. ^ps-50-19

**20** Benigne fac, Domine, in bona voluntate tua Sion,  
ut aedificentur muri Jerusalem. ^ps-50-20

**21** Tunc acceptabis sacrificium justitiae, oblationes et holocausta ;  
tunc imponent super altare tuum vitulos. ^ps-50-21

## Capítulo 51

**1** In finem. Intellectus David, ^ps-51-1

**2** cum venit Doëg Idumaeus, et nuntiavit Sauli : Venit David in domum Achimelech. ^ps-51-2

**3** Quid gloriaris in malitia,  
qui potens es in iniquitate ? ^ps-51-3

**4** Tota die injustitiam cogitavit lingua tua ;  
sicut novacula acuta fecisti dolum. ^ps-51-4

**5** Dilexisti malitiam super benignitatem ;  
iniquitatem magis quam loqui aequitatem. ^ps-51-5

**6** Dilexisti omnia verba praecipitationis ;  
lingua dolosa. ^ps-51-6

**7** Propterea Deus destruet te in finem ;  
evellet te, et emigrabit te de tabernaculo tuo,  
et radicem tuam de terra viventium. ^ps-51-7

**8** Videbunt justi, et timebunt ;  
et super eum ridebunt, et dicent : ^ps-51-8

**9** Ecce homo qui non posuit Deum adjutorem suum ;  
sed speravit in multitudine divitiarum suarum,  
et praevaluit in vanitate sua. ^ps-51-9

**10** Ego autem, sicut oliva fructifera in domo Dei ;  
speravi in misericordia Dei, in aeternum et in saeculum saeculi. ^ps-51-10

**11** Confitebor tibi in saeculum, quia fecisti ;  
et exspectabo nomen tuum,  
quoniam bonum est in conspectu sanctorum tuorum. ^ps-51-11

## Capítulo 52

**1** In finem, pro Maëleth intelligentiae David. Dixit insipiens in corde suo : Non est Deus. ^ps-52-1

**2** Corrupti sunt, et abominabiles facti sunt in iniquitatibus ;  
non est qui faciat bonum. ^ps-52-2

**3** Deus de caelo prospexit super filios hominum,  
ut videat si est intelligens, aut requirens Deum. ^ps-52-3

**4** Omnes declinaverunt ; simul inutiles facti sunt :  
non est qui faciat bonum, non est usque ad unum. ^ps-52-4

**5** Nonne scient omnes qui operantur iniquitatem,  
qui devorant plebem meam ut cibum panis ? ^ps-52-5

**6** Deum non invocaverunt ;  
illic trepidaverunt timore, ubi non erat timor.  
Quoniam Deus dissipavit ossa eorum qui hominibus placent :  
confusi sunt, quoniam Deus sprevit eos. ^ps-52-6

**7** Quis dabit ex Sion salutare Israël ?  
cum converterit Deus captivitatem plebis suae,  
exsultabit Jacob, et laetabitur Israël. ^ps-52-7

## Capítulo 53

**1** In finem, in carminibus. Intellectus David, ^ps-53-1

**2** cum venissent Ziphaei, et dixissent ad Saul : Nonne David absconditus est apud nos ? ^ps-53-2

**3** Deus, in nomine tuo salvum me fac,  
et in virtute tua judica me. ^ps-53-3

**4** Deus, exaudi orationem meam ;  
auribus percipe verba oris mei. ^ps-53-4

**5** Quoniam alieni insurrexerunt adversum me,  
et fortes quaesierunt animam meam,  
et non proposuerunt Deum ante conspectum suum. ^ps-53-5

**6** Ecce enim Deus adjuvat me,  
et Dominus susceptor est animae meae. ^ps-53-6

**7** Averte mala inimicis meis ;  
et in veritate tua disperde illos. ^ps-53-7

**8** Voluntarie sacrificabo tibi,  
et confitebor nomini tuo, Domine, quoniam bonum est. ^ps-53-8

**9** Quoniam ex omni tribulatione eripuisti me,  
et super inimicos meos despexit oculus meus. ^ps-53-9

## Capítulo 54

**1** In finem, in carminibus. Intellectus David. ^ps-54-1

**2** Exaudi, Deus, orationem meam,  
et ne despexeris deprecationem meam : ^ps-54-2

**3** intende mihi, et exaudi me.  
Contristatus sum in exercitatione mea,  
et conturbatus sum ^ps-54-3

**4** a voce inimici, et a tribulatione peccatoris.  
Quoniam declinaverunt in me iniquitates,  
et in ira molesti erant mihi. ^ps-54-4

**5** Cor meum conturbatum est in me,  
et formido mortis cecidit super me. ^ps-54-5

**6** Timor et tremor venerunt super me,  
et contexerunt me tenebrae. ^ps-54-6

**7** Et dixi : Quis dabit mihi pennas sicut columbae,  
et volabo, et requiescam ? ^ps-54-7

**8** Ecce elongavi fugiens,  
et mansi in solitudine. ^ps-54-8

**9** Exspectabam eum qui salvum me fecit  
a pusillanimitate spiritus, et tempestate. ^ps-54-9

**10** Praecipita, Domine ; divide linguas eorum :  
quoniam vidi iniquitatem et contradictionem in civitate. ^ps-54-10

**11** Die ac nocte circumdabit eam super muros ejus iniquitas ;  
et labor in medio ejus, ^ps-54-11

**12** et injustitia :  
et non defecit de plateis ejus usura et dolus. ^ps-54-12

**13** Quoniam si inimicus meus maledixisset mihi,  
sustinuissem utique.  
Et si is qui oderat me super me magna locutus fuisset,  
abscondissem me forsitan ab eo. ^ps-54-13

**14** Tu vero homo unanimis,  
dux meus, et notus meus : ^ps-54-14

**15** qui simul mecum dulces capiebas cibos ;  
in domo Dei ambulavimus cum consensu. ^ps-54-15

**16** Veniat mors super illos,  
et descendant in infernum viventes :  
quoniam nequitiae in habitaculis eorum, in medio eorum. ^ps-54-16

**17** Ego autem ad Deum clamavi,  
et Dominus salvabit me. ^ps-54-17

**18** Vespere, et mane, et meridie, narrabo, et annuntiabo ;  
et exaudiet vocem meam. ^ps-54-18

**19** Redimet in pace animam meam ab his qui appropinquant mihi :  
quoniam inter multos erant mecum. ^ps-54-19

**20** Exaudiet Deus, et humiliabit illos,  
qui est ante saecula.  
Non enim est illis commutatio,  
et non timuerunt Deum. ^ps-54-20

**21** Extendit manum suam in retribuendo ;  
contaminaverunt testamentum ejus : ^ps-54-21

**22** divisi sunt ab ira vultus ejus,  
et appropinquavit cor illius.  
Molliti sunt sermones ejus super oleum ;  
et ipsi sunt jacula. ^ps-54-22

**23** Jacta super Dominum curam tuam, et ipse te enutriet ;  
non dabit in aeternum fluctuationem justo. ^ps-54-23

**24** Tu vero, Deus, deduces eos in puteum interitus.  
Viri sanguinum et dolosi non dimidiabunt dies suos ;  
ego autem sperabo in te, Domine. ^ps-54-24

## Capítulo 55

**1** In finem, pro populo qui a sanctis longe factus est. David in tituli inscriptionem, cum tenuerunt eum Allophyli in Geth. ^ps-55-1

**2** Miserere mei, Deus, quoniam conculcavit me homo ;  
tota die impugnans, tribulavit me. ^ps-55-2

**3** Conculcaverunt me inimici mei tota die,  
quoniam multi bellantes adversum me. ^ps-55-3

**4** Ab altitudine diei timebo :  
ego vero in te sperabo. ^ps-55-4

**5** In Deo laudabo sermones meos ;  
in Deo speravi :  
non timebo quid faciat mihi caro. ^ps-55-5

**6** Tota die verba mea execrabantur ;  
adversum me omnes cogitationes eorum in malum. ^ps-55-6

**7** Inhabitabunt, et abscondent ;  
ipsi calcaneum meum observabunt.  
Sicut sustinuerunt animam meam, ^ps-55-7

**8** pro nihilo salvos facies illos ;  
in ira populos confringes. ^ps-55-8

**9** Deus, vitam meam annuntiavi tibi ;  
posuisti lacrimas meas in conspectu tuo,  
sicut et in promissione tua : ^ps-55-9

**10** tunc convertentur inimici mei retrorsum.  
In quacumque die invocavero te,  
ecce cognovi quoniam Deus meus es. ^ps-55-10

**11** In Deo laudabo verbum ;  
in Domino laudabo sermonem.  
In Deo speravi :  
non timebo quid faciat mihi homo. ^ps-55-11

**12** In me sunt, Deus, vota tua,  
quae reddam, laudationes tibi : ^ps-55-12

**13** quoniam eripuisti animam meam de morte,  
et pedes meos de lapsu,  
ut placeam coram Deo in lumine viventium. ^ps-55-13

## Capítulo 56

**1** In finem, ne disperdas. David in tituli inscriptionem, cum fugeret a facie Saul in speluncam. ^ps-56-1

**2** Miserere mei, Deus, miserere mei,  
quoniam in te confidit anima mea.  
Et in umbra alarum tuarum sperabo,  
donec transeat iniquitas. ^ps-56-2

**3** Clamabo ad Deum altissimum,  
Deum qui benefecit mihi. ^ps-56-3

**4** Misit de caelo, et liberavit me ;  
dedit in opprobrium conculcantes me.  
Misit Deus misericordiam suam et veritatem suam, ^ps-56-4

**5** et eripuit animam meam de medio catulorum leonum.  
Dormivi conturbatus.  
Filii hominum dentes eorum arma et sagittae,  
et lingua eorum gladius acutus. ^ps-56-5

**6** Exaltare super caelos, Deus,  
et in omnem terram gloria tua. ^ps-56-6

**7** Laqueum paraverunt pedibus meis,  
et incurvaverunt animam meam.  
Foderunt ante faciem meam foveam,  
et inciderunt in eam. ^ps-56-7

**8** Paratum cor meum, Deus, paratum cor meum ;  
cantabo, et psalmum dicam. ^ps-56-8

**9** Exsurge, gloria mea ;  
exsurge, psalterium et cithara :  
exsurgam diluculo. ^ps-56-9

**10** Confitebor tibi in populis, Domine,  
et psalmum dicam tibi in gentibus : ^ps-56-10

**11** quoniam magnificata est usque ad caelos misericordia tua,  
et usque ad nubes veritas tua. ^ps-56-11

**12** Exaltare super caelos, Deus,  
et super omnem terram gloria tua. ^ps-56-12

## Capítulo 57

**1** In finem, ne disperdas. David in tituli inscriptionem. ^ps-57-1

**2** Si vere utique justitiam loquimini,  
recta judicate, filii hominum. ^ps-57-2

**3** Etenim in corde iniquitates operamini ;  
in terra injustitias manus vestrae concinnant. ^ps-57-3

**4** Alienati sunt peccatores a vulva ;  
erraverunt ab utero :  
locuti sunt falsa. ^ps-57-4

**5** Furor illis secundum similitudinem serpentis,  
sicut aspidis surdae et obturantis aures suas, ^ps-57-5

**6** quae non exaudiet vocem incantantium,  
et venefici incantantis sapienter. ^ps-57-6

**7** Deus conteret dentes eorum in ore ipsorum ;  
molas leonum confringet Dominus. ^ps-57-7

**8** Ad nihilum devenient tamquam aqua decurrens ;  
intendit arcum suum donec infirmentur. ^ps-57-8

**9** Sicut cera quae fluit auferentur ;  
supercecidit ignis, et non viderunt solem. ^ps-57-9

**10** Priusquam intelligerent spinae vestrae rhamnum,  
sicut viventes sic in ira absorbet eos. ^ps-57-10

**11** Laetabitur justus cum viderit vindictam ;  
manus suas lavabit in sanguine peccatoris. ^ps-57-11

**12** Et dicet homo : Si utique est fructus justo,  
utique est Deus judicans eos in terra. ^ps-57-12

## Capítulo 58

**1** In finem, ne disperdas. David in tituli inscriptionem, quando misit Saul et custodivit domum ejus ut eum interficeret. ^ps-58-1

**2** Eripe me de inimicis meis, Deus meus,  
et ab insurgentibus in me libera me. ^ps-58-2

**3** Eripe me de operantibus iniquitatem,  
et de viris sanguinum salva me. ^ps-58-3

**4** Quia ecce ceperunt animam meam ;  
irruerunt in me fortes. ^ps-58-4

**5** Neque iniquitas mea, neque peccatum meum, Domine ;  
sine iniquitate cucurri, et direxi. ^ps-58-5

**6** Exsurge in occursum meum, et vide :  
et tu, Domine Deus virtutum, Deus Israël,  
intende ad visitandas omnes gentes :  
non miserearis omnibus qui operantur iniquitatem. ^ps-58-6

**7** Convertentur ad vesperam, et famem patientur ut canes :  
et circuibunt civitatem. ^ps-58-7

**8** Ecce loquentur in ore suo,  
et gladius in labiis eorum : quoniam quis audivit ? ^ps-58-8

**9** Et tu, Domine, deridebis eos ;  
ad nihilum deduces omnes gentes. ^ps-58-9

**10** Fortitudinem meam ad te custodiam,  
quia, Deus, susceptor meus es : ^ps-58-10

**11** Deus meus misericordia ejus praeveniet me. ^ps-58-11

**12** Deus ostendet mihi super inimicos meos :  
ne occidas eos, nequando obliviscantur populi mei.  
Disperge illos in virtute tua,  
et depone eos, protector meus, Domine : ^ps-58-12

**13** delictum oris eorum, sermonem labiorum ipsorum ;  
et comprehendantur in superbia sua.  
Et de execratione et mendacio annuntiabuntur ^ps-58-13

**14** in consummatione :  
in ira consummationis, et non erunt.  
Et scient quia Deus dominabitur Jacob, et finium terrae. ^ps-58-14

**15** Convertentur ad vesperam, et famem patientur ut canes :  
et circuibunt civitatem. ^ps-58-15

**16** Ipsi dispergentur ad manducandum ;  
si vero non fuerint saturati, et murmurabunt. ^ps-58-16

**17** Ego autem cantabo fortitudinem tuam,  
et exsultabo mane misericordiam tuam :  
quia factus es susceptor meus,  
et refugium meum in die tribulationis meae. ^ps-58-17

**18** Adjutor meus, tibi psallam,  
quia Deus susceptor meus es ;  
Deus meus, misericordia mea. ^ps-58-18

## Capítulo 59

**1** In finem, pro his qui immutabuntur, in tituli inscriptionem ipsi David, in doctrinam, ^ps-59-1

**2** cum succendit Mesopotamiam Syriae et Sobal, et convertit Joab, et percussit Idumaeam in valle Salinarum duodecim millia. ^ps-59-2

**3** Deus, repulisti nos, et destruxisti nos ;  
iratus es, et misertus es nobis. ^ps-59-3

**4** Commovisti terram, et conturbasti eam ;  
sana contritiones ejus, quia commota est. ^ps-59-4

**5** Ostendisti populo tuo dura ;  
potasti nos vino compunctionis. ^ps-59-5

**6** Dedisti metuentibus te significationem,  
ut fugiant a facie arcus ;  
ut liberentur dilecti tui. ^ps-59-6

**7** Salvum fac dextera tua, et exaudi me. ^ps-59-7

**8** Deus locutus est in sancto suo :  
laetabor, et partibor Sichimam ;  
et convallem tabernaculorum metibor. ^ps-59-8

**9** Meus est Galaad, et meus est Manasses ;  
et Ephraim fortitudo capitis mei.  
Juda rex meus ; ^ps-59-9

**10** Moab olla spei meae.  
In Idumaeam extendam calceamentum meum :  
mihi alienigenae subditi sunt. ^ps-59-10

**11** Quis deducet me in civitatem munitam ?  
quis deducet me usque in Idumaeam ? ^ps-59-11

**12** nonne tu, Deus, qui repulisti nos ?  
et non egredieris, Deus, in virtutibus nostris ? ^ps-59-12

**13** Da nobis auxilium de tribulatione,  
quia vana salus hominis. ^ps-59-13

**14** In Deo faciemus virtutem ;  
et ipse ad nihilum deducet tribulantes nos. ^ps-59-14

## Capítulo 60

**1** In finem. In hymnis David. ^ps-60-1

**2** Exaudi, Deus, deprecationem meam ;  
intende orationi meae. ^ps-60-2

**3** A finibus terrae ad te clamavi, dum anxiaretur cor meum ;  
in petra exaltasti me.  
Deduxisti me, ^ps-60-3

**4** quia factus es spes mea :  
turris fortitudinis a facie inimici. ^ps-60-4

**5** Inhabitabo in tabernaculo tuo in saecula ;  
protegar in velamento alarum tuarum. ^ps-60-5

**6** Quoniam tu, Deus meus, exaudisti orationem meam ;  
dedisti haereditatem timentibus nomen tuum. ^ps-60-6

**7** Dies super dies regis adjicies ;  
annos ejus usque in diem generationis et generationis. ^ps-60-7

**8** Permanet in aeternum in conspectu Dei :  
misericordiam et veritatem ejus quis requiret ? ^ps-60-8

**9** Sic psalmum dicam nomini tuo in saeculum saeculi,  
ut reddam vota mea de die in diem. ^ps-60-9

## Capítulo 61

**1** In finem, pro Idithun. Psalmus David. ^ps-61-1

**2** Nonne Deo subjecta erit anima mea ?  
ab ipso enim salutare meum. ^ps-61-2

**3** Nam et ipse Deus meus et salutaris meus ;  
susceptor meus, non movebor amplius. ^ps-61-3

**4** Quousque irruitis in hominem ?  
interficitis universi vos,  
tamquam parieti inclinato et maceriae depulsae. ^ps-61-4

**5** Verumtamen pretium meum cogitaverunt repellere ;  
cucurri in siti :  
ore suo benedicebant,  
et corde suo maledicebant. ^ps-61-5

**6** Verumtamen Deo subjecta esto, anima mea,  
quoniam ab ipso patientia mea : ^ps-61-6

**7** quia ipse Deus meus et salvator meus,  
adjutor meus, non emigrabo. ^ps-61-7

**8** In Deo salutare meum et gloria mea ;  
Deus auxilii mei, et spes mea in Deo est. ^ps-61-8

**9** Sperate in eo, omnis congregatio populi ;  
effundite coram illo corda vestra :  
Deus adjutor noster in aeternum. ^ps-61-9

**10** Verumtamen vani filii hominum,  
mendaces filii hominum in stateris,  
ut decipiant ipsi de vanitate in idipsum. ^ps-61-10

**11** Nolite sperare in iniquitate,  
et rapinas nolite concupiscere ;  
divitiae si affluant, nolite cor apponere. ^ps-61-11

**12** Semel locutus est Deus ;  
duo haec audivi :  
quia potestas Dei est, ^ps-61-12

**13** et tibi, Domine, misericordia :  
quia tu reddes unicuique juxta opera sua. ^ps-61-13

## Capítulo 62

**1** Psalmus David, cum esset in deserto Idumaeae. ^ps-62-1

**2** Deus, Deus meus, ad te de luce vigilo.  
Sitivit in te anima mea ; quam multipliciter tibi caro mea ! ^ps-62-2

**3** In terra deserta, et invia, et inaquosa,  
sic in sancto apparui tibi,  
ut viderem virtutem tuam et gloriam tuam. ^ps-62-3

**4** Quoniam melior est misericordia tua super vitas,  
labia mea laudabunt te. ^ps-62-4

**5** Sic benedicam te in vita mea,  
et in nomine tuo levabo manus meas. ^ps-62-5

**6** Sicut adipe et pinguedine repleatur anima mea,  
et labiis exsultationis laudabit os meum. ^ps-62-6

**7** Si memor fui tui super stratum meum,  
in matutinis meditabor in te. ^ps-62-7

**8** Quia fuisti adjutor meus,  
et in velamento alarum tuarum exsultabo. ^ps-62-8

**9** Adhaesit anima mea post te ;  
me suscepit dextera tua. ^ps-62-9

**10** Ipsi vero in vanum quaesierunt animam meam :  
introibunt in inferiora terrae ; ^ps-62-10

**11** tradentur in manus gladii :  
partes vulpium erunt. ^ps-62-11

**12** Rex vero laetabitur in Deo ;  
laudabuntur omnes qui jurant in eo :  
quia obstructum est os loquentium iniqua. ^ps-62-12

## Capítulo 63

**1** In finem. Psalmus David. ^ps-63-1

**2** Exaudi, Deus, orationem meam cum deprecor ;  
a timore inimici eripe animam meam. ^ps-63-2

**3** Protexisti me a conventu malignantium,  
a multitudine operantium iniquitatem. ^ps-63-3

**4** Quia exacuerunt ut gladium linguas suas ;  
intenderunt arcum rem amaram, ^ps-63-4

**5** ut sagittent in occultis immaculatum. ^ps-63-5

**6** Subito sagittabunt eum, et non timebunt ;  
firmaverunt sibi sermonem nequam.  
Narraverunt ut absconderent laqueos ;  
dixerunt : Quis videbit eos ? ^ps-63-6

**7** Scrutati sunt iniquitates ;  
defecerunt scrutantes scrutinio.  
Accedet homo ad cor altum, ^ps-63-7

**8** et exaltabitur Deus.  
Sagittae parvulorum factae sunt plagae eorum, ^ps-63-8

**9** et infirmatae sunt contra eos linguae eorum.  
Conturbati sunt omnes qui videbant eos, ^ps-63-9

**10** et timuit omnis homo.  
Et annuntiaverunt opera Dei,  
et facta ejus intellexerunt. ^ps-63-10

**11** Laetabitur justus in Domino, et sperabit in eo,  
et laudabuntur omnes recti corde. ^ps-63-11

## Capítulo 64

**1** In finem. Psalmus David, canticum Jeremiae et Ezechielis populo transmigrationis, cum inciperent exire. ^ps-64-1

**2** Te decet hymnus, Deus, in Sion,  
et tibi reddetur votum in Jerusalem. ^ps-64-2

**3** Exaudi orationem meam ;  
ad te omnis caro veniet. ^ps-64-3

**4** Verba iniquorum praevaluerunt super nos,  
et impietatibus nostris tu propitiaberis. ^ps-64-4

**5** Beatus quem elegisti et assumpsisti :  
inhabitabit in atriis tuis.  
Replebimur in bonis domus tuae ;  
sanctum est templum tuum, ^ps-64-5

**6** mirabile in aequitate.  
Exaudi nos, Deus, salutaris noster,  
spes omnium finium terrae, et in mari longe. ^ps-64-6

**7** Praeparans montes in virtute tua,  
accinctus potentia ; ^ps-64-7

**8** qui conturbas profundum maris,  
sonum fluctuum ejus.  
Turbabuntur gentes, ^ps-64-8

**9** et timebunt qui habitant terminos a signis tuis ;  
exitus matutini et vespere delectabis. ^ps-64-9

**10** Visitasti terram, et inebriasti eam ;  
multiplicasti locupletare eam.  
Flumen Dei repletum est aquis ; parasti cibum illorum :  
quoniam ita est praeparatio ejus. ^ps-64-10

**11** Rivos ejus inebria ;  
multiplica genimina ejus :  
in stillicidiis ejus laetabitur germinans. ^ps-64-11

**12** Benedices coronae anni benignitatis tuae,  
et campi tui replebuntur ubertate. ^ps-64-12

**13** Pinguescent speciosa deserti,  
et exsultatione colles accingentur. ^ps-64-13

**14** Induti sunt arietes ovium,  
et valles abundabunt frumento ;  
clamabunt, etenim hymnum dicent. ^ps-64-14

## Capítulo 65

**1** In finem. Canticum psalmi resurrectionis. Jubilate Deo, omnis terra ; ^ps-65-1

**2** psalmum dicite nomini ejus ;  
date gloriam laudi ejus. ^ps-65-2

**3** Dicite Deo : Quam terribilia sunt opera tua, Domine !  
in multitudine virtutis tuae mentientur tibi inimici tui. ^ps-65-3

**4** Omnis terra adoret te, et psallat tibi ;  
psalmum dicat nomini tuo. ^ps-65-4

**5** Venite, et videte opera Dei :  
terribilis in consiliis super filios hominum. ^ps-65-5

**6** Qui convertit mare in aridam ;  
in flumine pertransibunt pede :  
ibi laetabimur in ipso. ^ps-65-6

**7** Qui dominatur in virtute sua in aeternum ;  
oculi ejus super gentes respiciunt :  
qui exasperant non exaltentur in semetipsis. ^ps-65-7

**8** Benedicite, gentes, Deum nostrum,  
et auditam facite vocem laudis ejus : ^ps-65-8

**9** qui posuit animam meam ad vitam,  
et non dedit in commotionem pedes meos. ^ps-65-9

**10** Quoniam probasti nos, Deus ;  
igne nos examinasti, sicut examinatur argentum. ^ps-65-10

**11** Induxisti nos in laqueum ;  
posuisti tribulationes in dorso nostro ; ^ps-65-11

**12** imposuisti homines super capita nostra.  
Transivimus per ignem et aquam,  
et eduxisti nos in refrigerium. ^ps-65-12

**13** Introibo in domum tuam in holocaustis ;  
reddam tibi vota mea ^ps-65-13

**14** quae distinxerunt labia mea :  
et locutum est os meum in tribulatione mea. ^ps-65-14

**15** Holocausta medullata offeram tibi, cum incenso arietum ;  
offeram tibi boves cum hircis. ^ps-65-15

**16** Venite, audite, et narrabo, omnes qui timetis Deum,  
quanta fecit animae meae. ^ps-65-16

**17** Ad ipsum ore meo clamavi,  
et exaltavi sub lingua mea. ^ps-65-17

**18** Iniquitatem si aspexi in corde meo,  
non exaudiet Dominus. ^ps-65-18

**19** Propterea exaudivit Deus,  
et attendit voci deprecationis meae. ^ps-65-19

**20** Benedictus Deus, qui non amovit orationem meam,  
et misericordiam suam a me. ^ps-65-20

## Capítulo 66

**1** In finem, in hymnis. Psalmus cantici David. ^ps-66-1

**2** Deus misereatur nostri, et benedicat nobis ;  
illuminet vultum suum super nos, et misereatur nostri : ^ps-66-2

**3** ut cognoscamus in terra viam tuam,  
in omnibus gentibus salutare tuum. ^ps-66-3

**4** Confiteantur tibi populi, Deus :  
confiteantur tibi populi omnes. ^ps-66-4

**5** Laetentur et exsultent gentes,  
quoniam judicas populos in aequitate,  
et gentes in terra dirigis. ^ps-66-5

**6** Confiteantur tibi populi, Deus :  
confiteantur tibi populi omnes. ^ps-66-6

**7** Terra dedit fructum suum :  
benedicat nos Deus, Deus noster ! ^ps-66-7

**8** Benedicat nos Deus,  
et metuant eum omnes fines terrae. ^ps-66-8

## Capítulo 67

**1** In finem. Psalmus cantici ipsi David. ^ps-67-1

**2** Exsurgat Deus, et dissipentur inimici ejus ;  
et fugiant qui oderunt eum a facie ejus. ^ps-67-2

**3** Sicut deficit fumus, deficiant ;  
sicut fluit cera a facie ignis, sic pereant peccatores a facie Dei. ^ps-67-3

**4** Et justi epulentur, et exsultent in conspectu Dei,  
et delectentur in laetitia. ^ps-67-4

**5** Cantate Deo ; psalmum dicite nomini ejus :  
iter facite ei qui ascendit super occasum.  
Dominus nomen illi ; exsultate in conspectu ejus.  
Turbabuntur a facie ejus, ^ps-67-5

**6** patris orphanorum, et judicis viduarum ;  
Deus in loco sancto suo. ^ps-67-6

**7** Deus qui inhabitare facit unius moris in domo ;  
qui educit vinctos in fortitudine,  
similiter eos qui exasperant, qui habitant in sepulchris. ^ps-67-7

**8** Deus, cum egredereris in conspectu populi tui,  
cum pertransires in deserto, ^ps-67-8

**9** terra mota est, etenim caeli distillaverunt,  
a facie Dei Sinai, a facie Dei Israël. ^ps-67-9

**10** Pluviam voluntariam segregabis, Deus, haereditati tuae ;  
et infirmata est, tu vero perfecisti eam. ^ps-67-10

**11** Animalia tua habitabunt in ea ;  
parasti in dulcedine tua pauperi, Deus. ^ps-67-11

**12** Dominus dabit verbum evangelizantibus, virtute multa. ^ps-67-12

**13** Rex virtutum dilecti, dilecti ;  
et speciei domus dividere spolia. ^ps-67-13

**14** Si dormiatis inter medios cleros,  
pennae columbae deargentatae,  
et posteriora dorsi ejus in pallore auri. ^ps-67-14

**15** Dum discernit caelestis reges super eam,  
nive dealbabuntur in Selmon. ^ps-67-15

**16** Mons Dei, mons pinguis :  
mons coagulatus, mons pinguis. ^ps-67-16

**17** Ut quid suspicamini, montes coagulatos ?  
mons in quo beneplacitum est Deo habitare in eo ;  
etenim Dominus habitabit in finem. ^ps-67-17

**18** Currus Dei decem millibus multiplex, millia laetantium ;  
Dominus in eis in Sina, in sancto. ^ps-67-18

**19** Ascendisti in altum, cepisti captivitatem,  
accepisti dona in hominibus ;  
etenim non credentes inhabitare Dominum Deum. ^ps-67-19

**20** Benedictus Dominus die quotidie :  
prosperum iter faciet nobis Deus salutarium nostrorum. ^ps-67-20

**21** Deus noster, Deus salvos faciendi ;  
et Domini, Domini exitus mortis. ^ps-67-21

**22** Verumtamen Deus confringet capita inimicorum suorum,  
verticem capilli perambulantium in delictis suis. ^ps-67-22

**23** Dixit Dominus : Ex Basan convertam,  
convertam in profundum maris : ^ps-67-23

**24** ut intingatur pes tuus in sanguine ;  
lingua canum tuorum ex inimicis, ab ipso. ^ps-67-24

**25** Viderunt ingressus tuos, Deus,  
ingressus Dei mei, regis mei, qui est in sancto. ^ps-67-25

**26** Praevenerunt principes conjuncti psallentibus,  
in medio juvencularum tympanistriarum. ^ps-67-26

**27** In ecclesiis benedicite Deo Domino de fontibus Israël. ^ps-67-27

**28** Ibi Benjamin adolescentulus, in mentis excessu ;  
principes Juda, duces eorum ;  
principes Zabulon, principes Nephthali. ^ps-67-28

**29** Manda, Deus, virtuti tuae ;  
confirma hoc, Deus, quod operatus es in nobis. ^ps-67-29

**30** A templo tuo in Jerusalem,  
tibi offerent reges munera. ^ps-67-30

**31** Increpa feras arundinis ;  
congregatio taurorum in vaccis populorum :  
ut excludant eos qui probati sunt argento.  
Dissipa gentes quae bella volunt. ^ps-67-31

**32** Venient legati ex Aegypto ;  
Aethiopia praeveniet manus ejus Deo. ^ps-67-32

**33** Regna terrae, cantate Deo ;  
psallite Domino ; psallite Deo. ^ps-67-33

**34** Qui ascendit super caelum caeli, ad orientem :  
ecce dabit voci suae vocem virtutis. ^ps-67-34

**35** Date gloriam Deo super Israël ;  
magnificentia ejus et virtus ejus in nubibus. ^ps-67-35

**36** Mirabilis Deus in sanctis suis ;  
Deus Israël ipse dabit virtutem et fortitudinem plebi suae.  
Benedictus Deus ! ^ps-67-36

## Capítulo 68

**1** In finem, pro iis qui commutabuntur. David. ^ps-68-1

**2** Salvum me fac, Deus,  
quoniam intraverunt aquae usque ad animam meam. ^ps-68-2

**3** Infixus sum in limo profundi et non est substantia.  
Veni in altitudinem maris, et tempestas demersit me. ^ps-68-3

**4** Laboravi clamans, raucae factae sunt fauces meae ;  
defecerunt oculi mei, dum spero in Deum meum. ^ps-68-4

**5** Multiplicati sunt super capillos capitis mei  
qui oderunt me gratis.  
Confortati sunt qui persecuti sunt me  
inimici mei injuste ;  
quae non rapui, tunc exsolvebam. ^ps-68-5

**6** Deus, tu scis insipientiam meam ;  
et delicta mea a te non sunt abscondita. ^ps-68-6

**7** Non erubescant in me qui exspectant te, Domine, Domine virtutum ;  
non confundantur super me qui quaerunt te, Deus Israël. ^ps-68-7

**8** Quoniam propter te sustinui opprobrium ;  
operuit confusio faciem meam. ^ps-68-8

**9** Extraneus factus sum fratribus meis,  
et peregrinus filiis matris meae. ^ps-68-9

**10** Quoniam zelus domus tuae comedit me,  
et opprobria exprobrantium tibi ceciderunt super me. ^ps-68-10

**11** Et operui in jejunio animam meam,  
et factum est in opprobrium mihi. ^ps-68-11

**12** Et posui vestimentum meum cilicium ;  
et factus sum illis in parabolam. ^ps-68-12

**13** Adversum me loquebantur qui sedebant in porta,  
et in me psallebant qui bibebant vinum. ^ps-68-13

**14** Ego vero orationem meam ad te, Domine ;  
tempus beneplaciti, Deus.  
In multitudine misericordiae tuae,  
exaudi me in veritate salutis tuae. ^ps-68-14

**15** Eripe me de luto, ut non infigar ;  
libera me ab iis qui oderunt me, et de profundis aquarum. ^ps-68-15

**16** Non me demergat tempestas aquae,  
neque absorbeat me profundum,  
neque urgeat super me puteus os suum. ^ps-68-16

**17** Exaudi me, Domine, quoniam benigna est misericordia tua ;  
secundum multitudinem miserationum tuarum respice in me. ^ps-68-17

**18** Et ne avertas faciem tuam a puero tuo ;  
quoniam tribulor, velociter exaudi me. ^ps-68-18

**19** Intende animae meae, et libera eam ;  
propter inimicos meos, eripe me. ^ps-68-19

**20** Tu scis improperium meum, et confusionem meam, et reverentiam meam ; ^ps-68-20

**21** in conspectu tuo sunt omnes qui tribulant me.  
Improperium exspectavit cor meum et miseriam :  
et sustinui qui simul contristaretur, et non fuit ;  
et qui consolaretur, et non inveni. ^ps-68-21

**22** Et dederunt in escam meam fel,  
et in siti mea potaverunt me aceto. ^ps-68-22

**23** Fiat mensa eorum coram ipsis in laqueum,  
et in retributiones, et in scandalum. ^ps-68-23

**24** Obscurentur oculi eorum, ne videant,  
et dorsum eorum semper incurva. ^ps-68-24

**25** Effunde super eos iram tuam,  
et furor irae tuae comprehendat eos. ^ps-68-25

**26** Fiat habitatio eorum deserta,  
et in tabernaculis eorum non sit qui inhabitet. ^ps-68-26

**27** Quoniam quem tu percussisti persecuti sunt,  
et super dolorem vulnerum meorum addiderunt. ^ps-68-27

**28** Appone iniquitatem super iniquitatem eorum,  
et non intrent in justitiam tuam. ^ps-68-28

**29** Deleantur de libro viventium,  
et cum justis non scribantur. ^ps-68-29

**30** Ego sum pauper et dolens ;  
salus tua, Deus, suscepit me. ^ps-68-30

**31** Laudabo nomen Dei cum cantico,  
et magnificabo eum in laude : ^ps-68-31

**32** et placebit Deo super vitulum novellum,  
cornua producentem et ungulas. ^ps-68-32

**33** Videant pauperes, et laetentur ;  
quaerite Deum, et vivet anima vestra : ^ps-68-33

**34** quoniam exaudivit pauperes Dominus,  
et vinctos suos non despexit. ^ps-68-34

**35** Laudent illum caeli et terra ;  
mare, et omnia reptilia in eis. ^ps-68-35

**36** Quoniam Deus salvam faciet Sion,  
et aedificabuntur civitates Juda,  
et inhabitabunt ibi, et haereditate acquirent eam. ^ps-68-36

**37** Et semen servorum ejus possidebit eam ;  
et qui diligunt nomen ejus habitabunt in ea. ^ps-68-37

## Capítulo 69

**1** In finem. Psalmus David in rememorationem, quod salvum fecerit eum Dominus. ^ps-69-1

**2** Deus, in adjutorium meum intende ;  
Domine, ad adjuvandum me festina. ^ps-69-2

**3** Confundantur, et revereantur, qui quaerunt animam meam. ^ps-69-3

**4** Avertantur retrorsum, et erubescant, qui volunt mihi mala ;  
avertantur statim erubescentes qui dicunt mihi : Euge, euge ! ^ps-69-4

**5** Exsultent et laetentur in te omnes qui quaerunt te ;  
et dicant semper : Magnificetur Dominus, qui diligunt salutare tuum. ^ps-69-5

**6** Ego vero egenus et pauper sum ;  
Deus, adjuva me.  
Adjutor meus et liberator meus es tu ;  
Domine, ne moreris. ^ps-69-6

## Capítulo 70

**1** Psalmus David, filiorum Jonadab, et priorum captivorum. In te, Domine, speravi ; non confundar in aeternum. ^ps-70-1

**2** In justitia tua libera me, et eripe me :  
inclina ad me aurem tuam, et salva me. ^ps-70-2

**3** Esto mihi in Deum protectorem,  
et in locum munitum, ut salvum me facias :  
quoniam firmamentum meum et refugium meum es tu. ^ps-70-3

**4** Deus meus, eripe me de manu peccatoris,  
et de manu contra legem agentis, et iniqui : ^ps-70-4

**5** quoniam tu es patientia mea, Domine ;  
Domine, spes mea a juventute mea. ^ps-70-5

**6** In te confirmatus sum ex utero ;  
de ventre matris meae tu es protector meus ;  
in te cantatio mea semper. ^ps-70-6

**7** Tamquam prodigium factus sum multis ;  
et tu adjutor fortis. ^ps-70-7

**8** Repleatur os meum laude,  
ut cantem gloriam tuam,  
tota die magnitudinem tuam. ^ps-70-8

**9** Ne projicias me in tempore senectutis ;  
cum defecerit virtus mea, ne derelinquas me. ^ps-70-9

**10** Quia dixerunt inimici mei mihi,  
et qui custodiebant animam meam consilium fecerunt in unum, ^ps-70-10

**11** dicentes : Deus dereliquit eum :  
persequimini et comprehendite eum,  
quia non est qui eripiat. ^ps-70-11

**12** Deus, ne elongeris a me ;  
Deus meus, in auxilium meum respice. ^ps-70-12

**13** Confundantur et deficiant detrahentes animae meae ;  
operiantur confusione et pudore qui quaerunt mala mihi. ^ps-70-13

**14** Ego autem semper sperabo,  
et adjiciam super omnem laudem tuam. ^ps-70-14

**15** Os meum annuntiabit justitiam tuam,  
tota die salutare tuum.  
Quoniam non cognovi litteraturam, ^ps-70-15

**16** introibo in potentias Domini ;  
Domine, memorabor justitiae tuae solius. ^ps-70-16

**17** Deus, docuisti me a juventute mea ;  
et usque nunc pronuntiabo mirabilia tua. ^ps-70-17

**18** Et usque in senectam et senium,  
Deus, ne derelinquas me,  
donec annuntiem brachium tuum generationi omni quae ventura est,  
potentiam tuam, ^ps-70-18

**19** et justitiam tuam, Deus, usque in altissima ;  
quae fecisti magnalia, Deus : quis similis tibi ? ^ps-70-19

**20** Quantas ostendisti mihi tribulationes multas et malas !  
et conversus vivificasti me,  
et de abyssis terrae iterum reduxisti me. ^ps-70-20

**21** Multiplicasti magnificentiam tuam ;  
et conversus consolatus es me. ^ps-70-21

**22** Nam et ego confitebor tibi in vasis psalmi veritatem tuam, Deus ;  
psallam tibi in cithara, sanctus Israël. ^ps-70-22

**23** Exsultabunt labia mea cum cantavero tibi ;  
et anima mea quam redemisti. ^ps-70-23

**24** Sed et lingua mea tota die meditabitur justitiam tuam,  
cum confusi et reveriti fuerint qui quaerunt mala mihi. ^ps-70-24

## Capítulo 71

**1** Psalmus, in Salomonem. ^ps-71-1

**2** Deus, judicium tuum regi da,  
et justitiam tuam filio regis ;  
judicare populum tuum in justitia,  
et pauperes tuos in judicio. ^ps-71-2

**3** Suscipiant montes pacem populo,  
et colles justitiam. ^ps-71-3

**4** Judicabit pauperes populi,  
et salvos faciet filios pauperum,  
et humiliabit calumniatorem. ^ps-71-4

**5** Et permanebit cum sole, et ante lunam,  
in generatione et generationem. ^ps-71-5

**6** Descendet sicut pluvia in vellus,  
et sicut stillicidia stillantia super terram. ^ps-71-6

**7** Orietur in diebus ejus justitia, et abundantia pacis,  
donec auferatur luna. ^ps-71-7

**8** Et dominabitur a mari usque ad mare,  
et a flumine usque ad terminos orbis terrarum. ^ps-71-8

**9** Coram illo procident Aethiopes,  
et inimici ejus terram lingent. ^ps-71-9

**10** Reges Tharsis et insulae munera offerent ;  
reges Arabum et Saba dona adducent : ^ps-71-10

**11** et adorabunt eum omnes reges terrae ;  
omnes gentes servient ei. ^ps-71-11

**12** Quia liberabit pauperem a potente,  
et pauperem cui non erat adjutor. ^ps-71-12

**13** Parcet pauperi et inopi,  
et animas pauperum salvas faciet. ^ps-71-13

**14** Ex usuris et iniquitate redimet animas eorum,  
et honorabile nomen eorum coram illo. ^ps-71-14

**15** Et vivet, et dabitur ei de auro Arabiae ;  
et adorabunt de ipso semper,  
tota die benedicent ei. ^ps-71-15

**16** Et erit firmamentum in terra in summis montium ;  
superextolletur super Libanum fructus ejus,  
et florebunt de civitate sicut foenum terrae. ^ps-71-16

**17** Sit nomen ejus benedictum in saecula ;  
ante solem permanet nomen ejus.  
Et benedicentur in ipso omnes tribus terrae ;  
omnes gentes magnificabunt eum. ^ps-71-17

**18** Benedictus Dominus Deus Israël,  
qui facit mirabilia solus. ^ps-71-18

**19** Et benedictum nomen majestatis ejus in aeternum,  
et replebitur majestate ejus omnis terra. Fiat, fiat. ^ps-71-19

**20** Defecerunt laudes David, filii Jesse. ^ps-71-20

## Capítulo 72

**1** Psalmus Asaph. Quam bonus Israël Deus,  
his qui recto sunt corde ! ^ps-72-1

**2** Mei autem pene moti sunt pedes,  
pene effusi sunt gressus mei : ^ps-72-2

**3** quia zelavi super iniquos,  
pacem peccatorum videns. ^ps-72-3

**4** Quia non est respectus morti eorum,  
et firmamentum in plaga eorum. ^ps-72-4

**5** In labore hominum non sunt,  
et cum hominibus non flagellabuntur. ^ps-72-5

**6** Ideo tenuit eos superbia ;  
operti sunt iniquitate et impietate sua. ^ps-72-6

**7** Prodiit quasi ex adipe iniquitas eorum ;  
transierunt in affectum cordis. ^ps-72-7

**8** Cogitaverunt et locuti sunt nequitiam ;  
iniquitatem in excelso locuti sunt. ^ps-72-8

**9** Posuerunt in caelum os suum,  
et lingua eorum transivit in terra. ^ps-72-9

**10** Ideo convertetur populus meus hic,  
et dies pleni invenientur in eis. ^ps-72-10

**11** Et dixerunt : Quomodo scit Deus,  
et si est scientia in excelso ? ^ps-72-11

**12** Ecce ipsi peccatores, et abundantes in saeculo  
obtinuerunt divitias. ^ps-72-12

**13** Et dixi : Ergo sine causa justificavi cor meum,  
et lavi inter innocentes manus meas, ^ps-72-13

**14** et fui flagellatus tota die,  
et castigatio mea in matutinis. ^ps-72-14

**15** Si dicebam : Narrabo sic ;  
ecce nationem filiorum tuorum reprobavi. ^ps-72-15

**16** Existimabam ut cognoscerem hoc ;  
labor est ante me : ^ps-72-16

**17** donec intrem in sanctuarium Dei,  
et intelligam in novissimis eorum. ^ps-72-17

**18** Verumtamen propter dolos posuisti eis ;  
dejecisti eos dum allevarentur. ^ps-72-18

**19** Quomodo facti sunt in desolationem ?  
subito defecerunt : perierunt propter iniquitatem suam. ^ps-72-19

**20** Velut somnium surgentium, Domine,  
in civitate tua imaginem ipsorum ad nihilum rediges. ^ps-72-20

**21** Quia inflammatum est cor meum,  
et renes mei commutati sunt ; ^ps-72-21

**22** et ego ad nihilum redactus sum, et nescivi : ^ps-72-22

**23** ut jumentum factus sum apud te,  
et ego semper tecum. ^ps-72-23

**24** Tenuisti manum dexteram meam,  
et in voluntate tua deduxisti me,  
et cum gloria suscepisti me. ^ps-72-24

**25** Quid enim mihi est in caelo ?  
et a te quid volui super terram ? ^ps-72-25

**26** Defecit caro mea et cor meum ;  
Deus cordis mei, et pars mea, Deus in aeternum. ^ps-72-26

**27** Quia ecce qui elongant se a te peribunt ;  
perdidisti omnes qui fornicantur abs te. ^ps-72-27

**28** Mihi autem adhaerere Deo bonum est ;  
ponere in Domino Deo spem meam :  
ut annuntiem omnes praedicationes tuas  
in portis filiae Sion. ^ps-72-28

## Capítulo 73

**1** Intellectus Asaph. Ut quid, Deus, repulisti in finem,  
iratus est furor tuus super oves pascuae tuae ? ^ps-73-1

**2** Memor esto congregationis tuae,  
quam possedisti ab initio.  
Redemisti virgam haereditatis tuae,  
mons Sion, in quo habitasti in eo. ^ps-73-2

**3** Leva manus tuas in superbias eorum in finem :  
quanta malignatus est inimicus in sancto ! ^ps-73-3

**4** Et gloriati sunt qui oderunt te in medio solemnitatis tuae ;  
posuerunt signa sua, signa : ^ps-73-4

**5** et non cognoverunt sicut in exitu super summum.  
Quasi in silva lignorum securibus ^ps-73-5

**6** exciderunt januas ejus in idipsum ;  
in securi et ascia dejecerunt eam. ^ps-73-6

**7** Incenderunt igni sanctuarium tuum ;  
in terra polluerunt tabernaculum nominis tui. ^ps-73-7

**8** Dixerunt in corde suo cognatio eorum simul :  
Quiescere faciamus omnes dies festos Dei a terra. ^ps-73-8

**9** Signa nostra non vidimus ;  
jam non est propheta ;  
et nos non cognoscet amplius. ^ps-73-9

**10** Usquequo, Deus, improperabit inimicus ?  
irritat adversarius nomen tuum in finem ? ^ps-73-10

**11** Ut quid avertis manum tuam,  
et dexteram tuam de medio sinu tuo in finem ? ^ps-73-11

**12** Deus autem rex noster ante saecula :  
operatus est salutem in medio terrae. ^ps-73-12

**13** Tu confirmasti in virtute tua mare ;  
contribulasti capita draconum in aquis. ^ps-73-13

**14** Tu confregisti capita draconis ;  
dedisti eum escam populis Aethiopum. ^ps-73-14

**15** Tu dirupisti fontes et torrentes ;  
tu siccasti fluvios Ethan. ^ps-73-15

**16** Tuus est dies, et tua est nox ;  
tu fabricatus es auroram et solem. ^ps-73-16

**17** Tu fecisti omnes terminos terrae ;  
aestatem et ver tu plasmasti ea. ^ps-73-17

**18** Memor esto hujus : inimicus improperavit Domino,  
et populus insipiens incitavit nomen tuum. ^ps-73-18

**19** Ne tradas bestiis animas confitentes tibi,  
et animas pauperum tuorum ne obliviscaris in finem. ^ps-73-19

**20** Respice in testamentum tuum,  
quia repleti sunt qui obscurati sunt terrae domibus iniquitatum. ^ps-73-20

**21** Ne avertatur humilis factus confusus ;  
pauper et inops laudabunt nomen tuum. ^ps-73-21

**22** Exsurge, Deus, judica causam tuam ;  
memor esto improperiorum tuorum,  
eorum quae ab insipiente sunt tota die. ^ps-73-22

**23** Ne obliviscaris voces inimicorum tuorum :  
superbia eorum qui te oderunt ascendit semper. ^ps-73-23

## Capítulo 74

**1** In finem, ne corrumpas. Psalmus cantici Asaph. ^ps-74-1

**2** Confitebimur tibi, Deus, confitebimur,  
et invocabimus nomen tuum ;  
narrabimus mirabilia tua. ^ps-74-2

**3** Cum accepero tempus,  
ego justitias judicabo. ^ps-74-3

**4** Liquefacta est terra et omnes qui habitant in ea :  
ego confirmavi columnas ejus. ^ps-74-4

**5** Dixi iniquis : Nolite inique agere :  
et delinquentibus : Nolite exaltare cornu : ^ps-74-5

**6** nolite extollere in altum cornu vestrum ;  
nolite loqui adversus Deum iniquitatem. ^ps-74-6

**7** Quia neque ab oriente, neque ab occidente,  
neque a desertis montibus : ^ps-74-7

**8** quoniam Deus judex est.  
Hunc humiliat, et hunc exaltat : ^ps-74-8

**9** quia calix in manu Domini vini meri, plenus misto.  
Et inclinavit ex hoc in hoc ;  
verumtamen faex ejus non est exinanita :  
bibent omnes peccatores terrae. ^ps-74-9

**10** Ego autem annuntiabo in saeculum ;  
cantabo Deo Jacob : ^ps-74-10

**11** et omnia cornua peccatorum confringam,  
et exaltabuntur cornua justi. ^ps-74-11

## Capítulo 75

**1** In finem, in laudibus. Psalmus Asaph, canticum ad Assyrios. ^ps-75-1

**2** Notus in Judaea Deus ;  
in Israël magnum nomen ejus. ^ps-75-2

**3** Et factus est in pace locus ejus,  
et habitatio ejus in Sion. ^ps-75-3

**4** Ibi confregit potentias arcuum,  
scutum, gladium, et bellum. ^ps-75-4

**5** Illuminans tu mirabiliter a montibus aeternis ; ^ps-75-5

**6** turbati sunt omnes insipientes corde.  
Dormierunt somnum suum,  
et nihil invenerunt omnes viri divitiarum in manibus suis. ^ps-75-6

**7** Ab increpatione tua, Deus Jacob,  
dormitaverunt qui ascenderunt equos. ^ps-75-7

**8** Tu terribilis es ; et quis resistet tibi ?  
ex tunc ira tua. ^ps-75-8

**9** De caelo auditum fecisti judicium :  
terra tremuit et quievit ^ps-75-9

**10** cum exsurgeret in judicium Deus,  
ut salvos faceret omnes mansuetos terrae. ^ps-75-10

**11** Quoniam cogitatio hominis confitebitur tibi,  
et reliquiae cogitationis diem festum agent tibi. ^ps-75-11

**12** Vovete et reddite Domino Deo vestro,  
omnes qui in circuitu ejus affertis munera :  
terribili, ^ps-75-12

**13** et ei qui aufert spiritum principum :  
terribili apud reges terrae. ^ps-75-13

## Capítulo 76

**1** In finem, pro Idithun. Psalmus Asaph. ^ps-76-1

**2** Voce mea ad Dominum clamavi ;  
voce mea ad Deum, et intendit mihi. ^ps-76-2

**3** In die tribulationis meae Deum exquisivi ;  
manibus meis nocte contra eum, et non sum deceptus.  
Renuit consolari anima mea ; ^ps-76-3

**4** memor fui Dei, et delectatus sum,  
et exercitatus sum, et defecit spiritus meus. ^ps-76-4

**5** Anticipaverunt vigilias oculi mei ;  
turbatus sum, et non sum locutus. ^ps-76-5

**6** Cogitavi dies antiquos,  
et annos aeternos in mente habui. ^ps-76-6

**7** Et meditatus sum nocte cum corde meo,  
et exercitabar, et scopebam spiritum meum. ^ps-76-7

**8** Numquid in aeternum projiciet Deus ?  
aut non apponet ut complacitior sit adhuc ? ^ps-76-8

**9** aut in finem misericordiam suam abscindet,  
a generatione in generationem ? ^ps-76-9

**10** aut obliviscetur misereri Deus ?  
aut continebit in ira sua misericordias suas ? ^ps-76-10

**11** Et dixi : Nunc coepi ;  
haec mutatio dexterae Excelsi. ^ps-76-11

**12** Memor fui operum Domini,  
quia memor ero ab initio mirabilium tuorum : ^ps-76-12

**13** et meditabor in omnibus operibus tuis,  
et in adinventionibus tuis exercebor. ^ps-76-13

**14** Deus, in sancto via tua :  
quis deus magnus sicut Deus noster ? ^ps-76-14

**15** Tu es Deus qui facis mirabilia :  
notam fecisti in populis virtutem tuam. ^ps-76-15

**16** Redemisti in brachio tuo populum tuum,  
filios Jacob et Joseph. ^ps-76-16

**17** Viderunt te aquae, Deus ;  
viderunt te aquae, et timuerunt :  
et turbatae sunt abyssi. ^ps-76-17

**18** Multitudo sonitus aquarum ;  
vocem dederunt nubes.  
Etenim sagittae tuae transeunt ; ^ps-76-18

**19** vox tonitrui tui in rota.  
Illuxerunt coruscationes tuae orbi terrae ;  
commota est, et contremuit terra. ^ps-76-19

**20** In mari via tua, et semitae tuae in aquis multis,  
et vestigia tua non cognoscentur. ^ps-76-20

**21** Deduxisti sicut oves populum tuum,  
in manu Moysi et Aaron. ^ps-76-21

## Capítulo 77

**1** Intellectus Asaph. Attendite, popule meus, legem meam ;  
inclinate aurem vestram in verba oris mei. ^ps-77-1

**2** Aperiam in parabolis os meum ;  
loquar propositiones ab initio. ^ps-77-2

**3** Quanta audivimus, et cognovimus ea,  
et patres nostri narraverunt nobis. ^ps-77-3

**4** Non sunt occultata a filiis eorum in generatione altera,  
narrantes laudes Domini et virtutes ejus,  
et mirabilia ejus quae fecit. ^ps-77-4

**5** Et suscitavit testimonium in Jacob,  
et legem posuit in Israël,  
quanta mandavit patribus nostris  
nota facere ea filiis suis : ^ps-77-5

**6** ut cognoscat generatio altera :  
filii qui nascentur et exsurgent,  
et narrabunt filiis suis, ^ps-77-6

**7** ut ponant in Deo spem suam,  
et non obliviscantur operum Dei,  
et mandata ejus exquirant : ^ps-77-7

**8** ne fiant, sicut patres eorum,  
generatio prava et exasperans ;  
generatio quae non direxit cor suum,  
et non est creditus cum Deo spiritus ejus. ^ps-77-8

**9** Filii Ephrem, intendentes et mittentes arcum,  
conversi sunt in die belli. ^ps-77-9

**10** Non custodierunt testamentum Dei,  
et in lege ejus noluerunt ambulare. ^ps-77-10

**11** Et obliti sunt benefactorum ejus,  
et mirabilium ejus quae ostendit eis. ^ps-77-11

**12** Coram patribus eorum fecit mirabilia  
in terra Aegypti, in campo Taneos. ^ps-77-12

**13** Interrupit mare, et perduxit eos,  
et statuit aquas quasi in utre : ^ps-77-13

**14** et deduxit eos in nube diei,  
et tota nocte in illuminatione ignis. ^ps-77-14

**15** Interrupit petram in eremo,  
et adaquavit eos velut in abysso multa. ^ps-77-15

**16** Et eduxit aquam de petra,  
et deduxit tamquam flumina aquas. ^ps-77-16

**17** Et apposuerunt adhuc peccare ei ;  
in iram excitaverunt Excelsum in inaquoso. ^ps-77-17

**18** Et tentaverunt Deum in cordibus suis,  
ut peterent escas animabus suis. ^ps-77-18

**19** Et male locuti sunt de Deo ;  
dixerunt : Numquid poterit Deus parare mensam in deserto ? ^ps-77-19

**20** quoniam percussit petram, et fluxerunt aquae,  
et torrentes inundaverunt.  
Numquid et panem poterit dare,  
aut parare mensam populo suo ? ^ps-77-20

**21** Ideo audivit Dominus et distulit ;  
et ignis accensus est in Jacob,  
et ira ascendit in Israël : ^ps-77-21

**22** quia non crediderunt in Deo,  
nec speraverunt in salutari ejus. ^ps-77-22

**23** Et mandavit nubibus desuper,  
et januas caeli aperuit. ^ps-77-23

**24** Et pluit illis manna ad manducandum,  
et panem caeli dedit eis. ^ps-77-24

**25** Panem angelorum manducavit homo ;  
cibaria misit eis in abundantia. ^ps-77-25

**26** Transtulit austrum de caelo,  
et induxit in virtute sua africum. ^ps-77-26

**27** Et pluit super eos sicut pulverem carnes,  
et sicut arenam maris volatilia pennata. ^ps-77-27

**28** Et ceciderunt in medio castrorum eorum,  
circa tabernacula eorum. ^ps-77-28

**29** Et manducaverunt, et saturati sunt nimis,  
et desiderium eorum attulit eis : ^ps-77-29

**30** non sunt fraudati a desiderio suo.  
Adhuc escae eorum erant in ore ipsorum, ^ps-77-30

**31** et ira Dei ascendit super eos :  
et occidit pingues eorum,  
et electos Israël impedivit. ^ps-77-31

**32** In omnibus his peccaverunt adhuc,  
et non crediderunt in mirabilibus ejus. ^ps-77-32

**33** Et defecerunt in vanitate dies eorum,  
et anni eorum cum festinatione. ^ps-77-33

**34** Cum occideret eos, quaerebant eum et revertebantur,  
et diluculo veniebant ad eum. ^ps-77-34

**35** Et rememorati sunt quia Deus adjutor est eorum,  
et Deus excelsus redemptor eorum est. ^ps-77-35

**36** Et dilexerunt eum in ore suo,  
et lingua sua mentiti sunt ei ; ^ps-77-36

**37** cor autem eorum non erat rectum cum eo,  
nec fideles habiti sunt in testamento ejus. ^ps-77-37

**38** Ipse autem est misericors,  
et propitius fiet peccatis eorum,  
et non disperdet eos.  
Et abundavit ut averteret iram suam,  
et non accendit omnem iram suam. ^ps-77-38

**39** Et recordatus est quia caro sunt,  
spiritus vadens et non rediens. ^ps-77-39

**40** Quoties exacerbaverunt eum in deserto ;  
in iram concitaverunt eum in inaquoso ? ^ps-77-40

**41** Et conversi sunt, et tentaverunt Deum,  
et sanctum Israël exacerbaverunt. ^ps-77-41

**42** Non sunt recordati manus ejus,  
die qua redemit eos de manu tribulantis : ^ps-77-42

**43** sicut posuit in Aegypto signa sua,  
et prodigia sua in campo Taneos ; ^ps-77-43

**44** et convertit in sanguinem flumina eorum,  
et imbres eorum, ne biberent. ^ps-77-44

**45** Misit in eos coenomyiam, et comedit eos,  
et ranam, et disperdidit eos ; ^ps-77-45

**46** et dedit aerugini fructus eorum,  
et labores eorum locustae ; ^ps-77-46

**47** et occidit in grandine vineas eorum,  
et moros eorum in pruina ; ^ps-77-47

**48** et tradidit grandini jumenta eorum,  
et possessionem eorum igni ; ^ps-77-48

**49** misit in eos iram indignationis suae,  
indignationem, et iram, et tribulationem,  
immissiones per angelos malos. ^ps-77-49

**50** Viam fecit semitae irae suae :  
non pepercit a morte animabus eorum,  
et jumenta eorum in morte conclusit : ^ps-77-50

**51** et percussit omne primogenitum in terra Aegypti ;  
primitias omnis laboris eorum in tabernaculis Cham : ^ps-77-51

**52** et abstulit sicut oves populum suum,  
et perduxit eos tamquam gregem in deserto : ^ps-77-52

**53** et deduxit eos in spe, et non timuerunt,  
et inimicos eorum operuit mare. ^ps-77-53

**54** Et induxit eos in montem sanctificationis suae,  
montem quem acquisivit dextera ejus ;  
et ejecit a facie eorum gentes,  
et sorte divisit eis terram in funiculo distributionis ; ^ps-77-54

**55** et habitare fecit in tabernaculis eorum tribus Israël. ^ps-77-55

**56** Et tentaverunt, et exacerbaverunt Deum excelsum,  
et testimonia ejus non custodierunt. ^ps-77-56

**57** Et averterunt se, et non servaverunt pactum :  
quemadmodum patres eorum, conversi sunt in arcum pravum. ^ps-77-57

**58** In iram concitaverunt eum in collibus suis,  
et in sculptilibus suis ad aemulationem eum provocaverunt. ^ps-77-58

**59** Audivit Deus, et sprevit,  
et ad nihilum redegit valde Israël. ^ps-77-59

**60** Et repulit tabernaculum Silo,  
tabernaculum suum, ubi habitavit in hominibus. ^ps-77-60

**61** Et tradidit in captivitatem virtutem eorum,  
et pulchritudinem eorum in manus inimici. ^ps-77-61

**62** Et conclusit in gladio populum suum,  
et haereditatem suam sprevit. ^ps-77-62

**63** Juvenes eorum comedit ignis,  
et virgines eorum non sunt lamentatae. ^ps-77-63

**64** Sacerdotes eorum in gladio ceciderunt,  
et viduae eorum non plorabantur. ^ps-77-64

**65** Et excitatus est tamquam dormiens Dominus,  
tamquam potens crapulatus a vino. ^ps-77-65

**66** Et percussit inimicos suos in posteriora ;  
opprobrium sempiternum dedit illis. ^ps-77-66

**67** Et repulit tabernaculum Joseph,  
et tribum Ephraim non elegit : ^ps-77-67

**68** sed elegit tribum Juda,  
montem Sion, quem dilexit. ^ps-77-68

**69** Et aedificavit sicut unicornium sanctificium suum,  
in terra quam fundavit in saecula. ^ps-77-69

**70** Et elegit David, servum suum,  
et sustulit eum de gregibus ovium ;  
de post foetantes accepit eum : ^ps-77-70

**71** pascere Jacob servum suum,  
et Israël haereditatem suam. ^ps-77-71

**72** Et pavit eos in innocentia cordis sui,  
et in intellectibus manuum suarum deduxit eos. ^ps-77-72

## Capítulo 78

**1** Psalmus Asaph. Deus, venerunt gentes in haereditatem tuam ;  
polluerunt templum sanctum tuum ;  
posuerunt Jerusalem in pomorum custodiam. ^ps-78-1

**2** Posuerunt morticina servorum tuorum escas volatilibus caeli ;  
carnes sanctorum tuorum bestiis terrae. ^ps-78-2

**3** Effuderunt sanguinem eorum tamquam aquam in circuitu Jerusalem,  
et non erat qui sepeliret. ^ps-78-3

**4** Facti sumus opprobrium vicinis nostris ;  
subsannatio et illusio his qui in circuitu nostro sunt. ^ps-78-4

**5** Usquequo, Domine, irasceris in finem ?  
accendetur velut ignis zelus tuus ? ^ps-78-5

**6** Effunde iram tuam in gentes quae te non noverunt,  
et in regna quae nomen tuum non invocaverunt : ^ps-78-6

**7** quia comederunt Jacob,  
et locum ejus desolaverunt. ^ps-78-7

**8** Ne memineris iniquitatum nostrarum antiquarum ;  
cito anticipent nos misericordiae tuae,  
quia pauperes facti sumus nimis. ^ps-78-8

**9** Adjuva nos, Deus salutaris noster,  
et propter gloriam nominis tui, Domine, libera nos :  
et propitius esto peccatis nostris, propter nomen tuum. ^ps-78-9

**10** Ne forte dicant in gentibus : Ubi est Deus eorum ?  
et innotescat in nationibus coram oculis nostris  
ultio sanguinis servorum tuorum qui effusus est. ^ps-78-10

**11** Introëat in conspectu tuo gemitus compeditorum ;  
secundum magnitudinem brachii tui posside filios mortificatorum : ^ps-78-11

**12** et redde vicinis nostris septuplum in sinu eorum ;  
improperium ipsorum quod exprobraverunt tibi, Domine. ^ps-78-12

**13** Nos autem populus tuus, et oves pascuae tuae,  
confitebimur tibi in saeculum ;  
in generationem et generationem annuntiabimus laudem tuam. ^ps-78-13

## Capítulo 79

**1** In finem, pro iis qui commutabuntur. Testimonium Asaph, psalmus. ^ps-79-1

**2** Qui regis Israël, intende ;  
qui deducis velut ovem Joseph.  
Qui sedes super cherubim, manifestare ^ps-79-2

**3** coram Ephraim, Benjamin, et Manasse.  
Excita potentiam tuam, et veni,  
ut salvos facias nos. ^ps-79-3

**4** Deus, converte nos, et ostende faciem tuam,  
et salvi erimus. ^ps-79-4

**5** Domine Deus virtutum,  
quousque irasceris super orationem servi tui ? ^ps-79-5

**6** cibabis nos pane lacrimarum,  
et potum dabis nobis in lacrimis in mensura ? ^ps-79-6

**7** Posuisti nos in contradictionem vicinis nostris,  
et inimici nostri subsannaverunt nos. ^ps-79-7

**8** Deus virtutum, converte nos, et ostende faciem tuam,  
et salvi erimus. ^ps-79-8

**9** Vineam de Aegypto transtulisti :  
ejecisti gentes, et plantasti eam. ^ps-79-9

**10** Dux itineris fuisti in conspectu ejus ;  
plantasti radices ejus, et implevit terram. ^ps-79-10

**11** Operuit montes umbra ejus,  
et arbusta ejus cedros Dei. ^ps-79-11

**12** Extendit palmites suos usque ad mare,  
et usque ad flumen propagines ejus. ^ps-79-12

**13** Ut quid destruxisti maceriam ejus,  
et vindemiant eam omnes qui praetergrediuntur viam ? ^ps-79-13

**14** Exterminavit eam aper de silva,  
et singularis ferus depastus est eam. ^ps-79-14

**15** Deus virtutum, convertere,  
respice de caelo, et vide,  
et visita vineam istam : ^ps-79-15

**16** et perfice eam quam plantavit dextera tua,  
et super filium hominis quem confirmasti tibi. ^ps-79-16

**17** Incensa igni et suffossa,  
ab increpatione vultus tui peribunt. ^ps-79-17

**18** Fiat manus tua super virum dexterae tuae,  
et super filium hominis quem confirmasti tibi. ^ps-79-18

**19** Et non discedimus a te :  
vivificabis nos, et nomen tuum invocabimus. ^ps-79-19

**20** Domine Deus virtutum, converte nos, et ostende faciem tuam,  
et salvi erimus. ^ps-79-20

## Capítulo 80

**1** In finem, pro torcularibus. Psalmus ipsi Asaph. ^ps-80-1

**2** Exsultate Deo adjutori nostro ;  
jubilate Deo Jacob. ^ps-80-2

**3** Sumite psalmum, et date tympanum ;  
psalterium jucundum cum cithara. ^ps-80-3

**4** Buccinate in neomenia tuba,  
in insigni die solemnitatis vestrae : ^ps-80-4

**5** quia praeceptum in Israël est,  
et judicium Deo Jacob. ^ps-80-5

**6** Testimonium in Joseph posuit illud,  
cum exiret de terra Aegypti ;  
linguam quam non noverat, audivit. ^ps-80-6

**7** Divertit ab oneribus dorsum ejus ;  
manus ejus in cophino servierunt. ^ps-80-7

**8** In tribulatione invocasti me, et liberavi te.  
Exaudivi te in abscondito tempestatis ;  
probavi te apud aquam contradictionis. ^ps-80-8

**9** Audi, populus meus, et contestabor te.  
Israël, si audieris me, ^ps-80-9

**10** non erit in te deus recens,  
neque adorabis deum alienum. ^ps-80-10

**11** Ego enim sum Dominus Deus tuus,  
qui eduxi te de terra Aegypti.  
Dilata os tuum, et implebo illud. ^ps-80-11

**12** Et non audivit populus meus vocem meam,  
et Israël non intendit mihi. ^ps-80-12

**13** Et dimisi eos secundum desideria cordis eorum ;  
ibunt in adinventionibus suis. ^ps-80-13

**14** Si populus meus audisset me,  
Israël si in viis meis ambulasset, ^ps-80-14

**15** pro nihilo forsitan inimicos eorum humiliassem,  
et super tribulantes eos misissem manum meam. ^ps-80-15

**16** Inimici Domini mentiti sunt ei,  
et erit tempus eorum in saecula. ^ps-80-16

**17** Et cibavit eos ex adipe frumenti,  
et de petra melle saturavit eos. ^ps-80-17

## Capítulo 81

**1** Psalmus Asaph. Deus stetit in synagoga deorum ;  
in medio autem deos dijudicat. ^ps-81-1

**2** Usquequo judicatis iniquitatem,  
et facies peccatorum sumitis ? ^ps-81-2

**3** Judicate egeno et pupillo ;  
humilem et pauperem justificate. ^ps-81-3

**4** Eripite pauperem,  
et egenum de manu peccatoris liberate. ^ps-81-4

**5** Nescierunt, neque intellexerunt ;  
in tenebris ambulant :  
movebuntur omnia fundamenta terrae. ^ps-81-5

**6** Ego dixi : Dii estis,  
et filii Excelsi omnes. ^ps-81-6

**7** Vos autem sicut homines moriemini,  
et sicut unus de principibus cadetis. ^ps-81-7

**8** Surge, Deus, judica terram,  
quoniam tu haereditabis in omnibus gentibus. ^ps-81-8

## Capítulo 82

**1** Canticum Psalmi Asaph. ^ps-82-1

**2** Deus, quis similis erit tibi ?  
ne taceas, neque compescaris, Deus : ^ps-82-2

**3** quoniam ecce inimici tui sonuerunt,  
et qui oderunt te extulerunt caput. ^ps-82-3

**4** Super populum tuum malignaverunt consilium,  
et cogitaverunt adversus sanctos tuos. ^ps-82-4

**5** Dixerunt : Venite, et disperdamus eos de gente,  
et non memoretur nomen Israël ultra. ^ps-82-5

**6** Quoniam cogitaverunt unanimiter ;  
simul adversum te testamentum disposuerunt : ^ps-82-6

**7** tabernacula Idumaeorum et Ismahelitae,  
Moab et Agareni, ^ps-82-7

**8** Gebal, et Ammon, et Amalec ;  
alienigenae cum habitantibus Tyrum. ^ps-82-8

**9** Etenim Assur venit cum illis :  
facti sunt in adjutorium filiis Lot. ^ps-82-9

**10** Fac illis sicut Madian et Sisarae,  
sicut Jabin in torrente Cisson. ^ps-82-10

**11** Disperierunt in Endor ;  
facti sunt ut stercus terrae. ^ps-82-11

**12** Pone principes eorum sicut Oreb,  
et Zeb, et Zebee, et Salmana :  
omnes principes eorum, ^ps-82-12

**13** qui dixerunt : Haereditate possideamus sanctuarium Dei. ^ps-82-13

**14** Deus meus, pone illos ut rotam,  
et sicut stipulam ante faciem venti. ^ps-82-14

**15** Sicut ignis qui comburit silvam,  
et sicut flamma comburens montes, ^ps-82-15

**16** ita persequeris illos in tempestate tua,  
et in ira tua turbabis eos. ^ps-82-16

**17** Imple facies eorum ignominia,  
et quaerent nomen tuum, Domine. ^ps-82-17

**18** Erubescant, et conturbentur in saeculum saeculi,  
et confundantur, et pereant. ^ps-82-18

**19** Et cognoscant quia nomen tibi Dominus :  
tu solus Altissimus in omni terra. ^ps-82-19

## Capítulo 83

**1** In finem, pro torcularibus filiis Core. Psalmus. ^ps-83-1

**2** Quam dilecta tabernacula tua, Domine virtutum ! ^ps-83-2

**3** Concupiscit, et deficit anima mea in atria Domini ;  
cor meum et caro mea exsultaverunt in Deum vivum. ^ps-83-3

**4** Etenim passer invenit sibi domum,  
et turtur nidum sibi, ubi ponat pullos suos :  
altaria tua, Domine virtutum,  
rex meus, et Deus meus. ^ps-83-4

**5** Beati qui habitant in domo tua, Domine ;  
in saecula saeculorum laudabunt te. ^ps-83-5

**6** Beatus vir cujus est auxilium abs te :  
ascensiones in corde suo disposuit, ^ps-83-6

**7** in valle lacrimarum, in loco quem posuit. ^ps-83-7

**8** Etenim benedictionem dabit legislator ;  
ibunt de virtute in virtutem :  
videbitur Deus deorum in Sion. ^ps-83-8

**9** Domine Deus virtutum, exaudi orationem meam ;  
auribus percipe, Deus Jacob. ^ps-83-9

**10** Protector noster, aspice, Deus,  
et respice in faciem christi tui. ^ps-83-10

**11** Quia melior est dies una in atriis tuis super millia ;  
elegi abjectus esse in domo Dei mei  
magis quam habitare in tabernaculis peccatorum. ^ps-83-11

**12** Quia misericordiam et veritatem diligit Deus :  
gratiam et gloriam dabit Dominus. ^ps-83-12

**13** Non privabit bonis eos qui ambulant in innocentia :  
Domine virtutum, beatus homo qui sperat in te. ^ps-83-13

## Capítulo 84

**1** In finem, filiis Core. Psalmus. ^ps-84-1

**2** Benedixisti, Domine, terram tuam ;  
avertisti captivitatem Jacob. ^ps-84-2

**3** Remisisti iniquitatem plebis tuae ;  
operuisti omnia peccata eorum. ^ps-84-3

**4** Mitigasti omnem iram tuam ;  
avertisti ab ira indignationis tuae. ^ps-84-4

**5** Converte nos, Deus salutaris noster,  
et averte iram tuam a nobis. ^ps-84-5

**6** Numquid in aeternum irasceris nobis ?  
aut extendes iram tuam a generatione in generationem ? ^ps-84-6

**7** Deus, tu conversus vivificabis nos,  
et plebs tua laetabitur in te. ^ps-84-7

**8** Ostende nobis, Domine, misericordiam tuam,  
et salutare tuum da nobis. ^ps-84-8

**9** Audiam quid loquatur in me Dominus Deus,  
quoniam loquetur pacem in plebem suam,  
et super sanctos suos,  
et in eos qui convertuntur ad cor. ^ps-84-9

**10** Verumtamen prope timentes eum salutare ipsius,  
ut inhabitet gloria in terra nostra. ^ps-84-10

**11** Misericordia et veritas obviaverunt sibi ;  
justitia et pax osculatae sunt. ^ps-84-11

**12** Veritas de terra orta est,  
et justitia de caelo prospexit. ^ps-84-12

**13** Etenim Dominus dabit benignitatem,  
et terra nostra dabit fructum suum. ^ps-84-13

**14** Justitia ante eum ambulabit,  
et ponet in via gressus suos. ^ps-84-14

## Capítulo 85

**1** Oratio ipsi David. Inclina, Domine, aurem tuam et exaudi me,  
quoniam inops et pauper sum ego. ^ps-85-1

**2** Custodi animam meam, quoniam sanctus sum ;  
salvum fac servum tuum, Deus meus, sperantem in te. ^ps-85-2

**3** Miserere mei, Domine,  
quoniam ad te clamavi tota die ; ^ps-85-3

**4** laetifica animam servi tui,  
quoniam ad te, Domine, animam meam levavi. ^ps-85-4

**5** Quoniam tu, Domine, suavis et mitis,  
et multae misericordiae omnibus invocantibus te. ^ps-85-5

**6** Auribus percipe, Domine, orationem meam,  
et intende voci deprecationis meae. ^ps-85-6

**7** In die tribulationis meae clamavi ad te,  
quia exaudisti me. ^ps-85-7

**8** Non est similis tui in diis, Domine,  
et non est secundum opera tua. ^ps-85-8

**9** Omnes gentes quascumque fecisti venient,  
et adorabunt coram te, Domine,  
et glorificabunt nomen tuum. ^ps-85-9

**10** Quoniam magnus es tu, et faciens mirabilia ;  
tu es Deus solus. ^ps-85-10

**11** Deduc me, Domine, in via tua, et ingrediar in veritate tua ;  
laetetur cor meum, ut timeat nomen tuum. ^ps-85-11

**12** Confitebor tibi, Domine Deus meus, in toto corde meo,  
et glorificabo nomen tuum in aeternum : ^ps-85-12

**13** quia misericordia tua magna est super me,  
et eruisti animam meam ex inferno inferiori. ^ps-85-13

**14** Deus, iniqui insurrexerunt super me,  
et synagoga potentium quaesierunt animam meam :  
et non proposuerunt te in conspectu suo. ^ps-85-14

**15** Et tu, Domine Deus, miserator et misericors ;  
patiens, et multae misericordiae, et verax. ^ps-85-15

**16** Respice in me, et miserere mei ;  
da imperium tuum puero tuo,  
et salvum fac filium ancillae tuae. ^ps-85-16

**17** Fac mecum signum in bonum,  
ut videant qui oderunt me, et confundantur :  
quoniam tu, Domine, adjuvisti me, et consolatus es me. ^ps-85-17

## Capítulo 86

**1** Filiis Core. Psalmus cantici. Fundamenta ejus in montibus sanctis ; ^ps-86-1

**2** diligit Dominus portas Sion super omnia tabernacula Jacob. ^ps-86-2

**3** Gloriosa dicta sunt de te, civitas Dei ! ^ps-86-3

**4** Memor ero Rahab et Babylonis, scientium me ;  
ecce alienigenae, et Tyrus, et populus Aethiopum,  
hi fuerunt illic. ^ps-86-4

**5** Numquid Sion dicet : Homo et homo natus est in ea,  
et ipse fundavit eam Altissimus ? ^ps-86-5

**6** Dominus narrabit in scripturis populorum et principum,  
horum qui fuerunt in ea. ^ps-86-6

**7** Sicut laetantium omnium  
habitatio est in te. ^ps-86-7

## Capítulo 87

**1** Canticum Psalmi, filiis Core, in finem, pro Maheleth ad respondendum. Intellectus Eman Ezrahitae. ^ps-87-1

**2** Domine, Deus salutis meae,  
in die clamavi et nocte coram te. ^ps-87-2

**3** Intret in conspectu tuo oratio mea,  
inclina aurem tuam ad precem meam. ^ps-87-3

**4** Quia repleta est malis anima mea,  
et vita mea inferno appropinquavit. ^ps-87-4

**5** Aestimatus sum cum descendentibus in lacum,  
factus sum sicut homo sine adjutorio, ^ps-87-5

**6** inter mortuos liber ;  
sicut vulnerati dormientes in sepulchris,  
quorum non es memor amplius,  
et ipsi de manu tua repulsi sunt. ^ps-87-6

**7** Posuerunt me in lacu inferiori,  
in tenebrosis, et in umbra mortis. ^ps-87-7

**8** Super me confirmatus est furor tuus,  
et omnes fluctus tuos induxisti super me. ^ps-87-8

**9** Longe fecisti notos meos a me ;  
posuerunt me abominationem sibi.  
Traditus sum, et non egrediebar ; ^ps-87-9

**10** oculi mei languerunt prae inopia.  
Clamavi ad te, Domine, tota die ;  
expandi ad te manus meas. ^ps-87-10

**11** Numquid mortuis facies mirabilia ?  
aut medici suscitabunt, et confitebuntur tibi ? ^ps-87-11

**12** Numquid narrabit aliquis in sepulchro misericordiam tuam,  
et veritatem tuam in perditione ? ^ps-87-12

**13** Numquid cognoscentur in tenebris mirabilia tua ?  
et justitia tua in terra oblivionis ? ^ps-87-13

**14** Et ego ad te, Domine, clamavi,  
et mane oratio mea praeveniet te. ^ps-87-14

**15** Ut quid, Domine, repellis orationem meam ;  
avertis faciem tuam a me ? ^ps-87-15

**16** Pauper sum ego, et in laboribus a juventute mea ;  
exaltatus autem, humiliatus sum et conturbatus. ^ps-87-16

**17** In me transierunt irae tuae,  
et terrores tui conturbaverunt me : ^ps-87-17

**18** circumdederunt me sicut aqua tota die ;  
circumdederunt me simul. ^ps-87-18

**19** Elongasti a me amicum et proximum,  
et notos meos a miseria. ^ps-87-19

## Capítulo 88

**1** Intellectus Ethan Ezrahitae. ^ps-88-1

**2** Misericordias Domini in aeternum cantabo ;  
in generationem et generationem annuntiabo veritatem tuam in ore meo. ^ps-88-2

**3** Quoniam dixisti : In aeternum misericordia aedificabitur in caelis ;  
praeparabitur veritas tua in eis. ^ps-88-3

**4** Disposui testamentum electis meis ;  
juravi David servo meo : ^ps-88-4

**5** Usque in aeternum praeparabo semen tuum,  
et aedificabo in generationem et generationem sedem tuam. ^ps-88-5

**6** Confitebuntur caeli mirabilia tua, Domine ;  
etenim veritatem tuam in ecclesia sanctorum. ^ps-88-6

**7** Quoniam quis in nubibus aequabitur Domino ;  
similis erit Deo in filiis Dei ? ^ps-88-7

**8** Deus, qui glorificatur in consilio sanctorum,  
magnus et terribilis super omnes qui in circuitu ejus sunt. ^ps-88-8

**9** Domine Deus virtutum, quis similis tibi ?  
potens es, Domine, et veritas tua in circuitu tuo. ^ps-88-9

**10** Tu dominaris potestati maris ;  
motum autem fluctuum ejus tu mitigas. ^ps-88-10

**11** Tu humiliasti, sicut vulneratum, superbum ;  
in brachio virtutis tuae dispersisti inimicos tuos. ^ps-88-11

**12** Tui sunt caeli, et tua est terra :  
orbem terrae, et plenitudinem ejus tu fundasti ; ^ps-88-12

**13** aquilonem et mare tu creasti.  
Thabor et Hermon in nomine tuo exsultabunt : ^ps-88-13

**14** tuum brachium cum potentia.  
Firmetur manus tua, et exaltetur dextera tua : ^ps-88-14

**15** justitia et judicium praeparatio sedis tuae :  
misericordia et veritas praecedent faciem tuam. ^ps-88-15

**16** Beatus populus qui scit jubilationem :  
Domine, in lumine vultus tui ambulabunt, ^ps-88-16

**17** et in nomine tuo exsultabunt tota die,  
et in justitia tua exaltabuntur. ^ps-88-17

**18** Quoniam gloria virtutis eorum tu es,  
et in beneplacito tuo exaltabitur cornu nostrum. ^ps-88-18

**19** Quia Domini est assumptio nostra,  
et sancti Israël regis nostri. ^ps-88-19

**20** Tunc locutus es in visione sanctis tuis,  
et dixisti : Posui adjutorium in potente,  
et exaltavi electum de plebe mea. ^ps-88-20

**21** Inveni David, servum meum ;  
oleo sancto meo unxi eum. ^ps-88-21

**22** Manus enim mea auxiliabitur ei,  
et brachium meum confortabit eum. ^ps-88-22

**23** Nihil proficiet inimicus in eo,  
et filius iniquitatis non apponet nocere ei. ^ps-88-23

**24** Et concidam a facie ipsius inimicos ejus,  
et odientes eum in fugam convertam. ^ps-88-24

**25** Et veritas mea et misericordia mea cum ipso,  
et in nomine meo exaltabitur cornu ejus. ^ps-88-25

**26** Et ponam in mari manum ejus,  
et in fluminibus dexteram ejus. ^ps-88-26

**27** Ipse invocabit me : Pater meus es tu,  
Deus meus, et susceptor salutis meae. ^ps-88-27

**28** Et ego primogenitum ponam illum,  
excelsum prae regibus terrae. ^ps-88-28

**29** In aeternum servabo illi misericordiam meam,  
et testamentum meum fidele ipsi. ^ps-88-29

**30** Et ponam in saeculum saeculi semen ejus,  
et thronum ejus sicut dies caeli. ^ps-88-30

**31** Si autem dereliquerint filii ejus legem meam,  
et in judiciis meis non ambulaverint ; ^ps-88-31

**32** si justitias meas profanaverint,  
et mandata mea non custodierint : ^ps-88-32

**33** visitabo in virga iniquitates eorum,  
et in verberibus peccata eorum ; ^ps-88-33

**34** misericordiam autem meam non dispergam ab eo,  
neque nocebo in veritate mea, ^ps-88-34

**35** neque profanabo testamentum meum :  
et quae procedunt de labiis meis non faciam irrita. ^ps-88-35

**36** Semel juravi in sancto meo, si David mentiar : ^ps-88-36

**37** semen ejus in aeternum manebit. ^ps-88-37

**38** Et thronus ejus sicut sol in conspectu meo,  
et sicut luna perfecta in aeternum,  
et testis in caelo fidelis. ^ps-88-38

**39** Tu vero repulisti et despexisti ;  
distulisti christum tuum. ^ps-88-39

**40** Evertisti testamentum servi tui ;  
profanasti in terra sanctuarium ejus. ^ps-88-40

**41** Destruxisti omnes sepes ejus ;  
posuisti firmamentum ejus formidinem. ^ps-88-41

**42** Diripuerunt eum omnes transeuntes viam ;  
factus est opprobrium vicinis suis. ^ps-88-42

**43** Exaltasti dexteram deprimentium eum ;  
laetificasti omnes inimicos ejus. ^ps-88-43

**44** Avertisti adjutorium gladii ejus,  
et non es auxiliatus ei in bello. ^ps-88-44

**45** Destruxisti eum ab emundatione,  
et sedem ejus in terram collisisti. ^ps-88-45

**46** Minorasti dies temporis ejus ;  
perfudisti eum confusione. ^ps-88-46

**47** Usquequo, Domine, avertis in finem ?  
exardescet sicut ignis ira tua ? ^ps-88-47

**48** Memorare quae mea substantia :  
numquid enim vane constituisti omnes filios hominum ? ^ps-88-48

**49** Quis est homo qui vivet et non videbit mortem ?  
eruet animam suam de manu inferi ? ^ps-88-49

**50** Ubi sunt misericordiae tuae antiquae, Domine,  
sicut jurasti David in veritate tua ? ^ps-88-50

**51** Memor esto, Domine, opprobrii servorum tuorum,  
quod continui in sinu meo, multarum gentium : ^ps-88-51

**52** quod exprobraverunt inimici tui, Domine ;  
quod exprobraverunt commutationem christi tui. ^ps-88-52

**53** Benedictus Dominus in aeternum. Fiat, fiat. ^ps-88-53

## Capítulo 89

**1** Oratio Moysi, hominis Dei. Domine, refugium factus es nobis  
a generatione in generationem. ^ps-89-1

**2** Priusquam montes fierent,  
aut formaretur terra et orbis,  
a saeculo et usque in saeculum tu es, Deus. ^ps-89-2

**3** Ne avertas hominem in humilitatem :  
et dixisti : Convertimini, filii hominum. ^ps-89-3

**4** Quoniam mille anni ante oculos tuos  
tamquam dies hesterna quae praeteriit :  
et custodia in nocte ^ps-89-4

**5** quae pro nihilo habentur,  
eorum anni erunt. ^ps-89-5

**6** Mane sicut herba transeat ;  
mane floreat, et transeat ;  
vespere decidat, induret, et arescat. ^ps-89-6

**7** Quia defecimus in ira tua,  
et in furore tuo turbati sumus. ^ps-89-7

**8** Posuisti iniquitates nostras in conspectu tuo ;  
saeculum nostrum in illuminatione vultus tui. ^ps-89-8

**9** Quoniam omnes dies nostri defecerunt,  
et in ira tua defecimus.  
Anni nostri sicut aranea meditabuntur ; ^ps-89-9

**10** dies annorum nostrorum in ipsis septuaginta anni.  
Si autem in potentatibus octoginta anni,  
et amplius eorum labor et dolor ;  
quoniam supervenit mansuetudo, et corripiemur. ^ps-89-10

**11** Quis novit potestatem irae tuae,  
et prae timore tuo iram tuam ^ps-89-11

**12** dinumerare ?  
Dexteram tuam sic notam fac,  
et eruditos corde in sapientia. ^ps-89-12

**13** Convertere, Domine ; usquequo ?  
et deprecabilis esto super servos tuos. ^ps-89-13

**14** Repleti sumus mane misericordia tua ;  
et exsultavimus, et delectati sumus omnibus diebus nostris. ^ps-89-14

**15** Laetati sumus pro diebus quibus nos humiliasti ;  
annis quibus vidimus mala. ^ps-89-15

**16** Respice in servos tuos et in opera tua,  
et dirige filios eorum. ^ps-89-16

**17** Et sit splendor Domini Dei nostri super nos,  
et opera manuum nostrarum dirige super nos,  
et opus manuum nostrarum dirige. ^ps-89-17

## Capítulo 90

**1** Laus cantici David. Qui habitat in adjutorio Altissimi,  
in protectione Dei caeli commorabitur. ^ps-90-1

**2** Dicet Domino : Susceptor meus es tu, et refugium meum ;  
Deus meus, sperabo in eum. ^ps-90-2

**3** Quoniam ipse liberavit me de laqueo venantium,  
et a verbo aspero. ^ps-90-3

**4** Scapulis suis obumbrabit tibi,  
et sub pennis ejus sperabis. ^ps-90-4

**5** Scuto circumdabit te veritas ejus :  
non timebis a timore nocturno ; ^ps-90-5

**6** a sagitta volante in die,  
a negotio perambulante in tenebris,  
ab incursu, et daemonio meridiano. ^ps-90-6

**7** Cadent a latere tuo mille, et decem millia a dextris tuis ;  
ad te autem non appropinquabit. ^ps-90-7

**8** Verumtamen oculis tuis considerabis,  
et retributionem peccatorum videbis. ^ps-90-8

**9** Quoniam tu es, Domine, spes mea ;  
Altissimum posuisti refugium tuum. ^ps-90-9

**10** Non accedet ad te malum,  
et flagellum non appropinquabit tabernaculo tuo. ^ps-90-10

**11** Quoniam angelis suis mandavit de te,  
ut custodiant te in omnibus viis tuis. ^ps-90-11

**12** In manibus portabunt te,  
ne forte offendas ad lapidem pedem tuum. ^ps-90-12

**13** Super aspidem et basiliscum ambulabis,  
et conculcabis leonem et draconem. ^ps-90-13

**14** Quoniam in me speravit, liberabo eum ;  
protegam eum, quoniam cognovit nomen meum. ^ps-90-14

**15** Clamabit ad me, et ego exaudiam eum ;  
cum ipso sum in tribulatione :  
eripiam eum, et glorificabo eum. ^ps-90-15

**16** Longitudine dierum replebo eum,  
et ostendam illi salutare meum. ^ps-90-16

## Capítulo 91

**1** Psalmus cantici, in die sabbati. ^ps-91-1

**2** Bonum est confiteri Domino,  
et psallere nomini tuo, Altissime : ^ps-91-2

**3** ad annuntiandum mane misericordiam tuam,  
et veritatem tuam per noctem, ^ps-91-3

**4** in decachordo, psalterio ;  
cum cantico, in cithara. ^ps-91-4

**5** Quia delectasti me, Domine, in factura tua ;  
et in operibus manuum tuarum exsultabo. ^ps-91-5

**6** Quam magnificata sunt opera tua, Domine !  
nimis profundae factae sunt cogitationes tuae. ^ps-91-6

**7** Vir insipiens non cognoscet,  
et stultus non intelliget haec. ^ps-91-7

**8** Cum exorti fuerint peccatores sicut foenum,  
et apparuerint omnes qui operantur iniquitatem,  
ut intereant in saeculum saeculi : ^ps-91-8

**9** tu autem Altissimus in aeternum, Domine. ^ps-91-9

**10** Quoniam ecce inimici tui, Domine,  
quoniam ecce inimici tui peribunt ;  
et dispergentur omnes qui operantur iniquitatem. ^ps-91-10

**11** Et exaltabitur sicut unicornis cornu meum,  
et senectus mea in misericordia uberi. ^ps-91-11

**12** Et despexit oculus meus inimicos meos,  
et in insurgentibus in me malignantibus audiet auris mea. ^ps-91-12

**13** Justus ut palma florebit ;  
sicut cedrus Libani multiplicabitur. ^ps-91-13

**14** Plantati in domo Domini,  
in atriis domus Dei nostri florebunt. ^ps-91-14

**15** Adhuc multiplicabuntur in senecta uberi,  
et bene patientes erunt : ^ps-91-15

**16** ut annuntient quoniam rectus Dominus Deus noster,  
et non est iniquitas in eo. ^ps-91-16

## Capítulo 92

**1** Laus cantici ipsi David, in die ante sabbatum, quando fundata est terra. Dominus regnavit, decorem indutus est :  
indutus est Dominus fortitudinem, et praecinxit se.  
Etenim firmavit orbem terrae, qui non commovebitur. ^ps-92-1

**2** Parata sedes tua ex tunc ;  
a saeculo tu es. ^ps-92-2

**3** Elevaverunt flumina, Domine,  
elevaverunt flumina vocem suam ;  
elevaverunt flumina fluctus suos, ^ps-92-3

**4** a vocibus aquarum multarum.  
Mirabiles elationes maris ;  
mirabilis in altis Dominus. ^ps-92-4

**5** Testimonia tua credibilia facta sunt nimis ;  
domum tuam decet sanctitudo, Domine,  
in longitudinem dierum. ^ps-92-5

## Capítulo 93

**1** Psalmus ipsi David, quarta sabbati. Deus ultionum Dominus ;  
Deus ultionum libere egit. ^ps-93-1

**2** Exaltare, qui judicas terram ;  
redde retributionem superbis. ^ps-93-2

**3** Usquequo peccatores, Domine,  
usquequo peccatores gloriabuntur ; ^ps-93-3

**4** effabuntur et loquentur iniquitatem ;  
loquentur omnes qui operantur injustitiam ? ^ps-93-4

**5** Populum tuum, Domine, humiliaverunt,  
et haereditatem tuam vexaverunt. ^ps-93-5

**6** Viduam et advenam interfecerunt,  
et pupillos occiderunt. ^ps-93-6

**7** Et dixerunt : Non videbit Dominus,  
nec intelliget Deus Jacob. ^ps-93-7

**8** Intelligite, insipientes in populo ;  
et stulti, aliquando sapite. ^ps-93-8

**9** Qui plantavit aurem non audiet ?  
aut qui finxit oculum non considerat ? ^ps-93-9

**10** Qui corripit gentes non arguet,  
qui docet hominem scientiam ? ^ps-93-10

**11** Dominus scit cogitationes hominum,  
quoniam vanae sunt. ^ps-93-11

**12** Beatus homo quem tu erudieris, Domine,  
et de lege tua docueris eum : ^ps-93-12

**13** ut mitiges ei a diebus malis,  
donec fodiatur peccatori fovea. ^ps-93-13

**14** Quia non repellet Dominus plebem suam,  
et haereditatem suam non derelinquet, ^ps-93-14

**15** quoadusque justitia convertatur in judicium :  
et qui juxta illam, omnes qui recto sunt corde. ^ps-93-15

**16** Quis consurget mihi adversus malignantes ?  
aut quis stabit mecum adversus operantes iniquitatem ? ^ps-93-16

**17** Nisi quia Dominus adjuvit me,  
paulominus habitasset in inferno anima mea. ^ps-93-17

**18** Si dicebam : Motus est pes meus :  
misericordia tua, Domine, adjuvabat me. ^ps-93-18

**19** Secundum multitudinem dolorum meorum in corde meo,  
consolationes tuae laetificaverunt animam meam. ^ps-93-19

**20** Numquid adhaeret tibi sedes iniquitatis,  
qui fingis laborem in praecepto ? ^ps-93-20

**21** Captabunt in animam justi,  
et sanguinem innocentem condemnabunt. ^ps-93-21

**22** Et factus est mihi Dominus in refugium,  
et Deus meus in adjutorium spei meae. ^ps-93-22

**23** Et reddet illis iniquitatem ipsorum,  
et in malitia eorum disperdet eos :  
disperdet illos Dominus Deus noster. ^ps-93-23

## Capítulo 94

**1** Laus cantici ipsi David. Venite, exsultemus Domino ;  
jubilemus Deo salutari nostro ; ^ps-94-1

**2** praeoccupemus faciem ejus in confessione,  
et in psalmis jubilemus ei : ^ps-94-2

**3** quoniam Deus magnus Dominus,  
et rex magnus super omnes deos. ^ps-94-3

**4** Quia in manu ejus sunt omnes fines terrae,  
et altitudines montium ipsius sunt ; ^ps-94-4

**5** quoniam ipsius est mare, et ipse fecit illud,  
et siccam manus ejus formaverunt. ^ps-94-5

**6** Venite, adoremus, et procidamus,  
et ploremus ante Dominum qui fecit nos : ^ps-94-6

**7** quia ipse est Dominus Deus noster,  
et nos populus pascuae ejus, et oves manus ejus. ^ps-94-7

**8** Hodie si vocem ejus audieritis,  
nolite obdurare corda vestra ^ps-94-8

**9** sicut in irritatione,  
secundum diem tentationis in deserto,  
ubi tentaverunt me patres vestri :  
probaverunt me, et viderunt opera mea. ^ps-94-9

**10** Quadraginta annis offensus fui generationi illi,  
et dixi : Semper hi errant corde. ^ps-94-10

**11** Et isti non cognoverunt vias meas :  
ut juravi in ira mea :  
Si introibunt in requiem meam. ^ps-94-11

## Capítulo 95

**1** Canticum ipsi David, quando domus aedificabatur post captivitatem. Cantate Domino canticum novum ;  
cantate Domino omnis terra. ^ps-95-1

**2** Cantate Domino, et benedicite nomini ejus ;  
annuntiate de die in diem salutare ejus. ^ps-95-2

**3** Annuntiate inter gentes gloriam ejus ;  
in omnibus populis mirabilia ejus. ^ps-95-3

**4** Quoniam magnus Dominus, et laudabilis nimis :  
terribilis est super omnes deos. ^ps-95-4

**5** Quoniam omnes dii gentium daemonia ;  
Dominus autem caelos fecit. ^ps-95-5

**6** Confessio et pulchritudo in conspectu ejus ;  
sanctimonia et magnificentia in sanctificatione ejus. ^ps-95-6

**7** Afferte Domino, patriae gentium,  
afferte Domino gloriam et honorem ; ^ps-95-7

**8** afferte Domino gloriam nomini ejus.  
Tollite hostias, et introite in atria ejus ; ^ps-95-8

**9** adorate Dominum in atrio sancto ejus.  
Commoveatur a facie ejus universa terra ; ^ps-95-9

**10** dicite in gentibus, quia Dominus regnavit.  
Etenim correxit orbem terrae, qui non commovebitur ;  
judicabit populos in aequitate. ^ps-95-10

**11** Laetentur caeli, et exsultet terra ;  
commoveatur mare et plenitudo ejus ; ^ps-95-11

**12** gaudebunt campi, et omnia quae in eis sunt.  
Tunc exsultabunt omnia ligna silvarum ^ps-95-12

**13** a facie Domini, quia venit,  
quoniam venit judicare terram.  
Judicabit orbem terrae in aequitate,  
et populos in veritate sua. ^ps-95-13

## Capítulo 96

**1** Huic David, quando terra ejus restituta est. Dominus regnavit : exsultet terra ;  
laetentur insulae multae. ^ps-96-1

**2** Nubes et caligo in circuitu ejus ;  
justitia et judicium correctio sedis ejus. ^ps-96-2

**3** Ignis ante ipsum praecedet,  
et inflammabit in circuitu inimicos ejus. ^ps-96-3

**4** Illuxerunt fulgura ejus orbi terrae ;  
vidit, et commota est terra. ^ps-96-4

**5** Montes sicut cera fluxerunt a facie Domini ;  
a facie Domini omnis terra. ^ps-96-5

**6** Annuntiaverunt caeli justitiam ejus,  
et viderunt omnes populi gloriam ejus. ^ps-96-6

**7** Confundantur omnes qui adorant sculptilia,  
et qui gloriantur in simulacris suis.  
Adorate eum omnes angeli ejus. ^ps-96-7

**8** Audivit, et laetata est Sion,  
et exsultaverunt filiae Judae  
propter judicia tua, Domine. ^ps-96-8

**9** Quoniam tu Dominus altissimus super omnem terram ;  
nimis exaltatus es super omnes deos. ^ps-96-9

**10** Qui diligitis Dominum, odite malum :  
custodit Dominus animas sanctorum suorum ;  
de manu peccatoris liberabit eos. ^ps-96-10

**11** Lux orta est justo,  
et rectis corde laetitia. ^ps-96-11

**12** Laetamini, justi, in Domino,  
et confitemini memoriae sanctificationis ejus. ^ps-96-12

## Capítulo 97

**1** Psalmus ipsi David. Cantate Domino canticum novum,  
quia mirabilia fecit.  
Salvavit sibi dextera ejus,  
et brachium sanctum ejus. ^ps-97-1

**2** Notum fecit Dominus salutare suum ;  
in conspectu gentium revelavit justitiam suam. ^ps-97-2

**3** Recordatus est misericordiae suae,  
et veritatis suae domui Israël.  
Viderunt omnes termini terrae  
salutare Dei nostri. ^ps-97-3

**4** Jubilate Deo, omnis terra ;  
cantate, et exsultate, et psallite. ^ps-97-4

**5** Psallite Domino in cithara ;  
in cithara et voce psalmi ; ^ps-97-5

**6** in tubis ductilibus, et voce tubae corneae.  
Jubilate in conspectu regis Domini : ^ps-97-6

**7** moveatur mare, et plenitudo ejus ;  
orbis terrarum, et qui habitant in eo. ^ps-97-7

**8** Flumina plaudent manu ;  
simul montes exsultabunt ^ps-97-8

**9** a conspectu Domini :  
quoniam venit judicare terram.  
Judicabit orbem terrarum in justitia,  
et populos in aequitate. ^ps-97-9

## Capítulo 98

**1** Psalmus ipsi David. Dominus regnavit : irascantur populi ;  
qui sedet super cherubim : moveatur terra. ^ps-98-1

**2** Dominus in Sion magnus,  
et excelsus super omnes populos. ^ps-98-2

**3** Confiteantur nomini tuo magno,  
quoniam terribile et sanctum est, ^ps-98-3

**4** et honor regis judicium diligit.  
Tu parasti directiones ;  
judicium et justitiam in Jacob tu fecisti. ^ps-98-4

**5** Exaltate Dominum Deum nostrum,  
et adorate scabellum pedum ejus,  
quoniam sanctum est. ^ps-98-5

**6** Moyses et Aaron in sacerdotibus ejus,  
et Samuel inter eos qui invocant nomen ejus :  
invocabant Dominum, et ipse exaudiebat eos ; ^ps-98-6

**7** in columna nubis loquebatur ad eos.  
Custodiebant testimonia ejus,  
et praeceptum quod dedit illis. ^ps-98-7

**8** Domine Deus noster, tu exaudiebas eos ;  
Deus, tu propitius fuisti eis,  
et ulciscens in omnes adinventiones eorum. ^ps-98-8

**9** Exaltate Dominum Deum nostrum,  
et adorate in monte sancto ejus,  
quoniam sanctus Dominus Deus noster. ^ps-98-9

## Capítulo 99

**1** Psalmus in confessione. ^ps-99-1

**2** Jubilate Deo, omnis terra ;  
servite Domino in laetitia.  
Introite in conspectu ejus in exsultatione. ^ps-99-2

**3** Scitote quoniam Dominus ipse est Deus ;  
ipse fecit nos, et non ipsi nos :  
populus ejus, et oves pascuae ejus. ^ps-99-3

**4** Introite portas ejus in confessione ;  
atria ejus in hymnis :  
confitemini illi.  
Laudate nomen ejus, ^ps-99-4

**5** quoniam suavis est Dominus,  
in aeternum misericordia ejus,  
et usque in generationem et generationem veritas ejus. ^ps-99-5

## Capítulo 100

**1** Psalmus ipsi David. Misericordiam et judicium cantabo tibi, Domine ;  
psallam, ^ps-100-1

**2** et intelligam in via immaculata : quando venies ad me ?  
Perambulabam in innocentia cordis mei, in medio domus meae. ^ps-100-2

**3** Non proponebam ante oculos meos rem injustam ;  
facientes praevaricationes odivi ;  
non adhaesit mihi ^ps-100-3

**4** cor pravum ;  
declinantem a me malignum non cognoscebam. ^ps-100-4

**5** Detrahentem secreto proximo suo, hunc persequebar :  
superbo oculo, et insatiabili corde, cum hoc non edebam. ^ps-100-5

**6** Oculi mei ad fideles terrae, ut sedeant mecum ;  
ambulans in via immaculata, hic mihi ministrabat. ^ps-100-6

**7** Non habitabit in medio domus meae qui facit superbiam ;  
qui loquitur iniqua non direxit in conspectu oculorum meorum. ^ps-100-7

**8** In matutino interficiebam omnes peccatores terrae,  
ut disperderem de civitate Domini omnes operantes iniquitatem. ^ps-100-8

## Capítulo 101

**1** Oratio pauperis, cum anxius fuerit, et in conspectu Domini effuderit precem suam. ^ps-101-1

**2** Domine, exaudi orationem meam,  
et clamor meus ad te veniat. ^ps-101-2

**3** Non avertas faciem tuam a me :  
in quacumque die tribulor, inclina ad me aurem tuam ;  
in quacumque die invocavero te, velociter exaudi me. ^ps-101-3

**4** Quia defecerunt sicut fumus dies mei,  
et ossa mea sicut cremium aruerunt. ^ps-101-4

**5** Percussus sum ut foenum, et aruit cor meum,  
quia oblitus sum comedere panem meum. ^ps-101-5

**6** A voce gemitus mei  
adhaesit os meum carni meae. ^ps-101-6

**7** Similis factus sum pellicano solitudinis ;  
factus sum sicut nycticorax in domicilio. ^ps-101-7

**8** Vigilavi, et factus sum sicut passer solitarius in tecto. ^ps-101-8

**9** Tota die exprobrabant mihi inimici mei,  
et qui laudabant me adversum me jurabant : ^ps-101-9

**10** quia cinerem tamquam panem manducabam,  
et potum meum cum fletu miscebam, ^ps-101-10

**11** a facie irae et indignationis tuae :  
quia elevans allisisti me. ^ps-101-11

**12** Dies mei sicut umbra declinaverunt,  
et ego sicut foenum arui. ^ps-101-12

**13** Tu autem, Domine, in aeternum permanes,  
et memoriale tuum in generationem et generationem. ^ps-101-13

**14** Tu exsurgens misereberis Sion,  
quia tempus miserendi ejus, quia venit tempus : ^ps-101-14

**15** quoniam placuerunt servis tuis lapides ejus,  
et terrae ejus miserebuntur. ^ps-101-15

**16** Et timebunt gentes nomen tuum, Domine,  
et omnes reges terrae gloriam tuam : ^ps-101-16

**17** quia aedificavit Dominus Sion,  
et videbitur in gloria sua. ^ps-101-17

**18** Respexit in orationem humilium  
et non sprevit precem eorum. ^ps-101-18

**19** Scribantur haec in generatione altera,  
et populus qui creabitur laudabit Dominum. ^ps-101-19

**20** Quia prospexit de excelso sancto suo ;  
Dominus de caelo in terram aspexit : ^ps-101-20

**21** ut audiret gemitus compeditorum ;  
ut solveret filios interemptorum : ^ps-101-21

**22** ut annuntient in Sion nomen Domini,  
et laudem ejus in Jerusalem : ^ps-101-22

**23** in conveniendo populos in unum, et reges,  
ut serviant Domino. ^ps-101-23

**24** Respondit ei in via virtutis suae :  
Paucitatem dierum meorum nuntia mihi : ^ps-101-24

**25** ne revoces me in dimidio dierum meorum,  
in generationem et generationem anni tui. ^ps-101-25

**26** Initio tu, Domine, terram fundasti,  
et opera manuum tuarum sunt caeli. ^ps-101-26

**27** Ipsi peribunt, tu autem permanes ;  
et omnes sicut vestimentum veterascent.  
Et sicut opertorium mutabis eos, et mutabuntur ; ^ps-101-27

**28** tu autem idem ipse es, et anni tui non deficient. ^ps-101-28

**29** Filii servorum tuorum habitabunt,  
et semen eorum in saeculum dirigetur. ^ps-101-29

## Capítulo 102

**1** Ipsi David. Benedic, anima mea, Domino,  
et omnia quae intra me sunt nomini sancto ejus. ^ps-102-1

**2** Benedic, anima mea, Domino,  
et noli oblivisci omnes retributiones ejus. ^ps-102-2

**3** Qui propitiatur omnibus iniquitatibus tuis ;  
qui sanat omnes infirmitates tuas : ^ps-102-3

**4** qui redimit de interitu vitam tuam ;  
qui coronat te in misericordia et miserationibus : ^ps-102-4

**5** qui replet in bonis desiderium tuum ;  
renovabitur ut aquilae juventus tua : ^ps-102-5

**6** faciens misericordias Dominus,  
et judicium omnibus injuriam patientibus. ^ps-102-6

**7** Notas fecit vias suas Moysi ;  
filiis Israël voluntates suas. ^ps-102-7

**8** Miserator et misericors Dominus :  
longanimis, et multum misericors. ^ps-102-8

**9** Non in perpetuum irascetur,  
neque in aeternum comminabitur. ^ps-102-9

**10** Non secundum peccata nostra fecit nobis,  
neque secundum iniquitates nostras retribuit nobis. ^ps-102-10

**11** Quoniam secundum altitudinem caeli a terra,  
corroboravit misericordiam suam super timentes se ; ^ps-102-11

**12** quantum distat ortus ab occidente,  
longe fecit a nobis iniquitates nostras. ^ps-102-12

**13** Quomodo miseretur pater filiorum,  
misertus est Dominus timentibus se. ^ps-102-13

**14** Quoniam ipse cognovit figmentum nostrum ;  
recordatus est quoniam pulvis sumus. ^ps-102-14

**15** Homo, sicut foenum dies ejus ;  
tamquam flos agri, sic efflorebit : ^ps-102-15

**16** quoniam spiritus pertransibit in illo, et non subsistet,  
et non cognoscet amplius locum suum. ^ps-102-16

**17** Misericordia autem Domini ab aeterno,  
et usque in aeternum super timentes eum.  
Et justitia illius in filios filiorum, ^ps-102-17

**18** his qui servant testamentum ejus,  
et memores sunt mandatorum ipsius ad faciendum ea. ^ps-102-18

**19** Dominus in caelo paravit sedem suam,  
et regnum ipsius omnibus dominabitur. ^ps-102-19

**20** Benedicite Domino, omnes angeli ejus :  
potentes virtute, facientes verbum illius,  
ad audiendam vocem sermonum ejus. ^ps-102-20

**21** Benedicite Domino, omnes virtutes ejus ;  
ministri ejus, qui facitis voluntatem ejus. ^ps-102-21

**22** Benedicite Domino, omnia opera ejus :  
in omni loco dominationis ejus,  
benedic, anima mea, Domino. ^ps-102-22

## Capítulo 103

**1** Ipsi David. Benedic, anima mea, Domino :  
Domine Deus meus, magnificatus es vehementer.  
Confessionem et decorem induisti, ^ps-103-1

**2** amictus lumine sicut vestimento.  
Extendens caelum sicut pellem, ^ps-103-2

**3** qui tegis aquis superiora ejus :  
qui ponis nubem ascensum tuum ;  
qui ambulas super pennas ventorum : ^ps-103-3

**4** qui facis angelos tuos spiritus,  
et ministros tuos ignem urentem. ^ps-103-4

**5** Qui fundasti terram super stabilitatem suam :  
non inclinabitur in saeculum saeculi. ^ps-103-5

**6** Abyssus sicut vestimentum amictus ejus ;  
super montes stabunt aquae. ^ps-103-6

**7** Ab increpatione tua fugient ;  
a voce tonitrui tui formidabunt. ^ps-103-7

**8** Ascendunt montes, et descendunt campi,  
in locum quem fundasti eis. ^ps-103-8

**9** Terminum posuisti quem non transgredientur,  
neque convertentur operire terram. ^ps-103-9

**10** Qui emittis fontes in convallibus ;  
inter medium montium pertransibunt aquae. ^ps-103-10

**11** Potabunt omnes bestiae agri ;  
expectabunt onagri in siti sua. ^ps-103-11

**12** Super ea volucres caeli habitabunt ;  
de medio petrarum dabunt voces. ^ps-103-12

**13** Rigans montes de superioribus suis ;  
de fructu operum tuorum satiabitur terra : ^ps-103-13

**14** producens foenum jumentis,  
et herbam servituti hominum,  
ut educas panem de terra, ^ps-103-14

**15** et vinum laetificet cor hominis :  
ut exhilaret faciem in oleo,  
et panis cor hominis confirmet. ^ps-103-15

**16** Saturabuntur ligna campi,  
et cedri Libani quas plantavit : ^ps-103-16

**17** illic passeres nidificabunt :  
herodii domus dux est eorum. ^ps-103-17

**18** Montes excelsi cervis ;  
petra refugium herinaciis. ^ps-103-18

**19** Fecit lunam in tempora ;  
sol cognovit occasum suum. ^ps-103-19

**20** Posuisti tenebras, et facta est nox ;  
in ipsa pertransibunt omnes bestiae silvae : ^ps-103-20

**21** catuli leonum rugientes ut rapiant,  
et quaerant a Deo escam sibi. ^ps-103-21

**22** Ortus est sol, et congregati sunt,  
et in cubilibus suis collocabuntur. ^ps-103-22

**23** Exibit homo ad opus suum,  
et ad operationem suam usque ad vesperum. ^ps-103-23

**24** Quam magnificata sunt opera tua, Domine !  
omnia in sapientia fecisti ;  
impleta est terra possessione tua. ^ps-103-24

**25** Hoc mare magnum et spatiosum manibus ;  
illic reptilia quorum non est numerus :  
animalia pusilla cum magnis. ^ps-103-25

**26** Illic naves pertransibunt ;  
draco iste quem formasti ad illudendum ei. ^ps-103-26

**27** Omnia a te expectant  
ut des illis escam in tempore. ^ps-103-27

**28** Dante te illis, colligent ;  
aperiente te manum tuam, omnia implebuntur bonitate. ^ps-103-28

**29** Avertente autem te faciem, turbabuntur ;  
auferes spiritum eorum, et deficient,  
et in pulverem suum revertentur. ^ps-103-29

**30** Emittes spiritum tuum, et creabuntur,  
et renovabis faciem terrae. ^ps-103-30

**31** Sit gloria Domini in saeculum ;  
laetabitur Dominus in operibus suis. ^ps-103-31

**32** Qui respicit terram, et facit eam tremere ;  
qui tangit montes, et fumigant. ^ps-103-32

**33** Cantabo Domino in vita mea ;  
psallam Deo meo quamdiu sum. ^ps-103-33

**34** Jucundum sit ei eloquium meum ;  
ego vero delectabor in Domino. ^ps-103-34

**35** Deficiant peccatores a terra,  
et iniqui, ita ut non sint.  
Benedic, anima mea, Domino. ^ps-103-35

## Capítulo 104

**1** Alleluja. Confitemini Domino, et invocate nomen ejus ;  
annuntiate inter gentes opera ejus. ^ps-104-1

**2** Cantate ei, et psallite ei ;  
narrate omnia mirabilia ejus. ^ps-104-2

**3** Laudamini in nomine sancto ejus ;  
laetetur cor quaerentium Dominum. ^ps-104-3

**4** Quaerite Dominum, et confirmamini ;  
quaerite faciem ejus semper. ^ps-104-4

**5** Mementote mirabilium ejus quae fecit ;  
prodigia ejus, et judicia oris ejus : ^ps-104-5

**6** semen Abraham servi ejus ;  
filii Jacob electi ejus. ^ps-104-6

**7** Ipse Dominus Deus noster ;  
in universa terra judicia ejus. ^ps-104-7

**8** Memor fuit in saeculum testamenti sui ;  
verbi quod mandavit in mille generationes : ^ps-104-8

**9** quod disposuit ad Abraham,  
et juramenti sui ad Isaac : ^ps-104-9

**10** et statuit illud Jacob in praeceptum,  
et Israël in testamentum aeternum, ^ps-104-10

**11** dicens : Tibi dabo terram Chanaan,  
funiculum haereditatis vestrae : ^ps-104-11

**12** cum essent numero brevi,  
paucissimi, et incolae ejus. ^ps-104-12

**13** Et pertransierunt de gente in gentem,  
et de regno ad populum alterum. ^ps-104-13

**14** Non reliquit hominem nocere eis :  
et corripuit pro eis reges. ^ps-104-14

**15** Nolite tangere christos meos,  
et in prophetis meis nolite malignari. ^ps-104-15

**16** Et vocavit famem super terram,  
et omne firmamentum panis contrivit. ^ps-104-16

**17** Misit ante eos virum :  
in servum venundatus est, Joseph. ^ps-104-17

**18** Humiliaverunt in compedibus pedes ejus ;  
ferrum pertransiit animam ejus : ^ps-104-18

**19** donec veniret verbum ejus.  
Eloquium Domini inflammavit eum. ^ps-104-19

**20** Misit rex, et solvit eum ;  
princeps populorum, et dimisit eum. ^ps-104-20

**21** Constituit eum dominum domus suae,  
et principem omnis possessionis suae : ^ps-104-21

**22** ut erudiret principes ejus sicut semetipsum,  
et senes ejus prudentiam doceret. ^ps-104-22

**23** Et intravit Israël in Aegyptum,  
et Jacob accola fuit in terra Cham. ^ps-104-23

**24** Et auxit populum suum vehementer,  
et firmavit eum super inimicos ejus. ^ps-104-24

**25** Convertit cor eorum, ut odirent populum ejus,  
et dolum facerent in servos ejus. ^ps-104-25

**26** Misit Moysen servum suum ;  
Aaron quem elegit ipsum. ^ps-104-26

**27** Posuit in eis verba signorum suorum,  
et prodigiorum in terra Cham. ^ps-104-27

**28** Misit tenebras, et obscuravit ;  
et non exacerbavit sermones suos. ^ps-104-28

**29** Convertit aquas eorum in sanguinem,  
et occidit pisces eorum. ^ps-104-29

**30** Edidit terra eorum ranas  
in penetralibus regum ipsorum. ^ps-104-30

**31** Dixit, et venit coenomyia et ciniphes  
in omnibus finibus eorum. ^ps-104-31

**32** Posuit pluvias eorum grandinem :  
ignem comburentem in terra ipsorum. ^ps-104-32

**33** Et percussit vineas eorum, et ficulneas eorum,  
et contrivit lignum finium eorum. ^ps-104-33

**34** Dixit, et venit locusta,  
et bruchus cujus non erat numerus : ^ps-104-34

**35** et comedit omne foenum in terra eorum,  
et comedit omnem fructum terrae eorum. ^ps-104-35

**36** Et percussit omne primogenitum in terra eorum,  
primitias omnis laboris eorum. ^ps-104-36

**37** Et eduxit eos cum argento et auro,  
et non erat in tribubus eorum infirmus. ^ps-104-37

**38** Laetata est Aegyptus in profectione eorum,  
quia incubuit timor eorum super eos. ^ps-104-38

**39** Expandit nubem in protectionem eorum,  
et ignem ut luceret eis per noctem. ^ps-104-39

**40** Petierunt, et venit coturnix,  
et pane caeli saturavit eos. ^ps-104-40

**41** Dirupit petram, et fluxerunt aquae :  
abierunt in sicco flumina. ^ps-104-41

**42** Quoniam memor fuit verbi sancti sui,  
quod habuit ad Abraham puerum suum. ^ps-104-42

**43** Et eduxit populum suum in exsultatione,  
et electos suos in laetitia. ^ps-104-43

**44** Et dedit illis regiones gentium,  
et labores populorum possederunt : ^ps-104-44

**45** ut custodiant justificationes ejus,  
et legem ejus requirant. ^ps-104-45

## Capítulo 105

**1** Alleluja. Confitemini Domino, quoniam bonus,  
quoniam in saeculum misericordia ejus. ^ps-105-1

**2** Quis loquetur potentias Domini ;  
auditas faciet omnes laudes ejus ? ^ps-105-2

**3** Beati qui custodiunt judicium,  
et faciunt justitiam in omni tempore. ^ps-105-3

**4** Memento nostri, Domine, in beneplacito populi tui ;  
visita nos in salutari tuo : ^ps-105-4

**5** ad videndum in bonitate electorum tuorum ;  
ad laetandum in laetitia gentis tuae :  
ut lauderis cum haereditate tua. ^ps-105-5

**6** Peccavimus cum patribus nostris :  
injuste egimus ; iniquitatem fecimus. ^ps-105-6

**7** Patres nostri in Aegypto non intellexerunt mirabilia tua ;  
non fuerunt memores multitudinis misericordiae tuae.  
Et irritaverunt ascendentes in mare, mare Rubrum ; ^ps-105-7

**8** et salvavit eos propter nomen suum,  
ut notam faceret potentiam suam. ^ps-105-8

**9** Et increpuit mare Rubrum et exsiccatum est,  
et deduxit eos in abyssis sicut in deserto. ^ps-105-9

**10** Et salvavit eos de manu odientium,  
et redemit eos de manu inimici. ^ps-105-10

**11** Et operuit aqua tribulantes eos ;  
unus ex eis non remansit. ^ps-105-11

**12** Et crediderunt verbis ejus,  
et laudaverunt laudem ejus. ^ps-105-12

**13** Cito fecerunt ; obliti sunt operum ejus :  
et non sustinuerunt consilium ejus. ^ps-105-13

**14** Et concupierunt concupiscentiam in deserto,  
et tentaverunt Deum in inaquoso. ^ps-105-14

**15** Et dedit eis petitionem ipsorum,  
et misit saturitatem in animas eorum. ^ps-105-15

**16** Et irritaverunt Moysen in castris ;  
Aaron, sanctum Domini. ^ps-105-16

**17** Aperta est terra, et deglutivit Dathan,  
et operuit super congregationem Abiron. ^ps-105-17

**18** Et exarsit ignis in synagoga eorum :  
flamma combussit peccatores. ^ps-105-18

**19** Et fecerunt vitulum in Horeb,  
et adoraverunt sculptile. ^ps-105-19

**20** Et mutaverunt gloriam suam  
in similitudinem vituli comedentis foenum. ^ps-105-20

**21** Obliti sunt Deum qui salvavit eos ;  
qui fecit magnalia in Aegypto, ^ps-105-21

**22** mirabilia in terra Cham,  
terribilia in mari Rubro. ^ps-105-22

**23** Et dixit ut disperderet eos,  
si non Moyses, electus ejus,  
stetisset in confractione in conspectu ejus,  
ut averteret iram ejus, ne disperderet eos. ^ps-105-23

**24** Et pro nihilo habuerunt terram desiderabilem ;  
non crediderunt verbo ejus. ^ps-105-24

**25** Et murmuraverunt in tabernaculis suis ;  
non exaudierunt vocem Domini. ^ps-105-25

**26** Et elevavit manum suam super eos  
ut prosterneret eos in deserto : ^ps-105-26

**27** et ut dejiceret semen eorum in nationibus,  
et dispergeret eos in regionibus. ^ps-105-27

**28** Et initiati sunt Beelphegor,  
et comederunt sacrificia mortuorum. ^ps-105-28

**29** Et irritaverunt eum in adinventionibus suis,  
et multiplicata est in eis ruina. ^ps-105-29

**30** Et stetit Phinees, et placavit,  
et cessavit quassatio. ^ps-105-30

**31** Et reputatum est ei in justitiam,  
in generationem et generationem usque in sempiternum. ^ps-105-31

**32** Et irritaverunt eum ad aquas contradictionis,  
et vexatus est Moyses propter eos : ^ps-105-32

**33** quia exacerbaverunt spiritum ejus,  
et distinxit in labiis suis. ^ps-105-33

**34** Non disperdiderunt gentes  
quas dixit Dominus illis : ^ps-105-34

**35** et commisti sunt inter gentes,  
et didicerunt opera eorum ; ^ps-105-35

**36** et servierunt sculptilibus eorum,  
et factum est illis in scandalum. ^ps-105-36

**37** Et immolaverunt filios suos et filias suas daemoniis. ^ps-105-37

**38** Et effuderunt sanguinem innocentem,  
sanguinem filiorum suorum et filiarum suarum,  
quas sacrificaverunt sculptilibus Chanaan.  
Et infecta est terra in sanguinibus, ^ps-105-38

**39** et contaminata est in operibus eorum :  
et fornicati sunt in adinventionibus suis. ^ps-105-39

**40** Et iratus est furore Dominus in populum suum,  
et abominatus est haereditatem suam. ^ps-105-40

**41** Et tradidit eos in manus gentium ;  
et dominati sunt eorum qui oderunt eos. ^ps-105-41

**42** Et tribulaverunt eos inimici eorum,  
et humiliati sunt sub manibus eorum ; ^ps-105-42

**43** saepe liberavit eos.  
Ipsi autem exacerbaverunt eum in consilio suo,  
et humiliati sunt in iniquitatibus suis. ^ps-105-43

**44** Et vidit cum tribularentur,  
et audivit orationem eorum. ^ps-105-44

**45** Et memor fuit testamenti sui,  
et poenituit eum secundum multitudinem misericordiae suae : ^ps-105-45

**46** et dedit eos in misericordias,  
in conspectu omnium qui ceperant eos. ^ps-105-46

**47** Salvos nos fac, Domine Deus noster,  
et congrega nos de nationibus :  
ut confiteamur nomini sancto tuo,  
et gloriemur in laude tua. ^ps-105-47

**48** Benedictus Dominus Deus Israël, a saeculo et usque in saeculum ;  
et dicet omnis populus : Fiat, fiat. ^ps-105-48

## Capítulo 106

**1** Alleluja. Confitemini Domino, quoniam bonus,  
quoniam in saeculum misericordia ejus. ^ps-106-1

**2** Dicant qui redempti sunt a Domino,  
quos redemit de manu inimici,  
et de regionibus congregavit eos, ^ps-106-2

**3** a solis ortu, et occasu, ab aquilone, et mari. ^ps-106-3

**4** Erraverunt in solitudine, in inaquoso ;  
viam civitatis habitaculi non invenerunt. ^ps-106-4

**5** Esurientes et sitientes,  
anima eorum in ipsis defecit. ^ps-106-5

**6** Et clamaverunt ad Dominum cum tribularentur,  
et de necessitatibus eorum eripuit eos ; ^ps-106-6

**7** et deduxit eos in viam rectam,  
ut irent in civitatem habitationis. ^ps-106-7

**8** Confiteantur Domino misericordiae ejus,  
et mirabilia ejus filiis hominum. ^ps-106-8

**9** Quia satiavit animam inanem,  
et animam esurientem satiavit bonis. ^ps-106-9

**10** Sedentes in tenebris et umbra mortis ;  
vinctos in mendicitate et ferro. ^ps-106-10

**11** Quia exacerbaverunt eloquia Dei,  
et consilium Altissimi irritaverunt. ^ps-106-11

**12** Et humiliatum est in laboribus cor eorum ;  
infirmati sunt, nec fuit qui adjuvaret. ^ps-106-12

**13** Et clamaverunt ad Dominum cum tribularentur ;  
et de necessitatibus eorum liberavit eos. ^ps-106-13

**14** Et eduxit eos de tenebris et umbra mortis,  
et vincula eorum dirupit. ^ps-106-14

**15** Confiteantur Domino misericordiae ejus,  
et mirabilia ejus filiis hominum. ^ps-106-15

**16** Quia contrivit portas aereas,  
et vectes ferreos confregit. ^ps-106-16

**17** Suscepit eos de via iniquitatis eorum ;  
propter injustitias enim suas humiliati sunt. ^ps-106-17

**18** Omnem escam abominata est anima eorum,  
et appropinquaverunt usque ad portas mortis. ^ps-106-18

**19** Et clamaverunt ad Dominum cum tribularentur,  
et de necessitatibus eorum liberavit eos. ^ps-106-19

**20** Misit verbum suum, et sanavit eos,  
et eripuit eos de interitionibus eorum. ^ps-106-20

**21** Confiteantur Domino misericordiae ejus,  
et mirabilia ejus filiis hominum. ^ps-106-21

**22** Et sacrificent sacrificium laudis,  
et annuntient opera ejus in exsultatione. ^ps-106-22

**23** Qui descendunt mare in navibus,  
facientes operationem in aquis multis : ^ps-106-23

**24** ipsi viderunt opera Domini,  
et mirabilia ejus in profundo. ^ps-106-24

**25** Dixit, et stetit spiritus procellae,  
et exaltati sunt fluctus ejus. ^ps-106-25

**26** Ascendunt usque ad caelos, et descendunt usque ad abyssos ;  
anima eorum in malis tabescebat. ^ps-106-26

**27** Turbati sunt, et moti sunt sicut ebrius,  
et omnis sapientia eorum devorata est. ^ps-106-27

**28** Et clamaverunt ad Dominum cum tribularentur ;  
et de necessitatibus eorum eduxit eos. ^ps-106-28

**29** Et statuit procellam ejus in auram,  
et siluerunt fluctus ejus. ^ps-106-29

**30** Et laetati sunt quia siluerunt ;  
et deduxit eos in portum voluntatis eorum. ^ps-106-30

**31** Confiteantur Domino misericordiae ejus,  
et mirabilia ejus filiis hominum. ^ps-106-31

**32** Et exaltent eum in ecclesia plebis,  
et in cathedra seniorum laudent eum. ^ps-106-32

**33** Posuit flumina in desertum,  
et exitus aquarum in sitim ; ^ps-106-33

**34** terram fructiferam in salsuginem,  
a malitia inhabitantium in ea. ^ps-106-34

**35** Posuit desertum in stagna aquarum,  
et terram sine aqua in exitus aquarum. ^ps-106-35

**36** Et collocavit illic esurientes,  
et constituerunt civitatem habitationis : ^ps-106-36

**37** et seminaverunt agros et plantaverunt vineas,  
et fecerunt fructum nativitatis. ^ps-106-37

**38** Et benedixit eis, et multiplicati sunt nimis ;  
et jumenta eorum non minoravit. ^ps-106-38

**39** Et pauci facti sunt et vexati sunt,  
a tribulatione malorum et dolore. ^ps-106-39

**40** Effusa est contemptio super principes :  
et errare fecit eos in invio, et non in via. ^ps-106-40

**41** Et adjuvit pauperem de inopia,  
et posuit sicut oves familias. ^ps-106-41

**42** Videbunt recti, et laetabuntur ;  
et omnis iniquitas oppilabit os suum. ^ps-106-42

**43** Quis sapiens, et custodiet haec,  
et intelliget misericordias Domini ? ^ps-106-43

## Capítulo 107

**1** Canticum Psalmi, ipsi David. ^ps-107-1

**2** Paratum cor meum, Deus, paratum cor meum ;  
cantabo, et psallam in gloria mea. ^ps-107-2

**3** Exsurge, gloria mea ; exsurge, psalterium et cithara ;  
exsurgam diluculo. ^ps-107-3

**4** Confitebor tibi in populis, Domine,  
et psallam tibi in nationibus : ^ps-107-4

**5** quia magna est super caelos misericordia tua,  
et usque ad nubes veritas tua. ^ps-107-5

**6** Exaltare super caelos, Deus,  
et super omnem terram gloria tua : ^ps-107-6

**7** ut liberentur dilecti tui.  
Salvum fac dextera tua, et exaudi me. ^ps-107-7

**8** Deus locutus est in sancto suo :  
Exsultabo, et dividam Sichimam ;  
et convallem tabernaculorum dimetiar. ^ps-107-8

**9** Meus est Galaad, et meus est Manasses,  
et Ephraim susceptio capitis mei.  
Juda rex meus ; ^ps-107-9

**10** Moab lebes spei meae :  
in Idumaeam extendam calceamentum meum ;  
mihi alienigenae amici facti sunt. ^ps-107-10

**11** Quis deducet me in civitatem munitam ?  
quis deducet me usque in Idumaeam ? ^ps-107-11

**12** nonne tu, Deus, qui repulisti nos ?  
et non exibis, Deus, in virtutibus nostris ? ^ps-107-12

**13** Da nobis auxilium de tribulatione,  
quia vana salus hominis. ^ps-107-13

**14** In Deo faciemus virtutem ;  
et ipse ad nihilum deducet inimicos nostros. ^ps-107-14

## Capítulo 108

**1** In finem. Psalmus David. ^ps-108-1

**2** Deus, laudem meam ne tacueris,  
quia os peccatoris et os dolosi super me apertum est. ^ps-108-2

**3** Locuti sunt adversum me lingua dolosa,  
et sermonibus odii circumdederunt me :  
et expugnaverunt me gratis. ^ps-108-3

**4** Pro eo ut me diligerent, detrahebant mihi ;  
ego autem orabam. ^ps-108-4

**5** Et posuerunt adversum me mala pro bonis,  
et odium pro dilectione mea. ^ps-108-5

**6** Constitue super eum peccatorem,  
et diabolus stet a dextris ejus. ^ps-108-6

**7** Cum judicatur, exeat condemnatus ;  
et oratio ejus fiat in peccatum. ^ps-108-7

**8** Fiant dies ejus pauci,  
et episcopatum ejus accipiat alter. ^ps-108-8

**9** Fiant filii ejus orphani,  
et uxor ejus vidua. ^ps-108-9

**10** Nutantes transferantur filii ejus et mendicent,  
et ejiciantur de habitationibus suis. ^ps-108-10

**11** Scrutetur foenerator omnem substantiam ejus,  
et diripiant alieni labores ejus. ^ps-108-11

**12** Non sit illi adjutor,  
nec sit qui misereatur pupillis ejus. ^ps-108-12

**13** Fiant nati ejus in interitum ;  
in generatione una deleatur nomen ejus. ^ps-108-13

**14** In memoriam redeat iniquitas patrum ejus in conspectu Domini,  
et peccatum matris ejus non deleatur. ^ps-108-14

**15** Fiant contra Dominum semper,  
et dispereat de terra memoria eorum : ^ps-108-15

**16** pro eo quod non est recordatus facere misericordiam, ^ps-108-16

**17** et persecutus est hominem inopem et mendicum,  
et compunctum corde, mortificare. ^ps-108-17

**18** Et dilexit maledictionem, et veniet ei ;  
et noluit benedictionem, et elongabitur ab eo.  
Et induit maledictionem sicut vestimentum ;  
et intravit sicut aqua in interiora ejus,  
et sicut oleum in ossibus ejus. ^ps-108-18

**19** Fiat ei sicut vestimentum quo operitur,  
et sicut zona qua semper praecingitur. ^ps-108-19

**20** Hoc opus eorum qui detrahunt mihi apud Dominum,  
et qui loquuntur mala adversus animam meam. ^ps-108-20

**21** Et tu, Domine, Domine, fac mecum propter nomen tuum,  
quia suavis est misericordia tua. ^ps-108-21

**22** Libera me, quia egenus et pauper ego sum,  
et cor meum conturbatum est intra me. ^ps-108-22

**23** Sicut umbra cum declinat ablatus sum,  
et excussus sum sicut locustae. ^ps-108-23

**24** Genua mea infirmata sunt a jejunio,  
et caro mea immutata est propter oleum. ^ps-108-24

**25** Et ego factus sum opprobrium illis ;  
viderunt me, et moverunt capita sua. ^ps-108-25

**26** Adjuva me, Domine Deus meus ;  
salvum me fac secundum misericordiam tuam. ^ps-108-26

**27** Et sciant quia manus tua haec,  
et tu, Domine, fecisti eam. ^ps-108-27

**28** Maledicent illi, et tu benedices :  
qui insurgunt in me confundantur ;  
servus autem tuus laetabitur. ^ps-108-28

**29** Induantur qui detrahunt mihi pudore,  
et operiantur sicut diploide confusione sua. ^ps-108-29

**30** Confitebor Domino nimis in ore meo,  
et in medio multorum laudabo eum : ^ps-108-30

**31** quia astitit a dextris pauperis,  
ut salvam faceret a persequentibus animam meam. ^ps-108-31

## Capítulo 109

**1** Psalmus David. Dixit Dominus Domino meo :  
Sede a dextris meis,  
donec ponam inimicos tuos scabellum pedum tuorum. ^ps-109-1

**2** Virgam virtutis tuae emittet Dominus ex Sion :  
dominare in medio inimicorum tuorum. ^ps-109-2

**3** Tecum principium in die virtutis tuae  
in splendoribus sanctorum :  
ex utero, ante luciferum, genui te. ^ps-109-3

**4** Juravit Dominus, et non poenitebit eum :  
Tu es sacerdos in aeternum  
secundum ordinem Melchisedech. ^ps-109-4

**5** Dominus a dextris tuis ;  
confregit in die irae suae reges. ^ps-109-5

**6** Judicabit in nationibus, implebit ruinas ;  
conquassabit capita in terra multorum. ^ps-109-6

**7** De torrente in via bibet ;  
propterea exaltabit caput. ^ps-109-7

## Capítulo 110

**1** Alleluja. Confitebor tibi, Domine, in toto corde meo,  
in consilio justorum, et congregatione. ^ps-110-1

**2** Magna opera Domini :  
exquisita in omnes voluntates ejus. ^ps-110-2

**3** Confessio et magnificentia opus ejus,  
et justitia ejus manet in saeculum saeculi. ^ps-110-3

**4** Memoriam fecit mirabilium suorum,  
misericors et miserator Dominus. ^ps-110-4

**5** Escam dedit timentibus se ;  
memor erit in saeculum testamenti sui. ^ps-110-5

**6** Virtutem operum suorum annuntiabit populo suo, ^ps-110-6

**7** ut det illis haereditatem gentium.  
Opera manuum ejus veritas et judicium. ^ps-110-7

**8** Fidelia omnia mandata ejus,  
confirmata in saeculum saeculi,  
facta in veritate et aequitate. ^ps-110-8

**9** Redemptionem misit populo suo ;  
mandavit in aeternum testamentum suum.  
Sanctum et terribile nomen ejus. ^ps-110-9

**10** Initium sapientiae timor Domini ;  
intellectus bonus omnibus facientibus eum :  
laudatio ejus manet in saeculum saeculi. ^ps-110-10

## Capítulo 111

**1** Alleluja, reversionis Aggaei et Zachariae. Beatus vir qui timet Dominum :  
in mandatis ejus volet nimis. ^ps-111-1

**2** Potens in terra erit semen ejus ;  
generatio rectorum benedicetur. ^ps-111-2

**3** Gloria et divitiae in domo ejus,  
et justitia ejus manet in saeculum saeculi. ^ps-111-3

**4** Exortum est in tenebris lumen rectis :  
misericors, et miserator, et justus. ^ps-111-4

**5** Jucundus homo qui miseretur et commodat ;  
disponet sermones suos in judicio : ^ps-111-5

**6** quia in aeternum non commovebitur. ^ps-111-6

**7** In memoria aeterna erit justus ;  
ab auditione mala non timebit.  
Paratum cor ejus sperare in Domino, ^ps-111-7

**8** confirmatum est cor ejus ;  
non commovebitur donec despiciat inimicos suos. ^ps-111-8

**9** Dispersit, dedit pauperibus ;  
justitia ejus manet in saeculum saeculi :  
cornu ejus exaltabitur in gloria. ^ps-111-9

**10** Peccator videbit, et irascetur ;  
dentibus suis fremet et tabescet :  
desiderium peccatorum peribit. ^ps-111-10

## Capítulo 112

**1** Alleluja. Laudate, pueri, Dominum ;  
laudate nomen Domini. ^ps-112-1

**2** Sit nomen Domini benedictum  
ex hoc nunc et usque in saeculum. ^ps-112-2

**3** A solis ortu usque ad occasum  
laudabile nomen Domini. ^ps-112-3

**4** Excelsus super omnes gentes Dominus,  
et super caelos gloria ejus. ^ps-112-4

**5** Quis sicut Dominus Deus noster, qui in altis habitat, ^ps-112-5

**6** et humilia respicit in caelo et in terra ? ^ps-112-6

**7** Suscitans a terra inopem,  
et de stercore erigens pauperem : ^ps-112-7

**8** ut collocet eum cum principibus,  
cum principibus populi sui. ^ps-112-8

**9** Qui habitare facit sterilem in domo,  
matrem filiorum laetantem. ^ps-112-9

## Capítulo 113

**1** Alleluja. In exitu Israël de Aegypto,  
domus Jacob de populo barbaro, ^ps-113-1

**2** facta est Judaea sanctificatio ejus ;  
Israël potestas ejus. ^ps-113-2

**3** Mare vidit, et fugit ;  
Jordanis conversus est retrorsum. ^ps-113-3

**4** Montes exsultaverunt ut arietes,  
et colles sicut agni ovium. ^ps-113-4

**5** Quid est tibi, mare, quod fugisti ?  
et tu, Jordanis, quia conversus es retrorsum ? ^ps-113-5

**6** montes, exsultastis sicut arietes ?  
et colles, sicut agni ovium ? ^ps-113-6

**7** A facie Domini mota est terra,  
a facie Dei Jacob : ^ps-113-7

**8** qui convertit petram in stagna aquarum,  
et rupem in fontes aquarum. ^ps-113-8

**9** Non nobis, Domine, non nobis,  
sed nomini tuo da gloriam : ^ps-113-9

**10** super misericordia tua et veritate tua ;  
nequando dicant gentes :  
Ubi est Deus eorum ? ^ps-113-10

**11** Deus autem noster in caelo ;  
omnia quaecumque voluit fecit. ^ps-113-11

**12** Simulacra gentium argentum et aurum,  
opera manuum hominum. ^ps-113-12

**13** Os habent, et non loquentur ;  
oculos habent, et non videbunt. ^ps-113-13

**14** Aures habent, et non audient ;  
nares habent, et non odorabunt. ^ps-113-14

**15** Manus habent, et non palpabunt ;  
pedes habent, et non ambulabunt ;  
non clamabunt in gutture suo. ^ps-113-15

**16** Similes illis fiant qui faciunt ea,  
et omnes qui confidunt in eis. ^ps-113-16

**17** Domus Israël speravit in Domino ;  
adjutor eorum et protector eorum est. ^ps-113-17

**18** Domus Aaron speravit in Domino ;  
adjutor eorum et protector eorum est. ^ps-113-18

**19** Qui timent Dominum speraverunt in Domino ; adjutor eorum et protector eorum est. ^ps-113-19

**20** Dominus memor fuit nostri,  
et benedixit nobis.  
Benedixit domui Israël ;  
benedixit domui Aaron. ^ps-113-20

**21** Benedixit omnibus qui timent Dominum,  
pusillis cum majoribus. ^ps-113-21

**22** Adjiciat Dominus super vos,  
super vos et super filios vestros. ^ps-113-22

**23** Benedicti vos a Domino,  
qui fecit caelum et terram. ^ps-113-23

**24** Caelum caeli Domino ;  
terram autem dedit filiis hominum. ^ps-113-24

**25** Non mortui laudabunt te, Domine,  
neque omnes qui descendunt in infernum : ^ps-113-25

**26** sed nos qui vivimus, benedicimus Domino,  
ex hoc nunc et usque in saeculum. ^ps-113-26

## Capítulo 114

**1** Alleluja. Dilexi, quoniam exaudiet Dominus  
vocem orationis meae. ^ps-114-1

**2** Quia inclinavit aurem suam mihi,  
et in diebus meis invocabo. ^ps-114-2

**3** Circumdederunt me dolores mortis ;  
et pericula inferni invenerunt me.  
Tribulationem et dolorem inveni, ^ps-114-3

**4** et nomen Domini invocavi :  
o Domine, libera animam meam. ^ps-114-4

**5** Misericors Dominus et justus,  
et Deus noster miseretur. ^ps-114-5

**6** Custodiens parvulos Dominus ;  
humiliatus sum, et liberavit me. ^ps-114-6

**7** Convertere, anima mea, in requiem tuam,  
quia Dominus benefecit tibi : ^ps-114-7

**8** quia eripuit animam meam de morte,  
oculos meos a lacrimis,  
pedes meos a lapsu. ^ps-114-8

**9** Placebo Domino in regione vivorum. ^ps-114-9

## Capítulo 115

**1** Alleluja. Credidi, propter quod locutus sum ;  
ego autem humiliatus sum nimis. ^ps-115-1

**2** Ego dixi in excessu meo :  
Omnis homo mendax. ^ps-115-2

**3** Quid retribuam Domino  
pro omnibus quae retribuit mihi ? ^ps-115-3

**4** Calicem salutaris accipiam,  
et nomen Domini invocabo. ^ps-115-4

**5** Vota mea Domino reddam  
coram omni populo ejus. ^ps-115-5

**6** Pretiosa in conspectu Domini  
mors sanctorum ejus. ^ps-115-6

**7** O Domine, quia ego servus tuus ;  
ego servus tuus, et filius ancillae tuae.  
Dirupisti vincula mea : ^ps-115-7

**8** tibi sacrificabo hostiam laudis,  
et nomen Domini invocabo. ^ps-115-8

**9** Vota mea Domino reddam  
in conspectu omnis populi ejus ; ^ps-115-9

**10** in atriis domus Domini,  
in medio tui, Jerusalem. ^ps-115-10

## Capítulo 116

**1** Alleluja. Laudate Dominum, omnes gentes ;  
laudate eum, omnes populi. ^ps-116-1

**2** Quoniam confirmata est super nos misericordia ejus,  
et veritas Domini manet in aeternum. ^ps-116-2

## Capítulo 117

**1** Alleluja. Confitemini Domino, quoniam bonus,  
quoniam in saeculum misericordia ejus. ^ps-117-1

**2** Dicat nunc Israël : Quoniam bonus,  
quoniam in saeculum misericordia ejus. ^ps-117-2

**3** Dicat nunc domus Aaron :  
Quoniam in saeculum misericordia ejus. ^ps-117-3

**4** Dicant nunc qui timent Dominum :  
Quoniam in saeculum misericordia ejus. ^ps-117-4

**5** De tribulatione invocavi Dominum,  
et exaudivit me in latitudine Dominus. ^ps-117-5

**6** Dominus mihi adjutor ;  
non timebo quid faciat mihi homo. ^ps-117-6

**7** Dominus mihi adjutor,  
et ego despiciam inimicos meos. ^ps-117-7

**8** Bonum est confidere in Domino,  
quam confidere in homine. ^ps-117-8

**9** Bonum est sperare in Domino,  
quam sperare in principibus. ^ps-117-9

**10** Omnes gentes circuierunt me,  
et in nomine Domini, quia ultus sum in eos. ^ps-117-10

**11** Circumdantes circumdederunt me,  
et in nomine Domini, quia ultus sum in eos. ^ps-117-11

**12** Circumdederunt me sicut apes,  
et exarserunt sicut ignis in spinis :  
et in nomine Domini, quia ultus sum in eos. ^ps-117-12

**13** Impulsus eversus sum, ut caderem,  
et Dominus suscepit me. ^ps-117-13

**14** Fortitudo mea et laus mea Dominus,  
et factus est mihi in salutem. ^ps-117-14

**15** Vox exsultationis et salutis  
in tabernaculis justorum. ^ps-117-15

**16** Dextera Domini fecit virtutem ;  
dextera Domini exaltavit me :  
dextera Domini fecit virtutem. ^ps-117-16

**17** Non moriar, sed vivam,  
et narrabo opera Domini. ^ps-117-17

**18** Castigans castigavit me Dominus,  
et morti non tradidit me. ^ps-117-18

**19** Aperite mihi portas justitiae :  
ingressus in eas confitebor Domino. ^ps-117-19

**20** Haec porta Domini :  
justi intrabunt in eam. ^ps-117-20

**21** Confitebor tibi quoniam exaudisti me,  
et factus es mihi in salutem. ^ps-117-21

**22** Lapidem quem reprobaverunt aedificantes,  
hic factus est in caput anguli. ^ps-117-22

**23** A Domino factum est istud,  
et est mirabile in oculis nostris. ^ps-117-23

**24** Haec est dies quam fecit Dominus ;  
exsultemus, et laetemur in ea. ^ps-117-24

**25** O Domine, salvum me fac ;  
o Domine, bene prosperare. ^ps-117-25

**26** Benedictus qui venit in nomine Domini :  
benediximus vobis de domo Domini. ^ps-117-26

**27** Deus Dominus, et illuxit nobis.  
Constituite diem solemnem in condensis,  
usque ad cornu altaris. ^ps-117-27

**28** Deus meus es tu, et confitebor tibi ;  
Deus meus es tu, et exaltabo te.  
Confitebor tibi quoniam exaudisti me,  
et factus es mihi in salutem. ^ps-117-28

**29** Confitemini Domino, quoniam bonus,  
quoniam in saeculum misericordia ejus. ^ps-117-29

## Capítulo 118

**1** Alleluja. **Aleph** Beati immaculati in via,  
qui ambulant in lege Domini. ^ps-118-1

**2** Beati qui scrutantur testimonia ejus ;  
in toto corde exquirunt eum. ^ps-118-2

**3** Non enim qui operantur iniquitatem  
in viis ejus ambulaverunt. ^ps-118-3

**4** Tu mandasti mandata tua  
custodiri nimis. ^ps-118-4

**5** Utinam dirigantur viae meae  
ad custodiendas justificationes tuas. ^ps-118-5

**6** Tunc non confundar,  
cum perspexero in omnibus mandatis tuis. ^ps-118-6

**7** Confitebor tibi in directione cordis,  
in eo quod didici judicia justitiae tuae. ^ps-118-7

**8** Justificationes tuas custodiam ;  
non me derelinquas usquequaque. ^ps-118-8

**9** **Beth** In quo corrigit adolescentior viam suam ?  
in custodiendo sermones tuos. ^ps-118-9

**10** In toto corde meo exquisivi te ;  
ne repellas me a mandatis tuis. ^ps-118-10

**11** In corde meo abscondi eloquia tua,  
ut non peccem tibi. ^ps-118-11

**12** Benedictus es, Domine ;  
doce me justificationes tuas. ^ps-118-12

**13** In labiis meis pronuntiavi omnia judicia oris tui. ^ps-118-13

**14** In via testimoniorum tuorum delectatus sum,  
sicut in omnibus divitiis. ^ps-118-14

**15** In mandatis tuis exercebor,  
et considerabo vias tuas. ^ps-118-15

**16** In justificationibus tuis meditabor :  
non obliviscar sermones tuos. ^ps-118-16

**17** **Ghimel** Retribue servo tuo, vivifica me,  
et custodiam sermones tuos. ^ps-118-17

**18** Revela oculos meos,  
et considerabo mirabilia de lege tua. ^ps-118-18

**19** Incola ego sum in terra :  
non abscondas a me mandata tua. ^ps-118-19

**20** Concupivit anima mea  
desiderare justificationes tuas in omni tempore. ^ps-118-20

**21** Increpasti superbos ;  
maledicti qui declinant a mandatis tuis. ^ps-118-21

**22** Aufer a me opprobrium et contemptum,  
quia testimonia tua exquisivi. ^ps-118-22

**23** Etenim sederunt principes, et adversum me loquebantur ;  
servus autem tuus exercebatur in justificationibus tuis. ^ps-118-23

**24** Nam et testimonia tua meditatio mea est,  
et consilium meum justificationes tuae. ^ps-118-24

**25** **Daleth** Adhaesit pavimento anima mea :  
vivifica me secundum verbum tuum. ^ps-118-25

**26** Vias meas enuntiavi, et exaudisti me ;  
doce me justificationes tuas. ^ps-118-26

**27** Viam justificationum tuarum instrue me,  
et exercebor in mirabilibus tuis. ^ps-118-27

**28** Dormitavit anima mea prae taedio :  
confirma me in verbis tuis. ^ps-118-28

**29** Viam iniquitatis amove a me,  
et de lege tua miserere mei. ^ps-118-29

**30** Viam veritatis elegi ;  
judicia tua non sum oblitus. ^ps-118-30

**31** Adhaesi testimoniis tuis, Domine ;  
noli me confundere. ^ps-118-31

**32** Viam mandatorum tuorum cucurri,  
cum dilatasti cor meum. ^ps-118-32

**33** **He** Legem pone mihi, Domine, viam justificationum tuarum,  
et exquiram eam semper. ^ps-118-33

**34** Da mihi intellectum, et scrutabor legem tuam,  
et custodiam illam in toto corde meo. ^ps-118-34

**35** Deduc me in semitam mandatorum tuorum,  
quia ipsam volui. ^ps-118-35

**36** Inclina cor meum in testimonia tua,  
et non in avaritiam. ^ps-118-36

**37** Averte oculos meos, ne videant vanitatem ;  
in via tua vivifica me. ^ps-118-37

**38** Statue servo tuo eloquium tuum  
in timore tuo. ^ps-118-38

**39** Amputa opprobrium meum quod suspicatus sum,  
quia judicia tua jucunda. ^ps-118-39

**40** Ecce concupivi mandata tua :  
in aequitate tua vivifica me. ^ps-118-40

**41** **Vau** Et veniat super me misericordia tua, Domine ;  
salutare tuum secundum eloquium tuum. ^ps-118-41

**42** Et respondebo exprobrantibus mihi verbum,  
quia speravi in sermonibus tuis. ^ps-118-42

**43** Et ne auferas de ore meo verbum veritatis usquequaque,  
quia in judiciis tuis supersperavi. ^ps-118-43

**44** Et custodiam legem tuam semper,  
in saeculum et in saeculum saeculi. ^ps-118-44

**45** Et ambulabam in latitudine,  
quia mandata tua exquisivi. ^ps-118-45

**46** Et loquebar in testimoniis tuis in conspectu regum,  
et non confundebar. ^ps-118-46

**47** Et meditabar in mandatis tuis,  
quae dilexi. ^ps-118-47

**48** Et levavi manus meas ad mandata tua, quae dilexi,  
et exercebar in justificationibus tuis. ^ps-118-48

**49** **Zain** Memor esto verbi tui servo tuo,  
in quo mihi spem dedisti. ^ps-118-49

**50** Haec me consolata est in humilitate mea,  
quia eloquium tuum vivificavit me. ^ps-118-50

**51** Superbi inique agebant usquequaque ;  
a lege autem tua non declinavi. ^ps-118-51

**52** Memor fui judiciorum tuorum a saeculo, Domine,  
et consolatus sum. ^ps-118-52

**53** Defectio tenuit me,  
pro peccatoribus derelinquentibus legem tuam. ^ps-118-53

**54** Cantabiles mihi erant justificationes tuae  
in loco peregrinationis meae. ^ps-118-54

**55** Memor fui nocte nominis tui, Domine,  
et custodivi legem tuam. ^ps-118-55

**56** Haec facta est mihi,  
quia justificationes tuas exquisivi. ^ps-118-56

**57** **Heth** Portio mea, Domine,  
dixi custodire legem tuam. ^ps-118-57

**58** Deprecatus sum faciem tuam in toto corde meo ;  
miserere mei secundum eloquium tuum. ^ps-118-58

**59** Cogitavi vias meas,  
et converti pedes meos in testimonia tua. ^ps-118-59

**60** Paratus sum, et non sum turbatus,  
ut custodiam mandata tua. ^ps-118-60

**61** Funes peccatorum circumplexi sunt me,  
et legem tuam non sum oblitus. ^ps-118-61

**62** Media nocte surgebam ad confitendum tibi,  
super judicia justificationis tuae. ^ps-118-62

**63** Particeps ego sum omnium timentium te,  
et custodientium mandata tua. ^ps-118-63

**64** Misericordia tua, Domine, plena est terra ;  
justificationes tuas doce me. ^ps-118-64

**65** **Teth** Bonitatem fecisti cum servo tuo, Domine,  
secundum verbum tuum. ^ps-118-65

**66** Bonitatem, et disciplinam, et scientiam doce me,  
quia mandatis tuis credidi. ^ps-118-66

**67** Priusquam humiliarer ego deliqui :  
propterea eloquium tuum custodivi. ^ps-118-67

**68** Bonus es tu, et in bonitate tua  
doce me justificationes tuas. ^ps-118-68

**69** Multiplicata est super me iniquitas superborum ;  
ego autem in toto corde meo scrutabor mandata tua. ^ps-118-69

**70** Coagulatum est sicut lac cor eorum ;  
ego vero legem tuam meditatus sum. ^ps-118-70

**71** Bonum mihi quia humiliasti me,  
ut discam justificationes tuas. ^ps-118-71

**72** Bonum mihi lex oris tui,  
super millia auri et argenti. ^ps-118-72

**73** **Jod** Manus tuae fecerunt me, et plasmaverunt me :  
da mihi intellectum, et discam mandata tua. ^ps-118-73

**74** Qui timent te videbunt me et laetabuntur,  
quia in verba tua supersperavi. ^ps-118-74

**75** Cognovi, Domine, quia aequitas judicia tua,  
et in veritate tua humiliasti me. ^ps-118-75

**76** Fiat misericordia tua ut consoletur me,  
secundum eloquium tuum servo tuo. ^ps-118-76

**77** Veniant mihi miserationes tuae, et vivam,  
quia lex tua meditatio mea est. ^ps-118-77

**78** Confundantur superbi, quia injuste iniquitatem fecerunt in me ;  
ego autem exercebor in mandatis tuis. ^ps-118-78

**79** Convertantur mihi timentes te,  
et qui noverunt testimonia tua. ^ps-118-79

**80** Fiat cor meum immaculatum in justificationibus tuis,  
ut non confundar. ^ps-118-80

**81** **Caph** Defecit in salutare tuum anima mea,  
et in verbum tuum supersperavi. ^ps-118-81

**82** Defecerunt oculi mei in eloquium tuum,  
dicentes : Quando consolaberis me ? ^ps-118-82

**83** Quia factus sum sicut uter in pruina ;  
justificationes tuas non sum oblitus. ^ps-118-83

**84** Quot sunt dies servi tui ?  
quando facies de persequentibus me judicium ? ^ps-118-84

**85** Narraverunt mihi iniqui fabulationes,  
sed non ut lex tua. ^ps-118-85

**86** Omnia mandata tua veritas :  
inique persecuti sunt me, adjuva me. ^ps-118-86

**87** Paulominus consummaverunt me in terra ;  
ego autem non dereliqui mandata tua. ^ps-118-87

**88** Secundum misericordiam tuam vivifica me,  
et custodiam testimonia oris tui. ^ps-118-88

**89** **Lamed** In aeternum, Domine,  
verbum tuum permanet in caelo. ^ps-118-89

**90** In generationem et generationem veritas tua ;  
fundasti terram, et permanet. ^ps-118-90

**91** Ordinatione tua perseverat dies,  
quoniam omnia serviunt tibi. ^ps-118-91

**92** Nisi quod lex tua meditatio mea est,  
tunc forte periissem in humilitate mea. ^ps-118-92

**93** In aeternum non obliviscar justificationes tuas,  
quia in ipsis vivificasti me. ^ps-118-93

**94** Tuus sum ego ; salvum me fac :  
quoniam justificationes tuas exquisivi. ^ps-118-94

**95** Me exspectaverunt peccatores ut perderent me ;  
testimonia tua intellexi. ^ps-118-95

**96** Omnis consummationis vidi finem,  
latum mandatum tuum nimis. ^ps-118-96

**97** **Mem** Quomodo dilexi legem tuam, Domine !  
tota die meditatio mea est. ^ps-118-97

**98** Super inimicos meos prudentem me fecisti mandato tuo,  
quia in aeternum mihi est. ^ps-118-98

**99** Super omnes docentes me intellexi,  
quia testimonia tua meditatio mea est. ^ps-118-99

**100** Super senes intellexi,  
quia mandata tua quaesivi. ^ps-118-100

**101** Ab omni via mala prohibui pedes meos,  
ut custodiam verba tua. ^ps-118-101

**102** A judiciis tuis non declinavi,  
quia tu legem posuisti mihi. ^ps-118-102

**103** Quam dulcia faucibus meis eloquia tua !  
super mel ori meo. ^ps-118-103

**104** A mandatis tuis intellexi ;  
propterea odivi omnem viam iniquitatis. ^ps-118-104

**105** **Nun** Lucerna pedibus meis verbum tuum,  
et lumen semitis meis. ^ps-118-105

**106** Juravi et statui  
custodire judicia justitiae tuae. ^ps-118-106

**107** Humiliatus sum usquequaque, Domine ;  
vivifica me secundum verbum tuum. ^ps-118-107

**108** Voluntaria oris mei beneplacita fac, Domine,  
et judicia tua doce me. ^ps-118-108

**109** Anima mea in manibus meis semper,  
et legem tuam non sum oblitus. ^ps-118-109

**110** Posuerunt peccatores laqueum mihi,  
et de mandatis tuis non erravi. ^ps-118-110

**111** Haereditate acquisivi testimonia tua in aeternum,  
quia exsultatio cordis mei sunt. ^ps-118-111

**112** Inclinavi cor meum ad faciendas justificationes tuas in aeternum,  
propter retributionem. ^ps-118-112

**113** **Samech** Iniquos odio habui,  
et legem tuam dilexi. ^ps-118-113

**114** Adjutor et susceptor meus es tu,  
et in verbum tuum supersperavi. ^ps-118-114

**115** Declinate a me, maligni,  
et scrutabor mandata Dei mei. ^ps-118-115

**116** Suscipe me secundum eloquium tuum, et vivam,  
et non confundas me ab exspectatione mea. ^ps-118-116

**117** Adjuva me, et salvus ero,  
et meditabor in justificationibus tuis semper. ^ps-118-117

**118** Sprevisti omnes discedentes a judiciis tuis,  
quia injusta cogitatio eorum. ^ps-118-118

**119** Praevaricantes reputavi omnes peccatores terrae ;  
ideo dilexi testimonia tua. ^ps-118-119

**120** Confige timore tuo carnes meas ;  
a judiciis enim tuis timui. ^ps-118-120

**121** **Ain** Feci judicium et justitiam :  
non tradas me calumniantibus me. ^ps-118-121

**122** Suscipe servum tuum in bonum :  
non calumnientur me superbi. ^ps-118-122

**123** Oculi mei defecerunt in salutare tuum,  
et in eloquium justitiae tuae. ^ps-118-123

**124** Fac cum servo tuo secundum misericordiam tuam,  
et justificationes tuas doce me. ^ps-118-124

**125** Servus tuus sum ego : da mihi intellectum,  
ut sciam testimonia tua. ^ps-118-125

**126** Tempus faciendi, Domine :  
dissipaverunt legem tuam. ^ps-118-126

**127** Ideo dilexi mandata tua  
super aurum et topazion. ^ps-118-127

**128** Propterea ad omnia mandata tua dirigebar ;  
omnem viam iniquam odio habui. ^ps-118-128

**129** **Phe** Mirabilia testimonia tua :  
ideo scrutata est ea anima mea. ^ps-118-129

**130** Declaratio sermonum tuorum illuminat,  
et intellectum dat parvulis. ^ps-118-130

**131** Os meum aperui, et attraxi spiritum :  
quia mandata tua desiderabam. ^ps-118-131

**132** Aspice in me, et miserere mei,  
secundum judicium diligentium nomen tuum. ^ps-118-132

**133** Gressus meos dirige secundum eloquium tuum,  
et non dominetur mei omnis injustitia. ^ps-118-133

**134** Redime me a calumniis hominum  
ut custodiam mandata tua. ^ps-118-134

**135** Faciem tuam illumina super servum tuum,  
et doce me justificationes tuas. ^ps-118-135

**136** Exitus aquarum deduxerunt oculi mei,  
quia non custodierunt legem tuam. ^ps-118-136

**137** **Sade** Justus es, Domine,  
et rectum judicium tuum. ^ps-118-137

**138** Mandasti justitiam testimonia tua,  
et veritatem tuam nimis. ^ps-118-138

**139** Tabescere me fecit zelus meus,  
quia obliti sunt verba tua inimici mei. ^ps-118-139

**140** Ignitum eloquium tuum vehementer,  
et servus tuus dilexit illud. ^ps-118-140

**141** Adolescentulus sum ego et contemptus ;  
justificationes tuas non sum oblitus. ^ps-118-141

**142** Justitia tua, justitia in aeternum,  
et lex tua veritas. ^ps-118-142

**143** Tribulatio et angustia invenerunt me ;  
mandata tua meditatio mea est. ^ps-118-143

**144** Aequitas testimonia tua in aeternum :  
intellectum da mihi, et vivam. ^ps-118-144

**145** **Coph** Clamavi in toto corde meo : exaudi me, Domine ;  
justificationes tuas requiram. ^ps-118-145

**146** Clamavi ad te ; salvum me fac :  
ut custodiam mandata tua. ^ps-118-146

**147** Praeveni in maturitate, et clamavi :  
quia in verba tua supersperavi. ^ps-118-147

**148** Praevenerunt oculi mei ad te diluculo,  
ut meditarer eloquia tua. ^ps-118-148

**149** Vocem meam audi secundum misericordiam tuam, Domine,  
et secundum judicium tuum vivifica me. ^ps-118-149

**150** Appropinquaverunt persequentes me iniquitati :  
a lege autem tua longe facti sunt. ^ps-118-150

**151** Prope es tu, Domine,  
et omnes viae tuae veritas. ^ps-118-151

**152** Initio cognovi de testimoniis tuis,  
quia in aeternum fundasti ea. ^ps-118-152

**153** **Res** Vide humilitatem meam, et eripe me,  
quia legem tuam non sum oblitus. ^ps-118-153

**154** Judica judicium meum, et redime me :  
propter eloquium tuum vivifica me. ^ps-118-154

**155** Longe a peccatoribus salus,  
quia justificationes tuas non exquisierunt. ^ps-118-155

**156** Misericordiae tuae multae, Domine ;  
secundum judicium tuum vivifica me. ^ps-118-156

**157** Multi qui persequuntur me, et tribulant me ;  
a testimoniis tuis non declinavi. ^ps-118-157

**158** Vidi praevaricantes et tabescebam,  
quia eloquia tua non custodierunt. ^ps-118-158

**159** Vide quoniam mandata tua dilexi, Domine :  
in misericordia tua vivifica me. ^ps-118-159

**160** Principium verborum tuorum veritas ;  
in aeternum omnia judicia justitiae tuae. ^ps-118-160

**161** **Sin** Principes persecuti sunt me gratis,  
et a verbis tuis formidavit cor meum. ^ps-118-161

**162** Laetabor ego super eloquia tua,  
sicut qui invenit spolia multa. ^ps-118-162

**163** Iniquitatem odio habui, et abominatus sum,  
legem autem tuam dilexi. ^ps-118-163

**164** Septies in die laudem dixi tibi,  
super judicia justitiae tuae. ^ps-118-164

**165** Pax multa diligentibus legem tuam,  
et non est illis scandalum. ^ps-118-165

**166** Exspectabam salutare tuum, Domine,  
et mandata tua dilexi. ^ps-118-166

**167** Custodivit anima mea testimonia tua,  
et dilexit ea vehementer. ^ps-118-167

**168** Servavi mandata tua et testimonia tua,  
quia omnes viae meae in conspectu tuo. ^ps-118-168

**169** **Tau** Appropinquet deprecatio mea in conspectu tuo, Domine ;  
juxta eloquium tuum da mihi intellectum. ^ps-118-169

**170** Intret postulatio mea in conspectu tuo ;  
secundum eloquium tuum eripe me. ^ps-118-170

**171** Eructabunt labia mea hymnum,  
cum docueris me justificationes tuas. ^ps-118-171

**172** Pronuntiabit lingua mea eloquium tuum,  
quia omnia mandata tua aequitas. ^ps-118-172

**173** Fiat manus tua ut salvet me,  
quoniam mandata tua elegi. ^ps-118-173

**174** Concupivi salutare tuum, Domine,  
et lex tua meditatio mea est. ^ps-118-174

**175** Vivet anima mea, et laudabit te,  
et judicia tua adjuvabunt me. ^ps-118-175

**176** Erravi sicut ovis quae periit : quaere servum tuum,  
quia mandata tua non sum oblitus. ^ps-118-176

## Capítulo 119

**1** Canticum graduum. Ad Dominum cum tribularer clamavi,  
et exaudivit me. ^ps-119-1

**2** Domine, libera animam meam a labiis iniquis  
et a lingua dolosa. ^ps-119-2

**3** Quid detur tibi, aut quid apponatur tibi  
ad linguam dolosam ? ^ps-119-3

**4** Sagittae potentis acutae,  
cum carbonibus desolatoriis. ^ps-119-4

**5** Heu mihi, quia incolatus meus prolongatus est !  
habitavi cum habitantibus Cedar ; ^ps-119-5

**6** multum incola fuit anima mea. ^ps-119-6

**7** Cum his qui oderunt pacem eram pacificus ;  
cum loquebar illis, impugnabant me gratis. ^ps-119-7

## Capítulo 120

**1** Canticum graduum. Levavi oculos meos in montes,  
unde veniet auxilium mihi. ^ps-120-1

**2** Auxilium meum a Domino,  
qui fecit caelum et terram. ^ps-120-2

**3** Non det in commotionem pedem tuum,  
neque dormitet qui custodit te. ^ps-120-3

**4** Ecce non dormitabit neque dormiet  
qui custodit Israël. ^ps-120-4

**5** Dominus custodit te ;  
Dominus protectio tua super manum dexteram tuam. ^ps-120-5

**6** Per diem sol non uret te,  
neque luna per noctem. ^ps-120-6

**7** Dominus custodit te ab omni malo ;  
custodiat animam tuam Dominus. ^ps-120-7

**8** Dominus custodiat introitum tuum et exitum tuum,  
ex hoc nunc et usque in saeculum. ^ps-120-8

## Capítulo 121

**1** Canticum graduum. Laetatus sum in his quae dicta sunt mihi :  
In domum Domini ibimus. ^ps-121-1

**2** Stantes erant pedes nostri  
in atriis tuis, Jerusalem. ^ps-121-2

**3** Jerusalem, quae aedificatur ut civitas,  
cujus participatio ejus in idipsum. ^ps-121-3

**4** Illuc enim ascenderunt tribus, tribus Domini :  
testimonium Israël,  
ad confitendum nomini Domini. ^ps-121-4

**5** Quia illic sederunt sedes in judicio,  
sedes super domum David. ^ps-121-5

**6** Rogate quae ad pacem sunt Jerusalem,  
et abundantia diligentibus te. ^ps-121-6

**7** Fiat pax in virtute tua,  
et abundantia in turribus tuis. ^ps-121-7

**8** Propter fratres meos et proximos meos,  
loquebar pacem de te. ^ps-121-8

**9** Propter domum Domini Dei nostri,  
quaesivi bona tibi. ^ps-121-9

## Capítulo 122

**1** Canticum graduum. Ad te levavi oculos meos,  
qui habitas in caelis. ^ps-122-1

**2** Ecce sicut oculi servorum  
in manibus dominorum suorum ;  
sicut oculi ancillae  
in manibus dominae suae :  
ita oculi nostri ad Dominum Deum nostrum,  
donec misereatur nostri. ^ps-122-2

**3** Miserere nostri, Domine, miserere nostri,  
quia multum repleti sumus despectione ; ^ps-122-3

**4** quia multum repleta est anima nostra  
opprobrium abundantibus, et despectio superbis. ^ps-122-4

## Capítulo 123

**1** Canticum graduum. Nisi quia Dominus erat in nobis,  
dicat nunc Israël, ^ps-123-1

**2** nisi quia Dominus erat in nobis :  
cum exsurgerent homines in nos, ^ps-123-2

**3** forte vivos deglutissent nos ;  
cum irasceretur furor eorum in nos, ^ps-123-3

**4** forsitan aqua absorbuisset nos ; ^ps-123-4

**5** torrentem pertransivit anima nostra ;  
forsitan pertransisset anima nostra  
aquam intolerabilem. ^ps-123-5

**6** Benedictus Dominus, qui non dedit nos  
in captionem dentibus eorum. ^ps-123-6

**7** Anima nostra sicut passer erepta est  
de laqueo venantium ;  
laqueus contritus est,  
et nos liberati sumus. ^ps-123-7

**8** Adjutorium nostrum in nomine Domini,  
qui fecit caelum et terram. ^ps-123-8

## Capítulo 124

**1** Canticum graduum. Qui confidunt in Domino, sicut mons Sion :  
non commovebitur in aeternum,  
qui habitat ^ps-124-1

**2** in Jerusalem.  
Montes in circuitu ejus ;  
et Dominus in circuitu populi sui,  
ex hoc nunc et usque in saeculum. ^ps-124-2

**3** Quia non relinquet Dominus virgam peccatorum  
super sortem justorum :  
ut non extendant justi  
ad iniquitatem manus suas, ^ps-124-3

**4** benefac, Domine, bonis,  
et rectis corde. ^ps-124-4

**5** Declinantes autem in obligationes,  
adducet Dominus cum operantibus iniquitatem.  
Pax super Israël ! ^ps-124-5

## Capítulo 125

**1** Canticum graduum. In convertendo Dominus captivitatem Sion,  
facti sumus sicut consolati. ^ps-125-1

**2** Tunc repletum est gaudio os nostrum,  
et lingua nostra exsultatione.  
Tunc dicent inter gentes :  
Magnificavit Dominus facere cum eis. ^ps-125-2

**3** Magnificavit Dominus facere nobiscum ;  
facti sumus laetantes. ^ps-125-3

**4** Converte, Domine, captivitatem nostram,  
sicut torrens in austro. ^ps-125-4

**5** Qui seminant in lacrimis,  
in exsultatione metent. ^ps-125-5

**6** Euntes ibant et flebant,  
mittentes semina sua.  
Venientes autem venient cum exsultatione,  
portantes manipulos suos. ^ps-125-6

## Capítulo 126

**1** Canticum graduum Salomonis. Nisi Dominus aedificaverit domum,  
in vanum laboraverunt qui aedificant eam.  
Nisi Dominus custodierit civitatem,  
frustra vigilat qui custodit eam. ^ps-126-1

**2** Vanum est vobis ante lucem surgere :  
surgite postquam sederitis,  
qui manducatis panem doloris.  
Cum dederit dilectis suis somnum, ^ps-126-2

**3** ecce haereditas Domini, filii ;  
merces, fructus ventris. ^ps-126-3

**4** Sicut sagittae in manu potentis,  
ita filii excussorum. ^ps-126-4

**5** Beatus vir qui implevit desiderium suum ex ipsis :  
non confundetur cum loquetur inimicis suis in porta. ^ps-126-5

## Capítulo 127

**1** Canticum graduum. Beati omnes qui timent Dominum,  
qui ambulant in viis ejus. ^ps-127-1

**2** Labores manuum tuarum quia manducabis :  
beatus es, et bene tibi erit. ^ps-127-2

**3** Uxor tua sicut vitis abundans  
in lateribus domus tuae ;  
filii tui sicut novellae olivarum  
in circuitu mensae tuae. ^ps-127-3

**4** Ecce sic benedicetur homo  
qui timet Dominum. ^ps-127-4

**5** Benedicat tibi Dominus ex Sion,  
et videas bona Jerusalem omnibus diebus vitae tuae. ^ps-127-5

**6** Et videas filios filiorum tuorum :  
pacem super Israël. ^ps-127-6

## Capítulo 128

**1** Canticum graduum. Saepe expugnaverunt me a juventute mea,  
dicat nunc Israël ; ^ps-128-1

**2** saepe expugnaverunt me a juventute mea :  
etenim non potuerunt mihi. ^ps-128-2

**3** Supra dorsum meum fabricaverunt peccatores ;  
prolongaverunt iniquitatem suam. ^ps-128-3

**4** Dominus justus  
concidit cervices peccatorum. ^ps-128-4

**5** Confundantur, et convertantur retrorsum  
omnes qui oderunt Sion. ^ps-128-5

**6** Fiant sicut foenum tectorum,  
quod priusquam evellatur exaruit : ^ps-128-6

**7** de quo non implevit manum suam qui metit,  
et sinum suum qui manipulos colligit. ^ps-128-7

**8** Et non dixerunt qui praeteribant :  
Benedictio Domini super vos.  
Benediximus vobis in nomine Domini. ^ps-128-8

## Capítulo 129

**1** Canticum graduum. De profundis clamavi ad te, Domine ; ^ps-129-1

**2** Domine, exaudi vocem meam.  
Fiant aures tuae intendentes in vocem deprecationis meae. ^ps-129-2

**3** Si iniquitates observaveris, Domine,  
Domine, quis sustinebit ? ^ps-129-3

**4** Quia apud te propitiatio est ;  
et propter legem tuam sustinui te, Domine.  
Sustinuit anima mea in verbo ejus : ^ps-129-4

**5** speravit anima mea in Domino. ^ps-129-5

**6** A custodia matutina usque ad noctem,  
speret Israël in Domino. ^ps-129-6

**7** Quia apud Dominum misericordia,  
et copiosa apud eum redemptio. ^ps-129-7

**8** Et ipse redimet Israël  
ex omnibus iniquitatibus ejus. ^ps-129-8

## Capítulo 130

**1** Canticum graduum David. Domine, non est exaltatum cor meum,  
neque elati sunt oculi mei,  
neque ambulavi in magnis,  
neque in mirabilibus super me. ^ps-130-1

**2** Si non humiliter sentiebam,  
sed exaltavi animam meam :  
sicut ablactatus est super matre sua,  
ita retributio in anima mea. ^ps-130-2

**3** Speret Israël in Domino,  
ex hoc nunc et usque in saeculum. ^ps-130-3

## Capítulo 131

**1** Canticum graduum. Memento, Domine, David,  
et omnis mansuetudinis ejus : ^ps-131-1

**2** sicut juravit Domino ;  
votum vovit Deo Jacob : ^ps-131-2

**3** Si introiero in tabernaculum domus meae ;  
si ascendero in lectum strati mei ; ^ps-131-3

**4** si dedero somnum oculis meis,  
et palpebris meis dormitationem, ^ps-131-4

**5** et requiem temporibus meis,  
donec inveniam locum Domino,  
tabernaculum Deo Jacob. ^ps-131-5

**6** Ecce audivimus eam in Ephrata ;  
invenimus eam in campis silvae. ^ps-131-6

**7** Introibimus in tabernaculum ejus ;  
adorabimus in loco ubi steterunt pedes ejus. ^ps-131-7

**8** Surge, Domine, in requiem tuam,  
tu et arca sanctificationis tuae. ^ps-131-8

**9** Sacerdotes tui induantur justitiam,  
et sancti tui exsultent. ^ps-131-9

**10** Propter David servum tuum  
non avertas faciem christi tui. ^ps-131-10

**11** Juravit Dominus David veritatem,  
et non frustrabitur eam :  
De fructu ventris tui  
ponam super sedem tuam. ^ps-131-11

**12** Si custodierint filii tui testamentum meum,  
et testimonia mea haec quae docebo eos,  
et filii eorum usque in saeculum  
sedebunt super sedem tuam. ^ps-131-12

**13** Quoniam elegit Dominus Sion :  
elegit eam in habitationem sibi. ^ps-131-13

**14** Haec requies mea in saeculum saeculi ;  
hic habitabo, quoniam elegi eam. ^ps-131-14

**15** Viduam ejus benedicens benedicam ;  
pauperes ejus saturabo panibus. ^ps-131-15

**16** Sacerdotes ejus induam salutari,  
et sancti ejus exsultatione exsultabunt. ^ps-131-16

**17** Illuc producam cornu David ;  
paravi lucernam christo meo. ^ps-131-17

**18** Inimicos ejus induam confusione ;  
super ipsum autem efflorebit sanctificatio mea. ^ps-131-18

## Capítulo 132

**1** Canticum graduum David. Ecce quam bonum et quam jucundum,  
habitare fratres in unum ! ^ps-132-1

**2** Sicut unguentum in capite,  
quod descendit in barbam, barbam Aaron,  
quod descendit in oram vestimenti ejus ; ^ps-132-2

**3** sicut ros Hermon,  
qui descendit in montem Sion.  
Quoniam illic mandavit Dominus benedictionem,  
et vitam usque in saeculum. ^ps-132-3

## Capítulo 133

**1** Canticum graduum. Ecce nunc benedicite Dominum, omnes servi Domini :  
qui statis in domo Domini,  
in atriis domus Dei nostri. ^ps-133-1

**2** In noctibus extollite manus vestras in sancta,  
et benedicite Dominum. ^ps-133-2

**3** Benedicat te Dominus ex Sion,  
qui fecit caelum et terram. ^ps-133-3

## Capítulo 134

**1** Alleluja. Laudate nomen Domini ;  
laudate, servi, Dominum : ^ps-134-1

**2** qui statis in domo Domini,  
in atriis domus Dei nostri. ^ps-134-2

**3** Laudate Dominum, quia bonus Dominus ;  
psallite nomini ejus, quoniam suave. ^ps-134-3

**4** Quoniam Jacob elegit sibi Dominus ;  
Israël in possessionem sibi. ^ps-134-4

**5** Quia ego cognovi quod magnus est Dominus,  
et Deus noster prae omnibus diis. ^ps-134-5

**6** Omnia quaecumque voluit Dominus fecit,  
in caelo, in terra, in mari et in omnibus abyssis. ^ps-134-6

**7** Educens nubes ab extremo terrae,  
fulgura in pluviam fecit ;  
qui producit ventos de thesauris suis. ^ps-134-7

**8** Qui percussit primogenita Aegypti,  
ab homine usque ad pecus. ^ps-134-8

**9** Et misit signa et prodigia in medio tui, Aegypte :  
in Pharaonem, et in omnes servos ejus. ^ps-134-9

**10** Qui percussit gentes multas,  
et occidit reges fortes : ^ps-134-10

**11** Sehon, regem Amorrhaeorum, et Og, regem Basan,  
et omnia regna Chanaan : ^ps-134-11

**12** et dedit terram eorum haereditatem,  
haereditatem Israël populo suo. ^ps-134-12

**13** Domine, nomen tuum in aeternum ;  
Domine, memoriale tuum in generationem et generationem. ^ps-134-13

**14** Quia judicabit Dominus populum suum,  
et in servis suis deprecabitur. ^ps-134-14

**15** Simulacra gentium argentum et aurum,  
opera manuum hominum. ^ps-134-15

**16** Os habent, et non loquentur ;  
oculos habent, et non videbunt. ^ps-134-16

**17** Aures habent, et non audient ;  
neque enim est spiritus in ore ipsorum. ^ps-134-17

**18** Similes illis fiant qui faciunt ea,  
et omnes qui confidunt in eis. ^ps-134-18

**19** Domus Israël, benedicite Domino ;  
domus Aaron, benedicite Domino. ^ps-134-19

**20** Domus Levi, benedicite Domino ;  
qui timetis Dominum, benedicite Domino. ^ps-134-20

**21** Benedictus Dominus ex Sion,  
qui habitat in Jerusalem. ^ps-134-21

## Capítulo 135

**1** Alleluja. Confitemini Domino, quoniam bonus,  
quoniam in aeternum misericordia ejus. ^ps-135-1

**2** Confitemini Deo deorum,  
quoniam in aeternum misericordia ejus. ^ps-135-2

**3** Confitemini Domino dominorum,  
quoniam in aeternum misericordia ejus. ^ps-135-3

**4** Qui facit mirabilia magna solus,  
quoniam in aeternum misericordia ejus. ^ps-135-4

**5** Qui fecit caelos in intellectu,  
quoniam in aeternum misericordia ejus. ^ps-135-5

**6** Qui firmavit terram super aquas,  
quoniam in aeternum misericordia ejus. ^ps-135-6

**7** Qui fecit luminaria magna,  
quoniam in aeternum misericordia ejus : ^ps-135-7

**8** solem in potestatem diei,  
quoniam in aeternum misericordia ejus ; ^ps-135-8

**9** lunam et stellas in potestatem noctis,  
quoniam in aeternum misericordia ejus. ^ps-135-9

**10** Qui percussit Aegyptum cum primogenitis eorum,  
quoniam in aeternum misericordia ejus. ^ps-135-10

**11** Qui eduxit Israël de medio eorum,  
quoniam in aeternum misericordia ejus, ^ps-135-11

**12** in manu potenti et brachio excelso,  
quoniam in aeternum misericordia ejus. ^ps-135-12

**13** Qui divisit mare Rubrum in divisiones,  
quoniam in aeternum misericordia ejus ; ^ps-135-13

**14** et eduxit Israël per medium ejus,  
quoniam in aeternum misericordia ejus ; ^ps-135-14

**15** et excussit Pharaonem et virtutem ejus in mari Rubro,  
quoniam in aeternum misericordia ejus. ^ps-135-15

**16** Qui traduxit populum suum per desertum,  
quoniam in aeternum misericordia ejus. ^ps-135-16

**17** Qui percussit reges magnos,  
quoniam in aeternum misericordia ejus ; ^ps-135-17

**18** et occidit reges fortes,  
quoniam in aeternum misericordia ejus : ^ps-135-18

**19** Sehon, regem Amorrhaeorum,  
quoniam in aeternum misericordia ejus ; ^ps-135-19

**20** et Og, regem Basan,  
quoniam in aeternum misericordia ejus : ^ps-135-20

**21** et dedit terram eorum haereditatem,  
quoniam in aeternum misericordia ejus ; ^ps-135-21

**22** haereditatem Israël, servo suo,  
quoniam in aeternum misericordia ejus. ^ps-135-22

**23** Quia in humilitate nostra memor fuit nostri,  
quoniam in aeternum misericordia ejus ; ^ps-135-23

**24** et redemit nos ab inimicis nostris,  
quoniam in aeternum misericordia ejus. ^ps-135-24

**25** Qui dat escam omni carni,  
quoniam in aeternum misericordia ejus. ^ps-135-25

**26** Confitemini Deo caeli,  
quoniam in aeternum misericordia ejus.  
Confitemini Domino dominorum,  
quoniam in aeternum misericordia ejus. ^ps-135-26

## Capítulo 136

**1** Psalmus David, Jeremiae. Super flumina Babylonis illic sedimus et flevimus,  
cum recordaremur Sion. ^ps-136-1

**2** In salicibus in medio ejus  
suspendimus organa nostra : ^ps-136-2

**3** quia illic interrogaverunt nos, qui captivos duxerunt nos,  
verba cantionum ;  
et qui abduxerunt nos :  
Hymnum cantate nobis de canticis Sion. ^ps-136-3

**4** Quomodo cantabimus canticum Domini  
in terra aliena ? ^ps-136-4

**5** Si oblitus fuero tui, Jerusalem,  
oblivioni detur dextera mea. ^ps-136-5

**6** Adhaereat lingua mea faucibus meis,  
si non meminero tui ;  
si non proposuero Jerusalem  
in principio laetitiae meae. ^ps-136-6

**7** Memor esto, Domine, filiorum Edom,  
in die Jerusalem :  
qui dicunt : Exinanite, exinanite  
usque ad fundamentum in ea. ^ps-136-7

**8** Filia Babylonis misera ! beatus qui retribuet tibi  
retributionem tuam quam retribuisti nobis. ^ps-136-8

**9** Beatus qui tenebit,  
et allidet parvulos tuos ad petram. ^ps-136-9

## Capítulo 137

**1** Ipsi David. Confitebor tibi, Domine, in toto corde meo,  
quoniam audisti verba oris mei.  
In conspectu angelorum psallam tibi ; ^ps-137-1

**2** adorabo ad templum sanctum tuum,  
et confitebor nomini tuo :  
super misericordia tua et veritate tua ;  
quoniam magnificasti super omne, nomen sanctum tuum. ^ps-137-2

**3** In quacumque die invocavero te, exaudi me ;  
multiplicabis in anima mea virtutem. ^ps-137-3

**4** Confiteantur tibi, Domine, omnes reges terrae,  
quia audierunt omnia verba oris tui. ^ps-137-4

**5** Et cantent in viis Domini,  
quoniam magna est gloria Domini ; ^ps-137-5

**6** quoniam excelsus Dominus, et humilia respicit,  
et alta a longe cognoscit. ^ps-137-6

**7** Si ambulavero in medio tribulationis, vivificabis me ;  
et super iram inimicorum meorum extendisti manum tuam,  
et salvum me fecit dextera tua. ^ps-137-7

**8** Dominus retribuet pro me.  
Domine, misericordia tua in saeculum ;  
opera manuum tuarum ne despicias. ^ps-137-8

## Capítulo 138

**1** In finem, psalmus David. Domine, probasti me, et cognovisti me ; ^ps-138-1

**2** tu cognovisti sessionem meam et resurrectionem meam. ^ps-138-2

**3** Intellexisti cogitationes meas de longe ;  
semitam meam et funiculum meum investigasti : ^ps-138-3

**4** et omnes vias meas praevidisti,  
quia non est sermo in lingua mea. ^ps-138-4

**5** Ecce, Domine, tu cognovisti omnia,  
novissima et antiqua.  
Tu formasti me, et posuisti super me manum tuam. ^ps-138-5

**6** Mirabilis facta est scientia tua ex me ;  
confortata est, et non potero ad eam. ^ps-138-6

**7** Quo ibo a spiritu tuo ?  
et quo a facie tua fugiam ? ^ps-138-7

**8** Si ascendero in caelum, tu illic es ;  
si descendero in infernum, ades. ^ps-138-8

**9** Si sumpsero pennas meas diluculo,  
et habitavero in extremis maris, ^ps-138-9

**10** etenim illuc manus tua deducet me,  
et tenebit me dextera tua. ^ps-138-10

**11** Et dixi : Forsitan tenebrae conculcabunt me ;  
et nox illuminatio mea in deliciis meis. ^ps-138-11

**12** Quia tenebrae non obscurabuntur a te,  
et nox sicut dies illuminabitur :  
sicut tenebrae ejus, ita et lumen ejus. ^ps-138-12

**13** Quia tu possedisti renes meos ;  
suscepisti me de utero matris meae. ^ps-138-13

**14** Confitebor tibi, quia terribiliter magnificatus es ;  
mirabilia opera tua, et anima mea cognoscit nimis. ^ps-138-14

**15** Non est occultatum os meum a te, quod fecisti in occulto ;  
et substantia mea in inferioribus terrae. ^ps-138-15

**16** Imperfectum meum viderunt oculi tui,  
et in libro tuo omnes scribentur.  
Dies formabuntur, et nemo in eis. ^ps-138-16

**17** Mihi autem nimis honorificati sunt amici tui, Deus ;  
nimis confortatus est principatus eorum. ^ps-138-17

**18** Dinumerabo eos, et super arenam multiplicabuntur.  
Exsurrexi, et adhuc sum tecum. ^ps-138-18

**19** Si occideris, Deus, peccatores,  
viri sanguinum, declinate a me : ^ps-138-19

**20** quia dicitis in cogitatione :  
Accipient in vanitate civitates tuas. ^ps-138-20

**21** Nonne qui oderunt te, Domine, oderam,  
et super inimicos tuos tabescebam ? ^ps-138-21

**22** Perfecto odio oderam illos,  
et inimici facti sunt mihi. ^ps-138-22

**23** Proba me, Deus, et scito cor meum ;  
interroga me, et cognosce semitas meas. ^ps-138-23

**24** Et vide si via iniquitatis in me est,  
et deduc me in via aeterna. ^ps-138-24

## Capítulo 139

**1** In finem. Psalmus David. ^ps-139-1

**2** Eripe me, Domine, ab homine malo ;  
a viro iniquo eripe me. ^ps-139-2

**3** Qui cogitaverunt iniquitates in corde,  
tota die constituebant praelia. ^ps-139-3

**4** Acuerunt linguas suas sicut serpentis ;  
venenum aspidum sub labiis eorum. ^ps-139-4

**5** Custodi me, Domine, de manu peccatoris,  
et ab hominibus iniquis eripe me.  
Qui cogitaverunt supplantare gressus meos : ^ps-139-5

**6** absconderunt superbi laqueum mihi.  
Et funes extenderunt in laqueum ;  
juxta iter, scandalum posuerunt mihi. ^ps-139-6

**7** Dixi Domino : Deus meus es tu ;  
exaudi, Domine, vocem deprecationis meae. ^ps-139-7

**8** Domine, Domine, virtus salutis meae,  
obumbrasti super caput meum in die belli. ^ps-139-8

**9** Ne tradas me, Domine, a desiderio meo peccatori :  
cogitaverunt contra me ;  
ne derelinquas me, ne forte exaltentur. ^ps-139-9

**10** Caput circuitus eorum :  
labor labiorum ipsorum operiet eos. ^ps-139-10

**11** Cadent super eos carbones ;  
in ignem dejicies eos :  
in miseriis non subsistent. ^ps-139-11

**12** Vir linguosus non dirigetur in terra ;  
virum injustum mala capient in interitu. ^ps-139-12

**13** Cognovi quia faciet Dominus judicium inopis,  
et vindictam pauperum. ^ps-139-13

**14** Verumtamen justi confitebuntur nomini tuo,  
et habitabunt recti cum vultu tuo. ^ps-139-14

## Capítulo 140

**1** Psalmus David. Domine, clamavi ad te : exaudi me ;  
intende voci meae, cum clamavero ad te. ^ps-140-1

**2** Dirigatur oratio mea sicut incensum in conspectu tuo ;  
elevatio manuum mearum sacrificium vespertinum. ^ps-140-2

**3** Pone, Domine, custodiam ori meo,  
et ostium circumstantiae labiis meis. ^ps-140-3

**4** Non declines cor meum in verba malitiae,  
ad excusandas excusationes in peccatis ;  
cum hominibus operantibus iniquitatem,  
et non communicabo cum electis eorum. ^ps-140-4

**5** Corripiet me justus in misericordia, et increpabit me :  
oleum autem peccatoris non impinguet caput meum.  
Quoniam adhuc et oratio mea in beneplacitis eorum : ^ps-140-5

**6** absorpti sunt juncti petrae judices eorum.  
Audient verba mea, quoniam potuerunt. ^ps-140-6

**7** Sicut crassitudo terrae erupta est super terram,  
dissipata sunt ossa nostra secus infernum. ^ps-140-7

**8** Quia ad te, Domine, Domine, oculi mei ;  
in te speravi, non auferas animam meam. ^ps-140-8

**9** Custodi me a laqueo quem statuerunt mihi,  
et a scandalis operantium iniquitatem. ^ps-140-9

**10** Cadent in retiaculo ejus peccatores :  
singulariter sum ego, donec transeam. ^ps-140-10

## Capítulo 141

**1** Intellectus David, cum esset in spelunca, oratio. ^ps-141-1

**2** Voce mea ad Dominum clamavi,  
voce mea ad Dominum deprecatus sum. ^ps-141-2

**3** Effundo in conspectu ejus orationem meam,  
et tribulationem meam ante ipsum pronuntio : ^ps-141-3

**4** in deficiendo ex me spiritum meum,  
et tu cognovisti semitas meas.  
In via hac qua ambulabam  
absconderunt laqueum mihi. ^ps-141-4

**5** Considerabam ad dexteram, et videbam,  
et non erat qui cognosceret me :  
periit fuga a me,  
et non est qui requirat animam meam. ^ps-141-5

**6** Clamavi ad te, Domine ;  
dixi : Tu es spes mea,  
portio mea in terra viventium. ^ps-141-6

**7** Intende ad deprecationem meam,  
quia humiliatus sum nimis.  
Libera me a persequentibus me,  
quia confortati sunt super me. ^ps-141-7

**8** Educ de custodia animam meam  
ad confitendum nomini tuo ;  
me exspectant justi donec retribuas mihi. ^ps-141-8

## Capítulo 142

**1** Psalmus David, quando persequebatur eum Absalom filius ejus. Domine, exaudi orationem meam ;  
auribus percipe obsecrationem meam in veritate tua ;  
exaudi me in tua justitia. ^ps-142-1

**2** Et non intres in judicium cum servo tuo,  
quia non justificabitur in conspectu tuo omnis vivens. ^ps-142-2

**3** Quia persecutus est inimicus animam meam ;  
humiliavit in terra vitam meam ;  
collocavit me in obscuris, sicut mortuos saeculi. ^ps-142-3

**4** Et anxiatus est super me spiritus meus ;  
in me turbatum est cor meum. ^ps-142-4

**5** Memor fui dierum antiquorum ;  
meditatus sum in omnibus operibus tuis :  
in factis manuum tuarum meditabar. ^ps-142-5

**6** Expandi manus meas ad te ;  
anima mea sicut terra sine aqua tibi. ^ps-142-6

**7** Velociter exaudi me, Domine ;  
defecit spiritus meus.  
Non avertas faciem tuam a me,  
et similis ero descendentibus in lacum. ^ps-142-7

**8** Auditam fac mihi mane misericordiam tuam,  
quia in te speravi.  
Notam fac mihi viam in qua ambulem,  
quia ad te levavi animam meam. ^ps-142-8

**9** Eripe me de inimicis meis, Domine :  
ad te confugi. ^ps-142-9

**10** Doce me facere voluntatem tuam,  
quia Deus meus es tu.  
Spiritus tuus bonus deducet me in terram rectam. ^ps-142-10

**11** Propter nomen tuum, Domine, vivificabis me :  
in aequitate tua, educes de tribulatione animam meam, ^ps-142-11

**12** et in misericordia tua disperdes inimicos meos,  
et perdes omnes qui tribulant animam meam,  
quoniam ego servus tuus sum. ^ps-142-12

## Capítulo 143

**1** Psalmus David. Adversus Goliath. Benedictus Dominus Deus meus,  
qui docet manus meas ad praelium,  
et digitos meos ad bellum. ^ps-143-1

**2** Misericordia mea et refugium meum ;  
susceptor meus et liberator meus ;  
protector meus, et in ipso speravi,  
qui subdit populum meum sub me. ^ps-143-2

**3** Domine, quid est homo, quia innotuisti ei ?  
aut filius hominis, quia reputas eum ? ^ps-143-3

**4** Homo vanitati similis factus est ;  
dies ejus sicut umbra praetereunt. ^ps-143-4

**5** Domine, inclina caelos tuos, et descende ;  
tange montes, et fumigabunt. ^ps-143-5

**6** Fulgura coruscationem, et dissipabis eos ;  
emitte sagittas tuas, et conturbabis eos. ^ps-143-6

**7** Emitte manum tuam de alto : eripe me,  
et libera me de aquis multis,  
de manu filiorum alienorum : ^ps-143-7

**8** quorum os locutum est vanitatem,  
et dextera eorum dextera iniquitatis. ^ps-143-8

**9** Deus, canticum novum cantabo tibi ;  
in psalterio decachordo psallam tibi. ^ps-143-9

**10** Qui das salutem regibus,  
qui redemisti David servum tuum de gladio maligno, ^ps-143-10

**11** eripe me, et erue me de manu filiorum alienorum,  
quorum os locutum est vanitatem,  
et dextera eorum dextera iniquitatis. ^ps-143-11

**12** Quorum filii sicut novellae plantationes in juventute sua ;  
filiae eorum compositae,  
circumornatae ut similitudo templi. ^ps-143-12

**13** Promptuaria eorum plena, eructantia ex hoc in illud ;  
oves eorum foetosae, abundantes in egressibus suis ; ^ps-143-13

**14** boves eorum crassae.  
Non est ruina maceriae, neque transitus,  
neque clamor in plateis eorum. ^ps-143-14

**15** Beatum dixerunt populum cui haec sunt ;  
beatus populus cujus Dominus Deus ejus. ^ps-143-15

## Capítulo 144

**1** Laudatio ipsi David. Exaltabo te, Deus meus rex,  
et benedicam nomini tuo in saeculum, et in saeculum saeculi. ^ps-144-1

**2** Per singulos dies benedicam tibi,  
et laudabo nomen tuum in saeculum, et in saeculum saeculi. ^ps-144-2

**3** Magnus Dominus, et laudabilis nimis,  
et magnitudinis ejus non est finis. ^ps-144-3

**4** Generatio et generatio laudabit opera tua,  
et potentiam tuam pronuntiabunt. ^ps-144-4

**5** Magnificentiam gloriae sanctitatis tuae loquentur,  
et mirabilia tua narrabunt. ^ps-144-5

**6** Et virtutem terribilium tuorum dicent,  
et magnitudinem tuam narrabunt. ^ps-144-6

**7** Memoriam abundantiae suavitatis tuae eructabunt,  
et justitia tua exsultabunt. ^ps-144-7

**8** Miserator et misericors Dominus :  
patiens, et multum misericors. ^ps-144-8

**9** Suavis Dominus universis,  
et miserationes ejus super omnia opera ejus. ^ps-144-9

**10** Confiteantur tibi, Domine, omnia opera tua,  
et sancti tui benedicant tibi. ^ps-144-10

**11** Gloriam regni tui dicent,  
et potentiam tuam loquentur : ^ps-144-11

**12** ut notam faciant filiis hominum potentiam tuam,  
et gloriam magnificentiae regni tui. ^ps-144-12

**13** Regnum tuum regnum omnium saeculorum ;  
et dominatio tua in omni generatione et generationem.  
Fidelis Dominus in omnibus verbis suis,  
et sanctus in omnibus operibus suis. ^ps-144-13

**14** Allevat Dominus omnes qui corruunt,  
et erigit omnes elisos. ^ps-144-14

**15** Oculi omnium in te sperant, Domine,  
et tu das escam illorum in tempore opportuno. ^ps-144-15

**16** Aperis tu manum tuam,  
et imples omne animal benedictione. ^ps-144-16

**17** Justus Dominus in omnibus viis suis,  
et sanctus in omnibus operibus suis. ^ps-144-17

**18** Prope est Dominus omnibus invocantibus eum,  
omnibus invocantibus eum in veritate. ^ps-144-18

**19** Voluntatem timentium se faciet,  
et deprecationem eorum exaudiet, et salvos faciet eos. ^ps-144-19

**20** Custodit Dominus omnes diligentes se,  
et omnes peccatores disperdet. ^ps-144-20

**21** Laudationem Domini loquetur os meum ;  
et benedicat omnis caro nomini sancto ejus in saeculum, et in saeculum saeculi. ^ps-144-21

## Capítulo 145

**1** Alleluja, Aggaei et Zachariae. ^ps-145-1

**2** Lauda, anima mea, Dominum.  
Laudabo Dominum in vita mea ;  
psallam Deo meo quamdiu fuero.  
Nolite confidere in principibus, ^ps-145-2

**3** in filiis hominum, in quibus non est salus. ^ps-145-3

**4** Exibit spiritus ejus, et revertetur in terram suam ;  
in illa die peribunt omnes cogitationes eorum. ^ps-145-4

**5** Beatus cujus Deus Jacob adjutor ejus,  
spes ejus in Domino Deo ipsius : ^ps-145-5

**6** qui fecit caelum et terram,  
mare, et omnia quae in eis sunt. ^ps-145-6

**7** Qui custodit veritatem in saeculum ;  
facit judicium injuriam patientibus ;  
dat escam esurientibus.  
Dominus solvit compeditos ; ^ps-145-7

**8** Dominus illuminat caecos.  
Dominus erigit elisos ;  
Dominus diligit justos. ^ps-145-8

**9** Dominus custodit advenas,  
pupillum et viduam suscipiet,  
et vias peccatorum disperdet. ^ps-145-9

**10** Regnabit Dominus in saecula ;  
Deus tuus, Sion, in generationem et generationem. ^ps-145-10

## Capítulo 146

**1** Alleluja. Laudate Dominum, quoniam bonus est psalmus ;  
Deo nostro sit jucunda, decoraque laudatio. ^ps-146-1

**2** Aedificans Jerusalem Dominus,  
dispersiones Israëlis congregabit : ^ps-146-2

**3** qui sanat contritos corde,  
et alligat contritiones eorum ; ^ps-146-3

**4** qui numerat multitudinem stellarum,  
et omnibus eis nomina vocat. ^ps-146-4

**5** Magnus Dominus noster, et magna virtus ejus,  
et sapientiae ejus non est numerus. ^ps-146-5

**6** Suscipiens mansuetos Dominus ;  
humilians autem peccatores usque ad terram. ^ps-146-6

**7** Praecinite Domino in confessione ;  
psallite Deo nostro in cithara. ^ps-146-7

**8** Qui operit caelum nubibus,  
et parat terrae pluviam ;  
qui producit in montibus foenum,  
et herbam servituti hominum ; ^ps-146-8

**9** qui dat jumentis escam ipsorum,  
et pullis corvorum invocantibus eum. ^ps-146-9

**10** Non in fortitudine equi voluntatem habebit,  
nec in tibiis viri beneplacitum erit ei. ^ps-146-10

**11** Beneplacitum est Domino super timentes eum,  
et in eis qui sperant super misericordia ejus. ^ps-146-11

## Capítulo 147

**1** Alleluja. Lauda, Jerusalem, Dominum ;  
lauda Deum tuum, Sion. ^ps-147-1

**2** Quoniam confortavit seras portarum tuarum ;  
benedixit filiis tuis in te. ^ps-147-2

**3** Qui posuit fines tuos pacem,  
et adipe frumenti satiat te. ^ps-147-3

**4** Qui emittit eloquium suum terrae :  
velociter currit sermo ejus. ^ps-147-4

**5** Qui dat nivem sicut lanam ;  
nebulam sicut cinerem spargit. ^ps-147-5

**6** Mittit crystallum suam sicut buccellas :  
ante faciem frigoris ejus quis sustinebit ? ^ps-147-6

**7** Emittet verbum suum, et liquefaciet ea ;  
flabit spiritus ejus, et fluent aquae. ^ps-147-7

**8** Qui annuntiat verbum suum Jacob,  
justitias et judicia sua Israël. ^ps-147-8

**9** Non fecit taliter omni nationi,  
et judicia sua non manifestavit eis.  
Alleluja. ^ps-147-9

## Capítulo 148

**1** Alleluja. Laudate Dominum de caelis ;  
laudate eum in excelsis. ^ps-148-1

**2** Laudate eum, omnes angeli ejus ;  
laudate eum, omnes virtutes ejus. ^ps-148-2

**3** Laudate eum, sol et luna ;  
laudate eum, omnes stellae et lumen. ^ps-148-3

**4** Laudate eum, caeli caelorum ;  
et aquae omnes quae super caelos sunt, ^ps-148-4

**5** laudent nomen Domini.  
Quia ipse dixit, et facta sunt ;  
ipse mandavit, et creata sunt. ^ps-148-5

**6** Statuit ea in aeternum, et in saeculum saeculi ;  
praeceptum posuit, et non praeteribit. ^ps-148-6

**7** Laudate Dominum de terra,  
dracones et omnes abyssi ; ^ps-148-7

**8** ignis, grando, nix, glacies, spiritus procellarum,  
quae faciunt verbum ejus ; ^ps-148-8

**9** montes, et omnes colles ;  
ligna fructifera, et omnes cedri ; ^ps-148-9

**10** bestiae, et universa pecora ;  
serpentes, et volucres pennatae ; ^ps-148-10

**11** reges terrae et omnes populi ;  
principes et omnes judices terrae ; ^ps-148-11

**12** juvenes et virgines ; senes cum junioribus,  
laudent nomen Domini : ^ps-148-12

**13** quia exaltatum est nomen ejus solius. ^ps-148-13

**14** Confessio ejus super caelum et terram ;  
et exaltavit cornu populi sui.  
Hymnus omnibus sanctis ejus ;  
filiis Israël, populo appropinquanti sibi.  
Alleluja. ^ps-148-14

## Capítulo 149

**1** Alleluja. Cantate Domino canticum novum ;  
laus ejus in ecclesia sanctorum. ^ps-149-1

**2** Laetetur Israël in eo qui fecit eum,  
et filii Sion exsultent in rege suo. ^ps-149-2

**3** Laudent nomen ejus in choro ;  
in tympano et psalterio psallant ei. ^ps-149-3

**4** Quia beneplacitum est Domino in populo suo,  
et exaltabit mansuetos in salutem. ^ps-149-4

**5** Exsultabunt sancti in gloria ;  
laetabuntur in cubilibus suis. ^ps-149-5

**6** Exaltationes Dei in gutture eorum,  
et gladii ancipites in manibus eorum : ^ps-149-6

**7** ad faciendam vindictam in nationibus,  
increpationes in populis ; ^ps-149-7

**8** ad alligandos reges eorum in compedibus,  
et nobiles eorum in manicis ferreis ; ^ps-149-8

**9** ut faciant in eis judicium conscriptum :  
gloria haec est omnibus sanctis ejus.  
Alleluja. ^ps-149-9

## Capítulo 150

**1** Alleluja. Laudate Dominum in sanctis ejus ;  
laudate eum in firmamento virtutis ejus. ^ps-150-1

**2** Laudate eum in virtutibus ejus ;  
laudate eum secundum multitudinem magnitudinis ejus. ^ps-150-2

**3** Laudate eum in sono tubae ;  
laudate eum in psalterio et cithara. ^ps-150-3

**4** Laudate eum in tympano et choro ;  
laudate eum in chordis et organo. ^ps-150-4

**5** Laudate eum in cymbalis benesonantibus ;  
laudate eum in cymbalis jubilationis. ^ps-150-5

**6** Omnis spiritus laudet Dominum !  
Alleluja. ^ps-150-6