---
id: targum-escritos-mg-19-salmos
type: primary_text
title: Salmos (Targum dos Escritos)
original_title: תהלים
base_edition: Targum dos Escritos (Ketuvim), texto das Mikraot Gedolot (a Bíblia rabínica), na digitalização do Sefaria
language: arc
tags:
- bible
- targum
- targum-ketuvim
- aramaic
- writings
- tanakh
status: draft
project: pedra_angular
reference_system: verse
abbrev: Sl
book_number: 19
urn_work: urn:cts:pedraAngular:bible.Ps
urn: urn:cts:pedraAngular:bible.Ps.targum-arc1
source: Sefaria-Export (sefaria.org), versão "Mikraot Gedolot" de "Aramaic Targum to Psalms", lida em 2026-10-10.
source_repo: Sefaria/Sefaria-Export
source_file: json/Tanakh/Targum/Aramaic Targum/Writings/Aramaic Targum to Psalms/Hebrew/Mikraot Gedolot.json
license: public-domain
publishable: true
processing: JSON do Sefaria-Export posto na forma das Bíblias do acervo por Διαφορεύς, Claude Opus 5.5, em 2026-10-10 (sefaria_para_acervo.py). Nenhuma normalização de grafia ou de vocalização; saíram só os espaços nas pontas do versículo e a marcação small da fonte (o texto que ela envolvia ficou).
---

# Salmos — תרגום כתובים

## Capítulo 1

**1** טוּבֵיהּ דִגְבַר דְלָא הַלִיךְ בְּמִלְכַּת רַשִׁיעִין וּבְאוֹרְחַת חַיָבִין לָא קָם וּבְסִיעַת מְמִקְנֵי לָא אִסְתְּחַר: ^sl-1-1

**2** אֱלָהֵן בְּנִימוּסָא דַייָ רְעוּתֵיהּ וּבְאוֹרַיְתֵיהּ מְרַנֵן יֵמָם וְלֵילֵי: ^sl-1-2

**3** וִיהֵי כְּאִילָן חַיֵי דִנְצִיב עַל טְיָפֵי מוֹי דִי אִנְבֵּיהּ מְבַשֵׁל בְּעִדָנֵיהּ וְאַטְרְפוֹי לָא נָתְרִין וְכָל לַבְלְבוֹי דִמְלַבְלֵב מְגַרְגָר וּמַצְלָח: ^sl-1-3

**4** לָא מְטוּל הֵיכְנָא רַשִׁיעֵי אֱלָהֵן כְּמוֹזָא דִי תַשְׁקְפִנֵיהּ עַלְעוֹלָא: ^sl-1-4

**5** מְטוּל הֵיכְנָא לָא יִזְכּוּן רַשִׁיעֵי בְּיוֹמָא רַבָּא וְחַיָבִין בְּסִיעַת צַדִיקַיָא: ^sl-1-5

**6** מְטוּל דִגְלֵי קֳדָם יְיָ אוֹרַח צַדִיקַיָא וְאוֹרְחַתְהוֹן דְרַשִׁיעֵי תְהוֹבֵד: ^sl-1-6

## Capítulo 2

**1** לְמָה מִתְרַגְשִׁין עַמְמַיָא וְאוּמַיָא מְרַנְנִין סְרִיקוּתָא: ^sl-2-1

**2** קָיְמִין מַלְכֵי אַרְעָא וְשִׁלְטוֹנַיָא יִתְחַבְּרוּן כַּחֲדָא לְמָרָדָא קֳדָם יְיָ וּלְמִנְצֵי עַל מְשִׁיחֵיהּ: ^sl-2-2

**3** נִתְרַע יַת אֱסָרָתֵיהוֹן וְנִטְלוֹק מִנָנָא שַׁלְשְׁלָוָתֵהוֹן: ^sl-2-3

**4** דְיָתֵיב בִּשְׁמַיָא יִגְחַךְ מֵימְרָא דַייָ יִדְהַךְ לְהוֹן: ^sl-2-4

**5** הֵידֵין יְמַלֵל לְהוֹן בְּתוּקְפֵיהּ וּבְרוּגְזֵיהּ יְבַהַלְאִנוּן: ^sl-2-5

**6** וַאֲנָא רַבִּיתִי מַלְכִּי וּמַנִיתֵיהּ עַל טוּר מַקְדְשִׁי: ^sl-2-6

**7** אֶשְׁתְּעֵי קְיָמָא דַייָ אֲמַר חֲבִיב כְּבַר לְאַבָּא לִי אַנְתְּ זַכָּאָה כְּאִלוּ יוֹמָא דֵין בְּרֵיתָךְ: ^sl-2-7

**8** בְעֵי מִנִי וְאֶתֵּן נִכְסֵי עַמְמַיָא אַחְסַנְתָּךְ וַאֲחוּדָתָךְ שִׁלְטוֹנֵי סְיָפֵי אַרְעָא: ^sl-2-8

**9** תְּתַבְּרִנוּן הֵיךְ בְּחוּטְרָא דְפַרְזְלָא הֵיךְ מָאן דִפְחַר תִּתְרְעִנוּן: ^sl-2-9

**10** וּכְדֵין מַלְכַיָא אַשְׂכִּלוּ קַבִּילוּ מַרְדוּתָא נְגִידֵי אַרְעָא: ^sl-2-10

**11** פְּלָחוּ קֳדָם יְיָ בְּדַחֲלָא וְצַלוּ בִּרְתִיתָא: ^sl-2-11

**12** קַבִּילוּ אוּלְפָנָא דִלְמָא יִרְגֵיז וּתְהוֹבְדוּן אוּרְחָא מְטוּל דְיֵיחוֹר כִּזְעֵר רוּגְזֵיהּ טוּבֵיהּ לְכָל דְסָבְרִין בְּמֵימְרֵיהּ: ^sl-2-12

## Capítulo 3

**1** תֻּשְׁבַּחְתָּא לְדָוִד בְּמַעַרְקֵיהּ מִן קֳדָם אַבְשָׁלוֹם בְּרֵיהּ: ^sl-3-1

**2** יְיָ כַּמָה סַגִיאִין מְעִיקַי סַגִיאִין דְקַיְמִין עָלַי: ^sl-3-2

**3** סַגִיאִין אָמְרִין לְנַפְשִׁי לֵית פּוּרְקָנָא לֵיהּ בֵּאלָהָא לְעָלְמִין: ^sl-3-3

**4** וְאַנְתְּ יְיָ תְּרִיס עֲלֵי יְקָרִי וּמְרִים רֵישִׁי: ^sl-3-4

**5** קָלִי קֳדָם יְיָ אֲצַלֵי יְקַבֵּל צְלוֹתִי מִן טוּר בֵּית מַקְדְשֵׁיהּ לְעָלְמִין: ^sl-3-5

**6** אֲנָא שְׁכִיבֵית וּדְמַכֵית אִתְעֲרֵית מְטוּל דַיְיָ סָמִיךְ יָתִי: ^sl-3-6

**7** לָא תִדְחַל מִמַצוּתָא דְעָם דַחֲזוֹר חֲזוֹר אִתְכְּנַשׁוּ עֲלָי: ^sl-3-7

**8** קוּם יְיָ פְּרוֹק יָתִי אֱלֹהָי אֲרוּם מַחֵיתָ כָּל בַּעֲלֵי דְבָבַי עַל לִיסַתְהוֹן כַּכֵי רַשִׁיעֵי תִּבַּרְתָּ: ^sl-3-8

**9** מִן קֳדָם יְיָ פּוּרְקָנָא עַל עַמָךְ בִּרְכָתָךְ לְעָלְמִין: ^sl-3-9

## Capítulo 4

**1** לְשַׁבָּחָא עַל חִנְגִיתָא תּוּשְׁבַּחְתָּא לְדָוִד: ^sl-4-1

**2** בְּעִדָן צְלוֹתִי קַבֵּל מִנִי אֱלוֹהַּ צִדְקוֹתִי בְּעִידָן עַקְתָא אַפְתִּיתָא לִי חוּס עֲלַי וְקַבֵּל צְלוֹתִי: ^sl-4-2

**3** בְּנֵי נְשָׁא מְטוּל מֶה אַיְקָרִי לְאִתְכְּנָעוּתָא תְּרַחֲמִין סְרִקוּתָא תִּבְעוּן כַּדִיבוּתָא לְעָלְמִין: ^sl-4-3

**4** וִידַעוּן אֲרוּם פָּרִישׁ יְיָ זַכָּאָה לֵיהּ יְיָ יְקַבֵּל צְלוֹתֵיהּ דְדָוִד בְּמִקְרֵי לְוָתֵיהּ: ^sl-4-4

**5** זְעוּ מִנֵיהּ וְלָא תֶחֱטוּן אִמְרֵי בָעוּתְכוֹן בְפוּמְכוֹן וְשֵׁילַתְכוֹן בִּלְבַבְכוֹן וְצַלוּ עַל שִׁווּיֵכוֹן וְאִדְכַּרוּ יוֹם מִיתוּתָא לְעָלְמִין: ^sl-4-5

**6** כְּבַשׁוּ יִצְרְכוֹן וְיִתְחַשֵׁיב לְכוֹן כְּנִכְסַת צִדְקָא וְסַבָּרוּ עַל יְיָ: ^sl-4-6

**7** סַגִיאִין דְאָמְרִין מַן יַחֲמִינָנָא טָבָא נְשָׂא עֲלָנָא נְהוֹר סְבַר אַפָּךְ יְיָ: ^sl-4-7

**8** יְהֵבְתָּא חֶדְוָתָא בְלִבִּי מִן עִדָן דְעִבּוּרְהוֹן וְחַמְרֵהוֹן סַגִיאוּ: ^sl-4-8

**9** בִּשְׁלָמָא כַּחֲדָא אֶשְׁכּוֹב וְאֶדְמוֹךְ מִן בִּגְלַל דְאַנְתְּ הוּא יְיָ בִּלְחוֹדוֹי בְּסִבְרָא תּוֹתְבִנַנִי: ^sl-4-9

## Capítulo 5

**1** לְשַׁבָּחָא עַל חִנְגִין תּוּשְׁבַּחְתָּא לְדָוִד: ^sl-5-1

**2** מֵימְרִי אַצִית יְיָ אִתְבֵּין רִגוּגִי: ^sl-5-2

**3** צֵית לְקָל בָּעוּתִי מַלְכִּי וֵאלָהִי אֲרוּם קֳדָמָךְ אֲצַלִי: ^sl-5-3

**4** יְיָ בְּצַפְרָא שְׁמַע קָלִי בְּצַפְרָא אֲסַדֵר קֲדָמָךְ וְאֶסְתְּכֵי: ^sl-5-4

**5** מְטוּל דְלָא אֱלָהָא רָעֵי רִשְׁעָא אַנְתְּ לָא אִתּוֹתַב עִמָךְ בִּישָׁא: ^sl-5-5

**6** לָא יִתְעַתְּדוּן מְתַלְעֲבִין קֳבֵל עַיְנָךְ סְנֵיתָא כָּל עוֹבְדֵי שְׁקָר: ^sl-5-6

**7** תְּאַבֵּד מְמַלְלֵי כַדְבוּתָא אֱנָשׁ שָׁדֵי דַם זַכַּי וְנִכְלָא יְרַחֵק יְיָ: ^sl-5-7

**8** וַאֲנָא בִּסְגִיאֵי טוּבָךְ אֵעוּל לְבֵיתָךְ אֶסְגוֹד לְהֵיכְלָא דְקוּדְשָׁךְ בִּדְחַלְתָּךְ: ^sl-5-8

**9** יְיָ דַבֵּר יָתִי בְּצִדְקְתָךְ מִן בִּגְלַל תּוּשְׁבְּחִי תַּקִין קֳדָמַי אוֹרְחֲתָךְ: ^sl-5-9

**10** מְטוּל דְלֵית בְּפוּמְהוֹן דְרַשִׁיעֵי כֵיוַנְתָּא גוּפֵיהוֹן מַלְיָן אִתְרְגוּשְׁתָּא הֵיךְ שְׁיוֹל פְתִיחַ גְרוֹנְהוֹן לִישַׁנְהוֹן מְשָׁעֲעִין: ^sl-5-10

**11** חַיֵב לְהוֹן אֱלָהָא יִתְבַּטְלוּן מִמִלְכָּתְהוֹן בְּסִגְעָא מְרָדֵהוֹן אַתְקַל לְהוֹן אֲרוּם מְרַדוּ בְמֵימְרָךְ: ^sl-5-11

**12** וְיֶחְדוּן כָּל מְסַבְּרוּן בְמֵימְרָךְ לַעֲלַם יְשַׁבְּחוּן וְתַטֵל עֲלַוֵיוֹן וְיִבְדְחוּן בָךְ רַחֲמֵי שְׁמָךְ: ^sl-5-12

**13** מְטוּל דִי אַנְתְּ תְּבָרֵךְ לְצַדִיקַיָא יְיָ הֵיךְ תְּרֵיסָא רַעֲוָא טָבָא תְּכַלְלִנֵיהּ: ^sl-5-13

## Capítulo 6

**1** לְשַׁבָּחָא בִּנְגִינָתָא עַל כִּנָרָא דִתְמַנְיָא נֵימַיָא תּוּשְׁבַּחְתָּא לְדָוִד: ^sl-6-1

**2** יְיָ לָא בְּרוּגְזָךְ תַּכְנִיעֵנִי וְלָא בְּרִתְחָךְ תִּרְדֵי יָתִי: ^sl-6-2

**3** חוּס עֲלַי יְיָ מְטוּל דְחַלָשׁ אֲנָא אַסִי יָתִי יְיָ מְטוּל דְאִתְבְּהִילוּ גַרְמָי: ^sl-6-3

**4** וְנַפְשִׁי אִתְבְּהִילַת לַחֲדָא וְאַנְתְּ יְיָ עַד אֵימָתַי רְוַח לִי: ^sl-6-4

**5** תּוּב יְיָ פְּצֵי נַפְשִׁי פְּרַק לִי בִּגְלַל טוּבָךְ: ^sl-6-5

**6** מְטוּל דְלֵית בְּמוֹתָא דָכְרָנָךְ בִּשְׁאוֹל מַן יוֹדֵי לָךְ: ^sl-6-6

**7** אֶשְׁתַּלְהֵית בְּתִנְחָתִי אֲמַלֵל בְּצַעֲרִי בְּכָל לֵילְיָא עַל שִׁווּיִי בְדִמְעֲתִי דַרְגָשִׁי אַטְמֵשׁ: ^sl-6-7

**8** חַשְׁכַת מִן רוּגְזִי עַיְינַי אִתְבְּלִיאַת בְּכָל מְעִיקָי: ^sl-6-8

**9** זוּרוּ מִינִי כָּל עָבְדֵי שְׁקַר אֲרוּם שְׁמִיעַ קֳדָם יְיָ קָל בָּכוּתִי: ^sl-6-9

**10** שְׁמִיעַ קֳדָם יְיָ בָּעוּתִי יְיָ צְלוֹתִי יְקַבֵּל: ^sl-6-10

**11** יִבְהֲתוּן וְיִתְבַּהֲלוּן לַחֲדָא כּוּלְהוֹן בַעֲלֵי דְבָבִי יְתוּבוּן יִבְהֲתוֹן כְּשָׁעָא: ^sl-6-11

## Capítulo 7

**1** תַּרְגוּמָא דְאוֹדֵיתָא לְדָוִד דִי שַׁבַּח קֳדָם יְיָ מְטוּל דִי אֲמַר שִׁירָתָא עַל תְּבִירָא דְשָׁאוּל בַּר קִישׁ דְמִן שֵׁבֶט בִּנְיָמִן: ^sl-7-1

**2** יְיָ אֱלֹהַי בְּמֵימְרָךְ סַבְּרִית פְּרוֹק יָתִי מִכָּל רָדְפַי וּפְצָא יָתִי: ^sl-7-2

**3** דִלְמָא יִתַבַּר הֵיךְ אַרְיְוָתָא נַפְשִׁי יִפְשַׁח וְלֵית דְיִפְצֵי: ^sl-7-3

**4** יְיָ אֱלֹהַי אִין עֲבַדֵית שִׁירָתָא הָדָא בְּכַוַונְתָּא בִישָּׁא אִין אִית טְלוּמָא בִּידָי: ^sl-7-4

**5** אִין פַּרְעִית לִבְעֵיל שְׁלָמִי בִּישׁ וּדְחַקֵית מְעִיקַי מַגָן: ^sl-7-5

**6** יְהֵי רָדֵף בְּעֵל דְבָבָא נַפְשִׁי וְיַדְבֵּק וְיִכְבּוֹשׁ לְאַרְעָא חַיַי וִיקָרִי לְעַפְרָא יַשְׁרֵי לְעָלְמִין: ^sl-7-6

**7** קוּם יְיָ בְּתוּקְפָךְ אִתְנַטַל בְּרוּגְזָא עַל מְעִיקַי וְסַרְהֵיב לִי דִינָא דִי פַקֵדְתָּא: ^sl-7-7

**8** וּכְנִישַׁת אֻמַיָא תַּחְזְרִינָךְ וְאַמְטֻלְתָּהָא לְבֵי שְׁכִנְתָּךְ תּוּב: ^sl-7-8

**9** מֵימְרָא דַייָ יְדִין עַמְמַיָא דוֹן יָתִי יְיָ כִּזְכוּתִי וּכְשַׁלְמוּתִי פְּרַע עֲלָי: ^sl-7-9

**10** יִשְׁתֵּצֵי כְעַן בִּישָׁא דְרַשִׁיעֵי וְיִשְׁתַּכְלְלוּן צַדִיקֵי וּבָחֵן לִבְּבֵי וְכָלְיָן אֱלָהָא זַכָּאָה: ^sl-7-10

**11** תְּרֵיסִי עַל אֱלָהָא פָּרִיק תְּרִיצֵי לִבָּא: ^sl-7-11

**12** אֱלָהָא דַיָנָא זַכָּאָה וּבִתְקוֹף רָגִיז עַל רַשִׁיעֵי כָּל יוֹמָא: ^sl-7-12

**13** אִם לָא יְתוּב לִדְחַלְתֵּיהּ סַיְפֵיהּ שְׁחִיז קַשְׁתֵּיהּ מְתִיחָא וּסְדִירָא: ^sl-7-13

**14** וּמְטוּלְתֵּיהּ תַּקֵין זְיָנֵי מוֹתָא גִירוֹי לְדָלְקֵי צַדִיקַיָא יַעְבֵּיד: ^sl-7-14

**15** הָא יִצְטַעַר לִשְׁקָר וִיעֵדֵי עַמְלָא וְיֵלֵיד שִׁקְרָא: ^sl-7-15

**16** שׁוּחַ חֲפַר וְנַמְצֵיהּ וּנְפַל בְּשׁוּחֲתָא דִי עֲבָד: ^sl-7-16

**17** יְתוּב לֵעוּתֵיהּ בְּרֵישֵׁיהּ וְעַל מוֹקְדֵיהּ חֲטוֹפֵיהּ יֵחוֹת: ^sl-7-17

**18** אֲשַׁבַּח יְיָ בְּצִדְקְתֵיהּ וַאֲשַׁכַּח שׁוּם אֱלָהָא עִלָאָה: ^sl-7-18

## Capítulo 8

**1** לְשַׁבָּחָא עַל כִּנוֹרָא דְאַיְתֵי מִגַת תּוּשְׁבַּחְתָּא לְדָוִד: ^sl-8-1

**2** יְיָ אֱלָהָא רִבּוֹנָנָא כְּמָא תְלִיל שְׁמָךְ וּמְשַׁבַּח בְּכוֹלָא אַרְעָא דִיהַבְתָּא זִוָךְ עֵיל מִן שְׁמַיָא: ^sl-8-2

**3** מִפּוּם עוּלֵמַיָא וְיוֹנְקַיָא אִשְׁתֵּסְתָּא עוֹשָׁנָא מִן בִּגְלַל מְעִיקָיִךְ לְבַטָלָא בְּעֵיל דְבָבָא וְגָזוֹמָא: ^sl-8-3

**4** מְטוּל דְאֶחְמֵי שְׁמָיִךְ עוֹבָדִי אֶצְבְּעָתָךְ סִיהֲרָא וְכֹכְבַיָא דִי אַתְקֵינְתָּא: ^sl-8-4

**5** מַה בַּר נָשָׁא מִטוּל תִּדְכַּר עוֹבָדוֹי וּבַר נָשָׁא מְטוּל תִּסְעַר עֲלוֹי: ^sl-8-5

**6** וְחִסַרְתָּא יָתֵיהּ קַלִיל מִמַלְאֲכַיָא וְאַיְקָרָא וְשִׁבְהוֹרָא תֵכְלְלִנֵיהּ: ^sl-8-6

**7** אַשְׁלַטְתֵּיהּ בְּעוֹבָדֵי יְדָךְ כּוֹלָא שַׁוִיתָא תְחוֹת רִגְלוֹי: ^sl-8-7

**8** עָאן וְתוֹרֵי כוּלְהוֹן וּלְחוֹד בְּעִירֵי חַקְלָא: ^sl-8-8

**9** צִפְּרֵי שְׁמַיָא וְנוּנֵי יַמָא וְלִוְיָתָן דְחָלִיף אִסְרָטֵי יַמָא: ^sl-8-9

**10** יְיָ אֱלָהָא רִבּוֹנָנָא כְּמָה תְלִיל וּמְשַׁבַּח שְׁמָךְ בְּכוּלָא אַרְעָא: ^sl-8-10

## Capítulo 9

**1** לְשַׁבָּחָא עַל מִיתוֹתָא דְגַבְרָא דִי נְפַק מִבֵּנֵי מַשִׁרְיָתָא תּוּשְׁבַּחְתָּא לְדָוִד: ^sl-9-1

**2** אֲשַׁבַּח קֳדָם יְיָ בְּכָל לִבִּי אֶשְׁתָּעֵי כּוּלְהוֹן פְּרִישְׁוָתָךְ: ^sl-9-2

**3** אֶחְדֵי וְאֶבְדָח בְּמֵימְרָךְ אֲשַׁבַּח שְׁמָךְ עִלָאָה: ^sl-9-3

**4** בִּדְיְתוּב בְּעֵל דְבָבֵי לַאֲחוֹרָא יִתְקְלוּן וִיהוֹבְדוּן מִן קֳדָמָךְ: ^sl-9-4

**5** מְטוּל דַעֲבַדְתָּא פּוּרְעֲנוּתִי וְדִינִי יְתֵבְתָּא עַל כּוּרְסֵי דַיָנָא זַכָּאָה: ^sl-9-5

**6** נְזַפְתָּא עַמְמֵי דִפְלִשְׁתָּאֵי הוֹבַדְתָּא גָלְיַת רַשִׁיעָא שׁוּמְהוֹן מְחִיתָא לְעַלְמֵי עָלְמִין: ^sl-9-6

**7** וְכַד נְפַל בְּעֵל דְבָבָא אִשְׁתֵּצָיוּ חֶלְוָתֵיהּ וּכְרַכֵּיהוֹן אִצְתַּדְיוּ לְעַלְמָא וְקִרְוֵיהוֹן צְדִיתָא הוֹבַדְתָּא דָכְרָנְהוֹן מִנְהוֹן: ^sl-9-7

**8** וּמֵימְרָא דַייָ לְעַלְמִין מוֹתְבֵיהּ בִּשְׁמֵי מְרוֹמָא תַקִין לְדִינָא כּוּרְסֵיהּ: ^sl-9-8

**9** וְהוּא יְדֵין עַמָא דְאַרְעָא בִּזְכוּתָא יְדִין עַמְמַיָא בִּתְרִיצוּתָא: ^sl-9-9

**10** וִיהֵי מֵימְרָא דַייָ תְּקוֹף לְמַסְכְּנָא תְּקוֹף בְּעִדָנֵי עַקְתָא: ^sl-9-10

**11** וְיִסְתַּכְּלוּן בְּסַבָּרוּתָךְ יָדְעֵי שְׁמָךְ מְטוּל דְלָא שְׁבַקְתָּא תָּבְעָיִךְ יְיָ: ^sl-9-11

**12** שַׁבַּחוּ קֳדָם יְיָ דְאַשְׁרֵי שְׁכִנְתֵּיהּ בְּצִיוֹן תַּנִיאוּ בְּעַמְמַיָא עוֹבָדוֹי: ^sl-9-12

**13** מְטוּל דְתָבֵיעַ דְמָא דְזַכָּאָה יַת צַדִיקַיָא דְכִיר וְלָא שְׁלִי קְבֵלַת עִנְוְתָנִין: ^sl-9-13

**14** חוּס עֲלַי יְיָ חֲמֵי סִגוּפִי מִבַּעֲלֵי דְבָבִי מְרוֹמֵם לִי מִמַעֲלָנֵי מוֹתָא: ^sl-9-14

**15** מִן בִּגְלַל דְאִשְׁתָּעֵי לְכוּלְהוֹן שִׁבְחָתָךְ בְּמַעֲלָנֵי תַרְעֵי כְנִישַׁת צִיוֹן אַדוּץ בְּפוּרְקָנָךְ: ^sl-9-15

**16** טְבַעוּ עַמְמַיָא בְּשׁוּחֲתָא דַעֲבָדוּ בִּמְצַדְתָּא דְנָא כְּמַנוּ אִתְאֲחַדַת רִגְלֵיהוֹן: ^sl-9-16

**17** גְלֵי קֳדָם יְיָ דִין דַעֲבַד בְּעוֹבָדֵי אַיְדוֹי אִתְּקַל רַשִׁיעָא יְרַנְנוּן צַדִיקַיָא לְעָלְמִין: ^sl-9-17

**18** יְתוּבוּן רַשִׁיעֵי לִשְׁיוֹל כּוּלְהוֹן עַמְמַיָא דְאַשְׁלִיוּ דְחַלְתָּא דַיְיָ: ^sl-9-18

**19** מִטוּל דְלָא לְעָלְמַיָא מִשְׁתְּלֵי חֲשׁוֹכָא סוֹבָרָא דְעִנְוְתָנִי לָא תְהוֹבֵד לְעָלְמָא: ^sl-9-19

**20** קוּם יְיָ לָא יִתְעַשַׁן בַּר נָשָׁא רַשִׁיעָא יִתְדָנוּן עַמְמַיָא קֳדָמָךְ: ^sl-9-20

**21** שַׁוִי יְיָ דְחַלְתָּא לְהוֹן יִנְדְעוּן עַמְמַיָא דְבַר נָשׁ הִינוּן לְעָלְמִין: ^sl-9-21

## Capítulo 10

**1** לָמָה יְיָ תְּקוּם בְּרָחִיק תִּטַמַר בִּמְדוֹר קַדִישִׁין לְעִדָנֵי עַקְתָא: ^sl-10-1

**2** בְּגַסוֹת רַשִׁיעָא יִדְלַק עַנְיָא יִתְאַחְדוּן בְּנִכְלוּתָא דְנָא דִי חֲשַׁבוּ לְמֶעְבָּד: ^sl-10-2

**3** מְטוּל דְאִשְׁתַּבַּח רַשִׁיעָא עַל רִגְרוּג נַפְשֵׁיהּ דִמְבָרַךְ גַבְרָא טָלוֹמָא מַרְחַק מֵימְרָא דַיְיָ: ^sl-10-3

**4** רַשִׁיעָא בְּגַסוּת רוּחֵיהּ לָא יִתְבַּר אֱלָהָא וְיֵימַר בְּלִבֵּיהּ דְלָא גַלְיָן קֳדָם יְיָ כּוּלְהוֹן מַחְשְׁבָתוֹי: ^sl-10-4

**5** מַצְלְחִין אוֹרְחָתֵיהּ בְּכָל עִדָן רְחִיקִין דִינָךְ מִן קִבְּלֵיהּ בְּכָל מְעִיקוֹי יִזְעוֹף בְּהוֹן: ^sl-10-5

**6** יֵימַר בִּלְבָבֵיהּ לָא אָזוּעַ מִדָר לְדָר מִלְמֶעֱבַד בִּישׁ: ^sl-10-6

**7** לוּטִין פּוּמֵיהּ מְלֵי נִכְלֵי וְרַמְיוֹתָא תְּחוֹת לִישָׁנֵיהּ לֵאוֹת וּשְׁקָר: ^sl-10-7

**8** יָתֵיב בִּכְמַנֵי דְדַרְתַיָא בְּטוּמָרַיָא יִקְטוֹל זַכָּאָה עֵינוֹי לְמַסְכְּנַיָא יִטְשׁוּן: ^sl-10-8

**9** יִכְמוֹן בְּטוּמָרַיָא הֵיךְ אַרְיָא בְּמַטְלָלֵיהּ יִכְמוֹן לְמִתְפַּשׂ עַנְיָא יִתְפַּשׂ עַנְיָא בְּמִגָּרֵיהּ בִּמְצַדְתֵּיהּ: ^sl-10-9

**10** יְדַכְדַךְ וִישׁוּחַ וְיִפֹּל בִּתְקוֹף בְּמָנוֹי עַנְיָא: ^sl-10-10

**11** יֵימַר בְּלִבֵּיהּ אִתְנְשֵׁי אֱלָהָא טְמַר אַפּוֹי לָא חָמֵי לְעָלְמִין: ^sl-10-11

**12** קוּם יְיָ קַיָם שְׁבוּעַת יְדָךְ לָא תִנְשִׁי עִנְוְתָנֵי: ^sl-10-12

**13** מְטוּל מָה רָחֵיק רַשִׁיעָא אֱלָהָא יֵימַר בְּלִבֵּיהּ לָא תִתְבְּעֵי: ^sl-10-13

**14** גְלֵי קֳדָמָךְ מְטוּל דְאַנְתְּ לֵאוֹת וּרְגִיז עַל רַשִׁיעָא תַּסְעֵר אִסְתַּכַּל לְמִשְׁלַם אַגְרָא טָב לְצַדִיקַיָא בִּידָךְ עֲלָךְ יְסוֹבְרוּן עַנְיָךְ יַתֵּם אַנְתְּ הֲוֵיתָ סָעֵיד: ^sl-10-14

**15** תְּבַר אֶדְרָעֵיהוֹן דְרַשִׁיעֵי וּבִישֵׁי יִתְבְּעוּן רִשְׁעַתְהוֹן לָא יִשְׁכְּחוּ: ^sl-10-15

**16** יְיָ מְלִיךְ לְעָלְמֵי עָלְמַיָא אֲבַדוּ עַמְמֵי מֵאַרְעֵיהּ: ^sl-10-16

**17** רִיגְתָּא דְעִנְוְתָנֵי שְׁמִיעַ קֳדָמָךְ יְיָ תַּתְקֵין לִבְּהוֹן תַּצְלֵי אוּדְנָךְ: ^sl-10-17

**18** לְמִדַן יַתֵּם וְעַנְיָא לָא יוֹסִיף עוֹד תּוּב בְּנֵי נְשָׁא לְאִתְוָרָא מִן קֳדָם רַשִׁיעֵי אַרְעָא: ^sl-10-18

## Capítulo 11

**1** תּוּשְׁבַּחְתָּא לְדָוִד בְּמֵימְרָא דַייָ סַבְּרֵית הֵכְדֵין אַתּוּן אָמְרִין לְנַפְשִׁי אִטַלְטְלֵי לְטוּרָא הֵיךְ צִפָּרָא: ^sl-11-1

**2** אֲרוּם הָא רַשִׁיעֵי נַגְדִין קַשְׁתָּא מְתַקְנִין גִירֵהוֹן עַל נִימָא לְמִרְמֵי בִּקְבָלָא עֲלַוֵי תַקִינֵי לִבָּא: ^sl-11-2

**3** מְטוּל דְאִין אִשְׁיָתָא יִתְרַעוּן זַכָּאָה מְטוּלָא עֲבַד טוּבָא: ^sl-11-3

**4** יְיָ בְּהֵיכְלָא דְקוּדְשֵׁיהּ אֱלָהָא בִשְׁמֵי מְרוֹמָא כּוּרְסֵיהּ עֵינוֹי חָמְיָן תְּמוֹרוֹי מְבַחְנָן בְּנֵי נָשָׁא: ^sl-11-4

**5** אֱלָהָא צַדִיקַיָא בָחֵין וְרַשִׁיעַיָא וְרַחֲמֵי חֲטוּפִין סְנָאַת נַפְשֵׁיהּ: ^sl-11-5

**6** יָחֵית מַטְרִין דְפוּרְעָנוּ עַל רַשִׁיעֵי מַפְּחִין דְאֶשְׁתָּא וְכַבְרִיתָא וְזַעֲפָא עַלְעוֹלָא יַהֲבַת כַּלִידְהוֹן: ^sl-11-6

**7** מְטוּל דְצַדִיקָא יְיָ צִדְקוּתָא רָחֵים תְּקַנְיָא יֶחֱמוֹן סְבַר אַפּוֹי: ^sl-11-7

## Capítulo 12

**1** לְשַׁבָחָא עַל כִּנָרָא דְתַמְנַיָא נִימֵי תּוּשְׁבַּחְתָּא לְדָוִד: ^sl-12-1

**2** פְּרוֹק יְיָ מְטוּל דִגְמִירוּ טָבַיָא אֲרוּם סָפוּ מְהֵימְנַיָא מִן בְּנֵי נָשָׁא: ^sl-12-2

**3** שִׁקְרָא מְמַלְלִין אֱנָשׁ עִם חַבְרֵיהּ סִפְוָתָא שְׁעִיאָן בִּלְבָבֵהוֹן מְנַבְּלִין וּבְלִבָּא שִׁקְרָא מְמַלְלִין: ^sl-12-3

**4** יְשֵׁיצֵי יְיָ מִן עַלְמָא כָּל סִפְוָן שְׁעִיעִין לִישָׁנָא דְמַלְלָא רַבְרְבָנוּתָא: ^sl-12-4

**5** מִן דְכָפְרִין בְּעִקְרָא דְאָמְרִין בְּלִישָׁנָנָא נִתְגַבַּר סִפְוָתָנָא עִמָנָא מַן רִבּוֹן דִלָנָא: ^sl-12-5

**6** מֵאוּנְסָא דַעֲנִיֵי מִן צְוָחַת חֲשִׁיכֵי הַשְׁתָּא אֲקוּם אֲמַר יְיָ אֲשַׁוֵי פוּרְקַן וּלְרַשִׁיעֵי אַסְחֵיר בִּישׁוּתָא לְהוֹן: ^sl-12-6

**7** מִלִין דַייָ מִלַיָא דַכְיָן סִימָא סְנִינָא בְּכוּרָא עַל אַרְעָא זְקִיק שִׁבְעָתֵי זִמְנִין: ^sl-12-7

**8** אַנְתְּ יְיָ תִּנְטְרִנוּן לְצַדִיקַיָא תִּנְצְרִנוּן מִן דָרָא בִישָׁא הָדֵין לְעַלְמִין: ^sl-12-8

**9** חֲזוֹר חֲזוֹר רַשִׁיעַיָא מְהַלְכִין כַּעֲלוּקָא דְמָצְצָא דְמֵיהוֹן דִבְנֵי נָשָׁא: ^sl-12-9

## Capítulo 13

**1** לְשַׁבָּחָא תּוּשְׁבַּחְתָּא לְדָוִד: ^sl-13-1

**2** עַד אָן יְיָ תַּשְׁלִינַנִי לְעָלְמִין עַד אָן תִּטְמוֹר זִיו אַפָּךְ מִנִי: ^sl-13-2

**3** עַד אָן אֲשַׁוֵי מִלְכָּא בְּנַפְשִׁי דְוָנָא בִּלְבָבִי יְמָם עַד אָן יִתְּרָם בְּעֵל דְבָבִי עֲלָי: ^sl-13-3

**4** אִסְתַּכֵּל וְקַבֵּל צְלוֹתִי יְיָ אֱלָהִי אַנְהִיר עֵינַי בְּאוֹרַיַתָךְ דִלְמָא אֱחוֹב וְאֶדְמוּךְ עִם חַיָבֵי מוֹתָא: ^sl-13-4

**5** דִלְמָא יֵימַר יִצְרָא בִישָׁא אַשְׁלַטְתֵּיהּ מְעִיקַי יְרַנֵנוּן מְטוּל אֶסְטֵי מֵאָרְחָתָךְ: ^sl-13-5

**6** וַאֲנָא בְּטוּבָךְ אִתְרַחֲצֵית יְרַנֵן לְבָבִי בְּפוּרְקָנָךְ אֲשַׁבַּח קֳדָם יְיָ מְטוּל דִפְרִיעַ עֲלָי טָבְתָא: ^sl-13-6

## Capítulo 14

**1** לְשַׁבָּחָא בְּרוּחַ נְבוּאָה עַל דָוִד אֲמַר שַׁטְיָא בִּלְבָבֵיהּ לֵית שׁוּלְטָנָא דֶאֱלָהָא בְאַרְעָא חֲבִילוּ עוֹבָדֵיהוֹן רָחֲקוּ טָבְתָא וְאַשְׁכָּחוּ עִלָא לֵית דַעֲבַד טָב: ^sl-14-1

**2** יְיָ מִשְׁמַיָא אוֹדִיק עַל בְּנֵי נָשָׁא לְמֶחֱמֵי אִין אִית מַשְׂכִּיל תָּבַע אוּלְפַן מִן קֳדָם יְיָ: ^sl-14-2

**3** כּוּלְהוֹן זָרוּ לַאֲחוֹרָא כַּחֲדָא אִתְּרַשֵׁלוּ לֵית דְעָבַד טָב אֲפִילוּ לֵית חָד: ^sl-14-3

**4** הֲלָא יְדָעוּ כָּל עַבְדֵי שְׁקַר סָעֲדֵי עַמִי סָעֲדוּ לַחְמָא שְׁמָא דַייָ לָא בָרִיכוּ: ^sl-14-4

**5** תַמָן דַחֲלוּ דַחֲלָא מְטוּל דְמֵימְרָא דַייָ בְּדָרָא דְצַדִיקֵי: ^sl-14-5

**6** מִלְכַּת עַנְיָא תְּבַהֲתוּן מְטוּל דְשַׁוֵי בַיָי סִבְרֵיהּ: ^sl-14-6

**7** מַן יַרְחִישׁ מִצִיוֹן פּוּרְקָנָא דְיִשְׂרָאֵל כַּד יְתִיב יְיָ גְלוּת עַמֵיהּ יְרַנֵן יַעֲקֹב יֶחֱדֵי יִשְׂרָאֵל: ^sl-14-7

## Capítulo 15

**1** תּוּשְׁבַּחְתָּא לְדָוִד יְיָ מַן חֲמֵי לְמֵידַר בְּמִשְׁכָּנָךְ מַן חֲמֵי לְמִשְׁרֵי בְּטוּר בֵית מַקְדְשָׁךְ: ^sl-15-1

**2** דִמְהֲלִיךְ בִשְׁלִימָתָא וְעָבֵד צִדְקָתָא וּמְמַלֵל קוּשְׁטָא בִּלְבָבֵיהּ: ^sl-15-2

**3** לָא אֲכַל קוּרְצִין בְּלִישְׁנֵיהּ לָא עֲבַד לְחַבְרֵיהּ בִּישׁוּתָא וְכִסוֹפָא לָא סוֹבֵר עַל קְרִיבֵיהּ: ^sl-15-3

**4** דְשָׁט בְּאַנְפּוֹי וּבְסִיר וְיַת דַחֲלַיָא דַייָ מוֹקִיר דְיוֹמֵי לְאַבְאָשָׁא לְגַרְמֵיהּ וְלָא מְשַׁלְחָף: ^sl-15-4

**5** סִימֵיהּ לָא יְהַב בְּחִבּוּלְיָא וְשׁוֹחֲדָא עַל זַכָּאָה לָא קַבֵל דַעֲבֵיד אִלֵין לָא יְזוּעַ לְעַלְמָא: ^sl-15-5

## Capítulo 16

**1** גְלִיפָא תְרִיצָא לְדָוִד נְטַר יָתִי אֱלָהָא מְטוּל דְסַבְרֵית בְּמֵימְרָךְ: ^sl-16-1

**2** מַלֵילְתְּ אַנְתְּ נַפְשִׁי קֳדָם יְיָ אֱלָהִי אַנְתְּ בְּרַם טִיבָתִי לָא מִתְיְהִיבָא בַּר מִנָךְ: ^sl-16-2

**3** לְקַדִישַׁיָא דִי בְאַרְעָא הִנוּן הוֹדַעוּ כֹּחַ גְבוּרְתִּי מִן שְׁרוּיָא וְגֵוְתָנִין בְּעוֹבָדֵיהוֹן טָבַיָא כָּל רְעוּתִי טָב בְּהוּ: ^sl-16-3

**4** מַסְגָן צַלְמָנֵיהוֹן מִן בָּתַר כֵּן מוֹחָן לְקָרָבָא קוּרְבָּנֵיהוֹן לָא אֲקַבֵּל בְּרַעֲוָא נְסוּכֵהוֹן וְדַם קוּרְבָּנֵיהוֹן וְלָא אֶדְכַּר שׁוּמְהוֹן עַל סִפְוָתִי: ^sl-16-4

**5** יְיָ מוֹהָבִית כַּלִידִי וְחוּלָקִי אַנְתְּ תְּסוֹבֵר עַדְבִי: ^sl-16-5

**6** עַדְבִין נְפַלוּ לִי בִּבְסִימָתָא אוּף אַחֲסַנְתָּא שַׁפִּירָא עֲלָי: ^sl-16-6

**7** אֲבָרֵךְ יַת יְיָ דְמַלְכִּינָנִי אוּף בְּלֵילְיָא דְדָאָן לִי כוּלְיָתָי: ^sl-16-7

**8** שִׁוִיתִי יְיָ לְקוּבְּלִי תְּדִירָא מְטוּל דִשְׁכִנְתֵּיהּ שַׁרְיָא עֲלַי לָא אַזוּעַ: ^sl-16-8

**9** בְּגִין חֲדָא לִבִּי וְרַנֵן אַיְקָרִי אוֹף בִּשְׂרֵי יִשְׁרֵי לְרוֹחֲצָן: ^sl-16-9

**10** מְטוּל דְלָא תִשְׁבּוֹק נַפְשִׁי לִשְׁיוֹל לָא תִמְסוֹר זַכָּאָךְ לְמֶחֱמֵי בְּשִׁחֲיוּתָא: ^sl-16-10

**11** תְּהוֹדַע לִי אוֹרְחָא דְחַיֵי סוֹבְעָא דְחֶדְוָתָא קֳדָם אַפָּךְ בְּסִימָתָא בִּימִינָךְ לְעַלְמִין: ^sl-16-11

## Capítulo 17

**1** צְלוֹתָא לְדָוִד קַבֵּל יְיָ פְּגִיעֲתִי בִּצְדָקָה אֲצִית שַׁבּוּחִי תַּצְלֵי אוּדְנָךְ לִצְלוֹתִי בִּדְלָא סְפְוָתֵי נִכְלָא: ^sl-17-1

**2** מִן קֳדָמָךְ דִינִי יִפּוֹק עֵינָךְ תֶּהֶוְיָן חָמִין תְּרִיצוּתָא: ^sl-17-2

**3** בְּחַנְתָּא לִבְבִי אַסְעַרְתָּא עֲלָי בְּלֵילְיָא סְנַנְתָּא לִי לָא אַשְׁכַּחְתָּא שְׁחִיתָא חַשְׁבֵית בִּישׁוּתָא לָא עֲבַר פּוּמִי: ^sl-17-3

**4** בְּרַם אַכְסַנְתָּא עַל עוֹבָדֵיהוֹן דִבְנֵי נָשָׁא בְּמֵימַר סִפְוָתָךְ אֲנָא נְטַרֵית אָרְחוֹת חֲצִיפָא: ^sl-17-4

**5** סְעֵד אִסְתַּוְרַי בַּהֲלִיכָתָךְ דְלָא יְזוּעוּן רִגְלָי: ^sl-17-5

**6** אֲנָא קְרֵיתִי יָתָךְ מְטוּל תְּקַבֵּל צְלוֹתִי אֱלָהָא צַלֵי אוּדְנָךְ קַבֵּל צְלוֹתִי: ^sl-17-6

**7** פָּרֵישׁ טַבְוָתָךְ פָּרִיקְהוֹן דְסָבְרֵי מִן מַן דְקַיְמִין עֲלֵיהוֹן בְּאַיְדָא דִימִינָךְ: ^sl-17-7

**8** נְטַר יָתִי כְּגִלְגוּל דִי בִמְצִיעוּת עֵינָא בְטוּלָא דִשְׁכִנְתָּךְ תִּטְמוֹר יָתִי: ^sl-17-8

**9** מִן קֳדָם רַשִׁיעַיָא אִלֵין דִמְחַבְּלִין יָתִי בַּעֲלֵי דְבָבִי בִּרְעוּת נַפְשֵׁיהוֹן מְחַזְרָן עֲלָי: ^sl-17-9

**10** עָתְרְהוֹן סְגָא שׁוֹמְנֵיהוֹן כַּסִיאוּ פּוּמְהוֹן מַלְלוּ בְּרַבְרְבוּתָא: ^sl-17-10

**11** אִסְתַּוְרָנָא הַשְׁתָּא חֲזַרוּ לָנָא עֵינֵיהוֹן מְשַׁוָן לְמִפְשַׁט בְּאַרְעָא: ^sl-17-11

**12** דְמוּתֵיהּ הֵיךְ אַרְיָא דִמְרַגֵג לְמִתְבַּר וּכְשַׁחֲלָא דְיָתִיב בְּטוּמְרַיָא: ^sl-17-12

**13** קוּם יְיָ אַקְדֵם אַפּוֹי חַמְטֵיהּ פְּצָא נַפְשִׁי מִן רַשִׁיעָא דְאִתְחַיֵיב קְטוֹל בְּסַיְפָךְ: ^sl-17-13

**14** וְצַדִיקַיָא דְמַסְרִין נַפְשֵׁיהוֹן מְטוּלְתָּךְ יְיָ לְמִיתוּתָא בְּאַרְעָא חוּלַקְהוֹן בְּחַיֵי עָלְמָא וְטַשְׁיוּתָךְ טָבָא יִתְמַלְיָן כְּרֵיסֵיהוֹן יִסְבְּעוּן בְּנִין וְיִשְׁבְּקוּן שִׁיוּרְהוֹן לְטַלְיֵהוֹן: ^sl-17-14

**15** אֲנָא בְּקוּשְׁטָא אֶחְמֵי סְבַר אַפָּךְ אֶשְׂבַּע בְּעֵדֶן דְאִתְעָר מִן אַיְקָר פַּרְצוּפָךְ: ^sl-17-15

## Capítulo 18

**1** לְשַׁבָּחָא עַל נִסַיָא דְאִתְרְחִישׁוּ לְעַבְדָא דַייָ לְדָוִד דְשַׁבָּח בִּנְבוּאָה קֳדָם יְיָ יַת פִּתְגָמֵי שִׁירְתָא הָדָא עַל כָּל יוֹמַיָא דְשֵׁזְבֵיהּ יְיָ מִן יְדָא דְכָל בַּעֲלֵי דְבָבוֹי וּמֵחַרְבָּא דְשָׁאוּל: ^sl-18-1

**2** וַאֲמַר אֲחַבְּבִנָךְ יְיָ תּוּקְפִי: ^sl-18-2

**3** יְיָ תּוּקְפִי וְרֻחְצָנִי וּמְשֵׁזִיב יָתִי אֱלָהָא דְאִתְרְעֵי בִּי קָרְבַנִי לִדְחַלְתֵּיהּ תְּרֵיסִי דְמִן קֳדָמוֹי אִתְיְהַב לִי תְקוֹף וּפוּרְקָן עַל בַּעֲלֵי דְבָבֵי רָחְצָנִי: ^sl-18-3

**4** אֲמַר דָוִד בְתוּשְׁבַּחְתָּא אֲנָא מְצַלֵי קֳדָם יְיָ וּמִן בַּעֲלֵי דְבָבִי פָּרִיק יָתִי: ^sl-18-4

**5** אַקְפַתְנִי עָקָא כְאִתָּא דְיָתְבָא עַל מַתְבְּרָא וְחֵיל לֵית לָהּ לְמֵילַד וְהִיא מְסַכְּנָא לְמֵמָת וְסִיעַת טָלוֹמַיָא בַּעֲתַת יָתִי: ^sl-18-5

**6** מַשִׁרְיַת חַיָבִין אַקְפוּנִי אַקְדוּמִי יָתִי דִמְזַיְנִין בְּמָנֵי קְטוֹל: ^sl-18-6

**7** בִּדְעָיְקָא לִי אֲנָא מְצַלֵי קֳדָם יְיָ וּקְדָם אֱלָהִי אֲנָא מִתְחַנֵן וּמְקַבֵּל צְלוֹתִי מִן הֵיכְלֵיהּ וּבָעוּתִי קֳדָמוֹי מִתְקַבְּלָא בְּאוּדְנוֹי וּמִתְעַבְדָא: ^sl-18-7

**8** וְאִתְרְגִיפַת וְאִתְרְגִישַׁת אַרְעָא וְאֻשְׁיָת טוּרַיָא זְעוּ וְאִתְרְטִישׁוּ מְטוּל דִתְקֵיף לֵיהּ: ^sl-18-8

**9** סְלִיק זְדוֹנֵיהּ דְפַרְעֹה הֵיךְ קוּטְרָא דִבְכֵן שְׁלַח רוּגְזֵיהּ כְּאֶשָׁא בָּעֲרָא דְמִן קֳדָמוֹי מִשְׁתֵּצְיָא מְזוֹפִיתֵיהּ כְּגוּמְרִין דִי נוּר דָלְקָא מִמֵימְרֵיהּ: ^sl-18-9

**10** וְאַרְכֵן שְׁמַיָא וְאִתְגְלֵי יְקָרֵיהּ וַעֲנַן אֲמִטְתָא כַּבֵּשׁ קֳדָמוֹי: ^sl-18-10

**11** וְאִתְגְלֵי בִּגְבוּרְתֵּיהּ עַל כְּרוּבִין קַלִילִין וּדְבַר בִּתְקוֹף עַל גַדְפֵי זַעֲפָא: ^sl-18-11

**12** וְאַשְׁרֵי שְׁכִינְתֵּיהּ בְּעַרְפְּלָא וְאִתְחְזַר בַּעֲנָנֵי יְקָרֵיהּ הֵיךְ מְטַלַלְתָּא וְאַחֵית מִטְרִין דְרַעֲוָא עַל עַמֵיהּ וּמַיִן תַּקִיפִין מִן רִכְפַּת עֲנָנִין דְקִבְּלָא עַל רַשִׁיעַיָא מִן רוּמֵיהּ דְעָלְמָא: ^sl-18-12

**13** מִן זְהוֹר יְקָרֵיהּ עֲנָנֵי שְׁמַיָא עֲבַרוּ בִּמְזוֹפִיתָא בְּגוּמְרִין דְנוּר בַּרְדָא דָלְקָא מִן מֵימְרֵיהּ: ^sl-18-13

**14** וְאַכְלֵי מִן שְׁמַיָא יְיָ וְעִלָאָה אֲרִים מֵימְרֵיהּ רָמָא בַרְדָא וְגוּמְרִין דִי נוּר: ^sl-18-14

**15** וְשַׁדַר מֵימְרֵיהּ הֵיךְ גִירִין וּבַרְדִין וּבַרְקִין סַגִיאִין יְשַׂגְשְׂגוּן: ^sl-18-15

**16** וְאִתְחַמִיאוּ עִמְקֵי מַיָא וְאִתְגְלִיאוּ שִׁתְאֲסַיָא דְתֵבֵל מִמְזוֹפִיתָא מִן קֳדָם יְיָ מִמֵימַר תְּקוֹף רוּגְזָךְ: ^sl-18-16

**17** שְׁלַח נְבִיוֹהִי מֶלֶךְ תַּקִיף דְיָתֵיב בִּתְקוֹף רוּמָא דַבְּרַנִי שֵׁזְבַנִי מֵעַמְמִין סַגִיאִין: ^sl-18-17

**18** שֵׁזְבַנִי מִן סָנְאַי אֲרוּם עֲשִׁינִין הִינוּן וּמִן בַּעֲלֵי דְבָבִי אֲרוּם אִתְגַבַּרוּ עֲלָי: ^sl-18-18

**19** אַקְדִימוּ לִי בְיוֹם טִלְטוּלִי וַהֲוָה מֵימְרָא דַייָ סָמִיךְ לִי: ^sl-18-19

**20** וְאַפֵּק יָתִי לִרְוָחָא שֵׁזְבַנִי מְטוּל דְאִתְרְעֵי בִי: ^sl-18-20

**21** יִגְמְלִנַנִי יְיָ כִזְכוּתִי כִּבְרִירוּת יְדֵי יְתִיב לִי: ^sl-18-21

**22** מְטוּל דִנְטָרֵית אוֹרְחָן דְתַקְנָן קֳדָם יְיָ וְלָא הַלְכֵית בִּרְשַׁע קֳדָם יְיָ: ^sl-18-22

**23** מְטוּל דְכָל דִינוֹ גְלוֹי לְקִבְלִי לְמֶעְבַּדְהוֹן וּקְיָמוֹי לָא אַעְדֵי מֶנִי: ^sl-18-23

**24** וַהֲוֵיתִי שְׁלִים בִּדְחַלְתֵּיהּ וַהֲוֵיתִי נָטִיר נַפְשִׁי מֵחוֹבִין: ^sl-18-24

**25** וּפְרַע יְיָ לִי הֵיךְ זְכוּתִי כִּבְרִירוּת אַיְדִי קֳדָם מֵימְרֵיהּ: ^sl-18-25

**26** עִם אַבְרָהָם דְאִשְׁתַּכַּח חֲסִיד קֳדָמָךְ אַסְגֵיתָא לְמֶעְבַּד חִסְדָא עִם זַרְעֵיהּ דְיִצְחָק דַהֲוָה שְׁלִים בִּדְחַלְתָּךְ אַשְׁלֶמְתָּא מֵימַר רְעוּתָךְ עִמֵיהּ: ^sl-18-26

**27** עִם יַעֲקֹב דַהֲוָה בְּרִיר קֳדָמָךְ בְּחַרְתָּא בְנוֹי מִן כָּל עַמְמַיָא וְאַפְרֵשְׁתָּא זַרְעֵיהּ מִן כָּל פְּסִילָא וְעִם פַּרְעֹה וְזַרְעֵיהּ וּמִצְרָאֵי דַחֲשִׁיבוּ מַחְשְׁבָן בִּישָׁן עַל עַמָךְ בַּלְבֵּלְתִּנוּן בְּמַחְשְׁבָתְהוֹן: ^sl-18-27

**28** מְטוּל דְאַנְתְּ יַת עַמָא בֵּית יִשְׂרָאֵל דַחֲשִׁיכִין בֵּינֵי עַמְמַיָא בְּגָלוּתָא אַנְתְּ עֲתִיד לְמִפְרַק וּבְמֵימְרָךְ אוּמַיָא תַקִיפַיָא דְמִתְגַבְּרִין עֲלֵיהוֹן תַּמְאִיךְ: ^sl-18-28

**29** מְטוּל דְאַנְתְּ תַּנְהַר שְׁרָגָא דְיִשְׂרָאֵל דְמִטַפְיָא בְגָלוּתָא דְאַנְתְּ הוּא מָרֵיהּ דִנְהוֹרָא דְיִשְׂרָאֵל יְיָ אֱלָהִי יַפְקִנַנִי מֵחֶשְׁכָּא לִנְהוֹר יַחְמִנַנִי בְנִיחָמוּתִי דְעָלְמָא דַעֲתִיד לְמֵיתֵי לְצַדִיקַיָא: ^sl-18-29

**30** מְטוּל דִבְמֵימְרָךְ אַסְגֵי מַשִׁרְיָן וּבְמֵימַר אֱלָהִי אֶכְבּוֹשׁ כְּרַכִּין תַּקִיפִין: ^sl-18-30

**31** אֱלָהָא דְכִוְנָן אָרְחָתֵיהּ אוֹרַיְיתָא דַייָ בְּחִירָא תְּרֵיס הוּא לְכָל דְמִתְרַחֲצִין עֲלוֹי: ^sl-18-31

**32** אֲרוּם נִסָא וּפוּרְקָנָא דְתַעְבֵּיד לִמְשִׁיחָךְ וּלְשִׁיוּרֵי עַמָךְ דְיִשְׁתָּאֲרוּן יוֹדוּן כָּל עַמְמַיָא אוּמַיָא וְלִשָׁנַיָא וְיֵימְרוּן לֵית אֱלָהָא אֶלָא יְיָ אֲרוּם לֵית בַּר מִנָךְ וְעַמֵךְ יֵימְרוּן לֵית דְתַקִיף אֶלָא אֱלָהָנָא: ^sl-18-32

**33** אֱלָהָא דִמְזָרֵז לִי קָמוּר בְּחֵילָא וּמְתַקֵן שְׁלִים אָרְחִי: ^sl-18-33

**34** דִמְשַׁוֵי רִגְלַי קַלִילִין הֵיךְ אַיָלָתָא וְעַל בֵּית תּוּקְפִי יְקַימִנָנִי: ^sl-18-34

**35** מַלֵיף אַיְדֵי לְמֶעְבַּד קְרָבָא וּמַתְקֵיף הֵיךְ קֶשֶׁת כַּרְכּוֹמָא דַרְעָי: ^sl-18-35

**36** וִיהַבְתְּ לִי תְקוֹף וּפוּרְקַן וִימִינָךְ תְּסֵיְיעֵנִי וּבְמֵימְרָךְ אַסְגַעְתַּנִי: ^sl-18-36

**37** אַפְתֵּיתָ פְּסִיְעַתִי בְּאַתְרִי וְלָא אִזְדַעְזַא רְכוּבְתִּי: ^sl-18-37

**38** אֶרְדוֹף סָנְאַי וְשֵׁצִיתִנוּן וְלָא שְׁבוּת עַד דִגְמַרְתִּנוּן: ^sl-18-38

**39** אֲגַמְרִנוּן וְלָא יָכִילוּ לְמֵקָם וּנְפַלוּ קְטִילִין תְּחוֹת פַּרְסָת רִגְלָי: ^sl-18-39

**40** וְזֵרַזְתָּא לִי חֵילָא הֵיךְ קָמוֹר לְמֶעְבַּד קְרָבָא תַּבַּרְתָּא עַמְמִין דְקַיְמִין לְאַבְאָשָׁא לִי תְחוֹתָי: ^sl-18-40

**41** וּבַעֲלֵי דְבָבִי תַּבַּרְתָּ קֳדָמַי יְהַבְתִּנוּן מְחַזְרֵי קְדַל וְסָנְאַי אֲשֵׁיצִנוּן: ^sl-18-41

**42** בָּעָן סָעִיד וְלֵית לְהוֹן פָּרִיק מַצְלָן קֳדָם יְיָ וְלָא מְקַבֵּל צְלוֹתְהוֹן: ^sl-18-42

**43** וְדוֹשַׁשְׁתִּינוּן הֵיךְ גַרְגִשְׁתָּא דְאַרְעָא עַל אַנְפֵּי זַעְפָּא וְהֵיךְ סְיַן אַשְׁקָקֵי בַעֲטֵית אִנוּן: ^sl-18-43

**44** תְּשֵׁזְבִנַנִי מִפְּלֻגַת עַמְמַיָא תְּנַטְרִינַנִי בְמֵיזְרֵי מַזְיָן בְּרֵישׁ עַמְמַיָא עַמָא דְלָא חַכִּימַת יִפְלְחוּנַנִי: ^sl-18-44

**45** לְשֵׁמַע אִידִין יִשְׁתַּמְעוּן לִי בְּנֵי עַמְמַיָא יְכַדְבוּן קֳדָמַי: ^sl-18-45

**46** בְּנֵי עַמְמַיָא יְסוּפוּן וִיטַלְטְלוּן מִבִּרְנְיָתְהוֹן: ^sl-18-46

**47** קַיָם הוּא יְיָ וּבְרִיךְ תַּקִיפָא דְמִן קֳדָמוֹהִי מִתְיְהַב לִי תְקוֹף וּפוּרְקַן וּמְרוֹמֵם אֱלָהָא תְּקוֹף פּוּרְקָנִי: ^sl-18-47

**48** אֱלָהָא דְעָבֵד פוּרְעֲנוּתָא לִי וּמְתַבַּר עַמְמַיָא דְקַיְמִין לְאַבְאָשָׁא לִי תְחוֹתִי: ^sl-18-48

**49** מְשֵׁזְבִי מִבַּעֲלֵי דְבָבִי לְחוֹד עַל דְקָיְימִין לְאַבְאָשָׁא לִי תִּגְבְּרִנַנִי מִן גוֹג וּמַשִׁרְיָת עַמְמִין דַחֲטוֹפִין עִמְהוֹן תְּשֵׁזְבִנַנִי: ^sl-18-49

**50** מְטוּל הֵיכְנָא אוֹדֶה קֳדָמָךְ בֵּינֵי עַמְמַיָא יְיָ וְלִשְׁמָךְ אֲזַמֵר תּוּשְׁבַּחְתָּא: ^sl-18-50

**51** מַסְגֵי לְמֶעְבַּד פֻּרְקָן עִם מַלְכֵּיהּ וַעֲבַד טִיבוּ לִמְשִׁיחֵיהּ לְדָוִד וּלְזַרְעֵיהּ עַד עָלְמָא: ^sl-18-51

## Capítulo 19

**1** לְשַׁבָּחָא תּוּשְׁבַּחְתָּא לְדָוִד: ^sl-19-1

**2** דְמִסְתַּכְּלִין בִּשְׁמַיָא מִשְׁתָּעִין יְקָרָא דַיְיָ וְעוֹבָדֵי יְדוֹי מְחַוִין דִמְדִיקִין בְּאַוִירָא: ^sl-19-2

**3** יוֹמָא לְיוֹמָא מוֹסִיף וּמַבִּיעַ מֵימְרָא וְלֵילְיָא לְלֵילְיָא פָּתִית וּמְחַוֵי מַנְדְעָא: ^sl-19-3

**4** לֵית מֵימַר דְתוּרְעַמְתָּא וְלֵית מִלֵי דְשִׁגוּשָׁא דְלָא מִשְׁתְּמַע קָלְהוֹן: ^sl-19-4

**5** בְּכוֹלָא אַרְעָא נְפַק מְתַח עִנְיָנְהוֹן וּבִסְיָפֵי תֵבֵל מִלֵיהוֹן לְשַׁמָשָׁא שַׁוֵי מַשְׁרְוֵי זִיהָרָא בְהוֹן: ^sl-19-5

**6** וְהוּא בְּצַפְרָא בְּמַפְקֵיהּ יִפּוֹק הֵיךְ חֲתָנָא דְנָפֵק מִגְנוּנֵיהּ וּבְטִיהֲרָא יֶחְדֵי הֵיךְ גִבָּרָא לְמִרְהַט בְּאָרְחָא: ^sl-19-6

**7** מִסְיָפֵי שְׁמַיָא מַפְקָנֵיהּ וְתוּקְפֵיהּ עַל סִטְרֵיהוֹן וְלֵית דְמִטְמַר מִן רִתְחֵיהּ: ^sl-19-7

**8** אוֹרַיְיתָא דַייָ שְׁלֵמְתָּא מְתִיבָא נְפַשׁ סַהֲדוּתָא דַייָ מְהֵימְנָא מְחַכְּמָא שִׂבְרָא: ^sl-19-8

**9** פִּקוּדַיָא דַייָ תְּרִיצִין מְחַדִין לִבָּא פִקוּדָא דַייָ בְּרִירָא מְגַהֲרָא עַיְנִין: ^sl-19-9

**10** דְחַלְתָּא דַייָ דַכְיָא קְיָמָא לְעַלְמִין דִינַיָא דַייָ הֵימְנוּתָא זַכִּיאוּ כַּחֲדָא: ^sl-19-10

**11** דִרְגִיגִין מִדַהֲבָא וּמִן אוֹבְרִיזִין סַגִי וּבְסִימִין יַתִּיר מִן דִבְשָׁא וְכַבְרִיתָא חֲלִיאֲתָא: ^sl-19-11

**12** בְּרַם עַבְדָךְ אִזְדְהַר בְּהוֹן בִּדְנְטִירִין חִלוּפֵי הֵיכְנָא אִתְעֲבֵיד טָבְהוֹן דְיִשְׂרָאֵל: ^sl-19-12

**13** שַׁלְוְיָתָא מַן יֶחְכַּם וּמִטְמִירָתָא זַכֵּי יָתִי: ^sl-19-13

**14** בְּרַם מִן זֵידָנַיָא פְּצָא עַבְדָךְ דְלָא יִשְׁלְטוּן בִּי הַדֵין אֱהִי בְלָא מוּם וָאֱהִי זַכִּי מֵחוֹבָא רַבָּא: ^sl-19-14

**15** יְהוֹן לְרַעֲוָא מֵימְרִי פּוּמִי וְרִגְגַת רַעֲיוֹנִי קֳדָמָךְ יְיָ תּוּקְפִי וּפָרִיקִי: ^sl-19-15

## Capítulo 20

**1** לְשַׁבָּחָא תּוּשְׁבַּחְתָּא לְדָוִד: ^sl-20-1

**2** יְקַבֵּל צְלוֹתָךְ יְיָ בְּיוֹמָא דְעָקָא יְשַׂגְבִינָךְ שְׁמָא דֶאֱלָהָא דְיַעֲקֹב: ^sl-20-2

**3** יְשַׁדַר סַעְדָךְ מִן בֵּית מוּקְדָשֵׁהּ וּמִצִיּוֹן יְסַיְעִנָךְ: ^sl-20-3

**4** יִדְכַּר כּוּלְהוֹן דוֹרוֹנְיָתָךְ וְעַלְוָתָךְ יְדַהֵן לְעַלְמִין: ^sl-20-4

**5** יִתֵּן לָךְ כְּרַעֲיוֹנָךְ וְכָל מִלְכָּנָךְ יַשְׁלֵם: ^sl-20-5

**6** יֵימְרוּן עַמָךְ נְשַׁבַּח בְּפוּרְקָנָךְ וּבְשׁוּם אֱלָהָנָא נְטַקֵס יַשְׁלִים יְיָ כּוּלְהוֹן שֵׁילָתָךְ: ^sl-20-6

**7** הַשְׁתָּא יְדָעֵית אֲרוּם פָּרֵיק יְיָ מְשִׁיחֵיהּ קַבֵּיל צְלוֹתֵיהּ מִמוֹתְבֵי דִשְׁמַיָא קַדִישֵׁיהּ בִּגְבוּרָן פּוּרְקַן יְמִינֵיהּ: ^sl-20-7

**8** אִלֵין בִּרְתִיכִין וְאִלֵין בְּסוּסְוָן וַאֲנַחְנָא בְּשׁוּם יְיָ אֱלָהָנָא נִדְכָּר: ^sl-20-8

**9** אִנוּן גַחְנוּ וּנְפַלוּ וַאֲנַחְנָא אִזְדַקַפְנָא וְאִתְחַיֵלְנָא: ^sl-20-9

**10** יְיָ פְּרוֹק לָן מְלַךְ תַּקִיף קַבֵּל צְלוֹתָן בְּיוֹם מִקְרֵינָא: ^sl-20-10

## Capítulo 21

**1** לְשַׁבָּחָא תּוּשְׁבַּחְתָּא לְדָוִד: ^sl-21-1

**2** יְיָ בְעָשְׁנָךְ יֶחְדֵי מְלַךְ מְשִׁיחָא וּבְפוּרְקָנָךְ כְּמָא יְרַנֵן לַחֲדָא: ^sl-21-2

**3** רִגְגַת נַפְשֵׁיהּ יְהַבְתְּ לֵיהּ וּפֵרוּשׁ סִפְוָתֵיהּ לָא כְלֵיתָא לְעָלְמִין: ^sl-21-3

**4** אֲרוּם תְקַדְמִנֵיהּ בִּרְכָן טָבָן תְּשַׁוֵי עַל רֵישֵׁיהּ כְּלִיל דְהַב סְנִינָא: ^sl-21-4

**5** חַיֵי עַלְמָא שָׁאַל מִנָךְ יְהַבְתָּ לֵיהּ נָגְדָא דְיוֹמַיָא לְעַלְמֵי עָלְמִין: ^sl-21-5

**6** סַגִי יְקָרֵיהּ בְּפוּרְקָנָךְ תּוּשְׁבַּחְתָּא וְשִׁבְהוֹרָא תְשַׁוֵי עֲלוֹי: ^sl-21-6

**7** מְטוּל דִי תְשַׁוִנֵיהּ בִּרְכַן לְעָלְמִין תְּחַדִנֵיהּ בְּחֶדְוָתָא דִי מִן קֳדָמָךְ: ^sl-21-7

**8** מְטוּל דִמְלַךְ מְשִׁיחָא סַבִּיר בַּיָי וּבְחִסְדָא דְעִלָאָה לָא יְזוּעַ: ^sl-21-8

**9** תַּדְבֵּק מְחַת אַיְידָךְ לְכָל בַּעֲלֵי דְבָבָךְ פּוּרְעֲנוּת יְמִינָךְ תִּשְׁכַּח לְכָל סָנְאָךְ: ^sl-21-9

**10** תְּשַׁוִינוּן הֵיךְ אַתּוּן נוּרָא לְעִדָנֵי רוּגְזָךְ יְיָ בְּרִגְזֵיהּ יְסַלְעֲמִנוּן וְתֵיכְלִנוּן בִּעוּר גֵיהִנָם: ^sl-21-10

**11** בְּנֵיהוֹן מֵאַרְעָא תְהוֹבַד וְזַרְעִיתְהוֹן מִבְּנֵי נָשָׁא: ^sl-21-11

**12** מְטוּל דַחֲשִׁילוּ עֲלָךְ בִּישְׁתָא חֲשִׁיבוּ מַחְשְׁבָן בִּישִׁין וְלָא יְכִלוּנָךְ: ^sl-21-12

**13** מְטוּל דְשַׁוִיתִנוּן לְעַמָךְ כְּתַף חַד בְּאַטוּנֵי מַשְׁכְּנָךְ תְּתַקֵן אוֹרְחֵהוֹן קֳדָמֵיהוֹן: ^sl-21-13

**14** אִזְדְקַף יְיָ בְּעוּשְׁנָךְ נְשַׁבָּחָא וּנְדוּץ בִּגְבוּרְתָּךְ: ^sl-21-14

## Capítulo 22

**1** לְשַׁבָּחָא עַל תְּקוֹף קוּרְבַּן תְּדִירָא דִקְרִצְתָּא תּוּשְׁבַּחְתָּא לְדָוִד: ^sl-22-1

**2** אֵלִי אֵלִי מְטוּל מַה שְׁבַקְתַּנִי רָחִיק מִן פּוּרְקָנִי מִלֵי אַכְלְיוּתִי: ^sl-22-2

**3** אֱלָהִי אֲנָא קָרֵי בִימָמָא וְלָא תְקַבֵּל וּבְלֵילְיָא לָא שְׁתִיקוּתָא לִי: ^sl-22-3

**4** וְאַנְתְּ קַדִישׁ דִמְיַתֵּב עַלְמָא עַל תּוּשְׁבְּחָן יִשְׂרָאֵל: ^sl-22-4

**5** עֲלָךְ סַבַּרוּ אַבְהָתָנָא סַבַּרוּ בְּמֵימְרָךְ וְשֵׁזֶבְתִּנוּן: ^sl-22-5

**6** קֳדָמָךְ צַלוּ וְאִשְׁתְּזִיבוּ וַעֲלָךְ אִתְרְחִיצוּ וְלָא בְהִיתוּ: ^sl-22-6

**7** וַאֲנָא זְחִיל חֲלָשׁ וְלָא גִבָּר סָכָל חִסוּדֵי בְּנֵי נָשָׁא וּמִתְרַמְרְמוּתָא דְעַמְמֵי: ^sl-22-7

**8** כָּל דְחָמְיָן לִי יִדְהֲכוּן עֲלָי מִתְגָרְדִין בְּסִפְוָתְהוֹן יְטַלְטְלוּן בְּרֵישֵׁיהוֹן: ^sl-22-8

**9** שַׁבַּח קֳדָם יְיָ וְשֵׁזְבֵיהּ פְּצָא יָתֵיהּ מְטוּל דְאִתְרְעֵי בֵיהּ: ^sl-22-9

**10** מְטוּל דְאַתְּ אַפֵקְתַּנִי מִכְּרֵיסָא אַסְבַּרְתַּנִי עַל תַדְיֵי אִמִי: ^sl-22-10

**11** בְּסַעְדָךְ אִטַלְקֵית מִמַעַיְנָא מִכְּרֵיסַת אִמִי אֵלִי אָתְּ: ^sl-22-11

**12** לָא תִתְרָחֵיק מִנִי מְטוּל דְעַקְתָא קְרֵיבָא אֲרוּם לֵית פָּרִיק: ^sl-22-12

**13** אַחֲזַרוּ עֲלַי פַּלְחֵי כּוֹכְבַיָא דִמְתִילִין לְתוֹרִין סַגִיאִין רַבְרְבָנֵי מַתְנָן אַקְפוּנִי: ^sl-22-13

**14** פְּתַחוּ עֲלַי פּוּמְהוֹן הֵיךְ כְּאַרְיָא מַכְלֵי וְתָבַר: ^sl-22-14

**15** הֵיךְ כְּמַיָא אִשְׁתְּדֵת וְאִתְפַּרְפְּרָן כּוּלְהוֹן גַרְמַי הֲוָה לִבִּי מִתְמְסֵי הֵיךְ שַׁעֲוָה בְּגוֹ מֵעָי: ^sl-22-15

**16** יָבֵשׁ הֵיךְ פְּחַר חֵילִי וְלִישָׁנִי אִדְבֵּיק לְמוֹרִיגִי וּלְבֵית קְבוּרְתָּא אַמְטֵיתַנִי: ^sl-22-16

**17** מְטוּל דְאַחֲזַרוּ עֲלָי רַשִׁיעֵי דִמְתִילִין לְכַלְבַיָא סַגִיעִין כְּנִישַׁת מַבְאִישִׁין אַקְפוּנִי נָכְתִין הֵיךְ כְּאַרְיָא אַיְדַי וְרִגְלָי: ^sl-22-17

**18** אֲחַוֵי כָּל הַלְבְּשׁוּשַׁי גַרְמַי אִנוּן מִסְתַּכְּלִין מְבַזָן לִי: ^sl-22-18

**19** מְפַלְגִין לְבוּשַׁי וְעִלַוֵי פְתָנֵי יִרְמוֹן עַדְבִין: ^sl-22-19

**20** וְאַנְתְּ יְיָ לָא תִתְרָחִיק תּוּקְפִי לְסִיוֹעִי אוֹחִי: ^sl-22-20

**21** פְּצֵי מִקָטְלִין בְּחַרְבָּא נַפְשִׁי מִן אַיְדָא דְכַלְבָּא רוּחָא דְגוּשְׁמִי: ^sl-22-21

**22** פְּרוֹקְנִי מִפּוּם אַרְיָא וּמִגַבְרַיָא דְתַקִיפִין וְרָמִין כְּרֵימָנָא קַבֵּלְתָּא צְלוֹתִי: ^sl-22-22

**23** אֲחַוֵי גְבוּרַת שְׁמָךְ לְאֶחָי בִּמְצַע כְּנִשְׁתָּא אֲשַׁבְּחִנָךְ: ^sl-22-23

**24** דַחֲלַיָא דַייָ שַׁבַּחוּ קֳדָמוֹי כָּל זַרְעָא דְיַעֲקֹב הָבוּ לֵיהּ יְקָר וְאִזְדַעְזִעוּ מִנֵיהּ כָּל זַרְעָא דְיִשְׂרָאֵל: ^sl-22-24

**25** מְטוּל דְלָא בַסֵר וְלָא שָׁאַט צְלוֹתְהוֹן דַעֲנִיֵי וְלָא סַלִיק שְׁכִינְתֵּיהּ מִבֵּינֵיהוֹן וּבְצַלְאֵיהוֹן קֳדָמוֹהִי מְקַבֵּל: ^sl-22-25

**26** מִנָךְ תּוּשְׁבַּחְתִּי בִּכְנִישַׁת סְגִיעַת עַמָא נִדְרִי אֲשַׁלֵם קֲבֵיל דַחֲלוֹי: ^sl-22-26

**27** יֵיכְלוּן עֲנְוְתָנֵי וְיִשְׂבְּעוּן יְשַׁבַּחוּ קֳדָם יְיָ דְתָבְעִין לֵיהּ יִשְׁרֵי רוּחַ נְבוּאָה בְרַעְיוֹנֵי לִבְּכוֹן לְעָלְמִין: ^sl-22-27

**28** יִדְכְּרוּן נְסוֹי וִיתוּבוּן קֳדָם יְיָ כָּל סְיָפֵי אַרְעָא וְיִסְגְדוּ קֳדָמָךְ כָּל גְנִיסַת עַמְמַיָא: ^sl-22-28

**29** מְטוּל דְמִן קֳדָם יְיָ מַלְכוּתָא וְשַׁלִיט בְּעַמְמַיָא: ^sl-22-29

**30** סְעוּדוּ וּסְגִידוּ כָּל דְהִינֵי אַרְעָא קֳדָמוֹי יְגַחְנוּן כָּל נָחְתִין בֵּי קְבוּרְתָּא וּנְפַשׁ רַשִׁיעָא לָא יְחַיֵי: ^sl-22-30

**31** זַרְעֵיהּ דְאַבְרָהָם יִפְלְחוּן קֳדָמוֹי וִיחַווּן כֹּחַ גְבוּרְתָּא דַייָ לְדָרָא בַּתְרָאָה: ^sl-22-31

**32** יְתוּבוּן בְּנֵיהוֹן וִיתַנוּן צְדַקְתֵּיהּ לְעַמֵיהּ דַעֲתִיד לְמֵילַד פְּרִישָׁן דַעֲבַד: ^sl-22-32

## Capítulo 23

**1** תּוּשְׁבַּחְתָּא לְדָוִד יְיָ זָן יַת עַמֵי בְּמַדְבְּרָא לָא חֲסַרוּ כוֹלָא: ^sl-23-1

**2** בַּאֲתַר צִיחְתָא בַּהַנְיַת דִתְאִין יַשְׁרִינַנִי עַל מֵי נִיחַיָא דַבְּרֵנִי: ^sl-23-2

**3** נַפְשִׁי יְתִיב דַבְּרַנִי בְהִלְכַת צִדְקָא מְטוּל שְׁמֵיהּ: ^sl-23-3

**4** בְּרַם כַּד אֵזֵל בְּגָלוּתָא בְּמֵישַׁר טוּלָא דְמוֹתָא לָא אֶדְחַל מִבִּישְׁתָּא מְטוּל דְמֵימְרָךְ בְּסַעֲדִי תִּנְדָךְ תְּרִיצָא וְאוֹרַיְיתָךְ הִנוּן יְנַחְמוּנַנִי: ^sl-23-4

**5** סָדַרְתָּ קֳדָמַי פָּתוֹר קֳבֵיל מְעִיקַי דַהֵנְתָּא בִּמְשַׁח רְבוּתָא רֵישׁ כַּהֲנַי כַּלִידִי רְוִיחָא: ^sl-23-5

**6** בְּרַם טָבְתָא וְחִסְדָא יִרְדְפוּנַנִי כָּל יוֹמֵי חַיַי כַּד אֵתֵב בְּבֵית מַקְדְשָׁא דַייָ לְנַגְדָא דְיוֹמָנָא: ^sl-23-6

## Capítulo 24

**1** לְדָוִד תּוּשְׁבַּחְתָּא לַיָי הָא אַרְעָא וּבִרְיָתָהָא תֵּבֵל וּדְיָתְבִין בָּהּ: ^sl-24-1

**2** מְטוּל דִי הוּא עַל יַמַיָא שַׁוֵי שִׁתְסָהָא וְעַל נַהַרְוָתָא אַתְקְנָאָה: ^sl-24-2

**3** מַן יִסַק לְטוּר בֵּית מַקְדְשָׁא דַייָ וּמַן יְקוּם בַּאֲתַר קוּדְשַׁיָא: ^sl-24-3

**4** דְכֵי אַיְדַיָא וּבְרִיר רַעְיוֹנָא דְלָא אוֹמֵי עַל שִׁקְרָא לְחַיָבָא נַפְשֵׁיהּ וְלָא קָאֵם לְנִכְלָא: ^sl-24-4

**5** יְקַבֵּל בִּרְכָתָא מִן קֳדָם יְיָ וְצִדְקָתָא מֵאֱלָהָא דְפוּרְקָנֵיהּ: ^sl-24-5

**6** דְנָן דָרָא דְתָבְעִין לֵיהּ דְבָעִין סְבַר אַפּוֹי יַעֲקֹב לְעָלְמִין: ^sl-24-6

**7** זְקֻפוּ תַרְעֵי בֵית מַקְדְשָׁא רֵישֵׁיכוֹן וְאִזְדְקָפוּ מַעֲלָנֵי עַלְמָא וְיֵעוּל מֶלֶךְ יַקִירָא: ^sl-24-7

**8** מַן הוּא דֵיכֵי מַלְכָּא יַקִירָא יְיָ עָשִׁין וְגִבַּר יְיָ מָרֵי גְבוּרְתָּא וְעָבַד קְרָבָא: ^sl-24-8

**9** זְקוּפוּ תַרְעֵי גִנְתָא דְעֵדֶן רֵישֵׁיכוֹן וְאִזְדְקָפוּ מַעֲלָנֵי עַלְמָא וְיֵעוּל מַלְכָּא יַקִירָא: ^sl-24-9

**10** מַן הוּא דֵיכֵי מַלְכָּא יַקִירָא יְיָ צְבָאוֹת הוּא מַלְכָּא יַקִירָא לְעָלְמִין: ^sl-24-10

## Capítulo 25

**1** לְדָוִד קֳדָמָךְ יְיָ נַפְשִׁי אֱטוֹל בִּצְלוֹ: ^sl-25-1

**2** אֱלָהִי בָּךְ אִתְרַחֲצֵית לָא אֶבְהַת לָא יֶחְדוּן בַּעֲלֵי דְבָבַי עֲלָי: ^sl-25-2

**3** בְּרַם כָּל דְסָבְרִין לָךְ לָא יִבְהֲתוּן יִבְהֲתוּן בָזוֹזִין וּסְרִיקַיָא: ^sl-25-3

**4** אוּרְחָתָךְ יְיָ אוֹדַע יָתִי הִלְכָתָךְ אַלֵיף יָתִי: ^sl-25-4

**5** דַבְּרַנִי בִּזְכוּתָךְ וְאַלְפִנַנִי אֲרוּם אַתְּ הוּא אֱלָהָא דְפוּרְקָנִי יָתָךְ סַבְּרֵית כָּל יוֹמָא: ^sl-25-5

**6** אִדְכַּר רַחֲמָךְ יְיָ וְטַבְוָתָךְ אֲרוּם מִן עַלְמָא הִנוּן: ^sl-25-6

**7** חוֹבֵי טַלְיוּתִי וּמְרָדַי לָא תִדְכַּר כְּטוּבָךְ אִדְכַּר לִי אַנְתְּ מְטוּל טִיבוּתָךְ יְיָ: ^sl-25-7

**8** טָב וּתְרִיץ יְיָ בְּגִין כֵּן מָלִיף חַיָבַיָא בְּאוּרְחָא: ^sl-25-8

**9** מַדְרֵיךְ עִנְוְתָנֵי בְּדִינָא וּמַלֵיף עִנְוְתָנֵי אוּרְחֵיהּ: ^sl-25-9

**10** כָּל הִלְכָתֵיהּ דַייָ טִיבוּ וּקְשׁוֹט לְנָטְרֵי קְיָמֵיהּ וּסְהִדְוָתֵיהּ: ^sl-25-10

**11** מִן בִּגְלַל שְׁמָךְ יְיָ וְתִשְׁבּוֹק לְחוֹבִי אֲרוּם סַגִי הוּא: ^sl-25-11

**12** מַן הוּא דֵין גַבְרָא דְדָחִיל מִן קֳדָם יְיָ יַלְפִנֵיהּ בְּאוּרְחָא דְאִתְרְעֵי: ^sl-25-12

**13** נַפְשֵׁיהּ בְּטִיבוּתָא תְּבִית וּבְנוֹי יַחְסְנוּן אַרְעָא: ^sl-25-13

**14** רָזָא דַייָ גַלְיָא לְדָחֲלוֹי וּקְיָמֵיהּ לְאוֹדָעוּתְהוֹן: ^sl-25-14

**15** עֵינַי מִסְתַּכְּלִין תְּדִירָא קֳדָם יְיָ אֲרוּם הוּא יַפֵּיק מִמְצַדְתָּא רִגְלָי: ^sl-25-15

**16** אִסְתְּכֵּי לְוָתִי וְחוּס עֲלָי מְטוּל דִיחִידִי וְעַנְיָא אֲנָא: ^sl-25-16

**17** עָקְתִין דִלְבָבִי פַּתְיָן מִשִׁנוּקִי אַפֵּק יָתִי: ^sl-25-17

**18** חֲמֵי סִגוּפִי וְטָרְחִי וּשְׁבוֹק לְכוּלְהוֹן חוֹבַי: ^sl-25-18

**19** חֲמֵי בַּעֲלֵי דְבָבִי אֲרוּם סַגִיעוּ וְסִנְאֲתָה דְחָטוֹפִין סְנוֹ יָתִי: ^sl-25-19

**20** טוּר נַפְשִׁי וְשֵׁזִיב יָתִי לָא אֶבְהַת מְטוּל דְסִבְרֵית לָךְ: ^sl-25-20

**21** שְׁלֵימוּתָא וּתְרֵיצוּתָא יִטְרוּנַנִי אֲרוּם סִבְרִית בְמֵימְרָךְ: ^sl-25-21

**22** פְּרוֹק יְיָ יַת יִשְׂרָאֵל מִכֹּל עָקְתוֹי: ^sl-25-22

## Capítulo 26

**1** לְדָוִד דוּן יָתִי יְיָ אֲרוּם בִּשְׁלֵמוּתִי אֲנָא הַלְכִית וּבַיְיָ סִבְרִית לָא אִזְדַעְזָע: ^sl-26-1

**2** בְּחוֹן יָתִי יְיָ וְנַסֵי יָתִי סַנֵין כִּלְיָתִי וְרַעְיוֹנָי: ^sl-26-2

**3** מְטוּל דְטוּבָךְ קֳבֵיל עֵינַי וְהַלְכֵת בְּקוּשְׁטָךְ: ^sl-26-3

**4** לָא אִסְתַּחֲרֵית עִם גַבְרֵי שִׁקְרָא וְעִם מִטַמְרִין לְאַבְאָשָׁא לָא אֵעוֹל: ^sl-26-4

**5** סְנֵיתִי כְּנִישַׁת מַבְאִישִׁין וְעִם רַשִׁיעַיָא לָא אֶסְתְּחַר: ^sl-26-5

**6** אַקְדִישׁ בְּזַכּוּתָא אַיְדַי וְאַחְזְרֵית יַת מַדְבְּחָךְ יְיָ: ^sl-26-6

**7** לְאַשְׁמָעָא בְּקָל שְׁבָחָא וּלְאִשְׁתָּעָא כָּל פְּרִישׁוּתָךְ: ^sl-26-7

**8** יְיָ רְחִימֵית מְדוֹר בֵּית מַקְדְשָׁךְ וַאֲתַר מַשְׁכַּן יְקָרָךְ: ^sl-26-8

**9** לָא תִכְנוֹשׁ עִם חַיָבַיָא נַפְשִׁי וְעִם אַנְשֵׁי שָׁדְיָן דְמָא חַיָי: ^sl-26-9

**10** דִי בִּידֵיהוֹן עֲצַת חֶטְאִין וִימִינֵהוֹן מַלְיָן שׁוֹחֲדָא: ^sl-26-10

**11** וַאֲנָא בִּשְׁלֵימוּתִי אֵזֵיל פְּרוֹק יָתִי וְחוּס עֲלָי: ^sl-26-11

**12** רִגְלִי קָם בִּתְרִצָא בִּכְנִישַׁת צַדִיקִין אֲבָרֵךְ יְיָ: ^sl-26-12

## Capítulo 27

**1** לְדָוִד יְיָ נְהוֹרִי וּפוּרְקָנִי מִמַן אֶדְחַל יְיָ עוּשְׁנָא דְחַיַי מִמַן אֶדְחַל: ^sl-27-1

**2** כַּד יִתְקַרְבוּן עֲלַי מַבְאֲשִׁין לְגָרְמָא יַת בִּסְרֵי מְעִיקַי וּבַעֲלֵי דְבָבַי הִנוּן אִתְקַלוּ וּנְפָלוּ: ^sl-27-2

**3** אִין תִּשְׁרֵי עֲלַי מַשִׁרְיַת רַשִׁיעֵי לָא אִדְחַל לְבָבִי אִין תְּקוּם עֲלַי קְרָבָא בְּדָא אֲנָא סָבִיר: ^sl-27-3

**4** חֲדָא בְּעִיתִי מִן קֳדָם יְיָ יָתָהּ אֶתְבַּע דְאֵתֵב בְּבֵית מַקְדְשָׁא דַייָ כָּל יוֹמֵי חַיַי לְמֶחֱמֵי בְּבַּסִימוּתָא דַייָ וּלְבַקָרָא בְּהֵיכְלֵיהּ: ^sl-27-4

**5** אֲרוּם יִטְשִׁנַנִי בְּטַלְלֵיהּ בְּיוֹם בִּישְׁתָּא יְטַמְרִנַנִי בְּטִמוּר מַשְׁכְּנֵיהּ בִּכְרַךְ תַּקִיף יְרוֹרָם יָתִי: ^sl-27-5

**6** וְהַשְׁתָּא יִתְרוֹרָם רֵישִׁי עַל בַּעֲלֵי דְבָבִי חֲזוֹר חֲזוֹר וְאֶכּוֹס בְמַשְׁכְּנֵיהּ נִכְסֵי רַעֲוָא אֲשַׁבַּח וְאֲבִּיעַ קֳדָם יְיָ: ^sl-27-6

**7** קַבֵּל יְיָ צְלוֹתִי בְּמִקְרָאִי וְחוּס עֲלַי וּרְחֵם יָתִי: ^sl-27-7

**8** לָךְ אֲמַר לִבִּי בְּעֵי אַפָּי יַת סְבַר אַפָּךְ יְיָ אֶתְבַּע: ^sl-27-8

**9** לָא תְסַלֵק שְׁכִנְתָּךְ מִנִי לָא תַצְלֵי בְרוּגְזָא לְעַבְדָךְ סִיוּעִי הֲוֵיתָא לָא תְטַלְטֵל יָתִי וְלָא תִשְׁבְּקִנַנִי אֱלָהָא דְפוּרְקָנִי: ^sl-27-9

**10** מְטוּל דְאַבָּא וְאִמָא יִשְׁבְּקוּ יָתִי יְיָ יִכְנוֹשׁ לִי: ^sl-27-10

**11** אַלֵפְנִי יְיָ אוּרְחֲתָךְ וּדְבַרְנִי בְּהִלְכְתָא תְרִיצָא מְטוּל תּוּשְׁבְּחָתַי: ^sl-27-11

**12** לָא תִמְסְרִנַנִי בִּרְעוּת מְעִיקַי אֲרוּם קָמוּ עָלַי סָהֲדֵי שִׁקְרָא וּמְמַלְלֵי חֲטוֹפָא: ^sl-27-12

**13** אִלוּלֵי דִי הֵימְנִית לְמֶחְמֵי בְטוּבָא דַייָ בְּאַרְעָא דְחַיֵי עַלְמָא: ^sl-27-13

**14** סְבוֹר עַל יְיָ תְּקוֹף וְעַלֵם לִבָּךְ וּסְבוֹר עַל יְיָ: ^sl-27-14

## Capítulo 28

**1** לְדָוִד לְוָתָךְ יְיָ אֲנָא אֶקְרֵי תַּקִיפֵי לָא תִשְׁתּוֹק מִנִי דִלְמָא תִשְׁתּוֹק מִנִי וְאִתְמְתֵלִית עִם נָחֲתֵי גוּבָא: ^sl-28-1

**2** קַבֵּל בְּקָל בָּעוּתִי בְּמִצַלְיִי לְוָתָךְ כַּד אֶפְרוֹשׁ יְדַי בִּצְלוֹ קֳדָם הֵיכַל קֻדְשָׁךְ: ^sl-28-2

**3** לָא תִנְגְדִינַנִי עִם רַשִׁיעַיָא וְעִם עָבְדֵי עַוְלָא דִי מְמַלְלִין שְׁלָמָא עִם חַבְרֵיהוֹן וּבִישְׁתָא בְּלִבְּהוֹן: ^sl-28-3

**4** הַב לְהוֹן כְּעוֹבָדֵיהוֹן וּכְבִישׁוּת עוֹבָדֵיהוֹן כְּעוֹבָדֵי יְדֵיהוֹן פְּרַע לְהוֹן אֲתִיב פּוּרְעֲנוּתְהוֹן לְהוֹן: ^sl-28-4

**5** מְטוּל דְלָא מִתְבַּיְנִין לְאוֹרַיְיתָא דַייָ וּלְעוֹבָדֵי אַיְדוֹי יְפַגְרִנוּן וְלָא יִבְנִנוּן: ^sl-28-5

**6** בְּרִיךְ יְיָ אֲרוּם קַבֵּל קַל צְלוֹתִי: ^sl-28-6

**7** יְיָ עוּשְׁנִי וּתְרֵיסִי בֵּיהּ סַבָּר לִבִּי וְסַעֲדַנִי וְדָאֵיץ לִבִּי וּמִתּוּשְׁבַּחְתִּי אוֹדֶה קֳדָמוֹי: ^sl-28-7

**8** יְיָ תְּקוֹף לְהוֹן וְעוּשְׁנָא פּוּרְקָנוּת מְשִׁיחֵיהּ הוּא: ^sl-28-8

**9** פְּרוֹק יַת עַמָךְ וּבָרֵךְ יַת אַחְסַנְתָּךְ זוּן לְהוֹן וְסוֹבֵר יַתְהוֹן עַד עַלְמָא: ^sl-28-9

## Capítulo 29

**1** תּוּשְׁבַּחְתָּא לְדָוִד הֲבוּן קֳדָם יְיָ תּוּשְׁבַּחְתָּא כַתֵּי מַלְאֲכַיָא בְנֵי אֵלִים הֲבוּן קֳדָם יְיָ אַיְקַר וְעֻשְׁנָא: ^sl-29-1

**2** הֲבוּן קֳדָם יְיָ אַיְקָר שְׁמֵיהּ סְגִידוּ קֳדָם יְיָ בְּשִׁבְהוֹרַת קוּדְשָׁא: ^sl-29-2

**3** קָלָא דַייָ שְׁמִיעַ עַל מַיָא בִּתְקוֹף אַיְקָרֵיהּ אַכְלֵי יְיָ עַל מַיִין סַגִיאִין: ^sl-29-3

**4** קָלָא דַייָ שְׁמִיעַ בְּחֵילָא קָלָא דַייָ שְׁמִיעַ בְשִׁבְהוֹרָא: ^sl-29-4

**5** קָלָא דַייָ מַתְבַּר אַרְזַיָא וְתַבַּר מֵימְרָא דַייָ יַת אַרְזֵי לְבָנוֹן: ^sl-29-5

**6** וְשַׁוְרִנוּן הֵיךְ עֲגַל לִבְנָן וְטוּר מָסְרֵי פִּרְוֵי הֵיךְ בַּר רָמַיָא: ^sl-29-6

**7** קָלָא דַייָ מְנַסַר שַׁלְהוֹבִין דִי נוּר: ^sl-29-7

**8** קָלָא דַייָ מְרַטֵשׁ מַדְבְּרָא מְרַטֵשׁ מֵימְרָא דַייָ מַדְבְּרָא דִרְקָם: ^sl-29-8

**9** קָלָא דַייָ מַכְטִין אַיְלָתָא וּמַזְלִיחַ חֵוַת חוּרְשָׁא וּבְמִקְדְשֵׁיהּ דִלְעֵיל כּוּלְהוֹן שַׁמָשׁוֹי אָמְרִין אַיְקַר קֳדָמוֹי: ^sl-29-9

**10** יְיָ בְּדַר טוּפָנָא יְתִיב עַל כּוּרְסֵי דְדִינָא לְמִתְפְּרַע מִנְהוֹן וִיתֵיב יְיָ עַל כּוּרְסֵי רַחֲמוּתָא וְשֵׁזֵיב יַת נֹחַ וּמְלַךְ עַל בְּנוֹי לְעַלְמֵי עָלְמִין: ^sl-29-10

**11** יְיָ אוֹרַיְתָא לְעַמֵיהּ יְהַב יְיָ יְבָרֵךְ יַת עַמֵיהּ בִּשְׁלָם: ^sl-29-11

## Capítulo 30

**1** תּוּשְׁבְּחַת שִׁירְתָא עַל חֲנוּכַּת בֵּית מַקְדְשָׁא לְדָוִד: ^sl-30-1

**2** אֲשַׁבְּחִנָךְ יְיָ אֲרוּם אַזְקֵפְתַּנִי וְלָא אַחְדֵיתָא בַּעֲלֵי דְבָבַי עֲלָי: ^sl-30-2

**3** יְיָ אֱלָהִי צַלֵיתִי קֳדָמָךְ וַאֲסֵתַנִי: ^sl-30-3

**4** יְיָ אַסֵקְתָּא מִן שְׁיוֹל נַפְשִׁי קַיֵמְתַּנִי מִן לְמֵחַת לְגוּבָא: ^sl-30-4

**5** שַׁבַּחוּ קֳדָם יְיָ חֲסִידוֹי וְאוֹדוּ אַדְכְּרוּת קָדְשֵׁיהּ: ^sl-30-5

**6** מְטוּל דְשַׁעְתָּא רוּגְזֵהּ חַיֵי עַלְמָא בִּרְעוּתֵיהּ טָבָא בְרַמְשָׁא מְבִית בִּבְכוּתָא וּלְצַפְרָא מְקִים בְּתֻשְׁבַּחְתָּא: ^sl-30-6

**7** וַאֲנָא אֲמַרֵית בְּמֵתְבִי בְּרוֹחֲצָנָא דְלָא אַזוּעַ לְעַלְמָא: ^sl-30-7

**8** יְיָ בִּרְעוּתָךְ אִתְעַתַּדְתָא לְטוּרַיָא עָשִׁינַיָא סָלֵיקְתָּא שְׁכִינְתָּךְ הֲוֵיתִי מִתְבְּהֵל: ^sl-30-8

**9** קֳדָמָךְ יְיָ אֶקְרֵי וּלְוָתָךְ אֱלָהִי אֲצַלֵי: ^sl-30-9

**10** מַה מָמוֹן אִית בִּדְמִי בְּמֵחֲתִי לְבֵי קְבוּרְתָּא אֶפְשַׁר לְשַׁבְּחוּנָךְ נָחֲתֵי עַפְרָא הַחֲוֵיתוּן הֵימְנוּתָךְ: ^sl-30-10

**11** קַבֵּל יְיָ צְלוֹתִי וְחוּס עֲלַי יְיָ הֲוֵי סָעֵיד לִי: ^sl-30-11

**12** אֲפֵכְתָּא אִלְיִי לְחִנְגִין לִי שְׁרֵיתָא סַקִי וּזְרַזְתַּנִי חֶדְוָא: ^sl-30-12

**13** מִן בִּגְלַל דִישַׁבְּחוּן יַקִירֵי עַלְמָא וְלָא יִשְׁתְּקוּן יְיָ אֱלָהִי לְעַלְמָא אֲשַׁבְּחִנָךְ: ^sl-30-13

## Capítulo 31

**1** לְשַׁבָּחָא תּוּשְׁבַּחְתָּא לְדָוִד: ^sl-31-1

**2** בְּמֵימְרָךְ יְיָ סִבְרֵת לָא אֶבְהָת לְעַלְמָא בְּצִדְקָתָךְ שֵׁזֵיב יָתִי: ^sl-31-2

**3** אַצְלֵי לְוָתִי אוּדְנָךְ בְּסַרְהוֹבְיָא פְּצֵי יָתִי הֲוֵי לִי לִכְרַךְ עָשִׁין לְחוּסְנָא כְרִיכָא לְמִפְרַק יָתִי: ^sl-31-3

**4** מְטוּל דְתוּקְפִי וְרוֹחֲצָנִי אַתְּ וּבִגְלַל שְׁמָךְ דַבַּר יָתִי וְזוּן יָתִי: ^sl-31-4

**5** אַפֵּיק יָתִי מִמְצַדָא דְנָן דְפָרְסִין לִי אֲרוּם אַנְתְּ עוּשְׁנִי: ^sl-31-5

**6** בְּאַיְדָךְ אֲמַנֵי רוּחִי פְרוֹקְתָּא יָתִי יְיָ אֱלָהָא קְשִׁיטָא: ^sl-31-6

**7** שְׂנֵאתִי דְנָטְרִין עוֹבָדִין דְדָמִין לִלְמָא וּלְשִׁקְרָא וַאֲנָא עַל יְיָ כְּלִיתִי: ^sl-31-7

**8** אֲבוּעַ וְאֶחְדֵי בְּטִיבוּתָךְ דִי חֲמִיתָא יַת סִגוּפִי יָדַעְתָּא בְּעָקְתִין דְנַפְשִׁי: ^sl-31-8

**9** וְלָא מְסַרְתַּנִי בְּאַיְדָא דְבָעֵיל דְבָבָא אַקֵימְתָּא לִרְוָחָא רִגְלָי: ^sl-31-9

**10** חוּס עֲלַי יְיָ אֲרוּם עַיִק לִי בְּלֵאָת מֵרוּגְזָא עֵינִי אִתְּעָק נַפְשִׁי וּכְרֵיסִי: ^sl-31-10

**11** אֲרוּם שְׁצִיאוּ בִּדְוָנָא חַיַי וּשְׁנַי בְּתִנְחֲתָא תְּקַל בְּחוֹבִי חֵילִי וְאֵבָרַי חֲשַׁכוּ: ^sl-31-11

**12** מִן כָּל מְעִיקַי הֲוֵתִי כְסוּפָא וּלְשֵׁבָבִי לַחֲדָא וּדְלוֹחָא לְיָדְעִין לִי דְחָמִין לִי בְשׁוּקָא עָרְקִין מִן קֳדָמָי: ^sl-31-12

**13** אִתְנְשֵׁיתִי הֵיךְ שְׁכִיבָא מִן רַעְיוֹנָא הֲוֵיתִי כְּמָן דִפְחַר תְּבִיר: ^sl-31-13

**14** מְטוּל דִי שְׁמַעֵית טִיב בִּישׁ דְאָמְרִין עֲלַי עַמְמִין סַגִיאִין רְתִיתָא מֵחֲזוֹר חֲזוֹר בְּאִתְכַּנְשֵׁיהוֹן כַּחֲדָא עֲלַי לְמִסַב נַפְשִׁי חֲשִׁיבוּ: ^sl-31-14

**15** וַאֲנָא עֲלָךְ רְחִיצֵית יְיָ אַמְרֵית אֱלָהִי אַנְתְּ: ^sl-31-15

**16** בְּאַיְדָךְ זִמְנֵי פוּרְקָנִי פְּצֵי יָתִי מִן יַד בַּעֲלֵי דְבָבַי וּמֵרָדְפָי: ^sl-31-16

**17** אַנְהַר סְבַר אַפָּךְ עַל עַבְדָךְ פְּרוֹקְנִי בְטוּבָךְ: ^sl-31-17

**18** יְיָ לָא אֶבְהַת אֲרוּם קְרִיתָךְ יִבְהֲתוּן רַשִׁיעַי יִשְׁתְּקוּן וְיֵחַתוּן לְשֵׁיוֹל: ^sl-31-18

**19** תִּתְפַּקְקָן סִפְוָת שִׁקְרָא דְמַלְלָן עַל צַדִיקַיָא גִדוּפִין בְּגֵיוְתָנוּתָא וּבַסְרָנוּתָא: ^sl-31-19

**20** כְּמָא סַגִי טוּבָךְ דְאַטְשֵׁיתָא לְדָחֲלִין מִנָךְ עֲבַדְתָּא לְסָבְרִין עֲלָךְ לְמִפְרַע לְהוֹן אֲגַר טָב קֳבֵיל בְּנֵי נָשָׁא: ^sl-31-20

**21** תִטְמְרִינוּן בְּטוּמְרָא בְּעִדַן רוּגְזָךְ מִגְדוּדֵי גִבָּרַיָא תִּטְשִׁנוּן כַּד בִּמְטַלַלְתָּא מִתִּגְרַת לִישָׁנַיָא: ^sl-31-21

**22** בְּרִיךְ יְיָ אֲרוּם פָּרֵשׁ טִיבוּתֵיהּ לִי בְּקַרְתָּא כְרִיכְתָּא: ^sl-31-22

**23** וַאֲנָא אֲמַרֵית בְּאִתְבָּעוּתִי לְמֶעְרוֹק אִשְׁתְּצֵיתִי מִקְבֵיל יְקָרָךְ בְּקוּשְׁטָא שָׁמַעְתָּ קָל צְלוֹתִי בְּאִתְחַנָנוּתִי לְוָתָךְ: ^sl-31-23

**24** רְחוּמוּ יַת יְיָ כָּל חֲסִידוֹי מְהֵימְנַיָא נָטִיר מִן בִּישׁ יְיָ וּפָרֵעַ עַל דוֹרְבָּנֵי דְעָבְדִין גֵיוְתָנוּתָא: ^sl-31-24

**25** תְּקוּפוּ וְיִתְעֲלָם רַעְיוֹנְכוֹן כָּל דְכָלְיָן לְמֵימְרָא דַיְיָ: ^sl-31-25

## Capítulo 32

**1** לְדָוִד שִׂכְלָא טָבָא אֲמַר דָוִד טוּבוֹי דְמִן דְשַׁבְקִין לֵיהּ מְרוֹדוֹי חָפְיָן עַל חֶטְאוֹי: ^sl-32-1

**2** טוּבוֹי דְבַר נָשָׁא דְלָא חֲשִׁיב יְיָ לֵיהּ עֲוָיָן וּדְלָא בְרוּחֵיהּ נִכְלָא: ^sl-32-2

**3** מְטוּל דְשַׁתְקֵית מִן פִּתְגָמֵי אוֹרַיְתָא בַּלְיָן גַרְמַי כְּנַהֲמוּתִי כּוֹלָא יוֹמָא: ^sl-32-3

**4** אֲרוּם יֵימָם וְלֵילֵי תְּקִיפַת עֲלַי מַחֲתָךְ אִתְהַפֵּךְ רוּטְבִי הֵיךְ שַׁרְבָּא דְקַיְטָא לְעַלְמָא: ^sl-32-4

**5** חוֹבְתִּי אוֹדְעִנָךְ וְעַוְיָתִי לָא חֲפֵית אֲמַרֵית אוֹדֵי עַל מְרוֹדַי קֳדָם יְיָ וְאַתְּ שְׁבַקְתָּא עֲוָיָת חוֹבִי לְעָלְמִין: ^sl-32-5

**6** מְטוּל דָא יְצַלֵי כָּל חֲסִידָא קֳדָמָךְ לְעִידָן רְעוּתֵיהּ לְחוֹד דְיֵיתוּן עַמְמִין סַגִיאִין הֵיךְ מַיָא לְוָתֵיהּ לָא יִמְטוּן לְמַבְאָשָׁא: ^sl-32-6

**7** אַתְּ הוּא יְיָ טְמוֹר לִי מִמְעִיקָא תִנְטְרִנַנִי בִּיעַת שֵׁזָבוּתָא תַּחְזְרִנַנִי לְעָלְמָא: ^sl-32-7

**8** אַשְׂכְּלִינָךְ וְאַלְפִינָךְ בְּאוּרְחָא דְנָן תְּהַךְ אֶמְלְכִנָךְ וַאֲשַׁוֵי עֲלָךְ לְטָבָא עַיְנָי: ^sl-32-8

**9** לָא תֶהֱווּן כְּסוּסְיָא וְהֵיךְ כּוּדְנָא דְלֵית לְהוֹן בְּיוֹנָא בִזְמָמָא וּבִפְרוּמְבְּיָא תִקוּנֵיהּ לְאִתְחֲסָמָא כַּחֲדָא לָא יִתְקְרֵב לְוָתָךְ: ^sl-32-9

**10** סַגִיאִין כֵּיבִין לְרַשִׁיעָא וּדְכָלֵי בַיָי טֵיבוּתָא יַחְזְרִינֵהּ: ^sl-32-10

**11** חֲדוּ בְמֵימְרָא דַייָ וּבְעוּ צַדִיקַיָא וְשַׁבָּחוּ כָּל תְּרִיצֵי לִבָּא: ^sl-32-11

## Capítulo 33

**1** שַׁבַּחוּ צַדִיקַיָא קֳדָם יְיָ לִתְרִיצֵי יָאִי שַׁבַּחְתָּא: ^sl-33-1

**2** אוֹדִיאוּ קֳדָם יְיָ בְכִנָרָא בְּנִבְלָא דַעֲסַרְתֵּי נִימִין שַׁבַּחוּ לֵיהּ: ^sl-33-2

**3** שַׁבַּחוּ קֳדָם יְיָ שִׁירְתָא חַדְתָּא אוֹטִיבוּ לְשַׁבָּחָא בְּיַבָּבָא: ^sl-33-3

**4** מְטוּל דְתַקִין פִּתְגָמָא דַייָ וְכָל עוֹבָדוֹי בְּהֵימָנוּתָא: ^sl-33-4

**5** רָחֵם צִדְקָתָא וְדִינָא טוּבָא דַייָ מַלְיָא אַרְעָא: ^sl-33-5

**6** בְּמִלָא דַייָ שְׁמַיָא אִתְעֲבִידוּ וּבְרוּחָא דְפוּמֵיהּ כָּל חֵילְהוֹן: ^sl-33-6

**7** דְמַכְנִיס הֵיךְ זִיקָא מוֹי דְיַמָא יַהֲבִנוּן בְּאַפּוֹתִיקֵי תְהוֹמַיָא: ^sl-33-7

**8** וְיִדְחֲלוּן מִן קֳדָם יְיָ כָּל יָתְבֵי אַרְעָא מִנֵיהּ יִרְתְתוּן כָּל דַיְרֵי תֵבֵל: ^sl-33-8

**9** מְטוּל דְהוּא אֲמַר וַהֲוֵי הוּא פַּקֵיד וְאִתְקַיָם: ^sl-33-9

**10** יְיָ תְּבַר מִלְכַת עַמְמַיָא בַּטֵל מַחְשְׁבַת אוּמַיָא: ^sl-33-10

**11** מִלְכְּתָא דַייָ לְעַלְמָא קָיְמָא מַחְשְׁבַת לִבֵּיהּ לְדָרֵי דָרַיָא: ^sl-33-11

**12** טוּבוֹי דְגַבְרָא דַייָ אֱלָהֵיהּ עַמָא דִי בְחַר לְאַחְסָנָא לֵיהּ: ^sl-33-12

**13** מִן שְׁמַיָא אִסְתַּכַּל יְיָ חֲמָא יַת כָּל בְּנֵי נָשָׁא: ^sl-33-13

**14** מִמְדוֹר בֵּית מוֹתָבֵיהּ אוֹדִיק לְוַת כָּל יָתְבֵי אַרְעָא: ^sl-33-14

**15** דִי בְרָא יַתְהוֹן מְכַוֵן כַּחֲדָא לִבְּהוֹן וּמִתְבּוֹנֵן לְכָל עוֹבָדֵיהוֹן: ^sl-33-15

**16** לֵית מַלְכָּא מִתְפְּרַק בְּסִגְעֵי חֵילְוָתֵהּ גִבָּרָא לָא מִתְפְּצֵי בְסִגְעֵי חֵילֵיהּ: ^sl-33-16

**17** שִׁקְרָא סוּסָא לְפוּרְקָנָא וּבְסִגְעֵי תוּקְפֵיהּ לָא מִשְׁתְּזֵיב: ^sl-33-17

**18** הָא עֵינָא דַייָ מִסְתַּכֵּל לְדַחֲלִין מִנֵיהּ לְסָבְרִין לְטִיבוּתֵיהּ: ^sl-33-18

**19** לְמִפְצֵי מִמוֹתָא נַפְשֵׁיהוֹן וּלְקַיָמוּתְהוֹן בְּאוּלְצָנָא: ^sl-33-19

**20** נַפְשָׁנָא מִסְתַּכְיָא לְפוּרְקָנָא דַייָ סְעוּדָנָא וּתְרֵיסָנָא הוּא: ^sl-33-20

**21** אֲרוּם בְּמֵימְרֵיהּ יֶחְדֵי לִבָּנָא מְטוּל דִבְשׁוּם קוּדְשֵׁיהּ אִתְרְחֵצְנָא: ^sl-33-21

**22** יְהֵא טוּבָךְ יְיָ עֲלָנָא הֵיכְמָא דְסָבְרִינָן עֲלָךְ: ^sl-33-22

## Capítulo 34

**1** לְדָוִד כַּד שַׁנֵי יַת מַדְעֵיהּ קֳדָם אֲבִימֶלֶךְ וּפַטְרֵיהּ וַאֲזָל: ^sl-34-1

**2** אֲבָרֵיךְ יַת יְיָ בְּכָל עִדָן תְּדִירָא תּוּשְׁבַּחְתֵּיהּ בְּפוּמִי: ^sl-34-2

**3** בְּמֵימְרָא דַייָ תּוּשְׁבְּחַת נַפְשִׁי יִשְׁמְעוּן עִנְוְתָנַיָא וְיֶחְדוּן: ^sl-34-3

**4** הָבוּ רְבוּתָא קֳדָם יְיָ עִמִי וּנְרוֹמֵם שְׁמֵיהּ כַּחֲדָא: ^sl-34-4

**5** תְּבַעֵית אוּלְפָן מִן קֳדָם יְיָ וַעֲנַנִי וּמִכָּל דַחֲלָתַי פְצֵי יָתִי: ^sl-34-5

**6** אִסְתַּכַּלוּ לְוָתֵיהּ וְאִתְנַהֲרוּ וְאַפֵּיהוֹן לָא עֲצָבוּ: ^sl-34-6

**7** דֵין עַנְיָא צַלֵי קֳדָם יְיָ שְׁמִיעַ וּמִכָּל עָקְתוֹי פַּרְקֵיהּ: ^sl-34-7

**8** שְׁרֵי מַלְאֲכָא דַייָ חֲזוֹר חֲזוֹר לְדָחֲלִין מִנֵיהּ וְשֵׁזֵיב הִנוּן: ^sl-34-8

**9** אִשְׁתְּמוֹדְעוּן וַחֲמוֹן אֲרוּם טָב יְיָ טוּבוֹי לִגְבַר דְאִתְרְחֵיץ בְּמֵימְרֵיהּ: ^sl-34-9

**10** דְחִילוּ מִן קֳדָם יְיָ קַדִישׁוֹי אֲרוּם לֵית חוּסְרָנָא לְדָחֲלוֹי: ^sl-34-10

**11** בְּנֵי אַרְיְוָן אִתְמַסְכַּנוּ וּכְפַנוּ וְתָבְעֵי אוּלְפָנָא דַייָ לָא חָסְרִין כָּל טוּבָא: ^sl-34-11

**12** אֱזִילוּ בְּנַיָא קַבִּילוּ מִנִי דְחַלְתָּא דַייָ אַלֵיף יַתְכוֹן: ^sl-34-12

**13** מַן גַבְרָא דְבָעֵי חַיֵי רָחֵם יוֹמַיָא לְמֶחֱמֵי טָבָא: ^sl-34-13

**14** טוֹר לִישָׁנָךְ מִבִּישׁ וְסִפְוָתָךְ מִלְמַלָלָא נִכְלָא: ^sl-34-14

**15** זוֹר מִבִּישׁ וַעֲבֵד טָב בְּעֵי שְׁלָמָא וּרְדַף בַּתְרוֹהִי: ^sl-34-15

**16** עֵינוֹי דַייָ לְוַת צַדִיקַיָא וְאוּדְנוֹי לְקַבָּלָא צְלוֹתְהוֹן: ^sl-34-16

**17** פַּרְצוּפָא דַייָ רְגִיז בְּעָבְדֵי בִּישָׁא לְשֵׁצָאָה מִן אַרְעָא דָכְרָנְהוֹן: ^sl-34-17

**18** צַלְיָן צַדִיקַיָא וּקְדָם יְיָ שְׁמִיעַ וּמִכָּל עֲקָתְהוֹן פְּצִנוּן: ^sl-34-18

**19** קָרִיב יְיָ לִתְבִירֵי לִבָּא וְיַת מַכִּיכֵי רוּחָא יִפְרוֹק: ^sl-34-19

**20** סַגִיאִין בִּישָׁן מְעַרְעָן לְצַדִיקָא וּמִן כּוּלְהוֹן פְּצָא לֵיהּ יְיָ: ^sl-34-20

**21** נָטֵר לְכוּלְהוֹן אֵבְרוֹי חֲדָא מִנְהוֹן לָא מִתַּבְרָא: ^sl-34-21

**22** מִיתוֹתָא דְרַשִׁיעָא בִּישָׁא וְסַנְאִי צַדִיקָא יִתְחַיְבוּן: ^sl-34-22

**23** פְּרוֹק יְיָ נַפְשָׁא דְעַבְדוֹי וְלָא מִתְחַיְבִין כָּל דְסָבְרִין בְּמֵימְרֵיהּ: ^sl-34-23

## Capítulo 35

**1** לְדָוִד אִתְגַר יְיָ בְּמָרֵי תִגְרִתִי סַדַר קְרָב קֳבֵל בַּעֲלֵי קְרָבְתִּי: ^sl-35-1

**2** אַתְקִיף תְּרִיס וַעֲגִיל וְקוּם בְּסַעְדִי: ^sl-35-2

**3** וּשְׁלוֹף מוּרְגִיתָא וּטְרוֹק לְאוּרְעוּת רָדְפַי אֱמַר לְנַפְשִׁי פָּרִיקָךְ אֲנָא: ^sl-35-3

**4** יִבְהֲתוּן וְיִכְסְפוּן תָּבְעֵי נַפְשִׁי יִרְתְעוּן לַאֲחוֹרָא וְיִתְכַּנְעוּן חָשְׁלֵי בִישׁוּתִי: ^sl-35-4

**5** יֶהֱוְיָן הֵיךְ מוֹזָא קֳדָם זַעֲפָא וּמַלְאֲכָא דַייָ דָחֵי: ^sl-35-5

**6** יְהִי אוֹרְחַתְהוֹן חֲשׁוֹכָא וַחֲסִירָא וּמַלְאֲכָא דַייָ רָדֵיף לְהוֹן: ^sl-35-6

**7** אֲרוּם מַגָן פְּרַסוּ לְוָתִי שְׁיַח מְצָדְהוֹן מַגָן כְּמַנוּ לְנַפְשִׁי: ^sl-35-7

**8** תֵּיתֵיהּ שִׁלְיָא לָא יִתְחַכַּם וּמְצַדְתֵּיהּ דִי פְרַס תְצַיְדֵיהּ בְּשִׁלְיָא יִפּוֹל בָּהּ: ^sl-35-8

**9** וְנַפְשִׁי תֶּחְדֵי בְּמֵימְרָא דַייָ תְּדוּץ בְּפוּרְקָנֵיהּ: ^sl-35-9

**10** כּוּלְהוֹן אֵבָרַי תֶּהֶוְיָן אָמְרִין יְיָ מַן כְּוָתָךְ פְּצֵי עַנְיָא מִן תַּקִיף מִנֵיהּ וַעֲנִיָא וַחֲשִׁיכָא מִן אַנְסְיֵהּ: ^sl-35-10

**11** קָיְמִין סָהֲדֵי חֲטוֹפִין מִן דְלָא חַכִּימֵית שָׁיְלִין לִי: ^sl-35-11

**12** פְּרָעִין לִי בִּישְׁתָּא חֲלָף טָבְתָא בְּעָן לְמִתְכַּל לְנַפְשִׁי: ^sl-35-12

**13** וַאֲנָא בְּעִדָן מַרְעוּתְהוֹן לְבִישֵׁת סַקָא סַגְפֵית בְּצוֹמָא נַפְשִׁי וּצְלוֹתִי עַל עוּבִי תְּתוּב: ^sl-35-13

**14** הֵיךְ חַבְרָא וְהֵיךְ אֲחָא דִילִי הַלְכֵית הֵיךְ אֲבֵילָא דְמִתְאַבֵּל עַל אִמֵיהּ חַכִּיר שֵׁחַיֵת: ^sl-35-14

**15** וּבְתִבְרִי חֲדוּ וְאִתְכַּנָשׁוּ מִתְכַּנְשִׁין עֲלֵי רַשִׁיעַיָא דְמַכְּכִין לִי בְּמִלְהוֹן וְלָא חַכִּימֵית אִלוּ מְבַזְעִין מַשְׁכִי וְלָא מַפְקִין דְמָא: ^sl-35-15

**16** בְּמִלֵי שְׁעִיעוּתָא וּמַרְהֲבַיָא וּמְמַקְנַיָא מְעַסַן עֲלַי כַּכֵיהוֹן: ^sl-35-16

**17** יְיָ כְּמָה אַתְּ חָמֵי אֲתִיב נַפְשִׁי מִשִׁלְיָתְהוֹן מִבְּנֵי אַרְיְוַיָא גוּשְׁמִי: ^sl-35-17

**18** אוֹדֵי קֳדָמָךְ בִּכְנִשְׁתָּא רַבָּא בְּעַמָא תַקִיפָא אֲשַׁבְּחִנָךְ: ^sl-35-18

**19** לָא יֶחְדוּן עֲלַי בַּעֲלֵי דְבָבַי שִׁקְרָא סָנְאַי מַגָן רָמְזִין בְּעֵינֵיהוֹן: ^sl-35-19

**20** אֲרוּם לָא שְׁלָמָא מְמַלְלִין וְעַל צַדִיקֵי אַרְעָא דְנָיְחִין בְּעַלְמָא הַהוּא מִלֵי נִכְלִין מְחַשְׁלִין: ^sl-35-20

**21** וְאַפְּתִיאוּ עֲלַי פֻּמְהוֹן אֲמַרוּ חֶדְוָא חֶדְוָא חֲמָת עֵינָנָא: ^sl-35-21

**22** חֲמֵיתָא יְיָ לָא תִשְׁתּוֹק יְיָ לָא תִתְרָחֵיק מִנִי: ^sl-35-22

**23** אִתְּעָר וְתָקִיץ לְדִינִי אֱלֹהַי וּמָרֵי נִצְחָנִי יְיָ לְתִגְרְתִי: ^sl-35-23

**24** דוּן יָתִי כְצִדְקָתָךְ יְיָ אֱלָהִי וְלָא יֶחְדוּן עֲלָי: ^sl-35-24

**25** לָא יֵימְרוּן בְּלִבְּהוֹן חֲדִיאָת נַפְשָׁנָא דִלְמָא יֵימְרוּן גַמֵרְנָא יָתֵיהּ: ^sl-35-25

**26** יִבְהֲתוּן וְיִתְכָּנְעוֹן כַּחֲדָא דְחָדַיִן עַל בִּישְׁתִּי יִלְבְּשׁוּן בַּהֲתָא וְכִסוּפָא דְמִתְרַבְרְבָן עֲלָי: ^sl-35-26

**27** יְבוּעוּן וְיֶחְדוּן תָּבְעֵי צִדְקִי וְיֵימְרוּן תְּדִירָא יִסְגֵי יְקָרָא דַייָ דְצָבֵי שְׁלָמָא דְעַבְדֵיהּ: ^sl-35-27

**28** וְלִישְׁנֵי תְּרַנֵן צִדְקָתָךְ כּוּלֵי יוֹמָא תּוּשְׁבַּחְתָּךְ: ^sl-35-28

## Capítulo 36

**1** לְשַׁבָּחָא לְעַבְדָא דַייָ לְדָוִד: ^sl-36-1

**2** אֲמַר מְרָדָא לְחַיָבָא בִּמְצִיעוּת לְבָבִי לֵית דְחַלְתָּא דַייָ לִקְבֵיל עֵינוֹי: ^sl-36-2

**3** אֲרוּם שְׁעִיַא לֵיהּ בְּעֵינוֹי לְמִשְׁכַּח חוֹבִין לְמִסְגֵי אוּלְפָנָא: ^sl-36-3

**4** מִלֵי פוּמֵיהּ רִישְׁעָא וּנְכִילוּ פְּסַק לְמִשְׂכַּל לְאוֹטָבָא: ^sl-36-4

**5** רִשְׁעָא חֲשִׁיל עַל שִׁוְיֵהּ יִתְעַתַּד עַל אוֹרַח דְלָא טָב בִּישׁ לָא יְרַחֵק: ^sl-36-5

**6** יְיָ בִּשְׁמֵי שְׁמַיָא טוּבָךְ הֵימְנוּתָךְ עַד שְׁחָקֵי: ^sl-36-6

**7** צִדְקוּתָךְ רָמָא הֵיךְ טוּרַיָא תָקִיפָא דִינָךְ עֲמִיקִין הֵיךְ תְּהוֹמָא רַבָּא בְּנֵי נָשָׁא וּבְעִירָא תִּפְרוֹק יְיָ: ^sl-36-7

**8** כְּמָה יַקִיר טוּבָךְ יְיָ וּבְנֵי נָשָׁא בִּטְלַל שְׁכִנְתָּךְ יִשְׁרוּן לְרוֹחֲצָן: ^sl-36-8

**9** יִתְרַוְיוּן בִּדְהֵן בִּרְכָתָא דְבֵיתָךְ וּמַבּוּעַ בְּסִימוּתָךְ תַּשְׁקִנוּן: ^sl-36-9

**10** אֲרוּם עִמָךְ טְיָבֵי מַיִן חַיִין בְזִיו יְקָרָךְ נֶחֱמֵי נְהוֹרָא: ^sl-36-10

**11** נְגוֹד טוּבָךְ עַל יָדְעָךְ וְצִדְקָתָךְ עַל תְּרִיצֵי לִבָּא: ^sl-36-11

**12** לָא תְעַרְעִנַנִי רִגְלָא דְגֵיוְתָנָא וִידֵיהוֹן דְרַשִׁיעַיָא לָא תְטַלְטְלִנַנִי: ^sl-36-12

**13** תַּמָן נְפַלוּ עָבְדֵי שְׁקַר יִדְחֲיִן וְלָא יוֹסִיפוּן לְמֵקָם: ^sl-36-13

## Capítulo 37

**1** לְדָוִד לָא תְגָרֵג בְּמִבְאֲשִׁין לְמֶהֱוֵי דִכְוָתְהוֹן וְלָא תַטְנֵין בְּעָבְדֵי טְלוּמָא לְמִזְדַוֵג עִמְהוֹן: ^sl-37-1

**2** מְטוּל דְסוֹפֵיהוֹן הֵיךְ עִסְבָּא בְּסִרְהוֹבְיָא יִתְמוֹלְלוּ וְהֵיךְ יְרוֹק דִתְאָה יְנַתְּרוּן: ^sl-37-2

**3** רְחֵיץ בְּמֵימְרָא דַייָ וַעֲבַד טָב שְׁרֵי אַרְעָא וַחֲסֵן בְּהֵימְנוּתָא: ^sl-37-3

**4** וְתִתְפְּנֵק עַל יְיָ וְיִתֶּן לָךְ מִשְׁיָלֵי לִבָּךְ: ^sl-37-4

**5** גַלֵי עַל יְיָ אָרְחָתָךְ וּסְבוֹר עַל מֵימְרֵיהּ וְהוּא יַעְבֵּד: ^sl-37-5

**6** וְיִפּוֹק הֵיךְ נְהוֹרָא צִדְקָךְ וְדִינָךְ הֵיךְ טִיהֲרָא: ^sl-37-6

**7** שְׁתוֹק קֳדָם יְיָ וְאוֹרִיךְ לֵיהּ לָא תְגָרֵג בְּרַשִׁיעָא דְמַצְלָח אוֹרְחֵיהּ בְּגַבְרָא דְעָבֵיד עֵיצַת חֶטְאִין: ^sl-37-7

**8** אוֹרֵיךְ מֵרְגֵז וּשְׁבוֹק רִתְחָא לָא תְגָרֵג בְּרַם לְאַבְאָשָׁא: ^sl-37-8

**9** מְטוּל דְמִבְאֲשִׁין יִשְׁתֵּיצוּן וּדְסָבְרִין בְמֵימְרָא דַייָ הִנוּן יִירְתוּן אַרְעָא: ^sl-37-9

**10** וְתוּב בִּזְעֵיר וְלֵית רַשִׁיעָא וְתִתְבַּיֵן עַל אַתְרֵיהּ וְלֵיתוֹי: ^sl-37-10

**11** וְעֶנְוְתָנִין יִרְתוּן אַרְעָא וְיִתְפַּנְקוּן עַל סְגִיעוּת שְׁלָמָא: ^sl-37-11

**12** חָשֵׁב רַשִׁיעָא בִּישׁ עַל צַדִיקָא וּמְעַסֵי עֲלוֹי כַּכוֹי: ^sl-37-12

**13** יְיָ יִגְחַךְ עֲלוֹי אֲרוּם חָמָא אֲרוּם עָל יוֹמָא דִתְבִירֵיהּ: ^sl-37-13

**14** חַרְבָּא שְׁלִיפוּ רַשִׁיעַיָא וּמְתַחוּ קַשְׁוָתְהוֹן לְמִקְטוֹל עֲנִיֵי וַחֲשִׁיכֵי לְמִכּוֹס תְּרִיצֵי אוּרְחָא: ^sl-37-14

**15** סַיָפְהוֹן תֵּעוֹל בְּלִבְּהוֹן וְקַשְׁוָתְהוֹן יִתַּבְּרוּן: ^sl-37-15

**16** טָב קֳדָם יְיָ זְעֵרוּת צַדִיקַיָא מֵרִכְפַּת רַשִׁיעִין סַגִיעִין: ^sl-37-16

**17** אֲרוּם דְרוֹעֵי דְרַשִׁיעַיָא יִתַּבְּרוּן וְתָמִיךְ צַדִיקַיָא מֵימְרָא דַיְיָ: ^sl-37-17

**18** יְדִיעִין קֳדָם יְיָ יוֹמֵיהוֹן דִשְׁלֵמִין וְאַחְסַנְתֵּהוֹן לַעֲלַם תְּהֵי: ^sl-37-18

**19** לָא יִבְהֲתוּן בְּעִדָן בִּישְׁתָּא וּבְיוֹמֵי אוּלְצָנָא סָבְעִין: ^sl-37-19

**20** אֲרוּם רַשִׁיעַיָא יֵיבְדוּן וּבַעֲלֵי דְבָבַיָא דַייָ הֵיךְ יְקַר פַּלְגִיסִין דְמִין אַוְלָא מִתְפַּטְמִין וְסוֹפֵיהוֹן מִתְנַכְסִין הֵיכְנָא רַשִׁיעֵי יְסוּפוּן וּבִתְנָן גֵהִנָם יִגְמְרוּן: ^sl-37-20

**21** מוֹזִיף רַשִׁיעָא וְלָא פְרַע וְצַדִיק מְחַיֵס וִיהַב: ^sl-37-21

**22** מְטוּל דְמִתְבָּרְכִין בְּמֵימְרָא יִרְתוּן אַרְעָא וּדְמִתְלָטְטֵין בְּמוֹתָא יִשְׁתְּצוּן: ^sl-37-22

**23** מִן קֳדָם יְיָ פְּסִיעָתוֹ דְגַבְרָא מְתַקְנָן וְאוֹרְחָתֵיהּ יִתְרְעֵי: ^sl-37-23

**24** אֲרוּם יִפּוֹל מְרַע לָא יְמוּת מְטוּל דַייָ סָעִיד בִּידֵיהּ: ^sl-37-24

**25** טָלֵי הֲוֵית בְּרַם סִיבִית וְלָא חֲמֵית צַדִיקָא שְׁבִיקָא וּבְנוֹי תָּבְעִין לַחְמָא מֵחוּסְרָנָא: ^sl-37-25

**26** מִן בִּגְלָל דְכָל יוֹמָא חָיֵס וּמוֹזִיף וְדַרְעֵיהּ לְבִרְכְתָא: ^sl-37-26

**27** סְטֵי מִבִּישׁ וַעֲבַד טִיבוּ וּשְׁרֵי לְחַיֵי עָלְמָא: ^sl-37-27

**28** אֲרוּם יְיָ רְחֵם דִינָא וְלָא יִשְׁבּוֹק יַת חֲסִידוֹי לַעֲלַם מְנַטְרִין וּבְנֵיהוֹן דְרַשִׁיעַיָא יִשְׁתֵּצוּן: ^sl-37-28

**29** צַדִיקַיָא יַחְסְנוּן אַרְעָא וְיִשְׁרוּן לְעַלְמִין עֲלָהּ: ^sl-37-29

**30** פּוּמָא דְצַדִיקַיָא רָנֵן חוּכְמְתָא וְלִישָׁנֵיהּ מְמַלְלָא דִינָא: ^sl-37-30

**31** נִימוּסָא דֶאֱלָהֵיהּ בְּלִבֵּיהּ לָא מִזְדַעְזְעִין אִסְתַּוְרוֹי: ^sl-37-31

**32** מִסְתְּכֵי רַשִׁיעָא לְצַדִיקָא וּבָעֵי לְמִקְטְלֵיהּ: ^sl-37-32

**33** יְיָ לָא יִשְׁבְּקִנֵיהּ בִּידֵיהּ וְלָא יְחַיְבִנֵיהּ בְּמִדַיְנֵיהּ: ^sl-37-33

**34** סְבַר בְּמֵימְרֵיהּ דַייָ וְטַר אָרְחֵיהּ וִירוֹמְמִנָךְ לְמֶחְסַן אַרְעָא בְּאִשְׁתְּצָיוּת רַשִׁיעַיָא תֶחֱמֵי: ^sl-37-34

**35** חֲמִיתִי רַשִׁיעָא תַקִיפָא וְחָסִין הֵיךְ אִילָן יַצִיב וְעַבּוּף: ^sl-37-35

**36** וּפְסַק מִן עַלְמָא וְהָא לֵיתוֹי וּבְעֵית יָתֵיהּ וְלָא אִשְׁתְּכָח: ^sl-37-36

**37** נְטַר שְׁלֵימוּתָא וַחֲמֵי תְרִיצוּתָא אֲרוּם דְסוֹף בַּר נְשָׁא שְׁלָמָא: ^sl-37-37

**38** וּמְרוֹדִין יִשְׁתֵּיצוּן כַּחֲדָא סוֹפֵיהוֹן דְרַשִׁיעַיָא שֵׁיצְיָא: ^sl-37-38

**39** וּפוּרְקָנָא דְצַדִיקַיָא מִן קֳדָם יְיָ עוּשְׁנְהוֹן בְּעִדָן עָקְתָא: ^sl-37-39

**40** וְסַיְעִינוּן יְיָ וְשֵׁזִיב יַתְהוֹן שֵׁזֵיב יַתְהוֹן מִן חַיָבַיָא וְיִפְרְקִנוּן מְטוּל דְאִתְרְחִיצוּ בְּמֵימְרֵיהּ: ^sl-37-40

## Capítulo 38

**1** תֻּשְׁבַּחְתָּא לְדָוִד דָכְרָנָא טָבָא עַל יִשְׂרָאֵל: ^sl-38-1

**2** יְיָ לָא בְרוּגְזָךְ תְּכַסֵן יָתִי וְלָא בְרִתְחָךְ תִּרְדֵי יָתִי: ^sl-38-2

**3** מְטוּל דְגִירָךְ אִתַּחֲתָן עֲלָי וּשְׁרָת עֲלַי מְחַת יְדָךְ: ^sl-38-3

**4** לֵית אָסוּ בְּגוּשְׁמִי מִן קֳדָם רוּגְזָךְ לֵית שְׁלָם בְּאֵבָרַי מִן קֳדָם חוֹבִי: ^sl-38-4

**5** אֲרוּם חוֹבַי עֲבַרוּ רֵישִׁי הֵיךְ מְטוּל יַקִיר יְקַרוּ מִנִי: ^sl-38-5

**6** סְרִיאוּ מְאִיסוּ הַלְבְּשׁוּשַׁי מִן קֳדָם טִפְּשׁוּתִי: ^sl-38-6

**7** עֲקִימֵית שֵׁחַיֵת עַד לַחֲדָא כָּל יוֹמָא חַכִּיר הַלְכִית: ^sl-38-7

**8** אֲרוּם כְּסָלַי אִתְמַלְיָן קְדִיחֲתָא וְלֵית אָסוּ בְּגוּשְׁמִי: ^sl-38-8

**9** פָּגִית וְאִתְמַכְיִת עַד לַחֲדָא רְגִישִׁית מִנַהֲמוּתָא דְלִבִּי: ^sl-38-9

**10** יְיָ לְקִבְלָךְ כָּל רַגִיגְתִּי וְתִנְחֲתִי מִנָךְ לָא מִטַמְרָא: ^sl-38-10

**11** לִבְבִי צְמַרְמַר שַׁבְקַנִי חֵילִי וּנְהוֹר עֵינֵי בְּרַם הִנוּן לֵיתֵיהוֹן עִמִי: ^sl-38-11

**12** רְחִימַי וְחַבְרַי מִקֳבֵל מַכְתָּשִׁי קָמוּ וּקְרִיבַי מֵרָחֵיק קָיְמִין: ^sl-38-12

**13** וַעֲבַדוּ פַּחִין תָּבְעֵי נַפְשִׁי וּבָעֵי בִּישׁוּתִי מַלִילוּ שִׁקְרָא וְנִכְלָא כָּל יוֹמָא מְרַנְנִין: ^sl-38-13

**14** וַאֲנָא הֵיךְ חָרְשָׁא לָא אֶשְׁמַע וְהֵיךְ אִלְמָנָא דְלָא פְתַח פּוּמֵיהּ: ^sl-38-14

**15** וְהַוֵיתִי כִּגְבַר דְלָא שְׁמַע מֵעַלְמָא וְלָא אִית בְּפוּמֵיהּ מַכְסִנְיָתָא: ^sl-38-15

**16** אֲרוּם קֳדָמָךְ יְיָ צַלֵיתִי אַנְתְּ תְּקַבֵּל יְיָ אֱלָהִי: ^sl-38-16

**17** אֲרוּם אֲמַרֵית דִלְמָא יֶחֱדוּן עֲלַי בְּאִזְדַעְזָעוּת רִגְלִי עֲלַי אִיתְרַבְרַבוּ: ^sl-38-17

**18** אֲרוּם אֲנָא לִתְבִירָא מְעַתַּד וְכֵיבִי לְקִבְלִי תְדִירָא: ^sl-38-18

**19** אֲרוּם חוֹבִי אַתְנֵי אִתְיְצֵף מִן חֶטְאִי: ^sl-38-19

**20** וּבַעֲלֵי דְבָבַי חַיֵי אֲלִימוּ וְסַגִיאִין סָנְאַי עַל שִׁקְרָא: ^sl-38-20

**21** וּפָרְעִין בִּישְׁתָּא חֲלַף טָבְתָא מַסְטְנָן לִי חִלוּפִי דִרְדַפֵית טָב: ^sl-38-21

**22** לָא תִשְׁבְּקִינַנִי יְיָ אֱלָהִי לָא תַּרְחִיק מִינִי: ^sl-38-22

**23** זְרִיז לְסִיוּעִי יְיָ פּוּרְקָנִי: ^sl-38-23

## Capítulo 39

**1** לְשַׁבָּחָא עַל מַטְרַת בֵּית מַקְדְשָׁא עַל פֻּמֵיהּ דִידוּתוּן תֻּשְׁבַּחְתָּא לְדָוִד: ^sl-39-1

**2** אֲמַרֵית אֶנְטוֹר אוֹרְחִי מִלְמֶחֱטֵי בְּלִישָׁנִי אֶנְטוֹר לְפוּמִי זְמָמָא בִּדְאִית רַשִׁיעָא לְקִבְלִי: ^sl-39-2

**3** אִתְאַלְמֵית שְׁתֵקִית בְּטַלֵית מִן פִּתְגָמֵי אוֹרַיְתָא מְטוּל הֵיכְנָא כֵיבִי מְמַרְטֵיט: ^sl-39-3

**4** רָתַח בִּי בְגוּשְׁמֵי בְּרִינְנִי תִדְלַק אֶשְׁתָּא מַלְלֵית בְּלִישָׁנִי: ^sl-39-4

**5** אוֹדַע יְיָ לִי אוֹרַח סוֹפִי וּמִשְׁחַתָּא דְיוֹמַי מְנָא אִינוּן אֵידַע אֵימָתִי אֶפְסוּק מִן עַלְמָא: ^sl-39-5

**6** קַלִילִין סַדַרְתָּא יוֹמַי וְגוּשְׁמֵי כִלְמָא לְקִבְלָךְ בְּרַם כּוֹלָא לִלְמָא חֲשִׁיבִין בְּרַם כּוּלְהוֹן צַדִיקַיָא קַיָמִין לְחַיֵי עָלְמָא: ^sl-39-6

**7** בְּרַם בִּדְיוֹקְנָא דַייָ יִתְהַלֵךְ גַבְרָא בְּרַם לִלְמָא מִשְׁתַּגְשִׁין כָּנֵישׁ וְלָא חַכִּים מְטוּל מְנָא מַן כַּנְשִׁנוּן: ^sl-39-7

**8** וּכְדוּן מְנָא סַבָּרֵית יְיָ אוֹרִיכוּתִי לְוָתָךְ הִיא: ^sl-39-8

**9** מִן כּוּלְהוֹן מְרָדַי פְּצֵי יָתִי חִסוּדֵי סַכְלָא לָא תְשַׁוֵי עֲלַי: ^sl-39-9

**10** אִתְאַלְמֵית וְלָא אֶפְתַּח פּוּמִי מְטוּל דִּי אַנְתְּ עֲבַדְתָּ: ^sl-39-10

**11** אַעְדֵי מֵעֲלַי מַכְתָּשָׁךְ מִמְחַת גְבוּרַת יְדָךְ אֲנָא שֵׁצֵיתִי: ^sl-39-11

**12** בְּמַכְסְנוּתָא עַל חוֹבָא יִתְרְדֵי בַּר נָשָׁא וּמַסְיַת הֵיךְ עַמַר דְאִתְגַרְדֵם גוּשְׁמֵיהּ בְּרַם לְמָא כָּל בַּר נְשָׁא לְעַלְמָא: ^sl-39-12

**13** קַבֵּל צְלוֹתִי יְיָ וּבָעוּתִי אֲצֵית וּלְדִמְעֲתִי לָא תִשְׁתּוֹק אֲרוּם הֵיךְ גִיוֹרָא אֲנָא גַבָּךְ תּוֹתָבָא הֵיךְ כּוּלְהוֹן אֲבָהָתִי: ^sl-39-13

**14** אַשְׁלֵי מִנִי וְאִזֵיל עַד לָא אֵהַךְ וְלָא אִיתָי: ^sl-39-14

## Capítulo 40

**1** לְשַׁבָּחָא לְדָוִד תּוּשְׁבַּחְתָּא: ^sl-40-1

**2** מְסַבָּרָא סַבְּרֵית יְיָ וּצְלָא לְוָתִי וְקַבֵּיל בָּעוּתִי: ^sl-40-2

**3** וְאַסַקְנִי מִגוֹב אִתְרְגוּשְׁתָּא מִסְיֵין טִשְׁטוּשָׁא וַאֲקֵים עַל כֵּיפָא רִגְלַי תַּקִין אַתוּרָי: ^sl-40-3

**4** וְסַדַר בְּפוּמִי שְׁבַח חֲדָתָא תְּהֵי תּוּשְׁבַּחְתָּא קֳדָם אֱלָהָנָא יֶחֱמוּן סַגִיאִין וְיִדְחֲלוּן וְיִסְבְּרוּן בְּמֵימְרָא דַיְיָ: ^sl-40-4

**5** טוּבוֹי דְגַבְרָא דְשַׁוֵי יְיָ רוּחְצָנֵיהּ וְלָא אִסְתְּכֵי לְוַת סוּרְבָנַיָא וּמְמַלְלֵי כַדִיבוּתָא: ^sl-40-5

**6** סַגִיאֵי נִסַיָא דַעֲבַדְתָּא אַתְּ יְיָ אֱלָהִי פְרִישְׁוָתָךְ וּרְעוּתָךְ לְוָתָנָא לֵית אֶפְשַׁר לְסַדָרָא לְוָתָךְ תּוּשְׁבַּחְתָּךְ אַתְנֵי וַאֲמַלֵל תַּקִיפוּ מִן לְחַוָאָה: ^sl-40-6

**7** נִכְסָא וְדוֹרוֹנָא לָא צְבִיתָא אוּדְנִין לְאַצָתָא פוּרְקָנָךְ כְּרֵיתָא לִי עַלְתָא וְקָרְבַּן חַטָאתִי לָא שְׁיֵלְתָּא: ^sl-40-7

**8** הֵידֵין אֲמַרֵית הָא עֲלֵית לְחַיֵי עַלְמָא כַּד אֶעֱסוֹק בִּמְגִלַת סִפְרָא דְאוֹרַיְיתָא דְאִכְּתִיב אַמְטֻלְתִּי: ^sl-40-8

**9** לְמֶעֱבַד רְעוּתָךְ אֱלָהִי רְעֵיתִי וְאוֹרַיְתָךְ כְּלִילָא בִמְצַע מַעְיְנָי: ^sl-40-9

**10** בַּשְׂרֵית צִדְקָא בִּכְנִישְׁתָּא רַבָּא הָא סִפְוָתַי לָא אֶמְנַע יְיָ אֱלָהִי אַתְּ חַכֵּימְתָּ: ^sl-40-10

**11** צִדְקָתָךְ לָא טַמְרֵית בְּגוֹ לִבִּי קוּשְׁטָךְ וּפוּרְקָנָךְ אֲמַרֵית לָא כַסֵיתִי טִיבוּתָךְ וְהֵימָנוּתָךְ בִּקְהָלָא רַבָּא: ^sl-40-11

**12** בִּגְלַל כֵּן אַתְּ יְיָ לָא תִמְנַע רַחֲמָךְ מִנִי טוּבָךְ וְקוּשְׁטָךְ תְּדִירָא יִנְטְרוּנַנִי: ^sl-40-12

**13** אֲרוּם תַּקִיפִין עֲלַי בִּישִׁין עַד דְלֵית מִנְיָן אַדְבִּיקוּ יָתִי חוֹבַי וְלָא יְכֵלִית לְמֶחֱמֵי תְּקַפוּ מִן בִּינְתֵי רֵישֵׁי וְרַעְיוֹנַי שַׁבְקוּנִי: ^sl-40-13

**14** אִתְרְעֵי יְיָ לְשֵׁזָבוּתַנִי יְיָ דְסִיוּעִי זְרִיז: ^sl-40-14

**15** יִבְהַתוּן וְיִתְחַסְדוּן כַּחֲדָא תָּבְעֵי נַפְשִׁי לְמִגְמְרָהּ יְזוּרוּן לַאֲחוֹרָא וְיִכְסְפוּן דְצָבְיָן בִישְׁתִּי: ^sl-40-15

**16** יִתְבַּיְרוּן מְטוּל בַּהֲתֵיהוֹן דְאָמְרִין לִי חֲדֵינָא עַל תַּבְרֵיהּ חֶדְוָא עַל סִגוּפֵיהּ: ^sl-40-16

**17** יֶחְדוּן וִידוּצוּן בְּמֵימְרָךְ כָּל בַּעֲיָךְ וְיֵמְרוּן תְּדִירָא יִסְגֵי חֵילָא דַייָ דִי רָחֲמִין פּוּרְקָנָךְ: ^sl-40-17

**18** וַאֲנָא עַנְיָא וַחֲשׁוֹכָא יְיָ יַחֲשֵׁב טָב לִי עֲלַי סִיוּעִי וְשֵׁזְבוּתִי אַתְּ אֱלָהִי לָא תוֹחַר: ^sl-40-18

## Capítulo 41

**1** לְשַׁבָּחָא תּוּשְׁבַּחְתָּא לְדָוִד: ^sl-41-1

**2** טוּבוֹי דְמַשְׂכִּיל לַעֲנִיֵי מִסְכְּנָא לְרַחֲמוּתֵיהּ בְּיוֹם בִּישׁוּתָא יְשֵׁזְבִינֵיהּ יְיָ: ^sl-41-2

**3** יְיָ יִנְטְרִנֵיהּ וִיחַיִנֵיהּ וְיוֹטְבִינֵיהּ בְּאַרְעָא וְלָא תִמְסְרִינֵיהּ בִּרְעוּת בַּעֲלֵי דְבָבוֹי: ^sl-41-3

**4** מֵימְרָא דַייָ יְסַיְעִנֵיהּ בְּחַיוֹהִי וְיִתְגְלֵי לֵיהּ עַל שִׁווּי מַרְעֵיהּ לַאֲחָיוּתֵיהּ כָּל מִשְׁכְּבֵיהּ אַפַּכְתָּא בְעִדָן מַרְעֵיהּ וְאַכְסַנְתֵּיהּ: ^sl-41-4

**5** אֲנָא אֲמַרֵית יְיָ חוּס עֲלַי אֲסֵי נַפְשִׁי מְטוּל דְחָבִית קָדָמָךְ: ^sl-41-5

**6** בַּעֲלֵי דְבָבִי יֵימְרוּן בִּישׁ עֲלַי אֵימָתֵי יְמוּת וְיוֹבַד שְׁמֵיהּ: ^sl-41-6

**7** וְאִין אֲתָא לְמִקְבַל אַפִּי שִׁקְרָא יְמַלֵיל בְּרַעְיוֹנֵיהּ יִכְנוֹף עַוְלָא לֵיהּ יִפּוֹק לְשׁוּקָא יְמַלֵיל: ^sl-41-7

**8** כַּחֲדָא עֲלַי מְמַלְלִין בַּחֲשֵׁי כָּל סָנְאַי עֲלַי חַשְׁלִין בִּישְׁתָּא לִי: ^sl-41-8

**9** מַמְלֵל טְלוּמָא יַתִּיךְ בֵּיהּ וְיֵימַר דֵין דִמְרַע לָא יוֹסִיף לְמֵיקַם: ^sl-41-9

**10** אוֹף גְבַר דִתְבַע שְׁלוֹמִי דְאִתְרַחֲצִית עֲלוֹי מַבְרֵי סְעוּדְתִּי אִתְרַבְרַב עֲלַי לְחַכָּמָא: ^sl-41-10

**11** וְאַנְתְּ יְיָ חוּס עֲלַי וַאֲקֵימְנִי מִמְרַע וְאֶפְרַע לְהוֹן: ^sl-41-11

**12** בְּהָדָא יְדַעֵית אֲרוּם אִתְרְעֵיתָ בִי אֲרוּם לָא אִתְגַבַּר עֲלַי בַּעֲלֵי דְבָבִי לְאַבְאָשָׁא: ^sl-41-12

**13** וַאֲנָא בִּשְׁלֵמוּתִי סְעַדְתָּ בִּי וְאוֹקַמְתַּנִי קָדָמָךְ לְעָלְמָא: ^sl-41-13

**14** בְּרִיךְ שְׁמֵיהּ דַייָ אֱלָהָא דְיִשְׂרָאֵל מִן עַלְמָא הָדֵין וְעַד עָלְמָא דְאָתִי יֵימְרוּן צַדִיקַיָא אָמֵן וְאָמֵן: ^sl-41-14

## Capítulo 42

**1** לְשַׁבָּחָא בְּשִׂכְלָא טָבָא עַל יְדֵיהוֹן דִבְנֵי קֹרַח: ^sl-42-1

**2** הֵיךְ אַיָלָא דִי מְרַגֵג עַל פַּצִידֵי מַיָא הֵיכְנָא נַפְשִׁי מְרַגְגָא לְוָתָךְ יְיָ: ^sl-42-2

**3** צְחָת לָךְ נַפְשִׁי לֵאלָהָא תַּקִיפָא חַיָא וְקַיָמָא אֵמָתִי אֵעוּל וְאֶחְמֵי זִיו שְׁכִינְתָּא דַייָ: ^sl-42-3

**4** הֲוָת לִי דִמְעָתִי לְמִבְרֵי יֵימָם וְלֵילֵי בִּדְיֵימָר לִי סָנְאָה כָּל יוֹמָא אָן הוּא אֱלָהָךְ: ^sl-42-4

**5** אִלֵין נִיסַיָא אֲנָא דְכִיר וְאֵשׁוֹד עַל רַעֲיוֹנֵי נַפְשִׁי כַּד אַעֲבַר טְלָלָא בִּלְחוֹדִי אֶתְחַיֵל בְמַשְׁרְיָן דְצַדִיקֵי עַד בֵּית מוּקְדְשָׁא דַייָ בְּקַל בָּעוּתָא וְתוּשְׁבַּחְתָּא אִתְרְגוּשֵׁת עַמְמִין דְאָתְיָן לְמֵחַג לִירוּשְׁלֶם: ^sl-42-5

**6** מַה תִתְמַכְּכִין נַפְשִׁי וְתִרְגְשִׁי עֲלַי אוֹרִיכִי לֵאלָהָא אֲרוּם תּוּב אֲשַׁבְּחִנֵיהּ בְּפוּרְקָנָא דְמִן קֳדָמוֹי: ^sl-42-6

**7** אֱלָהִי עֲלַי נַפְשִׁי תִּתְמַכַּךְ בְּגִין כֵּן יִדְכְּרוּנָךְ יָתְבֵי לְהַלְאָה בַּאֲרַע יַרְדְנָא וְיָתְבֵי טוּרֵי חֶרְמוֹנִי וְעַמָא דְקַבִּילוּ אוֹרַיְיתָא בְּטוּרָא דְסִינַי דְמַכִּיךְ וּזְעִיר: ^sl-42-7

**8** תְּהוֹמָא עִלָאָה לִתְהוֹמָא אַרְעָאָה קָרֵי לְקָל זִלְחֵי מַרְזְבָיִךְ הֵיכְנָא כּוּלְהוֹן מִתְבְּרָיִךְ וְגַלְלָיִךְ עֲלַי עָבָרוּ: ^sl-42-8

**9** יֵימָם יִפְקוֹד יְיָ טוּבֵיהּ וּבְלֵילְיָא תּוּשְׁבַּחְתֵּיהּ עִמִי צְלוֹתָא לְאֵל דִי נָטִיר חַיָי: ^sl-42-9

**10** אֵימַר לֶאֱלָהָא רוּחְצָנִי לְמָא אַשְׁלִיתַנִי לְמָא בְּקִבְלָא אֵזִיל בִּדְחוּק בָּעֵיל דְבָבָא: ^sl-42-10

**11** בִּדְקַטְלִין גַרְמִי בִּזְמַן דִמְחָרְפִין יָתִי מְעִיקַי כַּד אָמְרִין לִי כָּל יוֹמָא אָן הוּא אֱלָהָךְ: ^sl-42-11

**12** מַה תִּתְמַכְּכִין נַפְשִׁי וּמַה תִּרְגְשִׁי עֲלָי אוֹרִיכִי לֵאלָהָא אֲרוּם תּוּב אֲשַׁבְּחִינֵהּ בְּפוּרְקָנֵיהּ דְמִן קֳדָמוֹי דִי הוּא אֱלָהִי: ^sl-42-12

## Capítulo 43

**1** דוֹן יָתִי יְיָ בְּדִין קְשׁוֹט וַעֲלָךְ לְמִנְצִי מַצוּתִי מִן עַמָא דְלָא זַכַּאי מִן גְבַר נָכִיל וּטְלוּמָא תְּשֵׁזְבִנַנִי: ^sl-43-1

**2** אֲרוּם אַנְתְּ הוּא אֱלָהָא עוּשְׁנִי לְמָה שְׁבַקְתַּנִי לְמָה חַקִיר אֵיזֵיל בִּדְחוֹק בָּעֵיל דְבָבָא: ^sl-43-2

**3** שְׁדַר נְהוֹרָךְ וְהֵמְנוּתָךְ הִנוּן יְדַבְּרוּנַנִי יֵעַלוּן יָתִי לְטוּר בֵּית מוּקְדָשָׁא וּמֶדְרְשֵׁי בֵּית שְׁכִינְתָּךְ: ^sl-43-3

**4** וְאֵעוּל לִקְרָבָא קוּרְבָּנֵיהּ לְמַדְבַּח דַייָ לֶאֱלָהָא דִי מִנֵיהּ חֶדְוַת בָּעוּתָא וְאוֹדִי קֳדָמָךְ בְּכִנְרָא יְיָ אֱלָהִי: ^sl-43-4

**5** מַה תִּתְמַכְּכִין נַפְשִׁי וּמַה תִּרְגְשִׁי עֲלָי אוֹרִיכִי לֵאלָהָא אֲרוּם תּוּב אֲשַׁבְּחִנֵיהּ בְּפוּרְקָנֵיהּ דְמִן קָדָמוֹי דִי הוּא אֱלָהִי: ^sl-43-5

## Capítulo 44

**1** לְשַׁבָּחָא לְדָוִד עַל יְדֵיהוֹן דִבְנֵי קֹרַח שִׂכְלָא טָבָא: ^sl-44-1

**2** יְיָ בְּאוּדְנָנָא שְׁמַעְנָא אֲבָהָתָנָא אִשְׁתַּעָיוּ לָנָא עוֹבָדָא דַעֲבַדְתָּא בִימֵיהוֹן בְּיוֹמַיָא דִי מִלְקַדְמִין: ^sl-44-2

**3** אַנְתְּ בִּידָא דִגְבוּרְתָּךְ עַמַיָא כְּנַעֲנָאֵי תָרֵכְתָּא וּנְצַבְתִּנוּן לְבֵית יִשְׂרָאֵל בְּאַרְעֲהוֹן תַּבַּרְתָּ עַמַיָא וּפְסַדְתִּנוּן: ^sl-44-3

**4** אֲרוּם לָא בִּגְבוּרַת סַיְפֵהוֹן יְרִיתוּ אַרְעָא וּתְקוֹף אֶדְרָעֵיהוֹן לָא פַּרְקַת לְהוֹן אֲרוּם יְמִינָךְ וְאֶדְרַע גְבוּרְתָּךְ וּנְהוֹר זִיו יְקָרָךְ אֲרוּם כָּל זְמַן דַעֲסִיקוּ בְאוֹרַיְתָא אִתְרְעֵיתָא בְהוֹן: ^sl-44-4

**5** אַנְתְּ הוּא מַלְכִּי אֱלָהָא בְּעִדָנָא הָדָא פַּקֵד פּוּרְקָנוּת דְבֵית יַעֲקֹב: ^sl-44-5

**6** בְּמֵימְרָךְ מְעִיקָנָא נְנַגֵחַ בִּשְׁמָךְ נִכְבּוֹשׁ כָּל דְקָיְמִין עֲלָנָא: ^sl-44-6

**7** אֲרוּם לָא בְּקַשְׁתִּי אֲנָא רָחִיץ וְסַיְפִי לָא תִפְרוֹק יָתִי: ^sl-44-7

**8** אֲרוּם פְּרַקְתְּנָא מִמָעִיקָנָא וּמְשַׂנְאָנָא אַיְתֵיתָא עֲלַוֵיהוֹן בַּהֲתָא: ^sl-44-8

**9** בְּמֵימְרָא דַייָ אֲנָן מְשַׁבְּחִין כָּל יוֹמָא וּשְׁמָךְ נוֹדֵי לְעַלְמֵי עָלְמִין: ^sl-44-9

**10** לְחוֹד אַשְׁלֵיתָא וְאַכְסַפְתָּנָא וְלָא תַשְׁרֵי שְׁכִנְתָךְ בְּחֵלְוָנָא: ^sl-44-10

**11** אַחְזַרְתָּנָא קְדַל קֳדָם מְעִיקָא וּמְשַׂנְאָנָא כְבֵשׁוּ לָנָא: ^sl-44-11

**12** מְסַרְתָּנָא הֵיךְ עָנָא לְמֵיכְלָא וּבֵינֵי עַמְמַיָא בַּדַרְתָּא יָתָנָא: ^sl-44-12

**13** זַבַּנְתָא עַמָךְ מַגָן דְלָא מָמוֹנָא וְלָא אַסְגֵיתָא קִנְיָנָא בְּפֵרוּגֵיהוֹן: ^sl-44-13

**14** שַׁוִיתָנָא קְלָנָא לְשֵׁיבָבָנָא מְמִקְנוּתָא וְתוּרְפִּיתָא לְחַזְרָנוּתָנָא: ^sl-44-14

**15** שַׁוִיתָנָא לְמִתְלָא בְעַמְמַיָא טִלְטוּל רֵישָׁא בְּאוּמַיָא: ^sl-44-15

**16** כָּל יוֹמָא כִּסוּפִי לְקִבְלִי וּבַהֲתַת אַפַּי חֲפָתְנִי: ^sl-44-16

**17** מִן קָלָא דִמְחַסֵד וּמְגַדֵף מִן קֳדָם בָּעֵל דְבָבָא וְנָקִים נִקְמָתָא: ^sl-44-17

**18** כָּל דָא עַרְעַת יְתָנָא וְלָא אַשְׁלִנָךְ וְלָא שַׁקַרְנָא בִקְיָמָךְ: ^sl-44-18

**19** לָא זָר פְּלִיג וּזְחוֹחִית לִבָּנָא וְאַתְּ אַסְטֵיתָא אִסְתַּוְרָנָא מִן תְרִיצַת אָרְחָתָךְ: ^sl-44-19

**20** אֲרוֹם אַמַכְתָּנָא בַּאֲתַר יְרוּדִין וַחֲפִיתָא עֲלָנָא בְטוּלָא דְמוֹתָא: ^sl-44-20

**21** אִין אַשְׁלִינָא שׁוּם אֱלָהָנָא וּפָּרִישְׂנָא בִּצְלוֹ יְדָנָא לִטְעוּתָא דְפַלְחֵי כּוֹכְבַיָא: ^sl-44-21

**22** הֲלָא אֱלָהָא יְבַשְׁקַר דָא אֲרוּם הוּא חַכִּים טְמִירֵי לִבָּא: ^sl-44-22

**23** אֲרוּם מְטוּלְתָךְ אִתְקְטַלְנָא כָּל יוֹמָא אִתְחַשַׁבְנָא כְעָנָא דִמְסִירָא לְנִכְסָא: ^sl-44-23

**24** אִתְגַבַּר לָמָה תְהִי כִגְבַר דָמִיךְ יְיָ אִתְעָר אֱלָהָנָא לָא תִתְנְשִׁי לְעָלְמָא: ^sl-44-24

**25** לָמָה שְׁכִינַת יְקָרָךְ תְּסַלֵק תִּשְׁלֵי סְגוּפְנָא וְדוֹחֲקָנָא: ^sl-44-25

**26** אֲרוּם שִׁיחָא לְעַפְרָא נַפְשָׁנָא דָבְקַת לְאַרְעִית גוּבָא מַעְיְנָנָא: ^sl-44-26

**27** קוּם סַיֵעַ לָנָא וּפְרוֹק יָתָנָא מְטוּל טוּבָךְ: ^sl-44-27

## Capítulo 45

**1** לְשַׁבָּחָא עַל יָתְבֵי סַנְהֶדְרִין דְמֹשֶׁה דְאִתְאֲמַר בִּנְבוּאָה עַל יְדֵיהוֹן דִבְנֵי קֹרַח שִׂכְלָא טָבָא וְתֻשְׁבַּחְתָּא וְאוֹדָאֲתָא: ^sl-45-1

**2** בָּעֵי לִבִּי מַמְלַל טָב אֵימַר אֲנִי עוֹבָדַי לְמַלְכָּא מַמְלַל לִישָׁנֵי מוֹחִי הֵיךְ קוֹלְמוֹס סַפְרָא רָגִיל: ^sl-45-2

**3** שׁוֹפְרָךְ מַלְכָּא מְשִׁיחָא עֲדִיף מִבְּנֵי נְשָׁא אִתְיְהֵיב רוּחַ נְבוּאָה בְסִפְוָתָךְ מְטוּל כֵּן בֵּרְכִנָךְ יְיָ לְעָלְמָא: ^sl-45-3

**4** זָרֵז סַיְפָּךְ עַל יַרְכָךְ גִבָּרָא לְמִקְטַל מַלְכִין עִם שִׁלְטוֹנִין הוֹדָךְ וְשִׁיבְהוֹרָךְ: ^sl-45-4

**5** וְשִׁיבְהוֹרָךְ סַגִי בְּגִין כֵּן תִּצְלַח לְמִרְכַּב עַל סוּסֵי מַלְכוּתָא עַל עֵסַק הֵמְנוּתָא וּקְשׁוֹט וְעִנְוְתָנוּתָא וְצִדְקְתָא וְיַלְפִנָךְ יְיָ לְמֶעְבַּד דְחִילָן בְּיַד יְמִינָךְ: ^sl-45-5

**6** גִרְרָךְ שְׁלִיפִין עַמְמִין תְּחוֹתָךְ יִפְּלוּן וּבְנֵי קַשְׁתָּךְ יִשְׁתַּלְחוּן בְּלֵב סָנְאֵי מַלְכָּא: ^sl-45-6

**7** כּוּרְסֵי יְקָרָךְ יְיָ קַיָים לְעָלְמֵי עַלְמִין חוּטְרָא תְּרֵצְתָּא חוּטְרָא דְמַלְכוּתָךְ: ^sl-45-7

**8** מְטוּל דִי רִחַמְתָּ צִדְקָתָא וּסְנֵיתָא רִשְׁעָא מְטוּל הֵיכְנָא רַבְּיָךְ יְיָ אֱלָהָךְ מִשְׁחָא דְחֶדְוָא יַתִּיר מִן חַבְרָךְ: ^sl-45-8

**9** מֵירָא דַכְיָא וְאַקְסִיל אֲלוֹאִין וּקְצִיעֲתָא מִתְגַמְרִין כָּל לְבוּשָׁיִךְ מִן הֵיכְלַיָא דִמְכַבְּשִׁין בְּשִׁין דְפִיל מֵאֲרַע מִנִי יַחְדוּנָךְ: ^sl-45-9

**10** פַּלְכֵי מַלְכְּוָתָא אָתִין לְמִקְבֵּל אַפָּךְ וּלְיַקְרוּתָךְ בִּזְמַן דִמְעַתַּד סְפַר אוֹרַיְיתָא בִּסְטַר יְמִינָךְ וּמִתְכַּתְּבָא בְּאוֹבָרִיזִין דְמִן אוֹפִיר: ^sl-45-10

**11** שִׁמְעִי כְּנִישְׁתָּא דְיִשְׂרָאֵל אוֹרָיַת פּוּמֵיהּ וַחֲמִי פְרִישָׁת עוֹבָדוֹי וְתִצְלֵי אוּדְנָךְ לְפִתְגָמֵי אוֹרַיְיתָא וְתִתְנְשֵׁי עוֹבָדִין בִּישִׁין דְרַשִׁיעִי עַמֵךְ וּבֵית טַעֲוַת דִפְלַחְתְּ בֵית אֲבוּיִךְ: ^sl-45-11

**12** וּבְכֵן יְרַגֵג מַלְכָּא שׁוּפְרָךְ אֲרוּם הוּא רִבּוֹנֵיךְ וְתִסְגְדוּן לֵיהּ: ^sl-45-12

**13** וְיַתְבֵי כְרַכָּא דְצוּר בְּתִקְרוּבְתָּא יֵיתוֹן וְאַפָּיִךְ יְשַׁחֲרוּן לְבֵית מַקְדְשָׁיִךְ עַתִּירֵי עַמְמַיָא: ^sl-45-13

**14** כָּל שְׁפַר אֲרַג נִכְסֵי פִּלְכֵי אוֹצָרֵי מַלְכַיָא דְמִטַמְרָן מִלְגָיו יִקְרְבוּן לְכַהֲנַיָא דִמְרַמְצִין בְּדַהֲבָא סְנִינָא לְבוּשֵׁיהוֹן: ^sl-45-14

**15** בִּלְבוּשֵׁי צִיוּרִין יְקָרְבוּן קוּרְבָּנֵיהוֹן קֳדָם מַלְכָּא דְעַלְמָא וּשְׁאָר חַבְרֵיהוֹן דִי מִתְבַּדְרִין בֵּינֵי עַמְמַיָא יִתֵּיתְיָן בְּחֶדְוָא לְוָתָךְ לִירוּשְׁלֵם: ^sl-45-15

**16** יִתֵּיתְיָן בְּחֶדְוָן וְתוּשְׁבְּחְתָא וְיַעֲלוּן בְהֵיכְלָא דְמֶלֶךְ עַלְמִין: ^sl-45-16

**17** בַּאֲתַר אַבְהָתָךְ יֶהֱוְיָן צַדִיקַיָא בְּנָךְ תְּמַנֵנוּן לְרַבְרְבַיָא בְּכָל אַרְעָא: ^sl-45-17

**18** בְּעִידָנָא הַהִיא תֵימְרוּן נִדְכַּר שְׁמָךְ בְּכָל דָר וְדָר מְטוּל הֵיכְנָא עַמְמַיָא דְמִתְגַיְרִין יְהוֹדוּן שְׁמָךְ לַעֲלָם וּלְעָלְמֵי עָלְמִין: ^sl-45-18

## Capítulo 46

**1** לְשַׁבָּחָא עַל יְדֵיהוֹן דִבְנֵי קֹרַח בְּרוּחַ נְבוּאָה בִּזְמַן דְאִתְכַּסֵי אֲבוּהוֹן מִנְהוֹן וְהִנוּן אִשְׁתֵּזְבוּ וַאֲמַרוּ שִׁירָתָא: ^sl-46-1

**2** אֱלָהָא לָנָא רוּחֲצָנָא וְעוּשְׁנָא סִיעֲתָא בְּעָקְתָא נִשְׁתַּכַּח לַחֲדָא: ^sl-46-2

**3** מְטוּל הֵיכְנָא לָא נִדְחָל בְּעִדָן דְאִשְׁתַּלְחִיפוּ אֲבָהָן מִן אַרְעָא כַּד מִתְמוֹטְטִין טוּרַיָא בְּפַלְגוּס דְיַמָא רַבָּא: ^sl-46-3

**4** מִתְרַגְשִׁין מִטַשְׁטְשִׁין מוֹהִי מִן עֲפַרְהוֹן מִתְרַגְפִין טוּרַיָא בְּגֵיוְתָנוּתָךְ לְעַלְמִין: ^sl-46-4

**5** עַמִין הֵיךְ נַהֲרִין וּמַבּוּעֵיהוֹן אָתְיָן וּמַחְדְיָן קַרְתָּא דַייָ וּמְצַלְיָן בְּבֵית מִקְדְשֵׁיהּ דַייָ מַשְׁכְּנֵיהּ דְעִלָאָה: ^sl-46-5

**6** שְׁכִנְתָּא דַייָ בְּגַוָהּ לָא תָזוּעַ יְסַיְעִנָהּ יְיָ בִּזְכוּתֵיהּ דְאַבְרָהָם דְצַלֵי עֲלָה לְעִדָנֵי צַפְרָא: ^sl-46-6

**7** בְּמִתַּן אוֹרַיְתָא לְעַמֵיהּ אִתְרְגַשׁוּ עַמַיָא אִזְדַעְזְעוּ מַלְכְּוָתָא כַּד אֲרִים קָלֵיהּ וְכַד יְהַב אוֹרַיְתָא לְעַמֵיהּ אִתְמוֹגַגוּ יָתְבֵי אַרְעָא: ^sl-46-7

**8** מֵימְרָא דַייָ צְבָאוֹת בְּסַעֲדָנָא תְּקוֹף לָנָא אֱלָהָא דְיַעֲקֹב לְעָלְמִין: ^sl-46-8

**9** אֱזִילוּן חֲמוֹן עוֹבָדַיָא דַייָ דְשַׁוֵי צַדְיָן בְרִשְׁעֵי אַרְעָא: ^sl-46-9

**10** יְבַטֵל קְרָבָא עַד סְיָפֵי אַרְעָא קַשְׁתָּא יְתַבַּר וְיִתְרַע מוּרְנִיתָא תְּרֵיסַיָא עֲגִילִין יוֹקִיד בְּנוּרָא: ^sl-46-10

**11** פְּסַקוּ מִן קְרָבָא וְיֵדְעוּן אֲרוּם אֲנָא יְיָ רְמָא בְּעַמַיָא רְמָא עַל יָתְבֵי אַרְעָא: ^sl-46-11

**12** מֵימְרָא דַייָ צְבָאוֹת בְּסַעֲדָנָא תְּקוֹף לָנָא אֱלָהָא דְיַעֲקֹב לְעַלְמִין: ^sl-46-12

## Capítulo 47

**1** לְשַׁבָּחָא עַל יְדֵיהוֹן דִבְנֵי קֹרַח תּוּשְׁבַּחְתָּא: ^sl-47-1

**2** כָּל עַמַיָא תְּקַעוּ יְדָא בְחֶדְוָא יַבִּיבוּ קֳדָם יְיָ בְּקָל תּוּשְׁבַּחְתָּא: ^sl-47-2

**3** אֲרוּם יְיָ עִלָאָה דְחִילָא מְלַךְ רַב עַל כָּל אַרְעָא: ^sl-47-3

**4** יִקְטַל עַמַיָא בְּמוֹתָנָא חִלוּפָנָא וְאוּמַיָא יִכְבּוֹשׁ תְּחוֹת רִגְלָנָא: ^sl-47-4

**5** יִרְעֵי לָנָא לְמֵירַת יַת אַחְסַנְתָּנָא יַת בֵּית מַקְדְשָׁא דְיַעֲקֹב דְרָחֵם לְעָלְמִין: ^sl-47-5

**6** יִתְעֲלֵי יְיָ בְּיַבָּבָא יְיָ בְּקָל שׁוֹפְרָא: ^sl-47-6

**7** שַׁבַּחוּ קֳדָם יְיָ שַׁבַּחוּ שַׁבַּחוּ לְמַלְכָּנָא שַׁבַּחוּ: ^sl-47-7

**8** אֲרוּם מְלַךְ כָּל יָתְבֵי אַרְעָא יְיָ שַׁבַּחוּ קֳדָמוֹי בְּשִׂכְלָא טָבָא: ^sl-47-8

**9** מָלַךְ יְיָ עַל עַמַיָא יְיָ יָתִיב עַל כּוּרְסֵיהּ דְקוּדְשֵׁיהּ: ^sl-47-9

**10** רַבָּנֵי עַמְמַיָא אִתְכַּנַשׁוּ עַמְמַיָא דִי מְהֵמְנִין לֵאלָהָא דְאַבְרָהָם אֲרוּם קֳדָם יְיָ תְּרֵיסֵי אַרְעָא לַחֲדָא אִתְעַלָא: ^sl-47-10

## Capítulo 48

**1** שִׁירְתָא וְתוּשְׁבַּחְתָּא עַל יְדֵיהוֹן דִבְנֵי קֹרַח: ^sl-48-1

**2** רַב יְיָ וּמְשַׁבַּח לַחֲדָא בִּירוּשְׁלֵם קַרְתָּא דֶאֱלָהָנָא וּבְטוּר בֵּית מַקְדְשֵׁיהּ: ^sl-48-2

**3** שַׁפִּיר הֵיךְ חֲתָנָא חֶדְוַת כָּל יָתְבֵי אַרְעָא טוּרָא דְצִיוֹן שִׁידָא דְצִפוּנָא קִרְיְתָא דְמַלְכָּא רַבָּא: ^sl-48-3

**4** יְיָ בְּבוּרְנְיָתָהָא אִתְיְדַע לִתְקוֹף: ^sl-48-4

**5** אֲרוּם הָא מַלְכַיָא אִתְחַבְּרוּ עֲבַרוּ כַּחֲדָא: ^sl-48-5

**6** הִינוּן חֲמוֹן הֵיכְנָא תְּמַהוּ עַל נִיסַיָא וּפְרוּשָׁתָא אִתְבְּהִילוּ אוּף עֲרַקוּ: ^sl-48-6

**7** זַעֲיָא אֲחַדְתִּינוּן תַּמָן רְתִיתָא הֵיךְ אִתָּא יָלְדָה: ^sl-48-7

**8** בְּקִידוּם תַּקִיף כְּאֶשָׁא דְמִן קֳדָם יְיָ תְּתַבַּר אִלְפַיָא דְטַרְסִיס: ^sl-48-8

**9** יֵימְרוּן בְּנֵי יִשְׂרָאֵל הֵיךְ מַה דִי שְׁמַעֲנָא הֵיכְנָא חַמֵינָא בְּקַרְתָּא דַייָ צְבָאוֹת בְּקַרְתָּא דֶאֱלָהָנָא יְיָ יְשַׁכְלְלִינָהּ עַד עַלְמֵי עַלְמִין: ^sl-48-9

**10** אַשְׁוִינוּ יְיָ טוּבָךְ בִּמְצִיעוּת הֵיכָלָךְ: ^sl-48-10

**11** הֵיךְ כִּשְׁמָךְ יְיָ הֵיכְדֵין תּוּשְׁבַּחְתָּךְ עַל סְיָפֵי אַרְעָא צִדְקְתָא מַלְיָא יְמִינָךְ: ^sl-48-11

**12** יֶחְדֵי טוּר צִיוֹן יְבוּעָן בְּתוּשְׁבְּחָן כְּנִישָׁתָא דְבֵית יְהוּדָה מְטוּל דִינָךְ: ^sl-48-12

**13** אַקִיפוּ צִיוֹן יְבוּעוּן וַחֲזַרוּ עֲלָהּ מְנוּ מִגְדְלָהָא: ^sl-48-13

**14** שַׁווּ לִיבְּכוֹן לְאוֹכְלוּסָהָא דְמִן לְעֵיל בִּרְנְיָתָהָא מְטוּל דְתִשְׁתְּעוּן לְדָר אוֹחֲרָן: ^sl-48-14

**15** אֲרוּם דֵין יְיָ הוּא אֱלָהָנָא שְׁכִנְתֵּיהּ בְּגַוָהּ וּמְדוֹרֵיהּ בִּשְׁמַיָא לְעַלְמֵי עַלְמִין הוּא יַדְבְּרִינָנָא כְיוֹמֵי טַלְיוּתָנָא: ^sl-48-15

## Capítulo 49

**1** לְשַׁבָּחָא עַל יְדֵיהוֹן דִבְנֵי קֹרַח תּוּשְׁבַּחְתָּא: ^sl-49-1

**2** שְׁמַעוּ אַחְוְיָתָא דָא כָל עַמְמַיָא אַצִיתוּ כָּל דְיָרֵי אַרְעָא: ^sl-49-2

**3** אוּף בְּנֵי אָדָם קַדְמָאָה אוּף בְּנוֹי דְיַעֲקֹב כַּחֲדָא זַכָּאָה וְחַיָבָא: ^sl-49-3

**4** פּוּמֵי יְמַלֵל חוּכְמְתָא וְרִנְגַת לִבָּא בִינָא: ^sl-49-4

**5** אַצְלֵי לְמִתְלָא אוּדְנִי אַשְׁרֵי לְמִפְתַּח בְּכִנָרָא אוּחַדְתִּי: ^sl-49-5

**6** מְטוּל אִדְחַל בְּיוֹם אַסְעָרוּת בִּישָׁא אֱלָהֵן דְחוֹבַת סוּרְחָנִי בְּסוֹפִי יַחְזְרִנַנִי: ^sl-49-6

**7** לְחַיָבַיָא דִי מִתְרַחֲצִין עַל נִכְסְהוֹן וּבִסְגִיאוּת עָתְרֵיהוֹן מִשְׁתַּבְּחִין: ^sl-49-7

**8** אֲחוּהִי דְאִשְׁתְּבָא לָא מַפְרֵק יִפְרוֹק גְבַר מִנִכְסוֹי וְלָא יְהַב לֵאלָהָא פוּרְקָנֵיהּ: ^sl-49-8

**9** וִיהֵי יַקִיר פּוּרְקָנֵיהּ וְיִפְסוֹק בִּישׁוּתֵיהּ וּפוּרְעֲנוּתָא לַעֲלָם: ^sl-49-9

**10** וִיחֵי תוּב לְחַיֵי עַלְמָא לָא יֶחֱמֵי דִין גֵהִנָם: ^sl-49-10

**11** אֲרוּם יֶחֱמוּן חַכִּימַיָא רְשִׁיעַיָא בִגְהִנָם יִתְדָנוּן כַּחֲדָא כְּסִילַיָא וְשַׁטְיָא יֵיבְדוּן וְיִשְׁבְּקוּן לְצַדִיקַיָא מָמוֹנְהוֹן: ^sl-49-11

**12** בְּבֵית קְבוּרְתְּהוֹן יִשְׁרוֹן לַעֲלָם וְלָא יְקוּמוּן מִמַשְׁכְּנֵיהוֹן לְדָרֵי דָרַיָא מְטוּל דְאִתְרַבְרְבוּ וּקְנוֹ שׁוּם בִּישׁ עֲלַוֵי אַרְעָא: ^sl-49-12

**13** וְגַבְרָא חַיָבָא בִיקָרָא לָא יְבִית עִם צַדִיקַיָא אַמְתִיל הֵיךְ בְּעִירָא אִשְׁתְּוָא לִלְמָא: ^sl-49-13

**14** דֵין אָרְחַתְהוֹן גְרַם שְׁטוּתָא לְהוֹן וּבְסוֹפְהוֹן בְּפוּמְהוֹן יִתְנוּן סוּרְחָנוּתְהוֹן לְעַלְמָא דְאָתֵי: ^sl-49-14

**15** הֵיךְ עָנָא צַדִיקַיָא שַׁווּ לְמוֹתָא וּקְטַלוּן וְתַבַּרוּ צַדִיקַיָא וּפָלְחֵי אוֹרַיְתָא וּתְרִיצַיָא אַלְקוּ מְטוּל הֲכִי גוּפֵיהוֹן יְהוֹן בַּלְיָן בִּגְהִנָם מִן בִּגְלַל דְאוֹשִׁיטוּ יְדֵיהוֹן וְחַבִּילוּ בֵּית מְדוֹר שְׁכִנְתֵּיהּ דִילֵיהּ: ^sl-49-15

**16** אֲמַר דָוִד בְּרוּחַ נְבוּאָה בְּרַם אֱלָהָא יִפְרוֹק נַפְשִׁי מִן דִין גֵהִנָם אֲרוּם יַלְפִנַנִי אוֹרַיְתֵיהּ לְעָלְמִין: ^sl-49-16

**17** (עַל קֹרַח וְסִיעֲתֵיהּ אִתְנַבֵּי וַאֲמַר) לָא תִדְחַל (מֹשֶׁה) אֲרוּם אִתְעַתַּר (קֹרַח) גַבְרָא (דְמַצוּתָא) אֲרוּם יִסְגֵי אַיְקָר בֵּיתֵיהּ: ^sl-49-17

**18** אֲרוּם לָא בְמוֹתֵיהּ יִסַב כוֹלָא לָא יֵחוֹת בַּתְרוֹי אַיְקָרֵיהּ: ^sl-49-18

**19** אֲרוּם נַפְשֵׁיהּ (דְמֹשֶׁה) בְּחַיוֹהִי יְבָרֵךְ לָךְ וְיוֹדוּנָךְ צַדִיקַיָא אֲרוּם תֵּיטִיב לְפַלְחִין קֳדָמָךְ: ^sl-49-19

**20** תֵּעוּל דוּכְרָנְהוֹן דְצַדִיקַיָא עַד דָר אַבְהָתְהוֹן וְרַשִׁיעַיָא לְעָלְמֵי עָלְמַיָא לָא יֶחֱמוּן נְהוֹרָא: ^sl-49-20

**21** גַבְרָא חַיָבָא בִּזְמַן דְאִיתוֹהִי בִּיקָרָא לָא יִתְבַּיֵן וּבְאִסְתַּלָקוּת יְקָרֵיהּ מִנֵיהּ אִמְתִיל לִבְעִירָא וְאִשְׁתְּוֵי לִלְמָא: ^sl-49-21

## Capítulo 50

**1** תּוּשְׁבַּחְתָּא עַל יְדוֹי דְאָסָף תַּקִיפָא אֱלָהָא יְיָ מַלֵל מִן בְּרֵאשִׁית שִׁירְתָא וּגְזָר לְמֶעְבַּד אַרְעָא מִמַדְנַח שִׁמְשָׁא עַד מַעֲלָנֵיהּ: ^sl-50-1

**2** וְשֵׁרוּי בִּרְיָת עַלְמָא מִצִיוֹן וּמִן תַּמָן גְמִיר שׁוּפְרֵיהּ אֱלָהָא יִתְגְלֵי: ^sl-50-2

**3** יֵימְרוּן צַדִיקַיָא בְּיוֹם דִינָא רַבָּא יֵיתֵי אֱלָהָנָא וְלָא יִשְׁתּוֹק לְמֶעְבַּד פּוּרְעֲנוּת עַמֵיהּ אֶשְׁתָּא קֳדָמוֹי תְּצַלְהַב וְחֵזוּר חֵזוּר לֵיהּ תִּזְעוֹף עַלְעוֹלָא לַחֲדָא: ^sl-50-3

**4** יִקְרָא לְאַנְגְלֵי מְרוֹמָא מִלְעֵיל וּלְצַדִיקֵי אַרְעָא מִלְרַע לְמִימְתַח דִין עַל עַמֵיהּ: ^sl-50-4

**5** כְּנוּשׁוּ לְוָתִי חֲסִידַי דִי גְזַרוּ קְיָימִי וְקַיִימוּ אוֹרַיְתָא וְאִתְעַסַקוּ בִּצְלוּתָא דְאִמְתִילָא לְקוּרְבָּנָא: ^sl-50-5

**6** וְיִתְנוּן אַנְגְלֵי מְרוֹמָא זְכוּתֵיהּ אֲרוּם אֱלָהָא דַיָנָא הוּא לְעָלְמָא: ^sl-50-6

**7** שְׁמַע עַמִי וַאֲמַלֵל יִשְׂרָאֵל וְאַסְהִיד בָּךְ אֱלָהָא אֱלָהָךְ אֲנָא: ^sl-50-7

**8** לָא מְטוּל דִבְחָךְ דְלָא קָרִבְתָּ קֳדָמַי בְּגָלוּתָא אֲנָא מוֹכַח לָךְ אֲרוּם עַלְוָתָךְ דִקְרִיבוּ אֲבָהָתָךְ לְקִבְּלִי תְדִירָא: ^sl-50-8

**9** לָא קַבְלֵית מִן אֵידָךְ תּוֹרָא מִן עֶדְרָךְ בַּרְחֵי: ^sl-50-9

**10** אֲרוּם דִילִי כָל חֵוַת חוּרְשָׁא (וְעַתְּדֵת לְצַדִיקַיָא בְגַן עֵדֶן) בְּעִירַיָא דַכְיָן (וְתוֹר בָּר דְרָעֵי בְכָל יוֹמָא) בְּטוּרִין אַלְפָא: ^sl-50-10

**11** גַלְיָן קֳדָמַי כָּל מִינֵי עוֹפָא דְפָרְחִין בְּאַוֵיר שְׁמַיָא וְתַרְנְגוֹל בְּרָא (דְקַרְצוּלֵיהּ שָׁרְיָן בְּאַרְעָא וְרֵישֵׁיהּ מְטֵי בִשְׁמַיָא) מְרַנֵן קֳדָמָי: ^sl-50-11

**12** אִין יִמְטֵי זְמַן קוּרְבָּנָא תְּדִירָא דִקְרִיצְתָּא לָא אֵימַר לָךְ אֲרוּם דִילִי אַרְעָא וּמַלְיְתָהּ: ^sl-50-12

**13** לָא קַבְּלֵית בְּשַׂר נִכְסַת פַּטִימַיָא וּדְמָא דְבַרְחֵי לָא זְרִיקוּ כַהֲנַיָא קֳדָמַי: ^sl-50-13

**14** כְּבוֹשׁ יִצְרָא בִישָׁא וְיִתְחַשֵׁב קֳדָם יְיָ כְּנִכְסַת תּוֹדְתָא וְשַׁלֵם לְעִלָאָה נְדָרָיִךְ: ^sl-50-14

**15** וְצַלֵי קֳדָמַי בְּיוֹמָא דְעַקְתָא אֱשֵׁזְבִנָךְ אֲרוּם תְּיַקְרִינַנִי: ^sl-50-15

**16** וּלְרַשִׁיעָא דְלָא עֲבַד תְּתוּבָא וּמְצַלֵי בִּמְרוֹמָא אֲמַר יְיָ מַה לָךְ לְמִשְׁתָּעֵי קְיָמִי וְתֵימֵי בִּשְׁמִי וְתִדְכַר קְיָמִי עֲלֵי פּוּמָךְ: ^sl-50-16

**17** וְאַנְתְּ סְנֵיתָא מַכְסְנוּתָא דְחַכִּימַיָא וּטְלַקְתָּא פִתְגָמַי בַּתְרָךְ: ^sl-50-17

**18** אִין חֲמֵיתָא גַנָבָא וּרְהֵטְתָא בַתְרוֹי וְעִם גִיוּפֵי שַׁוֵיתָא חוּלְקָךְ: ^sl-50-18

**19** פּוּמָךְ שְׁלַחְתָּא לְמִשְׁתָּעֵי לִישָׁנָא בִישָׁא וְלִישָׁנָךְ מַדְבְּקָא לְמַלָלָא נִכְלָא: ^sl-50-19

**20** תֵּתֵיב בַּאֲחָךְ תְּמַלֵיל כִּדְבוּתָא בְּבַר אִמָךְ תְּשַׁוֵי דָפְיָא: ^sl-50-20

**21** אִלֵין עוֹבָדִין בִּישִׁין עֲבַדְתָּא וְאוֹרְכֵית דִתְּתוּב חֲשַׁבְתָא לְמֶהֱוֵי עַד עַלְמִין שְׁלִים אֲמַרְתָּ בְּלִבְבָךְ אֶהֱוֵי תַקִיף הֵיכְמָךְ אוֹכְחִינָךְ בְּעַלְמָא הָדֵין וַאֲסַדֵר דִין גִּהֵנָם בְּעַלְמָא דְאָתֵי קֳדָמָךְ: ^sl-50-21

**22** אִתְבּוֹנַנוּ כְדוּן דָא רַשִׁיעַיָא דְשָׁלְיָן אֱלָהָא דִלְמָא אֶתְבַּר תּוּקְפְכוֹן וְלֵית מְשֵׁזִיב: ^sl-50-22

**23** דְדָבַח יִצְרָא בִּישָׁא הֵיךְ קוּרְבָּן תּוֹדָתָא יִתְחֲשֵׁב לֵיהּ וּמוֹקִיר לִי וְדִי יַעְדֵי אוֹרְחָא בִּישָׁא אַחְמֵי לֵיהּ בְּפוּרְקָנָא דַייָ: ^sl-50-23

## Capítulo 51

**1** לְשַׁבָּחָא תֻּשְׁבַּחְתָּא לְדָוִד: ^sl-51-1

**2** כַּד אֲתָא לְוָתֵיהּ נָתָן נְבִיָא כַּד שַׁמֵשׁ עִם בַּת שֶׁבַע: ^sl-51-2

**3** חוּס עֲלָי יְיָ הֵיךְ טִיבוּתָךְ הֵיךְ סְגִיאוּת רַחֲמָךְ שְׁבוֹק מְרוֹדָי: ^sl-51-3

**4** סוּגְעָא תְחַוְרִנַנִי מִן עַוְיָתִי וּמִן חוֹבִי תַדְכֵי יָתִי: ^sl-51-4

**5** אֲרוּם מְרוֹדַי קֳדָמַי גַלְיָן וְחוֹבִי לְקִבְלִי תְדִירָא: ^sl-51-5

**6** קֳדָמָךְ בִּלְחוֹדָךְ חָבֵית וּדְבִישׁ קֳדָמָךְ עֲבַדֵית מִן בִּגְלַל דִתְזַכֵּי יָתִי בְּמַלָלוּתָךְ תִּבְרוֹר יָתִי כַּד תְּדִין: ^sl-51-6

**7** הָא בְּעַוְיָא אִתְיְלִידֵית וּבְחוֹבָא עִבְּרַת מִנִי אִמִי: ^sl-51-7

**8** הָא קוּשְׁטָא רַעִיתָא בְכוּלִין וּבְטִמוּר לִבָּא חוּכְמְתָא תְהוֹדְעִנֵנִי: ^sl-51-8

**9** תַּדֵי עֲלַי הֵיךְ כֲּהַנָא דְמַדֵי בְאֵזוֹבָא עַל מְסַאֲבָא מוֹי אֲדָיוּתָא מִן קְטַם תּוֹרָתָא וְאִדַכֵּי תַּסְחִנַנִי וּמִן תַּלְגָא אֶתְחַוָר: ^sl-51-9

**10** תְּבַשְׂרִנַנִי חֶדְוָא וַאֲדִיצוּתָא תַּבִּיעָן תּוּשְׁבַּחְתָּא אֵיבְרַיָא רְשָׁפִיתָא: ^sl-51-10

**11** סָלִיק אַפָּךְ מִן חוֹבַי וְכָל עַוְיָתַי מְחֵי: ^sl-51-11

**12** לֵב בְּרִיר בָּרֵי לִי אֱלָהָא וְרוּחַ מְכַוֵן בִּדְחַלְתָּךְ חֲדֵית בְּגַוָי: ^sl-51-12

**13** לָא תִטְלוֹק יָתִי מִן קֳדָמָךְ וְרוּחַ נְבוּאַת קוּדְשָׁךְ לָא תְסַלֵק מִנִי: ^sl-51-13

**14** אֲתֵיב לִי אוֹרַיְתָךְ לְמֵדוּץ בְּפוּרְקָנָךְ וְרוּחַ נְבוּאָה תִסְמְכִנַנִי: ^sl-51-14

**15** אַאֲלֵף לִמְרוֹדַיָא אָרְחָתָךְ וְחַיָבַיָא קֳדָמָךְ יְתוּבוּן: ^sl-51-15

**16** פְּצֵי יָתִי מִדִין קְטוֹל יְיָ אֱלֹהַי פּוּרְקָנִי תַּבִּיעַ לִישָׁנִי צִדְקָתָךְ: ^sl-51-16

**17** יְיָ סִפְוָתַי פְּתַח בְּאוֹרַיְתָא וּפוּמִי יַתְנֵי תּוּשְׁבַּחְתָּךְ: ^sl-51-17

**18** אֲרוּם לָא תִצְבֵי נִכְסַת קוּדְשָׁא וְאֶתֵּן עָלְתָא לָא תִתְרְעֵי: ^sl-51-18

**19** נִכְסַת קוּדְשָׁא דֶאֱלָהָא נַפְשָׁא מִתַּבְרָא לֵב תְּבִיר וְשָׁפִי אֱלָהָא לָא תִבְסוֹר: ^sl-51-19

**20** אוֹטִיב בְּרַעֲוָתָךְ יַת צִיוֹן תְּשַׁכְלֵל שׁוּרֵי יְרוּשְׁלֵם: ^sl-51-20

**21** בְּכֵן תִּצְבֵי דִבְחִין דְצִדְקְתָא עַלְתָא וּגְמִיר הַבְכֵן יַסְקוּן כַּהֲנַיָא עַל מַדְבְּחָא תּוֹרִין: ^sl-51-21

## Capítulo 52

**1** לְשַׁבָּחָא שִׂכְלָא טָבָא עַל יְדוֹי דְדָוִד: ^sl-52-1

**2** כַּד אֱתֵי דוֹאֵג אֱדוֹמָאָה וְתַנֵי לְשָׁאוּל וַאֲמַר לֵיהּ אֲתָא דָוִד לְבֵית אֲחִימֶלֶךְ: ^sl-52-2

**3** מַה תִּשְׁתַּבַּח בְּלִישָׁנָא בִישָׁא גִבַּר לְמִשְׁדֵי אֲדַם זַכָּאָה חִסְדָא דֶאֱלָהָא כָּל יוֹמָא: ^sl-52-3

**4** אִתְרְגוּשְׁתָּא תְּחַשֵׁב בְּלִיבְבָךְ לִישְׁנָךְ הֵיךְ אִזְמֵל חָרִיף עָבִיד מִלֵי מַלְשִׁינוּתָא: ^sl-52-4

**5** רְחֵימְתָּא בִּישׁ מִן טַב שִׁקְרָא מַלְמַלְלָא צִדְקְתָא לְעַלְמִין: ^sl-52-5

**6** רְחַמְתָּא כָּל מִלֵי סַלְעֲמִיתָא לִישְׁנָא דִנְכִילוּ: ^sl-52-6

**7** לְחוֹד אֱלָהָא יִתְרְעִינָךְ לְעַלְמִין יִתְבְּרִינָךְ וִיטַלְטְלִינָךְ מִלְמִיתַּב בְּמַשְׁכְּנָא וְיִתְלְשִׁינָךְ מִן אֲרַע חַיַיָא לְעָלְמִין: ^sl-52-7

**8** וְיֶחְמוּן צַדִיקַיָא בְּפוּרְעָנוּתָא דְרַשִׁיעַיָא וִידַחֲלוּ מִן קֳדָם יְיָ וְאַמְטוּלְתֵּיהּ יִגְחֲכוּן: ^sl-52-8

**9** וְיֵימְרוּן הָא גַבְרָא דְלָא שַׁוֵי מֵימְרָא דַייָ עוּשְׁנֵיהּ סְבַר בְּעָתְרֵיהּ עֲשִׁין בְּמָמוֹנֵיהּ: ^sl-52-9

**10** וַאֲנָא הֵיךְ אִילָן זֵיתָא עַבּוּף בְּבֵית מַקְדַשׁ אֱלָהָא סַבְרֵת בְּחִסְדָא דֶאֱלָהָא לְעָלְמֵי עָלְמִין: ^sl-52-10

**11** אוֹדֵי קֳדָמָךְ לַעֲלַם אֲרוּם עֲבַדְתָּ פּוּרְעָנוּת דִינִי וְאַמְתִּין שְׁמָךְ אֲרוּם טָב קֳבֵל חֲסִידָיִךְ: ^sl-52-11

## Capítulo 53

**1** לְשַׁבָּחָא עַל פּוּרְעָנוּת דְרַשִׁיעַיָא דִי מַפְסִין שְׁמָא דְקֵירִיס שִׂכְלָא טָבָא עַל יַד דָוִד: ^sl-53-1

**2** אֲמַר נָבָל בְּלִבֵּיהּ לֵית אֱלָהָא פְּרַע מִינֵיהּ מְטוּל הֵיכְנָא חַבִּילוּ רַשִׁיעַיָא אוּרְחַתְהוֹן רְחִיקוּ מִן טָבָא דְאִשְׁתְּכַח בְּהוֹן עִלָא לֵית דְעָבֵיד טָב: ^sl-53-2

**3** בְּרַם אֱלָהָא מִשְׁמַיָא אוֹדִיק עַל בְּנֵי אֱנָשָׁא לְמֶחֱמֵי הֲאִית דִי יַשְׂכִּיל בְּאוֹרַיְתָא תְּבַע אוּלְפַן מִן קֳדָם יְיָ: ^sl-53-3

**4** כּוּלְהוֹן זָרוּ כַּחֲדָא אִטַנַפוּ לֵית דְעָבֵיד טָב לֵית אֲפִילוּ חָד: ^sl-53-4

**5** הֲלָא יְדַעוּן כָּל עָבְדֵי שִׁקְרָא דְמִן קֳדָמוֹי מִתְיְהִיב מְזוֹנָא וּמַה דֵין אָכְלֵי עַמִי סָעֲדִין לַחְמָא שְׁמָא דַייָ לָא בָּרֵכוּ: ^sl-53-5

**6** תַּמָן דְלַחוּ דְלוֹחָא מִן פְּסִילֵיהוֹן דְלֵית בְּהוֹן צְרוֹךְ לְמִדְלַח אֲרוּם אֱלָהָא מְבַדַר תְּקוֹף מַשִׁרְיָת חַיָבַיָא בְּהִתְתָא אֲרוּם מֵימְרָא דַייָ לָא רָחֲקִינוּן: ^sl-53-6

**7** מַן הוּא דִיהֵב מִן צִיוֹן פּוּרְקָנַיָא דְיִשְׂרָאֵל אֱלָהֵין יְיָ כַּד יַחֲזִיר מֵימְרָא דַייָ גָלוּת דְעַמֵיהּ יְרַנֵן דְבֵית יַעֲקֹב יֶחְדֵי דְבֵית יִשְׂרָאֵל: ^sl-53-7

## Capítulo 54

**1** לְשַׁבָּחָא עַל תּוּשְׁבַּחְתָּא שִׂכְלָא טָבָא עַל יַד דָוִד: ^sl-54-1

**2** כַּד אֲתוֹי אֱנָשֵׁי זִיף וַאֲמַרוּ לְשָׁאוּל הֲלָא דָוִד מִטַמַר גַבָּן: ^sl-54-2

**3** אֱלָהָא בִּשְׁמָךְ פְּרוֹק יָתִי וּבְכֹּחַ גְבוּרְתָּךְ דוּן יָתִי: ^sl-54-3

**4** יְיָ קַבֵּל צְלוֹתִי אֲצֵית לְמֵימָר פּוּמִי: ^sl-54-4

**5** אֲרוּם זְדוֹנִין קָמוּ עֲלַי וַעֲלִימִין תְּבַעוּ נַפְשִׁי לָא שַׁווּ אֱלָהָא לְקִבְלֵיהוֹן לְעָלְמִין: ^sl-54-5

**6** הָא יְיָ סְעִיר לִי יְיָ בְסָמְכֵי נַפְשִׁי: ^sl-54-6

**7** יְתוּב בִּישָׁא לִמְעִיקַי בְּהֵמְנוּתָךְ אַמְאֵךְ יַתְהוֹן: ^sl-54-7

**8** בְּנִכְסְתָא אֶדְבַּח קֳדָמָךְ אוֹדֵי שְׁמָךְ יְיָ אֲרוּם טָב: ^sl-54-8

**9** אֲרוּם מִכָּל עָקָא פְּצֵי יָתִי וּבְבַעֲלֵי דְבָבַי חֲמָת עֵינָי נִקְמָתָא: ^sl-54-9

## Capítulo 55

**1** לְשַׁבָּחָא עַל מִלֵי תּוּשְׁבַּחְתָּא שִׂכְלָא טָבָא עַל יַד דָוִד: ^sl-55-1

**2** אֲצֵית אֱלָהָא לִצְלוֹתִי וְלָא תִּתְכַּסֵי מִן צְלוֹתִי: ^sl-55-2

**3** אֲצֵית לְמֵימְרִי וְקַבֵּל מִנִי אִתְרַעֵם בְּמִלַי וְאֶרְגוֹשׁ: ^sl-55-3

**4** מִקָל בְּעֵל דְבָבָא מִן קֳדָם עָקַת רַשִׁיעָא אֲרוּם יִגְרוּן עֲלָי שִׁקְרָא וּבְרוּגְזָא יִנְטְרוּן לִי לִדְבָבוּ: ^sl-55-4

**5** לִבִּי יִרְתֵת בְּגַוִי וְדַחְלְתָא דְמוֹתָא נְפַלוּ עֲלָי: ^sl-55-5

**6** דְחַלְתָּא וּרְתֵיתָא אַתְיָן לִי וְחָפֵי יָתִי תְּבִירָא: ^sl-55-6

**7** וַאֲמַרִית מַה יִתֵּן לִי כַנְפָא הֵיךְ יוֹנְתָא אָטוֹס וְאֶשְׁרֵי: ^sl-55-7

**8** הָא אַרְחֵיק אֲתַר לְמִנְדַד אֲבִית בְּמַדְבְּרָא לְעָלְמִין: ^sl-55-8

**9** אַרְחִישׁ שֵׁזְבוּתָא לִי מִן זַעֲפָא נָטְלָא מֵעַלְעוֹלָא: ^sl-55-9

**10** סַלְעֵם יְיָ עֲצַתְהוֹן פַּלַג לִישָׁנְהוֹן אֲרוּם חֲמִית חֲטוֹף וּמַצוּ בְקַרְתָּא: ^sl-55-10

**11** יֵימָם וְלֵילֵי יַחְזְרוּנָהּ עֲלַוֵי שׁוּרָהָא וְלֵאוּת וּשְׁקַר בִּמְצָעָהּ: ^sl-55-11

**12** אִתְרִגוּשַׁיָא בִמְצָעָהּ וְלָא עֲדֵי מִן פְלָטָיוּתָהּ שְׁקַר וּנְכִילוּ: ^sl-55-12

**13** אֲרוּם לָא בְעֵיל דְבָבָא יַקֵל יָתִי וֶאֱסוֹבַר לָא מְסַנְאַי עֲלַי אִתְרַבְרַב וְאִטַמַר מִן קָדָמוֹי: ^sl-55-13

**14** וְאַנְתְּ אֲחִיתוֹפֶל גַבְרָא דְדָמֵי לִי רַב דַאֲלֵיפְתָּ לִי וּמְהוֹדַע חוּכְמָתָא לִי: ^sl-55-14

**15** דִי כַחֲדָא נְתָרֵץ רָזָא בְּבֵית מַקְדְשָׁא דֶאֱלָהָא נַלֵךְ בְּסַרְהוֹבְיָא: ^sl-55-15

**16** יְחַיְבִנוּן דִין קְטוֹל וְיִגְזוֹר עֲלֵיהוֹן בִּישָׁן לְדוֹאֵג וַאֲחִיתוֹפֶל יֵחֲתוּן לְשֵׁיוֹל כַּד הִנוּן חַיִין אֲרוּם בִּישָׁן בִּמְדוֹרֵיהוֹן בְּגוּפֵיהוֹן: ^sl-55-16

**17** אֲנָא קֳדָם אֱלָהָא אֲצַלֵי וּמֵימְרָא דַייָ יִפְרוֹק יָתִי: ^sl-55-17

**18** בְּרַמְשָׁא וּבְצַפְרָא וּבְטִהֲרָא אֲצַלֵי וְאַרְגִישׁ וּשְׁמַע קָלִי: ^sl-55-18

**19** פְּרַק בִּשְׁלָם נַפְשִׁי דְלָא לְמִקְרַב בִּישׁ לִי אֲרוּם בְּסַגִיעָן עָקָן הֲוָה מֵימְרֵיהּ בְּסַעֲדִי: ^sl-55-19

**20** יִשְׁמַע אֵל וִיקַבֵּל מִנְהוֹן וְיָתֵיב שְׁמַיָא מִלְקַדְמִין לְעַלְמִין וְרַשִׁיעֵי (דְלָא מִלְקַדְמִין) דְלָא מְהַשְׁנִין אוֹרְחַתְהוֹן בִּישַׁיָא וְלָא דְחַלוּן מִן קֳדָם אֱלָהָא: ^sl-55-20

**21** אוֹשִׁיט יְדוֹי בֶּאֱנָשֵׁיהּ שְׁלָמֵיהּ אַפֵּס קְיָמֵיהּ: ^sl-55-21

**22** שְׁעִיְעָן יַתִּיר מִן שְׁמַן דְגוּבְנִין מִילֵי פּוּמֵיהּ וְהֵיךְ זְיָנֵי קְרָבָא לִבֵּיהּ רְכִיכָן מִלוֹי יַתִּיר מִן מְשַׁח וְאִינוּן מוּרְנְיָן דִקְטוֹל: ^sl-55-22

**23** טְלוֹק עַל יְיָ סִבְרָךְ וְהוּא יְזוּן יָתָךְ לָא יִתֵּן לְעַלְמָא חוּסְרָנָא לְצַדִיקַיָא: ^sl-55-23

**24** וְאַנְתְּ אֱלָהָא בְּמֵימְרָךְ תּוֹחֵית יַתְהוֹן לְגֵהִנָם עֲמִיקָא גַבְרֵי מָרֵי קְטוֹל וּנְכִילוּ לָא יֶחֱמוּן פַּלְגוּת יוֹמֵיהוֹן וַאֲנָא אִתְרְחֵיץ בְמֵימְרָךְ: ^sl-55-24

## Capítulo 56

**1** לְשַׁבָּחָא עַל כְּנִשְׁתָּא דְיִשְׂרָאֵל דִמְתִילָא לְיוֹנָה שָׁתוֹקָא בְּעִדָן דִי מִתְרַחֲקִין מִן קִרְוֵיהוֹן וְחָזְרִין וּמְשַׁבְּחִין לְמָרֵי עַלְמָא הֵיךְ דָוִד מַכִּיר וּשְׁלִים כַּד אֲחַדוּ יָתֵיהּ פְּלִשְׁתָּאֵי בְגַת: ^sl-56-1

**2** חוּס עֲלַי יְיָ אֱלָהָא אֲרוּם שַׁפְיַנִי תְּחוֹתוֹי יִשְׁבִּי גְבַר חַיָב כָּל יוֹמָא מַגִיחָא יִדְחֲקִנַנִי: ^sl-56-2

**3** שָׁפְיָן גַרְמִי מְעִיקִי כָּל יוֹמָא אֲרוּם סְגִיאִין מְעִיקִין מַגִיחִין לִי אֱלָהָא עִלָאָהּ דִי כּוּרְסֵיהּ בִּמְרוֹמָא: ^sl-56-3

**4** יוֹמָא דְאִדְחַל אֲנָא עֲלָךְ אֶתְרְחֵץ: ^sl-56-4

**5** בְּמִדַת דִינָא דֶאֱלָהָא אֲשַׁבַּח בְּמֵימְרֵיהּ בֶּאֱלָהָא אֶתְרְחֵץ לָא אֶדְחַל מַה יַעְבֵיד בִּיסְרָא לִי: ^sl-56-5

**6** כָּל יוֹמָא מְטוּלְתִּי טָרְחָן עֲלַי כָּל מַחְשְׁבָתְהוֹן לְבִישׁ: ^sl-56-6

**7** יִכְנְשׁוּן וְיִטְשׁוּן בִּכְמָנָא הִנוּן אִסְתַּוָרַי יִטַמְרוּן הֵיכְמָא דִמְתִּינוּ עֲבַדוּ לְנַפְשִׁי: ^sl-56-7

**8** עַל שִׁקְרָא דִי בִּידֵיהוֹן רוֹקֵן יַתְהוֹן בִּרְגֵיז עַמַיָא תְּמַסְכֵּן אֱלָהָא: ^sl-56-8

**9** יוֹמֵי טִלְטוּלִי מְנִיתָא אַנְתְּ שַׁוֵי דִמְעֲתִי בְזִיקָךְ יְיָ הֲלָא בְּחוּשְׁבְּנָךְ: ^sl-56-9

**10** הַבְּכֵן יְתוּבוּן בַּעֲלֵי דְבָבַי מְחַזְרֵי קְדַל יוֹמָא דַאֲצַלֵי דֵי יְדַעֵית אֲרוּם אֱלָהָא בְּסַעְדִי: ^sl-56-10

**11** בְּמִדַת דִינָא דֶאֱלָהָא אֲשַׁבַּח בְּמֵימְרֵיהּ בְּמִדַת רַחֲמִין דַייָ אֲשַׁבַּח בְּמֵימְרֵיהּ: ^sl-56-11

**12** בְּמֵימְרָא דֶאֱלָהָא סַבְרֵת לָא אֶדְחַל מַה יַעְבֵּיד בַּר נְשָׁא לִי: ^sl-56-12

**13** עֲלַי קַבְּלֵית אֱלָהָא נְדָרַיִךְ אֲשַׁלֵם קוּרְבָּנֵי תּוֹדָן קֳדָמָךְ: ^sl-56-13

**14** אֲרוּם פְּצֵיתָא נַפְשִׁי מִקְטוֹל הֲלָא רַגְלַי מִן נְקִיפָא לִמְהַלְכָא קֳדָם יְיָ בִּנְהוֹר חַיַיָא: ^sl-56-14

## Capítulo 57

**1** לְשַׁבָּחָא עַל עָקְתָא בִּזְמַן דִי אֲמַר דָוִד לָא תְחַבֵּל אִתְאֲמַר עַל יַד דְדָוִד מַכִּיךְ וּשְׁלִים בְּמֵעַרְקֵיהּ מִן קֳדָם שָׁאוּל בְאִסְפְּלֵידָא: ^sl-57-1

**2** חוּס עֲלַי אֱלָהָא חוּס עֲלַי אֲרוּם בְּמֵימְרָךְ אִתְרְחַצַת נַפְשִׁי וּבִטְלַל שְׁכִנְתָּךְ אֱהִי רָחִיץ עַד דְיֶעְבַּר אִתְרְגוּשָׁתָא: ^sl-57-2

**3** אֲצַלֵי קֳדָם אֱלָהָא עִלָאָהּ תַקִיפָא דִי פַקֵיד לְעַכּוֹבִיתָא דְיִגְמַר בְּאִסְפְּלֵידָא עַזְלָא אַמְטוּלְתִי: ^sl-57-3

**4** יְשַׁדֵר מַלְאֲכֵיהּ מִשְׁמֵי מְרוֹמָא וְיִפְרְקִנְנִי חַסֵד שָׁיְפִי לְעַלְמִין יְשַׁדַר אֱלָהָא טוּבֵיהּ וְקוּשְׁטֵיהּ: ^sl-57-4

**5** נַפְשִׁי חָיְדָא כַּד בִּמְצַע שַׁלְהוֹבִין אֶדְמוֹךְ בֵּינֵי גוּמְרִין דִי מְלָהַטִין בְּנֵי נָשָׁא דְכַבֵּיהוֹן הֵיךְ מוּרְנִיתָא וְגָרְרִין וְלִישָׁנְהוֹן הֵיךְ סַיְפָא חֲרִיפָא: ^sl-57-5

**6** אִתְרוֹרַם עַל מַלְאֲכֵי שְׁמַיָא אֱלָהָא עַל כָּל יָתְבֵי אַרְעָא אַיְקָרָךְ: ^sl-57-6

**7** מְצַדְתָּא אַתְקִינוּ לְאִסְתַּוְרַי כָּיֵף נַפְשִׁי כָּרוּ קֳדָמַי שִׁיחָא נְפַלוּ בְּמִצְעָהּ לְעַלְמִין: ^sl-57-7

**8** מְכַוֵן לִבִּי לְאוֹרַיְתָךְ יְיָ מְכַוֵן לִבִּי לִדְחַלְתָּךְ אֲשַׁבַּח וַאֲזַמֵר: ^sl-57-8

**9** אִתְּעָר יְקָרִי אִתְּעָר לְשַׁבָּחָא עַל פּוּם נִבְלָא וְכִנָרָא אִתְעָר לִצְלוֹתָא דִקְרִיץ: ^sl-57-9

**10** אוֹדֵי קֳדָמָךְ בְּעַמַיָא יְיָ אֲשַׁבְּחִינָךְ בְּאוּמַיָא: ^sl-57-10

**11** אֲרוּם רַב עַד צֵית שְׁמַיָא טוּבָךְ וְעַד שְׁחָקִים קוּשְׁטָךְ: ^sl-57-11

**12** אִתְרוֹרַם יְיָ עַל מַלְאֲכֵי שְׁמַיָא אֱלָהָא עַל כָּל יַתְבֵי אַרְעָא אַיְקָרָךְ: ^sl-57-12

## Capítulo 58

**1** לְשַׁבָּחָא עַל עָקְתָא בִּזְמַן דִי אֲמַר דָוִד לָא תְּחַבֵּל עַל יַד דָוִד מַכִּיךְ וּשְׁלִים: ^sl-58-1

**2** הַבְּרַם בְּקוּשְׁטָא שָׁתְקִין צַדִיקֵי בְּעִדַן מָצוּ חֲמֵי לְכוֹן דְצִדְקָתָא מִתְמַלְלִין תְּרִיצוּתָא תְדִינוּן בְּנֵי נָשָׁא: ^sl-58-2

**3** בְּרַם רַשִׁיעֵי מַה דֵין בְּלִבָּא עִילָא תַעְבְּדוּן בְּאַרְעָא חֲטוֹף אַיְדֵיכוֹן יַתְקְנוּן: ^sl-58-3

**4** אִתְעֲבֵידוּ נוּכְרָאִין רַשִׁיעַיָא מִן מְעָן תָּעָן מִן כְּרֵיסָא מְמַלְלֵי כַּדְבוּתָא: ^sl-58-4

**5** אֵרֵסָא לְהוֹן כְּגַוָן אֵרֵסָא דְחִוְיָא הֵיךְ חוּרְמָנָא חֵרְשָׁא דִמְטַמְטֵם אֻדְנֵיהּ: ^sl-58-5

**6** דִי לָא יְקַבֵּל מִילֵי חֲרָשַׁיָא אָסְרֵי נַחְשַׁיָא וּמִן רָטְנֵי רְטָן הוּא חֲכִּים: ^sl-58-6

**7** אֱלָהָא תְּרַע כַּכֵּיהוֹן בְּפוּמְהוֹן וְנִיבֵי בְנֵי אַרְיְוָן תִּתְרַע יְיָ: ^sl-58-7

**8** יִתְמְסוּן בְחוֹבֵיהוֹן הֵיךְ מַיָא יִזְלוּן לְהוֹן וְנָגִיד גִדְרוֹי אַמְטֻלְהוֹן וִיהוֹן מִתְגוֹרְרִין: ^sl-58-8

**9** הֵיךְ זְחִיל תִּיבְלָלָא דִי מָאֵס אוֹרְחֵיהּ הֵיךְ נְפוּלָא וְאָשׁוּתָא דִי סַמְיָן וְלָא חֲמוּן שִׁמְשָׁא: ^sl-58-9

**10** עַד לָא יִתְעַבְדוּן רַשִׁיעַיָא רְכִיכֵי אַקְשׁוּן הֵיךְ אַטְדָא עַד דְהִינוּן רְטִיבִין כְּבוּסְרָא כְּעַלְעוֹלָא יְשֵׁצִינוּן: ^sl-58-10

**11** יֶחֱדֵי צַדִּיקָא אֲרוּם חֲמָא פוּרְעֲנוּתָא מִנְהוֹן אַסְתַּוְרָיִן יִשְׁזוֹג בַּאֲדַם רַשִׁיעָא: ^sl-58-11

**12** וְיֵימְרוּן בְּנֵי נָשָׁא בְּרַם אִית אַגַר טָב לְצַדִיקַיָא בְּרַם אִית אֱלָהָא דְדִינוֹי מְתִיחָן בְּאַרְעָא: ^sl-58-12

## Capítulo 59

**1** לְשַׁבָּחָא עַל עָקְתָא בִּזְמַן דִי אֲמַר דָוִד לָא תְחַבֵּל עַל יַד דָוִד מַכִּיךְ וּשְׁלִים כַּד שְׁדַר שָׁאוּל וּנְטַרוּ יַת בֵּיתָא לְמִקְטְלֵיהּ: ^sl-59-1

**2** פְּצֵי יָתִי מִבַּעֲלֵי דְבָבִי אֱלָהִי מִן קָיְמִין עֲלַי תְּשֵׁזְבִנַנִי: ^sl-59-2

**3** פְּצֵי יְתִי מֵעָבְדֵי שְׁקַר מִן גוּבְרִין קֲטוֹלִין פְּרוֹק יָתִי: ^sl-59-3

**4** אֲרוּם הָא כְּמַנוּ לְנַפְשִׁי מִתְכַּנְשִׁין עֲלַי עֲשִׁינִין לָא עַל סוּרְחָנִי וְלָא עַל חוֹבִי יְיָ: ^sl-59-4

**5** עַל לָא עַוְיָן רָהֲטִין וּמְסַדְרִין קְרָבָא אִתְגַבֵּר לְקַדְמוּתָא וַחֲמֵי: ^sl-59-5

**6** וְאַנְתְּ יְיָ אֱלֹהִים צְבָאוֹת אֱלָהָא דְיִשְׂרָאֵל אִתְעָר לְמִסְעָר עַל כָּל עַמְמַיָא לָא תְחוֹס כָּל שַׁלִיטֵי שְׁקַר לְעָלְמִין: ^sl-59-6

**7** יְתוּבוּן לְרַמְשָׁא מִתְרַגְשִׁין הֵיךְ כִּכְלַב וְיַחְזְרוּן קַרְתָּא: ^sl-59-7

**8** הָא יַבִּיעוּן בְּפוּמְהוֹן מִלַיָא דִשְׁנִינָן הֵיךְ סַיְפָא בְּסִפְוָתְהוֹן אָמְרִין נִתְגַבֵּר אֲרוּם מַן הוּא דִי שְׁמַע וְיִתְפְּרַע: ^sl-59-8

**9** וְאַנְתְּ יְיָ תְּגַחֵךְ לְהוֹן תִּתְלָעֵב לְכָל עַמְמַיָא: ^sl-59-9

**10** עוּשְׁנוֹי לָךְ אֶנְטוֹר אֲרוּם אֱלָהָא שֵׁזְבוּתִי: ^sl-59-10

**11** אֱלָהָא טוּבִי יְקַדְמִנַנִי אֱלָהָנָא יַחְמִנַנִי נִקְמָתָא בִמְעִיקָי: ^sl-59-11

**12** לָא תִקְטְלִינוּן מִן יַד דִלְמָא יִתְנְשׁוּן עַמִי טַלְטֵל יַתְהוֹן מִן בָּתֵּיהוֹן בְּתוּקְפָךְ וּתְמַסְכֵּן יַתְהוֹן מִן מָמוֹנֵיהוֹן תְּרִיסָנָא יְיָ: ^sl-59-12

**13** מְטוּל חוֹבַת פּוּמְהוֹן וּמַמְלַל סִפְוָתְהוֹן יִתְאַחְדָן בְּגֵיוְתָנוּתְהוֹן אֲרוּם מִן מוֹמָתָא וּמִן שִׁקְרָא יִשְׁתַּעֲיָן: ^sl-59-13

**14** שֵׁצֵי יַתְהוֹן בְּכָלוּ שֵׁצֵי יַתְהוֹן עַד דִי לֵיתִנוּן וְיִנְדְעוּן אֲרוּם אֱלָהָא שַׁלִיט בְּיַעֲקֹב לִסְיָפֵי אַרְעָא לְעָלְמָא: ^sl-59-14

**15** וִיתוּבוּן לְרַמְשָׁא יִתְרַגְשׁוּן הֵיךְ כִּכְלַב וְיַחְזְרוּן קַרְתָּא: ^sl-59-15

**16** הִנוּן יְטַלְטְלוּן לְמִבַּז בִּזְתָא לְמֵיכָל וְלָא יְנִיחוּן עַד דִי יִסְבְּעוּן וִיבִיתוּן: ^sl-59-16

**17** וַאֲנָא אַשַׁבַּח עוּשְׁנָךְ וַאֲבוּעַ לְעִדַן צַפְרָא טוּבָךְ אֲרוּם הֲוֵיתָא מְשֵׁזִיב לִי וְרוֹחֲצָנִי בְּיוֹמָא דְעַיִק לִי: ^sl-59-17

**18** עוּשְׁנִי לְוָתָךְ אֲשַׁבַּח אֲרוּם אֱלָהָא שֵׁזְבוּתִי אֱלָהָא טוּבִי: ^sl-59-18

## Capítulo 60

**1** לְשַׁבָּחָא עַל עַתִּיק סַהֲדוּתָא דִי בְנֵי יַעֲקֹב וְלָבָן פַּרְשְׁגֶן עַל יַד דָוִד לְאַלָפָא: ^sl-60-1

**2** כַּד כְּנַשׁ דָוִד מַשִׁרְיָן וַעֲבַר עַל אַיְגַר סַהֲדוּתָא וַאֲגִיחַ עִם אֲרַם דִי עִם צוֹבָא וּמִן בָּתַר כֵּן תָּב יוֹאָב וּמְחָא יַת אֱדוֹמָאֵי בְּמִישׁוֹר מִלְחָא וּנְפַלוּ מִן חֵילֵיהוֹן דְדָוִד וְיוֹאָב תְּרֵיסַר אַלְפִין: ^sl-60-2

**3** אֲמַר דָוִד אֱלָהָא שְׁבַקְתָּנָא תְּקֵפְתָּא עֲלָנָא תְּקוֹף רוּגְזָא תּוּב בִּיקָרָךְ לָנָא: ^sl-60-3

**4** אַרְגֵישְׁתָּא אַרְעָא דְיִשְׂרָאֵל זַעֲזַעְתָּא וּסְדֵקְתָּא יָתָהּ אַסֵי תַבְרְיָהָא אֲרוּם אִתְמוֹטַטַת: ^sl-60-4

**5** אַחְמֵיתָא עַמָךְ קַשְׁיָא אַשְׁקֵיתָא לָנָא חֲמַר דִלְוָט: ^sl-60-5

**6** יַהַבְתָּא לְדָחֲלָיִךְ נִסָא לְאִתְנַסָאָהּ בֵּיהּ מִן בִּגְלַל קוּשְׁטֵיהּ דְאַבְרָהָם לְעָלְמִין: ^sl-60-6

**7** מִן בִּגְלַל זְכוּתֵיהּ דְיִצְחָק יִתְפַּצְיָן רְחִימָיִךְ פְּרוֹק מְטוּל חֲסִידוּתָא דְיַעֲקֹב וְקַבֵּל צְלוֹתִי: ^sl-60-7

**8** אֱלָהָא מַמְלֵל בְּבֵית מַקְדְשֵׁיהּ אַבּוּעַ אֲרוּם יִתְגַבְּרוּן דְבֵית יִשְׂרָאֵל אֲפַלֵיג בִּזְתָא עִם בְּנֵי יוֹסֵף דְיָתְבִין בִּשְׁכֶם וּבְמֵישַׁר סוּכּוֹת אֶמְשַׁח מִישְׁחֲתָא וַאֲפַלֵג עֲדָאָה: ^sl-60-8

**9** עִמִי הֲווּן דְבֵית גִלְעָד וְעִמִי הֲווּן דְבֵית מְנַשֶׁה וְגִיבָּרִין דְבֵית אֶפְרַיִם עוֹשְׁנָא דְרֵישִׁי וּמִדְבֵּית יְהוּדָה סִפְרַיָא דְבֵית אוּלְפָנִי: ^sl-60-9

**10** בְּעֶטְיַת מוֹאֲבָאֵי אִטַמָשׁוּ רִגְלַי בַּאֲרַם גִּבָּרֵיהוֹן הֵיךְ דוּד שְׁזוּנִי עַל פִּרְקַת קְדַל גִבָּרֵי אֱדוֹם טִלְקֵית מְסָנַי עִלַוֵי פְלִשְׁתָּאֵי יַבִּיבוּ כְּנִשְׁתָּא דְיִשְׂרָאֵל: ^sl-60-10

**11** מַן הוּא דְיוֹבִיל יָתִי לְקַרְתָּא חֲרוֹבָא דְצוֹר מַן הוּא דְדַבְּרַנִי עַד אֱדוֹם: ^sl-60-11

**12** הֲלָא אַתְּ הוּא יְיָ שְׁבַקְתָּנָא וְלָא תִפּוֹק אֱלָהָא עִם חֵילְוָתָנָא: ^sl-60-12

**13** הַב לָן סַעְדָא מִמְעִיקָא וּמַגָן הוּא פּוּרְקָנָא דְבַר נָשָׁא: ^sl-60-13

**14** בְּמֵימְרָא דַייָ נַעְבֵּד חֵילָא וְהוּא יִכְבּוֹשׁ מְעִיקָנָא: ^sl-60-14

## Capítulo 61

**1** לְשַׁבָּחָא עַל תּוּשְׁבְּחָן לְדָוִד: ^sl-61-1

**2** קַבֵּל יְיָ בָּעוּתִי אֲצֵית צְלוֹתִי: ^sl-61-2

**3** מִן סְיָפֵי אַרְעָא קָדָמָךְ אֲצַלֵי בְּאִשְׁתַּלְהֲיוֹת לִבִּי בִּכְרַךְ תַּקִיף דְמִתְבְּנֵי עַל טַנֵר רָם מִנִי דַבַּר יָתִי: ^sl-61-3

**4** אֲרוּם הֲוֵיתָא רָחִיץ לִי קוּסְטַל דְעִשׁוּנָא מִן קֳדָם בְּעֵיל דְבָבָא: ^sl-61-4

**5** אֲדוּר בְּמַשְׁכְּנָךְ לְעָלְמַיָא אֶתְרְחֵץ בִּטְלַל שְׁכִנְתָּךְ לְעַלְמִין: ^sl-61-5

**6** אֲרוּם אַנְתְּ יְיָ שְׁמַעְתָּא נִדְרַי יְהֵבְתָּא יְרוּתָא לְדַחֲלֵי שְׁמָךְ: ^sl-61-6

**7** יוֹמִין עַל יוֹמֵי מַלְכָּא מְשִׁיחָא תּוֹסִיף שְׁנוֹי הֵיךְ דָרֵי עַלְמָא הָדֵין וְדָרֵי עַלְמָא דְאָתֵי: ^sl-61-7

**8** יֵתֵיב לְעַלְמִין קֳדָם יְיָ טִיבוּ וּקְשׁוֹט מִן מָרֵי עַלְמָא יִנְטְרוּן לֵיהּ: ^sl-61-8

**9** בְּכֵן אֲשַׁבַּח שְׁמָךְ לְעָלְמַיָא כַּד אַשְׁלֵים נִדְרַי בְּיוֹם פּוּרְקָנָא דְיִשְׂרָאֵל וּבְיוֹם דְיִתְרַבֵּי מַלְכָּא מְשִׁיחָא לְמֶהֱוֵי מְלִיךְ: ^sl-61-9

## Capítulo 62

**1** לְשַׁבָּחָא עַל יְדוֹי דִידוּתוּן תֻּשְׁבַּחְתָּא לְדָוִד: ^sl-62-1

**2** בְּרַם לֵאלָהָא שָׁתְקָא נַפְשִׁי מִנֵיהּ פּוּרְקָנִי: ^sl-62-2

**3** בְּרַם הוּא תּוּקְפִי וּפוּרְקָנִי מְשֵׁזְבִי לָא אֲזוּע בְּיוֹם עָקָא רַבָּא: ^sl-62-3

**4** עַד אָן אַתּוּן מִתְרַגְשִׁין עַל גְבַר חָסִיד תִּתְעֲבְדוּן קָטוֹלִין כּוּלְכוּן הֵיךְ שׁוּר דְסָטֵי הֵיךְ גוּדָא רְעִיעֲתָא: ^sl-62-4

**5** בְּרַם כַּד יוֹמוּן לְאוֹטָבָא מִתְמַלְכִין לְמִנְדַח יְחַזוּן כִדְבוּתָא בְּפוּמְהוֹן יְבָרְכוּן וּבְלִבְּהוֹן יְלַטְטוּן לְעַלְמִין: ^sl-62-5

**6** בְּרַם לֶאֱלָהָא שְׁתוּקִי נַפְשִׁי אֲרוּם מִנֵיהּ סַבְרִי: ^sl-62-6

**7** בְּרַם הוּא תוּקְפִי וּפוּרְקָנִי מְשֵׁזְבִי לָא אִזְדַעְזַע: ^sl-62-7

**8** עַל אֱלָהָא פוּרְקָנִי וִיקָרִי תְּקוֹף עוּשְׁנִי סִִבְרִי בֶּאֱלָהָא: ^sl-62-8

**9** סִבְרוּ בְּמֵימְרֵיהּ בְּכָל עִדָן עַמָא דְבֵית יִשְׂרָאֵל שְׁרוֹ קָדָמוֹי זְחוֹחֵי לִבְּכוֹן אֲמָרוּ אֱלָהָא סְבַר לָנָא לְעָלְמִין: ^sl-62-9

**10** בְּרַם לְמָא בְּנֵי נָשָׁא כַּדִיבָא בְּנֵי גְּבַר כַּד יִסְבּוּן בְּנֵי נָשָׁא בְּמִסְחֲתָא יִתְקְלוּן מַזָלְהוֹן הִנוּן גַרְמֵיהוֹן מִן לְמָא הֲוָון כַּחֲדָא: ^sl-62-10

**11** לָא תִּכְלוּן בִּטְלִימָא וּבְאוֹנְסָא לָא תְהַבְּלוּן מָמוֹנָא אֲרוּם יְשַׁבַּח לָא תְּשַׁווּן לִבָּא: ^sl-62-11

**12** אוֹרַיְיתָא חֲדָא מְמַלֵל אֱלָהָא וְתַרְתֵּין זִמְנִין דְנָן שְׁמַעֵית מִן פּוּם מֹשֶׁה סַפְרָא רַבָּא אֲרוּם עוּשְׁנָא קֳדָם אֱלָהָא: ^sl-62-12

**13** וְלָךְ אֱלָהָא לְמֶעְבַּד טוּבֵי לְצַדִיקַיָא אֲרוּם אַתְּ מְשַׁלֵם לֶאֱנָשׁ הֵיךְ עוֹבָדוֹי: ^sl-62-13

## Capítulo 63

**1** תּוּשְׁבַּחְתָּא לְדָוִד בְּעִדָן מֶהֱוֵי בְּמַדְבְּרָא דִי בִּתְחוּם שֵׁבֶט יְהוּדָה: ^sl-63-1

**2** אֱלָהָא תּוּקְפִי אַנְתְּ אֲקוּם בְּצַפְרָא קֳדָמָךְ צַחֲיָת לָךְ נַפְשִׁי רָגִיג לָךְ בִּסְרִי בְּאַרְעָא צַדְיָא וּמְשַׁלְהֵי מִדְלֵית מוֹי: ^sl-63-2

**3** הֵיכְנָא בַּאֲתַר קוּדְשָׁא חֲמִיתָךְ זַכֵּי יָתִי לְמֶחֱמֵי עוּשְׁנָךְ וִיקָרָךְ: ^sl-63-3

**4** אֲרוּם טָב הוּא חַסְדָךְ דְתַעְבֵּד לְצַדִיקַיָא לְעַלְמָא דְאָתֵי מִן חַיֵי דִיהַבְתָּא לְרַשִׁיעַיָא בְּעַלְמָא הָדֵין בְגִין כֵּן סִפְוָתִי יְשַׁבְּחוּנָךְ: ^sl-63-4

**5** הֵיכְנָא אֲבָרְכִנָךְ בְּחַיַי בְּעַלְמָא הָדֵין בְּשׁוּם מֵימְרָךְ אֶפְרוֹס יְדַי בִּצְלוֹ לְעַלְמָא דְאָתֵי: ^sl-63-5

**6** הֵיךְ תְּרַב וּדְהַן תִּסְבַּע נַפְשִׁי וְסִפְוָן דְתוּשְׁבְּחָן יְשַׁבַּח פּוּמִי: ^sl-63-6

**7** אִין אִדְכַּרְתִּיךְ עַל דַרְגָשִׁי בְּמַטַרְתָּ אֲרַנֵן בְּמֵימְרָךְ: ^sl-63-7

**8** אֲרוּם הֲוֵיתָא סָעִיד לִי וּבִטְלַל שְׁכִנְתָּךְ אֲבוּעַ: ^sl-63-8

**9** אִדְבָקַת נַפְשִׁי בָּתַר אוֹרַיְיתָךְ בִּי סַעֲדַת יְמִינָךְ: ^sl-63-9

**10** וְהִנוּן לִקְבוּרְתָּא יִתְבְּעוּן נַפְשִׁי יַעֲלוּן בְּאַרְעִית אַרְעָא: ^sl-63-10

**11** יְדַחֲלוּנֵיהּ מְטוּל מְחַת סַיְפָא מוֹהֲבֵית תְּעָלַיָא יֶהֱווּן: ^sl-63-11

**12** וּמַלְכָּא יֶחְדֵי בְּמֵימַר אֱלָהָא יְשַׁבַּח כָּל דִי מְקַיֵים בְּמֵימְרֵיהּ אֲרוּם יְסַרְנֵק פּוּמְהוֹן כָּל דְמַלְלֵי שִׁקְרָא: ^sl-63-12

## Capítulo 64

**1** לְשַׁבָּחָא תּוּשְׁבַּחְתָּא לְדָוִד: ^sl-64-1

**2** שְׁמַע אֱלָהָא קָלִי בְּעִדָן צְלוֹתִי מִדְלוּחָא דִבְעֵל דְבָבִי תִּנְטוֹר חַיָי: ^sl-64-2

**3** תִּטְמְרִנַנִי מֵרָזְהוֹן דְמִבְאֲשִׁין מֵאִתְרְגוּשַׁת עָבְדֵי שְׁקַר: ^sl-64-3

**4** דִי שְׁנִינוּ הֵיךְ סַיְפָא לִישָׁנְהוֹן נְגַדוּ קַשְׁתְּהוֹן מְשַׁחוּ גִרְרֵיהוֹן סַמָא דִקְטוֹל וּמְרִיר: ^sl-64-4

**5** לְגָרָאָה בְּטוּמְרַיָא דְלָא מוּם בִּתְכֵּף יִגָרוּן לֵיהּ וְלָא יִדְחֲלוּן: ^sl-64-5

**6** יִתְקְפוּן לְהוֹן פִּתְגָם בִּישׁ יִשְׁתָּעוּן לְמִכְמַן תַּקְלִין אָמְרִין מַן חָמֵי לְהוֹן: ^sl-64-6

**7** יִבְלְשׁוּן לְמִשְׁכַּח עִילִין לְשֵׁיצָאָה זַכָּאִין בְּלוּשָׁא דְמִתְבְּלָשׁ בְּגוּף בַּר נָשָׁא וְהִרְהוּרֵי לִבָּא עֲמִיקָא: ^sl-64-7

**8** וְיִגְרֵי עִלַוֵיהוֹן אֱלָהָא גִרְרָא בִּתְכֵף וְיִתְנוּן עַל מְחָתֵיהוֹן: ^sl-64-8

**9** וְיִתְקְלוּן לְהוֹן לִישָׁנְהוֹן יְטַלְטְלוּן כָּל דְחָמֵי בְהוֹן: ^sl-64-9

**10** וְיִדַחֲלוּן כָּל בְּנֵי נָשָׁא וִיחַווּן עוֹבָדָא דַייָ אֱלֹהִים וְעוֹבָדֵיהּ יֶהֱווּן מִתְבַּיְנִין: ^sl-64-10

**11** יֶחְדֵי צַדִיקָא בַּיָי וְיִתְרְחֵץ בְּמֵימְרֵיהּ וְיִשְׁתַּבְּחוּן כָּל תְּרִיצֵי לִבָּא: ^sl-64-11

## Capítulo 65

**1** לְשַׁבָּחָא תּוּשְׁבַּחְתָּא לְדָוִד שִׁירְתָא: ^sl-65-1

**2** קֳדָמָךְ מִתְחַשְׁבָא הֵיךְ שְׁתִיקוּתָא תּוּשְׁבַּחְתָּא אֱלָהָא דִי שְׁכִנְתֵּיהּ בְּצִיוֹן וְלָךְ יִשְׁתַּלְמוּן נִדְרַיָא: ^sl-65-2

**3** מְקַבֵּל צְלוֹתָא לְוָתָךְ כָּל בְּנֵי בִסְרָא יֵיתוּן: ^sl-65-3

**4** פִּתְגָמֵי עַוְיָן תְּקַפוּ מִנִי סוּרְחָנָנָא אַנְתְּ תְּכַפְּרִנוּן: ^sl-65-4

**5** טוּבוֹי דְתִבְחַר וּתְקָרֵב יִשְׁרֵי דָרָתָךְ יֵימְרוּן צַדִיקֵי נִשְׂבַּע בְּטוּב בֵּיתָךְ קוּדְשָׁא דְהֵיכָלָךְ: ^sl-65-5

**6** דְחִילָן בְּצִדְקָתָא תְקַבֵּל צְלוֹתְהוֹן אֱלָהָא פּוּרְקָנָא סִבְרָא דְכָל סְיָפֵי אַרְעַָא וְנַגְוָת יַמָא דִרְחִיקִין מִן יַבֶּשְׁתָּא: ^sl-65-6

**7** דְאַתְקֵן מְזוֹנַיָא לְיַעֲלֵי טוּרַיָא בְּכֹחַ גְבוּרְתֵּיהּ מְזַרֵז קָמוּר בִּגְבוּרְתֵּיהּ: ^sl-65-7

**8** מַמְאֵךְ רְגוּשׁ יַמַיָא וְרִגוּשׁ גַלֵיהוֹן וְרִכְפַּת אוּמַיָא: ^sl-65-8

**9** וּדְחִילוּ יָתְבֵי סְיָפִין מֵאַתְוָתָךְ מַפְקָנֵי צְפַר וּרְמַשׁ תְּסַדַר בְּפוּמְהוֹן שְׁבָחָא: ^sl-65-9

**10** אַדְכַּרְתָּא אַרְעָא וְאַשְׁקִיתָהּ סוּגֵי עֲלַלְתָּא תַעְתְּרִנָה מִן קוּבְתָא דֶאֱלָהָא דִי בִשְׁמַיָא מַלְיָא מִטְרָא תְּתַקֵן עִבּוּרְהוֹן אֲרוּם הֵיכְנָא תְּשַׁכְלְלִנָהּ: ^sl-65-10

**11** מַרְבְּיָנֵי צִמְחָהָא רַוֵי אַשְׁדִיךְ גַיְסָהָא צִמְחָהָא תְּבָרֵךְ: ^sl-65-11

**12** הַכְלֵלְתָּא שְׁנַת טוּב בִּרְכָתָךְ וְכִבְשֵׁי אוֹרְחָךְ יְבַסְמוּן דִיהֲנָא: ^sl-65-12

**13** יְבַסְמוּן תּוּשְׁבְּחָת מַדְבְּרָא וְדִיצָא גַלְמָתָא תְּקַמְרָן לְהוֹן: ^sl-65-13

**14** יַעֲלוּן דִכְרַיָא עִלַוֵי עָנָא וּמֵישְׁרַיָא יִתְחַפְיָן עִבּוּרָא יִתְיַבְּבוּן בְּרַם יְשַׁבְּחוּן: ^sl-65-14

## Capítulo 66

**1** לְשַׁבָּחָא שִׁירָא תּוּשְׁבַּחְתָּא יַבִּיבוּ קֳדָם יְיָ כָּל יָתְבֵי אַרְעָא: ^sl-66-1

**2** שַׁבַּחוּ אַיְקַר שְׁמֵיהּ שַׁווּ אַיְקַר תּוּשְׁבַּחְתֵּיהּ: ^sl-66-2

**3** אֱמַרוּ קֳדָם אֱלָהָא מַה דְחִילִין הִנוּן עוֹבָדָךְ בִּסְגִיעֵי עוּשְׁנָךְ יְכַדְבוּן לָךְ בַּעֲלֵי דְבָבָךְ: ^sl-66-3

**4** כָּל יָתְבֵי אַרְעָא יִסְגְדוּן קָדָמָךְ וִישַׁבְּחוּן לָךְ יְשַׁבְּחוּן שְׁמָךְ לְעָלְמִין: ^sl-66-4

**5** אֱזִילוּ וַחֲמוֹן עוֹבָדֵי אֱלָהָא דְחִיל מָרֵי תַּסְקוֹפִין עַל בְּנֵי נָשָׁא: ^sl-66-5

**6** הֲפַךְ יַמָא דְסוֹף לְיַבֶּשְׁתָּא בִּנְהַר יוֹרְדְנָא עֲבַרוּ בְּנֵי יִשְׂרָאֵל בְּרִגְלֵיהוֹן אוֹבִיל יַתְהוֹן לְטוּר קוּדְשֵׁיהּ תַּמָן נֶחֱדֵי בְּמֵימְרֵיהּ: ^sl-66-6

**7** דְשַׁלִיט בְּכֹחַ גְבוּרְתֵּיהּ עַל עַלְמָא עֵינוֹי בְּעַמְמַיָא מִסְתַּכְּלִין מְסַרְהֲבִין לָא יִתְרְמוֹן לְהוֹן לְעָלְמִין: ^sl-66-7

**8** בְּרִיכוּ עַמְמַיָא אֱלֹהִים וְאַשְׁמִיעוּ קָל תּוּשְׁבַּחְתֵּיהּ: ^sl-66-8

**9** דְמַנֵי נַפְשָׁנָא בְּחַיֵי דְעָלְמָא דְאָתֵי וְלָא מְסַר לְאִזְדַעֲזָעָא רִגְלָנָא: ^sl-66-9

**10** אֲרוּם בְּחַנְתָּנָא אֱלָהָא אַתֵּכְתָּנָא הֵיךְ קֵנָאָה דְמַתֵּךְ סִימָא: ^sl-66-10

**11** אֲעֵלְתָּנָא בַּמְצֻדְתָּא שַׁוִיתָא שׁוֹשִׁילְתָּא בְּחַרְצָנָא: ^sl-66-11

**12** אַמְאֵכְתָּנָא אַרְכֵּבְתָּא מָרֵי מְזוֹפִיתָא עַל רֵישָׁנָא דַנְתָּא יָתָנָא כְּדִי בְנוּרָא וּבְמוֹי וְאַפֵּקְתָּנָא לִרְוַחְתָּא: ^sl-66-12

**13** אֵעוּל לְבֵיתָךְ בְּעִלַוָן אֲשַׁלֶם לָךְ נִדְרָי: ^sl-66-13

**14** וְדִי פְתַחוּ סִפְוָתִי וּמַלֵיל פּוּמִי בִּדְעָק לִי: ^sl-66-14

**15** עַלְוָן שְׁמֵנִין אַסִיק קֳדָמָךְ עִם קְטוֹרַת בּוּסְמִין קָרְבַּן דִכְרִין אַעְבֵּד תּוֹרִין עִם בַּרְחַיָא לְעָלְמִין: ^sl-66-15

**16** אֱזִילוּ שְׁמַעוּ וְאִשְׁתָּעֵי כָּל דַחֲלַיָא דֶאֱלָהָא מַה דַעֲבַד לְנַפְשִׁי: ^sl-66-16

**17** לְוָתֵיהּ בְּפוּמִי קְרֵיתִי וְתוּשְׁבַּחְתֵּיהּ תְּחוֹת לִישָׁנִי: ^sl-66-17

**18** שְׁקָר אִין חֲמִיתִי בְּלִבִּי הַאֶפְשַׁר דִי לָא יִשְׁמַע יְיָ: ^sl-66-18

**19** בְּקוּשְׁטָא שְׁמַע אֱלָהָא אֲצֵית בְּקָל צְלוֹתִי: ^sl-66-19

**20** בְּרִיךְ אֱלָהָא דְלָא אַעְדֵי צְלוֹתִי וְטוּבֵיהּ מִנִי: ^sl-66-20

## Capítulo 67

**1** לְשַׁבָּחָא בִּנְגִינָתָא תּוּשְׁבַּחְתָּא וְשִׁירָתָא: ^sl-67-1

**2** אֱלָהָא יָחוּס עֲלָנָא וִיבָרְכִנָנָא יִנְהַר זִיו אַנְפּוֹי עִמָנָא לְעַלְמִין: ^sl-67-2

**3** לְהוֹדָעָא בְּאַרְעָא אוֹרְחָתָךְ בְּכָל עַמְמַיָא פּוּרְקָנָךְ: ^sl-67-3

**4** יוֹדוּן קֳדָמָךְ עַמְמַיָא אֱלָהָא יוֹדוּן קֳדָמָךְ עַמְמַיָא כּוּלְהוֹן: ^sl-67-4

**5** יֶחְדוּן וִידוּצוּן אוּמַיָא אֲרוּם תָּדֵין עַמַיָא בְּתִירוּצָא וְאוּמַיָא בְּאַרְעָא תַדְבְּרִינוּן לְעַלְמִין: ^sl-67-5

**6** יוֹדוּן קֳדָמָךְ עַמַיָא אֱלָהָא יוֹדוּן קֳדָמָךְ עַמַיָא כוּלְהוֹן: ^sl-67-6

**7** אַרְעָא יַהֲבַת אִבָּהּ יְבָרֵךְ יָתָן אֱלָהָא אֱלָהָנָא: ^sl-67-7

**8** יְבָרֵךְ יָתָן אֱלָהָא וְיִדְחֲלוּן יָתֵיהּ כָּל סְיָפֵי אַרְעָא: ^sl-67-8

## Capítulo 68

**1** לְשַׁבָּחָא לְדָוִד תּוּשְׁבְּחָא וְשִׁירָא: ^sl-68-1

**2** יְקוּם אֱלָהָא יִתְבַּדְרוּן בַּעֲלֵי דְבָבוֹי וְיַעַרְקוּן סָנְאוֹי מִן קֳדָמוֹי: ^sl-68-2

**3** הֵיכְמָא דִשְׁקִיף תְּנָנָא יִשְׁקְפוּן הֵיכְמָא דִי יִתְמְסֵי שַׁעֲוָא מִן קֳדָם אֶשָׁא יְהוֹבְדוּן רַשִׁיעַיָא מִן קֳדָם אֱלָהָא: ^sl-68-3

**4** וְצַדִיקַיָא יֶחְדוּן וִידוּצוּן קֳדָם יְיָ וְיֶחְדוּן בְּחֶדְוָא: ^sl-68-4

**5** שַׁבַּחוּ קֳדָם אֱלָהָא שַׁבַּחוּ שׁוּם יְקָרֵיהּ קַלְסוּן לְיָתֵב עַל כּוּרְסֵיהּ יְקָרֵיהּ בַּעֲרָבוֹת יָהּ שְׁמֵיהּ וּבִיעוּ קֳדָמוֹי: ^sl-68-5

**6** אֲבוּהוֹן דְיַתְמֵי וְדַיָנֵהוֹן דְאַרְמְלָן אֱלָהָא בִּמְדוֹר בֵּית שְׁכִינַת קוּדְשֵׁיהּ: ^sl-68-6

**7** אֱלָהָא דִי מְזַוֵג זוּגִים יְחִידָאִין לְבַר זוּגָא כַּחֲדָא דְאַפֵּיק בֵּית יִשְׂרָאֵל דַהֲווֹן אֲסִירִין בְּמִצְרַיִם עַל עוֹבָדֵיהוֹן דַאֲבָהָתְהוֹן כָּשְׁרִין בְּפוּמְבִּי בְּרַם פַּרְעֹה וּמַשִׁרְיָתֵיהּ דְסָרֵבוּ לְשַׁלָחוּתְהוֹן שְׁרוֹן צְחִיחִין: ^sl-68-7

**8** אֱלָהָא כַּד נְפַקְתָּא בְעַמוּדָא דַעֲנָנָא וּבְעַמוּדָא דְאֶשְׁתָּא קֳדָם עַמָךְ כַּד טְיַלְתָּא בְּמַדְבְּרָא דִישִׁימוֹן לְעַלְמִין כַּד יְהַבְתָּא אוֹרַיְתָא לְעַמָךְ: ^sl-68-8

**9** אַרְעָא אִתְרְגִישַׁת לְחוֹד שְׁמַיָא אַטִיפוּ טַלָא מִן קֳדָם יְיָ דֵין סִינַי סְלִיק תְּנָנֵיהּ כִּתְנָנָא דְאַתּוּנָא מִן קֳדָם דְאִתְגְלֵי עֲלוֹי יְיָ אֱלָהָא דְיִשְׂרָאֵל: ^sl-68-9

**10** כַּד שְׁמַעוּ בֵּית יִשְׂרָאֵל יַת קָל גְבוּרְתָּךְ פְּרַחוּ נַפְשֵׁיהוֹן מִן יַד אַחֵתְתָּא עִלַוֵיהוֹן טַלִין דִתְחַיוּתָא וּמִטְרִין דְרַעֲוָא אֲרֵימְתָּא אֱלָהָא עַל אַחְסַנְתָּךְ וּכְנִשְׁתָּא דְאִשְׁתַּלְהַיַת אַתְּ אַתְקֵינְתָּא: ^sl-68-10

**11** חַיָתָךְ אַתֵיבְתָּא בָהּ אִתְּקֵנְתָּא מַשִׁרְיַת מַלְאֲכַיָא לְאוֹטָבָא לַעֲנִיַיָא דֶאֱלָהָא: ^sl-68-11

**12** יְיָ יְהַב פִּתְגָמֵי אוֹרַיְתָא לְעַמֵיהּ בְּרַם מֹשֶׁה וְאַהֲרֹן מְכַשְׁרִין מֵימַר אֱלָהָא לְחַלְוַת רַבָּא דְיִשְׂרָאֵל: ^sl-68-12

**13** מַלְכְּוָתָא עִם חֵילֵיהוֹן אִטַלְטָלוּ מִן פַּלְטְרֵיהוֹן וְחַכִּימַיָא אִטַלְטְלוּ מִן מַדָעֵהוֹן וּכְנִשְׁתָּא דְיִשְׂרָאֵל מַפְלְגָא עַדָאָהּ מִן שְׁמַיָא: ^sl-68-13

**14** אִין אַתּוּן רַשִׁיעַיָא שָׁכְבִין בֵּינֵי קִלְקְלָתָא כְּנִשְׁתָּא דְיִשְׂרָאֵל דְדַמְיָא לְיוֹנְתָא מְטַלְלָא בַּעֲנָנֵי יְקָרָא מַפְלְגָא בִּזַת מִצְרָאֵי סִימָא דִזְקִיק וְטַסְבַּרְיָהָא מַלְיָן אוֹבְרִיזִין סְנִין: ^sl-68-14

**15** כַּד פַּרְסַת אַיְדָהָא עַל יַמָא בִצְלוֹ שַׁדַי אַמְאֵךְ מַלְכְּוָן וְאַמְטוּלְתָּהּ עֲנַן גֵיהִנֹם הֵיךְ תַּלְגָא פְּצָא יָתָהּ מִטוּלָא דְמוֹתָא: ^sl-68-15

**16** טוּר מוֹרִיָה אֲתַר דִי פְלַחוּ אֲבָהָת עַלְמָא קֳדָם יְיָ אִתְבְּחַר לְבִנְיַן בֵּית מַקְדְשָׁא וְטוּר סִינַי לְמוֹהֲבִית אוֹרַיְתָא טוּר מַתְנָן טוּר תָּבוֹר וְכַרְמֵל אִתְפְּסִילוּ אִתְעֲבֵד לְהוֹן גִבְבָא הֵיךְ טוּר מַתְנָן: ^sl-68-16

**17** אֲמַר אֱלָהָא לְמָה אַתּוּן טָפְזִין טוּרַיָא לֵית רַעֲוָתִי לְמִתַּן אוֹרַיְתָא עַל טוּרַיָא גֵיוְתָנִין מְבַסְרָנַיָא הָא טוּר סִינַי דְמַכִּיךְ רַגֵג מֵימְרָא דַייָ לְאַשְׁרָאָה עֲלוֹי שְׁכִינְתֵּיהּ לְחוֹד בִּשְׁמֵי שְׁמַיָא יְיָ יִשְׁרֵי לְעָלְמָא: ^sl-68-17

**18** אַרְתִּיכִין דֶאֱלָהָא תְּרֵין רִבְבָן דְנוּר דְלִיק תְּרֵין אַלְפִין דְאַנְגְלַיָא מַדְבְּרִין לְהוֹן שְׁכִנְתָּא דַייָ שְׁרָת עֲלֵיהוֹן עַל טוּרָא דְסִינָי בִּקְדוּשָׁה: ^sl-68-18

**19** סְלֵקְתָּא לִרְקִיעַ (מֹשֶׁה נְבִיָא) שְׁבִיתָא שִׁבְיְתָא (אַלֵפְתָּא פִּתְגָמֵי אוֹרַיְתָא) יְהַבְתָּא לְהוֹן מַתְּנָן לִבְנֵי נָשָׁא וּבְרַם סַרְבָּנַיָא דִי מִתְגַיְירִין וְתָיְבִין בִּתְתוּבָא שְׁרָת עֲלֵיהוֹן שְׁכִינַת יְקָרָא דַייָ אֱלֹהִים: ^sl-68-19

**20** בְּרִיךְ יְיָ עַל כָּל יוֹמָא וְיוֹמָא טְעֵן לָנָא מוֹסִיף פִּקוּדַיָא עֲלַוֵי פִּקוּדַיָא תַּקִיפָא דִי הוּא פֻרְקָנָנָא וּסְעִידָנָא לְעָלְמִין: ^sl-68-20

**21** אֱלָהָא לָנָא תְקוֹף וּפוּרְקָן וּמִן קֳדָם יְיָ מִתְגָרִין בְּרַשִׁיעַיָא מוֹתָא וּמַפְקָנוּת נִשְׁמָתָא בְּסַרְנוֹקָא: ^sl-68-21

**22** בְּרַם אֱלָהָא יִתְּבַר רֵישׁ בַּעֲלֵי דְבָבוֹי יְנַתֵּר שְׂעַר גְבַר דִי מִתְהַלֵךְ בְּחוֹבוֹ: ^sl-68-22

**23** צַדִיקַיָא דְמִיתוּ וְאִתְאֲכַלוּ מִן חֵיוַת בְּרָא אֲמַר יְיָ מִכּוּתְנָן אֲתֵיב אֲתֵיב צַדִיקַיָא דִי יִשְׁתְּנִיקוּ בִּמְצוּלְתֵּיהּ דְיַמָא: ^sl-68-23

**24** מִן בִּגְלַל דְיֶחֱמוּן פּוּרְעֲנוּת רַשִׁיעָא יִטְמְשׁוּן רַגְלֵיהוֹן בְּדַם קַטִילִין לִישָׁן חֵיוָת בָּרָא מִן תַּרְבֵּיהוֹן יִדְהֲנוּן מִן בַּעֲלֵי דְבָבָא מִנְהוֹן יִסְבְּעוּן: ^sl-68-24

**25** חֲמוֹן בֵּית יִשְׂרָאֵל הֲלִיכוֹת שְׁכִינְתָּךְ עַל יַמָא אֱלָהָא אָמְרִין הֲלִיכָת אֱלָהָא מְלַךְ כָּל עַלְמָא בִקְדוּשָׁא: ^sl-68-25

**26** אַקְדִימוּ וַאֲמַרוּ שִׁירְתָא בָּתַר מֹשֶׁה וְאַהֲרֹן דִמְנַגְנִין קֳדָמֵיהוֹן בִּמְצַע נְשַׁיָא צַדִיקָתָא דִי עִם מִרְיָם מְתוֹפְפִין: ^sl-68-26

**27** בֵּינֵי כְנִישַׁיָא בָּרִיכוּ אֱלָהָא רוֹמְמוּ יְיָ עוֹבְרַיָא בִּמְעֵי אִמְהוֹן זַרְעָא דְיִשְׂרָאֵל: ^sl-68-27

**28** תַּמָן בִּנְיָמִין זְעֵיר בְּשִׁבְטַיָא דְמִן שֵׁירוּיָא נְחַת לְיַמָא מְטוּל הֵיכְנָא קַבֵּל מַלְכוּתָא מִן שֵׁירוּיָא וּבַתְרֵיהוֹן נְחַתוּ רַבְרְבֵי יְהוּדָה רְגַמוּ יַתְהוֹן שִׁבְטַיָא אַבְנִין וְקַבִּילוּ רַבָּנוּתָא בַּתְרֵיהוֹן רַבָּנֵי זְבוּלֻן הֲווֹן תַּגָרֵיהוֹן רַבָּנֵי נַפְתָּלִי הֲווֹן גִבָּרֵהוֹן: ^sl-68-28

**29** פַּקֵד אֱלָהָא עוּשְׁנָךְ אִתְעַשַׁן אֱלָהָא שְׁרֵי בְּבֵית מַקְדְשָׁא דְנָן דַעֲבַדְתָּ לָנָא: ^sl-68-29

**30** מִן הֵיכְלָךְ תְּקַבֵּל קוּרְבָּנַיָא עַל יְרוּשְׁלֶם שְׁכִנְתָּךְ שָׁרְיָא מִפַּנִקְטֵיהוֹן לָךְ יַיְתוּן מַלְכַיָא קוּרְבָּנַיָא: ^sl-68-30

**31** נְזוֹף בְּמַשִׁרְיַת חַיָבִין תְּרַע יַתְהוֹן הֵיךְ קַנְיָא כְּנִישַׁת גִבָּרִין דְמִתְרַחֲצִין בְּעֶגְלַיָא טַעֲוַת עַמַיָא רְעוּתֵיהּ בְּעַמָא דִי מִתְעַסְקִין בִּרְעוּתָא בְּאוֹרַיְתָא דִזְקִיקָא מִן סִימָא בַּדַר עַמַיָא דִלְאַגָחָא קְרָבָא צָבִין: ^sl-68-31

**32** יֵיתוּן בְּנוֹי דְחָם חוּסְמָנַיָא מִמִצְרַיִם לְאִתְגַיָרָא בְּנוֹי דְכוּשׁ יִרְהֲטוּן לְמִפְרַשׂ יְדֵיהוֹן בִּצְלוֹ קֳדָם אֳלָהָא: ^sl-68-32

**33** מַלְכְּוָת אַרְעָא שַׁבַּחוּ קֳדָם יְיָ שַׁבַּחוּ יְיָ לְעָלְמִין: ^sl-68-33

**34** לְיָתֵב עַל כּוּרְסֵיהּ בִּשְׁמֵי שְׁמַיָא מִן לְקַדְמִין הוּא בְּמֵימְרֵיהּ יְהַב בְּקָלֵיהּ קָל רוּחַ נְבוּאֲתָא לִנְבִיַיָא: ^sl-68-34

**35** הֲבוּ יְקָר עוּשְׁנָא לֵאלָהָא דִי עַל יִשְׂרָאֵל גֵיוְתָנוּתֵיהּ וְעוּשְׁנֵיהּ בִּשְׁמַיָא: ^sl-68-35

**36** דְחִיל אֱלָהָא מִן בֵּית מַקְדְשָׁךְ תַּקִיפָא דְיִשְׂרָאֵל הוּא יְהַב עוּשְׁנָא וְתוּקְפָא לְעַמֵיהּ בְּרִיךְ אֱלָהָא: ^sl-68-36

## Capítulo 69

**1** לְשַׁבָּחָא עַל גָלוּת סַנְהֶדְרִין עַל יַד דָוִד: ^sl-69-1

**2** פְּרוֹק יָתִי אֱלָהָא אֲרוּם מָטוּ מַשְׁרְיָת חַיָבִין עַד דִי אֲעֵיקִין לִי הֵיךְ מַיָא דִמְטוֹ עַד נַפְשָׁא: ^sl-69-2

**3** טְמַעֵית בְּגַלוּתָא הֵיךְ בְּמַיָא דִמְצוּלְתָּא וְלֵית אֲתַר לְמֵקוּם מְטֵית בְּעָמְקֵי תְּקוֹף סִיעַת רַשִׁיעַיָא וּנְבוּזַרְאֲדָן אַגְלֵי יָתִי: ^sl-69-3

**4** אִשְׁתַּלְהֲיַת בְּמִקְרִי אִתְחַרְחַר עֻנְקִי כָּלוּ עֵינַי מִלְאוֹרְכָא לֵאלָהִי: ^sl-69-4

**5** סַגִיעִין מִן סַעֲרָן דְרֵישִׁי סָנְאַי מַגָן תְּקַפוּ מַקְנִיטַי בַּעֲלֵי דְבָבַי סָהֲדֵי שִׁקְרָא דְלָא אַנְסֵית עַל סַהֲדוּתְכוֹן הַבְּכֵן אֲשַׁלֵם: ^sl-69-5

**6** אֱלָהָא אַתְּ יְדַעְתָּא לְטַפְּשׁוּתִי וְסוּרְחָנוּתִי מִן קֳדָמָךְ לָא אִתְכַּסִיאוּ: ^sl-69-6

**7** לָא יִבְהֲתוּן בִּי דְסָבְרִין עֲלָךְ לָא יִכְסְפוּן בִּי דְתָבְעִין אוּלְפָן מִנָךְ אֱלָהָא דְיִשְׂרָאֵל: ^sl-69-7

**8** אֲרוּם אַמְטוּלְתָּךְ סוֹבָרִית חִסוּדָא חָפַת כִּסוּפָא אַפֵּי: ^sl-69-8

**9** נוּכְרִי אִתְחַשִׁיבֵית לְאֶחָי וְהֵיךְ בַּר עַמִין לִבְנֵי אִמִי: ^sl-69-9

**10** אֲרוּם טְנָנָא דְבֵית מַקְדְשָׁא גְמַרֵת יָתִי וְחִסוּדַי רַשִׁיעַיָא דִמְחַסְדִין לָךְ בְּמִשְׁתַּפְּהוֹן טַעֲוַתְהוֹן לְאַיקָרָךְ נְפַלוּ עֲלָי: ^sl-69-10

**11** וּבְכֵית בְּצוֹמָא דְנַפְשִׁי וַהֲוָת חִסוּדְתִּי לִקְלָנָא לִי: ^sl-69-11

**12** וִיהֲבֵית תְּחוֹת כְסוּתִי סַקָא וַהֲוֵית לְהוֹן לְמַתְלָא: ^sl-69-12

**13** יְמַלְלוּן עֲלַי יָתְבֵי תַרְעָא בֵית קַרְנָתָא וְזִמְרֵיהוֹן דְאָזְלִין לְמִשְׁתֵּי מַרְוָת בְּבֵית קַרְקַסְוָן: ^sl-69-13

**14** וַאֲנָא צְלוֹתִי קֳדָמָךְ יְיָ בְּעִדָן רַעֲוָת אֱלָהָא בִּסְגִיעֵי טוּבָךְ עֲנֵי יָתִי בִּקְשׁוֹט פּוּרְקָנָךְ: ^sl-69-14

**15** פְּצֵי יָתִי מִן טִינָא וְלָא אֶטְמוֹעַ אִתְפְּצֵי מִן סָנְאַי דְדָמִין לְעוּמְקֵי מוֹי: ^sl-69-15

**16** לָא יִגְלֵי יָתִי עַם תַּקִיף וְלָא יִסַלְעֵם לְמֶחְפֵּי עֲלַי מְצוּלְתָּא חָסִין וְלָא תִפְתַּח עֲלַי גֵהִנָם פּוּמָהּ: ^sl-69-16

**17** עֲנֵי יָתִי יְיָ אֲרוּם טָב חַסְדָךְ הֵיךְ כִּסְגִיעוּת רַחֲמָךְ תִּסְתַּכֵּל לְוָתִי: ^sl-69-17

**18** וְאַל תִּסְתַּלַק שְׁכִנְתָּךְ מֵעַבְדָךְ אֲרוּם עַיִק לִי סַרְהֵב עֲנֵי יָתִי: ^sl-69-18

**19** קְרֵב לְוַת נַפְשִׁי פְּרוֹק יָתָהּ מְטוּל דְלָא אִתְרַבְרְבוּ עֲלַי בַּעֲלֵי דְבָבִי פְּרוֹק יָתִי: ^sl-69-19

**20** אַתְּ יְדַעְתָּא קְלָנִי וּבַהֲתִי וּכְסוּפִי לְקִבְלָךְ קָיְימִין כָּל מְעִיקַי: ^sl-69-20

**21** קְלָנָא תְּבַרַת לִבִּי וְהָא הִיא תַקִיפָא וְאַמְתֵּנִית לְמָרֵי מַסְפְּדַיָא וְלֵיתֵיהוֹן וּלְמָרֵי תַנְחוּמִין וְלָא אַשְׁכְּחֵית: ^sl-69-21

**22** וְיַהֲבוּ בִסְעוּדְתִּי מְרֵירַת רֵישֵׁי חוּרְמָנִי וּלְצָחוּתִי אַשְׁקִיאוּ יָתִי חָלָא: ^sl-69-22

**23** יְהֵי פָתוֹרְהוֹן דְסַדַרוּ קֳדָמֵי בְּאָכְלֵי קֳדָמֵיהוֹן לְקוּלָא וְנִכְסַתְהוֹן לְתַקָלָא: ^sl-69-23

**24** יִתְחַשְׁכַן עֵינֵיהוֹן מִן לְמֶחֱמֵי וְחִרְצֵיהוֹן תְּדִירָא תְזַעְזַע: ^sl-69-24

**25** שְׁדֵי עִלַוֵיהוֹן רוּגְזָךְ וּתְקוֹף רוּגְזָךְ יַדְבְּקִנוּן: ^sl-69-25

**26** תְּהֵי מַשְׁכָּנוּתְהוֹן צַדְיָא בְּמַשְׁכְּנֵיהוֹן לָא יְהֵי יָתֵיב: ^sl-69-26

**27** אֲרוּם דִי אַנְתְּ מְחִיתָא רְדַפוּ וּמִן דִכְאִיב עַל קְטוֹלָךְ יִשְׁתַּעְיָן: ^sl-69-27

**28** הַב עַוְיָת עַל עַוְיַתְהוֹן וְלָא יִדְכּוּן לְמֵעַל בִּכְנִישַׁת צַדִיקָיִךְ: ^sl-69-28

**29** יִתְמְחוּן מִסְפַּר דָכְרָן חַיַיָא וְעִם צַדִיקַיָא לָא יִתְכַּתְבוּן: ^sl-69-29

**30** וַאֲנָא עַנְיָא וּכְאֵבָא פוּרְקָנָךְ אֱלָהָא תְשֵׁזְבִנָנִי: ^sl-69-30

**31** אֲשַׁבַּח שׁוּם אֱלָהָא בְּשִׁירָא וַאֲרַבִּנֵיהּ בְּתוֹדָתָא: ^sl-69-31

**32** וְתִשְׁפַּר צְלוֹתִי קֳדָם יְיָ מִן תּוֹר פַּטִים וּבְחִיר דְקָרֵיב אָדָם קֳדָמֵי דְקַדִימוּ קַרְנוֹי לְטִלְפוֹהִי: ^sl-69-32

**33** חֲמוּן עִנְוְתָנַיָא וְיֶחְדוּן תָּבְעֵי אוּלְפָן מִן קֳדָם אֱלָהָא וִיחִי לִבְּכוֹן: ^sl-69-33

**34** אֲרוּם מְקַבֵּל צְלוֹתְהוֹן דַחֲשִׁיכֵי יְיָ וְלַאֲסִירוֹי לָא בְסַר: ^sl-69-34

**35** יְשַׁבְּחוּנֵיהּ מַלְאֲכֵי שְׁמַיָא וְיָתְבֵי אַרְעָא יַמַיָא וְכָל דְרָחֲשִׁין בְּהוֹן: ^sl-69-35

**36** אֲרוּם אֱלָהָא יִפְרוֹק צִיוֹן וִישַׁכְלֵל קִרְוִין דִיהוּדָה וִיתוּבוּן תָּמָן וְיֵרְתוּנָהּ: ^sl-69-36

**37** וּבְנֵי עַבְדוֹי יַחְסְנוּן יָתָהּ וְרָחֳמֵי שְׁמֵיהּ יִשְׁרוֹן בְּגַוָהּ: ^sl-69-37

## Capítulo 70

**1** לְשַׁבָּחָא עַל יַד דָוִד לְמַדְכַּר עַל צְרוֹךְ לְבוֹנְתָּא: ^sl-70-1

**2** אֱלָהָא לְפַצָאָה יָתִי יְיָ לְצַעְדִי זְרִיז: ^sl-70-2

**3** יִבַהֲתוּן וְיִתְחַסְדוּן תָּבְעֵי נַפְשִׁי יְזוּרוּן לַאֲחוֹרָא וְיִכְסְפוּן דְצָבְיָן בָּשְׁתִּי: ^sl-70-3

**4** יְתוּבוּן לַאֲחוֹרָא מְטוּל דִי כְמַנוּ עֲלַי יִתְפַּרְעוּן הֵיךְ בְּהִיתְהוֹן דְאָמְרִין עֲלַי חֲדֵינָא חֲדֵינָא: ^sl-70-4

**5** יֶחְדוּן וִידוּצוּן בְּמֵימְרָךְ כָּל תָּבְעֵי אוּלְפָן מִנָךְ וְיֵימְרוּן תְּדִירָא יִסְגֵי יְקָרֵיהּ דַייָ רָחֲמֵי פּוּרְקָנָךְ: ^sl-70-5

**6** וַאֲנָא עַנְיָא וַחֲשִׁיכָא אֱלָהָא זְרֵיז לִי סַעֲדִי וְשִׁזְבוּתִי אַתְּ הוּא יְיָ לָא תוֹחַר: ^sl-70-6

## Capítulo 71

**1** בְּמֵימְרָךְ יְיָ רְחִיצִית לָא אֶבְהַת לַעֲלָם: ^sl-71-1

**2** בְּצִדְקָתָךְ פְּצֵי יָתִי וְשֵׁזְבִנַנִי אַצְלֵי לְוָתִי אוּדְנָךְ וּפְרוֹק יָתִי: ^sl-71-2

**3** הֱוֵי לִי לְטִינָר תַּקִיף עָשִׁין לְמֵעַל תְּדִירָא פְּקַדְתָּ לְמִפְרַק יָתִי אֲרֵי תּוּקְפִי וּכְרַךְ חוּסְנִי אַתְּ: ^sl-71-3

**4** אֱלָהִי שֵׁזִיב יָתִי מִן יַד רַשִׁיעָא מִן יְדָא דְמָרֵי עִילָא וַחֲטוֹף: ^sl-71-4

**5** אֲרוּ אַתְּ הוּא סוֹבָרִי יְיָ אֱלָהִי רוּחֲצָנִי מִן טַלְיוּתִי: ^sl-71-5

**6** עֲלָיִךְ סַמְכֵית מִן כְּרֵיסָא מִן מְעַיָא דְאִמִי אַנְתְּ מַפְקִי בְּמֵימְרָךְ תּוּשְׁבָּחְתִּי תְּדִירָא: ^sl-71-6

**7** הֵיךְ תָּמְהָא הֲוֵיתִי לְסַגִיעִין וְאַנְתְּ רוּחֲצָנִי וְעוּשְׁנָא דִילִי: ^sl-71-7

**8** יִתְמְלֵי פּוּמִי תּוּשְׁבַּחְתָּךְ כָּל יוֹמָא שִׁבְהוֹרָךְ: ^sl-71-8

**9** לָא תִטְלוֹק יָתִי לְעִדָן סֵיבוּ כַּד יִפְסוֹק חֵילִי לָא תִשְׁבְּקִנַנִי: ^sl-71-9

**10** אֲרוּם אֲמַרוּ בַּעֲלֵי דְבָבִי עֲלַי בִּישׁ וְנַטְרֵי נַפְשִׁי יִתְמְלִיכוּ כַּחֲדָא: ^sl-71-10

**11** לְמֵימַר אֱלָהָא שַׁבְקֵיהּ רְדוּפוּ וַאֲחִידוּ יָתֵיהּ אֲרוּם לֵית דְפָצֵי: ^sl-71-11

**12** אֱלָהָא לָא תַרְחִיק מִנִי אֱלָהִי לְסַעְדִי זְרֵיז: ^sl-71-12

**13** יִבְהֲתוּן יִשְׁתֵּיצוּן סָטְנֵי נַפְשִׁי יִתְעַטְפוּן קְלָנָא וְכִיסוּפָא תָּבְעֵי בִּישׁוּתִי: ^sl-71-13

**14** וַאֲנָא תְדִירָא אוֹרִיךְ וְאוֹסִיף עַל כָּל תּוּשְׁבַּחְתָּךְ: ^sl-71-14

**15** פּוּמִי יִשְׁתָּעֵי צִדְקוּתָךְ כָּל יוֹמָא פּוּרְקָנָךְ אֲרוּם לָא יְדַעִית מִנְיָנֵהוֹן: ^sl-71-15

**16** אֵעוּל בִּגְבוּרְתָּא דַייָ אֱלֹהִים אִדְכַּר צִדְקוּתָךְ בִּלְחוֹדָךְ: ^sl-71-16

**17** אֱלָהָא אַלֵיפְתַּנִי בְּנִסַיָא מִן טַלְיוּתִי וְעַד הַעִדָנָא אַשְׁנֵי פְּרִישָׁתָךְ: ^sl-71-17

**18** וּלְחוֹד עַד זִקְנָא וְסֵיבוּתָא אֱלָהָא לָא תִשְׁבּוֹק יָתִי עַד דַאֲתַנֵי תְּקוֹף אֶדְרְעָךְ לְדָר דָרֵי לְכָל דִי יֵיתִי כֹּחַ גְבוּרְתָּךְ: ^sl-71-18

**19** וְצִדְקָתָךְ אֱלָהָא עַד שְׁמֵי מְרוֹמָא דִי עֲבַדְתָּ רַבְרְבָן אֱלָהָא מַן כְּוָתָךְ: ^sl-71-19

**20** דִי אֲחֵמְתַּנִי עָקָן סַגִיעִין וּבִישִׁין תְּתוּב תְּחַיֵי יָתָנָא וּמִתְּהוֹמָה אַרְעִיתָא תְּתִיב תַּסֵק יָתָנָא: ^sl-71-20

**21** תַּסְגֵי רַבְיוּתִי וְתַחְזוֹר תַּנְחַמִנַנִי: ^sl-71-21

**22** לְחוֹד אֲנָא אוֹדֵי קֳדָמָךְ בִּזְיָנֵי זְמַר וְנִבְלָא אֲתַנֵי קוּשְׁטָךְ אֱלָהִי אֲשַׁבַּח קֳדָמָךְ בְּכִנָרָא קַדִישָׁא יִשְׂרָאֵל: ^sl-71-22

**23** תְּבוּעָן סִפְוָתִי אֲרוּם אֲשַׁבַּח קֳדָמָךְ וְנַפְשִׁי דִי פְרַקְתָּא: ^sl-71-23

**24** לְחוֹד לִישָׁנִי כָּל יוֹמָא תְּרַנֵן צִדְקָתָךְ אֲרוּם בְּהִיתוּ אֲרוּם אִיתְחַסַדוּ תָּבְעֵי בִישׁוּתִי: ^sl-71-24

## Capítulo 72

**1** עַל יְדוֹי דִשְׁלֹמֹה אִתְאֲמַר בִּנְבוּאָה אֱלָהָא הִילְכוֹת דִינָךְ לְמַלְכָּא מְשִׁיחָא הַב וְצִדְקָתָךְ לִבְרֵיהּ דְדָוִד מַלְכָּא: ^sl-72-1

**2** יָדִין עַמָךְ בְּצִדְקָא וַעֲנִיָךְ בְּהִלְכָת דִינָא: ^sl-72-2

**3** יִטְלוּן יָתְבֵי טוּרַיָא שְׁלָמָא לְבֵית יִשְׂרָאֵל וְגַלְמָתָא בִּזְכוּתָא: ^sl-72-3

**4** יְדִין עֲנִיֵי עַמָא יִפְרוֹק לִבְנֵי חֲשִׁיכָא וְיִשׁוֹף גַבְרָא טְלוֹמָא: ^sl-72-4

**5** יִדְחַלוּן מִנָךְ עִם מִסַק שִׁמְשָׁא וִיצָלוּן קֳדָמָךְ קֳדָם מִנְהַר סִיהֲרָא דָרֵי דָרַיָא: ^sl-72-5

**6** יֵחוֹת הֵיךְ מִטְרָא דְרַעֲוָא עַל עִסְבָּא דִגְזִיז מִן גוֹבַאי הֵיךְ רְסִיסֵי מַלְקוֹשָׁא דְנָטְפִין עַל עִסְבָּא דְאַרְעָא: ^sl-72-6

**7** יִסְגוּן בְּיוֹמוֹהִי צַדִיקַיָא וּסְגִיעֵי שְׁלָמָא עַד דִי יִשְׁתֵּיצוּן פָּלְחֵי סִהֲרָא: ^sl-72-7

**8** וְיִשְׁלוֹט מִן סְטַר יַמָא רַבָּא לִסְטַר יַמָא רַבָּא וּמִן פְּרָת עַד סְיָפֵי אַרְעָא: ^sl-72-8

**9** קֳדָמוֹי יִגְחֲנוּן אֵיפַרְכַיָא וּבַעֲלֵי דְבָבוֹי עַפְרָא יְלַחֲכוּן: ^sl-72-9

**10** מַלְכַיָא דְטַרְסִיס וְגִיסֵי יַמָא דְאוֹקְיָנוּס תִּקְרֻבְתָּא יְתִיבוּן מַלְכַיָא דִשְׁבָא וּסְבָא דוֹרוֹן יִקְרְבוּן: ^sl-72-10

**11** וְיִסְגְדוּן לֵיהּ כָּל מַלְכַיָא כָּל עַמְמַיָא יִשְׁתַּעְבְּדוּן לֵיהּ: ^sl-72-11

**12** אֲרוּם יִפְצֵי חֲשִׁיכָא דְבָעֵי מָטוּ וְעַנְיָא וְלֵית סָעֵיד לֵיהּ: ^sl-72-12

**13** יֵחוֹס עַל מִסְכָּנָא וַחֲשׁוּכָא וְנַפְשָׁת חֲשִׁיכַיָא יִפְרוֹק: ^sl-72-13

**14** מֵאוּנְסָא וּמֵחֲטוֹפִין יִפְרוֹק נַפְשֵׁיהוֹן וִיהֵי יַקִיר אַדְמְהוֹן קֳדָמוֹי: ^sl-72-14

**15** וִיחֵי וְיִתֵּן לֵיהּ מִזְהַב דְאַיְתִיאוּ לֵיהּ מִשְׁבָא וִיצַלֵי מְטוּלְתֵּיהּ תְּדִירָא כָּל יוֹמָא יְבָרְכִנֵיהּ: ^sl-72-15

**16** יְהִי סָעִיד לַחְמָא בְּאַרְעָא בְּרֵישׁ טוּרַיָא יַרְגִישׁ הֵיךְ כְּלִבְנָן אִבֵּיהּ וִינַצְצוּן מִן קַרְתָּא דִירוּשְׁלֶם הֵיךְ עִסְבָּא דְאַרְעָא: ^sl-72-16

**17** יְהִי שְׁמֵיהּ מַדְכַּר לַעֲלָם וּקְדָם מֶהֱוֵי שִׁמְשָׁא מְזַמָן הֲוָה שְׁמֵיהּ וְיִתְבָּרְכוּן בִּזְכוּתֵיהּ כָּל עַמַיָא וְיֵמְרוּן טָב לֵיהּ: ^sl-72-17

**18** בְּרִיךְ יְיָ אֱלֹהִים אֱלָהָא דְיִשְׂרָאֵל דַעֲבִיד פְּרִישָׁן רַבְרְבָן בִּלְחוֹדוֹהִי: ^sl-72-18

**19** וּבְרִיךְ שׁוּם יְקָרֵיהּ לְעָלְמָא וְיִתְמַלֵי מִזִיו יְקָרֵיהּ כָּל אַרְעָא אָמֵן וְאָמֵן: ^sl-72-19

**20** גְמִירִין צְלוֹתַיָא דְדָוִד בַּר יִשָׁי: ^sl-72-20

## Capítulo 73

**1** תּוּשְׁבַּחְתָּא עַל יְדֵי דְאָסָף בְּרַם טָב לְיִשְׂרָאֵל אֱלָהָא לִבְרִירֵי לִבָּא: ^sl-73-1

**2** וַאֲנָא כִּזְעֵיר אִתְמוֹטַטָא רִגְלֵי כִּלְמָא דְאִזְדַעְזְעָא אִסְתַּוְרָי: ^sl-73-2

**3** אֲרוּם טְנַנֵית בִּמְתַלְעַבַיָא בְּעִדָן דִי שְׁלָם רַשִׁיעַיָא אֶחֱמֵי: ^sl-73-3

**4** אֲרוּם לֵיתֵיהוֹן תָּוְהִין וּמִצְטַעֲרִין מְטוּל יוֹם מִיתַתְהוֹן אִתְבַּעֲיָן מַחְשְׁבָתְהוֹן וּפַטִים וְאַלִים לִבְּהוֹן: ^sl-73-4

**5** בְּלֵיעוּת גַּבְרִין דְמִתְעֲסְקִין בְּאוֹרַיְתָא לֵיתֵיהוֹן לָעִין וְעִם בְּנֵי נָשָׁא צַדִיקֵי דְסָכְלִין יְסוּרֵי לָא מִתְכַּתְּשִׁין: ^sl-73-5

**6** לְכַךְ כֵּן עֲטַרְתִּנוּן גֵיוְתָנוּתָא כְּלִילָא דִמְשַׁוְיָן בְּרֵישֵׁיהוֹן הִיא מִן חֲטוֹף דִילְהוֹן: ^sl-73-6

**7** שְׁנָא מִן שׁוּמְנָא פַּרְצוּפֵיהוֹן עֲבַרוּ חוֹטְבֵיהוֹן חֲפוּרַת לִבָּא: ^sl-73-7

**8** יִתְמַקְמְקוּן מִן פִּטְמָא וִימַלְלוּן לְאַבְאָשָׁא וְלִטְלוּמָא מִן רוּם לִבְּהוֹן יְמַלְלוּן: ^sl-73-8

**9** שַׁוִיאוּ בְקַדִישֵׁי שְׁמַיָא פּוּמְהוֹן וְלִישָׁנְהוֹן מְצַלְהֲבָה בְּקַדִישֵׁי אַרְעָא: ^sl-73-9

**10** בְּכֵן תָּבוּ עַל עַמָיָא דַייָ לְאַלְקָיוּתְהוֹן וְיִמְחוֹנוּן בְּמַרְזוֹפִין וְדִמְעִין סַגִיעִין מָחֲתִין לְהוֹן: ^sl-73-10

**11** וְיֵימְרוּן הֵכְדֵין יְדַע אֱלָהָא וְאִית מַנְדְעָא בְּעִלָאָה: ^sl-73-11

**12** הָא אִלֵין רַשִׁיעַיָא דְיָתְבִין בְּשַׁלְוָתָא בְּעַלְמָא הָדֵין אַדְבִּיקוּ נִכְסִין קְנוּ חֵילָא: ^sl-73-12

**13** בְּרַם לִסְרִיקוּתָא זַכְוַת לִבְבִי וְשֵׁזְבֵית בִּבְרִירוּ יְדָי: ^sl-73-13

**14** וַהֲוֵיתִי כַתִּישׁ כָּל יוֹמָא וּמַכְסְנוּתִי לְצַפְרִירֵי: ^sl-73-14

**15** אִין אֲמַרֵית אִשְׁתָּעִי דִכְמָתְהוֹן הָא עַל דָר בְּנָיִךְ אַרְשֵׁעִית: ^sl-73-15

**16** וַחֲשִׁיבֵית לְמִדַע יַת דָא לְעוּת הוּא בְעֵינָי: ^sl-73-16

**17** עַד זְמַן פּוּרְקָנָא דְאֵיתֵי לְוַת מַקְדְשֵׁי אֱלָהָא אֶתְבְּיַן לְסוֹפְהוֹן: ^sl-73-17

**18** בְּרַם בְּקִבְלַיָא שַׁוִיתָא לְהוֹן דְמִיתִנוּן לְשַׁהְוָתָא: ^sl-73-18

**19** הֵכְדֵין הֲווֹ לְצָדוֹ כְשַׁעְתָּא כָּלוּ אִשְׁתֵּיצוּן מִן אִתְרַגַשְׁיָן: ^sl-73-19

**20** הֵיךְ חֶלְמָא מִן גְבַר דְמִתְּעָר יְיָ לְיוֹם דִינָא רַבָּא בְּאִתְּעַר יַתְהוֹן מִן בֵּית קְבוּרְתְּהוֹן בִּרְגַז דְמוּתְהוֹן תִּבְסַר: ^sl-73-20

**21** אֲרוּם יְחוּשׁ לִבִּי וְכוּלְיָתִי בָּעֲרָן כְּאֶשָׁא: ^sl-73-21

**22** וַאֲנָא שַׁטְיָא לָא אֵידָע הֵיךְ בְּעִירֵי אִתְחַשְׁבֵית גַבָּךְ: ^sl-73-22

**23** וַאֲנָא תְּדִירָא עִמָךְ אוֹחַדְתָּא בְיַד יְמִינִי: ^sl-73-23

**24** בְּמִלְכְּתָךְ תַּדְבְּרִנַנִי וּבָתַר דִשְׁלִים אַיְקָרָא דַאֲמַרְתָּא עֲלָי לְאַיְתָאָה תִּסְבִּנַנִי: ^sl-73-24

**25** מַן כְּוָתָךְ דִילִי בִּשְׁמַיָא אֶלָא אַתְּ וְעִמָךְ חַבְרָא לָא צְבִיתִי בְּאַרְעָא: ^sl-73-25

**26** אִשְׁתֵּיצָא גוּשְׁמִי וְלִבְּבִי תַקִיפָא דְבָחֵין לִבְבִי וְחוּלָקִי אֱלָהָא לְעַלְמָא: ^sl-73-26

**27** אֲרוּם הָא רַשִׁיעַיָא דִי מִתְרַחֲקִין מִנָךְ יֹאבְדוּן שֵׁיצֵיתָא כָּל דְטָעֵי מִן בָּתַר דְחַלְתָּךְ: ^sl-73-27

**28** וַאֲנָא לְמִקְרַב בַּיָי לִי טָב שַׁוְיֵת בַּיָי אֱלֹהִים רוּחְצָנִי לְאִשְׁתָּעַיָא לְצַדִיקַיָא כּוּלְהוֹן פִּקוּדֵי שְׁלִיחוּתָךְ: ^sl-73-28

## Capítulo 74

**1** שִׂכְלָא טָבָא עַל יְדוֹי דְאָסָף לְמָה אֱלָהָא רְחֵקְתָּא לְעַלְמִין יִתְקֵף רוּגְזָךְ בְּעָאן רַעֲיָתָךְ: ^sl-74-1

**2** אִדְכַּר כְּנִשְׁתָּךְ דִקְנֵיתָא מִלְקַדְמִין פְּרַקְתָּ מִמִצְרַיִם שִׁבְטֵי אַחְסַנְתָּךְ טוּר דְצִיוֹן דְנָן דִי שָׁרֵיתָא שְׁכִנְתָּךְ בֵּיהּ: ^sl-74-2

**3** אֲרֵים אִסְתַּוְרָךְ לְמִשְׁוַק אוּמַיָא לְעַלְמִין דִבְּכָל חֵילֵיהּ אַבְאֵישׁ בְּעֵל דְבָבָא בְּקוּדְשָׁא: ^sl-74-3

**4** אָכְלִין מְעִיקָךְ בִּמְצַע זִמְנָיִךְ שַׁווֹן אַתְוָתְהוֹן אָתַיָא: ^sl-74-4

**5** יַצְלֵף בְּקוּרְנְסָא הֵיךְ גְבַר דִמְרִים יְדִי בִּסְבִיךְ קִיסַיָא לְמִקְטַע בְּכוּלְבַיָא: ^sl-74-5

**6** וּכְדֵין גְלִיפְיָהָא גָרְרִין כַּחֲדָא בְּקוּפִיץ וּבְמַפְסְלַת דְיוּסְטַר מָחֳיָן בְּמַרְזוֹפִין: ^sl-74-6

**7** אַדְלִיקוּ בְּנוּרָא בֵית מַקְדְשָׁא לְאַרְעָא אַפִּיסוּ מַשְׁכַּן דְאִתְקְרֵי בֵיהּ שְׁמָךְ: ^sl-74-7

**8** אֲמַרוּ בְּלִבְּהוֹן בְּנֵיהוֹן כַּחֲדָא אוֹקִידוּ אֲבָהָתְהוֹן כָּל מְעַרְעַיָא אֱלָהָא בְּאַרְעָא: ^sl-74-8

**9** אָתְוָנָא דִיהֲבוּ לָנָא נְבִיַיָא לָא חֲמֵינָא לֵית תּוּב נְבִיָא וְלֵית עִמָנָא דְיָדַע עַד אֵימָתַי: ^sl-74-9

**10** עַד אֵימָתַי אֱלָהָא יְחַסֵד מְעִיקָא יַרְחִיק בְּעֵיל דְבָבָא שְׁמָךְ לְעָלְמָא: ^sl-74-10

**11** לְמָא תְּתִיב יְדָךְ וִימִינָךְ לְמִפְרוֹק מִן גוֹ עִטְפָךְ אַפִּיק וְשֵׁיצֵי עָקְתָא: ^sl-74-11

**12** וֵאלָהָא מַלְכָּא דִשְׁכִינַת קוּדְשֵׁיהּ מִלְקַדְמִין עָבֵיד פּוּרְקָנָא בְּגוֹ אַרְעָא: ^sl-74-12

**13** אַנְתְּ גְזֵרְתָּא בְּעוּשְׁנָךְ מוֹי דְיַמָא אַנְתְּ תְּבַרְתָּא רֵישֵׁי תַנִינַיָא וְשַׁנֵקְתָּ מִצְרָאֵי עַל יַמָא: ^sl-74-13

**14** אַנְתְּ תְּרַעְתָּא רֵישֵׁי גִבָּרֵי פַּרְעֹה יְהַבְתִּנוּן לְגַמְרָא לְעַם בֵּית יִשְׂרָאֵל וְגוּשְׁמֵיהוֹן לִירוֹדֵי: ^sl-74-14

**15** אַנְתְּ בְּזַעְתָּא מַעֲיָנָא מִן כֵּיפָא וַהֲוֵי לְנַחֲלָא אַנְתְּ יַבֵּשְׁתָּא מְגִיזַת נַחֲלֵי אַרְנוֹנָא וּמְגִיזַת יוּבְקָא וְיוֹרְדָנָא דְהוֹן תַּקִיפִין: ^sl-74-15

**16** דִי לָךְ יְמָמָא לְחוֹד דִי לָךְ לֵילְיָא אַנְתְּ אַתְקֵנְתָּא סִיהֲרָא וְשִׁמְשָׁא: ^sl-74-16

**17** אַנְתְּ אַקֵמְתָּא כָּל תְּחוּמָא דְאַרְעָא קַיְטָא וְסִתְוָא אַנְתְּ בְּרָאתִנוּן: ^sl-74-17

**18** אִדְכַּר דָא בְּעֵיל דְבָבָא מְגַדֵף יְיָ וְעַמָא טִפְּשָׁא דְרָחִיקוּ שְׁמָךְ: ^sl-74-18

**19** לָא תִמְסוֹר לְפַלְחֵי מַזָרַיָא דִמְתִילִין לְחֵיוַת בָּרָא נַפְשָׁת מְאַלְפֵי אוֹרַיְתָךְ חַיֵיהוֹן דַעֲנִיָךְ לָא תִתְנְשֵׁי לְעַלְמִין: ^sl-74-19

**20** אִסְתַּכָּל לִקְיָמָא דִגְזַרְתָּא לַאֲבָהָתָן אֲרוּם אִתְמְלִיאוּ בְנֵיהוֹן חֲשׁוֹכָא פְרִיס עַל אַרְעָא וְאוֹנִיאוּתָא וַחֲטוֹפִין: ^sl-74-20

**21** לָא יְתוּב מִסְכֵּן מַכְסִיף עַנְיָא וַחֲשׁוֹכָא יְשַׁבְּחוּן שְׁמָךְ: ^sl-74-21

**22** קוּם אֱלָהָא נְצֵי מַצוּתָךְ אִדְכַּר קְלָנָא דְעַמָךְ מִן מַלְכָּא טִפְּשָׁא כָּל יוֹמָא: ^sl-74-22

**23** לָא תִתְנְשֵׁי קָל מְעִיקָךְ אִתְרְגוּשָׁא דְקָיְמִין לְקִבְלָךְ דְסַלְקָא תְדִירָא: ^sl-74-23

## Capítulo 75

**1** לְשַׁבָּחָא בִזְמַן דִי אֲמַר דָוִד לָא תְחַבֵּל עַמָךְ תּוּשְׁבַּחְתָּא עַל יְדוֹי דְאָסָף שִׁירָא: ^sl-75-1

**2** אוֹדֵינָא לָךְ יְיָ אוֹדֵינָא וְקָרֵיב שְׁמָךְ אִשְׁתְּעִיוּ פְרִישְׁוָתָךְ: ^sl-75-2

**3** אֲרוּם אֵידָע זִמְנָא אֲנָא תְּרִיצָן אֲדוּן: ^sl-75-3

**4** מִתְמַסְסִין דַיָרֵי אַרְעָא וְכָל יָתְבָהָא אֲנָא אַתְקֵנִית עַמוּדָהָא לְעַלְמִין: ^sl-75-4

**5** אֲמַרֵית לִמְתַלְעֲבוּן לָא תִתְלַעֲבוּן וְרַשִׁיעַיָא לָא תְרִימוּן אַיְקָר: ^sl-75-5

**6** לָא תְרִימוּן לִמְרוֹמָא אַיְקָרְכוֹן אַתּוּן דִי מְמַלְלִין בְּתוּקְפָא וּבְגִדוּפִין: ^sl-75-6

**7** אֲרוּם לֵית בַּר מִנִי מִמַדִנְחָא וְעַד מַעַרְבָא וְלָא מִן צִפּוּנָא דְמַדְבְּרַיָא וּמִן דְרוֹמָא אֲתַר טוּרַיָא: ^sl-75-7

**8** אֲרוּם אֱלָהָא דַיָן זַכַּי דְנָן יַמְאֵיךְ וּדְנָן יְרוֹמֵם: ^sl-75-8

**9** אֲרוּם כָּס דִלְוָט בְּיַד יְיָ וַחֲמַר עֲשִׁין מְלֵי מְזִיגַת מְרֵרְתָּא לְטַלְטְלָא מֵעֲרַת דִי רַשִׁיעַיָא וּמָה דִשְׁרֵי מִנֵיהּ קָשֵׁי מִן דֵין קַדְמָאִין בְּרַם דוּרְדְיָהָא וּפִקָטְיָהָא יְמַצְצוּן יִשְׁתּוּן כֹּל רַשִׁיעֵי אַרְעָא: ^sl-75-9

**10** וַאֲנָא אֲתַנֵי לַעֲלָם נִסַיָא אֲשַׁבַּח לֵאלָהָא דְיַעֲקֹב: ^sl-75-10

**11** וְכָל תְּקוֹף רוּם רַשִׁיעַיָא אַמְאֵיךְ אֶתְּלְשִׁינוּן מִתּוּקְפֵיהוֹן יִתְרוֹמֵם תְּקוֹף רוּמְהוֹן דְצַדִיקַיָא: ^sl-75-11

## Capítulo 76

**1** לְשַׁבָּחָא בְּתוּשְׁבַּחְתָּא תוּשְׁבְּחָא עַל יְדָא דְאָסָף שִׁירָא: ^sl-76-1

**2** אִתְיְדַע בִּדְבֵית יְהוּדָה אֱלָהָא בִּדְבֵית יִשְׂרָאֵל רַב שְׁמֵיהּ: ^sl-76-2

**3** וַהֲוָה בִירוּשְׁלֵם בֵּית מַקְדְשֵׁיהּ וּמְדוֹר בֵּית שְׁכִינַת קוּדְשֵׁיהּ בְצִיוֹן: ^sl-76-3

**4** כַּד עֲבַדוּ בֵית יִשְׂרָאֵל רְעוּתֵיהּ אַשְׁרֵי שְׁכִנְתֵּיהּ בֵּינֵיהוֹן תַּמָן תְּבַר גִרְרִין וְקַשְׁתִּין דְעַמַיָא מְגִיחֵי קְרָבָא תְּרִיסָא וְסִדְרֵי קְרָבָא בַּטֵל לְעַלְמִין: ^sl-76-4

**5** נְהִיר דְחִיל אַתְּ אֱלָהָא מְשַׁבַּח מִן בֵּית מַקְדְשָׁךְ יְזוּעוּן מִן קֳדָמָךְ מַלְכַיָא דְיָתְבִין בִּכְרַכֵּי טוּרַיָא אֲתַר בֵית כְּנִישׁוּת בִּזַתְהוֹן: ^sl-76-5

**6** אַשְׁלִחוּן מֵעִלַוֵיהוֹן זְיָנֵי קְרָבָא גִבָּרֵי לִבָּא אִתְנַמְנַמוּ בְּשִׁנְתְּהוֹן וְלָא סַפִּיקוּ כָּל גַבְרֵי חֵילָא לְמֵחַד זְיָנֵיהוֹן בִּידֵיהוֹן: ^sl-76-6

**7** מִמְזוּפְתָךְ אֱלָהָא דְיַעֲקֹב דְמַכוּן אַרְתִיכִין וּפְרָשִׁין אִתְעֲקַרוּ: ^sl-76-7

**8** אַנְתְּ דְחִיל אַנְתְּ הוּא אֱלָהָא וּמַן יְקוּם קֳדָמָךְ מְעִדָן דְיִתְקוֹף רוּגְזָךְ: ^sl-76-8

**9** מִן שְׁמַיָא אַשְׁמַעְתָּא דִין אַרְעָא דְעַמְמֵי דְחִילַת אַרְעָא דְיִשְׂרָאֵל שְׁדוֹכַת: ^sl-76-9

**10** אֲמַרִין צַדִיקַיָא יְקוּם לְדִינָא עִם רַשִׁיעַיָא אֱלָהָא לְמִפְרַק מִן יְדֵיהוֹן כָּל עִנְוְתָנֵי אַרְעָא לְעַלְמִין: ^sl-76-10

**11** כַּד אַנְתְּ רָגֵז עַל עַמָךְ אַנְתְּ מְרַחֵם עֲלֵיהוֹן וְהִנוּן יוֹדִין לִשְׁמָךְ וּשְׁאָרָא דְרִתְחָא דְאִשְׁתְּאַר לָךְ מִן רוּגְזָא דִי רַגֵזְתָּא: (ת"א אֲרוּם כַּד יִתְקוֹף רוּגְזָךְ עַל עַמָךְ יְתוּבוּן וְיוֹדוּן לִשְׁמָךְ: ^sl-76-11

**12** נְדַרוּ נִדְרִין וְשַׁלִימוּ קֳדָם יְיָ אֱלָהָכוֹן כָּל דְיָתְבִין חֲזוֹר חֲזוֹר לְמַקְדְשֵׁיהּ יַיְתוּן קוּרְבְּנַיָא לְבֵית מִקְדָשׁ דְּחִיל: ^sl-76-12

**13** יַזְעֵר גַסוֹת רוּחֲהוֹן דְרַבְרְבָנַיָא דְחִילָא עַל כָּל מַלְכֵי אַרְעָא: ^sl-76-13

## Capítulo 77

**1** לְשַׁבָּחָא עַל יַד יְדוּתוּן לְאָסָף תּוּשְׁבְּחָא: ^sl-77-1

**2** קָלִי קֳדָם יְיָ וְאֶקְבַּל קָלִי קֳדָם אֱלָהָא וְאַצֵית מֵימְרִי: ^sl-77-2

**3** בְּיוֹם עָקְתִי אוּלְפָן מִן קֳדָם יְיָ תְּבַעֵית שְׁרַת עֲלַי נְבוּאָה בְּלֵילְיָא זִלְגַת עֵינִי דִמְעֲתָא וְלָא סְפוּג סְרִיבַת לְאִתְנְחָמָא נַפְשִׁי: ^sl-77-3

**4** אֶדְכַּר אֱלָהָא וְאֶרְגוּשׁ קֳדָם יְיָ אֲמַלֵל וְתִשְׁתַּלְהֵי רוּחִי לְעַלְמִין: ^sl-77-4

**5** אֲחַדְתָּא תִּימוֹרָתָא דְעַיְנָי אִטָרְפֵית וְלָא אֲמַלֵל: ^sl-77-5

**6** מְנִיתִי יוֹמִין טָבִין דְמִן לְקָדְמִין שְׁנַיָא טָבַיָא דְמִן עַלְמִין: ^sl-77-6

**7** אֶדְכַּר תּוּשְׁבַּחְתִּי בְּלֵילְיָא עִם הִרְהוּרֵי לִבְּבִי אֲמַלֵל וְיִבְלַשׁ נִסַיָא מַנְדַע דְרוּחִי: ^sl-77-7

**8** הַאֶפְשַׁר דִי לְעַלְמִין יִרְחַק יְיָ וְלָא יוֹסִיף לְאִתְרָעַיָא תוּב: ^sl-77-8

**9** הַאֶפְשַׁר דִי פְסַק לְעַלְמִין טוּבֵיהּ שְׁלִים פִּתְגַם דְבִישׁ עַל כָּל דָר וְדָר: ^sl-77-9

**10** הַאֶפְשַׁר דְאִתְנְשֵׁי לְחַיָסָא אֱלָהָא אִין סְלִיק בְּרוּגְזֵי מִן לְמִכְמַר רַחֲמוֹי לְעָלְמִין: ^sl-77-10

**11** וַאֲמַרֵית מַרְעוּתִי הוּא אִשְׁתְּנִיוּ גְבוּרַת יְמִין עִלָאָה (וַאֲמַרֵית בָּעוּתִי הוּא שְׁנִין דְקֵץ מִיָמִין): ^sl-77-11

**12** אֶדְכַּר עוֹבָדֵי אֱלָהָא אֲרוּם אֶדְכַּר מִן לְקַדְמִין פְּרִשְׁוָתָךְ: ^sl-77-12

**13** וּרְנַנֵית בְּכָל עוֹבָדָךְ טָבַיָא וּבְתַסְקוֹפֵי נִסָךְ אֲמַלֵל: ^sl-77-13

**14** אֱלָהָא דְקַדִישִׁין אוֹרְחָתָךְ מַן אֱלָהָא רַבָּא כֵּאלָהָא דְיִשְׂרָאֵל: ^sl-77-14

**15** אַנְתְּ הוּא אֱלָהָא עָבֵיד פְּרִישָׁן הוֹדַעְתָּ בְעַמַיָא עוּשְׁנָךְ: ^sl-77-15

**16** פְּרַקְתָּא בִגְבוּרַת אֶדְרְעָךְ עַמָךְ בָּנַיָא דְאוֹלִיד יַעֲקֹב וְזָן יוֹסֵף לְעַלְמִין: ^sl-77-16

**17** חֲמוֹן שְׁכִנְתָּךְ בְּגוֹ יַמָא אֱלָהָא חֲמוֹן גְבוּרְתָּךְ עַל יַמָא רְתַתּוּן עַמַיָא לְחוֹד אִתְרַגְזוּן תְּהוֹמַיָא: ^sl-77-17

**18** אָחִיתוּ מַיָא עֲנָנֵי שְׁמַיָא קָלִין יַהֲבוּ שְׁחָקֵי לְחוֹד כִּפֵּי גִרְרָךְ אָזְלִין וּמִשְׁתַּלְהֲבִין: ^sl-77-18

**19** קָל אַכְלְיוּתָךְ בְּגַלְגְלָא אִשְׁתְּמַע אַנְהִירוּ בְרָקִין תֵּבֵל רִגְזַת וְאִתְרְגִיפַת אַרְעָא: ^sl-77-19

**20** בְּיַמָא דְסוּף אוֹרְחָךְ וְכִבְשָׁךְ בְּמַיִן סַגִיעִין וְרוּשְׁמַת פְּסִיעָתָךְ לָא אִתְיְדַעוּ: ^sl-77-20

**21** דַבַּרְתָּ הֵיךְ עָנָא עַמָךְ בְּיַד מֹשֶׁה וְאַהֲרֹן: ^sl-77-21

## Capítulo 78

**1** שִׂכְלָא דְרוּחַ קֻדְשָׁא עַל יְדוֹי דְאָסָף אֲצֵית עַמִי אוֹרַיְתִי אַצְלוּן אוּדְנֵיכוֹן לְמֵימְרֵי פוּמִי: ^sl-78-1

**2** אֶפְתַּח בִּמְתַל פּוּמִי אַבִּיעַ חֶדְוַן דְמִן לְקַדְמִין: ^sl-78-2

**3** דִי שְׁמַעֲנָן וִידַעֲנָן לְהוֹן וַאֲבָהָתָן תַּנִיאוּ לָנָא: ^sl-78-3

**4** לָא נְכַסֵי מִבְּנֵיהוֹן לְדָר בַּתְרַי מִשְׁתָּעֲיָן תֻּשְׁבְּחָתָא דַייָ וְעַשְׁנֵיהּ וּפְרִישְׁוָתֵיהּ דִי עֲבַד: ^sl-78-4

**5** וַאֲקֵים סַהֲדוּתָא בִּדְבֵית יַעֲקֹב וְאוֹרַיְתָא גְזַר דְבֵית יִשְׂרָאֵל דִי פַקֵד לַאֲבָהָתָן לְהוֹדָעוּתְהוֹן לִבְנֵיהוֹן: ^sl-78-5

**6** מִן בִּגְלַל דִי יְדַעוּן דָר בַּתְרַי בְּנִין דְמִתְיַלְדִין יְקוּמוּן וְיִתַנוּן לִבְנֵיהוֹן: ^sl-78-6

**7** וִישַׁווּן בֵּאלָהָא סִבְרֵיהוֹן וְלָא יִתְנְשׁוּן עוֹבָדֵי אֱלָהָא וּפִקוּדוֹי יִנְטְרוּן: ^sl-78-7

**8** וְלָא יֶהֱווּן הֵיךְ אֲבָהָתְהוֹן דָר מְסָרְבָן וּמַרְגֵיז דָר דְלָא מְתַקֵן לִבֵּיהּ לְמָרֵיהּ וְלָא הֲוָת מְהֵימְנָא בֵּאלָהָא רוּחֵיהּ: ^sl-78-8

**9** כַּד הֲווּ יָתְבִין בְּמִצְרַיִם אִתְרַבְרְבוּ בְּנֵי אֶפְרַיִם מַנוּ קִצָא וּטְעוּ וּנְפָקוּ תְּלָתִין שְׁנִין קֳדָם קִצָא בְּזֵינֵי קְרָבָא וְגִבָּרָא נַטְלֵי קַשְׁתָּא אַפִּיכוּ קְדַל וְאִתְקְטַלוּ בְּיוֹם סִדְרֵי קְרָבָא: ^sl-78-9

**10** מְטוֹל דְלָא נְטַרוּ קְיַם אֱלָהָא וּבְאוֹרַיְתֵיהּ סָרֵבוּ לְהַלָכָא: ^sl-78-10

**11** וְאִתְנְשִׁיאוּ עוֹבָדוֹי עַמָא בֵית יִשְׂרָאֵל וּפְרִישְׁוָתֵיהּ דִי אַחְמֵי יַתְהוֹן: ^sl-78-11

**12** קֳבֵל אַבְרָהָם יִצְחָק וְיַעֲקֹב וְשִׁבְטַיָא דַאֲבָהַתְהוֹן עֲבַד פְּרִישָׁן בְּאַרְעָא דְמִצְרַיִם חֲקַל טָאנֵיס: ^sl-78-12

**13** בְּזַע יַמָא בְּחוּטְרָא דְמֹשֶׁה רַבְּהוֹן וְאַעְבְּרִנוּן וְאוֹקִים מַיָא צְרִירִין הֵיךְ זִיקָא: ^sl-78-13

**14** וְדַבְּרִינוּן בַּעֲנָנָא בִימָמָא וְכָל לֵילְיָא בִּנְהוֹר אֶשָׁא: ^sl-78-14

**15** בְּזַע טוּרִין בְּחוּטְרֵיהּ דְמֹשֶׁה רַבְּהוֹן בְּמַדְבְּרָא וְאַשְׁקֵי כַּד בִּתְהוֹמַיָא רַבְרְבָן: ^sl-78-15

**16** וְאַפֵּיק נוֹזְלַָא דְמַיָא מִן כֵּיפָא וְאוֹחִית הֵיךְ נַהֲרִין דְנָגְדִין מַיָא: ^sl-78-16

**17** וְאוֹסִיפוּ תּוּב לְמֶחֱטֵי קֳדָמוֹי לְמִרְגַז קֳדָם עִלָאָה בְּמַדְבְּרָא צְחִי: ^sl-78-17

**18** וְנַסִיאוּ אֱלָהָא בְלִבְּהוֹן לְמִשְׁאַל אוֹכְלָא לְנַפְשֵׁיהוֹן: ^sl-78-18

**19** וְאִתְרַעֲמוּ קֳדָם יְיָ אֲמַרוּ הַאִית יוּכְלָא קֳדָם אֱלָהָא לְסַדָרָא פְּתוֹרָא בְּמַדְבְּרָא: ^sl-78-19

**20** הָא כְּבַר מְחָא בְּטִינָר וְדִיבוּ מַיָא וְנַחֲלַיָא הַלְחוֹד לַחְמָא יָכִיל לְמִתַּן אִם יְתַקֵן מְזוֹנָא לְעַמֵיהּ: ^sl-78-20

**21** בְּכֵן שְׁמִיעַ קֳדָם אֱלָהָא וּרְגִיז וְאֶשְׁתָּא אִתַּסְקַת בִּדְבֵית יַעֲקֹב וּלְחוֹד תְּקוֹף רוּגְזָא סְלִיק בְּיִשְׂרָאֵל: ^sl-78-21

**22** אֲרוּם לָא הֵימִינוּ בֵּאלָהָא וְלָא אִתְרְחִיצוּ בְּפוּרְקָנֵיהּ: ^sl-78-22

**23** וּפְקִיד שְׁחָקֵי מִלְעֵיל וְדָשֵׁי שְׁמַיָא פְּתַח: ^sl-78-23

**24** וְאָחֵית עֲלֵיהוֹן מַנָא לְמֵיכַל וְעִבּוּר שְׁמַיָא יְהַב לְהוֹן: ^sl-78-24

**25** מָזוֹן דִנְחַת מִמְדוֹר מַלְאֲכַיָא אֲכַלוּ בְּנֵי נָשָׁא זְוָדִין שְׁלַח לְהוֹן לְשַׂבְעָה: ^sl-78-25

**26** אַטֵיל רוּחַ קִדוּמָא בִּשְׁמַיָא וְדַבֵּר בְּעוּשְׁנֵיהּ רוּחַ דָרוֹמָא: ^sl-78-26

**27** וְאָחֵית עֲלֵיהוֹן הֵיךְ כְּעַפְרָא בִסְרָא וְהֵיךְ חָלָא דְיַמָא עוֹפָא דִפְרָח: ^sl-78-27

**28** וְאַפִּיל בִּמְצַע מַשִׁרְיָתֵיהּ חֲזוֹר חֲזוֹר לְמַשְׁכְּנוֹי: ^sl-78-28

**29** וַאֲכַלוּ וּשְׂבַעוּ לַחֲדָא וְרֵגוּגֵיהוֹן אַיְתֵי לְהוֹן: ^sl-78-29

**30** זָרוּ מִן רִגוּגֵיהוֹן עַד כְּדֵין מֵיכַלְהוֹן בְּפוּמְהוֹן: ^sl-78-30

**31** וְרוּגְזָא דֶאֱלָהָא סְלִיקַת בְּהוֹן וּקְטִיל בְּגִבָּרֵיהוֹן וְעוּלֵימֵי יִשְׂרָאֵל אַחְמִיט: ^sl-78-31

**32** בְּכָל דָא חָבוּ תּוּב וְלָא הֵימִינוּ בִּפְרִישְׁוָתוֹי: ^sl-78-32

**33** וְשֵׁיצֵי בִּלְמָא יוֹמֵיהוֹן וּשְׁנָתֵיהוֹן בְּבַהוּלְתָּא: ^sl-78-33

**34** בִּזְמַן דְקַטְלִנוּן תָּיְבִין וּתְבַעוּ יָתֵיהּ וִיתוּבוּן וִיצַלוּן קֳדָם אֱלָהָא: ^sl-78-34

**35** וְאִדְכַּרוּ אֲרוּם אֱלָהָא תַּקִיפְהוֹן וֵאלָהָא עִלָאָה פַּרְקִינוּן: ^sl-78-35

**36** וְשַׁרְגִינוּן לֵיהּ בְּפוּמְהוֹן וּבְלִישָׁנְהוֹן מְכַדְבִין לֵיהּ: ^sl-78-36

**37** מְטוּל דִלְבְּהוֹן לָא מְהֵימַן עִמֵיהּ וְלָא הֵימִינוּ בִּקְיָמֵיהּ: ^sl-78-37

**38** וְהוּא רַחֲמָנָא מְכַפֵּר עַוְיָתְהוֹן וְלָא מְחַבֵּל יַתְהוֹן וּמַסְגֵי לְמֵתַב מִן רוּגְזֵיהּ וְלָא יוֹחִי בְהוֹן כָּל חֵמְתֵיהּ: ^sl-78-38

**39** וּדְכִיר אֲרוּם בְּנֵי בִסְרָא הִנוּן רוּחָא דְאָזֵיל וְלָא תָאֵב: ^sl-78-39

**40** כַּמָה יְסָרְבוּן לֵיהּ בְּמַדְבְּרָא יִרְגְזוּן קֳדָמוֹי בַּאֲתַר צַדְיָא: ^sl-78-40

**41** וְתָבוּ וְנַסִיאוּ אֱלָהָא וְקַדִישָׁא דְיִשְׂרָאֵל אַתְווּ תִוְהָא: ^sl-78-41

**42** לָא אִדְכַּרוּ יַת נִסָא דִידֵיהּ וְיוֹמָא דְפַרְקִנוּן מִן מְעִיקָא: ^sl-78-42

**43** דְשַׁוֵי בְמִצְרַיִם אֲתוֹהִי וְתִמְהוֹי בַּחֲקַל טָאנֵיס: ^sl-78-43

**44** וַהֲפֵךְ לִדְמָא אֲרִיתֵיהוֹן וְנוֹזְלֵיוֹן לָא שָׁתָן מִנְהוֹן: ^sl-78-44

**45** יִגְרֵי בְהוֹן עִרְבּוּבֵי חֵיוַת בָּרָא וְגַמַר יַתְהוֹן וְעוּרְדְעָנַיָא וִיחַבֵּל יַתְהוֹן: ^sl-78-45

**46** וִיהַב וּמְסַר לְזַחֲלָא עִבּוּרְהוֹן וְלֵעוּתְהוֹן לְגוֹבָאֵי: ^sl-78-46

**47** וְקַלֵף בְּבַרְדָא גוּפְנֵיהוֹן וְשִׁקְמָתְהוֹן בְּכַרְזוּבָא: ^sl-78-47

**48** וּמְסַר לְבַרְדָא בְּעִירֵהוֹן וְגֵיתֵהוֹן לְרִשְׁפִּין דִי נוּר: ^sl-78-48

**49** יְגָרֵי בְּהוֹן מָאתָן וְחַמְשִׁין מְחָן בִּתְקוֹף רוּגְזֵיהּ בְּרִתְחָא וּבְתָרִיכוּתָא וּבְעָקָא דְמִשְׁתַּלְחָן בְּעִדָן בִּידֵיהוֹן דְאִזְגַדִין בִּישִׁין: ^sl-78-49

**50** יְטַיֵל בִּכְבִישׁ תּוּקְפֵיהּ לָא מְנַע מְמוֹתָא נַפְשֵׁיהוֹן וּבְעִירֵיהוֹן לִמְמוֹתָא מְסַר: ^sl-78-50

**51** וּקְטַל כָּל בּוּכְרָא בְּמִצְרַיִם שֵׁרוּ צְעָרֵיהוֹן בְּמַשְׁכְּנֵהוֹן דְחָם: ^sl-78-51

**52** וְאַטֵיל הֵיךְ עָנָא עַמֵי וְדַבָּרִנוּן הֵיךְ עָנָא עֶדְרָא בְּמַדְבְּרָא: ^sl-78-52

**53** וְאַשְׁרִנוּן לְרוֹחֲצָן וְלָא דָחֲלִין וְיַת בַּעֲלֵי דְבָבֵיהוֹן חֲפָא יַמָא: ^sl-78-53

**54** וְאַעֲלִנוּ לִתְחוּם אֲתַר בֵּית מַקְדְשֵׁיהּ טוּר דֵין קְנָת יְמִינֵיהּ: ^sl-78-54

**55** וְתָרֵךְ מִן קֳדָמֵיהוֹן עַמַיָא וְאַשְׁרֵי יַתְהוֹן בַּעֲדַב אַחֲסַנְתֵּיהּ וְאַשְׁרֵי בְּמַשְׁכְּנֵהוֹן שִׁבְטַיָא דְיִשְׂרָאֵל: ^sl-78-55

**56** וְאַנְסִיאוּ וְאַרְגִיזוּ קֳדָם אֱלָהָא עִלָאָה וְסַהֶדְוָתֵיהּ לָא נְטַרוּ: ^sl-78-56

**57** וְזוּרוּ וְאַרְשִׁיעוּ הֵיךְ אֲבָהַתְהוֹן אִתְהַפִּיכוּ הֵיךְ קַשְׁתָּא דְרָמְיָא גִרְרִין: ^sl-78-57

**58** וְאַרְגִיזוּ קֳדָמוֹי בְּנִסְכֵּיהוֹן וּבִפְסִלֵיהוֹן וּבְצַלְמָנֵיהוֹן אַקְנוּן יָתֵיהּ: ^sl-78-58

**59** שְׁמִיעַ קֳדָם אֱלָהָא וּרְגַז וְרַחֲקַת נַפְשֵׁיהּ לַחֲדָא בְּיִשְׂרָאֵל: ^sl-78-59

**60** וּשְׁבַק מַשְׁכְּנָא דְשִׁילוֹ מַשְׁכַּן דִי שְׁרָת תַּמָן שְׁכִנְתֵּיהּ בְּגוֹ נָשָׁא: ^sl-78-60

**61** וּמְסַר לְשִׁבְיְתָא אוֹרַיְתֵיהּ וְשִׁבְהוֹרֵיהּ בְּיַד מְעִיקָא: ^sl-78-61

**62** וּמְסַר לְקָטְלִין בְּחַרְבָּא עַמֵיהּ וּבְאַחֲסַנְתֵּיהּ אַרְגִיז: ^sl-78-62

**63** עוּלֵימוֹהִי אָכְלַת אֵשְׁתָּא וּבְתוּלָתֵיהּ לָא אִשְׁתַּבְּחָן: ^sl-78-63

**64** כַּהֲנוֹי בְקַטְלָא דְחַרְבָּא יִפְּלוּן וְאַרְמְלָתוֹי לָא סְפִיקָן דְתִבְכְּיָן (ת"א בְּעִדָן דִשְׁבוּ פְלִשְׁתָּאֵי אֲרוֹנָא דַייָ בְּחַרְבָּא נְפַלוּ כַּהֲנֵי שִׁילוֹ חָפְנִי וּפִנְחָס וּבְעִדָן דִבְשַׂרוּ נְשׁוֹהִי לָא בָכְיָן אֲרוּם מִיתוּ אוּף אִנוּן בְּהָדָא יוֹמָא): ^sl-78-64

**65** וְאִתְעָר הֵיךְ דָמִיךְ יְיָ הֵיךְ גַבְרָא דְמִתְפְּקַח מִן חַמְרָא: ^sl-78-65

**66** וּמְחָא מְעִיקוֹי בִּטְחוֹרָיָא בַּאֲחוֹרֵיהוֹן קְלָנָא דְעַלְמָא יְהַב לְהוֹן: ^sl-78-66

**67** וְרָחֵיק בְּמַשְׁכְּנָא דִפְרֵס עַל תְּחוּמֵיהּ דְיוֹסֵף וּבְשֵׁבֶט אֶפְרַיִם לָא רְעָא: ^sl-78-67

**68** וְאִתְרְעֵי יַת שֵׁבֶט יְהוּדָה יַת טוּרָא דְצִיוֹן דִי רְחִים: ^sl-78-68

**69** וּבְנָא הֵיךְ קַרְנָא דְרִימְנָא מַקְדְשֵׁיהּ מְעַתַּד הֵיךְ אַרְעָא דִיסָדָהּ לְעַלְמֵי עָלְמִין: ^sl-78-69

**70** וְאִתְרְעֵי בְּדָוִד עַבְדֵיהּ וְדַבָּרֵיהּ מִן עֶדְרֵי דְעָנָא: ^sl-78-70

**71** וּמִן בָּתַר מְיַנְקָן אַיְתֵיהּ לְמִשְׁלַט בְּיַעֲקֹב עַמֵיהּ וּבְיִשְׂרָאֵל אַחְסַנְתֵּיהּ: ^sl-78-71

**72** וּמְלַךְ עֲלֵיהוֹן בִּשְׁלִימוּת לִבְּבֵיהּ וּבְסוּכְלְתָנוּת אַיְדוֹי יְדַבְּרִנוּן: ^sl-78-72

## Capítulo 79

**1** תּוּשְׁבְּחָא עַל יְדוֹי דְאָסָף עַל חוּרְבַּן בֵּית מַקְדְשָׁא אֲמַר בְּרוּחַ נְבוּאָה אֱלֹהִים אֲתוֹ עַמַיָא בְּאַחְסַנְתָּךְ סְאִיבוּ יַת הֵיכָל קָדְשָׁךְ שַׁוִיאוּ יָת יְרוּשְׁלָם לְצָדוּ: ^sl-79-1

**2** יְהַבוּ יַת גוּשְׁמֵי עַבְדָךְ לְמֵיכְלָא לְעוֹפָא דִשְׁמַיָא בְּסַר חֲסִידָךְ לְחֵיוָת אַרְעָא: ^sl-79-2

**3** שָׁדוֹן אַדְמְהוֹן הֵיךְ מַיָא חַזְרָנוּת דִירוּשְׁלֶם וְלֵית דְקָבֵר: ^sl-79-3

**4** הֲוֵינָא קְלָנָא לְשָׁכְנָנָא תּוֹלְעֲבָא וְגוֹחֲכָא לְחַזְרָנוּתָנָא: ^sl-79-4

**5** עַד אֵימָתַי יְיָ תִּתְקוֹף לְעָלְמִין תִּבְעַר הֵיךְ אֶשָׁא טְנָנוּתָךְ: ^sl-79-5

**6** שְׁדֵי חֵמְתָךְ עַל פַּלְחֵי כוֹכְבַיָא דְלָא חַכִּימוּ יָתָךְ וְעַל מַלְכְּוָתָא דְכַשְׂדָאֵי דִי בִשְׁמָךְ לָא צַלִיאוּ: ^sl-79-6

**7** אֲרוּם גַמַרוּ בֵית יַעֲקֹב וְיַת בֵּית מַקְדְשֵׁיהּ אַצְדִיאוּ: ^sl-79-7

**8** לָא תִדְכַּר לָנָא עַוְיָן דְמִן שֵׁרוּיָא בְּסַרְהוֹבְיָא יְקַדְמוּ לָךְ טַבְוָתָךְ אֲרוּם אִתְמַסְכַּנְנָא לַחֲדָא: ^sl-79-8

**9** סְעֵד יָתָנָא אֱלָהָא פּוּרְקָנָנָא מְטוּל אַיְקַר שְׁמָךְ וּפְרוֹק יָתָנָא וְכַפֵּר עַל חוֹבָנָא בִּגְלַל שְׁמָךְ: ^sl-79-9

**10** לְמָה יֵימְרוּן עַמַיָא אָן אֱלָהָהוֹן יִתְגְלֵי בְּעַמַיָא לְמֶחֱמֵינָא פּוּרְעֲנוּת אֲדַם עַבְדָךְ דְאִשְׁתְּפֵךְ: ^sl-79-10

**11** תְּעוֹל קֳדָמָךְ אֶנְקָתָא דַאֲסִירֵי הֵיךְ סַגִי תְּקוֹף אֶדְרְעָךְ שְׁרֵי בְנַיָא דְמִתְמַסְרִין לְמִיתוּתָא: ^sl-79-11

**12** וַאֲתִיב לְשָׁכְנָנָא עַל חַד שִׁבְעָה גוּמְלָא עַל פּוּרְעֲנוּת קְיָמְהוֹן וְחִסוּדָן דִי חֲסִדוּ יָתָךְ יְיָ: ^sl-79-12

**13** וַאֲנַחְנָא עַמָךְ וְעָאן רַעֲיָתָךְ נוֹדֵי קֳדָמָךְ לַעֲלַם דָרֵי לְדָרֵי דָרַיָא נְתַנֵי תּוּשְׁבַּחְתָּךְ: ^sl-79-13

## Capítulo 80

**1** לְשַׁבָּחָא עַל יָתְבֵי סַנְהֶדְרִין דִי מִתְעַסְקִין בְּסַהֲדוּת אוֹרַיְתָא עַל יְדוֹי דְאָסָף תּוּשְׁבַּחְתָּא: ^sl-80-1

**2** פַּרְנָסָא דְיִשְׂרָאֵל אָצֵית דְמַדְבַּר הֵיךְ עָנָא אֲרוֹנָא דְיוֹסֵף דִשְׁכִינְתֵּיהּ שָׁרְיָא בֵינֵי כְרוּבַיָא הוֹפַע: ^sl-80-2

**3** קֳדָם אֶפְרַיִם וּבִנְיָמִין וּמְנַשֶׁה עוֹרֵר יַת כֹּחַ גְבוּרְתָּךְ עֲלָנָא וַעֲלָךְ מִן דִינָא לְמִפְרוֹק לָנָא: ^sl-80-3

**4** אֱלָהָא אֲתֵיב יָתָנָא מִגָלוּתָנָא וְאַנְהַר זִיו סְבַר אַפָּךְ עֲלָנָא וְנִתְפְּרַק: ^sl-80-4

**5** יְיָ אֱלֹהִים צְבָאוֹת עַד אֵימָתַי לָא קָבַלְתָּא צְלוֹתָא דְעַמָךְ: ^sl-80-5

**6** אוֹכַלְתָּא לְהוֹן לְחַם טְמִישׁ בְּדִמְעֲתָא וְאַשְׁקֵיתָן חֲמַר דִמְעָא תִּלְתָּי: ^sl-80-6

**7** שַׁוִיתָנָא לִמְדָנָא לְשֵׁיבָבָנָא וּבַעֲלֵי דְבָבָנָא יִתְלַעֲבוּן לְהוֹן: ^sl-80-7

**8** אֱלֹהִים צְבָאוֹת אֲתֵיב יָתָנָא מִגְלוּתָנָא וְאַנְהֵר זִיו סְבַר אַפָּךְ עֲלָנָא וְנִתְפְּרֵק: ^sl-80-8

**9** בֵּית יִשְׂרָאֵל דִמְתִילִין לְגוּפְנָא מִמִצְרַיִם אֲטֵלְתָּא תָּרֵכְתָא עַמַיָא מֵאַרְעָא דְיִשְׂרָאֵל וּנְצֵבְתִּנוּן: ^sl-80-9

**10** פָּנִיתָא מִן קֳדָמֵיהוֹן כְּנַעֲנָאֵי וְשֵׁרָשְׁתָּא שׁוֹרָשֵׁיהוֹן וּמַלְאַת אַרְעָא: ^sl-80-10

**11** חַפְיָן טוּרַיָא דְיִרוּשְׁלֶם טוּל בֵּית מַקְדְשָׁא וּבָתֵּי מֶדְרָשַׁיָא רַבָּנִין אָמְרִין אֲלִימִין דִמְתִילִין לְאַרְזִין תַּקִיפִין: ^sl-80-11

**12** שְׁבֵשַׁת שִׁבְשִׁין (שְׁדַרַת תַּלְמִידָהָא) עַד יַמָא רַבָּא וְלִנְהַר פְּרָת יַנִיקָהָא: ^sl-80-12

**13** לְמָא תַקֵפְתָּא גוּדְרָהָא וּמְכַסְחִין יָתָהּ כָּל עָבְרֵי אוֹרְחָא: ^sl-80-13

**14** יְנוּבְרִנָהּ חֲזִיר דְמִן חוּרְשָׁא וְתַרְנְגוֹל בָּרָא יִתְפַּרְנֵס מִנָהּ: ^sl-80-14

**15** אֱלֹהִים צְבָאוֹת תּוּב כְּדוּן אִסְתַּכֵּל מִן שְׁמַיָא וַחֲמֵי וְאִדְכַּר בְּרַחֲמֵי גוּפְנָא הָדָא: ^sl-80-15

**16** וְעוֹבָרָא דִי נְצִיבַת יְמִינָךְ וְעַל מַלְכָּא מְשִׁיחָא דְחַיֵלְתָּא לָךְ: ^sl-80-16

**17** מִתּוֹקְדָא בְּנוּרָא וּמְפָרְכָא מִמְזוֹפִיתָא דְמִן קֳדָמָךְ יֵיבְדוּן: ^sl-80-17

**18** תְּהֵי אַיְדָךְ עַל גְבַר דְקַיֵימְתָּא לֵיהּ בְּיַד יְמִינָךְ עַל בַּר נַשׁ דְחַיֵלְתָּא לָךְ: ^sl-80-18

**19** לָא נָזוֹר מִבָּתַר דְחַלְתָּךְ תְּקַימִנָנָא וּבִשְׁמָךְ נִקְרֵי: ^sl-80-19

**20** יְיָ אֱלֹהִים צְבָאוֹת אָתֵיב יָתָנָא מִגָלוּתָא אַנְהַר זִיו סְבַר אַפָּךְ עֲלָנָא וְנִתְפְּרַק: ^sl-80-20

## Capítulo 81

**1** לְשַׁבָּחָא עַל כִּנָרָא דְאָתְיָא מִן גַת עַל יְדָא דְאָסָף: ^sl-81-1

**2** שַׁבַּחוּ קֳדָם אֱלֹהִים עוּשְׁנָנָא יַבְּבוּ קֳדָם אֱלָהָא דְיַעֲקֹב: ^sl-81-2

**3** אֲרִימוּ קָלָא בְּתוּשְׁבַּחְתָּא וְסֵדַרוּ תוּפַּיָא כִּנָרָא דְקָלֵיהּ בְּסִים עִם נִבְלִין: ^sl-81-3

**4** תְּקַעוּ בְּיַרְחָא דְתִשְׁרֵי שׁוֹפְרָא בְּיַרְחָא דְמִתְכַּסֵי יוֹמֵי חַגַיָא דִילָנָא: ^sl-81-4

**5** אֲרוּם קְיָם גְזַר יִשְׂרָאֵל הוּא הִלְכָת דִינָא לֵאלָהָא דְיַעֲקֹב: ^sl-81-5

**6** סַהֲדוּתָא עַל יְהוֹסֵף שַׁוְיֵהּ דְלָא קָרֵב לְאִתַּת רִבּוֹנֵיהּ בֵּיהּ בְּיוֹמָא נְפַק מִבֵּית אַסִירֵי וְשַׁלִיט בְּכָל אַרְעָא דְמִצְרָיִם סִפְתָא דְלָא חַכִּימַת אֲלֵיפִית שְׁמַעִית: ^sl-81-6

**7** אַעְדֵיתִי מִשִׁעְבּוּדָא כַּתְפֵיהּ אַיְדוֹי מִן לְמִרְמֵי טִינָא לְקִדְרָא אִסְתַּלְקָן: ^sl-81-7

**8** בְּעִדָן עָקְתָא דְמִצְרַיִם קָרִיתָ וּפַצֵית יְתָךְ עֲנֵית יָתָךְ בַּאֲתַר טְמִיר בֵּית שְׁכִנְתִּי דְאָכְלִין קֳדָמוֹי גַלְגַלִין דִי נוּר בְּחַנְתָּךְ עַל מֵי מַצוּתָא לְעָלְמִין: ^sl-81-8

**9** שְׁמַעוּ עַמִי וְאַסְהֵיד בְּכוֹן יִשְׂרָאֵל אִם תְּקַבֵּל לְמֵימְרִי: ^sl-81-9

**10** לָא יְהֵי בֵינֵיכוֹן פָּלְחֵי טָעֲוָתָא נוּכְרָאָה וְלָא תִסְגְדוּן לְטַעֲוַת חִילוֹנָי: ^sl-81-10

**11** אֲנָא יְיָ אֱלָהָךְ דְאַסְקֵית יַתְכוֹן מֵאַרְעָא דְמִצְרַיִם אַפְתֵּי פוּמָךְ בְּפִתְגָמֵי אוֹרַיְתָא וַאֲמַלֵי יָתָהּ מִכָּל טָבְתָא: ^sl-81-11

**12** וְלָא קַבִּילוּ עַמִי לְקָלִי וְיִשְׂרָאֵל לָא צְבוּ לְמֵימְרִי: ^sl-81-12

**13** וְתָרִכְתֵּיהּ בְּהִרְהוּרֵי לִבְּהוֹן אֲזַלוּ בְּמִלְכַת רַשִׁיעֵיהוֹן: ^sl-81-13

**14** הַלְוַאי עַמִי שְׁמַע לִי יִשְׂרָאֵל בְּאוֹרְחָתַי יְהַלְכוּן: ^sl-81-14

**15** כִּזְעֵר בַּעֲלֵי דְבָבֵיהוֹן אַמְאֵךְ וְעַל בַּעֲלֵי דְבָבֵיהוֹן אֲתֵיב מְחַת גְבוּרְתִּי: ^sl-81-15

**16** סַנְאֵי יְיָ יְכַדְבוּן לֵיהּ וִיהֵי תּוּקְפֵיהוֹן לַעֲלָם: ^sl-81-16

**17** וְיֹאכְלִנֵיהּ מִן טוּב לְחֵם חִטִין וּמִן טִינָרָא דוּבְשָׁא אַשְׂבַּעְנָךְ: ^sl-81-17

## Capítulo 82

**1** תּוּשְׁבַּחְתָּא עַל יְדָא דְאָסָף אֱלֹהִים שְׁכִנְתֵּיהּ שָׁרְיָא בִּכְנִישַׁת צַדִיקִין דְתַקִיפִין בְּאוֹרַיְתָא בִּמְצַע דִינִין דִקְשׁוֹט יְדָן: ^sl-82-1

**2** עַד אֵימָתַי רַשִׁיעַיָא תְדוּנוּן שְׁקַר וְאַפֵּי רַשִׁיעַיָא תִּסְבוּן לְעַלְמִין: ^sl-82-2

**3** דוּנוּ מַסְכֵּנָא אַצְדִיקוּ: ^sl-82-3

**4** שְׁזִיבוּ מִסְכֵּן וְיַתְמָא עַנְיָא וּמִסְכֵּנָא וַחֲשׁוֹכָא מִן יְדֵיהוֹן דְרַשִׁיעַיָא פְּצוּ יַתְהוֹן: ^sl-82-4

**5** לָא חַכִּימוּ לְאוֹטְבָא וְלָא אֶתְבַּיְנָן בְּאוֹרַיְתָא בַּחֲשׁוֹכָא מְהַלְכִין מְטוּל הֵיכְנָא מִתְמוֹטְטִין רִגְלֵיהוֹן דִי בְּסִיסֵי אַרְעָא: ^sl-82-5

**6** אֲנָא אֲמַרֵית הֵי כְּמַלְאֲכַיָא אַתּוּן חֲשִׁיבִין וְהֵיךְ אַנְגְלֵי מְרוֹמָא כוּלְכוֹן: ^sl-82-6

**7** בְּרַם בְּקוּשְׁטָא הֵיךְ בְּנֵי נָשָׁא תְּמוּתוּן וְהֵיךְ חַד מִן רַבְרְבָנַיָא תִפְּלוּן: ^sl-82-7

**8** קוּם יְיָ דוּן יַת כָּל יָתְבֵי אַרְעָא אֲרוּם אַתְּ תַּחְסִין בְּכָל עַמְמַיָא: ^sl-82-8

## Capítulo 83

**1** שִׁיר וּשְׁבָחָא עַל יְדָא דְאָסָף: ^sl-83-1

**2** אֱלֹהִים לָא תִשְׁתּוֹק לָךְ לָא תִתְרַשֵׁל וְלָא תִשְׁדוֹךְ אֱלָהָא: ^sl-83-2

**3** אֲרוּם הָא בַעֲלֵי דְבָבָךְ מִתְרַגְשִׁין וְסַנְאָךְ זְקִיפוּ רֵישָׁא: ^sl-83-3

**4** עַל עַמָךְ נְכִילוּ רָזָא וּמִתְמַלְכִין עַל דְמִתְטְשִׁין בְּאוֹצְרָיִךְ: ^sl-83-4

**5** אָמְרִין אֱתוֹ וְנִכְנְסוּן מִלְמֶהֱוֵי עָם וְלָא אִדְכַּר שְׁמָא דְיִשְׂרָאֵל תּוּב: ^sl-83-5

**6** אֲרוּם אִתְמְלַכוּן בְּכָל לִבָּא עֲלָךְ כַּחֲדָא וְאַמְטוּלְתָּךְ קְיָמָא גָזְרִין: ^sl-83-6

**7** מִשְׁכְּנֵי אֱדוֹמָאֵי וְעַרָבָאֵי מוֹאֲבָאֵי וְהוּנְגְרָאֵי: ^sl-83-7

**8** גוּבְלָאֵי וְעַמוֹנָאֵי וַעֲמַלְקָאֵי פְּלִשְׁתָּאֵי עִם יָתְבֵי צוֹר: ^sl-83-8

**9** לְחוֹד סַנְחֵרִיב מַלְכָּא דְאַתּוּר אִתְחַבַּר עִמְהוֹן הֲווֹן לִסְעֵיד לִבְנֵי לוֹט לְעָלְמִין: ^sl-83-9

**10** עֲבַד לְהוֹן הֵיךְ עֲבַדְתָּא לְמִדְיָן וּלְסִיסְרָא וְהֵיךְ עֲבַדְתָּא לְיָבִין בְּנַחַל דְקִישׁוֹן: ^sl-83-10

**11** אִשְׁתְּצִיוּ בְּעֵינָא דְדֹאר הֲווֹן הֵיךְ רְעִי דִרְמִיס לְאַרְעָא: ^sl-83-11

**12** שַׁוִי יַתְהוֹן וְרַבָּנֵיהוֹן הֵיךְ עוֹרֵב וְהֵיךְ זְאֵב וְהֵיךְ זֶבַח וְהֵיךְ צַלְמוּנָע כָּל מַלְכֵיהוֹן: ^sl-83-12

**13** דִי אֲמַרוּ נֵירַת לָנָא יַת כָּל עִידִית אֱלֹהִים: ^sl-83-13

**14** אֱלָהִי שַׁוִי יַתְהוֹן הֵיךְ גִלְגְלָא דְמִתְגַלְגַל וְאָזֵל וְלָא נְיָח בְּמִדְרוֹן וְהֵיךְ קַשָׁא קֳדָם זַעֲפָא: ^sl-83-14

**15** הֵיךְ אֶשָׁא דְבַעֲרָא בְּחוּרְשָׁא וְהֵיךְ שַׁלְהוֹבִיתָא דְמִצַלְהֲבָא זָרְזֵי טוּרַיָא: ^sl-83-15

**16** הֵכְנָא תִרְדְפִנוּן בְּעַלְעוֹלָךְ וּבְזַעֲפָךְ תְּבַהֲלִנוּן: ^sl-83-16

**17** מַלְיָא אַפֵּיהוֹן קְלָנָא וְיִבְעוּן שְׁמָךְ יְיָ: ^sl-83-17

**18** יִבָּהֲתוּן וְיִבָּהֲלוּן לְעַלְמֵי עָלְמִין וְיִתְחַסְדוּן וִיהוֹבְדוּן: ^sl-83-18

**19** וְיֵדְעוּ אֲרוּם אַתְּ שְׁמָךְ יְיָ בִּלְחוֹד עִלָאָה עַל כָּל יָתְבֵי אַרְעָא: ^sl-83-19

## Capítulo 84

**1** לְשַׁבָּחָא עַל כִּנָרָא דְאָתְיָא מִגַת עַל יְדֵיהוֹן דִבְנֵי קֹרַח תּוּשְׁבַּחְתָּא: ^sl-84-1

**2** מַה הִנוּן רְחִימִין מִשְׁכְּנָיִךְ יְיָ צְבָאוֹת: ^sl-84-2

**3** רִגַגַת וּלְחוֹד תְּאִיבַת נַפְשִׁי לְדָרַת יְיָ לִבִּי וּבִסְרִי מְרַנְנָן לֵאלָהָא קַיָם: ^sl-84-3

**4** לְחוֹד יוֹנְתָא אַשְׁכַּחַת בֵּיתָא וְשַׁפְנִינָא שַׁרְכְּפָא לֵיהּ דִי כָשְׁרִין גוֹזָלֶיהָ לְאִתְקְרָבָא עַל מַדְבְּחָתָךְ יְיָ צְבָאוֹת מַלְכִּי וֵאלָהָא: ^sl-84-4

**5** טוּבֵיהוֹן דְצַדִיקִין דְיָתְבִין בְּבֵית מַקְדְשָׁךְ תּוּב יְשַׁבְּחוּנָךְ לְעָלְמִין: ^sl-84-5

**6** טוּבֵיהּ דִגְבַר דְעוּשְׁנָא לֵיהּ בְּמֵימְרָךְ רוּחְצָנוּתָא בִּלְבָבֵיהוֹן: ^sl-84-6

**7** רַשִׁיעַיָא דְעָבְרִין עִם עוֹמְקֵי גֵהִנָם בַּכְיָן בִּכְיְתָא הֵיךְ מַעֲיָנָא יְשַׁוִנֵיהּ לְחוֹד בִּרְכָן יַעֲטוֹף לִדְתָיְבִין לְאוּלְפָן אוֹרַיְתֵיהּ: ^sl-84-7

**8** אָזְלִין צַדִיקַיָא מִן בֵּית מַקְדְשָׁא לְבֵית מֶדְרָשָׁא יִתְחַמֵי לֵעוּת אוֹרַיְתָא דִילְהוֹן קֳדָם יְיָ דִשְׁכִנְתֵּיהּ שָׁרְיָא בְצִיוֹן: ^sl-84-8

**9** אֲמַר דָוִד יְיָ אֱלֹהִים צְבָאוֹת קַבֵּל צְלוֹתִי אֲצֵית אֱלָהָא דְיַעֲקֹב לְעָלְמִין: ^sl-84-9

**10** זַכְוַת אֲבָהָתָנָא חֲמֵי אֱלֹהִים וְאִסְתַּכַּל אַנְפֵּי מְשִׁיחָךְ: ^sl-84-10

**11** אֲרוּם טָב לְמִתַּב יוֹמָא חָד בְּדָרַת מַקְדְשָׁךְ מִן אָלֶף בְּגָלוּתָא בְּחַרֵת לְאִדְבָּקָא בְּבֵית מַקְדָשׁ אֱלָהָא מִן לְמֵדָר בְּמַשְׁכְּנֵי רַשִׁיעָא: ^sl-84-11

**12** אֲרוּם הֵיךְ שׁוּר רָם וּתְרִיס תַּקִיף יְיָ אֱלֹהִים חִנָא וִיקָרָא יִתֵּן יְיָ לָא יְכַסֵי טָבָא מִן דְאָזְלִין בִּשְׁלֵימוּתָא: ^sl-84-12

**13** יְיָ צְבָאוֹת טָב לְבַר נָשָׁא דְמִתְרְחֵץ בְּמֵימְרָךְ: ^sl-84-13

## Capítulo 85

**1** לְשַׁבָּחָא עַל יְדֵיהוֹן דִבְנֵי קֹרַח תּוּשְׁבְּחָא: ^sl-85-1

**2** רְעֵיתָא יְיָ אַרְעָךְ אַתֵבָת שִׁבְיְתָא דְבֵית יַעֲקֹב: ^sl-85-2

**3** שְׁבַקְתָּא חוֹבֵיהוֹן דְעַמָךְ כַּסִיתָא כָּל חַטָאֵיהוֹן לְעָלְמִין: ^sl-85-3

**4** כְּנֵשְׁתָּא כָּל רוּגְזָךְ תַּבְתָּא מִן תְּקוֹף רוּגְזָךְ: ^sl-85-4

**5** תּוּב לְוָתָנָא אֱלָהָא פּוּרְקָנָא וּבַטֵל רוּגְזָךְ עִמָנָא: ^sl-85-5

**6** הַאֶפְשַׁר דִי לְעַלְמַיָא תִתְקוֹף בָּנָא תִּנְגִיד תּוּקְפָךְ לְדָר וָדָר: ^sl-85-6

**7** הֲלָא אַתְּ תְּתוּב תְּחַיֵי יָתָנָא וְעַמָךְ יֶיחְדוּן בְּמֵימְרָךְ: ^sl-85-7

**8** אַחֲמֵי יָתָנָא יְיָ טוּבָךְ וּפוּרְקָנָךְ תִּתְיְהַב לָנָא: ^sl-85-8

**9** אֶשְׁמַע מַה יְמַלֵל אֱלָהָא יְיָ אֲרוּם יְמַלֵל שְׁלָם לְעַמֵיהּ וְלַחֲסִידוֹי וְלָא יַחְזְרוּן לְסִכְלָא: ^sl-85-9

**10** בְּרַם קָרִיב לְדָחֲלִין מִנֵיהּ פּוּרְקָנֵיהּ לְאַשְׁרָאָה יְקָרָא בְּאַרְעָנָא: ^sl-85-10

**11** טַבְוָן וּקְשׁוֹט אָרְעִין צִדְקָא וּשְׁלָמָא אִדְבָּקוּ: ^sl-85-11

**12** קְשׁוֹט מִן אַרְעָא אַרְבְּיָת וְצִדְקָא מִן שְׁמַיָא אוֹדִיק: ^sl-85-12

**13** לְחוֹד יְיָ יִתֵּן טָבָא וְאַרְעָנָא תִּתֵּן אִבָּהּ: ^sl-85-13

**14** צִדְקָא קֳדָמוֹי יְהַלֵךְ וְשַׁוֵי לְאוֹרַח טָב אִסְתַּוְרוֹי: ^sl-85-14

## Capítulo 86

**1** צְלוֹתָא דְצַלֵי דָוִד אַצְלֵי יְיָ אוּדְנָךְ עֲנֵי יָתִי אֲרוּם עַנְיָא וַחֲשִׁיכָא אֲנָא: ^sl-86-1

**2** נְטוֹר נַפְשִׁי אֲרוּם חֲסִידָא אֲנָא פְּרוֹק עַבְדָךְ אַתְּ אֱלָהִי דִי אֲנָא מִתְרְחֵץ עֲלָךְ: ^sl-86-2

**3** חוּס עֲלַי יְיָ אֲרוּם קֳדָמָךְ אֲצַלֵי כָּל יוֹמָא: ^sl-86-3

**4** אַחְדֵי נַפְשָׁא דְעַבְדָךְ אֲרוּם לְוָתָךְ יְיָ נַפְשִׁי אֶזְקוֹף בִּצְלוֹ: ^sl-86-4

**5** אֲרוּם אַתְּ הוּא יְיָ טָב לְצַדִיקַיָא וּשְׁבֵק לִדְתָיְבִין לְאוֹרַיְתֵיהּ וּמַסְגֵי טִיבוּ לְכָל דִמְצַלְיָן קֳדָמָךְ: ^sl-86-5

**6** אֲצֵית יְיָ צְלוֹתִי וְקַבֵּל לְקָל תַּחֲנוּנָי: ^sl-86-6

**7** בְּיוֹמָא דְעָקְתִי אֶקְרֵי לְוָתָךְ אֲרוּם אַתְּ עָנֵי יָתִי: ^sl-86-7

**8** לֵית בַּר מִינָךְ בְּאַנְגְלֵי מְרוֹמָא יְיָ וְלֵית כְּעוֹבָדָךְ: ^sl-86-8

**9** כָּל עַמְמַיָא דִי עֲבַדְתָּ יֵיתוּן וְיִסְגְדוּן קֳדָמָךְ יְיָ וְיִתְּנוּן אַיְקַר לִשְׁמָךְ: ^sl-86-9

**10** אֲרוּם רַבָּא אַתְּ אֱלָהָא וְעָבֵּד פְּרִישָׁן אַתְּ הוּא אֱלָהָא בִּלְחוֹדָךְ: ^sl-86-10

**11** אַלֵף יָתִי יְיָ אוֹרְחָתָךְ אֶתְהַלֵךְ בְקוּשְׁטָךְ יַחֵד לִבְּבֵי לְמִדְחַל שְׁמָךְ: ^sl-86-11

**12** אוֹדִי קֳדָמָךְ יְיָ אֱלֹהָי בְּכָל לִבְּבִי וְאַיְקַר שְׁמָךְ לַעֲלָם: ^sl-86-12

**13** אֲרוּם טוּבָךְ רַב עָלַי וּפַצִיתָא נַפְשִׁי מִשְׁיוֹל אַרְעִיתָא: ^sl-86-13

**14** אֱלָהָא זְדוֹנִין קָמוּ עֲלַי וְתַקִיפִין תְּבָעוּ נַפְשִׁי וְלָא שָׁוִיאוּ יָתָךְ לְקִבְלְהוֹן: ^sl-86-14

**15** וְאַתְּ יְיָ אֱלָהָא רַחֲמָנָא וְחִנְנָא מְרַחֵק רְגַז וּמַסְגֵי לְמֶעְבַּד טַבְוָן וּקְשׁוֹט: ^sl-86-15

**16** אִתְפְּנֵי לְוָתִי וְחוּס עֲלַי הַב עוֹשְׁנָךְ לְעַבְדָךְ וּפְרוֹק לְבַר אַמְתָךְ: ^sl-86-16

**17** עֲבֵד עִמִי אָת לְטָבָא בִּזְמַן דְעָיֵל שְׁלֹמֹה בְּרִי יַת אֲרוֹנָא בְּבֵית מַקְדְשָׁא יִתְפַּתְּחָן תַּרְעַיָא אַמְטוּלְתִּי וְיֶחֱמוּ סַנְאַי אֲרוּם שְׁבַקְתָּא לִי וְיִבַּהֲתוּן וִידוּן אֲרוּם אַתְּ יְיָ סִיַעְתַּנִי וְנִחַמְתָּנִי: ^sl-86-17

## Capítulo 87

**1** עַל יְדֵיהוֹן דִבְנֵי קֹרַח אִתְאַמַר שִׁירְתָא דְמִתְיַסַד עַל פּוּם אַבְהָתָא דְמִן לְקַדְמִין: ^sl-87-1

**2** רָחַם יְיָ מַעֲלָנֵי בָּתֵּי מֶדְרָשַׁיָא דִקְבִיעָן בְּצִיוֹן מִכֹּל בָּתֵּי כְנִישַׁיָא דְבֵית יַעֲקֹב: ^sl-87-2

**3** מִלִין דִיקָר אִתְמַלֵל עֲלָךְ קַרְתָּא דֶאֱלָהָא לְעָלְמִין: ^sl-87-3

**4** אִדְכַּרוּ תּוּשְׁבַּחְתָּךְ מִצְרָאֵי וּבַבְלָאֵי לְיָדְעֵי יָתָךְ הָא פְּלִשְׁתָּאֵי וְצוֹרָאֵי עִם כּוּשָׁאֵי דֵין מְלִיךְ אִתְרַבָּא תַּמָן: ^sl-87-4

**5** וּלְצִיּוֹן יִתְאֲמַר דָוִד מַלְכָּא וּשְׁלֹמֹה בְרֵיהּ אִתְרַבָּא בְגַוָהּ וֵאלָהָא הוּא יְשַׁכְלְלִנָהּ לְעֵילָא: ^sl-87-5

**6** יְיָ עַל סִפְרָא דִי מְכַתְּבִין בֵּיהּ חוּשְׁבַּן כָּל עָלְמַיָא דֵין מְלֵיךְ אִתְרַבָּא תַּמָן לְעָלְמִין: ^sl-87-6

**7** וְאָמְרֵי שִׁירִין עַל חִנְגַיָא כָּל מִינֵי תוּשְׁבְּחָן עַל קוּרְבָּנָא מִתְאַמְרִין בְּגַוָךְ: ^sl-87-7

## Capítulo 88

**1** שִׁירָא וְתוּשְׁבַּחְתָּא עַל יְדֵיהוֹן דִבְנֵי קֹרַח עַל צְלוֹתָא לְשַׁבָּחָא שִׂכְלָא טָבָא עַל יְדוֹי דְהֵימָן יַצִיבָא: ^sl-88-1

**2** יְיָ אֱלָהָא פוּרְקָנֵיהּ יֵימָם קַבְּלֵית בְּלֵילְיָא צְלוֹתִי לְקִבְלָךְ: ^sl-88-2

**3** תֵּעוֹל קֳדָמָךְ צְלוֹתִי אַצְלֵי אוּדְנָךְ לְבָעוּתִי: (ת"א יֵיתֵי קֳדָמָךְ צְלוֹתִי עַל עַמָךְ בֵּית יִשְׂרָאֵל וְהַט אוּדְנָךְ לְתוּשְׁבַּחְתִּי דְשַׁבְּחֵת לִיקָרָךְ): ^sl-88-3

**4** אֲרוּם שְׂבַעַת בְּבִישָׁן נַפְשִׁי וְחַיַי לְשֵׁיוֹל מְטוּ: ^sl-88-4

**5** אִתְחַשְׁבֵית עִם נַחֲתֵי בֵית אֲסִירֵי הֲוֵיתִי הֵיךְ בַּר נַשׁ דְלֵית לֵיהּ חֵילָא: ^sl-88-5

**6** הֵיךְ רַשִׁיעַיָא דְמִיתוּ וְלָא תָבוּ יִתְעֲבַדוּ בְנֵי חוֹרִין מִן מַצוּתָא הֵיךְ קְטִילִין דְחַרְבָּא שָׁכְבֵי בֵית קְבוּרְתָּא דְלָא דְכַרְתִּנוּן תוּב וְהִנוּן מֵאַפֵּי שְׁכִנְתָּךְ אִתְפַּלָגוּן: ^sl-88-6

**7** שַׁוִיתָא יָתִי בְּגָלוּתָא דִמְתִילָא לְגוּבָא אַרְעִיתָא בַּחֲשׁוֹכַיָא בִּמְצוּלְתָּא: ^sl-88-7

**8** עֲלַי סַמְכַת חֵמְתָךְ וְכָל גְזֵירָן בִישָׁן תַבַּרוּ יָתִי סַגֵפְתָּא לְעָלְמִין: ^sl-88-8

**9** אַרְחֵקְתָּא מְיוּדָעַי מִנִי שַׁוִיתָא יָתִי רִיחוּקִין לְהוֹן כָּלוּא בְּבֵית אֲסִירֵי וְלָא אֶפּוֹק: ^sl-88-9

**10** עֵינִי זַלְגַת דִמְעִין מִן עֲנִיתָא קְרִיתָךְ יְיָ בְּכָל יוֹמָא פַּרְסֵית לְוָתָךְ בִּצְלוֹ יְדָי: ^sl-88-10

**11** הַאֶפְשַׁר דִי לְמֵיתַיָא תַעְבֵּיד פְּרִישָׁן אִין גוּשְׁמַיָא דְאִתְמְסִיאוּ בְּעַפְרָא יְקוּמוּן יוֹדוּן קֳדָמָךְ לְעָלְמִין: ^sl-88-11

**12** הַאֶפְשַׁר דִי יִתְחוֹי בְּבֵית קְבוּרְתָא טוּבָךְ קוּשְׁטָא בְּבֵית אָבְדָנָא: ^sl-88-12

**13** הַאֶפְשַׁר דִי תְוַדְעוּ בַּחֲשָׁךְ גֵהִנָם פְּרִישְׁוָתָךְ וְצִדְקָתָךְ דְצַחוּתָא וְצַדְיָא: ^sl-88-13

**14** וַאֲנָא קֳדָמָךְ יְיָ צַלֵיתִי וּבְצַפְרָא צְלוֹתִי תְקַדְמִינָךְ: ^sl-88-14

**15** לָמָה יְיָ שְׁבַקְתָּא נַפְשִׁי תַּעֲלִים אַפָּךְ מִנִי דְלָא אֶחְמֵי בִנְהוֹרָךְ נְהוֹרָא: ^sl-88-15

**16** עַנְיָא אֲנָא וּנְגִיד מִן טַלְיָא סוֹבַרֵית רְחִימְתָּךְ טְעִינָא עֲלַי: ^sl-88-16

**17** עֲלַי עֲבַרוּ רוּגְזָיִךְ בַּעֲתָיִךְ שֵׁיצִיאוּ יָתִי: ^sl-88-17

**18** אַחְזַרוּ יָתִי הֵיךְ מוֹי כָּל יוֹמָא אַקִיפוּן עֲלַי כַּחֲדָא: ^sl-88-18

**19** אַרְחֵקְתָּא מִנִי רְחִימָא וְחַבְרָא וּלְיָדְעֵי חֲשִׁיךְ אֲנָא בְּפוּמְהוֹן: ^sl-88-19

## Capítulo 89

**1** שִׂכְלָא טָבָא דְאִתְאַמַר עַל יְדָא דְאַבְרָהָם דַאֲתָא מִן מַדִינְחָאָה: ^sl-89-1

**2** חִסְדָא דַייָ לַעֲלַם אֲשַׁבַּח לְדָר וְדָר אֲהוֹדַע קוּשְׁטָךְ בְּפוּמִי: ^sl-89-2

**3** אֲרוֹם אֲמַרֵית עָלְמָא בְּחִסְדָא יִתְבְּנֵי שְׁמַיָא תְּתַקֵן קוּשְׁטָךְ בְּהוֹן: ^sl-89-3

**4** גְזַרֵית קְיָם לְאַבְרָהָם בְּחִירִי קַיְמִית לְדָוִד עַבְדִי: ^sl-89-4

**5** עַד עָלְמָא אַתְקֵין בְּנַיִךְ וְאֶבְנֵי לְדָר וְדָר כּוּרְסֵי מַלְכוּתָךְ לְעָלְמִין: ^sl-89-5

**6** וְיוֹדוּן שְׁמַיָא פְּרִשְׁוָתָךְ יְיָ לְחוֹד קוּשְׁטָךְ בִּכְנִישַׁת קַדִישִׁין: ^sl-89-6

**7** אֲרוּם מַן הוּא בְּשַׁחֲקֵי דְמִשְׁתְּוֵי לַיָי דְדָמִי לַיָי בְּאוֹכְלוֹסֵי מַלְאֲכַיָא: ^sl-89-7

**8** אֱלָהָא תַקִיפָא בְּרָזֵיהוֹן דְקַדִישִׁין יָתֵיב עַל כּוּרְסֵי יְקָרָא וְרַבָּא וּדְחִיל עַל כָּל מַלְאֲכַיָא דְקָיְמִין חֲזוֹר חֲזוֹר לֵיהּ: ^sl-89-8

**9** יְיָ אֱלָהָא עַל כָּל חַיָלֵי מְרוֹמָא מַן דִכְוָתָךְ חֲסִינָא יְיָ וְקוּשְׁטָךְ חֲזוֹר לָךְ: ^sl-89-9

**10** אַתְּ שַׁלִיט בְּגֵיוְתָנוּתָא דְיַמָא כַּד מִתְרַבָּא מִתְנַטְלִין גַלוֹי אַנְתְּ תַּמְאִיכִנוּן: ^sl-89-10

**11** אַתְּ שַׁפֵּיתָא הֵיךְ קְטִיל דְחַרְבָּא רַהֲבָא הוּא פַּרְעֹה רַשִׁיעָא בִּתְקוֹף אֶדְרַע עוּשְׁנָךְ בַּדַרָא בַּעֲלֵי דְבָבָךְ: ^sl-89-11

**12** דִי לָךְ שְׁמַיָא לְחוֹד דִי לָךְ אַרְעָא תֵּבֵל וּמַלְיָא אַתְּ יְסַדְתִּנוּן: ^sl-89-12

**13** מַדְבְּרַיָא דִי בְּצִפוּנָא וְיָתְבִין דִי בְדָרוֹמָא וְחֶרְמוֹן דִי בְמַדִינְחָא בִּשְׁמָךְ מְשַׁבְּחִין: ^sl-89-13

**14** דִי לָךְ אֶדְרְעָא עִם גְבוּרְתָּא תַּעֲשָׁן יְדָךְ לְמִפְרַק עַמָךְ תְּרוּם יְמִינָךְ לְשַׁכְלָלָא בֵית מַקְדְשָׁךְ: ^sl-89-14

**15** צִדְקְתָא וְדִינָא מְדוֹר כּוּרְסֵי יְקָרָךְ טֵיבוּ וּקְשׁוֹט מְקַדְמִין אַפָּךְ: ^sl-89-15

**16** טוּבֵיהוֹן דְעַמָא דְיָדְעִין לְרַצוּיֵי בָרְיֵהוֹן בְּיַבָּבָא יְיָ בִּנְהוֹר זִיו אַפָּךְ יְהַלֵכוּן וְיִזְכּוּן בְּדִינָא: ^sl-89-16

**17** בִּשְׁמָךְ יְרַנְנוּן כָּל יוֹמָא וּבְצִדְקְתָךְ יִתְרוֹמְמוּן: ^sl-89-17

**18** אֲרוּם שִׁבְהוֹר עוּשְׁנְהוֹן אַתְּ וּבִרְעוּתָךְ תְּרִים קַרְנְהוֹן: ^sl-89-18

**19** אֲרוּם דַייָ הִנוּן תְּרֵיסְנָא וְדַייָ קַדִישׁ יִשְׂרָאֵל מַלְכָּנָא: ^sl-89-19

**20** בַּהֲדֵין מַלֵלְתָּא בְחֶזְוָנָא לַחֲסִידַיִךְ וַאֲמָרַת שַׁוֵיתִי סָעִיד לְעַמִי עַל יְדֵיהּ דְמִתְגַבֵּר בְּאוֹרַיְתָא אַפְרֵשִׁית עוּלֵים מִן בֵּינֵי עַמָא: ^sl-89-20

**21** אַשְׁכְּחִית דָוִד עַבְדִי בִּמְשַׁח קוּדְשָׁא רַבֵּיתִי יָתֵיהּ: ^sl-89-21

**22** דִי אַיְדַי מְתַקְנָן בְּסַעְדֵיהּ בְּרַם אֶדְרְעִי תְחַיְלִנֵיהּ: ^sl-89-22

**23** לָא יַטְעֵי בְעַל דְבָבָא בֵיהּ וּבַר רַשִׁיעָא לָא יִסְגְפִנֵיהּ: ^sl-89-23

**24** וְאֶשׁוֹף מִן קֳדָמֹהִי מְעִיקוֹי וּמְסַנְאוֹי אֶגוֹף: ^sl-89-24

**25** וּקוּשְׁטִי וְטוּבִי עִמֵיהּ וּבְשׁוּם מֵימְרִי תְּרוֹמֵם יְקָרֵיהּ: ^sl-89-25

**26** וַאֲשַׁוֵי בִמְחוֹזֵי יַמָא שׁוּלְטָנֵיהּ וּבְיָתְבֵי עַל נַהַרְוָתָא גְבוּרַת יְמִינֵיהּ: ^sl-89-26

**27** הוּא יִקְרֵי לִי אַבָּא אַתְּ אֱלָהִי וּתְקֵיף פּוּרְקָנִי: ^sl-89-27

**28** לְחוֹד אֲנָא בּוּכְרָא לְמַלְכַיָא דְבֵית יְהוּדָה אֶתְּנִנֵיהּ עִלָאָה עַל מַלְכֵי אַרְעָא: ^sl-89-28

**29** לַעֲלַם אֶטוֹר לֵיהּ טוּבִי וּקְיָמִי מְהֵימְנָא לֵיהּ: ^sl-89-29

**30** וַאֲשַׁוֵי לְעַלְמִין בְּנוֹי וְכוּרְסֵיהּ כְּיוֹמַיָא דִיקוּמוּן שְׁמַיָא: ^sl-89-30

**31** אִין יִשְׁבְּקוּן בְּנוֹי אוֹרַיְתִי וּבְדִינַי לָא יְהַלֵכוּן: ^sl-89-31

**32** אִין קְיָמִי יַפְּסוּ וּפִקוּדַי לָא יִנְטְרוּן: ^sl-89-32

**33** וְאַסְעַר עַל יְדֵיהוֹן דְשִׁבְטָא דְרַשִׁיעִין מְרָדֵיהוֹן וּבְמַזִיקַיָא בְמַכְתָּשִׁין לְהוֹן עִוָיָתְהוֹן: ^sl-89-33

**34** וְטוּבִי לָא אֲבַטֵל מִנֵיהּ וְלָא אֲשַׁקֵר בְהֵמָנוּתִי: ^sl-89-34

**35** לָא אַפֵּיס קְיָמִי וּמַפְקָנוּת סִפְוָתִי לָא אֲשַׁנֵי: ^sl-89-35

**36** חֲדָא זִמְנָא קַיְמֵית בְּשׁוּם קוּדְשִׁי אִם לְדָוִד אֲכַדֵיב: ^sl-89-36

**37** בְּנוֹי לַעֲלָם יֶהֱווֹן וְכוּרְסֵיהּ נְהִיר הֵיךְ שִׁמְשָׁא לְקִבְלִי: ^sl-89-37

**38** הֵיךְ סִיהֲרָא דִמְתַקַן לְאָת לַעֲלַם וְסָהִיד בִּשְׁחָקָא מְהֵימָן לְעַלְמִין: ^sl-89-38

**39** וְאַתְּ שְׁבַקְתָּא וּרְחַקְתָּא אַרְגֵזְתָּא עִם מְשִׁיחָךְ: ^sl-89-39

**40** אַשְׁנֵיתָא קְיָם דְעִם עַבְדָךְ אַפֵּסְתָּא לְאַרְעָא כְּלִילֵיהּ: ^sl-89-40

**41** תַּקַפְתָּא כָל כְּרַכּוֹי שַׁוִיתָא פַּצִיחוֹי תְּבִירָא: ^sl-89-41

**42** רַמְסִין יָתֵיהּ כָּל עָבְרֵי אוֹרְחָא הֲוָה קְלָנָא לְשִׁבְבֵי: ^sl-89-42

**43** אֲרֵמְתָּא יְמִינָא דִמְעִיקוֹי אֲחוֹדְתָּא כָּל בַּעֲלֵי דְבָבוֹי: ^sl-89-43

**44** לְחוֹד תְּתִיב לַאֲחוֹרָא סַיְפֵיהּ וְלָא אַקֵמְתָּא יָתֵיהּ בִּקְרָבָא: ^sl-89-44

**45** בַּטֵלְתָּא כַּהֲנַיָא דְמַדִין עַל מַדְבְּחָא וּמְדַכִּין עַמֵיהּ וְכוּרְסֵי מַלְכוּתֵיהּ לְאַרְעָא מִגַרְתָּה: ^sl-89-45

**46** קְצַרְתָּא יוֹמֵי עֲלִימוֹי עֲטַפְתָּא עֲלוֹי בַּהֲתָא וְכִסוּפָא לְעָלְמִין: ^sl-89-46

**47** עַד אֵימָתַי יְיָ תְּסַלֵיק שְׁכִנְתָּךְ לְעַלְמִין תַּדְלִיק הֵיךְ אֶשְׁתָּא חֵמְתָךְ: ^sl-89-47

**48** אִדְכַּר דִי אֲנָא אִתְבְּרֵיתִי מִן עַפְרָא מְטוּל מָה לְבַטָלָא בְּרֵיתָא כָּל בְּנֵי נָשָׁא: ^sl-89-48

**49** מַן הוּא גַבְרָא דִיחֵי וְלָא יֶחֱמֵי מַלְאֲכָא דְמוֹתָא וְשֵׁזֵיב נַפְשֵׁיהּ מִן יְדֵיהּ וְלָא יֵיחוֹת לְבֵית קְבוּרְתֵּיהּ לְעָלְמִין: ^sl-89-49

**50** אָן הִנוּן טַבְוָתָךְ דְמִן שְׁרוּיָא יְיָ דְקַיֵמְתָּא לְדָוִד בְּהֵימָנוּתָךְ: ^sl-89-50

**51** אִדְכַּר יְיָ חִסוּדָא דְעַבְדָךְ סוֹבְרֵית בְּעִטְפֵי כָּל גִדוּפֵיהוֹן דְסַגִיעוּן עַמְמִין: ^sl-89-51

**52** דִי חֲסִידוּ בַּעֲלֵי דְבָבָךְ יְיָ דִי חֲסִידוּ אִיחוֹר רוּשְׁמַת רִגְלֵי מְשִׁיחָךְ יְיָ: ^sl-89-52

**53** בְּרִיךְ שְׁמָא דַייָ בְּעָלְמָא הָדֵין אָמֵן וְאָמֵן בְּרִיךְ שְׁמָא דַייָ לְעָלְמָא דְאָתֵי אָמֵן וְאָמֵן: ^sl-89-53

## Capítulo 90

**1** צְלוֹתָא דְצַלֵי מֹשֶׁה נְבִיָא דַייָ כַּד חָבוּ עַמָא בֵית יִשְׂרָאֵל בְּמַדְבְּרָא עֲנֵי וְכֵן אָמַר יְיָ דְמַדוֹר בֵּית שְׁכִנְתָּךְ בִּשְׁמַיָא אַתְּ הֲוֵיתָא לָנָא סָעֵיד בְּכָל דָר וָדָר: ^sl-90-1

**2** כַּד אִתְגְלֵי קֳדָמָךְ דְעַמָךְ עֲתִידִין לְמֵחוֹב אַתְקֵנְתָּא תְּתוּבָא עַד דְלָא טוּרַיָא אִתְנַטַלוּ וְאִתְבְּרִיאַת אַרְעָא וְיָתְבֵי תֵבֵל מִן עַלְמָא הָדֵין עַד עַלְמָא דְאָתֵי אַתְּ הוּא אֱלָהָא: ^sl-90-2

**3** תְּתֵיב בַּר נַשׁ עַל חוֹבֵיהּ עַד מוֹתָא וַאֲמַרֵת תּוּבוּ בְנֵי נָשָׁא: ^sl-90-3

**4** אֲרוּם אֲלַף שְׁנִין בְּעֵינָךְ מִתְחַשְׁבִין קֳדָמָךְ הֵיךְ יוֹמָא דְאִתְמָלֵי אֲרוּם יֶעְבַּר וְהֵיךְ מַטְרַת לֵילְיָא: ^sl-90-4

**5** וְאִין לָא תָיְבִין תֵּיתֵי עֲלֵיהוֹן מוֹתָא הֵיךְ דְמָכִין יְהוֹן וּלְעָלְמָא דְאָתִי הֵיךְ עִסְבָּא דְמִתְפָּרְכָא יִתְחַלְפוּן: ^sl-90-5

**6** דַמְיָן עוֹבָדֵיהוֹן הֵיךְ עִסְבָּא דִי בְצַפְרָא יְנִיץ וְיַסְגֵי לְרַמְשָׁא מִתְמוֹלֵל וּמִתְיַבֵּשׁ מִן חוּרְבָּא: ^sl-90-6

**7** אֲרוּם אִשְׁתֵּיצָנָא מִן תּוּקְפָךְ וּמִן רוּגְזָךְ אִתְבַּהֵלְנָא: ^sl-90-7

**8** שַׁוִיתָא חוֹבָנָא לְקִבְלָךְ עַוְיַת טַלְיוּתָנָא קָבֵל נְהוֹר אַפָּךְ: ^sl-90-8

**9** אֲרוּם כָּל יוֹמָנָא אִתְפְּנִיאוּ קֳדָמָךְ בְּרוּגְזָךְ שֵׁצֵינָא יוֹמֵי חַיָנָא הֵיךְ הֲבֵל פּוּמָא דְסִתְוָא: ^sl-90-9

**10** יוֹמֵי שְׁנוֹתָנָא בְּעָלְמָא הָדֵין שׁוּבְעִין שְׁנִין מִתְאַלְמִין וְאִין בִּגְבוּרְתָּא תַּמְנָן שְׁנִין וְסוּגְעֵיהוֹן לֵיאוּת וּשְׁקַר לְחַיָבַיָא אֲרוּם עֲדוּ בְּסַרְהוֹבְיָא וְטָיְסִין לְצַפְרָא: ^sl-90-10

**11** מַן הוּא דְיָדַע לְאַתְבָא עוּשְׁנָא דְתוּקְפָךְ אֱלָהֵין צַדִיקַיָא דְדָחֲלִין מִנָךְ מְשַׁדְכִין רוּגְזָךְ: ^sl-90-11

**12** לְמִמְנֵי יוֹמָנָא כֵּן יִתְכַּוֵן לְהוֹדַע בְּרַם נְבִיָא דְלִבֵּיהּ מַבַּע חוּכְמָתָא: ^sl-90-12

**13** תּוּב יְיָ עַד אֵימָתַי תְסַגְפִנָנָא וְתוּב מִן בִּישְׁתָּא דִי מַלֵלְתָּא לְמֶעְבַּד לְעַבְדָךְ: ^sl-90-13

**14** שַׂבַּע יָתָנָא לְעַלְמָא דִמְתִיל לְצַפְרָא טוּבָךְ וּנְרַנֵן וְנֶחְדֵי בְּכוּלְהוֹן יוֹמָנָא: ^sl-90-14

**15** שַׂמַח יָתָנָא הֵיךְ יוֹמִין דְסַגִפְתָּנָא הֵיךְ שְׁנַיָא דַחֲמֵינָא בִּישְׁתָּא: ^sl-90-15

**16** יִתְחֲמֵי לְעַבְדָךְ עוֹבָדֵי נִסָךְ וְשִׁבְהוֹרָךְ עַל בְּנֵיהוֹן: ^sl-90-16

**17** וִיהֵי בְסִימוּתָא דְגַן עֵדֶן מִן קֳדָם יְיָ עֲלָנָא וְעוֹבָדֵי יְדֵינָא מִנֵיהּ יִתַּקְנוּן: ^sl-90-17

## Capítulo 91

**1** דְאַשְׁרֵי שְׁכִנְתֵּיהּ בְּרָזָא עִלָאָה בִּטְלַל עֲנָנֵי יְקָרָא דְשַׁדַי יְבִית: ^sl-91-1

**2** אֲמַר דָוִד אֵימַר לַיְיָ רוּחְצָנִי וּכְרַךְ תּוּקְפִי אֱלָהִי אָכְלֵי בְּמֵימְרֵיהּ: ^sl-91-2

**3** אֲרוּם הוּא יִפְצִנָךְ שְׁלֹמֹה בְּרִי מִפַּחָא וְתִקְלָא מִמוֹתָא וְאִתְרְגוּשְׁתָּא: ^sl-91-3

**4** בִּטְלַל שְׁכִנְתֵּיהּ יַטְלַל עֲלָךְ וּתְחוֹת טְלַל יְקָרֵיהּ תִּתְרְחֵץ תְּרִיסָא וַעֲגִילָא הֵימְנוּתֵיהּ: ^sl-91-4

**5** לָא תִדְחַל מִן דְלוּחָא דְמַזִיקֵי דְאָזְלִין בְּלֵילְיָא מִן גִרְרָא דְמַלְאָךְ מוֹתָא דְשָׁדֵי בִימָמָא: ^sl-91-5

**6** מִן מוּתָא דִי בְקִבְלָא מְהַלֵךְ מִסִיעַת שֵׁידִין דִמְחַבְּלִין בְּטִיהֲרָא: ^sl-91-6

**7** תַּדְכַּר שְׁמָא דְקוּדְשָׁא יִפְּלוּן מִן סְטַר שְׂמָאלָךְ אַלְפָא וְרִבְבוּתָא מִן יְמִינָךְ לְוָתָךְ לָא יִקְרְבוּן לְמִנְזָק: ^sl-91-7

**8** לְחוֹד בְּעַיְנָךְ תְּהֵי מִסְתַּכַּל וְהֵיךְ מִתְגַמְרִין רַשִׁיעֵי תֶחֱמֵי: ^sl-91-8

**9** עֲנֵי שְׁלֹמֹה וְכֵן אֲמַר אֲרוּם אַנְתְּ הוּא יְיָ רוּחֲצָנִי בִּמְדוֹר עִלָאָה שַׁוֵיתָא בֵּית שְׁכִנְתָּךְ: ^sl-91-9

**10** אֲתִיב מָרֵי עַלְמָא וְכֵן אֲמַר לָא תְאָרַע לָךְ בִּישְׁתָּא וּמַכְתָּשָׁא וּמַזִיקַיָא לָא יִקְרְבוּן בְּמַשְׁכְּנָיִךְ: ^sl-91-10

**11** אֲרוּם מַלְאֲכוֹי יְפַקֵד עֲלָךְ לְמִטְרִינָךְ בְּכָל אוֹרְחָתָךְ: ^sl-91-11

**12** עַל תּוּקְפֵיהוֹן יִטְלוּנָךְ דִלְמָא תַתְקֵל בְּיִצְרָא בִישָׁא דִמְתִיל לְאַבְנֵי רִגְלָךְ: ^sl-91-12

**13** עַל גּוּר בַּר אַרְוְיָן וּפִתְנָא תִּבְעוֹט תִּרְמוֹס אַרְיָא וְחוּרְמָנָא: ^sl-91-13

**14** מְטוּל דִי בְמֵימְרִי אִתְרְעִי וַאֲשֵׁזְבִנֵיהּ אֲשַׂגְבִנֵיהּ מְטוּל דְיָדַע שְׁמִי: ^sl-91-14

**15** יְצֵלֵי קֳדָמַי וַאֲנָא עָנֵי יָתֵיהּ עִמֵיהּ אֲנָא בְעַקְתָא אֶפְצִנֵיהּ וַאֲיַקְרִנֵיהּ: ^sl-91-15

**16** אוֹרִיכוּת יוֹמִין אַסְבְּעִנֵיהּ וְאַחְמִנֵיהּ בְּפוּרְקָנִי: ^sl-91-16

## Capítulo 92

**1** שְׁבָחָא וְשִׁירָא דִי אֲמַר אָדָם קַדְמָאָה עַל יוֹמָא דְשַׁבַּתָּא: ^sl-92-1

**2** טָב לְאוֹדָאָה קֳדָם יְיָ וּלְשַׁבָּחָא שְׁמָךְ עִלָאָה: ^sl-92-2

**3** לְתַנָאָה בְּצַפְרָא טוּבָךְ וְקוּשְׁטָךְ בְּלֵילְוָן: ^sl-92-3

**4** עַל פּוּם כִּנָרָא דַעֲשַׂרְתֵּי נִימִין וְעַל פּוּם נִבְלָא עֲלֵי רִנְנַת כִּנָרַיָא: ^sl-92-4

**5** אֲרוּם אַחְדִיתַנִי יְיָ בְּעוֹבָדָךְ בְּעוֹבָדֵי אַיְדָךְ אֲבוּעַ: ^sl-92-5

**6** כַּמָה רַבְרְבִין עוֹבָדָךְ יְיָ לַחֲדָא עֲמִיקִין מַחְשְׁבָתָיִךְ: ^sl-92-6

**7** בַּר נַשׁ שַׁטְיָא לָא יְדָע וּכְסִילָא לָא יַתְבַּיֵן יַת דָא: ^sl-92-7

**8** כַּד מִתְלַבְלְבִין רַשִׁיעַיָא הֵיךְ עִסְבָּא וְנָצְצִין כָּל עָבְדֵי שְׁקַר וַעֲתִיד דִישֵׁצִינוּן אֱלָהָא עַד עָלְמָא: ^sl-92-8

**9** וְאַתְּ רְמָא וְעִלָאָה בְעַלְמָא הָדֵין יְיָ וְאַתְּ רְמָא וְעִלָאָה לְעַלְמָא דְאָתֵי: ^sl-92-9

**10** אֲרוּם הָא בַעֲלֵי דְבָבָךְ יְיָ אֲרוּם הָא בַעֲלֵי דְבָבָךְ יְהוֹבְדוּן לְעַלְמָא דְאָתֵי מִתְפָּרְשִׁין מִן סִיעָתְהוֹן דְצַדִיקַיָא כָּל עָבְדֵי שְׁקָר: ^sl-92-10

**11** וְזַקֵפְתָּא הֵיךְ רֵימְנָא תוּקְפִי רַבֵּיתָא יָתִי בִּמְשַׁח רְבוּתָא רַטִיבָא דְזַיִת עַבּוּף: ^sl-92-11

**12** וְאִסְתַּכָּלַת עַיְנִי בְּאוּבְדָנָא דִמְעִיקֵי בְּקָיְמִין עֲלַי לְאַבְאָשָׁא שָׁמְעָן אוּדְנַי קָל תְּבִירְהוֹן: ^sl-92-12

**13** צַדִיקָא הֵיךְ דִקְלָא יְלַבְלֵב פֵּרִין הֵיךְ אַרְזָא בְּלִבְנָן יִסְגֵא וְיַעְבֵּיד שָׁרָשִׁין: ^sl-92-13

**14** בְּנוֹי יֶהֱווֹן שְׁתִילִין בְּבֵית מַקְדְשָׁא דַייָ בְּדָרַת בֵּית אֱלָהָנָא יְלַבְלְבוּן: ^sl-92-14

**15** תּוּב כַּאֲבָהָתְהוֹן יַעְבְּדוּן בְּנִין בְּשֵׂיבוּ דְהֵנִין וְרַטִיבִין יְהוֹן: ^sl-92-15

**16** מְטוּל דִיחַווּן דַיָרֵי אַרְעָא אֲרוּם תְרִיץ יְיָ תָּקְפִי וְלֵית עַוְלְתָה בֵּיהּ: ^sl-92-16

## Capítulo 93

**1** יְיָ מְלִיךְ גֵיוְתָנוּתָא אַלְבֵּשׁ אַלְבֵּשׁ יְיָ עוּשְׁנָא וְאִזְדַרַז לְחוֹד תַּקֵיף תֵּבֵל דְלָא תִזְדַעְזָע: ^sl-93-1

**2** מְתַקָן כּוּרְסְיָךְ מִן לְקַדְמִין מִן עַלְמָא אַתְּ אֱלָהָא: ^sl-93-2

**3** זְקִיפִין נַהַרְוָתָא יְיָ זְקִיפִין נַהַרְוָתָא קָלְהוֹן בְּשִׁירְתָא יְקַבְּלוּן נַהַרְוָתָא אֲגַר שְׁבָחֵיהוֹן: ^sl-93-3

**4** מִן קָלָן דְמַיִין סַגִיעִין מִמְשַׁבְּחַיָא תְבִירֵי יַמָא רַבָּא מְשַׁבַּח בִּשְׁמֵי מְרוֹמָא דַיָי: ^sl-93-4

**5** סְהִדְוָתָךְ קַשִׁיטִין לַחֲדָא לְבֵית מַקְדְשָׁךְ יָאִין וְקַדִישִׁין יְיָ לְאוֹרִיכוּת יוֹמִין: ^sl-93-5

## Capítulo 94

**1** אֱלָהָא מָרֵי פוּרְעֲנוּתָא יְיָ אֱלָהָא מָרֵי פּוּרְעֲנוּתָא הוֹפָע: ^sl-94-1

**2** אִתְנַטַל דַיָן אַרְעָא אֲתִיב גוּמְלָא בִישָׁא עַל גֵיוְתָנַיָא: ^sl-94-2

**3** עַד אֵימָתַי רַשִׁיעַיָא יְיָ עַד אֵימָתַי רַשִׁיעַיָא יֵתְבוּן בְּשַׁלְוָתָא: ^sl-94-3

**4** יְבוּעוּן וִימַלְלוּן גִדוּפִין אָמְרִין מִלִין דִקְלָנָא כָּל עָבְדֵי שְׁקָר: ^sl-94-4

**5** עַמָךְ יְיָ יְשׁוּפוּן וְאַחְסַנְתָּךְ יְמַסְכְּנוּן: ^sl-94-5

**6** אַרְמַלְתָּא וְגִיוֹרָא יִקְטְלוּן וְיַתְמֵי יְרַצְחוּן: ^sl-94-6

**7** וַאֲמַרוּ לָא יֶחֱמֵי יָהּ וְלָא יִתְבַּיֵן אֱלָהָא דְיַעֲקֹב: ^sl-94-7

**8** הִתְבּוֹנְנוּ דְשָׁטְיָן בְּעַמָא וּכְסִילַיָא אֵימָתַי תַּשְׂכִּילוּן: ^sl-94-8

**9** הַאֶפְשַׁר דִי נְצִיב אוּדְנָא הֲלָא שָׁמֵיעַ אוּלְפָנָא אִין אֶפְשַׁר דִי בְרָא עַיְנָא וְלָא אִסְתַּכֵּל בְּאוֹרַיְתָא: ^sl-94-9

**10** הַאֶפְשַׁר דִיהַב אוֹרַיְתָא לְעַמֵיהּ וְכַד יְחוֹבוּן הֲלָא יִתְוַכְּחוּן הֲלָא יְיָ אַלִיף לְאָדָם קָדָמֵי מַנְדְעָא: ^sl-94-10

**11** קֳדָם יְיָ יְדִיעָן מַחְשְׁבַת בְּנֵי נָשָׁא אֲרוּם הִנוּן לְמָא: ^sl-94-11

**12** טָב לְגַבְרָא דִי תְכַסְנִנֵיהּ יָהּ וּמִן אוֹרַיְתָךְ תְּאַלְפִנֵיהּ: ^sl-94-12

**13** לְשַׁדָכָא לֵיהּ מִן יוֹמֵי בִישָׁא עַד דְיִתְבְּרֵי לְרַשִׁיעַיָא שׁוּחָה: ^sl-94-13

**14** אֲרוּם לָא יִנְטוֹשׁ יְיָ עַמֵיהּ וְאַחְסַנְתֵּיהּ לָא יִשְׁבּוֹק: ^sl-94-14

**15** אֲרוּם עַד צִדְקָתָא יְתוּב דִינָא וּבַתְרוֹי יִתְפָּרְקוּן כָּל תְּרִיצֵי לִבָּא: ^sl-94-15

**16** מַן יָקוּם לִי לְאַגָחָא קְרָבָא עִם מַבְאֲשִׁין מַן יִתְעַתַּד לִי לְמִנְצִי עִם עָבְדֵי שְׁקָר: ^sl-94-16

**17** אִלוּלֵי יְיָ סָעִיד לִי כִּזְעֵר שְׁרָת בִּשְׁתִּיקוּתָא נַפְשִׁי: ^sl-94-17

**18** אִין אֲמַרִית אִתְמוֹטַטָא רִגְלִי טוּבָךְ יְיָ יַסְעִיד יָתִי: ^sl-94-18

**19** בְּסִגְעֵי מַחְשְׁבָתָא בְגַוַי נִיחוּמָתָךְ יְפַרְקְנוּן נַפְשִׁי: ^sl-94-19

**20** הַאֶפְשַׁר דְיִתְחַבֵּר עִמָךְ כּוּרְסֵי שִׁקְרָא בִּרְיַת לְעוּתָא הֲיִתְעַתֵּד עֲלֵי קְיָם: ^sl-94-20

**21** יִכְנְשׁוּן בִּישָׁן עַל נַפְשָׁא דְצַדִיקָא וְאַדְמָא זַכַּי יְחַיְבוּן דִין דִקְטוֹל: ^sl-94-21

**22** וִיהֵי יְיָ לִי לְסָעִיד וֵאלָהַי לִתְקוֹף רוּחֲצָנִי: ^sl-94-22

**23** וַאֲתִיב עֲלֵיהוֹן יַת שְׁקָרֵיהוֹן וּבְבִישָׁתְהוֹן יְגַמְרִינוּן יְגַמְרִינוּן יְיָ אֱלָהָנָא: ^sl-94-23

## Capítulo 95

**1** אֱתוּן נְשַׁבַּח קֳדָם יְיָ נְיַבֵּב קֳדָם תַּקִיף פּוּרְקָנָא: ^sl-95-1

**2** נְקַדֵם אַפּוֹי בְּתוֹדָתָא בְּתוּשְׁבָּחַיָא נְיַבֵּב קֳדָמוֹי: ^sl-95-2

**3** אֲרוּם אֱלָהָא רַבָּא יְיָ וּמַלְכָּא רַבָּא עַל כָּל אֱלָהָא: ^sl-95-3

**4** דִי בִידֵיהּ תָּלְיָן פִּשְׁפּוּשִׁין דְאַרְעָא וְתוּקְפֵי רוּם טוּרַיָא דִי לֵיהּ: ^sl-95-4

**5** דִי לֵיהּ יַמָא וְהוּא עֲבַד יָתֵיהּ וְיַבֶּשְׁתָּא אַיְדוֹ בְרִיאוּ: ^sl-95-5

**6** אֱתוּן נִסְגוֹד וְנִגְחַן נַחֲמוֹט קֳדָם יְיָ דַעֲבִיד יָתָנָא: ^sl-95-6

**7** אֲרוּם הוּא אֱלָהָנָא וַאֲנַחְנָא עַמֵיהּ וְעָאָן רַעֲיַת אַיְדֵיהּ יוֹמָא דֵין אִם בְּמֵימְרֵיהּ תְּקַבְּלוּן: ^sl-95-7

**8** לָא תַקְשׁוּן לִבְּכוֹן הֵיךְ בְּמַצוּתָא הֵיךְ יוֹמָא דְנַסֵיתוּן אֱלָהָא בְּמַדְבְּרָא: ^sl-95-8

**9** דִי נַסִיאוּ יָתִי אֲבָהַתְכוֹן בַּחֲנוּ יָתִי לְחוֹד חֲמוֹן עוֹבָדָי: ^sl-95-9

**10** אַרְבְּעִין שְׁנִין מְאַסֵית בְּדָרָא בְּמַדְבְּרָא וַאֲמַרֵית עַמָא דְטַעְוָתָא בְּלִבְּהוֹן הִנוּן וְאִנוּן לָא יָדְעוּ אָרְחִי: ^sl-95-10

**11** דְקַיְמֵית בִּתְקוֹף רוּגְזִי אִם יַעֲלוּן לְנִיחַ בֵּית מַקְדְשִׁי: ^sl-95-11

## Capítulo 96

**1** שַׁבַּחוּ קֳדָם יְיָ תּוּשְׁבַּחְתָּא חֲדְתָּא שַׁבַּחוּ אַנְגְלֵי מְרוֹמָא שַׁבַּחוּ קֳדָם יְיָ כָּל צַדִיקֵי אַרְעָא: ^sl-96-1

**2** שַׁבַּחוּ קֳדָם יְיָ בָּרִיכוּ שְׁמֵיהּ בַּשַׂרוּן מִיוֹמָא לְיוֹמָא פּוּרְקָנֵיהּ: ^sl-96-2

**3** אִשְׁתְּעָיוּ בְּעַמְמַיָא אַיְקָרֵיהּ בְּכָל עַמַיָא פְּרִישְׁוָתֵיהּ: ^sl-96-3

**4** אֲרוּם רַב יְיָ וּמְשַׁבַּח לַחֲדָא דִדְחִיל הוּא עַל כָּל אֱלָהַיָא: ^sl-96-4

**5** אֲרוּם כָּל דַחֲלַת עַמְמַיָא טַעֲוָתָא וַיָי שְׁמַיָא עֲבָד: ^sl-96-5

**6** שְׁבָחָא וְשִׁבְהוֹרָא קֳדָמוֹי עוּשְׁנָא וְתוּשְׁבְּחָא בְּבֵית מַקְדְשֵׁיהּ: ^sl-96-6

**7** הֲבוּ זְמָר קֳדָם יְיָ יְחוּסֵי עַמַיָא הֲבוּ קֳדָם יְיָ אַיְקַר וְעוּשְׁנָא: ^sl-96-7

**8** הֲבוּ קֳדָם יְיָ אַיְקַר וְרוֹמְמוּ שְׁמֵיהּ אוֹבִילוּ וְסוֹבְרוּ תִקְרוּבְתָּא וְעוּלוּ לִקְדָמוֹי לְדַרְתּוֹי: ^sl-96-8

**9** סְגוּדוּ קֳדָם יְיָ בְּשִׁבְהוֹרַת קוּדְשָׁא רְתִיתוּ מִן קֳדָמוֹי כָּל יָתְבֵי אַרְעָא: ^sl-96-9

**10** אֱמַרוּ בְּעַמַיָא יְיָ מְלָךְ לְחוֹד תַּקִין תֵּבֵל דְלָא תִתְמוֹטָט יָדִין עַמַיָא בְּתִירוּצָא: ^sl-96-10

**11** יֶחֱדוּן חַיָלֵי דִשְׁמַיָא וִידוּצוּן צַדִיקֵי אַרְעָא יִכְלֵי יַמָא וּמַלְיֵהּ: ^sl-96-11

**12** יְבוּעַ תּוּשְׁבְּחָא חֲקַל וְכָל דִי בֵיהּ הַבְּכֵן יְשַׁבְּחוּן כָּל אִילָנֵי חוּרְשָׁא: ^sl-96-12

**13** קֳדָם יְיָ אֲרוּם אֲתָא לְמֵדָן אַרְעָא יְדוּן תֵּבֵל בְּצִדְקְתָא וְעַמַיָא בְּהֵימְנוּתָא: ^sl-96-13

## Capítulo 97

**1** יְיָ מְלַךְ תְּדוּץ אַרְעָא יֶחְדוּן נַגְוָן סַגִיעִין: ^sl-97-1

**2** עֲנָנֵי יְקָרָא וַאֲמִטְתָא חֲזוֹר חֲזוֹר דִי לֵיהּ צִדְקְתָא וְדִינָא אֲתַר דִי מְכַוָן כּוּרְסֵיהּ: ^sl-97-2

**3** אֶשָׁא קֳדָמוֹי תְּהַלֵךְ וּמְצַלְהֲבָא חֲזוֹר חֲזוֹר מְעִיקוֹי: ^sl-97-3

**4** מְנַהֲרִין בְּרָקֵי תֵּבֵל חֲמָת וְאִתְחַלְחַלַת אַרְעָא: ^sl-97-4

**5** טוּרַיָא הֵיךְ שַׁעֲוָא יִתְמְסוּן מִן קֳדָם יְיָ מִן קֳדָם רִבּוֹן כָּל אַרְעָא: ^sl-97-5

**6** יְתַנוּן אַנְגְלֵי מְרוֹמָא צִדְקְתֵיהּ וְיֶחְמוּן כָּל עַמַיָא אַיְקָרֵיהּ: ^sl-97-6

**7** יִבְהֲתוּן כָּל פָּלְחֵי פִּסְלָא דְמִשְׁתַּבְּחִין בְּטַעֲוָתָא וְיִסְגְדוּן קֳדָמוֹי כָּל עַמַיָא פַּלְחֵי טַעֲוָתָא: ^sl-97-7

**8** שַׁמְעַת וַחֲדַת כְּנִשְׁתָּא דְצִיוֹן וְדָצְיָן בְנָתָא דְבֵית יְהוּדָה מִן בִּגְלַל דִנָיִיךְ יְיָ: ^sl-97-8

**9** אֲרוּם אַתְּ הוּא יְיָ עִלָאָה עַל כָּל יָתְבֵי אַרְעָא לַחֲדָא אִתְעַלִיתָ עַל כָּל דַחֲלַיָא: ^sl-97-9

**10** רְחִמַיָא דַייָ סְנוּ בִישׁ מְטוּל דְקֵירִיס נָטֵיר נַפְשָׁת חֲסִידוֹי מִן אַיְדֵיהוֹן דְרַשִׁיעֵי יִפְצֵי אִנוּן: ^sl-97-10

**11** נְהוֹר דְנַח וּמִטַמַר לְצַדִיקַיָא וְלִתְרִיצֵי לִבָּא חֶדְוָא: ^sl-97-11

**12** חֲדוּן צַדִיקַיָא בְּמֵימְרָא דַייָ וְאוֹדוּן לְדָכְרָן שׁוּם קוּדְשֵׁיהּ: ^sl-97-12

## Capítulo 98

**1** תוּשְׁבְּחַת נְבוּאָה שַׁבַּחוּ קֳדָם יְיָ שְׁבַח חֲדָת אֲרוּם פְּרִישָׁן עֲבַד פְּרִיקַת לֵיהּ יְמִינֵיהּ וְאֶדְרַע שְׁכִינַת קוּדְשֵׁיהּ: ^sl-98-1

**2** הוֹדַע יְיָ פּוּרְקָנֵיהּ לְמֶחֱמֵיהוֹן דְעַמַיָא גָלֵי צִדְקָתֵיהּ: ^sl-98-2

**3** דְכַר טוּבֵיהּ וְקוּשְׁטֵיהּ לְבֵית יִשְׂרָאֵל וַחֲמוּן כָּל סְיָפֵי אַרְעָא יַת פּוּרְקָא דֶאֱלָהָנָא: ^sl-98-3

**4** יַבִּיבוּ קֳדָם יְיָ כָּל יָתְבֵי אַרְעָא בּוּעוּ וְשַׁבַּחוּ וְזַמֵרוּ: ^sl-98-4

**5** זַמַרוּ קֳדָם יְיָ בְּכִנָרִין בְּכִנָרִין וְקָל זְמָרַיָא: ^sl-98-5

**6** בַּחֲצוֹצְרָתָא וְקָל שׁוֹפָרָא יַבִּיבוּ קֳדָם מַלְכָּא יְיָ: ^sl-98-6

**7** יַכְלֵי יַמָא וּמַלְיֵהּ תֵּבֵל וְכָל דַיָרִין עֲלָהּ: ^sl-98-7

**8** נְהַרְוָתָא יִמְחוֹן כַּפַּיָא כַּחֲדָא טוּרַיָא יְרַנְנוּן: ^sl-98-8

**9** קֳדָם יְיָ אֲרוּם אֲתָא לְמֵדָן אַרְעָא יְדוּן תֵּבֵל בְּצִדְקְתָא וְעַמַיָא בְּתֵרוּצְתָּא: ^sl-98-9

## Capítulo 99

**1** יְיָ מְלָךְ יְזוּעוּן עַמַיָא דִי שְׁכִנְתֵּיהּ שָׁרְיָא בֵינֵי כְרוּבַיָא יְזַעְזַע אַרְעָא: ^sl-99-1

**2** יְיָ בְּצִיוֹן רַבָּא וְרָמָא הוּא עַל כָּל עַמְמַיָא: ^sl-99-2

**3** יְהוֹדוּן שְׁמָךְ רַבָּא וּדְחִילָא קַדִישָׁא הוּא: ^sl-99-3

**4** וְעוֹשְׁנֵיהּ דְמַלְכָּא דְדִינָא רָחֵים אַתְּ אַתְקֵינְתָּא תְרִיצוּתָא דִינָא וְצִדְקְתָא בְּיַעֲקֹב אַתְּ עֲבַדְתָּ: ^sl-99-4

**5** שַׁבַּחוּ קֳדָם יְיָ אֱלָהָנָא וּסְגִידוּ לְבֵית מַקְדְשֵׁיהּ קַדִישׁ הוּא: ^sl-99-5

**6** מֹשֶׁה וְאַהֲרֹן בְּכַהֲנוֹי דִמְסַרוּ נַפְשֵׁיהוֹן מְטוּל עַמָא דַייָ וּשְׁמוּאֵל אַמְטוּלְהוֹן צַלֵי קֳדָם יְיָ הֵיךְ אֲבָהַת עַלְמָא דְצַלוּ בִשְׁמֵיהּ מְצַלֵין קֳדָם יְיָ וְהוּא עָנִי יַתְהוֹן: ^sl-99-6

**7** בְּעַמוּד עֲנָנֵי יְקָרָא מְמַלֵל עִמְהוֹן נְטַרוּ סָהִדְוָתֵיהּ וּקְיָם דִיהַב לְהוֹן: ^sl-99-7

**8** יְיָ אֱלָהָנָא אַתְּ עֲנֵיתָ יַתְהוֹן אֱלָהָא שָׁבֵיק הֲוֵיתָא לְעַמָךְ אַמְטוּלְהוֹן וּמִתְפְּרַע עַל עוֹבָדֵיהוֹן: ^sl-99-8

**9** שַׁבַּחוּ קֳדָם יְיָ אֱלָהָנָא וּסְגִידוּ לְטוּר בֵּית מַקְדְשֵׁיהּ אֲרוּם קַדִישׁ יְיָ אֱלָהָנָא: ^sl-99-9

## Capítulo 100

**1** שְׁבָחָא עַל קוּרְבַּן תּוֹדְתָא יַבִּיבוּ קֳדָם יְיָ כָּל יָתְבֵי אַרְעָא: ^sl-100-1

**2** פְּלַחוּ קֳדָם יְיָ בְּחֶדְוָה אֱתוּ קֳדָמוֹי בְּתוּשְׁבַּחְתָּא: ^sl-100-2

**3** אוֹדִיעוּ אֲרוּם יְיָ הוּא אֱלָהָא הוּא עֲבַד יָתָנָא וְדִילֵיהּ אֲנַחְנָא עַמֵיהּ וְעָאן רַעְיָתֵיהּ: ^sl-100-3

**4** עוּלוּ בְתַרְעוֹי בְּאוֹדוּתָא דָרָתוֹי בְּתוּשְׁבַּחְתָּא אוֹדוּן קֳדָמוֹי בְּרִיכוּ שְׁמֵיהּ: ^sl-100-4

**5** אֲרוּם טַב יְיָ לַעֲלַם טוּבֵיהּ וְעַד דָר וְדָר הֵימְנוּתֵיהּ: ^sl-100-5

## Capítulo 101

**1** עַל יַד דָוִד תּוּשְׁבַּחְתָּא אִין חִסְדָא אַתְּ גָמֵל עִמִי אִין דִינָא אַתְּ עָבֵד עִמִי עַל כּוֹלָא אֲשַׁבַּח קֳדָמָךְ יְיָ אֲזַמֵר: ^sl-101-1

**2** אַשְׂכְּלִנָךְ בְּאוֹרַח שְׁלִים אֵימָתַי תֵּעוּל לְוָתִי אֶתְהַלֵךְ בִּשְׁלֵימוּת לִבְּבֵי בְּגוֹ בֵית אוּלְפָנִי: ^sl-101-2

**3** לָא אֲשַׁוֵי לְלִבִּי מִלְתָא דְרַשִׁיעָא עָבְדֵי בִישִׁין וְשָׂטִין מִן פִּקוּדַיָא סְנֵיתִי לָא יִדְבְּקוּן בִּי: ^sl-101-3

**4** לִבָּא עוּקְמָנָא יֶעְדֵי מִנִי יִצְרָא בִישָׁא לָא אֵדָע: ^sl-101-4

**5** דְמִשְׁתָּעֵי לִישָׁן תְּלִיתַי עַל חַבְרֵיהּ יָתֵיהּ אַמַגֵר (וְיִלְקֵי בְּצָרַעְתָּא) דְאָזֵיל בְּגַסוּת עַיְנִין עִמֵיהּ לָא אֲדוּר בְּעַלְמָא: ^sl-101-5

**6** עֵינַי בְּקַשִׁיטֵי אַרְעָא לְמִתַּב בִּמְחִיצַת צַדִיקֵי דְאָזֵל בְּאוּרְחָא שְׁלִים הוּא יְקוּם עִם שַׁמָשַׁי: ^sl-101-6

**7** לָא יִתֵב בִּמְצַע בֵּית מוּקְדָשִׁי עָבֵד נְכִילוּ דִי מְמַלֵל שִׁקְרִין לֵית לֵיהּ רְשׁוּ לְאִתְכַּוָנָא קָבֵל עַיְנָי: ^sl-101-7

**8** לְעָלְמָא דְאָתִי דְאִמְתִיל לִנְהוֹר צַפְרָא אֲמַגֵר כָּל רַשִׁיעֵי אַרְעָא לְשֵׁיצָאָה מִן יְרוּשְׁלֵם קַרְתָּא דַייָ כָּל עָבְדֵי שְׁקָר: ^sl-101-8

## Capítulo 102

**1** צְלוֹתָא עַל מִסְכְּנָא אֲרוּם מִשְׁתַּלְהֵי וּקְדָם יְיָ יֵימַר צְלוֹתֵיהּ: ^sl-102-1

**2** יְיָ קַבֵּל צְלוֹתִי וּפְגִינוּתִי לְקָדָמָךְ תֵּעוּל: ^sl-102-2

**3** לָא תְסַלֵק שְׁכִנְתָּךְ מִנִי בְּיוֹם עָקְתִי אַצְלֵי לְוָתִי אוּדְנָךְ בְּיוֹמָא דְאֶקְרֵי סַרְהֵיב עֲנֵי יָתִי: ^sl-102-3

**4** אֲרוּם אִשְׁתֵּצִיאוּ הֵיךְ תְּנָנָא יוֹמַי וְאֵבָרַי הֵיךְ תַּפְיָא חַרְרָן: ^sl-102-4

**5** לְקָא הֵיךְ עִסְבָּא לִבִּי אֲרוּם אִתְנְשֵׁיתִי אוֹרָיַת אוּלְפָנִי: ^sl-102-5

**6** מִן קָל תִּנְחֲתִי אִדְבַּק גַרְמִי לְבִסְרִי: ^sl-102-6

**7** אִדְמֵית לִקְאָתָא דְמַדְבְּרָא הֲוֵית הֵיךְ קְפוּפָא דִי בְאַרְעָא נְגוּבְתָּא: ^sl-102-7

**8** שִׁקְדֵית כָּל לֵילְיָא וַהֲוֵיתִי הֵיךְ צִפַּר דְפָרֵחַ וְנָיֵד בִּלְחוֹדֵיהּ עַל אִגְרָא: ^sl-102-8

**9** כָּל יוֹמָא יְחַסְדוּן לִי בַעֲלֵי דְבָבַי מְתַלְעֲבֵי בְמֵימְרִי קַיְמוּ מַגָן: ^sl-102-9

**10** אֲרוּם אַפְרָא הֵיךְ מְזוֹנָא סְעַדֵית וְשִׁקְיוּתִי בִּבְכוּתָא מִזְגֵית: ^sl-102-10

**11** מִן קֳדָם רוּגְזָךְ וְקִצְפָּךְ אֲרוּם נְטַלְתַּנִי וּטְלַקְתָּנִי: ^sl-102-11

**12** יוֹמַי הֵיךְ טוּלָא דְיִצְלֵי וַאֲנָא הֵיךְ עִסְבָּא אִיבָשׁ: ^sl-102-12

**13** וְאַתְּ יְיָ מְדוֹרֵךְ לַעֲלַם בִּשְׁמַיָא תֵּתֵב וְדָכְרָנָךְ לְדָר וְדָר: ^sl-102-13

**14** אַתְּ תְּקוּם תְּרַחֵם צִיוֹן אֲרוּם עִדָן לְמֵחוּס עֲלָהּ אֲרוּם אֲתָא זִמְנָא: ^sl-102-14

**15** אֲרוּם רָעוּ עַבְדָךְ יַת אֲבָנָהָא וְיַת עַפְרָהָא יְחַיְסוּן: ^sl-102-15

**16** וְיִדַחֲלוּן עַמַיָא יַת שְׁמָא דַייָ וְכָל מַלְכַיָא דְאַרְעָא יַת יְקָרָךְ: ^sl-102-16

**17** אֲרוּם אִתְבְּנֵי בְּמֵימְרָא דַייָ קַרְתָּא דְצִיוֹן אִתְגְלֵי בִּיקָרֵיהּ: ^sl-102-17

**18** אִתְפְּנֵי לְוַת צְלוֹתֵיהּ דְמִצְטַדְיָן וְלָא בַּסֵר יַת צְלוֹתְהוֹן: ^sl-102-18

**19** תִּתְכְּתֵב צְלוֹתָא דָא לְדָר בַּתְרָי וְעַמָא דַעֲתִיד לְאִתְבְרָאָה יְשַׁבַּח יָהּ: ^sl-102-19

**20** אֲרוּם אוֹדִיק מִשְׁמֵי מְרוֹמָא דְקוּדְשֵׁיהּ יְיָ מִן שְׁמַיָא לְאַרְעָא אִסְתַּכָּל: ^sl-102-20

**21** לְמִשְׁמַע אַנִיקוּתָא דַאֲסִירַיָא לְמִשְׁרֵי בְנַיָא דִמְסִירִין לְמִיתוּתָא: ^sl-102-21

**22** לְמִשְׁתָּעֵי בְצִיוֹן שְׁמָא דַייָ וְתוּשְׁבְּחֵיהּ בִּירוּשְׁלֵם: ^sl-102-22

**23** בְּאִתְכַּנְשׁוּת עַמִין כַּחֲדָא וּמַלְכְּוָתָא לְמִפְלַח קֳדָם יְיָ: ^sl-102-23

**24** אִסְתְּגֵיף מִן טוֹרַח דְאוֹרַח גָלוּתָא חֵילִי אִתְקַצְרוּן יוֹמָי: ^sl-102-24

**25** אֵימַר קֳדָם אֱלָהִי לָא תְסַלְקִנַנִי מִן עָלְמָא בְּפַלְגוּת יוֹמָי אַיְתֵי יָתִי לְעָלְמָא דְאָתֵי מְטוּל דִי בְדָרֵי דָרַיָא שְׁנָתָךְ: ^sl-102-25

**26** מִן שֵׁרוּיָא דְאִתְבְּרִי כָּל בִּרְיְתָא אַרְעָא יִסַדְתָּא וְעוֹבְדֵי יְדָךְ שְׁמַיָא: ^sl-102-26

**27** הִנוּן יְהוֹבְדוּן וְאַתְּ תְּקוּם וְכוּלְהוֹן הֵיךְ לְבוּשָׁא יִתְבַּלְיָן הֵיךְ אִצְטְלֵי תַחְלְפִינוּן וְיִתְחַלְפוּן: ^sl-102-27

**28** וְאַתְּ הוּא דִי בְרֵיתִנוּן וּשְׁנָתָךְ לָא מִשְׁתַּלְמָן: ^sl-102-28

**29** בְּנֵי עַבְדָךְ יִשְׁרוֹן בְּאַרְעָא וְזַרְעֲיָתְהוֹן קָדָמָךְ יִתַּקְנוּן: ^sl-102-29

## Capítulo 103

**1** עַל יַד דָוִד אִתְאַמַר בִּנְבוּאָה בְּרִיכִי נַפְשִׁי יַת שְׁמָא דַייָ וְכָל בְּנֵי גַוַי יַת שְׁמָא דְקוּדְשֵׁיהּ: ^sl-103-1

**2** בְּרִיכִי נַפְשִׁי יַת שְׁמָא דַייָ וְלָא תִתְנְשֵׁי יַת כָּל חִסוּלוֹי: ^sl-103-2

**3** דְשָׁבֵק לְכָל עַוְיַיְכִי דְמַסֵי לְכָל מַרְעַיְכִי: ^sl-103-3

**4** דְפָרֵק מִגְהִנָם חַיַיְכִי דְאַכְלַל יָתַיְכִי חִסְדָא וְרַחֲמֵי: ^sl-103-4

**5** דְמַסְבַּע בְטוּבָא יוֹמֵי סֵבְוָתַיְכִי וּלְעַלְמָא דְאָתֵי תְּחַדֵת הֵיךְ נִשְׁרָא טַלְיוּתַיְכִי: ^sl-103-5

**6** עָבֵד צִדְקְתָא יְיָ וְדִינִין לְכָל טָלוֹמִין: ^sl-103-6

**7** גַלֵי אָרְחָתֵיהּ לְמֹשֶׁה לִבְנֵי יִשְׂרָאֵל עוֹבָדוֹי: ^sl-103-7

**8** רַחֲמָנָא וַחֲנָנָא יְיָ מַרְחֵיק רְגַז וּמַסְגֵי לְמֶעְבַּד טַבְוָן וּקְשׁוֹט: ^sl-103-8

**9** לָא לְעַלְמִין יִנְצֵי וְלָא לַעֲלַם יִנְטוֹר דְבָבוֹ: ^sl-103-9

**10** לָא כְחוֹבָנָא עֲבַד לָנָא וְלָא כְעַוְיָתָנָא שַׁלֵם לָנָא: ^sl-103-10

**11** אֲרוּם הֵיךְ גְבִיהִין שְׁמַיָא מֵעִלַוֵי אַרְעָא הֵכְדֵין גְבַר טוּבֵיהּ עַל דָחֲלוֹי: ^sl-103-11

**12** הֵיךְ דְרָחִיק מַדִנְחָא מִן מַעַרְבָא הֵכְדֵין אַרְחִיק מִנָנָא יַת סוּרְחָנָנָא: ^sl-103-12

**13** הֵיךְ דִי רָחֵם אַבָּא עַל בָּנַיָא הֵכְדֵין רָחֵם יְיָ עַל דָחֲלוֹי: ^sl-103-13

**14** אֲרוּם הוּא יְדַע יִצְרָנָא בִישָׁא דְמַחֲטֵי יָתָנָא דְכִיר קָדָמוֹי אֲרוּם מִן עַפְרָא אֲנַחְנָא: ^sl-103-14

**15** בַּר נַשׁ הֵיךְ עִסְבָּא יוֹמֵיהּ הֵיךְ נִצָא דְחַקְלָא הֵכְדֵין יְנִיץ: ^sl-103-15

**16** אֲרוּם זַעֲפָא נִתְבַת בֵּיהּ וְלֵיתוֹי וְלָא אִשְׁתְּמוֹדְעֵיהּ תּוּב אַתְרֵיהּ: ^sl-103-16

**17** וְחִסְדָא דַייָ מִן עַלְמָא הָדֵין וְעַד עַלְמָא דְאָתֵי עַל דָחֲלוֹי וְצִדְקְתֵיהּ לִבְנֵי בְנִין: ^sl-103-17

**18** לְנָטְרֵי קְיָמֵיהּ וּלְדָכְרֵי פִקוּדוֹי לְמֶעְבַּדְהוֹן: ^sl-103-18

**19** יְיָ בִּשְׁמֵי מְרוֹמָא אַתְקֵין כּוּרְסֵיהּ וּמַלְכוּתֵיהּ בְּכוּלָא שָׁלְטָא: ^sl-103-19

**20** בְּרִיכוּ שְׁמָא דַייָ מַלְאֲכוֹי דְמִתְגַּבְּרִין בְּחֵילָא עָבְדֵי מִלוּלֵיהּ לְמִשְׁמַע קָל מִלוּלֵיהּ: ^sl-103-20

**21** בָּרִיכוּ שְׁמָא דַייָ כָּל חֵילוֹי מְשֻׁמְשָׁנוֹי דְעָבְדֵי רְעוּתֵיהּ: ^sl-103-21

**22** בָּרִיכוּ שְׁמָא דַייָ כָּל עוֹבָדוֹי בְּכָל אֲתַר שׁוּלְטָנֵיהּ בָּרִיכִי נַפְשִׁי יַת שְׁמָא דַיְיָ: ^sl-103-22

## Capítulo 104

**1** בָּרִיכִי נַפְשִׁי יַת שְׁמָא דַייָ יְיָ אֱלָהִי אִתְגַדַלְתָּא לַחֲדָא שְׁבָחָא וְשִׁבְהוֹרָא אַלְבִּישְׁתָּא: ^sl-104-1

**2** דְמִתְעַטֵף נְהוֹרָא הֵיךְ סְדִינָא דִמְתַּח שְׁמַיָא הֵיךְ יְרִיעֲתָּא: ^sl-104-2

**3** דְטָלֵל בְּמַיָא הֵיךְ בִּנְיָנָא דְכָשׁוּרֵי אַכְסַדְרוֹי דְשַׁוֵי עֲנָנִין אַרְתִיכֵיהּ עַל עֲנָנִין קְלִילִין הֵיךְ כַּנְפֵי נִשְׁרָא: ^sl-104-3

**4** דַעֲבַד אִזְגַדוֹ סַרְהוֹבִין הֵיךְ רוּחָא שַׁמָשׁוֹי תַּקִיפִין הֵיךְ אֶשָׁא מְצַלְהֲבָא: ^sl-104-4

**5** דִי מְיַסַד אַרְעָא עֲלַוֵי בְּסִיסָהּ דְלָא תָזוּעַ לְעַלְמֵי עָלְמִין: ^sl-104-5

**6** תְהוֹמָא כַּד בִּלְבוּשָׁא חֲפִיתָהּ וּמְבַזְעִין עַל טוּרַיָא וְקָיְמִין מַיָא: ^sl-104-6

**7** מִן מְזוֹפִיתָךְ יַעַרְקוּן לְמִגַד מִן קָל אַכְלָיוּתָךְ יִתְבַּהֲלוּן לְמִשְׁפָּךְ: ^sl-104-7

**8** יְסַלְקוּן מִן תְּהוֹמָא לְטוּרַיָא וְנָחֲתִין בְּבִקְעֲתָא לַאֲתַר דְנָן דִיסַדְתָּא לְהוֹן: ^sl-104-8

**9** תְּחוּם שַׁוֵיתָא לְגַלְלֵי יַמָא דִי לָא יֶעְבְּרוּן דִי לָא יְתוּבוּן לְמֶחְפֵּי אַרְעָא: ^sl-104-9

**10** דִי מְשַׁלַח מַעֲיָנֵי בְּנַהֲרוּתָא בֵּינֵי טוּרַיָא מְהַלְכִין: ^sl-104-10

**11** מַשְׁקִין כָּל חֵיוַת בָּרָא יִתְבְּרוּן עֲרוֹדַיָא צָחוּתְהוֹן: ^sl-104-11

**12** עִלַוֵיהוֹן צִפְּרֵי שְׁמַיָא יִשְׁרוּן מִבֵּינֵי זָאַזְיָא יִתְּנוּ קָל זְמָר: ^sl-104-12

**13** דְמַשְׁקֵי טוּרַיָא מִן בֵּית גִנְזֵי עִלָאִי דִי לֵיהּ מִן עוֹבָדָיִךְ תִּשְׂבַּע אַרְעָא: ^sl-104-13

**14** דִמְרַכֵּי עִסְבָּא לִבְעִירֵי וְיַרְקֵי לְפוּלְחָנָא דְבַר נָשָׁא לְמִפַּק לַחְמָא מִן אַרְעָא: ^sl-104-14

**15** וְחַמְרָא דְמֶחְדֵי לִבָּא דְבַר נָשָׁא לְאַנְהָרָא אַפַּיָא מִן מִשְׁחָא וְלַחְמָא לִבָּא דְבַר נָשָׁא יִסְעָד: ^sl-104-15

**16** שָׂבְעִין אִילָנַיָא דִי בְרָא יְיָ אַרְזֵי לִבְנָן דִי נְצִיב: ^sl-104-16

**17** דִי תַמָן צִפְּרַיָא עָבְדִין שַׁרְכְּפִין וָוְתָא בְרָאתִי בֵּית מְדוֹרָה: ^sl-104-17

**18** טוּרַיָא רָמַיָא לְיַעֲלֵי כֵּיפֵי רוּחֲצָן לְטַפְזַיָא: ^sl-104-18

**19** עֲבַד סִיהֲרָא לְמִימְנֵי בֵיהּ זִמְנַיָא שִׁמְשָׁא יָדַע עִידָן טְמוֹעֵיהּ: ^sl-104-19

**20** תְּשַׁוֵי חֲשׁוֹךְ וַהֲוֵי לֵילְיָא בֵּיהּ רָחֲשִׁין כָּל חֵיוַת חוּרְשָׁא: ^sl-104-20

**21** בְּנֵי אַרְיְוָן אָכְלִין לְמִשְׁכַּח מְזוֹנָא וּלְמִבְעֵי מִן אֱלָהָא מֵיכַלְהוֹן: ^sl-104-21

**22** תִּדְנַח שִׁמְשָׁא מִתְכַּנְשִׁין וּלְבֵית מְדוֹרְהוֹן רָבְעִין: ^sl-104-22

**23** יִפּוֹק בַּר נָשָׁא לְעוֹבָדֵיהּ וּלְפוּלְחָנֵיהּ עַד עֵרוּבֵי רַמְשָׁא: ^sl-104-23

**24** מָה סַגִיעִין הִנוּן עוֹבָדָךְ יְיָ כּוּלְהוֹן בְּחוּכְמְתָא עֲבַדְתָּא מַלְיָא אַרְעָא קִנְיָנָךְ: ^sl-104-24

**25** דְנָן יַמָא רַבָּא וּפְתַי תְּחוּמוֹן תַּמָן רִיחֲשָׁא וְלֵית מִנְיָן חֵיוָתָא זְעֵירְתָא עִם רַבְרְבָתָא: ^sl-104-25

**26** תַּמָן אִלְפַיָא אָזְלִין לִוְיָתָן דֵין בָּרֵיתָא לְמִגְחַךְ בֵּיהּ לְצַדִיקַיָא בִּסְעוּדַת בֵּית מְדוֹרֵיהּ: ^sl-104-26

**27** כּוּלְהוֹן עֲלָךְ סְבִירִין לְמִתַּן מְזוֹנְהוֹן בְּזִמְנֵיהּ: ^sl-104-27

**28** תִּתֵּן לְהוֹן וְכָנְשִׁין תִּפְתַּח אַיְדָךְ וְשָׂבְעִין טָבָא: ^sl-104-28

**29** תְּסַלֵּק שְׁכִנְתָּךְ מִתְבַּהֲלִין תִּכְנוֹשׁ רוּחֲהוֹן מִתְנַגְדִין וּלְוַת עֲפַרְהוֹן תָיְבִין: ^sl-104-29

**30** תְּשַׁלַח רוּחַ קוּדְשָׁךְ מִתְבַּרְיָן וּתְחַדֵת אַפֵּי אַרְעָא: ^sl-104-30

**31** יְהֵי אַיְקָר יְיָ לַעֲלַם יֶחֱדֵי יְיָ בְּעוֹבָדוֹי: ^sl-104-31

**32** דְמִסְתַּכֵּל לְאַרְעָא וּמִתְרַגְפָא מְקָרֵב בְּטוּרַיָא וּמַסְקִין תְּנָנָא: ^sl-104-32

**33** אֲשַׁבַּח קֳדָם יְיָ בְּחַיַי אֲזַמֵר לֵאלָהַי בְּעוֹד אִיתַי: ^sl-104-33

**34** יִבְסַם קֳדָמוֹי שׁוּתִי אֲנָא אֶחְדֵי בְּמֵימְרָא דַיָי: ^sl-104-34

**35** יִשְׁתֵּיצוּן חַטָאַיָא מִן אַרְעָא וּרְשִׁיעַיָא תּוּב לֵיתֵיהוֹן בָּרִיכִי נַפְשִׁי יַת שְׁמָא דַייָ הַלְלוּיָהּ: ^sl-104-35

## Capítulo 105

**1** שַׁבַּחוּ קֳדָם יְיָ קְרוֹ בִּשְׁמֵיהּ הוֹדֵעוּן בְּעַמְמַיָא עוֹבָדוֹי: ^sl-105-1

**2** שַׁבַּחוּ קֳדָמוֹי זַמַרוּ קֳדָמוֹי מַלִילוּ בְּכָל פְּרִישְׁוָתֵיהּ: ^sl-105-2

**3** שַׁבַּחוּ בְּשׁוּם קוּדְשֵׁיהּ יֶחְדֵי לִבְּהוֹן דְתָבְעֵי אוּלְפָן מִן קֳדָם יְיָ: ^sl-105-3

**4** תְּבַעוּ אוּלְפָנָא דַייָ וְאוֹרַיְתֵהּ אַקְבִילוּ אַפּוֹי תְדִירָא: ^sl-105-4

**5** אִדְכַּרוּ פְּרִישְׁוָתֵיהּ דִי עֲבַד תִּמְהוֹי וְדִינֵי פּוּמֵיהּ: ^sl-105-5

**6** זַרְעָא דְאַבְרָהָם עַבְדֵיהּ בְּנֵי יַעֲקֹב בְּחִירוֹי: ^sl-105-6

**7** הוּא יְיָ אֱלָהָנָא בְּכָל אַרְעָא מְתִיחִין דִינוֹי: ^sl-105-7

**8** דְכִיר לַעֲלָם קְיָמֵיהּ פִּתְגָם פַּקֵד לְאַלְפֵי דָרִין: ^sl-105-8

**9** דִי גְזַר עִם אַבְרָהָם וּקְיָמֵיהּ לְיִצְחָק: ^sl-105-9

**10** וְקַיְמִנָהּ לְיַעֲקֹב לִגְזֵירָא לְיִשְׂרָאֵל קְיָם עֲלָם: ^sl-105-10

**11** לְמֵימָר לָךְ אֶתֵּן יַת אַרְעָא דִכְנָעַן עֲדַב אַחְסַנְתְּכוֹן: ^sl-105-11

**12** כַּד הֲוֵיתוּן עַם דְמִנְיָן כִּזְעֵירִין וְיָתְבִין בָּהּ: ^sl-105-12

**13** וְהַלִיכוּ מִן עַמָא לְעַמָא מִמַלְכוּתָא לְעַמָא אֲחוֹרָן: ^sl-105-13

**14** לָא שְׁבַק אֱנָשׁ לְטִלוֹמְהוֹן וְאוֹכַח בְּגִינְהוֹן מַלְכַיָא: ^sl-105-14

**15** לָא תִקְרְבוּן בִּמְשִׁיחַי וּבִנְבִיאַי לָא תַבְאִישׁוּן: ^sl-105-15

**16** וְאָכְלֵי כַפְנָא עַל אַרְעָא כָּל סְעִיד לַחְמָא תְּבַר: ^sl-105-16

**17** שַׁדַר קֳדָמֵיהוֹן גְבַר חַכִּים לְעַבְדָא אִזְדַבַּן יוֹסֵף: ^sl-105-17

**18** עַנִיאוּ בְּשׁוֹשִׁלְתָּא רִגְלוֹי שֵׁיד דְפַרְזֶל עֲלַת בְּנַפְשֵׁיהּ: ^sl-105-18

**19** עַד עִידָן דַאֲתָא פִּתְגָמֵיהּ מֵימְרָא דַייָ סְנֵן יָתֵיהּ: ^sl-105-19

**20** שַׁדַר מְלַךְ וְשַׁרְיֵהּ שׁוּלְטָן בְּעַמַיָא וּפְתַח לֵיהּ: ^sl-105-20

**21** שַׁוְיֵהּ רִבּוֹן עַל בַּיְתֵיהּ וְשַׁלִיט בְּכָל קִנְיָנֵיהּ: ^sl-105-21

**22** לְמֵיסַר רַבְרְבָנוֹי הֵיךְ בְּנַפְשֵׁיהּ וּמִן סָבוֹי אֶתְחַכַּם: ^sl-105-22

**23** וַאֲתָא יִשְׂרָאֵל לְמִצְרַיִם וְיַעֲקֹב דָר בְּאַרְעָא דְחָם: ^sl-105-23

**24** וַאֲפֵישׁ יַת עַמֵיהּ לַחֲדָא וְאַתְקְפֵיהּ מִן מְעִיקוֹי: ^sl-105-24

**25** אִתְהַפֵּיךְ לִבְּהוֹן לְמִסְגֵי עַמֵיהּ לַחֲשָׁבָא בִישָׁן עַל עַבְדוֹי: ^sl-105-25

**26** שְׁלַח מֹשֶׁה עַבְדֵיהּ אַהֲרֹן דְאִתְרְעֵי בֵיהּ: ^sl-105-26

**27** שַׁווּ בְהוֹן פִּתְגָמֵי אַתְוָתוֹהִי וְתִמְהוֹי בְּאַרְעָא דְחָם: ^sl-105-27

**28** שַׁדַר חֲשׁוֹכָא וְחַשְׁכִינוּן וְלָא סָרִיבוּ עַל פִּתְגָמֵיהּ: ^sl-105-28

**29** הֲפַךְ לְאַדְמָא מֵימֵיהוֹן וְקַטֵל כָּל נוּנֵיהוֹן: ^sl-105-29

**30** רְחִישׁ אַרְעַתְהוֹן עוּרְדְעָנַיָא בְּקִטוֹנֵי מַלְכֵיהוֹן: ^sl-105-30

**31** אֲמַר וְאַיְתֵי עִרְבּוּבִין קַלְמָתָא בְּכָל תְּחוּמֵיהוֹן: ^sl-105-31

**32** יְהַב מִטְרֵהוֹן בַּרְדָא אֶשָׁא מְצַלְהֲבָא בְּאַרְעֵהוֹן: ^sl-105-32

**33** וּמְחָא גוּפְנֵיהוֹן וְתֵינֵיהוֹן וּתְבַר אִילָנֵי תְחוּמֵיהוֹן: ^sl-105-33

**34** אֲמַר וְאַיְתֵי גוֹבָאִי וּרְשׁוֹנָא לֵית מִנְיָן: ^sl-105-34

**35** וְגַמַר כָּל עִסְבָּא בְּאַרְעֲהוֹן וַאֲכַל פֵּרֵי אַרְעֲהוֹן: ^sl-105-35

**36** וּמְחָא כָל בּוּכְרָא בְּמִצְרַיִם שֵׁרוּי לְכָל תּוּקְפֵיהוֹן: ^sl-105-36

**37** וְאַפְקִינוּן בְּסִימָא וּבְדַהֲבָא וְלָא אִתְדָנוּ עִם מִצְרָאֵי לְמִתְקָלָא: ^sl-105-37

**38** חֲדוּן מִצְרָאֵי בְּמִפַּקְהוֹן אֲרוּם נְפַל דְחַלְהוֹן עֲלֵיהוֹן: ^sl-105-38

**39** פַּרְסֵי לַעֲנָנֵי הֵיךְ וֵילְתָא וְאֶשְׁתָּא לְאַנְהָרָא בְּלֵילְיָא: ^sl-105-39

**40** שְׁאִילוּ בִּסְרָא וְאַיְתֵי פִּסְיוֹנִין וְלַחְמָא דִשְׁמַיָא יַשְׂבְּעִינוּן: ^sl-105-40

**41** פְּתַח טִינָרָא וּדְאִיבוּ מַיָא הֲלִיכוּ בְּצַחֲוָתָא הֵיךְ נַהֲרָא: ^sl-105-41

**42** אֲרוּם דְכַר יַת מַמְלֵל קוּדְשֵׁיהּ דִי עִם אַבְרָהָם עַבְדֵיהּ: ^sl-105-42

**43** וְאַפֵּיק עַמֵיהּ בְּחֶדְוָא בְּתוּשְׁבַּחְתָּא יַת בְּחִירוֹי: ^sl-105-43

**44** יְהַב לְהוֹן אַרְעַת עַמְמִין וְלֵעוּת אוּמַיָא יֵרְתוּן: ^sl-105-44

**45** מִן בִּגְלַל דְיִטְרוֹן קְיָמוֹי וְאוֹרַיְתֵיהּ יִנְטְרוּן הַלְלוּיָהּ: ^sl-105-45

## Capítulo 106

**1** הַלְלוּיָהּ אוֹדוּ קֳדָם יְיָ אֲרוּם טָב אֲרוּם לַעֲלַם טוּבֵיהּ: ^sl-106-1

**2** מַן יֵיכוֹל לְמַלָלָא גְבוּרְתָּא דַייָ יִרְשֵׁי לְאַשְׁמָעָא לְכוּלְהוֹן תּוּשְׁבַּחְתֵּיהּ: ^sl-106-2

**3** טוּבֵיהוֹן דְנָטְרֵי דִינָא עָבְדֵי צְדַקְתָּא בְּכָל עִדָן: ^sl-106-3

**4** דְכַר יָתִי יְיָ בְּרַעֲוָא טָבָא עִם עַמָא אִדְכָּר לִי בְּפוּרְקָנָךְ: ^sl-106-4

**5** לְמֶחֱמֵי בְּטוּבַת בְּחִירַיִךְ לְמִחֲדֵי בְּחֶדְוַת עֲמָךְ לְאִשְׁתַּבָּחָא עִם אַחְסַנְתָּךְ: ^sl-106-5

**6** חַבְנָא עִם אַבְהָתָנָא אַעְוֵינָא אַרְשַׁעֲנָא: ^sl-106-6

**7** אַבְהָתָנָא בְּמִצְרַיִם לָא אַשְׂכִּילוּ פְּרִשְׁוָתָךְ לָא דְכַרוּ יַת סוּגְעֵי טוּבָךְ וְסָרִיבוּ עַל מֵימְרָךְ עַל יַמָא בְּיַמָא דְסוּף: ^sl-106-7

**8** וּפָרְקִנוּן בִּגְלַל שְׁמֵיהּ לְאוֹדָעָא יַת גְּבוּרְתֵּיהּ: ^sl-106-8

**9** וּנְזַף בְּיַמָא דְסוּף וְאִתְנְגֵיב וְהַלְכִנוּן בִּתְדוֹמַיָא הֵיךְ כִּבְמַדְבְּרָא: ^sl-106-9

**10** וּפַרְקִנוּן מִיַד סָנְאָה וּפְרַק יַתְהוֹן מִן יַד בַּעֲלֵי דְבָבָא: ^sl-106-10

**11** וַחֲפוּן מַיָא מְעִיקֵיהוֹן חַד מִנְהוֹן לָא אִשְׁתָּאַר: ^sl-106-11

**12** וְהֵימִינוּ בְּשׁוּם מֵימְרֵיהּ שַׁבַּחוּ תּוּשְׁבַּחְתֵּיהּ: ^sl-106-12

**13** סַרְהִיבוּ אִתְנְשִׁיאוּ עוֹבָדוֹי לָא אִסְתַּבַּרוּ לְמִלְכְתֵיהּ: ^sl-106-13

**14** וְשַׁיִילוּ שְׁאֶלְתָּא בְּמַדְבְּרָא וְנַסִיאוּ אֱלָהָא בַּאֲתַר צָדוּ: ^sl-106-14

**15** וִיהַב לְהוֹן שֵׁילוּתְהוֹן וְשַׁדַר פַּתְרָנוּתָא בְּנַפְשֵׁיהוֹן: ^sl-106-15

**16** וּטְנַנוּ לְמֹשֶׁה בְּמַשְׁרִיתָא לְאַהֲרֹן קַדִישָׁא דַיָי: ^sl-106-16

**17** אִתְפַּתְּחַת אַרְעָא וּבַלְעַת דָתָן וַחֲפָת עַל סִיעַת אֲבִירָם: ^sl-106-17

**18** וְדַלְקַת אֶשְׁתָּא בְּסִיעַתְהוֹן לַהֲבוּתָא תְּשַׁלְהֵב רַשִׁיעַיָא: ^sl-106-18

**19** עֲבַדוּ עִגְלָא בְּחוֹרֵב וּסְגִידוּ לְמַתְּכָא: ^sl-106-19

**20** וּפְדַנוּן יַת אַיְקָר רִבּוֹנְהוֹן בִּדְמוּת תּוֹר דַאֲכִיל עִסְבָּא וּמִזְדְהַם: ^sl-106-20

**21** אִתְנְשִׁיאוּ אֱלָהָא פָּרִקְהוֹן דַעֲבַד רַבְרְבָן בְּמִצְרַיִם: ^sl-106-21

**22** פְּרִישָׁן בְּאַרְעָא דְחָם דְחִילָן עַל יַמָא דְסוּף: ^sl-106-22

**23** וַאֲמַר בְּמֵימְרֵיהּ לְשֵׁצָיוּתְהוֹן אִלְמָלֵי מֹשֶׁה בְּחִירֵיהּ דְקָם וְאִתְקַף בִּצְלוֹ קֳדָמוֹי לַאֲתָבָא חֲמָתִי מִלְחַבָּלָא: ^sl-106-23

**24** וְאִתְרְחִיקַת נַפְשֵׁהוֹן בְּאַרְעָא רְגִינָא לָא הֵמִינוּ בְּפִתְגָמֵיהּ: ^sl-106-24

**25** וְאִתְרַעֲמוּ בְמַשְׁכְּנֵהוֹן לָא קַבִּילוּ בְּמֵימְרָא דַיָי: ^sl-106-25

**26** וַאֲרִים יְדֵיהּ בִּשְׁבוּעָה מְטוּלְהוֹן לְמִרְמֵי יַתְהוֹן קְטִילִין בְּמַדְבְּרָא: ^sl-106-26

**27** וּלְאַגְלָאָה זַרְעֲהוֹן בְּעַמַיָא וּלְבַדָרוּתְהוֹן בְּאַרְעֲתָא: ^sl-106-27

**28** וְאַדְבִּיקוּ בְּטַעֲוַת פְּעוֹר וַאֲכַלוּ נִכְסֵי מֵיתַיָא: ^sl-106-28

**29** וְאַרְגִיזוּ קֳדָמוֹי בְּעוֹבָדֵיהוֹן וְתַקְפַת בְּהוֹן מוֹתָנָא: ^sl-106-29

**30** וְקָם פִּינְחָס וְצַלֵי וְאִתְכַּלְיַת מוֹתָנָא: ^sl-106-30

**31** וְאִתְחַשְׁבֵת לֵיהּ לִזְכוּ לְדָר וְדָר עַד עַלְמָא: ^sl-106-31

**32** וְאַרְגִיזוּ עַל מֵי מַצוּתָא וּבָאֵישׁ לְמֹשֶׁה בִּגְלַלְהוֹן: ^sl-106-32

**33** אֲרוּם סָרִיבוּ עַל רוּחַ קוּדְשֵׁיהּ וּפָרֵישׁ בְּסִפְוָתֵיהּ: ^sl-106-33

**34** לָא שֵׁיצִיאוּ יַת עַמָא דִי אֲמַר יְיָ לְהוֹן: ^sl-106-34

**35** וְאִתְעֲרְבִּיבוּ בְּעַמַיָא וְאַלִיפוּ יַת עוֹבָדֵיהוֹן: ^sl-106-35

**36** וּפְלַחוּ יַת טַעֲוָתְהוֹן וַהֲווּ לְהוֹן לְתַקְלָא: ^sl-106-36

**37** וְדַבַּחוּ יַת בְּנֵיהוֹן וְיַת בְּנָתֵיהוֹן לְמַזִיקַיָא: ^sl-106-37

**38** וּשְׁדוּ אֲדַם זַכַּי דְמֵי בְנֵיהוֹן וּבְנָתֵיהוֹן דִי דַבַּחוּ לְטַעֲוָת דִכְנַעֲנָאֵי וְאִטַנְפַת אַרְעָא בְּחוֹבִין דִקְטוֹל: ^sl-106-38

**39** וּטְמִיאוּ בְּעוֹבָדֵיהוֹן וּטְעוּ בְּמַעֲלְלֵיהוֹן: ^sl-106-39

**40** וּתְקִיף רוּגְזָא דַייָ בְּעַמֵיהּ וְרַחֵק יַת אַחְסְתֵּיהּ: ^sl-106-40

**41** וּמַסְרִינוּן בְּיַד עַמַיָא וְשַׁלִיטוּ בְהוֹן סָנְאֵיהוֹן: ^sl-106-41

**42** וְדַחֲקִינוּן בַּעֲלֵי דְבָבֵיהוֹן וְאִתְכְּנִיעוּ תְּחוֹת יְדֵיהוֹן: ^sl-106-42

**43** זִמְנִין סַגִיעִין יִפְצֵיאִנוּן וְהִנוּן יִסָרְבוּן לֵיהּ בְּמִלְכַּתְהוֹן וְאִתְמְכִיאוּ בְּחוֹבֵיהוֹן: ^sl-106-43

**44** וַחֲמָא כַּד עַיָק לְהוֹן כַּד שְׁמַע יַת צְלוֹתְהוֹן: ^sl-106-44

**45** וּדְכִיר לְהוֹן קַיָמֵיהּ וְתָב מִן רוּגְזֵיהּ כְּסוּגְעֵי חַסְדוֹי: ^sl-106-45

**46** וִיהַב יַתְהוֹן לְרַחֲמִין בְּאַנְפֵּי כָּל דִשְׁבֵי יַתְהוֹן: ^sl-106-46

**47** פְּרוֹק יָתָנָא יְיָ אֱלָהָנָא וּכְנוֹשׁ יָתָנָא מִבֵּינֵי עַמְמַיָא לְאוֹדָעָה בְּשׁוּם קוּדְשָׁךְ לְאִשְׁתַּבָּחָא בְּתוּשְׁבַּחְתָּךְ: ^sl-106-47

**48** בְּרִיךְ שְׁמָא דַייָ אֱלָהָא דְיִשְׂרָאֵל מִן עַלְמָא וְעַד עַלְמָא דְאָתֵי וְיֵימַר כָּל עַמָא הָדֵין אָמֵן הַלְלוּיָהּ: ^sl-106-48

## Capítulo 107

**1** שַׁבַּחוּ קֳדָם יְיָ אֲרוּם טָב אֲרוּם לַעֲלַם טוּבֵיהּ: ^sl-107-1

**2** יֵימְרוּן פָּרִיקַיָא דַייָ דִי פַרְקִינוּן מִן יַד מְעִיקָא: ^sl-107-2

**3** וּמֵאַרְעֲתָא כַּנְשִׁינוּן מִמַדִנְחָא וּמִמַעֲרָבָא מִצִפּוּנָא וּמִן יַמָא דָרוֹמָא: ^sl-107-3

**4** עַל עַמָא דְבֵית יִשְׂרָאֵל אִתְנַבֵּי וַאֲמַר עַמָא בֵּית יִשְׂרָאֵל טָעוּ בְּמַדְבְּרָא בִּצְדִי אָרְחָא קַרְתָּא דִמְיַתְבָא לָא אַשְׁכָּחוּ: ^sl-107-4

**5** כָּפְנִים לְחוֹד צָחֲיָן נַפְשַׁתְהוֹן תִּשְׁתַּלְהֲיָא: ^sl-107-5

**6** וְצַלוּ קֳדָם יְיָ כַּד עַיָק לְהוֹן מִמְעִקַתְהוֹן פְּצָא יַתְהוֹן: ^sl-107-6

**7** וְדַבְּרִינוּן בְּאוֹרַח תְּרִיצְתָּא לְמֵיזַל לִירוּשְׁלֵם קַרְתָּא דִמְיַתְבָא: ^sl-107-7

**8** יְהוֹדוּן קֳדָם יְיָ מְטוּל חַסְדֵיהּ וּמִשְׁתַּעָן פְּרִישְׁוָתֵיהּ לִבְנֵי נְשָׁא: ^sl-107-8

**9** אֲרוּם אַשְׂבַּע נֶפֶשׁ סְרֵיקָא וְנַפְשָׁא כֵּפִינָא מְלֵי טוּבָא: ^sl-107-9

**10** עַל צִדְקִיָהוּ וְרַבְרְבָנֵי יִשְׂרָאֵל אִתְנַבֵּי וַאֲמַר צִדְקִיָהוּ וְרַבְרְבָנֵי יִשְׂרָאֵל דִגְלוּ בְּבָבֶל וִיתִיבוּ בַחֲשׁוֹכָא וְטוּלָא דְמוֹתָא וַהֲווֹ אֲסִירִין בְּסִגוּף שֵׁרֵי פַּרְזְלָא: ^sl-107-10

**11** אֲרוּם סָרִיבוּ עַל מֵימְרֵיהּ דֶאֱלָהָא וּמִלְכַּת עִלָאָה רָחִיקוּ: ^sl-107-11

**12** וְתַבַּר בְּלֵעוּתָא לִבְּהוֹן אַתְקִילוּ וְלֵית דְסָעִיד: ^sl-107-12

**13** וְצַלוּ קֳדָם יְיָ בִּדְעַיֵק לְהוֹן מִמְעִיקָתְהוֹן פָּרְקִנוּן: ^sl-107-13

**14** אַפְקִנוּן מֵחֲשׁוֹכָא וְטוּלָא דְמוֹתָא וְשַׁלְשֶׁלְוָתְהוֹן יִתְרַע: ^sl-107-14

**15** יְהוֹדוּן קֳדָם יְיָ מְטוּל חַסְדֵיהּ וּמִשְׁתָּעָן פְּרִשְׁוָתֵיהּ לִבְנֵי נָשָׁא: ^sl-107-15

**16** אֲרוּם תְּבַר דָשֵׁי נְחָשָׁא וְעַבְרֵי פַּרְזְלָא קַצֵץ: ^sl-107-16

**17** שַׁטְיָן מֵאוֹרַח מְרָדֵיהוֹן וּמֵעַוְיָתֵיהוֹן מִסְתַּגְפִין: ^sl-107-17

**18** כָּל מֵיכְלָא תַּרְחִיק נַפְשֵׁהוֹן וּמָטְיָן עַד מַעֲלָנֵי מוֹתָא: ^sl-107-18

**19** וְצַלוּ קֳדָם יְיָ כַּד עַיֵק לְהוֹן מִמְעִיקָתְהוֹן יִפְרְקִנוּן: ^sl-107-19

**20** יְשַׁדֵר פִּתְגָמֵי אַסוּתֵיהּ וְיַסֵי יַתְהוֹן וִישֵׁיזֵיב מִלְחַבָּלוּתְהוֹן: ^sl-107-20

**21** יְהוֹדוּן קֳדָם יְיָ מְטוּל חַסְדֵיהּ וּמִשְׁתָּעָן פְּרִישְׁוָתֵיהּ לִבְנֵי נָשָׁא: ^sl-107-21

**22** וְיִכְסוּן נִכְסֵי תוֹדְתָא וְיִשְׁתָּעוּן עוֹבָדוֹי בְּדִצְתָּא: ^sl-107-22

**23** מַלָחַיָא נְחוֹתֵי יַמָא בְּאִלְפַיָא עָבְדֵי פוּלְחָנָא בְּמַיִין סַגִיעִין: ^sl-107-23

**24** הִנוּן חֲמוֹן עוֹבָדַיָא דַייָ וּפְרִישְׁוָתֵיהּ בִּמְצוּלְתָּא: ^sl-107-24

**25** וַאֲמַר בְּמֵימְרֵיהּ וַאֲקִים זַעֲפָא וְעַלְעוֹלָא וְאִתְרוֹמְמוּ גַלְלוֹי: ^sl-107-25

**26** סָלְקִין צֵית שְׁמַיָא נָחֲתִין עִמְקֵי תְהוֹמַיָא נַפְשַׁתְהוֹן בְּבִישָׁא תִּתְמוֹגֵג: ^sl-107-26

**27** יִרְתְּתוּן יְנוּעוּן הֵיךְ רַוְיָא דַחֲמַר וְכָל חוּכְמַתְהוֹן מִסְתַּלְעֲמָא: ^sl-107-27

**28** וְצַלוּ קֳדָם יְיָ כַּד עַיִק לְהוֹן וּמִמְעִיקָתְהוֹן יַפֵּק יַתְהוֹן: ^sl-107-28

**29** יְקִים עַלְעוֹלָא לִשְׁתִּיקוּתָא וְיִשְׁתְּקוּן גַלְלֵיהוֹן: ^sl-107-29

**30** וַחֲדוּן אֲרוּם שָׁתְקִין וְדַבָּרִנוּן לִמְחוֹז רַעֲיָתְהוֹן: ^sl-107-30

**31** יְהוֹדוּן קֳדָם יְיָ מְטוּל חַסְדֵיהּ וּמִשְׁתָּעָן פְּרִישְׁוָתֵיהּ לִבְנֵי נָשָׁא: ^sl-107-31

**32** וּמְרוֹמְמִין יָתֵיהּ בִּכְנִישַׁת עַמָא בֵּית יִשְׂרָאֵל וּבְסַנְהֶדְרִין דְחַכִּימַיָא יְשַׁבְּחוּן יָתֵיהּ: ^sl-107-32

**33** שַׁוִי נְהַרְוָתָא הֵיךְ מַדְבְּרָא וּמַפְקָנוּת מַיָא הֵיךְ צְחוּתָא: ^sl-107-33

**34** אַרְעָא דְיִשְׂרָאֵל דְעַבְדָא פְּרִי צְדָא הֵיךְ סְדוֹם דְאִתְהַפְּכַת מִן בִּישׁוּת יָתְבִין בָּהּ: ^sl-107-34

**35** כַּד תָּבוּ לְאוֹרַיְתָא שַׁוִי מַדְבְּרָא הֵיךְ אֲרִיתָא דְמַיָא וַאֲרַע צִיחַיָא לְמַפְקָנוּת מַיָא: ^sl-107-35

**36** וְאַשְׁרֵי תַמָן כָּפְנִים וְאַתְקִינוּ קַרְתָּא מְיַתְבָא: ^sl-107-36

**37** וּזְרַע חַקְלִין וּנְצִיבוּ כַרְמַיָא וַעֲבַדוּ פְּרִי אִבָּא: ^sl-107-37

**38** וּבָרְכִינוּן וְיִסְגוּן לַחֲדָא וּבְעִירֵיהוֹן לָא יַזְעֵר: ^sl-107-38

**39** וְכַד חָבוּ אַזְעֵרוּ וְאִתְמַסְכְּנוּ מִן אֲנִיק בִּישְׁתָּא וְדָווֹנָא: ^sl-107-39

**40** שָׁדֵי בַּסְרָנוּתָא עַל רַבְרְבָנַיָא וְאַטְעִיאוּנוּן בִּלְמָא דְלָא אוֹרְחָא: ^sl-107-40

**41** וְכַד תָּבוּ לְאוֹרַיְתָא שַׂגֵב חֲשֵׁיכָא מִמִסְכֵּינוּתָא וְשַׁוֵי הֵיךְ עָאנֵי גְנִיסַיָא: ^sl-107-41

**42** חֲמוֹן תְּרִיצַיָא וְיֶחֱדוּן וְכָל מָרֵי שִׁקְרָא שַׁוַר פּוּמָא וְאִתְחַסֵם: ^sl-107-42

**43** מַן חַכִּימָא וְיִנְטוֹר אִלֵין וְיִתְבּוֹנְנוּ חַסְדַיָא דַיָי: ^sl-107-43

## Capítulo 108

**1** שִׁירָא וּשְׁבָחָא עַל יְדָא דְדָוִד: ^sl-108-1

**2** תַּקִין לִבִּי אֱלֹהִים אֲשַׁבַּח וַאֲזַמֵר לְחוֹד אַיְקָרִי: ^sl-108-2

**3** שַׁבַּח נִבְלָא וְכִנָרָא אֲשַׁבַּח בִּקְרִצְתָּא: ^sl-108-3

**4** אוֹדֵי קֳדָמָךְ בְּעַמַיָא יְיָ וַאֲשַׁבְּחִינָךְ בְּאוּמַיָא: ^sl-108-4

**5** אֲרוּם רַב מֵעִלַוֵי שְׁמַיָא טוּבָךְ וְעַד שָׁחְקֵי מָטֵי קוּשְׁטָךְ: ^sl-108-5

**6** אִתְרוֹמֵם עִלַוֵי שְׁמַיָא אֱלֹהִים וְעַל כָּל יָתְבֵי אַרְעָא אַיְקָרָךְ: ^sl-108-6

**7** מִן בִּגְלַל דְיִשְׁתֵּזְבוּן רְחִימָךְ פְּרוֹק יְמִינָךְ וַעֲנֵי יָתִי: ^sl-108-7

**8** אֱלָהָא מְמַלֵל מֵאֲתַר בֵּית שְׁכִנְתֵּיהּ אֲבוּעַ אֲפַלֵג בִּזְתָא עִם יָתְבֵי שְׁכֶם וְעִם יָתְבֵי מֵישַׁר סֻכּוֹת אֶמְשַׁח תְּחוּמָא: ^sl-108-8

**9** דִילִי גִלְעָד דִילִי מְנַשֶׁה גִבָּרִין דְבֵית אֶפְרַיִם עוּשְׁנָא דְרֵישִׁי וּמִדְבֵית יְהוּדָה סַפְרֵי: ^sl-108-9

**10** דוֹשְׁשֵׁית מוֹאָבָאֵי הֵיךְ דוּדִי שֵׁזוּגִי עַל מַלְכוּת אֱדוֹם אֶטְלוֹק סַנְדְלִי עַל מַלְכוּת פְּלִשְׁתָּאֵי אֶתְיַבֵּב: ^sl-108-10

**11** וּכְדוּן מַן אוֹבִיל יָתִי עַד כְּרַכָּא תַקִיפָא מַן דַבְּרַנִי עַד אֱדוֹם: ^sl-108-11

**12** הֲלָא עַל דְחַבְנָא קֳדָם יְיָ שְׁבַקְתָּנָא וְלָא נַפְקָא שְׁכִנְתֵּיהּ בְּחֵלְוְתָנָא: ^sl-108-12

**13** הַב לָן סַעֲדָא מִן מְעִיקָא דְמַגָן פּוּרְקָנָא דְבַר נָשָׁא: ^sl-108-13

**14** בֵּאלָהָא נַעֲבֵּיד חֵילָא וְהוּא יְדוֹשֵׁשׁ מְעִיקָנָא: ^sl-108-14

## Capítulo 109

**1** לְשַׁבָּחָא עַל יַד דָוִד תּוּשְׁבְּחָא אֱלֹהִים שְׁבָחַתִי לָא תִשְׁתּוֹק: ^sl-109-1

**2** אֲרוּם פּוּמָא דְרַשִׁיעָא וּפוּמָא דְנִכְלָא עֲלַי פָּתְחִין מַלִילוּ עִמִי לִישָׁן דִשְׁקָר: ^sl-109-2

**3** וּמְמַלְלֵי סָנוּתָא חֲזַרוּ יָתִי וְאַגִיחוּ עִמִי מַגָן: ^sl-109-3

**4** חֲלַף דִי רְחִמֵית סְטַנוּ לִי וַאֲנָא אֲצַלֵי: ^sl-109-4

**5** וְשַׁווּן עֲלַי בִּישְׁתָּא חֲלַף טָבָא וְסִנְאֲתָא חֲלַף דִרְחִימֵית: ^sl-109-5

**6** אַסְעַר עֲלוֹי רַשִׁיעָא וְסִיטְנָא יְקוּם עַל יְמִינֵיהּ: ^sl-109-6

**7** בְּאִדַיְנֵיהּ יִפּוֹק חַיָב וּצְלוֹתֵיהּ תְּהֵי לְחוֹבְתָא: ^sl-109-7

**8** יְהוֹן יוֹמוֹי קַלִילִין מִנְיַן שְׁנוֹי יֵירָת אוֹחֲרָן: ^sl-109-8

**9** יְהוֹן בְּנוֹי יַתְמֵי וְאִתְּתֵיהּ אַרְמַלְתָּא: ^sl-109-9

**10** וְאִטַלְטְלָא יְטַלְטְלוּן בְּנוֹי וְשַׁאֲלוּן וְתִבְעוּן מִדְהֲוָת צָרַתְהוֹן: ^sl-109-10

**11** יְגַבֵּב מְזוֹפָא לְכָל דִילֵיהּ וְיִבְזוּן נֻכְרָאִין לֵיעוּתֵיהּ: ^sl-109-11

**12** לָא יְהֵי לֵיהּ נָגֵיד חִסְדָא וְלָא יְהֵי לֵיהּ חָיֵס עַל יַתְמוֹי: ^sl-109-12

**13** יְהֵי סוֹפֵיהּ לְאִשְׁתֵּצָיָא בְּדָר אוֹחֲרָן יִתְמְחֵי שִׁמְהוֹן: ^sl-109-13

**14** יִדְכַּר עִוְיַת אֲבָהָתוֹי קֳדָם יְיָ וְחוֹבַת אִמֵיהּ לָא תִתְמְחֵי: ^sl-109-14

**15** יֶהֱוְיָן קֳבֵיל מֵימְרָא דַייָ תְּדִירָא וִישֵׁיצֵי מֵאַרְעָא דָכְרָנְהוֹן: ^sl-109-15

**16** מִטוּל דְלָא אִדְכַּר לְמֶעְבַּד טֵיבוּ וְרָדֵיף גְבַר עַנְיָא וַחֲשִׁיכָא וּמַכִּיךְ לִבָּא לְאִתְקַטָלָא: ^sl-109-16

**17** וְרָחֵים לְוָטַיָא וְאַתְיַת לֵיהּ וְלָא אִתְרְעֵי בְּבִרְכְתָא וְאִתְרַחֲקַת מִנֵיהּ: ^sl-109-17

**18** וּלְבַשׁ לְוָטָא הֵיךְ לְבוּשָׁא וַעֲלַת הֵיךְ מַיָא בְּגוּשְׁמֵיהּ וְהֵיךְ מִשְׁחָא בְּאֵבָרוֹי: ^sl-109-18

**19** תֶּהֱוֵי לֵיהּ הֵיךְ לְבוּשׁ יִתְעֲטֵף וּלְקָמוֹר תְּדִירָא יְזָרְזִנָה: ^sl-109-19

**20** דָא עוֹבָדָא דְשָׂטְנֵי מִן יְיָ וּדְמַלְלִין בִּישְׁתָּא עַל נַפְשִׁי: ^sl-109-20

**21** וְאַתְּ אֱלֹהִים יְיָ עֲבֵד עִמִי מִן בִּגְלַל שְׁמָךְ הֵיךְ טוּבָךְ וְחַסְדָךְ פְּצֵי יָתִי: ^sl-109-21

**22** אֲרוּם עַנְיָא וַחֲשִׁיכָא אֲנָא וְלִבִּי שְׁפִי בְּגַוִי: ^sl-109-22

**23** הֵיךְ טוּלָא בְּצַלָיוּתֵיהּ אִתְגַמְרֵית אִטַלְטְלֵית הֵיךְ גוֹבָאִי: ^sl-109-23

**24** רְכוּבַי אִתְּקַלוּ מִצוֹמָא וּבִסְרִי פַּתְרֵן מִלְהֱוֵי פַּטִים: ^sl-109-24

**25** וַאֲנָא הֲוֵיתִי קְלָנָא לְהוֹן יֶחְמוּן יָתִי יְטַלְטְלוּן רֵישֵׁיהוֹן: ^sl-109-25

**26** סְעוֹד לִי יְיָ אֱלֹהַי פְּרוֹק יָתִי הֵיךְ חַסְדָךְ: ^sl-109-26

**27** וְיֵדְעוּן אֲרוּם מְחָתָךְ דָא אַנְתְּ יְיָ עֲבַדְתָּהּ: ^sl-109-27

**28** יְלַטְטוּן הִנוּן וְאַתְּ תְּבָרֵךְ יְקוּמוּן וְיִבַהֲתוּן וְעַבְדָךְ יֶחְדֵי: ^sl-109-28

**29** יִלְבְּשׁוּן סָטְנַי כִּסוּפָא וִיעַטְפוּן הֵיךְ מְעִילָא בַּהַתְהוֹן: ^sl-109-29

**30** אוֹדֵי יְיָ לַחֲדָא בְּפוּמִי וּבִמְצַע חַכִּימַיָא אֲשַׁבְּחִנֵיהּ: ^sl-109-30

**31** אֲרוּם יְקוּם מִן יְמִינָא דַחֲשִׁיכָא לְמִפְרַק מִמְדַיְנֵי נַפְשֵׁיהּ: ^sl-109-31

## Capítulo 110

**1** עַל יַד דָוִד תּוּשְׁבְּחָא אֲמַר יְיָ בְּמֵימְרֵיהּ לְשַׁוָאָה יָתִי רִבּוֹן עַל כָּל יִשְׂרָאֵל בְּרַם אֲמַר לִי תּוּב וְאוֹרֵךְ לְשָׁאוּל דְמִן שִׁבְטָא דְבִנְיָמִין עַד דִימוּת אֲרוּם לֵית מַלְכוּתָא מְקָרְבָא אֲחַבֶרְתָּהּ וּבָתַר כֵּן אֲשַׁוֵי בַּעֲלֵי דְבָבָךְ כְּבִישׁ לְרִגְלָךְ: (ת"א) אֲמַר יְיָ בְּמֵימְרֵיהּ לְמִתַּן לִי רַבָּנוּתָא חֲלַף דִיתֵבִית לְאוּלְפָן אוֹרַיְתָא דִימִינִי אוֹרֵךְ עַד דַאֲשַׁוֵי בְּעַל דְבָבָךְ כְּבִישׁ לְרִגְלָךְ: ^sl-110-1

**2** חוּמְרָא דְעוּשְׁנָךְ יְשַׁדַר יְיָ מִצִיוֹן וּתְהֵי רָדֵי בִּמְצַע בַּעֲלֵי דְבָבָךְ: ^sl-110-2

**3** עַמָךְ דְבֵית יִשְׂרָאֵל דְמִתְנַדְבִין לְאוֹרַיְתָא בְּיוֹם אַגָחוּתָא קְרָבָא תִּסְתַּיַע בְּשִׁבְהוֹרֵי קוּדְשָׁא רַחֲמִין דֶאֱלָהָא יִסְתַּרְהֲבוּן לָךְ הֵיךְ נַחֲתָת טַלָא לְרוֹחֲצָן תּוֹלְדָתָךְ: ^sl-110-3

**4** קַיָם יְיָ וְלָא יְתוּב דְאַנְתְּ מִתְמַנֵי לְרַבָּא לְעַלְמָא דְאָתֵי בְּגִין זְכוּתָא דַהֲוֵיתָא מְלַךְ זַכַּי: ^sl-110-4

**5** שְׁכִנְתָּא דַייָ עַל יְמִינָךְ מְחָא בְיוֹם רוּגְזֵיהּ מַלְכַיָא: ^sl-110-5

**6** אִתְמַנָא לְדַיָן עַל עַמְמַיָא מְלֵי אַרְעָא גוּשְׁמֵי רַשִׁיעִין קְטִילִין מְחָא רֵישָׁא עַל אַרְעָא סַגִיעָא לַחֲדָא: ^sl-110-6

**7** מִפּוּם נְבִיָא בְּאוֹרְחָא אוּלְפָן יְקַבֵּל מְטוּל הֵיכְנָא יִזְקוֹף רֵישָׁא: ^sl-110-7

## Capítulo 111

**1** הַלְלוּיָהּ אֲשַׁבַּח קֳדָם יְיָ בְּכָל לִבָּא בְּרָזְהוֹן דִתְרִיצַיָא וּכְנִשְׁתָּא: ^sl-111-1

**2** רַבְרְבִין עוֹבָדַיָא דַייָ מִתְבַּעְיָן לְכָל דְצָבְיָן לְהוֹן: ^sl-111-2

**3** שְׁבָחָא וְשִׁבְהוֹרָא עוֹבָדֵיהּ וּזְכוּתֵיהּ קַיָמָא לְעָלְמִין: ^sl-111-3

**4** דָכְרָן טָב עֲבַד לִפְרִשְׁוָתֵיהּ חֲנָנָא וְרַחֲמָנָא יְיָ: ^sl-111-4

**5** מְזוֹנָא יְהַב לְדָחֲלוֹי יִדְכַּר לַעֲלַם קְיָמֵיהּ: ^sl-111-5

**6** חֵיל עוֹבָדוֹי חַוֵי לְעַמֵיהּ לְמִתַּן לְהוֹן אַחְסָנַת עַמְמַיָא: ^sl-111-6

**7** עוֹבָדֵי יְדוֹי קוּשְׁטָא וְדִינָא מְהֵימְנִין עַל פִּקוּדוֹי: ^sl-111-7

**8** סְמוּכִין לְעַלְמֵי עַלְמָא מִתְעַבְּדִין בְּקוּשְׁטָא וְתִירוּצָא: ^sl-111-8

**9** פּוּרְקָנָא שְׁלַח לְעַמֵיהּ פַּקֵד לַעֲלַם קְיָמֵיהּ קַדִישָׁא וּדְחִילָא שְׁמֵיהּ: ^sl-111-9

**10** שֵׁרוּי חוּכְמְתָא דְחַלְתָּא דַייָ סִכְלָא טָבָא לְכָל עוֹבָדֵיהוֹן תּוּשְׁבַּחְתֵּיהּ קַיָמָא לְעַלְמִין: ^sl-111-10

## Capítulo 112

**1** הַלְלוּיָהּ טוּבֵיהּ דְגַבְרָא דָחֵל יַת יְיָ בְּפִקוּדוֹהִי צָבֵי לַחֲדָא: ^sl-112-1

**2** גִבָּר בְאוֹרַיְתָא יֶהֱוְיָן בְּנוֹי בְּדָר תְּרִיצַיָא יִתְבָּרַךְ: ^sl-112-2

**3** מַזָלָא וְעוּתְרָא בְּבֵיתֵיהּ וּזְכוּתֵיהּ קְיָמָא לְעַלְמִין: ^sl-112-3

**4** דְנָח בַּחֲשׁוֹכָא נְהוֹר לִתְרִיצַיָא חֲנָנָא וְרַחֲמָנָא וְצַדִיקָא: ^sl-112-4

**5** גַבְרָא טָבָא חָיֵס עַל עֲנִיֵי וּמוֹזִיף יְסוֹבַר מִלוֹי בְּהִלְכְתָא: ^sl-112-5

**6** אֲרוּם לַעֲלַם לָא יְזוּעַ לְדָכְרָן עֲלַם יְהֵי זַכַּי: ^sl-112-6

**7** מִשְׁמוּעֲתָא בִישָׁא לָא יִדְחַל תַּכִּין לִבֵּיהּ רָחֵץ בְּמֵימְרָא דַיָי: ^sl-112-7

**8** סְמִיךְ לִבֵּיהּ לָא יִדְחַל עַד דְיֶחֱמֵי פּוּרְקָנָא בְּעַקְתָא: ^sl-112-8

**9** בַּדַר מָמוֹנֵיהּ יְהַב לַחֲשִׁיכֵי זְכוּתֵיהּ קַיָמָא לְעַלְמָא תּוּקְפֵיהּ תְּרוּם בְּאַיְקָרָא: ^sl-112-9

**10** רַשִׁיעָא יֶחֱמֵי וְיִכְעוֹס עֲלוֹי שִׁנוֹי יְעַסֵי וְאִתְמְסָא רְגוּג רַשִׁיעֵי תֵיבִיד: ^sl-112-10

## Capítulo 113

**1** הַלְלוּיָהּ שַׁבַּחוּ עַבְדַיָא דַייָ שַׁבַּחוּ יַת שְׁמָא דַיָי: ^sl-113-1

**2** יֶהֱוֵי שְׁמָא דַייָ מְבָרָךְ מֵהַשְׁתָּא וְעַד עַלְמָא: ^sl-113-2

**3** מִמַדְנַח שִׁמְשָׁא עַד מִטְמְעֵיהּ מְשַׁבַּח שְׁמָא דַיָי: ^sl-113-3

**4** רְמָא עַל כָּל עַמַיָא יְיָ עֲלַוֵי שְׁמַיָא אַיְקָרֵיהּ: ^sl-113-4

**5** מַן כְּוָתֵיהּ דַייָ אֱלָהָנָא דִגְבִיהַּ מוֹתְבֵיהּ לְמִתַּב: ^sl-113-5

**6** דְמַמֵיךְ עַיְנֵיהּ לְמֶחֱמֵי בִשְׁמַיָא וּבְאַרְעָא: ^sl-113-6

**7** מֵקִים מֵעַפְרָא מִסְכֵּנָא מִקַלְקַלְתָּא יְרִים חֲשִׁיכָא: ^sl-113-7

**8** לְאוֹתָבָא עִם רַבְרְבַיָא עִם רַבְרְבֵי עַמֵיהּ: ^sl-113-8

**9** מְיַתֵב כְּנִשְׁתָּא דְיִשְׂרָאֵל דִמְתִילָא לַעֲקָרָא דְיָתְבָא מוֹרִיקָא לֶאֱנָשֵׁי בֵיתָהּ מָלְיָא אוֹכְלוֹסִין הֵיךְ אִמָא דִי עַל בְּנַיָא חָדְיָא הַלְלוּיָהּ: ^sl-113-9

## Capítulo 114

**1** בְּמִפַּק יִשְׂרָאֵל מִמִצְרַיִם בֵּית יַעֲקֹב מֵעַמֵי בַּרְבְּרָאֵי: ^sl-114-1

**2** הֲוָת כְּנִשְׁתָּא דְבֵית יְהוּדָה אֲחִידָא לְקוּדְשֵׁיהּ יִשְׂרָאֵל לְשַׁלִיטוֹי: ^sl-114-2

**3** יַמָא אִסְתַּכַּל וְאַפֵּךְ יוֹרְדְנָא חֲזַר לְאָחוֹר: ^sl-114-3

**4** טוּרַיָא טְפַזוּ הֵיךְ דִכְרִין גַלְמָתָא הֵיךְ בְּנִין דְעָאן: ^sl-114-4

**5** מַה לָךְ יַמָא אֲרוּם תְּאַפֵּךְ יוֹרְדְנָא תַּחֲזוֹר לַאֲחוֹרָא: ^sl-114-5

**6** טוּרַיָא טְפַזוּ הֵיךְ דִכְרִין גַלְמָתָא הֵיךְ בְּנִין דְעָאן: ^sl-114-6

**7** מִן קֳדָם קֵירִיס אִתְחַלְחַלִי אַרְעָא מִן קֳדָם אֱלָהָא דְיַעֲקֹב: ^sl-114-7

**8** דְהָפַךְ טִינָרָא לַאֲרִיתָא דְמַיָא שָׁמִיר לְמַעְיָן דְמַיִין: ^sl-114-8

## Capítulo 115

**1** לָא מְטוּלְתָּנָא יְיָ לָא מְטוּל זַכְוָתָנָא אֲרוּם לִשְׁמָךְ הַב אַיְקָרָא מְטוּל טוּבָךְ וּמְטוּל קוּשְׁטָךְ: ^sl-115-1

**2** לְמָא יֵימְרוּן עַמְמַיָא אָן הַשְׁתָּא אֱלָהָהוֹן: ^sl-115-2

**3** וֵאלָהָנָא מְדוֹרֵיהּ בִּשְׁמַיָא כָּל דִי יִצְבֵי עָבֵד: ^sl-115-3

**4** טַעֲוָתְהוֹן דְכַסְפָּא וְדַהֲבָא עוֹבַד יְדוֹי בַּר נָשׁ: ^sl-115-4

**5** פּוּמָא לְהוֹן וְלָא מְמַלְלִין עַיְנִין לְהוֹן וְלָא חָמְיָן: ^sl-115-5

**6** אוּדְנִין לְהוֹן וְלָא שָׁמְעִין נְחִירֵי לְהוֹן וְלָא מְרִיחִין: ^sl-115-6

**7** יְדֵיהוֹן וְלָא מְמַשְׁמְשִׁין רִגְלְהוֹן וְלָא מְהַלְכִין לָא מְרַנְנִין בְּעִנְקְהוֹן: ^sl-115-7

**8** דִכְמָתְהוֹן יְהוֹן עוֹבָדֵיהוֹן כֹּל דִי מִתְרְחֵץ עֲלֵיהוֹן: ^sl-115-8

**9** יִשְׂרָאֵל רְחֵץ בְּמֵימְרָא דַייָ סַעְדְהוֹן וּתְרֵיסְהוֹן הוּא: ^sl-115-9

**10** דְבֵית אַהֲרֹן רְחִיצוּ בְּמֵימְרָא דַייָ סַעְדְהוֹן וּתְרֵיסְהוֹן הוּא: ^sl-115-10

**11** דַחֲלַיָא דַייָ רְחִיצוּ בְּמֵימְרָא דַייָ סַעְדְהוֹן וּתְרֵיסְהוֹן הוּא: ^sl-115-11

**12** מֵימְרָא דַייָ דְכַר יָתָנָא לְטָב יְבָרֵךְ יְבָרֵךְ יַת בֵּית יִשְׂרָאֵל יְבָרֵךְ יַת בֵּית אַהֲרֹן: ^sl-115-12

**13** יְבָרֵךְ דַחֲלַיָא דַייָ זְעִירַיָא עִם רַבְרְבַיָא: ^sl-115-13

**14** יוֹסֵף מֵימְרָא דַייָ עֲלַוֵיכוֹן עֲלַוֵיכוֹן וַעֲלַוֵי בְנֵיכוֹן: ^sl-115-14

**15** בְּרִיכִין אַתּוּן מִן קֳדָם יְיָ עָבֵד שְׁמַיָא וְאַרְעָא: ^sl-115-15

**16** שְׁמֵי שְׁמַיָא לִשְׁכִינַת יְקָרָא דַייָ וְאַרְעָא יְהַב לִבְנֵי נָשָׁא: ^sl-115-16

**17** לָא מֵתַיָא מְשַׁבְּחִין שְׁמָא דַייָ וְלָא כָּל נָחֲתֵי בֵית קְבוּרַת אַדְמָתָא: ^sl-115-17

**18** וַאֲנַחְנָא נְבָרֵךְ יָהּ מִן הַשְׁתָּא וְעַד עַלְמָא הַלְלוּיָהּ: ^sl-115-18

## Capítulo 116

**1** רְחִימֵת אֲרוּם שְׁמַע יְיָ יַת קָלִי בָּעוּתִי: ^sl-116-1

**2** אֲרוּם אַצְלֵי אוּדְנֵיהּ לִי וּבְיוֹמַי אֲנָא קָרֵי: ^sl-116-2

**3** אַקִיפוּ יָתִי מְרָעֵי מוֹתָא וְעִיקְתִין דְשֵׁיוֹל אַשְׁכְּחוּנִי עִיקְתָא וְדָבוֹנָא אֶשְׁכָּח: ^sl-116-3

**4** וּבִשְׁמָא דַייָ אֶקְרֵי בְּבָעוּ יְיָ שַׁזִיב נַפְשִׁי: ^sl-116-4

**5** חַנָנָא יְיָ וְזַכָּאָה וֵאלָהָנָא מְרַחֵם: ^sl-116-5

**6** נָטֵר שַׁרְגוּגַיָא יְיָ אִתְמַסְכְּנֵית וְלִי חֲמֵי לְמִפְרוֹק: ^sl-116-6

**7** תּוּבִי נַפְשִׁי לְבֵית מְנֻחַיְכִי אֲרוּם מֵימְרָא דַייָ גְמַל טוּבָא עֲלַיְכִי: ^sl-116-7

**8** אֲרוּם פְּצִיתָא נַפְשִׁי מִקְטוֹל יַת עַיְנִי מִן דִמְעֲתָא יַת רִגְלִי מִן לְאִדָחָיָא: ^sl-116-8

**9** אֶתְהַלֵךְ קֳדָם יְיָ בְּאַרְעַת חַיַיָא: ^sl-116-9

**10** הֵימְנֵית אֲרוּם אֲמַלֵל בִּכְנִישַׁת צַדִיקֵי אֲנָא שַׁבְּחִית לַחֲדָא: ^sl-116-10

**11** אֲנָא אֲמַרֵית בְּמֶעֱרְקִי כָּל בְּנֵי נָשָׁא מְכַדְבִין: ^sl-116-11

**12** מָה אֲתִיב קֳדָם יְיָ כָּל גְמוּלָן טָבָן דִילֵיהּ גְמִילִין חִנוּן עֲלָי: ^sl-116-12

**13** כַּסָא דְפוּרְקָנַיָא אֲסוֹבַר לְעַלְמָא דְאָתֵי וּבִשְׁמָא דַייָ אֶקְרֵי: ^sl-116-13

**14** נִדְרַי קֳדָם יְיָ אֲשַׁלֵם אֲתַנֵי כְדוֹן נִסוֹי לְכָל עַמֵיהּ: ^sl-116-14

**15** יַקִיר קֳדָם יְיָ מִיתוּתָא דְמִשְׁתַּלְחָא לַחֲסִידוֹי: ^sl-116-15

**16** בְּבָעוּ יְיָ אֲרוּם אֲנָא עַבְדָךְ אֲנָא עַבְדָךְ בַּר אַמְתָךְ שֵׁרִיתָא לְשׁוּלְשְׁלְוָתָי: ^sl-116-16

**17** לָךְ אֶדְבַּח דְבַח נִכְסְתָא וּבִשְׁמָא דַייָ אֶקְרֵי: ^sl-116-17

**18** נִדְרַי קֳדָם יְיָ אֲשַׁלֵם אֲתַנֵי כְדוּן נִסוֹי לְכָל עַמֵיהּ: ^sl-116-18

**19** בְּדָרָתָא דִי בְּבֵית מַקְדַשׁ אֱלָהָנָא בִּמְצָעַיְכִי יְרוּשְׁלֵם הַלְלוּיָהּ: ^sl-116-19

## Capítulo 117

**1** שַׁבְּחוּ יַת יְיָ כָּל עַמַיַא שַׁבַּחוּ לֵיהּ כָּל אוּמַיָא: ^sl-117-1

**2** אֲרוּם אַגְבַּר עֲלָנָא טוּבֵיהּ וְקוּשְׁטֵיהּ דַייָ לְעָלְמָא הַלְלוּיָהּ: ^sl-117-2

## Capítulo 118

**1** שַׁבַּחוּ קֳדָם יְיָ אֲרוּם טָב אֲרוּם לַעֲלַם טוּבֵיהּ: ^sl-118-1

**2** יֵימְרוּן כְדוּן יִשְׂרָאֵל אֲרוּם לַעֲלַם טוּבֵיהּ: ^sl-118-2

**3** יֵימְרוּן כְּדוּן בֵּית אַהֲרֹן אֲרוּם לַעֲלַם טוּבֵיהּ: ^sl-118-3

**4** יֵימְרוּן כְּדוּן דַחֲלַיָא דַייָ אֲרוּם לַעֲלַם טוּבֵיהּ: ^sl-118-4

**5** מִן עָקְתָא קְרֵיתִי יָהּ קַבֵּל צְלוֹתִי בְּפַתְיָא יָהּ: ^sl-118-5

**6** מֵימְרָא דַייָ בְּסַעֲדִי לָא אֶדְחַל מָא יַעְבֵּיד לִי בַּר נָשׁ: ^sl-118-6

**7** מֵימְרָא דַייָ לְמִסְעֲדָא יָתִי וַאֲנָא אֶחְמֵי פּוּרְעֲנוּתָא בְּסָנְאָי: ^sl-118-7

**8** טָב לְמִתְרְחָצָא בְּמֵימְרָא דַייָ מִן לְמִרְחָץ בְּבַר נָשׁ: ^sl-118-8

**9** טָב לְמִתְרְחָצָא בְּמֵימְרָא דַייָ מִן לְמִרְחָץ בְּרַבְרְבַיָא: ^sl-118-9

**10** כָּל עַמְמַיָא חֲזַרוּ יָתִי בְּשׁוּם מֵימְרָא דַייָ רַחֲצִית אֲרוּם אֶתְּשִׁנוּן: ^sl-118-10

**11** אַקִיפִין לִי אַף חֲזַרוּ יָתִי בְּשׁוּם מֵימְרָא דַייָ רַחֲצִית אֲרוּם אֶתְּשִׁנוּן: ^sl-118-11

**12** אַקִיפוּן לִי הֵיךְ זְבוּרְיָתָא דָלְקִין הֵיךְ אֶשְׁתָּא בְּכוּבִין בְּשׁוּם מֵימְרָא דַייָ רַחֲצֵית אֲרוּם אֶתְּשִׁנוּן: ^sl-118-12

**13** מִדְחֵי דְחִיתָא יָתִי לְמִנְפַּל וּמֵימְרָא דַייָ סַיְעַנִי: ^sl-118-13

**14** תּוּקְפִי וְתוּשְׁבַּחְתִּי דְחִיל עַל כָּל עַלְמָא יְיָ אֲמַר בְּמֵימְרֵיהּ וַהֲוָה לִי לְפָרִיק: ^sl-118-14

**15** קַל תּוּשְׁבַּחְתָּא וּפוּרְקָנָא בְּמַשְׁכְּנֵהוֹן דְצַדִיקֵי יְמִינָא דַייָ עַבְדַת חֵילָא: ^sl-118-15

**16** יְמִינָא דַייָ מְרַמְמָא יְמִינָא דַייָ עַבְדַת חֵילָא: ^sl-118-16

**17** לָא אֱמוּת אֲרוּם אֱחֵי וְאֶשְׁתָּעֵי עוֹבְדֵי אֱלָהָא: ^sl-118-17

**18** מִכְסְנָא אַכְסְנַנִי יָהּ וּלְמוֹתָא לָא מְסַר יָתִי: ^sl-118-18

**19** פְּתַחוּ לִי מַעֲלָנֵי קַרְתָּא דְצִדְקָא אֵעוֹל בְּהוֹן אֲשַׁבַּח יָהּ: ^sl-118-19

**20** דֵין מַעֲלָנָא דְבֵית מַקְדָשָׁא דַייָ צַדִיקַיָא יַעֲלוּן בֵּיהּ: ^sl-118-20

**21** אֲהוֹדֵי קֳדָמָךְ אֲרוּם קַבֵּלְתָּא צְלוֹתִי וַהֲוֵיתָא לִי לְפָרִיק: ^sl-118-21

**22** טַלְיָא שְׁבִיקוּ אַרְדִיכְלַיָא הֲוָה בְנֵי בָנַיָא דְיִשַׁי וְזַכָּאָה לְאִתְמַנָאָה לִמְלִיךְ וְשׁוּלְטָן: ^sl-118-22

**23** מִן קֳדָם יְיָ הֲוָת דָא אֲמַרוּ אַרְדִיכְלַיָא הִיא פְרִישָׁא קַדְמָנָא אֲמַרוּ בְנוֹי דְיִשָׁי: ^sl-118-23

**24** דֵין יוֹמָא עֲבַד יְיָ אֲמַרוּ אַרְדִיכְלַיָא נְדוּץ וְנֶחְדֵי בֵיהּ אֲמַרוּ בְנוֹי דְיִשָׁי: ^sl-118-24

**25** בְּבָעוּ מִנָךְ יְיָ כְּדוּן אֲמַרוּ אַרְדִיכְלַיָא בְּבָעוּ מִנָךְ יְיָ אַצְלַח כְּדוּן אֲמַרוּ יִשַׁי וְאִנְתְּתֵיהּ: ^sl-118-25

**26** בְּרִיךְ דְאָתֵי בְּשׁוּם מֵימְרָא דַייָ אֲמַרוּ אַרְדִיכְלֵי יְבָרְכוּן יַתְכוֹן מִן בֵית מַקְדָשָׁא דַייָ אֲמַר דָוִד: ^sl-118-26

**27** אֱלָהָא יְיָ אַנְהַר לָנָא אֲמַרוּ שִׁבְטַיָא דְבֵית יְהוּדָה כְּפִיתוּ טַלְיָא לְנִכְסַת חַגָא בְּשִׁלְשְׁלָוָן עַד דִי תִקְרְבוּנֵיהּ וְתִשְׁדוּן אַדְמֵיהּ בְּקַרְנַת מַדְבְּחָא אֲמַר שְׁמוּאֵל נְבִיָא: ^sl-118-27

**28** אֱלָהִי אַתְּ וְאוֹדֵי קֳדָמָךְ אֱלָהִי אֲשַׁבְּחִינָךְ אֲמַר דָוִד: ^sl-118-28

**29** מְתִיב שְׁמוּאֵל וַאֲמַר שַׁבַּחוּ כְנִשְׁתָּא דְיִשְׂרָאֵל אוֹדוּ קֳדָם יְיָ אֲרוּם טָב אֲרוּם לַעֲלַם טוּבֵיהּ: ^sl-118-29

## Capítulo 119

**1** טוּבֵיהוֹן דִשְׁלִמֵי אוֹרְחֵיהּ דִמְהַלְכִין בְּאוֹרַיְתָא דַיְיָ: ^sl-119-1

**2** טוּבֵיהוֹן דְנָטְרֵי סְהַדְוָתֵיהּ בְּכָל לִבָּא יִתְבְּעוּן אוּלְפָנֵיהּ: ^sl-119-2

**3** בְּרַם לָא עֲבַדוּ שִׁקְרָא בְּאוֹרְחָתֵיהּ תַּקְנַיָא הֲלִיכוּ: ^sl-119-3

**4** אַנְתְּ פַּקַדְתָּא פִּקוּדָךְ לְמִטַר לַחֲדָא: ^sl-119-4

**5** טָב לִי דְתַקְנָן אוֹרְחָתַי לִמְטַר גְזֵרָתָךְ: ^sl-119-5

**6** הָדֵין לָא אַבָּהֵית בְּאִסְתַּכָּלוּתִי לְכָל פִקוּדָךְ: ^sl-119-6

**7** אוֹדֵי קֳדָמָךְ בִּתְרִיצוּת לִבָּא בְּמַלְפֵי דִינֵי זַכְוָתָךְ: ^sl-119-7

**8** יַת גְזֵרָתָךְ אֶטַר לָא תִשְׁבּוֹק יָתִי עַד לַחֲדָא: ^sl-119-8

**9** בְּמָא יִדְכֵּי טַלְיָא יַת אוֹרְחָתֵיהּ לְמִטַר הֵיךְ דִבְרָיִךְ: ^sl-119-9

**10** בְּכָל לִבִּי תְּבַעֵית אוּלְפָנָךְ לָא תַשְׁלִנַנִי מִפִּקוּדָיִךְ: ^sl-119-10

**11** בְּלִבִּי אֲטִישֵׁית מֵימְרָךְ מִן בִּגְלַל דְלָא אֱחוֹב קֳדָמָךְ: ^sl-119-11

**12** בְּרִיךְ אַתְּ יְיָ אַלֵף יָתִי גְזֵרָתָךְ: ^sl-119-12

**13** בְּסִפְוָתִי אִשְׁתָּעִיתִי כָּל דִינֵי פּוּמָךְ: ^sl-119-13

**14** בְּאוֹרַח סְהִדְוָתָךְ חֲדֵיתִי כַּעֲלַוֵי כָל מַזָלָא: ^sl-119-14

**15** בְּפוּקוּדָיִךְ אֲמַלֵל וְאֶסְתַּכֵּל אוֹרְחָתָךְ: ^sl-119-15

**16** בִּגְזֵרָתָךְ אִתְפַּרְנֵק לָא אִתְנְשֵׁי דִבּוּרָיִךְ: ^sl-119-16

**17** שְׁלֵם טָב עַל עַבְדָךְ אֱחֵי וְאִטַר דִבּוּרָיִךְ: ^sl-119-17

**18** גַלֵי עֵינַי וְאִסְתַּכַּל פְּרִישָׁן מֵאוֹרַיְתָךְ: ^sl-119-18

**19** דַיָר אֲנָא בְּאַרְעָא לָא תְסַלֵק מִנִי פִּקוּדָיִךְ: ^sl-119-19

**20** רְגֵגַת נַפְשִׁי לִרְגִגְתָּא לְפִקוּדָיִךְ בְּכָל עִדָן: ^sl-119-20

**21** נְזַפְתָּא זְדוֹנִין לִיטִין דְאִשְׁתְּלִיוּ מִפִּקוּדָיִךְ: ^sl-119-21

**22** אַעְדֵי מֵעֲלָי קְלָנָא וּבוּזְתָא אֲרוּם סָהִדְוָתָךְ נָטְרֵית: ^sl-119-22

**23** אֲרוּם יָתְבִין רַבְרְבִין מִנִי מְמַלְלִין עַבְדָךְ עָסֵק בְּאַחֲוָיַת גְזֵרָתָךְ: ^sl-119-23

**24** לְחוֹד סָהִדְוָתָךְ פַּרְנוּקִי מָרֵי עֲצָתִי: ^sl-119-24

**25** אִדְבַּקַת לְעַפְרָא נַפְשִׁי אַסֵי יָתִי כְּדִבְרָיִךְ: ^sl-119-25

**26** אוֹרְחִי מַנִיתִי וְקַבֵּלְתָּא צְלוֹתִי אַלֵף יָתִי גְזֵרָתָךְ: ^sl-119-26

**27** אוֹרַח פִּקוּדָיִךְ תְּבַיְנֵנִי וַאֲמַלֵל בִּפְרִישְׁוָתָךְ: ^sl-119-27

**28** אַגְמַת נַפְשִׁי מִדָבוֹנָא קַיֵם יָתִי כְּדִבְרָיִךְ: ^sl-119-28

**29** אוֹרַח דְשִׁקְרָא אַעְדֵי מִנִי וְאוֹרַיְתָךְ חַיִס לִי: ^sl-119-29

**30** אוֹרַח הֵימָנוּתָא בְּחָרִית דִינָיִךְ שַׁוְיֵת: ^sl-119-30

**31** אִדְבַּקֵית בְּסָהִדְוָתָךְ יְיָ לָא תְבַהֲתִנַנִי: ^sl-119-31

**32** אוֹרַח פִּקוּדָיִךְ אֶרְהוֹט אֲרוּם תָּפְתֵּי לִבִּי: ^sl-119-32

**33** אַלֵף יָתִי יְיָ אוֹרַח גְזֵרָתָךְ וְאֶנְטְרִינָהּ עַד גְמִירָא: ^sl-119-33

**34** תְּבַיְנַנִי וְאֶנְטוֹר אוֹרַיְתָךְ יְיָ וְאֶנְטְרִינָהּ בְּכָל לִבָּא: ^sl-119-34

**35** תַּדְרְכִנַנִי בִּשְׁבִיל פִּקוּדָיִךְ אֲרוּם בֵּיהּ צָבִיתִי: ^sl-119-35

**36** אַצְלֵי לִבִּי לְסָהִדְוָתָךְ וְלָא לְוַת מָמוֹנָא: ^sl-119-36

**37** אַעֲבֵר עֵינַי מִלְמֶחֱמֵי שִׁקְרָא בְּדִבְרָיִךְ אַסֵי יָתִי: ^sl-119-37

**38** אֲקֵים לְעַבְדָךְ מֵימְרָךְ דִי לִדְחַלְתָּךְ: ^sl-119-38

**39** אַעֲבֵר חִסוּדִי דִי דְחִילַת אֲרוּם דִינָיִךְ תָּבִין: ^sl-119-39

**40** הָא רַגְגֵית לְפִקוּדָיִךְ בְּצִדְקָתָךְ אַסִי יָתִי: ^sl-119-40

**41** וְיֵיתוּן עֲלַי חַסְדָיִךְ יְיָ פּוּרְקָנָךְ הֵיךְ מֵימְרָךְ: ^sl-119-41

**42** וַאֲתֵיב מְחַסְדִי פִּתְגָם אֲרוּם סַבְּרֵית בְּדִבְרָיִךְ: ^sl-119-42

**43** וְלָא תְסַלֵק מִפּוּמִי פִּתְגָם דִקְשׁוֹט עַד לַחֲדָא אֲרוּם לְדִינָךְ אוֹרְכִית: ^sl-119-43

**44** וְאֶטוֹר אוֹרַיְתָךְ תְּדִירָא לְעָלְמֵי עַלְמִין: ^sl-119-44

**45** וָאְֱהָךְ בִּפְתִיוּת אוֹרַיְתָךְ אֲרוּם פִּקוּדָיִךְ תְּבַעֵית: ^sl-119-45

**46** וַאֲמַלֵל בְּסָהִדְוָתָךְ קֳבֵל מַלְכַיָא וְלָא אֶבַהֵית: ^sl-119-46

**47** וְאֶתְפַּרְנֵק בְּפִקוּדָיִךְ דִי רְחִימַת: ^sl-119-47

**48** וְאֶזְקוֹף יְדַי לְפִקוּדָיִךְ דִרְחִימַת וַאֲמַלֵל בִּגְזֵרָתָךְ: ^sl-119-48

**49** אִדְכַּר פִּתְגָמָא לְעַבְדָךְ דִי אוֹרַכְתַּנִי: ^sl-119-49

**50** דָא הִיא תַנְחוּמְתִי בְּסָגוּפִי אֲרוּם מֵימְרָךְ קַיֵים יָתִי: ^sl-119-50

**51** זְדוֹנִין מְמִיקְנִין לִי עַד לַחֲדָא מְאוֹרַיְתָךְ לָא אַצְלֵיתִי: ^sl-119-51

**52** אִדַכְּרִית דִינָיִךְ מִן עַלְמָא יְיָ וְאֶתְנְחָמֵית: ^sl-119-52

**53** רְתִיתָא אַחִידַת יָתִי מֵרַשִׁיעֵי דְשָׁבְקִין אוֹרַיְתָךְ: ^sl-119-53

**54** תּוּשְׁבְּחָן הֲווּ לִי גְזֵרָתָךְ בְּבֵית מְדוֹרִי: ^sl-119-54

**55** אִדַכְּרִית בְּלֵילְיָא שְׁמָךְ יְיָ וּנְטַרֵית אוֹרַיְתָךְ: ^sl-119-55

**56** דָא הֲוָת לִי לִזְכוּתָא אֲרוּם פִּקוּדָיךְ נְטַרֵית: ^sl-119-56

**57** חוּלָקִי יְיָ אֲמַרֵית לְמִטַר דְבָרָיִךְ: ^sl-119-57

**58** צַלֵיתִי קֳדָמָךְ בְּכָל לִבָּא חוּס עֲלַי הֵיךְ מֵימְרָךְ: ^sl-119-58

**59** חֲשִׁיבֵית לְאוֹטָבָא אוֹרְחָי וַאֲתֵיב רִגְלַי לְסָהִדְוָתָךְ: ^sl-119-59

**60** זַרְזֵית וְלָא אִתְעַכְּבֵית לְמִטַר פִּקוּדָיִךְ: ^sl-119-60

**61** סִיעַת רַשִׁיעַיָא אִתְכַּנָשׁוּ עֲלָי אוֹרַיְתָךְ לָא אִתְנְשֵׁיתִי: ^sl-119-61

**62** בְּפַלְגוּת לֵילְיָא אֲקוּם לְשַׁבָּחָא קֳדָמָךְ מְטוּל דִינִי צִדְקָךְ: ^sl-119-62

**63** חַבְרָא אֲנָא לְכָל דְדָחֲלִין מִנָךְ וּלְנָטְרֵי פִּקוּדָיִךְ: ^sl-119-63

**64** טוּבָךְ יְיָ מַלְיָא אַרְעָא גְזֵרָתָךְ אַלֵף יָתִי: ^sl-119-64

**65** טָבָא עֲבַדְתָּא עִם עַבְדָךְ יְיָ הֵיךְ דִבּוּרָךְ: ^sl-119-65

**66** שַׁפִּיר טַעַם וּמַנְדְעָא אַלֵף יָתִי אֲרוּם בְּפִקוּדָיִךְ הֵימְנֵית: ^sl-119-66

**67** עַד לָא אִסְתְּגִיף אֲנָא שָׁלֵי וּכְדוּן מֵימְרָךְ נְטַרֵית: ^sl-119-67

**68** טָב אַתְּ וּמֵטִיב אַלֵיף יָתִי גְזֵרָתָךְ: ^sl-119-68

**69** חַבַּרוּ עֲלַי שִׁקְרָא זֵידוֹנִין אֲנָא בְּכָל לִבָּא אֶטוֹר פִּקוּדָיִךְ: ^sl-119-69

**70** אִטַפֵּשׁ הֵיךְ תְּרַב יִצְרָא דְלִבְּהוֹן אֲנָא אוֹרַיְתָךְ פַּרְנוּקִי: ^sl-119-70

**71** טָב לִי אֲרוּם אִתְעַנְיֵית מִן בִּגְלַל דְאֵילַף גְזֵרָתָךְ: ^sl-119-71

**72** טָב לִי אוֹרָיַת פּוּמָךְ מִן אֲלַף כִּכְּרִין דְהַב וְסִימָא: ^sl-119-72

**73** אַיְדָךְ עֲבַדוּ יָתִי וְאַתְקִינוּ יָתִי תְּבַיְנֵנִי וְאֵילִיף פִּקוּדָיִךְ: ^sl-119-73

**74** דָחֲלָיִךְ יֶחְמוּן יָתִי וְיֶחְדוּן אֲרוּם לִפְגָמָךְ אוֹרִיכֵית: ^sl-119-74

**75** יְדַעֵית יְיָ אֲרוּם זַכָּאִין דִינָיִךְ וּבְקוּשְׁטָא סַגֵפְתָּנִי: ^sl-119-75

**76** יְהֵי כְדוּן חַסְדָךְ לְנַחֲמוּתִי הֵיךְ מֵימְרָךְ לְעַבְדָךְ: ^sl-119-76

**77** יֵיתוּן עֲלַי רַחֲמָךְ וֶאֱחֵי אֲרוּם אוֹרַיְתָךְ פַּרְנוּקָי: ^sl-119-77

**78** יִבָּהֲתוּן זְדוֹנִין אֲרוּם עַל שִׁקְרָא עַוִיתוּ יָתִי אֲנָא אֲמַלֵל בְּפִקוּדָיִךְ: ^sl-119-78

**79** יְתוּבוּן לְאוּלְפָנִי דָחֲלָיִךְ וְיָדְעִין סְהִדְוָתָךְ: ^sl-119-79

**80** יְהֵי לִבִּי דְלָא מוּם בִּגְזֵרָתָךְ מִן בִּגְלַל דְלָא אֲבָהֵת: ^sl-119-80

**81** רְגִיגַת לְפוּרְקָנָךְ נַפְשִׁי לְפִתְגָמָךְ אוֹרִיכֵית: ^sl-119-81

**82** סָפוּ עַיְנַי לְמֵימְרָךְ לְמֵימַר אֵימָתַי תְּנַחֵם יָתִי: ^sl-119-82

**83** אֲרוּם הֲוֵיתִי הֵיךְ זַרְנוּקָא דְתָלֵי בְּקִטְרָא גְזֵרָתָךְ לָא אִתְנְשֵׁיתִי: ^sl-119-83

**84** כְּמָה יוֹמֵי עַבְדָךְ אֵימָתַי תַּעְבֵיד בְּרוֹדְפַי דִינָא: ^sl-119-84

**85** כָּרוּ לִי זְדוֹנִין שׁוּחָן דְלָא פַּקֵדְתִּנוּן בְּאוֹרַיְתָךְ: ^sl-119-85

**86** כָּל פִּקוּדָיִךְ קוּשְׁטָא עַל שִׁקְרָא רְדַפוּ יָתִי סַעֲדֵנִי: ^sl-119-86

**87** כִּזְעֵיר שֵׁצִיאוּ יָתִי בְּאַרְעָא וַאֲנָא לָא שַׁבְקֵית פִּקוּדָיִךְ: ^sl-119-87

**88** הֵיךְ חִסְדָךְ קַיֵם יָתִי וְאֶטוֹר סַהֲדוּת פּוּמָךְ: ^sl-119-88

**89** לְעַלְמָא יְיָ פִּתְגָמָךְ קַיָם בִּשְׁמַיָא: ^sl-119-89

**90** לְדָר וְדָר הֵימָנוּתָךְ אַתְקֵנְתָּא אַרְעָא וְקַיָמָא: ^sl-119-90

**91** לְדִינָיִךְ קָמוּ יוֹמָנָא אֲרוּם כּוּלְהוֹן עַבְדָךְ: ^sl-119-91

**92** אִלוּלֵי אוֹרַיְתָךְ פִּרְנוּקֵי הֵידֵין אוֹבְדֵית בְּסִגוּפִי: ^sl-119-92

**93** לַעֲלַם לָא אִתְנְשֵׁי פִּקוּדָיִךְ אֲרוּם בְּהוֹן קַיֵמְתָּנִי: ^sl-119-93

**94** דִי לָךְ אֲנָא פְּרוֹק יָתִי אֲרוּם פִּקוּדָיִךְ תְּבַעֵית: ^sl-119-94

**95** לְוָתִי אַמְתִּינוּ רַשִׁיעַיָא לְהוֹבָדָא יָתִי סָהִדְוָתָךְ אִתְבַּיָן: ^sl-119-95

**96** לְכָל מַה דְאִשְׁתַּדַל וְאִשְׂתַּכֵּל חֲמֵיתִי סֵיפָא פַּתְיָא תַּפְקֵדְתָּךְ לַחֲדָא: ^sl-119-96

**97** מָה רְחִימֵית אוֹרַיְתָךְ כָּל יוֹמָא הִיא שׁוּתִי: ^sl-119-97

**98** יַתִּיר מִבַּעֲלֵי דְבָבַי מְחַכְּמָא יָתִי פִּקוּדָיִךְ אֲרוּם לַעֲלַם הִיא פִּקוּדָיִךְ אֲרוּם לַעֲלַם הִיא דִילִי: ^sl-119-98

**99** מִכָּל מְאַלְפַי אַסְכְּלֵית אֲרוּם סָהִדְוָתָךְ שׁוּתָא לִי: ^sl-119-99

**100** מִן חֲכִּימַיָא אֶתְבַּיֵן אֲרוּם פִּקוּדָיִךְ נַטְרֵית: ^sl-119-100

**101** מִכָּל אוֹרַח בִּישָׁא מַנְעֵית רִגְלָי מִן בִּגְלַל אֶטוֹר דִבְרָיִךְ: ^sl-119-101

**102** מִן דִינָיִךְ לָא עֲדֵית אֲרוּם אַתְּ אַלֵפְתָּנִי: ^sl-119-102

**103** מַה חַלְיָן לְמוֹרִיגִי מֵימְרָךְ בַּסִימָן יַתִּיר מִן דוּבְשָׁא לְפוּמִי: ^sl-119-103

**104** מִפִּקוּדָיִךְ אֶתְבַּיָן מְטוּל הֵיכְנָא סְגֵיתִי כָּל בַּר נָשׁ דִמְשַׁקֵר: ^sl-119-104

**105** הֵיךְ שְׁרָגָא דִי מִנְהֲרָא לְרִגְלָי דִבְרָיִךְ וּנְהוֹרָא לְכִבְשִׁי: ^sl-119-105

**106** אוֹמֵיתִי וְקַיְמֵית לְמִטַר פִּקוּדֵי זַכְוָתָךְ: ^sl-119-106

**107** אִסְתַּגְפֵית עַד לַחֲדָא יְיָ אַסֵי יָתִי הֵיךְ דִבְרָךְ: ^sl-119-107

**108** נִכְסְתָא דְפוּמִי אִתְרְעֵי כְּדוּן יְיָ וְדִינָךְ אַלֵף יָתִי: ^sl-119-108

**109** נַפְשִׁי מִסְתַּכְּנָא עַל גַב יְדִי תְּדִירָא וְאוֹרַיְתָךְ לָא אִתְנְשֵׁיתִי: ^sl-119-109

**110** סַדַרוּ רַשִׁיעַיָא פָחָא לִי וּמִפִּקוּדָיִךְ לָא תְעִיתִי: ^sl-119-110

**111** אַחְסְנֵית סָהִדְוָתָךְ לַעֲלַם אֲרוּם חֶדְוַת לִבִּי הִנוּן: ^sl-119-111

**112** אַצְלֵית לִבִּי לְמֶעְבַּד גְזֵרָתָךְ לַעֲלַם עַד סוֹפָא: ^sl-119-112

**113** דְחָשְׁבִין מַחְשְׁבָן סְרִיקִין סְנֵיתִי וְאוֹרַיְתָךְ רְחִימֵית: ^sl-119-113

**114** טוּמְרִי וּתְרֵיסִי אַתְּ לְפִתְגָמָךְ אוֹרְכֵית: ^sl-119-114

**115** זוֹרוּ מִנִי מַבְאֲשִׁין וְאֶטוֹר פִּקוּדֵי אֱלָהָי: ^sl-119-115

**116** סְמוֹף יָתִי בְּמֵימְרָךְ וְאֵחֵי וְלָא תְבַהֵת יָתִי מִן כִּלְיוּתִי: ^sl-119-116

**117** סְעוֹד יָתִי וְאֶתְפְּרֵק וַאֲגַעְגֵעַ בְּאוֹרַיְתָךְ תְּדִירָא: ^sl-119-117

**118** כְּבַשְׁתָּא כָּל דְשָׁלִין מִגְזָרָתָךְ אֲרוּם שִׁקְרָא נִכְלְהוֹן: ^sl-119-118

**119** סוּלַיָא פְסַקְתָּא בְטֵלְתָּא כָּל רַשִׁיעֵי אַרְעָא מְטוּל הֵיכְנָא רְחִימֵית סָהִדְוָתָךְ: ^sl-119-119

**120** מְצַלְהַב מִדַחֲלָךְ בִּסְרִי וּמִדִינָיִךְ דְחֵלִית: ^sl-119-120

**121** עַבְדֵית דִינָא וְצִדְקְתָא לָא תִשְׁבְּקִנַנִי לִטְלוֹמָי: ^sl-119-121

**122** בַּסֵים עַבְדָךְ לְטָבָא לָא יִטְלְמוּן יָתִי זֵידוֹנִין: ^sl-119-122

**123** עֵינַי סַבַּרוּ לְפוּרְקָנָךְ וּלְמֵימַר צִדְקָךְ: ^sl-119-123

**124** עֲבֵד עִם עַבְדָךְ הֵיךְ חִסְדָךְ וּגְזֵרָתָךְ אַלֵף יָתִי: ^sl-119-124

**125** עַבְדָךְ אֲנָא תְבַיֵן יָתִי וְאֵידַע סָהִדְוָתָךְ: ^sl-119-125

**126** עִידַן לְמֶעְבַּד רְעוּתָא דַייָ אַפִּיסוּ תַלְמִדַיָא אוֹרַיְתָךְ: ^sl-119-126

**127** מְטוּל הֵיכְנָא רְחִימֵת פִּקוּדָיִךְ מִדַהֲבָא וּמִן אוֹבְרִיזָא: ^sl-119-127

**128** מְטוּל הֵיכְנָא כָּל פִּקוּדַיָא כוּלְהוֹן תְּרָצְתִּנוּן כָּל אוֹרַח שִׁקְרָא סְנֵיתִי: ^sl-119-128

**129** פְּרִישָׁן סָהִדְוָתָךְ מְטוּל הֵיכְנָא נְטַרְתִּנוּן נַפְשִׁי: ^sl-119-129

**130** גְלֵיף דִבְרָיִךְ יַנְהַר חֲשִׁיכַיָא יִתְבַּיֵן שַׁרְגִיגַי: ^sl-119-130

**131** פּוּמִי פְּתַחֵית וְאָלְפֵית אֲרוּם לְפִקוּדָיִךְ צְבֵיתִי: ^sl-119-131

**132** אִיתְפְּנֵי לְוָתִי וְחוּס עֲלַי כְּהִלְכְתָא לִרְחִימֵי שְׁמָךְ: ^sl-119-132

**133** אִסְתַּוְרֵי אַתְקֵין בְּמֵימְרָךְ וְלָא תַשְׁלֵיט בִּי כָּל שְׁקָר: ^sl-119-133

**134** פְּרוֹק יָתִי מִטְלוּמָא דְבַר נָשָׁא וְאֶטוֹר פִּקוּדָיִךְ: ^sl-119-134

**135** זִיו אַפָּךְ אַנְהַר בְּעַבְדָךְ וְאַלֵפְנִי יַת גְזֵרָתָךְ: ^sl-119-135

**136** טְיָפֵי מַיָא יִחַתוּן עֵינַי עַל מְטוּל דְלָא נְטַרוּ אוֹרַיְתָךְ: ^sl-119-136

**137** זַכַּי אַתְּ יְיָ וּתְרִיצִין דִינָךְ: ^sl-119-137

**138** פַּקֵדְתָּא צִדְקְתָא דְסָהִדְוָתָךְ וְהֵימְנוּתָא לַחֲדָא: ^sl-119-138

**139** מַגְרַת יָתִי טִנְנָתִי אֲרוּם אִתְנְשִׁיאוּ דִבְרָיִךְ מְעִיקָי: ^sl-119-139

**140** סְנִינָא מֵימְרָךְ לַחֲדָא וְעַבְדָךְ רָחֲמָהּ: ^sl-119-140

**141** זוּטַר אֲנָא וּבַסִיר פִּקוּדָיִךְ לָא אִתְנְשֵׁיתִי: ^sl-119-141

**142** צִדְקְתָךְ צִדְקָא לְעָלְמָא וְאוֹרַיְתָךְ קְשׁוֹט: ^sl-119-142

**143** עָקָא מְעִיקָא עֲרַעוּ יָתִי פִּקוּדָיִךְ פִּרְנוּקָי: ^sl-119-143

**144** צִדְקְתָא דְסָהִדְוָתָךְ לַעֲלַם תְּבַיְנֵנִי וְאֶתְקַיֵם: ^sl-119-144

**145** קְרֵיתִי בְּכָל לִבָּא עֲנֵי יָתִי יְיָ גְזֵרָתָךְ אֶנְטוֹר סָהִדְוָתָךְ: ^sl-119-145

**146** קְרִיתִיךְ פְּרוֹק יָתִי וְאֶנְטֹר סָהִדְוָתָךְ: ^sl-119-146

**147** אַקְדִימִית בִּשְׁפַרְפְּרָא וְצַלֵיתִי לְפִתְגָמָךְ אוֹרְכֵית: ^sl-119-147

**148** אַקְדִימוּ עֵינַי מְטַרְתָּא דִצְפַר וּרְמַשׁ לְמַלָלָא בְּמֵימְרָךְ: ^sl-119-148

**149** קָלִי שְׁמַע הֵיךְ חִסְדָךְ יְיָ הֵיךְ דִינָךְ קַיֵם יָתִי: ^sl-119-149

**150** קָרִיבוּ רָדְפֵי זְנוּ מְאוֹרַיְתָךְ אִתְרָחֲקוּ: ^sl-119-150

**151** קָרֵיב אַתְּ יְיָ וְכָל פִּקוּדָיךְ קְשׁוֹט: ^sl-119-151

**152** מִן לְקַדְמִין חַכִּימֵית מִן סָהִדְוָתָךְ אֲרוּם לַעֲלַם יְסַדְתִּינוּן: ^sl-119-152

**153** חֲמֵי סִגוּפִי וּפְצֵי יָתִי אֲרוּם אוֹרַיְתָךְ לָא אִתְנְשֵׁיתִי: ^sl-119-153

**154** נְצֵי מַצוּתִי וּפְרוֹק יָתִי לְמֵימְרָךְ אַסֵי יָתִי: ^sl-119-154

**155** רָחִיק מִן רַשִׁיעֵי פּוּרְקָנָא אֲרוּם גְזֵרָתָךְ לָא תְבַעוּ: ^sl-119-155

**156** רַחֲמָךְ סַגִיעִין יְיָ הֵיךְ דִינָיִךְ אַסֵי יָתִי: ^sl-119-156

**157** סַגִיעִין רַדְפָי וּמְעִיקָי מִסָהִדְוָתָךְ לָא אַצְלֵיתִי: ^sl-119-157

**158** חֲמֵיתִי בָזוֹזֵי וְאִדַיְנֵית עִמְהוֹן דִי מֵימְרָךְ לָא נְטָרוּ: ^sl-119-158

**159** חֲמֵי אֲרוּם פִּקוּדָיִךְ רְחִימֵית יְיָ הֵיךְ חִסְדָךְ אַסֵי יָתִי: ^sl-119-159

**160** שֵׁירוּי פִתְגָמָךְ קְשׁוֹט וּלְעַלַם כָּל דִינֵי צִדְקְתָךְ: ^sl-119-160

**161** רַבְרְבִין רְדַפוּ יָתִי מַגָן וּמִפִּתְגָמָךְ דְלַח לְבִּי: ^sl-119-161

**162** חֲדֵי אֲנָא עַל מֵימְרָךְ הֵיךְ גְבַר דְמַשְׁכַּח עֲדִי סַגִי: ^sl-119-162

**163** שִׁקְרָא סְנֵיתִי וּרְחֵיקִית אוֹרַיְתָךְ רְחִימֵית: ^sl-119-163

**164** שְׁבַע זִמְנִין בְּיוֹמָא שַׁבְּחֵית יָתָךְ מְטוּל דִינֵי צִדְקָךְ: ^sl-119-164

**165** שְׁלָם סַגִי לְרַחֲמֵי אוֹרַיְתָךְ בְּעַלְמָא הָדֵין וְלֵית לְהוֹן תַּקְלָא לְעַלְמָא דְאָתֵי: ^sl-119-165

**166** סַבְּרֵית לְפוּרְקָנָךְ יְיָ וּפִקוּדָיִךְ עַבְדֵית: ^sl-119-166

**167** נְטַרַת נַפְשִׁי סָהִדְוָתָךְ וְרַחֲמִינוּן לַחֲדָא: ^sl-119-167

**168** נַטְרֵית פִּקוּדָיִךְ וְסָהִדְוָתָךְ אֲרוּם כָּל אוֹרְחָתִי לְקִבְלָךְ: ^sl-119-168

**169** תִּתְקְרֵב צְלוֹתִי קֳדָמָךְ יְיָ הֵיךְ פִּתְגָמָךְ תְּבַיְנִנַנִי: ^sl-119-169

**170** תֵּיתֵי צְלוֹתִי קֳדָמָךְ הֵיךְ מֵימְרָךְ פְּצֵי יָתִי: ^sl-119-170

**171** תְּבַעְיָן סִפְוָתִי תּוּשְׁבַּחְתָּא אֲרוּם תַּלְפִנַנִי גְזֵירָתָךְ: ^sl-119-171

**172** תְּתֵיב לִישָׁנִי מֵימְרָךְ אֲרוּם כָּל דִינָיִךְ צִדְקְתָא: ^sl-119-172

**173** תְּהֵא יְדָךְ לְסַיָעוּתִי אֲרוּם פִּקוּדָיִךְ רְעֵיתִי: ^sl-119-173

**174** רַגְגֵית לְפוּרְקָנָךְ יְיָ וְאוֹרַיְתָךְ פַּרְנוּקָי: ^sl-119-174

**175** תְּחֵי נַפְשִׁי וּתְשַׁבְּחִינָךְ וְדִינָךְ יְסַיְעוּנִי: ^sl-119-175

**176** טְעִיתִי הֵיךְ עָאן דְמִתְבַּד בְּעֵי עַבְדָךְ אֲרוּם פִּקוּדָיִךְ לָא אִתְנְשֵׁיתִי: ^sl-119-176

## Capítulo 120

**1** שִׁירָא דְאִתְאַמַר עַל מַסוּקִין דִתְהוֹמָא קֳדָם יְיָ כַּד עַיִקִ לִי צְלֵיתִי וְקַבֵּל צְלוֹתִי: ^sl-120-1

**2** יְיָ פְּצֵי נַפְשִי מִסְפְוָתָא דְשִׁקְרָא מִן לִישָׁנָא נְכִילְתָּא: ^sl-120-2

**3** מָא יְהֵיב לָךְ מַלְשִׁינָא וּמָא יוֹסִיף לָךְ אָכִיל קוּרְצִי לִישָׁנָא נְכִילְתָא: ^sl-120-3

**4** גִרְרִין דְגִבָּרָא שְׁנוּנִין הֵיךְ בַּרְקִין מִלְעֵיל עִם גוּמְרֵי רִתְמִין דְדָלְקִין בִּגְהִנָם מִלְרַע: ^sl-120-4

**5** וַי לִי אַרוּם אִתּוֹתְבִית עִם אוֹסָאֵי שְׁרֵית עִם מַשְׁכְּנֵיהוֹן דַעֲרָבָאֵי: ^sl-120-5

**6** יַתִּיר מִנְהוֹן שְׁרָת נַפְשִׁי עִם אֱדוֹם סָנֵי שְׁלָם: ^sl-120-6

**7** אֲנָא שְׁלָם וַאֲרוּם אֲצַלֵי הִנוּן לִקְרָבָא: ^sl-120-7

## Capítulo 121

**1** שִׁירָא דְאִתְאַמֵר עַל מַסוּקִין דִתְהוֹמָא אֶזְקוֹף עֵינַי לְטוּרַיָא מִן הָאן יֵיתֵי סַעֲדִי: ^sl-121-1

**2** סַעֲדִי מִן קֳדָם יְיָ דַעֲבַד שְׁמַיָא וְאַרְעָא: ^sl-121-2

**3** לָא יִתֵּן לְאִתְמוֹטָטָא רִגְלָךְ לָא נָיֵם נָטְרָךְ: ^sl-121-3

**4** הָא לָא נָיֵם וְלָא יִדְמוּךְ נָטַר יִשְׂרָאֵל: ^sl-121-4

**5** יְיָ יִנְטְרִנָךְ יְיָ יְטַלֵל עֲלָךְ עַל סְטַר יְמִינָךְ: ^sl-121-5

**6** יֵימָם כַּד שְׁלִיט שִׁמְשָׁא לָא יִמְחוּנָךְ צַפְרִירֵי וְלֵילֵי כַּד שַׁלִיט סִיהֲרָא בְּלֵילְיָא: ^sl-121-6

**7** מֵימְרָא דַייָ יִנְטְרִנָךְ מִכָּל בִּישׁ יִנְטוֹר יַת נַפְשָׁךְ: ^sl-121-7

**8** יְיָ יִנְטוֹר מַפְקָךְ לִפְרַגְמַטְיָא וּמַעֲלָךְ לְמֶעֱסַק בְּאוֹרַיְתָא מִן הַשְׁתָּא וְעַד עַלְמָא: ^sl-121-8

## Capítulo 122

**1** שִׁירָא דְאִתְאֲמַר עַל מַסוּקִין דִתְהוֹמָא חֲדֵיתִי בְּאָמְרִין לִי בֵּית מַקְדְשָׁא דַייָ נֵיזֵיל: ^sl-122-1

**2** קָיְמִין הֲוָאָה רִגְלָנָא בְּתַרְעַיִךְ יְרוּשְׁלֵם: ^sl-122-2

**3** יְרוּשְׁלֵם דְמִתְבַּנְיָא בִּרְקִיעָא הֵיךְ קַרְתָּא לְאִתְחַבָּרָא לָהּ כַּחֲדָא בְּאַרְעָא: ^sl-122-3

**4** דְתַמָן סְלִיקוּ שִׁבְטַיָא שִׁבְטִין דַייָ מַסְהִיד לְיִשְׂרָאֵל דִי שְׁכִינְתֵּיהּ שָׁרְיָא בֵינֵיהוֹן בְּמֵיזְלֵיהוֹן לְאוֹדָאָה לִשְׁמָא דַיָי: ^sl-122-4

**5** אֲרוּם תַּמָן מִתְיַתְבִין כּוּרְסְוָן בִּירוּשְׁלֶם כּוּרְסְוָן בְּבֵית מַקְדְשָׁא לְמַלְכַיָא דְבֵית דָוִד: ^sl-122-5

**6** שְׁאִילוּ בִּשְׁלָמָא דִירוּשְׁלֶם יֵתְבוּן בְּשַׁלְוָתָא רְחִימָיִךְ: ^sl-122-6

**7** יְהֵי שְׁלָם בְּחֵילֵיךְ שַׁלְוָתָא בְּבִרְנְיָתֵךְ: ^sl-122-7

**8** מִן בִּגְלַל אַחַי וְחַבְרֵי אֲמַלֵל כְּדוּן שְׁלָם בָּךְ: ^sl-122-8

**9** מְטוּל בֵּית מַקְדַשׁ דַייָ אֱלָהָנָא אֶתְבַּע לְאוֹטָבָא לָךְ: ^sl-122-9

## Capítulo 123

**1** שִׁירָא דְאִתְאַמַר עַל מְסוּקִין דִתְהוֹמָא קֳדָמָךְ זְקַפֵית יַת עֵינַי דְיָתֵיב עַל כּוּרְסֵי יְקָרָא בִשְׁמַיָא: ^sl-123-1

**2** הָא כְמָא דְמוֹדִיקָן עַיְנֵי עַבְדִין מִיָדַיָא דְרִבּוֹנֵיהוֹן וְהֵיכְמָא דְמוֹדִיקָן עַיְנֵי אַמְתָא מִיָדַיָא דְרִבּוֹנְתָּהָא הֵכְדֵין מְדִיקָן עֵינָנָא קֳדָם יְיָ אֱלָהָנָא עַד דִי יָחוּס עֲלָנָא: ^sl-123-2

**3** חוּס עֲלָנָא יְיָ חוּס עֲלָנָא אֲרוּם סַגִי שְׂבַעֲנָא בְּסֵירוּתָא: ^sl-123-3

**4** סוּגְעָת שַׂבְעַת לָהּ נַפְשָׁנָא תַלְעוּבָא דְשָׁלְוִין מְבַסְרָנַיָא וְגֵיוְתָנַיָא: ^sl-123-4

## Capítulo 124

**1** שִׁירָא דְאִתְאֲמַר עַל מַסוּקִין דִתְהוֹמָא עַל יַד דָוִד אֱלוּלֵי יְיָ דַהֲוָה בְסַעְדָנָא יֵימְרוּן כְּדוּן יִשְׂרָאֵל: ^sl-124-1

**2** אֱלוּלֵי מֵימְרָא דַייָ דַהֲוָה בְּסַעֲדָנָא כַּד קָם עֲלָנָא בַּר נָשׁ: ^sl-124-2

**3** הָא בְכֵן כַּד חַיִין בְּלַעוּ יָתָנָא כַּד תַּקִיף רוּגְזֵהוֹן בָּנָא: ^sl-124-3

**4** הָא בְּכֵן מַיָא שְׁטַפוּ יָתָנָא מַרְעִית עָבְרָא עַל נַפְשָׁנָא: ^sl-124-4

**5** הָא בְּכֵן עָבַר עַל נַפְשָׁנָא מַלְכָּא דִמְתִיל לְמוֹי זֵידוֹנַיָא דְיַמָא: ^sl-124-5

**6** בְּרִיךְ שְׁמָא דַייָ דְלָא מַסְרָנָא הֵיךְ תְּבִירָא לְשִׁנֵיהוֹן: ^sl-124-6

**7** נַפְשָׁנָא הֵיךְ כְּצִפְּרָא אִשְׁתֵּיזְבֵת מִפַּחֵי תַקְלַיָא פָחָא אִתְּבַר וַאֲנָן אִשְׁתְּזָבְנָא: ^sl-124-7

**8** סַעֲדָנָא בְּשׁוּם מֵימְרָא דַייָ דַעֲבַד שְׁמַיָא וְאַרְעָא: ^sl-124-8

## Capítulo 125

**1** שִׁירָא דְאִתְאֲמַר עַל מַסוּקִין דִתְהוֹמָא צַדִיקַיָא דְמִתְרַחֲצִין בְּמֵימְרָא דַייָ הֵיךְ טוּרָא דְצִיוֹן לָא יִזְדַעְזַע לַעֲלַם יִתְיְתֵב: ^sl-125-1

**2** יְרוּשְׁלֶם טוּרַיָא חֲזוֹר חֲזוֹר דִי לָהּ וּמֵימְרָא דַייָ חֲזוֹר חֲזוֹר לְעַמֵיהּ מִן הַשְׁתָּא וְעַד עָלְמָא: ^sl-125-2

**3** אֲרוּם לָא יָנוּחַ שֵׁבֶט רִשְׁעָא עַל פִּצְתָּא דְצַדִיקַיָא מִן בִּגְלַל דְלָא יוֹשִׁיטוּן צַדִיקַיָא בְּשִׁקְרָא אַיְדֵיהוֹן: ^sl-125-3

**4** אוֹטֵיב יְיָ לְטָבִין וְלִתְרִיצִין בְּלִבְּבֵהוֹן: ^sl-125-4

**5** וּדְסָטְיָן בָּתַר עוּקְמָנוּתְהוֹן יוֹלִיכִנוּן בִּגְהִנָם חוּלָקְהוֹן עִם עָבְדֵי שְׁקָר שְׁלָמָא עַל יִשְׂרָאֵל: ^sl-125-5

## Capítulo 126

**1** שִׁירָא דְאִתְאַמַר עַל מַסוּקִין דִתְהוֹמָא כַּד יְתוּב יְיָ יַת גַלְוָת צִיוֹן הֲוֵינָא הֵיךְ מַרְעַיָא דְאִתַּסְיָן: ^sl-126-1

**2** הֵיכְדֵין יִתְמְלֵי פוּמָנָא חוֹכָא וְלִישָׁנָנָא תּוּשְׁבְּחָא הֵידֵין יֵימְרוּן בְּעַמַיָא אַסְגֵי יְיָ לְמֶעְבַּד טָבָא עִם אִלֵין: ^sl-126-2

**3** אַסְגֵי יְיָ לְמֶעְבַּד טָבָא עִמָנָא הֲוֵינָא חָדִין: ^sl-126-3

**4** אֲתִיב יְיָ יַת גַלְוָתָן הֵיךְ דִמְיַתְבָא אַרְעָא כַּד נָבְעִין מַפְקָנֵי מַיָא בִּבְצוֹרְתָּא: ^sl-126-4

**5** דְזָרְעִין בְּדִמְעֲתָא בְּשַׁבַּחְתָּא יַחְצְדוּן: ^sl-126-5

**6** מַהְלְכָא יַהֲלוֹךְ בִּבְכוּתָא מְסוֹבַר נִגְדָא דְבַר זַרְעָא מֵיתָא יֵיתֵי בְּתּוּשְׁבְּחָא כַּד יְסוֹבַר אֱסַרְתּוֹי: ^sl-126-6

## Capítulo 127

**1** שִׁירָא דְאִתְאֲמַר עַל מַסוּקִין דִתְהוֹמָא עַל יַד שְׁלֹמֹה אִין מֵימְרָא דַייָ לָא יִבְנֵי קַרְתָּא מַגָן לָעָן אַרְדִיכְלוֹי בֵּיהּ אִין מֵימְרָא דַייָ לָא נְטַר קַרְתָּא דִירוּשְׁלֵם מַגָן אִתְּעַר נָטֵיר: ^sl-127-1

**2** עַל מַגָן תִּטְלְחוּן לְכוֹן דִתְקַדְמוּן בְּצַפְרָא לְמֶעְבַּד לְכוֹן חֲטוֹף דִי מְאַחְרֵן וְתֵתְבוּן לְמֶעְבָּד זָנוּ דְאָכְלִין מְזוֹנֵי דְמִסְכְּנִין דְלָעוּ בְהוֹן עַל יָאוּת וְכֵיוָן יִתֵּן יְיָ לְרָחֲמֵיהּ דִמְכָא: ^sl-127-2

**3** הָא אַחְסָנַת יְיָ בְּנִין כָּשְׁרִין אֲגַר עוֹבְדִין טָבִין וַלְדֵי מְעָא: ^sl-127-3

**4** כְּגִירִין בְּאַיְדָא דְגִיבָּרָא כִּן בְּנִין דְעוּלֵימָא: ^sl-127-4

**5** טַב לֵיהּ לִגְבַר דְיִמְלֵי בֵּית מֶדְרָשֵׁיהּ מִנְהוֹן לָא יִבַּהֲתוּן אֲרוּם יִנְצוּן עִם בַּעֲלֵי דְבָבֵיהוֹן בִּתְרַע בֵּית דִינָא: ^sl-127-5

## Capítulo 128

**1** שִׁירָא דְאִתְאַמַר עַל מַסוּקִין דִתְהוֹמָא טוּבֵיהוֹן דְכָל דָחֲלַיָא דַייָ דְאָזְלִין בְּאוֹרְחָתֵיהּ: ^sl-128-1

**2** לֵעוּת אַיְדָךְ אֲרוּם תֵּיכוּל טוּבָךְ בְּעַלְמָא הָדֵין וְטָב לָךְ לְעַלְמָא דְאָתֵי: ^sl-128-2

**3** אִתְּתָךְ הֵיךְ גוּפְנָא דַעֲבַדֵת פֵּרִין עַל שִׁדָא דְבֵיתָךְ בְּנָךְ הֵיךְ שְׁתִילַיָא דְזֵיתַיָא חֲזוֹר חֲזוֹר לְפָתוֹרָךְ: ^sl-128-3

**4** הָא אֲרוּם הֵיכְנָא מִתְבָּרַךְ גַבְרָא דָחֵל מִן קֳדָם יְיָ: ^sl-128-4

**5** יְבָרְכִנָךְ יְיָ מִצִיוֹן וְתֶחֱמֵי בְּטוּבָא דִירוּשְׁלֶם כָּל יוֹמֵי חַיָיךְ: ^sl-128-5

**6** וְתֶחֱמֵי בְּנִין לִבְנָיִךְ שְׁלָמָא עַל יִשְׂרָאֵל: ^sl-128-6

## Capítulo 129

**1** שִׁירָא דְאִתְאַמַר עַל מַסוּקִין דִתְהוֹמָא סַגִיעִין דַאֲעִיקוּ לִי מִן טַלְיוּתִי יֵימַר כְּדוּן יִשְׂרָאֵל: ^sl-129-1

**2** סַגִיעִין דַאֲעִיקוּ לִי מִן טַלְיוּתִי בְּרַם לָא יָכִילוּ לְאַבְאָשָׁא לִי: ^sl-129-2

**3** עַל גוּשְׁמִי רְדוּ רָדַיָא אוֹרִיכִי לְמוּרְדָנִיתְהוֹן: ^sl-129-3

**4** יְיָ זַכָּאָה קַצֵץ שׁוּלְשְׁלֵי רַשִׁיעַיָא: ^sl-129-4

**5** יִבַּהֲתוּן וִיזוֹרוּן לַאֲחוֹרָא כָּל סָנְאֵי דְצִיוֹן: ^sl-129-5

**6** יֶהֶווּן כַּחֲצִיר אִגְרַיָא דְמִן קֳדָם דִיצִיץ אָתֵי רוּחַ קִידוּמָא נָתֵק בֵּיהּ וְאִתְיַבֵּשׁ: ^sl-129-6

**7** דְלָא מָלֵי אַיְדֵיהּ חֲצָד וְכַתְפֵיהּ מְעַמֵר: ^sl-129-7

**8** וְלָא אֲמַרוּ דְעָבְרִין מִתַּמָן בִּרְכָתָא דַייָ עֲלֵיכוֹן וְלָא יְתִיבוּן לְהוֹן בָרֵכְנָא יַתְכוֹן בִּשְׁמָא דַיָי: ^sl-129-8

## Capítulo 130

**1** שִׁיר דְאִתְאֲמַר עַל מַסוּקִין דִתְהוֹמָא מִן עוּמְקַיָא קְרֵיתָךְ יְיָ: ^sl-130-1

**2** יְיָ קַבֵּל צְלוֹתִי תֶּהֶוְיָן אוּדְנָיִךְ צָיְתִין לְקָל צְלוֹתִי: ^sl-130-2

**3** אִין עַוְיָן תִּטוֹר יָהּ יְיָ מַן יְקוּם: ^sl-130-3

**4** אֲרוּם גַבָּךְ שְׁבִיקוּתָא מִן בִּגְלַל דְתִתְחַמֵי: ^sl-130-4

**5** אַמְתִינֵית יְיָ מְתִינַת נַפְשִׁי וּלְאַיְקָרֵיהּ אוֹרִיכֵית: ^sl-130-5

**6** נַפְשִׁי אוֹרִיכָא לַיָי מִן נָטְרֵי מַטְרַת לְצַפְרָא דְנָטְרִין לִקְרָבָא קוּרְבָּן צַפְרָא: ^sl-130-6

**7** מוֹרִיךְ יִשְׂרָאֵל לַיָי אֲרוּם גַבֵּי יְיָ חִסְדָא וְסַגִי עִמֵיהּ פּוּרְקָן: ^sl-130-7

**8** וְהוּא יִפְרוֹק יַת יִשְׂרָאֵל מִכֹּל עַוְיָתֵיהּ: ^sl-130-8

## Capítulo 131

**1** שִׁירָא דְאִתְאַמַר עַל מַסוּקִין דִתְהוֹמָא יְיָ לָא גְבַהּ לִבִּי וְלָא אִתְרוֹמַמוּ עֵינַי וְלָא הַלְכֵית בְּרַבְרְבִין וּבִפְרִישִׁין מִנִי: ^sl-131-1

**2** אִין לָא שַׁוְיֵת אַיְדָא לְפוּם וְשַׁתְקֵית נַפְשִׁי עַד דְצָיֵת פִתְגָמֵי אוֹרַיְתָא הֵיךְ חֲסִילָא עַל תַדְיֵי אִמֵיהּ אִתְגַבְּרֵית בְּאוֹרַיְתָא הֵיךְ חֲסִילָא עֲלַוָי נַפְשִׁי: ^sl-131-2

**3** יוֹרִיךְ יִשְׂרָאֵל לַיָי מִן הַשְׁתָּא וְעַד עַלְמָא: ^sl-131-3

## Capítulo 132

**1** שִׁירָא דְאִתְאַמַר עַל מַסוּקִין דִתְהוֹמָא אִדְכַּר יְיָ לְדָוִד יַת כָּל סִגוּפֵיהּ: ^sl-132-1

**2** דִי קַיֵם קֳדָם יְיָ נְדַר לְתַקִיפָא דְיַעֲקֹב: ^sl-132-2

**3** אִין אֵעוּל עַל אִתְּתִי אִין אַסֵיק עַל דַרְגֵשׁ מַצָעָי: ^sl-132-3

**4** אִין אֶתֵּן דוּמְכָא לְעֵינַי לְתִימוֹרַי נְיוּמְתָּא: ^sl-132-4

**5** עַד דְאַשְׁכַּח אֲתַר לְמִבְנֵי בֵּית מַקְדָשָׁא דַייָ מַשְׁכְּנַיָא לְתַקִיפָא דְיַעֲקֹב: ^sl-132-5

**6** הָא שְׁמַעְנָא יָתָהּ בְּאֶפְרָת אַשְׁכַּחְנוּהָא בַּחֲקַל חוּרְשֵׁי לִבְנָן אֲתַר דְצַלִיאוּ אֲבָהָת עַלְמָא: ^sl-132-6

**7** נֵעוּל לְמַשְׁכְּנוֹי נִסְגוֹד לְכִבְשָׁא דְרַגְלוֹי: ^sl-132-7

**8** קוּם יְיָ שְׁרֵי בְּבֵית מֵישְׁרֵי נְיָחָךְ אַתְּ וַאֲרוֹן דִי בֵיהּ אוֹרַיְתָךְ: ^sl-132-8

**9** כַּהֲנָיִךְ יִלְבְּשׁוּן לְבוּשִׁין דִזְכוּ וְלֵוָאֵי חֲסִידָיִךְ יְשַׁבְּחוּן עַל קוּרְבָּנַיָא: ^sl-132-9

**10** מְטוּל זְכוּתֵיהּ דְדָוִד עַבְדָךְ בְּמֵעַל אֲרוֹנָא בִּמְצַע תַּרְעַיָא לָא תְּתֵיב אַפֵּי שְׁלֹמֹה מְשִׁיחָךְ: ^sl-132-10

**11** קַיֵם לְדָוִד בְּקוּשְׁטָא לָא יְתוּב מִנָהּ מִן וַלְדָא דִמְעָךְ אֲשַׁוֵי מְלֵךְ עַל כּוּרְסֵי דִי לָךְ: ^sl-132-11

**12** אִין נָטְרִין בְּנָךְ קְיָמִי וְסָהִדְוָתִי דְנָן דְאַלְפִנוּן אַף בְּנֵיהוֹן לְעַלְמִין יֵתְבוּן עַל כּוּרְסֵי דִי לָךְ: ^sl-132-12

**13** אֲרוּם אִתְרְעֵי יְיָ בְּצִיוֹן רַגֵג יָתָהּ לְמוֹתַב דִי לֵיהּ: ^sl-132-13

**14** דָא נְיָח שְׁכִנְתִּי עַד עַלְמָא כָּא אֲתֵיב אֲרוּם רִגַגְתָּהּ: ^sl-132-14

**15** זְוָדָהּ מְבָרָכָא אֲבָרֵךְ וַחֲשִׁיכָהָא יִסְבְּעוּן לַחֲמָא: ^sl-132-15

**16** וְכַהֲנָהָא אַלְבִּישׁ לְבוּשֵׁי פּוּרְקָן וַחֲסִידָהָא מְשַׁבָּחָא יְשַׁבְּחוּן: ^sl-132-16

**17** תַּמָן אַצְמַח מְלַךְ יַקִיר לְבֵית דָוִד סְדַרֵית שְׁרָגָא לִמְשִׁיחָי: ^sl-132-17

**18** בַּעֲלֵי דְבָבוֹי אַלְבִּישׁ לְבוּשִׁין דְבַהֲתָא וַעֲלוֹי יְנִיץ כְּלִילֵיהּ: ^sl-132-18

## Capítulo 133

**1** שִׁירָא דְאִתְאֲמַר עַל מַסוּקִין דִתְהוֹמָא הָא כְמָא טָב וּכְמָא בְּסִים לְמִטַב צִיוֹן וִירוּשְׁלֶם כִּתְרֵין אַחִין בְּרַם כַּחֲדָא: ^sl-133-1

**2** כִּמְשַׁח טָב דְמִתְרַק עַל רֵישָׁא נָחֵת עַל דִקְנָא דִקְנֵיהּ דְאַהֲרֹן דְנָחֵת עַל אִמְרָא דִלְבוּשׁוֹי: ^sl-133-2

**3** הֵיךְ כְּטַלָא דְחֶרְמוֹן דְנָחֵת עַל טוּרֵי דְצִיוֹן אֲרוּם תַּמָן פַּקֵד יְיָ יַת בִּרְכְּתָא חַיֵי עַד עַלְמָא: ^sl-133-3

## Capítulo 134

**1** שִׁירָא דְאִתְאֲמַר עַל מַסוּקִין דִתְהוֹמָא הָא בָּרִיכוּ יַת יְיָ כָּל עַבְדַיָא דַייָ דְקָיְמִין עַל בֵּית מַטְרַת בֵּית מַקְדְשָׁא דַייָ וּמְשַׁבְּחִין בְּלֵילְוָן: ^sl-134-1

**2** טוּלוּ יְדֵיכוֹן קוּדְשָׁא כַּהֲנַיָא עַל דוּכַן קוּדְשָׁא וּבָרִיכוּ יַת יְיָ: ^sl-134-2

**3** יְבָרְכִנָךְ יְיָ מִצִיוֹן דַעֲבַד שְׁמַיָא וְאַרְעָא: ^sl-134-3

## Capítulo 135

**1** הַלְלוּיָהּ שַׁבַּחוּ יַת שְׁמָא דַייָ שַׁבַּחוּ עַבְדַיָא דַיָי: ^sl-135-1

**2** דְקָיְמִין בְּבֵית מַקְדְשָׁא דַייָ בְדָרַת בֵּית אֱלָהָנָא: ^sl-135-2

**3** הַלְלוּיָהּ אֲרוּם טָב יְיָ זַמְרוּ לִשְׁמֵיהּ אֲרוּם בְּסִים: ^sl-135-3

**4** אֲרוּם דְבֵית יַעֲקֹב בְּחַר לֵיהּ יְיָ יִשְׂרָאֵל לְחִבּוּבֵיהּ: ^sl-135-4

**5** אֲרוּם אֲנָא יְדַעֵית אֲרוּם רַב יְיָ וְרִבּוֹנְנָא עַל כָּל אֱלֹהִים: ^sl-135-5

**6** כָּל דִי יִתְרְעֵי יְיָ עֲבַד בִּשְׁמַיָא וּבְאַרְעָא בְּיַמְמַיָא וְכָל תְּהוֹמַיָא: ^sl-135-6

**7** דְמַסִיק עֲנָנִין מִסְיָפֵי אַרְעָא בְּרָקִין לְמֵחַת מִטְרָא עֲבַד דְמַפֵּק זַעֲפָא מִן טוּסְבְּרַיָא דִילֵיהּ: ^sl-135-7

**8** דִי קְטַל בּוּכְרַיָא דְמִצְרָאֵי מֵאֱנָשָׁא עַד בְּעִירָא: ^sl-135-8

**9** שְׁדַר אָתִין וְתִמְהִין בִּמְצִיעַיִךְ מִצְרָיִם בְּפַרְעֹה וּבְכָל עַבְדוֹי: ^sl-135-9

**10** דִי מְחָא עַמְמִין סַגִיעִין וּקְטַל מַלְכִין תַּקִיפִין: ^sl-135-10

**11** לְסִיחוֹן מַלְכָּא אֱמוֹרָהָא וּלְעוֹג מַלְכָּא דְמַתְנָן וּלְכֹל מַלְכְּוָת כְּנָעַן: ^sl-135-11

**12** וִיהַב אַרְעֲהוֹן אַחְסָנָא אַחְסָנָא לְיִשְׂרָאֵל עַמֵיהּ: ^sl-135-12

**13** יְיָ שְׁמָךְ לַעֲלַם יְיָ דִכְרָנָךְ לְדָר וְדָר: ^sl-135-13

**14** אֲרוּם יְדִין יְיָ בְּמֵימְרֵיהּ דִינָא דְעַמֵיהּ וְעַל עַבְדוֹי צַדִיקַיָא יְתוּב בְּרַחֲמוֹי: ^sl-135-14

**15** טַעֲוָן דְעַמְמַיָא סִימָא וְדַהֲבָא עוֹבַד אַיְדֵי בַּר נָשׁ: ^sl-135-15

**16** פּוּם לְהוֹן וְלָא מְמַלְלִין עַיְנִין לְהוֹן וְלָא חָמְיָן: ^sl-135-16

**17** אוּדְנִין לְהוֹן וְלָא צָיְתִין נְחִירֵי וְלָא אִית רוּחָא דְחַיֵי בְּפוּמְהוֹן: ^sl-135-17

**18** דִי כְמָתְהוֹן יְהוֹן עוֹבָדֵיהוֹן כָּל דְמִתְרַחֵץ עֲלֵיהוֹן: ^sl-135-18

**19** דְבֵית יִשְׂרָאֵל בָּרִיכוּ יַת יְיָ דְבֵית אַהֲרֹן בָּרִיכוּ יַת יְיָ: ^sl-135-19

**20** דְבֵית לֵוָאֵי בָּרִיכוּ יַת יְיָ דַחֲלַיָא דַייָ בָּרִיכוּ יַת יְיָ: ^sl-135-20

**21** בְּרִיךְ יְיָ מִצִיוֹן דְאַשְׁרֵי שְׁכִנְתֵּיהּ בִּירוּשְׁלֵם הַלְלוּיָהּ: ^sl-135-21

## Capítulo 136

**1** שַׁבַּחוּ קֳדָם יְיָ אֲרוּם טָב אֲרוּם לַעֲלַם טוּבֵיהּ: ^sl-136-1

**2** שַׁבַּחוּ לֶאֱלָהֵי אֳלָהַיָא אֲרוּם לַעֲלַם טוּבֵיהּ: ^sl-136-2

**3** שַׁבַּחוּ לְמָרֵי מָרַיָא אֲרוּם לַעֲלַם טוּבֵיהּ: ^sl-136-3

**4** לַעֲבַד פְּרִישָׁן רַבְרְבָן בִּלְחוֹדֵיהּ אֲרוּם לַעֲלַם טוּבֵיהּ: ^sl-136-4

**5** לַעֲבַד שְׁמַיָא בְּסוּכְלְתָנוּ אֲרוּם לַעֲלַם טוּבֵיהּ: ^sl-136-5

**6** לְרָדֵיד אַרְעָא עֲלַוֵי דְמַיָא אֲרוּם לַעֲלַם טוּבֵיהּ: ^sl-136-6

**7** לַעֲבַד נְהוֹרִין רַבְרְבִין אֲרוּם לַעֲלַם טוּבֵיהּ: ^sl-136-7

**8** יַת שִׁמְשָׁא לְמִשְׁלַט בִּימָמָא אֲרוּם לַעֲלַם טוּבֵיהּ: ^sl-136-8

**9** יַת סִיהֲרָא וְכוֹכְבַיָא לְמִשְׁלַט בְּלֵילְיָא אֲרוּם לַעֲלַם טוּבֵיהּ: ^sl-136-9

**10** לְמָחֵי מִצְרָאֵי בְּמַכְתָּשִׁין קְטַל אֲרוּם לַעֲלַם טוּבֵיהּ: ^sl-136-10

**11** וְאַפֵּיק יִשְׂרָאֵל פָּרִיקִין מִבֵּינֵיהוֹן אֲרוּם לַעֲלַם טוּבֵיהּ: ^sl-136-11

**12** בְּאַיְדָא תַּקִיפָא וּבִדְרַע מְרַמְמָא אֲרוּם לַעֲלַם טוּבֵיהּ: ^sl-136-12

**13** לְצָלַח יַמָא דְסוּף לְצָלוּחָא אֲרוּם לַעֲלַם טוּבֵיהּ: ^sl-136-13

**14** וְאַעְבַר יִשְׂרָאֵל בִּמְצִיעֵיהּ אֲרוּם לַעֲלַם טוּבֵיהּ: ^sl-136-14

**15** וְשַׁנֵק פַּרְעֹה וְחֵילְוָתֵיהּ בְּיַמָא דְסוּף אֲרוּם לַעֲלַם טוּבֵיהּ: ^sl-136-15

**16** לִמְהַלֵךְ עַמֵיהּ בְּמַדְבְּרָא אֲרוּם לַעֲלַם טוּבֵיהּ: ^sl-136-16

**17** לְמָחֵי מַלְכִין רַבְרְבִין אֲרוּם לַעֲלַם טוּבֵיהּ: ^sl-136-17

**18** וּקְטַל מַלְכִין גֵיוְתָנִין אֲרוּם לַעֲלַם טוּבֵיהּ: ^sl-136-18

**19** לְסִיחוֹן מַלְכָּא אֱמוֹרָאָה אֲרוּם לַעֲלַם טוּבֵיהּ: ^sl-136-19

**20** וּלְעוֹג מַלְכָּא דְמַתְנָן אֲרוּם לַעֲלַם טוּבֵיהּ: ^sl-136-20

**21** וִיהַב אַרְעֲהוֹן לְאַחְסָנָא אֲרוּם לַעֲלַם טוּבֵיהּ: ^sl-136-21

**22** אַחְסַנְתָּא לְיִשְׂרָאֵל עַבְדֵיהּ אֲרוּם לַעֲלַם טוּבֵיהּ: ^sl-136-22

**23** בְּאִתְמַכְּכוּתָנָא דְכַר לָנָא קְיָמֵיהּ אֲרוּם לַעֲלַם טוּבֵיהּ: ^sl-136-23

**24** וּפְרִיקָנָא מִן מְעִיקָנָא אֲרוּם לַעֲלַם טוּבֵיהּ: ^sl-136-24

**25** דִיהַב מְזוֹנֵיהּ לְכָל בִּסְרָא אֲרוּם לַעֲלַם טוּבֵיהּ: ^sl-136-25

**26** שַׁבַּחוּ לֵאלָהָא שְׁמַיָא אֲרוּם לַעֲלַם טוּבֵיהּ: ^sl-136-26

## Capítulo 137

**1** עַל נַהַרְוָתָא דְבָבֶל תַּמָן יְתִיבְנָא לְחוֹד בְּכִינָא כַּד הֲוֵינָא דָכְרִין יַת צִיוֹן: ^sl-137-1

**2** עַל עֲרָבִין בִּמְצִיעֲתָא תָּלִינָן כִּנָרָנָא: ^sl-137-2

**3** אֲרוּם תַּמָן שַׁיְלוּ יָתָנָא בַּבְלָאֵי דִשְׁבוֹי יָתָנָא לְמֵימַר מִלִין דְשִׁירַיָא וּבָזְזָנָא עַל עֲסַק חֶדְוָא אָמְרִין שְׁבַחוּ לָנָא מִן שִׁירָתָא דַהֲוֵיתוּן אָמְרִין בְּצִיוֹן: ^sl-137-3

**4** מִן יַד לֵוָאֵי אָמְרִין הֵיכְדֵין נְשַׁבַּח יַת תּוּשְׁבָּחָא דַייָ עַל אַרְעָא חִילוֹנִיתָא: ^sl-137-4

**5** מְתִיבָא קָל רוּחָא דְקוּדְשָׁא וְאָמְרָא דְאִין מַנְשְׁיֵנָא לִיךְ יְרוּשְׁלֶם אַנְשְׁיָה לִימִינִי: ^sl-137-5

**6** תִּדְבַּק לִישָׁנִי לְמוֹרִיגִי אִין לָא אִדְכַּר יָתִיכִי אִין לָא אַסִיק דָכְרָן יְרוּשְׁלֶם עַל שֵׁרוּי חֶדְוַת בֵּית שַׁמְשָׁי: ^sl-137-6

**7** אָמַר מִיכָאֵל רַבָּא דִירוּשְׁלֶם אִדְכַּר יְיָ לְעַלְמָא לֶאֱדוֹמָא דְאַחֲרִיבוּ יְרוּשְׁלֶם דְאָמְרִין צְדוּ צְדוּ עַד דְשִׁתְּאֲסָא בָּהּ: ^sl-137-7

**8** אֲמַר גַבְרִיאֵל רַבָּא דְצִיוֹן לְאוּמָא בַּבְלֵיתָא בְּזוּזִיתָא טָב לֵיהּ דִישַׁלֵם לָךְ יַת גוּמְלֵיךְ בִּישׁ דִי גְמַלְתָּא לָנָא: ^sl-137-8

**9** טָב לֵיהּ דְאָחֵד וּמְרַטֵשׁ יַת טַלְיַיִךְ עַל כֵּיפָא: ^sl-137-9

## Capítulo 138

**1** עַל יַד דָוִד אוֹדֵי קֳדָמָךְ יְיָ בְּכָל לִבִּי קֳבֵל דַיָנַיָא אֲזַמְרִנָךְ: ^sl-138-1

**2** אֶסְגוֹד קֳדָם הֵיכְלָא דְקוּדְשָׁךְ וְאוֹדֵי יַת שְׁמָךְ מְטוּל טוּבָךְ וּמְטוּל קוּשְׁטָךְ אֲרוּם אַסְגֵיתָא עַל כָּל שְׁמָךְ מֵימְרֵי תוּשְׁבַּחְתָּךְ: ^sl-138-2

**3** בְּיוֹמָא דִי קְרֵית עֲנֵי יָתִי אַסְגַעְתָּנִי בְּנַפְשִׁי עוּשְׁנָא: ^sl-138-3

**4** יוֹדוּן קֳדָמָךְ יְיָ כָּל מַלְכֵי אַרְעָא אֲרוּם שְׁמַעוּ מֵימְרֵי תוּשְׁבַּחְתָּךְ: ^sl-138-4

**5** וִישַׁבְּחוּן עַל כְּבִישֵׁי יְיָ אֲרוּם רַב אַיְקָרָא דַיָי: ^sl-138-5

**6** אֲרוּם רָמָא יְיָ וּמַכִּיךְ יֶחֱמֵי לְטָב וְגֵיוְתָנָא מִן שְׁמַיָא רְחִיקִין יַמְאֵיךְ: ^sl-138-6

**7** אִין אֲהַלֵךְ בִּמְצַע עָקְתָא תְּחַיִנַנִי עַל נְחִירָא בַּעֲלֵי דְבָבַי תּוֹשִׁיט אַיְדָךְ לְחַבָּלוּתְהוֹן וְתִפְרְקִנַנִי יְמִינָךְ: ^sl-138-7

**8** יְיָ יַשְׁלִים בִּישָׁא עֲלַוֵיהוֹן אַמְטוּלְתִּי יְיָ טוּבָךְ לַעֲלַם עוֹבָדֵי אַיְדָךְ לָא תִשְׁבּוֹק: ^sl-138-8

## Capítulo 139

**1** לְשַׁבָּחָא עַל יַד דָוִד תּוּשְׁבַּחְתָּא יְיָ פִשְׁפַּשְׁתַּנִי וִידַעְתָּא: ^sl-139-1

**2** אַתְּ קֳדָמָךְ גְלֵי אוֹתָבוּתִי לְמֶעֱסַק בְּאוֹרַיְתָא וְאוֹקִימוּתִי לְמֵזַל בִּקְרָבָא אִתְבַּיֵנְתָּא לְחַבָּרוּתִי בִּכְנִשְׁתָּךְ מִן עַם רָחִיק: ^sl-139-2

**3** כְּדוּן בַּהֲלִיכוּתָא בְּאוֹרְחָא וּבְרַבְעוּתִי לְמֶעֱסַק בְּאוֹרַיְתָא אִתְעַבַּדְתָּא חִילוֹנַי וְכָל אָרְחָתַי אַסְכֵּנְתָּא: ^sl-139-3

**4** וְכַד לֵית מַמְלַל בְּלִישָׁנִי הָא יְיָ יְדַעְתָּא מַחְשְׁבָת לִבִּי כּוֹלָא: ^sl-139-4

**5** מֵאֲחוֹרַי וּמֵאַפַּי אַעֵקְתָּא יָתִי וְגָרִיתָ עֲלֵי מְחָתָא דִידָךְ: ^sl-139-5

**6** מִכַּסְיָא לְמֵידַע מִנִי אִתְּקָפַת לָא אֶכּוּל לָהּ: ^sl-139-6

**7** אָן אֵיזֵל מִן קֳדָם זַעֲפָךְ וְאָן מִן קֳדָמָךְ אֶפּוֹךְ: ^sl-139-7

**8** אִין אֶסַק לִשְׁמַיָא תַּמָן אַנְתְּ וְאֶמוּךְ לִשְׁיוֹל הָא תַמָן מֵימְרָךְ: ^sl-139-8

**9** אֶזְקוֹף צִיצִין דִקְרִיץ אַשְׁרֵי בְּסוֹפֵי יַמָא: ^sl-139-9

**10** לְחוֹד תַּמָן אַיְדָךְ תַּדְבַּר יָתִי וְתֶחֱדִנַנִי יְמִינָךְ: ^sl-139-10

**11** וַאֲמַרֵית בְּרַם חוֹשֶׁךְ מַחֲבַרְבַר עֲלַי וְלֵילְיָא קָבֵל אַמְטוּלְתִּי: ^sl-139-11

**12** לְחוֹד חֲשׁוֹכָא לָא יַחֲשִׁיךְ מִן מֵימְרָךְ וְלֵילְיָא הֵיךְ יוֹמָא יַנְהֵר הֵיךְ חֲשׁוֹכָא הֵיךְ נְהוֹרָא שָׁוְיָן: ^sl-139-12

**13** אֲרוּם אַנְתְּ קְנֵיתָא כוּלְיָתִי אַשְׁתְּיָת לִי בִּכְרֵיסָא דְאִמִי: ^sl-139-13

**14** אוֹדִינָךְ מְטוּל דִדְחִילַן פְּרִישֵׁת פְּרִישָׁן עוֹבָדָיִךְ וְנַפְשִׁי חַכְּמָא לַחֲדָא: ^sl-139-14

**15** לָא אִתְכַּסָא גַרְמִי מִנָךְ דִי אִתְעֲבִידַת בְּטוּמְרָא אִצְטַיְרֵית בִּכְּרֵיסָא דְאִמָא: ^sl-139-15

**16** גִשְׁמִי חָמְיָן עַיְנָךְ וְעַל סֵפֶר דָכְרָנָךְ כּוּלְהוֹן יוֹמַי מִכַּתְבִין בְּיוֹמָא דְאִתְבְּרִי עַלְמָא מִן שְׁרוּיָא אִתְבְּרִיאוּ כוּלְהוֹן בִרְיָתָא וְלֵית כַּחֵד חַד בֵּינֵיהוֹן: ^sl-139-16

**17** וְלִי כְּמָא יַקִירִין רָחֲמָיִךְ צַדִיקַיָא אֱלָהָא כְּמָא אִתְחַיְלוּ רַבָּנֵיהוֹן: ^sl-139-17

**18** אֲמַנִנוּן בְּעַלְמָא הָדֵין יַתִּיר מִן חָלָא יִסְגְעוּן אִתְּעָרֵית בְּעַלְמָא דְאָתֵי וְעַד כְּדוּן אֲנָא גַבָּךְ: ^sl-139-18

**19** אִין תִּקְטוֹל אֱלָהָא לְרַשִׁיעָא וְגַבְרִין דְחַיָבִין דִין דִקְטוֹל יְזוּרוּן מִנִי: ^sl-139-19

**20** דִי יֵימוּן בִּשְׁמָךְ עַל נִכְלָא מִשְׁתַּבְּעִין עַל מַגָן בַּעֲלֵי דְבָבָךְ: ^sl-139-20

**21** הֲלָא מְסַנְאָךְ יְיָ אֲנָא סָנֵי וְכַד קָיְמִין לְקִבְלָךְ אֲנָא מְגָרֵג: ^sl-139-21

**22** עַד שְׁצִיאִית סִנְיָתָא סְנֵיתִינוּן לְבַעֲלֵי דְבָבִין הֲווֹן לִי: ^sl-139-22

**23** חַקְרֵנִי אֱלָהָא וִידַע רַעֲיוֹנַי בְּחוֹן יָתִי וִידַע הִרְהוּרָי: ^sl-139-23

**24** וַחֲמֵי אִין אוֹרַח דְטָעִין בִּי דַבֵּר יָתִי בְּאוֹרַח תְּרִיצֵי עַלְמָא: ^sl-139-24

## Capítulo 140

**1** לְשַׁבָּחָא תּוּשְׁבַּחְתָּא עַל יַד דָוִד: ^sl-140-1

**2** פְּצֵי יָתִי יְיָ מִבַּר נָשׁ בִּישׁ מִגְבַר חֲטוֹפִין תִּנְטוֹר יָתִי: ^sl-140-2

**3** דִי חֲשִׁילוּ בִישָׁן בְּלִבָּא כָּל יוֹמָא מְגָרְגִין קְרָבַיָא: ^sl-140-3

**4** מְתַנְיָן בְּלִישָׁנְהוֹן הֵיךְ חִוְיָא אֵרְסָא דְעַכּוּבִיתָא תְּחוֹת סִפְוָתְהוֹן לְעַלְמִין: ^sl-140-4

**5** נְטוֹר יָתִי יְיָ מִן יַד דְרַשִׁיעַיָא מִן גְבַר חֲטוּפִין תִּנְטוֹר יָתִי דִי חֲשִׁילוּ לְמִנְקוֹף אִסְתַּוְרָי: ^sl-140-5

**6** כְּמַנּוּ גֵיוְתָנוּן פַּחָא לִי וְאַשְׁלַיָא פָּרְסִין מְצַדְתָּא לִסְטַר אוֹרְחָא תַּקְלִין שָׁוָן לִי תְדִירָא: ^sl-140-6

**7** אֲמַרִית לַיְיָ אֱלָהִי אַנְתְּ אֲצֵית יְיָ לְקָל בָּעוּתִי: ^sl-140-7

**8** אֱלֹהִים יְיָ עוּשְׁנָא דְפוּרְקָנִי טַלֵלְתָּא עַל רֵישִׁי בְּיוֹם קְרָבָא: ^sl-140-8

**9** לָא תִתֵּן יְיָ רִגוּנֵי דוֹאֵג רַשִׁיעָא מַחֲשַׁבְתֵּיהּ לָא תַסְפֵּק יִסְתַּלְקוּן לְעָלְמִין: ^sl-140-9

**10** אֲחִיתוֹפֶל רֵישׁ סַנְהֶדְרֵי תַלְמִידֵי לֵעוּת מַלְשִׁינוּתָא דְסִפְוָתְהוֹן יַחֲפִינוּן: ^sl-140-10

**11** יִמְטוּן עֲלַוֵיהוֹן גוּמְרִין מִן שְׁמַיָא בְּנוּרָא דְגֵיהִנָם יַפְּלִינוּן בְּגִיצִין דְמַחְמְרִין דְלָא יְקוּמוּן לְחַיֵי עַלְמָא: ^sl-140-11

**12** גְבַר דְמִשְׁתָּעֵי לִישָׁן תְּלִיתַי לָא אֶפְשַׁר דְיִתְכַּן בְּאַרְעָא דְחַיֵי גְבַר חֲטוֹפָא בִישׁ יְצוּדִינֵיהּ מַלְאַךְ דְמוֹתָא יְנַקְפִנֵיהּ בְּגֵהִנָם: ^sl-140-12

**13** הַבְּכֵן גְלֵי קֳדָמַי אֲרוּם יַעְבֵּד יְיָ דִינְהוֹן דַעֲנִיֵי דִינָא דַחֲשִׁיכֵי: ^sl-140-13

**14** בְּרַם צַדִיקַיָא יְהוֹדוּן לִשְׁמָךְ יֵתְבוּן תְּרִיצֵי לְצַלָאָה קֳדָמָךְ: ^sl-140-14

## Capítulo 141

**1** תּוּשְׁבַּחְתָּא לְדָוִד יְיָ קְרִיתָךְ חִישׁ לִי אֲצִית קָלִי בְּמִקְרֵי לָךְ: ^sl-141-1

**2** תִּתְכַּוַן צְלוֹתִי הֵיךְ קְטוֹרֶת בּוּסְמִין קֳדָמָךְ זַקְפוּת יִדַי בִּצְלוֹ הֵיךְ דוֹרוֹן בְּסִים דְמִתְקָרֵב בִּרְמַשׁ: ^sl-141-2

**3** שַׁוֵי יְיָ מַטְרָא לְפוּמִי נְטַר עַל זְקוֹף סִפְוָתָי: ^sl-141-3

**4** לָא תַצְלֵי לִבִּי לְפִתְגָם בִּישׁ לְמֶחְשַׁב מַחְשְׁבָן בְּרִשְׁעָא עִם גַבְרֵי עָבְדֵי שְׁקַר וְלָא אֶסְעוֹד בִּזְמַר בֵּית מִשְׁתֵּיהוֹן: ^sl-141-4

**5** יְטַפְּחִנַנִי צַדִיקָא מְטוּל חִסְדָא וִיכַסְנַנִי מְשַׁח רְבוּת קוּדְשָׁא לָא יְבַטֵל מִן רֵישִׁי אֲרוּם עַד כְּדוּן צְלוֹתִי מִסְתַּדְרָא בְּבִישָׁתֵהוֹן: ^sl-141-5

**6** אִשְׁתְּמִיטוּ מִבֵּית מֶדְרָשָׁא עַל יְדֵי תְקוֹף דִינֵיהוֹן תָּיְבִין וְשָׁמְעִין מֵימְרִי אֲרוּם בְּסִימוּ: ^sl-141-6

**7** דִי כְמָא גְבַר דְפַלַח וּמְבַזַע בִּמְרָדַיָא בְאַרְעָא הֵכְדֵין אִתְבַּדַרוּ אַבְרָנָא עַל פּוּם קְבוּרְתָּא: ^sl-141-7

**8** מְטוּל הֵיכְנָא לְוָתָךְ אֱלֹהִים יְיָ עַיְנַי מוֹדִיקָן בְּמֵימְרָךְ סִבְרֵית לָא תְרוֹקֵן נַפְשִׁי: ^sl-141-8

**9** נְטוֹר יָתִי מִן אַיְדֵי פַחָא דְאַתְקִילוּ לִי וְתִקְלָן עָבְדֵי שְׁקָר: ^sl-141-9

**10** יִפְּלוּן בִּמְצוּדָתוֹי רַשִׁיעֵי כַּחֲדָא אֲנָא עַד זְמַן דִי אֶעְבַּר: ^sl-141-10

## Capítulo 142

**1** שִׂכְלָא טָב עַל יְדֵי דָוִד בְּמֶהֱוֵי בְּאַסְפְּלִידָא צְלוֹתָא: ^sl-142-1

**2** קָלִי קֳדָם יְיָ אֶקְבֵּל קָלִי קֳדָם יְיָ אֲצַלֵי: ^sl-142-2

**3** אֶשׁוֹד קֳדָמוֹי שׁוּתִי עַקְתִי קֳדָמוֹי אֲתַנֵי: ^sl-142-3

**4** בְּאִשְׁתַּלְהֲיוּת עֲלַי רוּחִי וְאַתְּ יָדַעְתָּ שְׁבִילִי בִּכְבִישָׁא דְנָן דַאֲהַלֵךְ כְּמַנוּ פַחָא לִי: ^sl-142-4

**5** אִסְתַּכְּלֵית עַל יְמִינָא וַחֲמֵית וְלֵית לִי מִשְׁתְּמוֹדַע הוֹבַד שְׁזִיבוּ מִנִי וְלֵית תָּבַע לְנַפְשִׁי: ^sl-142-5

**6** קִבְלֵית לְוָתָךְ יְיָ אֲמַרֵית אַנְתְּ מְשֵׁזְבִי חוּלָקִי בַּאֲרַע חַיָיא: ^sl-142-6

**7** אֲצֵית לִצְלוֹתִי אֲרוּם אִתְמַסְכְּנֵית לַחֲדָא פְּצֵי יָתִי מֵרָדְפָי אֲרוּם אִתְחַיִלוּ מִנִי: ^sl-142-7

**8** הַנְפֵּיק מִן מַסְגֵירָא נַפְשִׁי לְאוֹדָאָה יַת שְׁמָךְ אַמְטוּלְתִּי יַעַבְדוּן לָךְ כְּלִיל דִשְׁבָח צַדִיקַיָא אֲרוּם תְּשַׁלֵם גּוּמְלָא טָבָא עָלָי: ^sl-142-8

## Capítulo 143

**1** שְׁבָחָא לְדָוִד יְיָ שְׁמַע צְלוֹתִי אֲצֵית לְתַחֲנוּנָי בְּקוּשְׁטָךְ עֲנֵי יָתִי בְּצִדְקָתָךְ: ^sl-143-1

**2** וְלָא תֵעוּל לְבֵית דִינָא עִם עַבְדָךְ אֲרוּם לָא יִזְכֵי קֳדָמָךְ כָּל דְחָי: ^sl-143-2

**3** אֲרוּם רָדֵף בְּעֵל דְבָבָא נַפְשִׁי דִכְדֵךְ לְאַרְעָא חַיָתִי אוֹתְבַנִי בַּחֲשׁוֹכַיָא הֵיךְ שְׁכִיבֵי עַלְמָא הָדֵין: ^sl-143-3

**4** בְּאִשְׁתַּלְהֲיוֹת עֲלַי רוּחִי בְּגוּשְׁמִי יִשְׁתַּעֲמֵם לִבִּי: ^sl-143-4

**5** אִדְכַּרִית יוֹמִין מִלְקַדְמִין רְנַנֵית בְּכוּלְהוֹן עוֹבָדָךְ בְּעוֹבָדֵי אַיְדָךְ אֲמַלֵל: ^sl-143-5

**6** פְּרִיסֵית אַיְדִי בִצְלוֹ קֳדָמָךְ נַפְשִׁי הֵיךְ אַרְעָא דְצַחֲיָא לְמַיָא מוֹדִיקָא לָךְ לְעָלְמִין: ^sl-143-6

**7** סַרְהַב עֲנֵי יָתִי יְיָ רְגִיגַת לָךְ רוּחִי לָא תְסַלֵק שְׁכִנְתָּךְ מִנִי וְאִתְמְתִילֵית עִם נָחֲתֵי גוֹב בֵית קְבוּרְתָּא: ^sl-143-7

**8** אַשְׁמִיעַ יָתִי בִּצְפַר טוּבָךְ אֲרוּם בְּמֵימְרָךְ סִבְרֵית אוֹדַע יְתִי אוֹרַח דְנָן דַאֲהַלֵךְ אֲרוּם לְוָתָךְ זְקַפֵית נַפְשִׁי בִּצְלוֹ: ^sl-143-8

**9** פְּצֵי יָתִי מִבַּעֲלֵי דְבָבַי יְיָ מֵימְרָךְ מַנֵיתִי לְפָרִיק: ^sl-143-9

**10** אַלֵף יָתִי לְמֶעְבַּד רְעוּתָךְ אֲרוּם אַנְתְּ אֱלָהִי רוּחַ קוּדְשָׁךְ טָבָא תְּדַבֵּר יָתִי בְּאַרְעָא תְּרִיץ: ^sl-143-10

**11** מִן בִּגְלַל שְׁמָךְ יְיָ תְּקַיְמִנַנִי בְּצִדְקָךְ אַפֵּק מִן עָקְתָא נַפְשִׁי: ^sl-143-11

**12** וּבְחַסְדָךְ תְּמַגֵר בַּעֲלֵי דְבָבִי וּתְהוֹבַד כָּל מְעִיקֵי נַפְשִׁי אֲרוּם אֲנָא עַבְדָךְ: ^sl-143-12

## Capítulo 144

**1** עַל יַד דָוִד בְּרִיךְ יְיָ תּוּקְפִי דִמְאַלֵף אַיְדַי לְסִדְרֵי קְרָב אֶצְבְּעָתִי לְאַגָחָא קְרָבָא: ^sl-144-1

**2** עָבֵד טִיבוּ וּכְרַךְ תַּקִיפֵי תּוּקְפִי וּמְשֵׁזֵב יָתִי תְּרֵיסִי וּבְמֵימְרֵיהּ סִבְרֵית דִי מְרַדֵד עַמִין תְּחוֹתָי: ^sl-144-2

**3** יְיָ מָה הוּא בַר נָשׁ דְחַכִּימְתֵּיהּ בְּנֵי אֱנָשָׁא וַחֲשִׁבְתֵּיהּ: ^sl-144-3

**4** בַּר נָשׁ לִלְמָא אִדְמָא יוֹמוֹי הֵיךְ טוּלָא דְעָבַר: ^sl-144-4

**5** יְיָ אַרְכֵין שְׁמַיָא וְתִתְגְלֵי קְרַב בְּטוּרַיָא וּמַסְקִין תְּנָנָא: ^sl-144-5

**6** אַבְרֵיק בַּרְקָא וּבַדְרִנוּן שַׁדַר גִרְרִיךְ וּתְשַׁגְשִׁינוּן: ^sl-144-6

**7** אוֹשִׁיט יְדָךְ מִן שְׁמֵי מְרוֹמָא פְּצֵי יָתִי וְשֵׁיזֵיב יָתִי מְאוּכְלוֹסִין דִמְתִילִין לְמַיִין סַגִיעִין מִן יֶדְהוֹן דְבְנֵי נוּכְרָאִין: ^sl-144-7

**8** דִי פוּמְהוֹן מְמַלֵל מוֹמָתָא דְמַגָן וְאוֹרַיָתְהוֹן אוֹרָיַת שִׁקְרָא: ^sl-144-8

**9** אֱלֹהִים שְׁבָח חֲדָת אֲשַׁבַּח קֳדָמָךְ בְּנִבְלָא עֲסַרְתֵּי נִימִין אֲזַמֵר קֳדָמָךְ: ^sl-144-9

**10** דִיהַב פּוּרְקָן לְמַלְכַיָא דְפָצֵי יַת דָוִד עַבְדֵיהּ מֵחַרְבָּא בִישָׁא דְגָלְיָת: ^sl-144-10

**11** פְּצֵי יָתִי וְשֵׁיזִיב יָתִי מִידֵיהוֹן דִּבְנֵי נוּכְרָאִין דִּי פוּמְהוֹן מַלֵל מוֹמָתָא דְמַגָן וְאוֹרַיָתְהוֹן אוֹרָיַת שִׁקְרָא: ^sl-144-11

**12** דִבְנָנָא כִּנְצִיבִין דְדִקְלִין בְּאוּלְפָן אוֹרַיְתָא רַבְיָן מִן טַלְיוּתְהוֹן בְּנָתָנָא זִוְתָנִין וּכְשֵׁרִין לְכַהֲנַיָא דִמְשַׁמְשִׁין בִּמְצַע הֵיכְלָא: ^sl-144-12

**13** תַּסְוָרָנָא מַלְיָן מְסַפְּקָן מִן שַׁתָּא לְשַׁתָּא עָאנָנָא מְיַלְדָן אַלְפַיָא מַפְשָׁן רִבְוָתָא בְּאִשְׁקָקָנָא: ^sl-144-13

**14** תּוֹרִיָנָא מָרֵי מַטוּל לֵית תְּקוֹף וְלָא מַפְקָא בִישָׁא וְלֵית צִוְחַת בִּכְיֵתָא בִּפְלַטְיָתָנָא: ^sl-144-14

**15** טוּבוֹי דְעַמָא דְהֵכְדֵין לֵיהּ טוּבוֹי דְעַמָא דַייָ אֱלָהֵיהּ: ^sl-144-15

## Capítulo 145

**1** תּוּשְׁבַּחְתָּא לְדָוִד אֲרוֹמְמִנָךְ אֱלָהִי מַלְכָּא וַאֲבָרֵךְ שְׁמָךְ לְעָלְמֵי עָלְמִין: ^sl-145-1

**2** בְּכָל יוֹמָא אֲבָרְכִנָךְ וַאֲשַׁבַּח שְׁמָךְ לְעָלְמֵי עָלְמִין: ^sl-145-2

**3** רַב יְיָ וּמְשַׁבַּח לַחֲדָא וְלִרְבוּתֵיהּ לֵית סוֹף: ^sl-145-3

**4** דָרָא לְדָרָא יְשַׁבַּח עוֹבָדָךְ וּגְבוּרְתָּךְ יְתַנוּן: ^sl-145-4

**5** שִׁבְהוֹר אַיְקָר זִיוָךְ וּמִלֵי פְּרִישְׁוָתָךְ אֲמַלֵל: ^sl-145-5

**6** וְעוּשְׁנָא דְחַלְתָּךְ יֵימְרוּן וְרַבָּנוּתָךְ יִשְׁתָּעוּן: ^sl-145-6

**7** דָכְרָן סַגִיעֵי טוּבָךְ יַבִּיעוּן וְצִדְקָתָךְ יְשַׁבְּחוּן: ^sl-145-7

**8** חָנָנָא וְרַחֲמָנָא יְיָ מַרְחִיק רְגַז וּמַסְגֵי לְמֶעְבַּד טַבְוָן: ^sl-145-8

**9** טָב יְיָ לְכוֹלָא וְרַחֲמוֹי עַל כּוּלְהוֹן עוֹבָדוֹי: ^sl-145-9

**10** יְהוֹדוּנָךְ יְיָ כּוּלְהוֹן עוֹבָדָךְ וַחֲסִידָיִךְ יְבָרְכִינָךְ: ^sl-145-10

**11** אַיְקַר מַלְכוּתָךְ יֵימְרוּן וּגְבוּרְתָּךְ יְמַלְלוּן: ^sl-145-11

**12** לְהוֹדָעָא לִבְנֵי נָשָׁא גְבוּרָתוֹי וְאַיְקָר שִׁיבְהוֹר מַלְכוּתֵיהּ: ^sl-145-12

**13** מַלְכוּתָךְ מַלְכוּתָא דְכָל עָלְמַיָא וְשׁוּלְטָנוּתָךְ בְּכָל דָר וְדָר: ^sl-145-13

**14** סָעִיד יְיָ לְכָל נְפִילִין וְזָקֵיף לְכוּלְהוֹן כְּפִיפִין: ^sl-145-14

**15** עֵינֵיהוֹן דְכוֹלָא לְוָתָךְ סְבִירָן וְאַתְּ יָהֵב לְהוֹן יַת מֵיכַלְהוֹן בְּזִמְנֵיהּ: ^sl-145-15

**16** פּוֹתֵחַ יַת אַיְדָךְ וּמַסְבַּע לְכוּלְהוֹן חַיֵי רְעוּתְהוֹן: ^sl-145-16

**17** זַכַּי יְיָ בְּכָל אוֹרְחָתֵיהּ וַחֲסִידָא בְכָל עוֹבָדוֹי: ^sl-145-17

**18** קָרֵב יְיָ לְכָל דְקָרְיָן לֵיהּ לְכוּלְהוֹן דְקָרְיָן יָתֵיהּ בִּקְשׁוֹט: ^sl-145-18

**19** רְעוּת דָחֲלוֹי יַעְבֵּד וְיַת בָּעוּתְהוֹן יִשְׁמַע וְיִפְרְקִנוּן: ^sl-145-19

**20** נָטֵר יְיָ יַת כָּל רְחִימוֹי וְיַת כָּל רַשִׁיעֵי יְשֵׁיצֵי: ^sl-145-20

**21** שְׁבָחָא דַייָ יְמַלֵל פּוּמִי וִיבָרְכוּן כָּל בְּנֵי בִסְרָא שׁוּם קוּדְשֵׁיהּ לְעָלְמֵי עָלְמִין: ^sl-145-21

## Capítulo 146

**1** הַלְלוּיָהּ שַׁבַּחִי נַפְשִׁי יַת שְׁמָא דַיָי: ^sl-146-1

**2** אֲשַׁבַּח יְיָ בְּחַיַי אֲזַמֵר לֶאֱלָהִי בִּדְאִיתִי: ^sl-146-2

**3** לָא תִתְרַחֲצוּן בְּרַבְרְבַיָא בְּבַר נָשׁ דְלֵית לֵיהּ פוּרְקָנָא: ^sl-146-3

**4** תִּפּוֹק רוּחֵיהּ יְתוּב לְעַפְרֵיהּ בְּיוֹמָא הַהוּא הוֹבַדוּ זִמְיוֹנוֹי: ^sl-146-4

**5** טוּבֵיהּ דֶאֱלָהָא יַעֲקֹב בְּסַעְדֵיהּ סַבְרֵיהּ עַל יְיָ אֱלָהֵיהּ: ^sl-146-5

**6** דַעֲבַד שְׁמַיָא וְאַרְעָא יַת יַמָא וְיַת כָּל דִי בְהוֹן דִי נַטֵר קְשׁוֹט לַעֲלָם: ^sl-146-6

**7** דִי עָבֵד דִינָא לִטְלוֹמִין יָהֵב מָזוֹן לִכְפִינִין יְיָ דְשָׁרֵי אֲסִירַיָא: ^sl-146-7

**8** יְיָ פָּקַח לְסַמְיָן יְיָ זָקֵף כְּפִיפִין יְיָ רָחֵם צַדִיקַיָא: ^sl-146-8

**9** יְיָ נְטַר יַת גִיוֹרָא יַתֵּם וְאַרְמְלָא יְסוֹבַר וְאוֹרְחָא דְרַשִׁיעֵי יְטַלְטֵל: ^sl-146-9

**10** יִמְלוֹךְ יְיָ לַעֲלַם אֱלָהָיִךְ צִיוֹן לְדָר וְדָר הַלְלוּיָהּ: ^sl-146-10

## Capítulo 147

**1** הַלְלוּיָהּ אֲרוּם טָב לְזַמָרָא קֳדָם אֱלָהָנָא אֲרוּם בְּסִים יַאֲיָא תּוּשְׁבַּחְתָּא: ^sl-147-1

**2** בָּנֵי יְרוּשְׁלֵם יְיָ גַלְוָת יִשְׂרָאֵל יְכַנֵס: ^sl-147-2

**3** דְמַסֵי לִתְבִירֵי לִבָּא וּמַסֵיק אַרְכָא לְצַעְרֵיהוֹן: ^sl-147-3

**4** מָנֵי סְכוֹם לְכוֹכְבַיָא לְכוּלְהוֹן בִּשְׁמָא קָרֵי: ^sl-147-4

**5** רַב מָרָנָא וְסַגִי חֵילָא לְסוּכְלְתָנוּתֵיהּ לֵית סְכוּם: ^sl-147-5

**6** מְסוֹבַר עִנְוְתָנַיָא יְיָ מַכִיךְ רַשִׁיעַיָא עֲדֵי אַרְעָא: ^sl-147-6

**7** שַׁבַּחוּ קֳדָם יְיָ בְתוֹדָתָא זַמַרוּ קֳדָם אֱלָהָנָא בְּכִנָרָא: ^sl-147-7

**8** דַחֲפֵי שְׁמַיָא בַּעֲנָנָא דִמְתַקֵן לְאַרְעָא מִטְרָא דִמְרַבֵּי טוּרַיָא עִסְבֵּי: ^sl-147-8

**9** יָהֵב לִבְעִירָא מְזוֹנָא לִבְנֵי עוּרְבָא דְקָרָן: ^sl-147-9

**10** לָא בִגְבוּרְתָּא דִרְכִיבִין עַל סוּסֵי יִצְבֵי לָא בְשׁוֹקֵי גוּבְרִין רַחֲמָנִין יִצְבֵי: ^sl-147-10

**11** רָעֵי יְיָ יַת דָחֲלוֹי יַת דְמוֹרִיכִין לְטוּבֵיהּ: ^sl-147-11

**12** שַׁבַּחִי יְרוּשְׁלֵם יַת יְיָ שַׁבַּחִי אֱלָהָיִךְ צִיוֹן: ^sl-147-12

**13** אֲרוּם תַקֵף נַגְרֵי תַרְעַיִךְ בְּרִיךְ בָנַיְכִי בִּמְצָעַיִךְ: ^sl-147-13

**14** דְשַׁוֵי תְחוּמָךְ שְׁלָם שְׁמָן חִנְטַיָא יַסְבְּעִנָךְ: ^sl-147-14

**15** דִמְשַׁדַר מֵימְרֵיהּ לְאַרְעָא עַד סַרְהוֹבָא יִרְהוּט מִלוּלֵיהּ: ^sl-147-15

**16** דִיהַב תַלְגָא חִוָר הֵיךְ עֲמַר גְלִיד הֵיךְ קְטַם יְבַדַר: ^sl-147-16

**17** מַטְלֵק קַרְחֵיהּ פְּלִיג הֵיךְ רִסוּקִין דְמִן קֳדָם קוֹרֵיהּ מַן אֶפְשַׁר לֵיהּ לְמֵקָם: ^sl-147-17

**18** יְשַׁדַר קִדוּם חַמְתֵיהּ וְיַמְסִנוּן יַנְתֵב רוּחֵיהּ זַלְחִין מַיָא: ^sl-147-18

**19** דְתָנֵי דִבְרַיָא דְאוֹרַיְתָא לְיַעֲקֹב קְיָמוֹי וְדִינוֹי לְיִשְׂרָאֵל: ^sl-147-19

**20** לָא עֲבַד הֵיכְנָא לְכָל עַמָא וְדִינִין לָא הוֹדְעִינוּן הַלְלוּיָהּ: ^sl-147-20

## Capítulo 148

**1** הַלְלוּיָהּ שַׁבַּחוּ יַת יְיָ בִּרְיָתָא קַדִישַׁיָא מִן שְׁמַיָא שַׁבַּחוּ יָתֵיהּ כָּל חֵילֵי אַנְגְלֵי מְרוֹמָא: ^sl-148-1

**2** שַׁבַּחוּ יָתֵיהּ כָּל מַלְאָכַיָא דִי מְשַׁמְשִׁין קֳדָמוֹי שַׁבַּחוּ יָתֵיהּ כָּל חֵלְוָתֵיהּ: ^sl-148-2

**3** שַׁבַּחוּ יָתֵיהּ שִׁמְשָׁא וְסִיהֲרָא שַׁבַּחוּ יָתֵיהּ כָּל כּוֹכְבֵי נְהוֹרָא: ^sl-148-3

**4** שַׁבַּחוּ יָתֵיהּ שְׁמֵי שְׁמַיָא וּמַיָא דְתָלִין בְּמֵימְרָא מֵעִלַוֵי שְׁמַיָא: ^sl-148-4

**5** יְשַׁבְּחוּן יַת שְׁמָא דַייָ אֲרוּם הוּא פַּקֵיד וְאִתְבְּרִיאוּ: ^sl-148-5

**6** וַהֲקִימִנוּן לְעַלְמֵי עָלְמִין גְזֵירְתָּא יְהַב וְלָא יֶעֱבַּר: ^sl-148-6

**7** שַׁבַּחוּ יַת יְיָ מִן אַרְעָא תַּנִינַיָא וְכָל תְּהוֹמַיָא: ^sl-148-7

**8** אֶשָׁא וּבַרְדָא תַּלְגָא וְקִטְרָא רוּחַ עַלְעוּלָא עָבְדָא פִתְגָמֵיהּ: ^sl-148-8

**9** טוּרַיָא וְכָל גַלְמָתָא אִילָן דַעֲבַד פֵּרִין וְכָל אַרְזִין: ^sl-148-9

**10** חַיָתָא וְכָל בְּעִירָא רִיחֲשָׁא וְצִפַּר גַדְפָא דְפָרַח: ^sl-148-10

**11** מַלְכַיָא דְאַרְעָא וְכָל אוּמַיָא רַבְרְבָנַיָא וְכָל דַיָנֵי אַרְעָא: ^sl-148-11

**12** עוּלֵימָא וּלְחוֹד בְּתוּלָן סָבַיָא עִם טָלַיָא: ^sl-148-12

**13** יְשַׁבְּחוּן יַת שְׁמָא דַייָ אֲרוּם תַּקִיף שְׁמֵיהּ בִּלְחוֹדוֹי תּוּשְׁבַּחְתֵּיהּ עַל אַרְעָא וּשְׁמַיָא: ^sl-148-13

**14** וּזְקַף אַיְקָר לְעַמֵיהּ שְׁבָחָא לְכָל חֲסִידוֹי לִבְנֵי יִשְׂרָאֵל עַמָא דִקְרוֹבִין לֵיהּ שַׁבַּחוּ יַת יְיָ: ^sl-148-14

## Capítulo 149

**1** שַׁבַּחוּ קֳדָם יְיָ שְׁבַח חֲדָת תּוּשְׁבַּחְתֵּיהּ בִּקְהָלָא דַחֲסִידֵי: ^sl-149-1

**2** יֶחְדוּן דְבֵית יִשְׂרָאֵל בְּעוֹבְדֵיהוֹן בְּנֵי צִיוֹן יְדוּצוּן בְּמַלְכֵהוֹן: ^sl-149-2

**3** יְשַׁבְּחוּן שְׁמֵיהּ בְּחִנְגִין בְּתוּפִין וְכִנָרִין יְזַמְרוּן לֵיהּ: ^sl-149-3

**4** אֲרוּם רְעוּתָא דַייָ בְּעַמֵיהּ יְשַׁבְּחוּן עִנְוְתָנַיָא בְּפוּרְקָנָא: ^sl-149-4

**5** יַבּוּעוּן חֲסִידֵי בִּיקָרָא יְרַנְנוּן עַל דִמְכֵיהוֹן: ^sl-149-5

**6** תּוּשְׁבְּחָן דֶאֱלָהָא בְּעוּנְקֵהוֹן וְהֵיךְ סַיְפָא דְיוּסְטְרָא בְּאַיְדֵיהוֹן: ^sl-149-6

**7** לְמֶעְבַּד נִקְמְתָא בְּעַמַיָא מִכְסָנוּתָא בְאוּמַיָא: ^sl-149-7

**8** לְמֵיסַר מַלְכֵיהוֹן בְּשִׁירִין וְיַקִירֵיהוֹן בְּכַבְלֵי דְפַרְזְלָא: ^sl-149-8

**9** לְמֶעְבַּד בְּהוֹן דִין דִכְתִיב בְּאוֹרַיְתָא שִׁבְהוֹרָא הוּא לְכָל חֲסִידוֹי הַלְלוּיָהּ: ^sl-149-9

## Capítulo 150

**1** הַלְלוּיָהּ שַׁבַּחוּ אֱלָהָא בְּבֵית מַקְדְשֵׁיהּ שַׁבַּחוּ יָתֵיהּ בִּרְקִיעָא דְעוּשְׁנֵיהּ: ^sl-150-1

**2** שַׁבַּחוּ יָתֵיהּ בִּגְבוּרְתֵּיהּ שַׁבַּחוּ יָתֵיהּ הֵיךְ סוּגְעֵי רְבוּתֵיהּ: ^sl-150-2

**3** שַׁבַּחוּ יָתֵיהּ בִּתְקִיעוּתָא דְשׁוֹפָרָא שַׁבַּחוּ יָתֵי בְּנִבְלִין וְכִינָרִין: ^sl-150-3

**4** שַׁבַּחוּ יָתֵיהּ בְּתוּפִין וּבְחִנְגִין שַׁבַּחוּ יָתֵיהּ בַּחֲלִילִין וְאַבּוּבִין: ^sl-150-4

**5** שַׁבַּחוּ יָתֵיהּ בְּצִלְצַלְוָן דְשָׁמְעִין בִּלְחוֹדֵיהוֹן שַׁבַּחוּ יָתֵיהּ בְּצִלְצַלְוָן דְמַשְׁמְעִין בְּיַבָּבָא: ^sl-150-5

**6** כֹּל נִשְׁמָתָא תְּשַׁבַּח יָהּ הַלְלוּיָהּ: ^sl-150-6