---
id: targum-jonatas-mg-23-isaias
type: primary_text
title: Isaías (Targum Jônatas)
original_title: ישעיהו
translator:
- Jonathan ben Uzziel
base_edition: Targum Jônatas dos Profetas, texto das Mikraot Gedolot (a Bíblia rabínica), na digitalização do Sefaria
language: arc
tags:
- bible
- targum
- targum-jonathan
- aramaic
- prophets
- tanakh
status: draft
project: pedra_angular
reference_system: verse
abbrev: Is
book_number: 23
urn_work: urn:cts:pedraAngular:bible.Isa
urn: urn:cts:pedraAngular:bible.Isa.jonathan-arc1
source: Sefaria-Export (sefaria.org), versão "Mikraot Gedolot" de "Targum Jonathan on Isaiah", lida em 2026-10-10.
source_repo: Sefaria/Sefaria-Export
source_file: json/Tanakh/Targum/Targum Jonathan/Prophets/Targum Jonathan on Isaiah/Hebrew/Mikraot Gedolot.json
license: public-domain
publishable: true
processing: JSON do Sefaria-Export posto na forma das Bíblias do acervo por Διαφορεύς, Claude Opus 5.5, em 2026-10-10 (sefaria_para_acervo.py). Nenhuma normalização de grafia ou de vocalização; só os espaços nas pontas do versículo saíram.
---

# Isaías — תרגום יונתן

## Capítulo 1

**1** נְבוּאַת יְשַׁעְיָה בַר אָמוֹץ דְאִתְנַבֵּי עַל אֱנַשׁ יְהוּדָה וְיָתְבֵי יְרוּשְׁלֵם בִּימֵי עֻזִיָה יוֹתָם אָחָז יְחִזְקִיָהוּ מַלְכַיָא דְבֵית יְהוּדָה: ^is-1-1

**2** שְׁמַעוּ שְׁמַיָא דְזָעוּ כַּד יְהָבִית אוֹרַיְתִי לְעַמִי וַאֲצִיתִי אַרְעָא דְאִתְרְגִישַׁת מִן קֳדָם פִּתְגָמַי אֲרֵי יְיָ מַלֵיל עִמִי בֵּית יִשְׂרָאֵל קְרִיתִי לְהוֹן בְּנִין חֲבַבְתִּינוּן וִיקַרְתִּנּוּן וְאִנוּן מְרַדוּ בְמֵימְרִי: ^is-1-2

**3** יְדַע תּוֹרָא זָבְּנֵיהּ וַחֲמָרָא אוֹרְיָא דִמְרוֹהִי יִשְׂרָאֵל לָא אֲלִיף לְמִדַע דְחַלְתִּי עַמָא לָא אִסְתַּכֵּל לְמֵתָב לְאוֹרַיְתִי: ^is-1-3

**4** וַי עַל דְאִתְקְרִיאוּ עַם קַדִישׁ וַחֲטוֹ כְּנִישָׁא בְחִירָא וְאַסְגִיאוּ חוֹבִין אִתְכְּנִיאוּ בְזַרְעָא רְחִימָא וְאַבְאִישׁוּ אִתְאַמַר לְהוֹן בְּנִין חֲבִיבִין וְחַבִּילוּ אוֹרְחָתְהוֹן שְׁבַקוּ יַת פּוּלְחָנָא דַייָ קָצוּ בְּדַחֲלַת קַדִישָׁא דְיִשְׂרָאֵל וּבְדִיל עוֹבְדֵיהוֹן בִּישַׁיָא אִסְתְּחֲרוּ וַהֲווֹ לְאַחוֹרָא: ^is-1-4

**5** לָא מִסְתַּכְּלִין לְמֵימָר עַל מָה לָקַנָא עוֹד מוֹסְפִין לְמֶחְטֵי וְלָא אָמְרִין מָה דֵין כָּל רֵישׁ מְרַע וְכָל לֵב דַוָי: ^is-1-5

**6** מִשְׁאָר עַמָא וְעַד רֵישָׁא לֵית בְּהוֹן דִשְׁלִים בִּדְחַלְתִּי כּוּלְהוֹן סָרְבִין וּמָרְדִין אִתְגַעֲלוּ בְחוֹבִין כְּמָחָא מְרַסְסָא לָא שָׁבְקִין מִזְדוֹנֵיהוֹן וְלָא מְחַמְדִין לִתְיוּבְתָּא אַף לָא זַכְוָן לְהוֹן לְאַגָנָא עֲלֵיהוֹן: ^is-1-6

**7** אַרְעֲכוֹן צַדְיָא קִרְוֵיכוֹן יְקִידַת נוּר אַרְעֲכוֹן לְקִבְלֵיכוֹן עַמְמַיָא מַחְסְנִין יָתָהּ וּבְחוֹבֵיהוֹן צְדִיאַת מִנְכוֹן אִתְחַלָפַת וַהֲוָה לְנוּכְרָאִין: ^is-1-7

**8** וְאִשְׁתְּאַרַת כְּנִשְׁתָּא דְצִיוֹן כְּמִטַלַלְתָּא בְּכַרְמָא בָּתַר דְקַטְפוּהִי כְּעַרְסַל מַבְּתּוּתָא בְּמִקְשַׁיָא בָּתַר דִאַבְעָיוּהִי כְּקַרְתָּא דְצָיְרִין עֲלָהּ: ^is-1-8

**9** אִלוּלָפוֹן מוֹתָר טוּבֵיהּ דַייָ צְבָאוֹת אַשְׁאַר לָנָא שֵׁיזְבָא בְּרַחֲמוֹהִי אִית עִמָנָא חוֹבִין דְכֶאֱנָשׁ סְדוֹם פּוֹן אֲבַדְנָא וּכְיָתְבֵי עֲמוֹרָה אִשְׁתֵּיצָנָא: ^is-1-9

**10** קַבִּילוּ פִּתְגָמָא דַייָ שִׁלְטוֹנַיָא דְעוֹבָדֵיהוֹן בִּישִׁין כְּשִׁלְטוֹנֵי סְדוֹם אֲצִיתוּ לְאוֹרַיְתָא דֶאֱלָהָנָא עַמָא דְעָבְדֵיהוֹן דָמְיָן לְעַם עֲמוֹרָה: ^is-1-10

**11** לָא רַעֲוָא קֳדָמַי בִּסְגִיאוּת נִכְסַת קוּדְשֵׁיכוֹן אֲמַר יְיָ שְׂבַעֵית מִסַת עֲלָוָת דִכְרִין וּתְרַב פַּטִימִין וְדַם תּוֹרִין וְאִמְרִין וְגַדְיָן דִכְאִלֵין לָא רַעֲוָא קֳדָמַי בְּהוֹן: ^is-1-11

**12** כַּד אַתּוּן אָתָן לְאִתְחֲזָאָה קֳדָמַי מַן תְּבַע דָא מִיֶדְכוֹן לְמֵיתֵי וּלְאִתְדָשָׁא עֲזָרָתִי: ^is-1-12

**13** לָא תוֹסְפוּן לְאַיְתָאָה מִנְחַת אֲנִיסָא קוּרְבַּן מְרַחַק הוּא קֳדָמַי יַרְחִין וְשַׁבִּין כְּנִישָׁא אַתּוּן מִתְכַּנְשִׁין לָא שָׁבְקִין חוֹבֵיכוֹן לְקַבְּלָא צְלוֹתְכוֹן בְּעִדַן כְּנִישַׁתְכוֹן: ^is-1-13

**14** יַרְחֵיכוֹן וּמוֹעֲדֵיכוֹן רָחֵיק מֵימְרִי הֲווֹ קֳדָמַי לְרִחוּק אַסְגֵיתִי לְמִשְׁבָּק: ^is-1-14

**15** וְכַד כַּהֲנַיָא פָּרְסִין יְדֵהוֹן לְצַלָאָה עֲלֵיכוֹן מְסַלֵיקְנָא אַפֵּי שְׁכִנְתִּי מִנְכוֹן וְאַף כַּד אַתּוּן מַסְגַן לְצַלָאָה לָא רַעֲוָא קֳדָמַי לְקַבָּלָא צְלוֹתְכוֹן מִדִי יֶדְכוֹן דַם זַכַּאי מַלְיָן: ^is-1-15

**16** תּוּבוּ לְאוֹרַיְתָא וְאִדַכּוּ מֵחוֹבֵיכוֹן וְאַעְדוֹ בִישׁוּת עוֹבָדֵיכוֹן מִקֳבֵיל מֵימְרִי אִתְמְנִיעוּ מִלְאַבְאָשָׁא: ^is-1-16

**17** אַלִיפוּ לְאוֹטָבָא תְּבָעוּ דִינָא זַכּוּ דַאֲנִיס דוּנוּ דִין יַתְמָא עֲבִידוּ קַבִּילוּ קְבֵילַת אַרְמַלְתָּא: ^is-1-17

**18** בְּכֵן כַּד תְּתוּבוּן לְאוֹרַיְתָא תִּבְעוּן מִן קֳדָמַי וְאַעְבֵּיד בָּעוּתְכוֹן אֲמַר יְיָ אִם יְהוֹן חוֹבֵיכוֹן כְּתִימִין כְּצִבְעוֹנִין כְּתַלְגָא יֶחֱוָרוּן אִם יִסְמְקוּן כְּזָהֳרֵיתָא כַּעֲמַר נְקֵי יְהוֹן: ^is-1-18

**19** אִם תֵּיבוּן וּתְקַבְּלוּ לְמֵימְרִי טוּבָא דְאַרְעָא תֵּיכְלוּן: ^is-1-19

**20** וְאִם תְּסָרְבוּן וְלָא תְקַבְּלוּן לְמֵימְרִי בְּחֶרֶב סָגְאָה תִּתְקַטְלוּן אֲרֵי מֵימְרָא דַייָ גְזַר כֵּן: ^is-1-20

**21** אֵיכְדֵין תָּבוּ עוֹבְדָהָא לְמֶהֱוֵי כְטָעִיתָא קַרְתָּא מְהֵימַנְתָּא דַהֲוַת מַלְיָא עָבְדֵי דִינָא קוּשְׁטָא הֲוָה מִתְעֲבֵיד בָּהּ וּכְעַן אִינוּן קְטוֹלֵי נַפְשָׁן: ^is-1-21

**22** כַּסְפֵּךְ הֲוָה לִפְסוּלָא וְחַמְרֵיךְ מְעָרָב בְּמַיָא: ^is-1-22

**23** רַבְרְבַיִךְ מָרְדִין וְשׁוּתָּפִין לְגַנָבִין כּוּלְהוֹן רְחִימִין לְקַבָּלָא שׁוֹחֲדָא אָמְרִין גְבַר לְחַבְרֵיהּ עֲבֵיד לִי טַב בְּדִינִי וַאֲשַׁלֵם לָךְ בְּדִינָךְ דִין יַתְמָא לָא דַיְנִין וּקְבֵילַת אַרְמַלְתָּא לָא עֲלַת לָקֳדָמֵיהוֹן: ^is-1-23

**24** בְּכֵן אֲמַר רִבּוֹן עַלְמָא יְיָ צְבָאוֹת תַּקִיפָא דְיִשְׂרָאֵל קַרְתָּא יְרוּשְׁלֵם אֲנָא עֲתִיד לְנַחֲמוּתָהּ בְּרַם וַי לְרַשִׁיעַיָא כַּד אִתְגְלֵי לְמֶעְבַּד פּוּרְעֲנוּת דִין מְסַנְאֵי עַמִי וְאָתִיב נְקָמָא לִבְעֵיל דְבָבִי: ^is-1-24

**25** וְאָתִיב מְחַת גְבוּרְתִּי עֲלָךְ וַאֲבָרֵר כְּמָא דִמְנַקַן בְּבוֹרִיתָא כָּל רַשִׁיעַיָא וְאַעְדִי כָּל חוֹבָךְ: ^is-1-25

**26** וַאֲמַנֵי בִיךְ דַיָנֵי קוּשְׁטָא תַקְנִין כִּבְקַדְמֵיתָא וּמָלְכֵי מִלְכָךְ כַּד מִן אַוְלָא וּבָתַר כֵּן יִתְקְרֵי לָךְ קַרְתָּא דְקוּשְׁטָא קַרְתָּא מְהֵימַנְתָּא: ^is-1-26

**27** צִיוֹן כַּד יִתְעֲבֵד בָּהּ דִינָא תִתְפְּרוֹק וְדַעֲבָדוּ אוֹרַיְתָא יְתוּבוּן לָהּ בְּזָכוּ: ^is-1-27

**28** וְיִתַּבְּרוּן מָרוֹדִין וְחַיָבִין כַּחֲדָא וְדִשְׁבָקוּ אוֹרַיְתָא דַייָ יִשְׁתֵּיצוּן: ^is-1-28

**29** אֲרֵי תִּתְבַּהֲתוּן מֵאִילָנֵי טַעֲוָתָא דַחֲמַדְתּוּן וְתִתְכַּנְעוּן מִגִנֵי טַעֲוָתָא דְאַתּוּן מִסְתַּיְעִין בְּהוֹן: ^is-1-29

**30** אֲרֵי תְהוֹן כְּבוּטְמָא דִי מְנַתַּר טַרְפוֹהִי וּכְגִנַת שַׁקְיָא דְמַיָן לֵית לָהּ: ^is-1-30

**31** וִיהֵי תוּקְפֵיהוֹן דְרַשִׁיעַיָא כִּנְעוֹרֶת כִּתָּנָא וְעוֹבַד יֶדְהוֹן כְּנִיצוֹץ נוּרָא כְּמָא דִמְקָרְבִין דֵין לִסְטַר דֵין וְדָלְקִין תַּרְוֵיהוֹן כַּחֲדָא כֵּן יְסוּפוּן רַשִׁיעַיָא אִינוּן וְעוֹבָדֵיהוֹן בִּישַׁיָא וְלָא יְהֵא עֲלֵיהוֹן חַיָס: ^is-1-31

## Capítulo 2

**1** פִּתְגָם נְבוּאָה דְאִתְנַבֵּי יְשַׁעְיָה בַּר אָמוֹץ עַל אֱנַשׁ יְהוּדָה וְיַתְבֵי יְרוּשְׁלֵם: ^is-2-1

**2** וִיהֵי בְּסוֹף יוֹמַיָא מְתַקֵן יְהֵי טוּר בֵּית מַקְדְשָׁא דַייָ בְּרֵישׁ טוּרַיָא וּמְנַטַל מֵרָמָתָא וְיִתְפְּנוּן לְמִפְלַח עֲלוֹהִי כָּל מַלְכוּתָא: ^is-2-2

**3** יִיהָבוּן עַמְמִין סַגִיאִין וְיֵמְרוּן אֱתוֹ וְנִסַק לְטוּר בֵּית מַקְדְשָׁא דַייָ לְבֵית שִׁכְנַת אֱלָהֵיהּ דְיַעֲקֹב וְיַלְפִינָנָא מֵאוֹרְחָן דְתַקְנָן קֳדָמוֹהִי וּנְהַךְ בְּאוּלְפַן אוֹרַיְתֵיהּ אֲרֵי מִצִיוֹן תִּפּוֹק אוֹרַיְתָא וְאוּלְפָן פִּתְגָמָא דַייָ מִירוּשְׁלֶם: ^is-2-3

**4** וְיָדִין בֵּין מִלְכְּוָתָא וְיוֹכַח לְעַמְמִין סַגִיאִין וִיעַפְפוּן סְיָפֵיהוֹן לְסִכִּין וּמוּרְנְיָתֵיהוֹן לְמַגָלִין לָא יִטוֹל עַם בְּאַפֵּי עַם זְיַן וְלָא יִתְאַלְפוּן עוֹד מִבְּכֵן קְרָבָא: ^is-2-4

**5** יֵימְרוּן דְבֵית יַעֲקֹב אֲתוֹ וּנְהַךְ בְּאוּלְפָן אוֹרַיְתָא דַיְיָ: ^is-2-5

**6** אֲרֵי שְׁבַקְתּוּן דַחֲלָא תַקִיפָא דַהֲוָה פָּרֵיק לְכוֹן דְבֵית יַעֲקֹב אֲרֵי אִתְמְלִיאַת אַרְעֲכוֹן טַעֲוָן כְּמִלְקַדְמִין וְעָנְנִין כִּפְלִשְׁתָּאֵי וּבְנִימוּסֵי עַמְמַיָא אָזְלִין: ^is-2-6

**7** וְאִתְמְלִיאַת אַרְעֲהוֹן כְּסַף וּדְהַב וְלֵית סוֹף לְגִנְזוֹהִי וְאִתְמְלִיאַת אַרְעֲהוֹן סוּסְוָן וְלֵית סוֹף לִרְתִיכוֹהִי: ^is-2-7

**8** וְאִתְמְלִיאַת אַרְעֲהוֹן טַעֲוָן לְעוֹבָדֵי יְדֵיהוֹן סָגְדִין לִדְאַתְקִינָא אֶצְבְּעָתֵיהוֹן: ^is-2-8

**9** וְיִמְאַךְ אֱנָשָׁא וַיֶחֱלַשׁ תְּקוֹף גַבְרִין וְלָא תִשְׁבּוֹק לְהוֹן: ^is-2-9

**10** וְיַעֲלוּן לְמֶעֱרַק בְּמַעֲרַק בְּטִנָרָא וּלְאִטַמָרָא בְּעַפְרָא מִן קֳדָם דְחִילָא דַייָ וּמִזִיו יְקָרֵיהּ: ^is-2-10

**11** עֵינֵי רָמוּת אֱנָשָׁא יִמְאֲכָן וְיֶחֱלַשׁ תְּקוֹף גַבְרִין וּתְקֵיף יְיָ בִּלְחוֹדוֹהִי בְּעִדָנָא הַהִיא: ^is-2-11

**12** אֲרֵי יוֹמָא דַעֲתִיד לְמֵיתֵי מִן קֳדָם יְיָ צְבָאוֹת עַל כָּל גֵיוָתָנַיָא וּרְמֵי לִבָּא וְעַל כָּל תַּקִיפַיָא וְיִמְאֲכוּן: ^is-2-12

**13** וְעַל כָּל רַבְרְבָנֵי עַמְמַיָא תַּקִיפַיָא וַחֲסִינַיָא וְעַל כָּל טוּרְנֵי מְדִינָתָא: ^is-2-13

**14** וְעַל כָּל טוּרַיָא רָמַיָא וְעַל כָּל רָמְתָא מְנַטְלָתָא: ^is-2-14

**15** וְעַל כָל דְיָתְבִין בְּמִגְדָל רָם וְעַל כָּל דְשָׁרָן בְּשׁוּר כָּרִיךְ: ^is-2-15

**16** וְעַל כָּל דְיָתְבִין בְּנִיסֵי יַמָא וְעַל כָּל דְשָׁרָן בְּבִירַנְיָתָא שַׁפִּירָן: ^is-2-16

**17** וְיִמְאַךְ רָמוּת אֱנָשָׁא וְיֶחֱלַשׁ תְּקוֹף גַבְרִין וְתַקִיף יְיָ בִּלְחוֹדוֹהִי בְּעִדָנָא הַהִיא: ^is-2-17

**18** וְטַעֲוָתָא גְמִירָא יְסוּפוּן: ^is-2-18

**19** וְיַעֲלוּן בִּמְעָרַת טִנָרַיָא וּבִמְחִילֵי עַפְרָא מִן קֳדָם דְחַלְתָּא דַייָ וּמִזִיו יְקָרֵיהּ בְּאִתְגַלְיוּתֵי לְמִתְבַר רַשִׁיעֵי אַרְעָא: ^is-2-19

**20** בְּעִדָנָא הַהִיא יְרַחֲקוּן בְּנֵי אֱנָשָׁא יַת טַעֲוַת כַּסְפֵּיהוֹן וְיַת טַעֲוַת דְהַבְהוֹן דַעֲבָדוּ לְהוֹן לְמִסְגֵיד לְטַעֲוָתָא וּלְצַלְמָנַיָא: ^is-2-20

**21** לְמֵיעַל בִמְעָרַת טִנָרַיָא וּבִשְׁקִיפֵי כֵיפָא מִן קֳדָם דַחַלְתָּא דַייָ וּמִזִיו יְקָרֵיהּ בְּאִתְגַלְיוּתֵיהּ לְמִתְבַּר רַשִׁיעֵי אַרְעָא: ^is-2-21

**22** אִתְמְנָעוּ לְכוֹן מִלְאִשְׁתַּעְבָּדָא לְאֱנָשָׁא בְּמֶעְבְּדֵיהּ דַחֲלָא דְנִשְׁמַת רוּחַ חַיִין בְּאַפּוֹהִי אֲרֵי יוֹמָא דֵין הוּא קַיָם וּמְחַר לֵיתוֹהִי וְכִלְמָא חֲשִׁיב הוּא: ^is-2-22

## Capítulo 3

**1** אֲרֵי הָא רִבּוֹן עַלְמָא יְיָ צְבָאוֹת מַעְדֵי מִירוּשְׁלֵם וּמִיהוּדָה סְמַךְ וּסְעֵיד כָּל סְמַךְ מֵיכַל וְכָל סְעֵיד מִשְׁתֵּי: ^is-3-1

**2** גִבָּר וּגְבַר עֲבֵיד קְרָב דַיַין וְסָפַר וּמִשְׁתָּאֵל וְסָב: ^is-3-2

**3** רַב חַמְשִׁין וּנְסֵב אַפִּין וּמָלֵיךְ מֵילַךְ וַאֲמַר וּמִשְׁתְּמַע וְחַכִּים וְסוּכְלְתָן בְּעֵצָה: ^is-3-3

**4** וַאֲמַנֵי יַנְקַיָא פַּרְנָסֵיהוֹן וְחַלָשַׁיָא יִשְׁלְטוּן בְּהוֹן: ^is-3-4

**5** וְיִתְגָרוּן עַמָא גְבַר בִּגְבַר וּגְבַר בְּחַבְרֵיהּ יִשְׁלְטוּן עוּלֵימַיָא בְּסָבָא וּדְשַׁיִט בִּדְיַקִיר: ^is-3-5

**6** אֲרֵי יֵחוֹד גְבַר בַּאֲחוֹהִי מִזַרְעֲיַת בֵּית אֲבוּהִי לְמֵימַר כְּסוּ אִית לָךְ רַב תְּהֵא עֲלָנָא וּמַגְבִּיתָא הָדָא תְּהֵא תְּחוֹת יְדָךְ: ^is-3-6

**7** יְתִיב בְּעִדָנָא הַהִיא לְמֵימָר לֵית אֲנָא כָשַׁר לְמֶהֱוֶי רֵישׁ וּבְבֵיתִי לֵית מָה דְאֵיכוּל וְלֵית מָה דְאִתְכַּסֵי לָא תְמַנוּנִי רַב בְּרֵישׁ כָּל עַמָא: ^is-3-7

**8** אֲרֵי אִתְקִילוּ יַתְבֵי יְרוּשְׁלֵם וֶאֱנַשׁ יְהוּדָה גָלוּ אֲרֵי מַמְלֵל פּוּמְהוֹן וַאֲגַר עוֹבָדֵיהוֹן גְלַן קֳדָם יְיָ וּמַרְגְזִין קֳדָם יְקָרֵיהּ: ^is-3-8

**9** אִשְׁתְּמוֹדָעוּת אַפֵּיהוֹן בְּדִינָא אַסְהֵיד בְּהוֹן וַחֲטָאֵיהוֹן כִּסְדוֹמָאֵי קָבְלִין וְלָא מָנְעִין וַי לְנַפְשֵׁיהוֹן אֲרֵי גְרַמוּ דְתֵיתֵי לְהוֹן בִּישָׁא: ^is-3-9

**10** אֱמָרוּ לְצַדִיקָא טוֹבֵיכוֹן אֲרֵי פֵרַי עוֹבָדֵיהוֹן יִשְׁתַּלְמוּן: ^is-3-10

**11** וַי לְרַשִׁיעַיָא דְעוֹבָדֵיהוֹן בִּישִׁין אֲרֵי גֻמְלָא דִידֵיהוֹן יִתְּתֵב לְהוֹן: ^is-3-11

**12** עַמִי דְסִרְכוֹהִי בַזְזְהוֹי כִמְעַלְלֵי לְכַרְמָא וּכְמָרֵי חוֹבָא שַׁלִיטוּ בֵּיהּ עַמִי מְשַׁבְּחָךְ אַטְעֲיוּךְ וְאוֹרַח שְׁבִילָךְ קִלְקִילוּ: ^is-3-12

**13** עֲתִיד לְמֵדָן יְיָ וּמִתְגְלֵי לְמֶעֱבַּד פּוּרְעֲנוּת דִין מִן עַמְמַיָא: ^is-3-13

**14** יְיָ בְּדִינָא יֵעוֹל יַת סָבֵי עַמָא וְסַרְכוֹהִי וְאַתּוּן אֲנִסְתּוּן יַת עַמִי חֲטוֹף מַסְכְּנָא בְּבָתֵּיכוֹן: ^is-3-14

**15** מַה לְכוֹן דְאַתּוּן מְמַסְכְּנִין יַת עַמִי וְאַפֵּי חֲשִׁיכַיָא מְבַלִין אַתּוּן וּמַיְתִין בְּדִינֵיהוֹן אֲמַר יְיָ אֱלֹהִים צְבָאוֹת: ^is-3-15

**16** וַאֲמַר יְיָ חֲלַף דְאִתְרַבְרְבָא בְנָת צִיוֹן וְאָזְלָן מְרִימָן צַוַאר וּמְסַרְבְּקָן עַיְנִין אָזְלָן וּבְפָּתְהָן מַקְפָן וּבְרַגְלֵהֶן מַרְגְזָן: ^is-3-16

**17** וִישַׁעְבֵּיד יְיָ יִקְרַת בְּנָת צִיוֹן וַיְיָ יְקָרְהָן יַעֲדִי: ^is-3-17

**18** בְּיוֹמָא הַהוּא יַעֲדִי יְיָ יַת תּוּשְׁבְּחַת דִמְסָנַיָא וּשְׁבִיסַיָא וְסִבְכַיָא: ^is-3-18

**19** עַנְקַיָא וְשֵׁירֵי יְדַיָא וַחֲנִיסְנְסַיָא: ^is-3-19

**20** כְּלִילַיָא וְשֵׁירֵי רְגִלַיָא וְקִלְמִסְמְסַיָא וְקָדָשַׁיָא וַחֲלִיטָתָא: ^is-3-20

**21** עִזְקָתָא וְטִלְטוּלַיָא: ^is-3-21

**22** כִּתּוּנַיָא וְשׁוֹשִׁיפַיָא לִבּוּרְנְקִיָא וּמַחְכַּיָא: ^is-3-22

**23** וּמַחְזְיָתָא וְקַרְטְסַיָא וְכִתָּרַיָא וּכְבֵינָתָא: ^is-3-23

**24** וִיהֵי אֲתַר דַהֲוָאָה יָהֲבַן בּוּסְמִין יִתְמְסֵי אֲתַר דַהֲוָאָה אָסְרָן פְּסִיקַיָא יְהֵי רוּשְׁמִין דִמְחָא וַחֲלַף אַקָפּוּת פָּתָא גִזוּז רֵישׁ וַחֲלַף דַהֲוָאָה מְהַלְכִין בְּגֵיוָה יַסְרָן סַקִין דָא פּוּרְעֲנוּתָא תִּתְעֲבֵיד מִנְהוֹן אֲרֵי טְעָאָה בְשׁוּפְרְהוֹן: ^is-3-24

**25** שְׁפַר גִבָּרַיִךְ בְּחַרְבָא יִתְקַטְלוּן וְעָבְדֵי נִצְחָנֵיךְ בִּקְרָבָא: ^is-3-25

**26** וְיִצְדוּן וִיסוּפוּן תַּרְעֵי קִרְוָהָא וְתִּתְרוֹקִין אַרְעָא וְתֶחְרוֹב: ^is-3-26

## Capítulo 4

**1** וְיִתְקְפָן שְׁבַע נְשִׁין בְּגַבְרָא חַד בְּעִדָנָא הַהִיא לְמֵימָר מִדִילָנָא נֵיכוּל וּמִידִילָנָא נִתְכְּסֵי לְחוֹד יִתְקְרֵי שְׁמָךְ עֲלָנָא כְּנוֹשׁ חִסוּדָנָא: ^is-4-1

**2** בְּעִדָנָא הַהוּא יְהֵי מְשִׁיחָא דַייָ לְחֶדְוָה וְלִיקָר וְעָבְדֵי אוֹרַיְתָא לִרְבוּ וּלְתוּשְׁבְּחָא לְשֵׁיזְבַת יִשְׂרָאֵל: ^is-4-2

**3** וִיהֵי דְאִשְׁתָּאַר יְתוּב לְצִיוֹן וּדְעָבַד אוֹרַיְתָא יִתְקַיֵם בִּירוּשְׁלֵם קַדִישׁ יִתְאֲמַר לֵיהּ כָּל דִכְתִיב לְחַיֵי עַלְמָא יֶחֱזֵי בִּנְחָמַת יְרוּשְׁלֵם: ^is-4-3

**4** אִם יַעֲדֵי יְיָ יַת תֶּגְאָלַת בְּנַת צִיוֹן וְיַת אַשְׁדֵי דַם זַכֵי דְבִירוּשְׁלֵם יִגְלֵי מִגַוָהּ בְּמֵימַר דִין וּבְמֵימַר גְמִירָא: ^is-4-4

**5** וְיִבְרִי יְיָ עַל כָּל מִקְדַשׁ טוּרָא דְצִיוֹן וְעַל אֲתַר בֵּית שְׁכִינְתֵּיהּ עֲנַן יְקַר יְהֵא מַטִיל עֲלוֹהִי בִימָמָא וְאַמִטְתָא וְזֵיהוֹר כְּאֵשָׁא שַׁלְהוֹבֵי בְּלֵילְיָא אֲרֵי יַתִּיר מִן יְקָרָא דַאֲמִיר לְאַיְתָאָה עֲלוֹהִי שְׁכִנְתָּא תְהֵי מְנַנָא עֲלוֹהִי בְּגִנוּן: ^is-4-5

**6** וְעַל יְרוּשָׁלֵם תְּהֵי מַטְלַת עֲנָנֵי לְאַטְלָלָה עֲלָהּ בִימָם מִשְׁרָב וּלְבֵית סֵתֶר וּלְאַגָנָא מִזַרְמִית וּמִמִטְרָא: ^is-4-6

## Capítulo 5

**1** אֲמַר נְבִיָא אַשְׁבְחֵיהּ כְּעַן לְיִשְׂרָאֵל דִמְתִיל לְכַרְמָא זַרְעֵיהּ דְאַבְרָהָם רַחֲמֵי תּוּשְׁבְּחַת רַחֲמִי לְכַרְמֵי עַמִי חֲבִיבַי יִשְׂרָאֵל יְהָבִית לְהוֹן אַחֲסָנָא בְּטוּר רָם בְּאַרְעָא שְׁמֵינָא: ^is-5-1

**2** וְקַדֵשְׁתִּינוּן וְיַקַרְתִּינוּן וְקַיַמְתִּינוּן כְּמַצַב גֶפֶן בְּחִירָא וּבְנִיתָא מַקְדְשִׁי בֵינֵיהוֹן וְאַף מַדְבְּחִי יְהָבִית לְכַפָּרָא עַל חֲטָאֵיהוֹן וַאֲמַרִית דְיַעְבְּדוּן עוֹבָדִין טָבִין קֳדָמַי וְאִינוּן אַבְאִישׁוּ עוֹבָדֵיהוֹן: ^is-5-2

**3** נְבִיָא אֲמַר לְהוֹן הָא בֵית יִשְׂרָאֵל מְרָדוּ מִן אוֹרַיְתָא וְלָא צָבָן לְמֵיתַב כְּעַן יַתְבֵי יְרוּשְׁלֵם וֶאֱנַשׁ יְהוּדָה דִינוּ כְעַן דִינָא קֳדָמַי מִן עַמִי: ^is-5-3

**4** מָה טָבָא אֲמָרִית לְמֶעְבַּד עוֹד לְעַמִי וְלָא עֲבָדִית לְהוֹן מַה דֵין אֲמָרִית דְיַעְבְּדוּן עוֹבָדִין טָבִין וְאִינוּן אַבְאִישׁוּ עוֹבָדֵיהוֹן: ^is-5-4

**5** וּכְעַן אֲחַוֵי כְעַן לְכוֹן יַת דַאֲנָא עֲתִיד לְמֶעְבַּד לְעַמִי אֲסַלֵק שְׁכִנְתִּי מִנְהוֹן וִיהוֹן לְמִבַּז אֶתְרַע בֵּית מַקְדַשְׁהוֹן וִיהוֹן לְדָיִשׁ: ^is-5-5

**6** וַאֲשַׁוִינוּן רְטִישִׁין לָא אִסְתַּעֲרוּן וְלָא יִסְתַּמָכוּן וִיהוֹן מְטַלְטְלִין וּשְׁבִיקִין וְעַל נְבִיַיָא אֲפַקֵיד דְלָא יִתְנַבּוּן עֲלֵיהוֹן נְבוּאָה: ^is-5-6

**7** אֲרֵי עַמָא דַייָ צְבָאוֹת בֵּית יִשְׂרָאֵל וֶאֱנַשׁ יְהוּדָה נִצְבָא דְחֶדְוָתֵיהּ וַאֲמָרֵית דְיַעְבְּדוּן דִינָא וְהָא אִינוּן אֲנוּסִין אֲמָרִית דְיַעְבְּדוּן זָכוּ וְהָא אִינוּן מַסְגַן חוֹבִין: ^is-5-7

**8** וַי דְמַקְפִין בֵּיתָא עַל בֵּיתָא חֲקַל אוּנְסָא בַּחֲקַלְתְּהוֹן מַקְרְבִין אָמְרִין עַד דְנַחְסִין כָּל אֲתַר וּמְדַמָן דְיָתְבִין בִּלְחוֹדֵיהוֹן בְּגַוָה דְאַרְעָא: ^is-5-8

**9** אֲמַר נְבִיָא בְּאוּדְנַי הֲוֵיתִי שָׁמַע כַּד אִתְגְזָרֵית דָא מִן קֳדָם יְיָ צְבָאוֹת אִם לָא בָּתִּין סַגִיאִין לְצָדוּ יְהוֹן רַבְרְבִין וְטָבִין מִבְּלִי יָתֵיב: ^is-5-9

**10** אֲרֵי בְחוֹבָא דְלָא יְהָבוּ מַעֲשְׂרַיָא בֵּית עֲסַר אַשְׁכְּרִין דִכְרַם יַעְבְּדוּן בֵּיתָא חֲדָא וּבֵית כּוֹר זֶרַע יַעְבֵּיד תְּלַת סָאִין: ^is-5-10

**11** וַי דִמְקַדְמִין בְּצַפְרָא לְמִשְׁתֵּי חֲמַר עַתִּיק רָדְפִין מְאַחְרִין לְמִפְטַר מְרַמְשִׁין עַל שִׁוְיֵהוֹן חֲמַר אוּנְסִין מַדְלֵיק לְהוֹן: ^is-5-11

**12** וַהֲוֵי עַל יְדֵי כִנוֹר וָנֵבֶל קַתְרוֹס אַבּוּבָא וְחַמְרָא מִשְׁתֵּיהוֹן וּבְאוֹרַיְתָא דַייָ לָא אִסְתַּכָּלוּ וְעוֹבֵד גְבוּרְתֵּיהּ לָא חֲזוֹ: ^is-5-12

**13** בְּכֵן גָלוּ עַמִי מִבְּלִי דַעְתָּא וְיַקִירֵהוֹן מִיתוּ בְכַפְנָא וְסִגְוְהוֹן בִּבְצוֹרָתָא בְצָחוּתָא: ^is-5-13

**14** בְּכֵן אַפְתִיאַת שְׁאוֹל נַפְשָׁהּ וּפְתָחַת פּוּמָהּ וְלֵית סוֹף וּנְחָתוּ יְקָרְהוֹן וְסִגְוְהוֹן וְאִתְרְגוּשְׁתְּהוֹן וְדִתְקוֹף בְּהוֹן: ^is-5-14

**15** וְיִמְאַךְ אֱנָשָׁא וְיֶחְלַשׁ תְּקוֹף גַבְרִין וְעֵינֵי רְמַיָא יִמְאֲכוּן: ^is-5-15

**16** וּתְקֵיף יְיָ צְבָאוֹת בְּדִינָא וֵאלָהָא קַדִישָׁא קַדִישׁ בִּזְכוּתָא: ^is-5-16

**17** וְיִתְפַּרְנְסוּן צַדִיקַיָא כְּמָא דַאֲמִיר עֲלֵיהוֹן יִסְגוֹן וְנִכְסֵי רַשִׁיעַיָא צַדִיקַיָא יַחְסְנוּן: ^is-5-17

**18** וַי דִמְשָׁרָן לְמֶחֱטֵי צַבְחַר נַגְדִין חוֹבִין בְּחַבְלֵי לְמָא אָזְלִין סָגָן עַד דְתַקִיפִין וְכִגְדִילַת עֶגְלְתָא חוֹבִין: ^is-5-18

**19** דְאָמְרִין אֵימָתַי יוֹחֵי וִיגַלֵי פְּרִשְׁתֵּיהּ בְּדִיל דְנֶחֱזֵי וְיִקְרַב וְיֵיתֵי מַלְכֵי דְקַדִישָׁא דְיִשְׂרָאֵל וְנֵדְעִינֵיהּ: ^is-5-19

**20** וַי דְאָמְרִין לְרַשִׁיעַיָא דְמַצְלְחִין בְּעַלְמָא הָדֵין אַתּוּן טָבַיָא וּלְעִנְוְתָנַיָא אָמְרִין אַתּוּן רַשִׁיעַיָא הֲלָא בְּמֵיתֵי נְהוֹרָא לְצַדִיקַיָא יַחֲשׁוֹךְ לְרַשִׁיעַיָא וִיבַסְמוּן פִּתְגָמֵי אוֹרַיְתָא לְעָבְדֵיהוֹן וְיֵיתֵי מֵרְדָא לְרַשִׁיעַיָא וְיֵדְעוּן דִבְסוֹפָא מְרִיר חֶטְאָה לֶעָבְדֵיהּ: ^is-5-20

**21** וַי דְחַכִּימִין בְּעֵינֵי נַפְשְׁהוֹן וְקָבֵיל אַפֵּיהוֹן סוּכְלְתָנִין: ^is-5-21

**22** וַי דְגִבָּרִין לְמִשְׁתֵּי חֲמַר וְגִבָּרִין מָרֵי נִכְסִין לְאִתְרַוָאָה מִן עַתִּיק: ^is-5-22

**23** מְזַכָּן לֵיהּ לְחַיָבָא חֲלַף דִמְקַבְּלִין מִנֵיהּ מָמוֹן דִשְׁקַר וּזְכוּת זַכַּיָא בִרְשַׁע מַעֲדָן מִנְהוֹן: ^is-5-23

**24** בְּכֵן יִתְאַכְּלוּן כְּקַשָׁא בְּאֶשְׁתָּא וְכַעֲמִירָא בְּשַׁלְהוֹבִיתָא מַסְגַן תּוּקְפְהוֹן כִּשְׁבַז יְהֵי וּמָמוֹן אוּנְסֵיהוֹן כְּאַבְקָא דְפָרַח אֲרֵי קָצוּ בְּאוֹרַיְתָא דַייָ צְבָאוֹת וְיַת מֵימַר קַדִישָׁא דְיִשְׂרָאֵל רְחִיקוּ: ^is-5-24

**25** עַל כֵּן תְּקֵיף רוּגְזָא דַייָ צְבָאוֹת בְּעַמֵיהּ וַאֲרִים מְחַת גְבוּרְתֵּיהּ עֲלֵיהוֹן כַּד מְחָנוּן וְזָעוּ טוּרַיָא וַהֲוָאָה נְבֶלְתְּהוֹן מְשַׁגְרָן כְּסָחִיתָא בְּגוֹ שׁוּקַיָא בְכָל דָא לָא תָבוּ מֵחוֹבֵיהוֹן דִיתוּב רוּגְזֵיהּ מִנְהוֹן וְעַד כְּעַן מַתְקְפִין מַרְדֵיהוֹן וְעוֹד מַחֲתֵיהּ עֲתִידָא לְאִתְפְּרַע מִנְהוֹן: ^is-5-25

**26** וְיִזְקוֹף אָת לְעַמְמַיָא מֵרָחִיק וְיַכְלֵי לֵיהּ מִסְיָפֵי אַרְעָא וְהָא בִפְרִיעַ מְלַךְ בְּמַשִׁרְיָתֵיהּ כַּעֲנָנִין קַלִילִין יֵיתֵי: ^is-5-26

**27** לֵית דִמְשַׁלְהֵי וְלֵית דְמִתְקֵיל בֵּיהּ לָא יְנוּם וְלָא יִדְמוּךְ וְלָא יִשְׁתְּרֵי זְרִיז חַרְצֵיהּ וְלָא תִתְפְּסֵיק עַרְקַת מְסָנֵיהּ: ^is-5-27

**28** דִי גִירוֹהִי מְחַרְפִין וְכָל קַשְׁתָּתֵיהּ מְתִיחָן פַּרְסַת סוּסְוָתֵיהּ כְּטָנָרָא תַקִיפִין וְגַלְגְלוֹהִי קַלִילִין הָא כְעַלְעוֹלָא: ^is-5-28

**29** נִיהוֹמֵי לֵיהּ כַּאַרְיָא וְיִנְהוֹם כְּבַר אַרְיְוָן וְיַכְלֵי וְיֵחוֹד בִּזָא וִישֵׁיזֵיב וְלֵית דְמַצִיל: ^is-5-29

**30** וְיַכְלֵי עֲלוֹהִי בְּעִדָנָא הַהִיא כְּאִתְרְגוּשַׁת יַמָא דְאִם יִבְעוֹן רַשִׁיעַיָא סָעֵיד מִיַתְבֵי אַרְעָא עָקָא וּתְבַר אַיְתֵי עֲלֵיהוֹן בְּרַם צַדִיקַיָא דִיהוֹן בְּשַׁעְתָּא הַהִיא יִתְכְּסוּן מִן קֳדָם בִּישְׁתָּא: ^is-5-30

## Capítulo 6

**1** בְּשַׁתָּא דְאִתְנַגַע בָּהּ מַלְכָּא עֻזִיָה אֲמַר נְבִיָא חֲזֵיתִי יַת יְקָרָא דַייָ שָׁרֵי עַל כּוּרְסֵיהּ רָם וּמִתְנַטֵל בִּשְׁמֵי מְרוֹמָא וּמִזִיו יְקָרֵיהּ אִתְמְלֵי הֵיכְלָא: ^is-6-1

**2** שַׁמָשִׁין קַדִישִׁין בְּרוּמָא קֳדָמוֹהִי שִׁתָּא גַפִּין לְחַד שִׁתָּא גַפִּין לְחַד בִּתְרִין מְכַסֵי אַפּוֹהִי דְלָא חָזֵי וּבִתְרֵין מְכַסֵי גְוִיָתֵיהּ דְלָא מִתְחֲזֵי וּבִתְרֵין מְשַׁמֵשׁ: ^is-6-2

**3** וּמְקַבְּלִין דֵין מִן דֵין וְאָמְרִין קַדִישׁ בִּשְׁמֵי מְרוֹמָא עִלָאָה בֵית שְׁכִנְתֵּיהּ קַדִישׁ עַל אַרְעָא עוֹבַד גְבוּרְתֵּיהּ קַדִישׁ לְעָלַם וּלְעָלְמֵי עָלְמַיָא יְיָ צְבָאוֹת מַלְיָא כָל אַרְעָא זִיו יְקָרֵיהּ: ^is-6-3

**4** וְזָעוּ אֵילְוַת סִפֵּי הֵיכְלָא מִקָל מִלוּלָא וּבֵית מַקְדְשָׁא אִתְמְלֵי אֲמִטְתָא: ^is-6-4

**5** וַאֲמָרֵית וַי לִי אֲרֵי חָבֵית אֲרֵי גְבַר חַיָב לְאוֹכָחָא אֲנָא וּבְגוֹ עַמָא דְמִגְעַל בְּחוֹבִין אֲנָא יָתִיב אֲרֵי יַת יְקַר שְׁכִינַת מְלַךְ עַלְמַיָא יְיָ צְבָאוֹת חֲזָאָה עֵינָי: ^is-6-5

**6** וְאִשְׁתְּדִי לְוָתִי חַד מִן שַׁמָשַׁיָא וּבְפוּמֵיהּ מַמְלֵל דְקַבֵּיל מִן קֳדָם דִשְׁכִנְתֵּיהּ עַל כּוּרְסֵי יְקָרָא בִּשְׁמֵי מְרוֹמָא עֵיל מִן מַדְבְּחָא: ^is-6-6

**7** וְסַדַר בְּפוּמִי וַאֲמַר הָא שַׁוִיתִי פִּתְגַמֵי נְבוּאָתִי בְּפוּמָךְ וְיַעְדוּן חוֹבָךְ וְחֶטְאָךְ יִתְכַּפְּרוּן: ^is-6-7

**8** וּשְׁמָעִית יַת קַל מֵימְרָא דַייָ דַאֲמַר יַת מַן אֲשַׁלַח לְאִתְנַבָּאָה וּמַן יֵזֵיל לְאַלָפָא וַאֲמָרִית הָא אֲנָא שְׁלַח יָתִי: ^is-6-8

**9** וַאֲמַר אֱזֵיל וְתֵימָר לְעַמָא הָדֵין דְשָׁמְעִין מִשְׁמַע וְלָא מִסְתַּכְּלִין וַחֲזוֹ מֶחְזָא וְלָא יָדְעִין: ^is-6-9

**10** טַפֵּישׁ לִבֵּיהּ דְעַמָא הָדֵין וְאוּדְנוֹהִי יַקֵר וְעֵינוֹהִי עַמְעָם דִלְמָא יֶחֱזוּן בְּעֵינֵיהוֹן וּבְאוּדְנֵיהוֹן יִשְׁמְעוּן וּבְלִבְּהוֹן יִסְתַּכְּלוּן וִיתוּבוּן וְיִשְׁתְּבֵק לְהוֹן: ^is-6-10

**11** וַאֲמָרִית עַד אֵימָתַי יְיָ וַאֲמַר עַד דְיִצְדוּן קִרְוַיָא מִבְּלִי יָתֵיב וּבָתַּיָא מִבְּלִי אֱנָשָׁא וְאַרְעָא תֶּחֱרוּב וְתִצְדֵי: ^is-6-11

**12** וְיַרְחַק יְיָ יַת בְּנֵי אֱנָשָׁא וְתִסְגֵי צַדְיוּתָא בְּגַוָהּ דְאַרְעָא: ^is-6-12

**13** וְיִשְׁתַּאֲרוּן בָּהּ חַד מִן עַסְרָא צַדִיקַיָא וִיתוּבוּן וִיהוֹן לִצְרָבָא כְּבוּטְמָא וְכִבְלוֹטָא דִבְמִתַר טַרְפּוֹהִי דָמִין לְיַבְשִׁין וְעַד כְּעַן אִינוּן רַטִיבָן לְקַיָמָא מִנְהוֹן זַרְעָא כֵּן גָלוּתָא דְיִשְׂרָאֵל יִתְכַּנְשׁוּן וִיתוּבוּן לְאַרְעֲהוֹן אֲרֵי זַרְעָא דְקוּדְשָׁא נִצְבַתְהוֹן: ^is-6-13

## Capítulo 7

**1** וַהֲוָה בְּיוֹמֵי אָחָז בַּר יוֹתָם בַּר עֻזִיָה מְלַךְ שִׁבְטָא דְבֵית יְהוּדָה סְלִיק רְצִין מַלְכָּא דַאֲרָם וּפֶקַח בַּר רְמַלְיָהוּ דְיִשְׂרָאֵל לִירוּשְׁלֵם לְאַגָחָא קְרָבָא עֲלָהּ וְלָא יָכִיל לְאַגָחָא עֲלָהּ: ^is-7-1

**2** וְאִתְחַוָא לְבֵית דָוִד לְמֵימָר אִתְחַבַּר מַלְכָּא דַאֲרָם עִם מַלְכָּא דְיִשְׂרָאֵל לְמֵיתֵי עֲלוֹהִי וְזָע לִבֵּיהּ וְלִבָּא דְעַמֵיהּ כְּאִשְׁתְּדָיוּת אִילָנֵי חוּרְשָׁא מִן קֳדָם רוּחָא: ^is-7-2

**3** וַאֲמַר יְיָ לִישַׁעְיָה פּוּק כְּעַן לִקֳדָמוּת אָחָז אַתְּ וּשְׁאָר תַּלְמִידָךְ דְלָא חֲטוֹ וּדְתָבוּ מֵחֶטְאָה לִסְיָפֵי מְזִיקַת בְּרֵיכָתָא עִלֵיתָא דִי בְּכֵבַשׁ חֲקַל מַשְׁטַח קְצִירַיָא: ^is-7-3

**4** וְתֵימַר לֵיהּ אִסְתַּמַר וְנוּחַ לָא תִדְחַל וְלִבָּךְ לָא יָזוּעַ מִן קֳדָם תְּרֵין רַבְרְבַיָא דְאִינוּן כְּאוּדַיָא מַתְנְנַיָא הָאִלֵין בִּתְקוֹף רְגַז רְצִין וַאֲרָם וּבַר רְמַלְיָהוּ: ^is-7-4

**5** חֲלַף אֲרֵי מְלַךְ עֲלָךְ אֲרָם בִּישָׁא אֶפְרַיִם וּבַר רְמַלְיָהוּ לְמֵימָר: ^is-7-5

**6** נִסַק בְּאַרְעָא דְבֵית יְהוּדָה וּנְחַבְּרִינוּן וּנְשַׁוִינוּן עִמָנָא וְנַמְלִיךְ מַלְכָּא בְּגַוָהּ יַת מַן דְכָשַׁר לָנָא: ^is-7-6

**7** כִּדְנַן אֲמַר יְיָ אֱלֹהִים לָא תְקוּם וְלָא תֶהֱוֵי: ^is-7-7

**8** אֲרֵי רֵישׁ אֲרָם דַמֶשֶׂק וְרֵישׁ דַמֶשֶׂק רְצִין וּבְסוֹף שִׁתִּין וַחֲמֵשׁ שְׁנִין יִבְטְלוּן בֵּית יִשְׂרָאֵל מִמָלְכוּ: ^is-7-8

**9** וְרֵישׁ אֶפְרַיִם שֹׁמְרוֹן וְרֵישׁ שֹׁמְרוֹן בַּר רְמַלְיָה אִם לָא תְהֵימְנוּן בְּמִלֵי נְבִיָא אֲרֵי לָא תִתְקַיְמוּן: ^is-7-9

**10** וְאוֹסִיף נְבִיָא דַייָ לְמַלָלָא עִם אָחָז לְמֵימָר: ^is-7-10

**11** שְׁאַל לָךְ אָתָא מִן קֳדָם יְיָ אֱלָהָךְ שְׁאַל דִי יִתְעֲבֵיד לָךְ נֵס עַל אַרְעָא אוֹ תִתְחֲזֵי לָךְ אָת בִּשְׁמַיָא: ^is-7-11

**12** וַאֲמַר אָחָז לָא אֶשְׁאַל וְלָא אֲנַסֵי קֳדָם יְיָ: ^is-7-12

**13** וַאֲמַר שְׁמָעוּ כְעַן בֵּית דָוִד הַזְעֵר לְכוֹן דְאַתּוּן מְהַלָן יַת נְבִייָא אֲרֵי תְהַלוּן אַף יַת פִּתְגָמֵי אֱלָהָי: ^is-7-13

**14** בְּכֵן יִתֵּן יְיָ הוּא לְכוֹן אָתָא הָא עוּלֶמְתָּא מְעַדְיָא וּתְלִיד בַּר וְתִקְרֵי שְׁמֵיהּ עִמָנוּאֵל: ^is-7-14

**15** שְׁמַן וּדְבַשׁ יֵכוּל עַד לָא יְדַע עוּלֵימָא לְרָחְקָא בִישָׁא וּלְקָרָבָא טָבָא: ^is-7-15

**16** אֲרֵי עַד לָא יְדַע עוּלֵימָא לְרָחָקָא בִישָׁא וּלְקָרָבָא טָבָא תִּתְרְטִישׁ אַרְעָא דִי אַתְּ מְעִיק מִן קֳדָם תְּרֵין מַלְכָּהָא: ^is-7-16

**17** יֵיתֵי יְיָ עֲלָךְ וְעַל עַמָךְ וְעַל בֵּית אֲבוּךְ יוֹמִין דְלָא אֲתוֹ לְמִיוֹמָא דְאִתְפְּלִיגוּ בֵית יִשְׂרָאֵל עַל דְבֵית יְהוּדָה יַת מַלְכָּא דְאַתּוּר: ^is-7-17

**18** וִיהֵי בְּעִדָנָא הַהִיא יַכְלֵי יְיָ לְעַם קִטְרֵי מַשִׁרְיַת גִבָּרַיָא דְסַגִיאִין כִּדְבוּבַיָא וְיַיְתִינוּן מִסְיָפֵי אַרְעָא דְמִצְרַיִם וְלַעֲזִיזֵי מַשִׁרְיָתָא דְאִינוּן תַּקִיפִין כְּדַבַּרְיָתָא וְיַיְתִינוּן מִסְיָפֵי אַרְעָא דְאַתּוּר: ^is-7-18

**19** וְיֵיתוּן וְיִשְׁרוּן כּוּלְהוֹן בִּרְחוֹבֵי קִרְוַיָא וּבִשְׁקִיפֵי כֵיפַיָא וּבְכֹל מַדְבְּרֵי נַעֲצוּצַיָא וּבְכֹל בָּתֵּי תוּשְׁבְּחָתָא: ^is-7-19

**20** בְּעִדָנָא הַהִיא יִקְטוֹל יְיָ בְּהוֹן כְּמָא דְמִתְקְטֵיל בְּחַרְבָּא חֲרִיפָא בְּסִבְכַיָא וּבְמִגְרַיָא בְּעֶבְרֵי נַהֲרָא בְּמַלְכָּא דְאַתּוּר וְיַת מַלְכָּא וְיַת מַשִׁרְיָתֵיהּ וְאַף יַת שִׁלְטוֹנֵי כַּחֲדָא יְשֵׁיצֵי: ^is-7-20

**21** וִיהֵי בְּעִדָנָא הַהִיא יְקַיֵם גְבַר עִגְלַת תּוֹרִין וּתְרֵין עָן: ^is-7-21

**22** וִיהֵי מִסְגֵי טוּב מְשַׁח יֵכוֹל שְׁמַן אֲרֵי שְׁמַן וּדְבַשׁ יִתְפַּרְנְסוּן כָּל צַדִיקַיָא דְאִשְׁתָּאֲרוּן בְּגוֹ אַרְעָא: ^is-7-22

**23** וִיהֵי בְּעִדָנָא הַהִיא יְהֵי כָל אֲתַר דִיהוֹן תַּמָן אֶלֶף גוּפְנִין שַׁוְיָן בְּאֶלֶף מָנִין כְּסַף לְהוֹבָאֵי וּבוּר יְהֵי: ^is-7-23

**24** בְּגִירִין וּבְקַשְׁתָּן יַהֲכוּן לְתַמָן הֲרֵי הוֹבָאִי וּבוּר תְּהֵי כָל אַרְעָא: ^is-7-24

**25** וְּכָל טוּרַיָא דְבֵית יְהוּדָה דִי בְמַעְדֵר יִתְפַּלְחוּן לָא תֵיעוּל לְתַמָן דַחֲלַת הוֹבָאִי וּבוּר וִיהֵי לְבֵית אַרְבָּעָה בַקְרָן דְתוֹרִין וּלְבֵית מַשְׁרֵי עֶדְרִין דְעָן: ^is-7-25

## Capítulo 8

**1** וַאֲמַר יְיָ לִי סַב לָךְ לוּחַ רַב וּכְתוֹב עֲלוֹהִי כְּתַב מְפָרַשׁ מוֹחִי לְמִבַּז בִּזָא וּלְמֶעְדֵי עֲדָאָה: ^is-8-1

**2** וְאַסְהֵיד קֳדָמַי סְהִידִין מְהֵמְנָן יַת לְוָטַיָא דַאֲמָרִית לְאַיְתָאָה בִּנְבוּאַת אוּרִיָה כַהֲנָא וְהָא אֲתוֹ אַף כֵּן כָּל נְחָמָתָא דַאֲמָרֵית לְאַיְתָאָה בִּנְבוּאַת זְכַרְיָה בַּר יְבָרֶכְיָה אֲנָא עֲתִיד לְאַיְתָאָה: ^is-8-2

**3** וַעֲלֵית לְוַת נְבִיאֲתָא וְעַדִיאַת וִילֵדַת בַּר וַאֲמַר יְיָ לִי קְרִי שְׁמֵיהּ מוֹחִי לְמִבַּז בִּזָא וּלְמֶעְדֵי עֲדָאָה: ^is-8-3

**4** אֲרֵי עַד לָא יְדַע עוּלֵימָא מִקְרֵי אַבָּא וְאִמָא יִשְׁבֵי יַת נִכְסֵי דַמֶשֶׂק וְיַת עֲדָאֵי שֹׁמְרוֹן קֳדָם מַלְכָּא דְאַתּוּר: ^is-8-4

**5** וְאוֹסִיף מֵימְרָא דַייָ לְמַלָלָא עִמִי עוֹד לְמֵימָר: ^is-8-5

**6** חֲלַף דְקָץ עַמָא הָדֵין בְּמַלְכוּתָא דְבֵית דָוִד דִמְדַבֵּר לְהוֹן בְּנִיחַ כְּמֵי שִׁלוּחָא דְנַגְדִין בְּנִיחַ וְאִתְרְעִיאוּ בִרְצִין וּבַר רְמַלְיָה: ^is-8-6

**7** בְּכֵן הָא יְיָ מַיְתֵי וּמַסִיק עֲלֵיהוֹן יַת מַשִׁרְיַת עַמְמַיָא דְסַגִיאִין כְּמֵי נַהֲרָא תַּקִיפַיָא וַחֲסִינַיָא יַת מַלְכָּא דְאַתּוּר וְיַת כָּל מַשִׁרְיָתֵיהּ וְיִסַק עַל כָּל פַּצִידוֹהִי וִיהַךְ עַל כָּל כֵּיפוֹהִי: ^is-8-7

**8** וְיַעְדֵי בְאַרְעָא דְבֵית יְהוּדָה כְּנַחַל מְגַבֵּר עַד יְרוּשְׁלֵם יִמְטֵי וִיהֵי עַם מַשִׁרְיָתֵיהּ מָלֵי פְתָאֵי אַרְעָךְ עִמָנוּ אֵל: ^is-8-8

**9** אִתְחַבָּרוּ עַמְמַיָא וְאִתְבָּרוּ וְאָצִיתוּ כֹּל דִי בִסְיָפֵי אַרְעָא אַתְקִיפוּ וְאִתְבָּרוּ אַתְקִיפוּ וְאִתְבָּרוּ: ^is-8-9

**10** אִתְמְלִיכוּ מְלַךְ וְיַעֲדֵי מַלִלוּ פִּתְגָמָא וְלָא יִתְקַיֵם אֲרֵי בְסַעֲדָנָא אֱלָהָא: ^is-8-10

**11** אֲרֵי כִדְנַן אֲמַר יְיָ לִי בְּמִתְקַף נְבוּאָתָא וְאֶלְפֵנִי מִלְמֵהַךְ בְּאוֹרַח עַמָא הָדֵין לְמֵימָר: ^is-8-11

**12** לָא תֵימְרוּן מְרוֹד לְכָל דְיֵמַר עַמָא הָדֵין מְרוֹד וְלִדְחַלְתֵּיהּ לָא תִדְחֲלוּן וְעַל תּוּקְפֵיהּ לָא תֵמְרוּן תְּקוֹף: ^is-8-12

**13** יַת יְיָ צְבָאוֹת יָתֵיהּ תֵּימְרוּן קַדִישׁ וְהוּא דְחַלְתְּכוֹן וְהוּא תוּקְפֵכוֹן: ^is-8-13

**14** וְאִם לָא תְקַבְּלוּן וִיהֵי מֵימְרֵיהּ בְכוֹן לְפוּרְעָן וּלְאֶבֶן מָחֵי וּלְכֵיף מְתַקֵל לִתְרֵין בָּתֵּי רַבְרְבֵי יִשְׂרָאֵל לִתְבַר וּלְתַקָלָא עַל דְאִתְפְּלִיגוּ עַל דְבֵית יְהוּדָה דְיָתְבִין בִּירוּשְׁלֵם: ^is-8-14

**15** וְיִתְקְלוּן בְּהוֹן סַגִיאִין וְיִפְּלוּן וְיִתַּבְּרוּן וְיִתַּצְדוּן וְיִתְאַחֲדוּן: ^is-8-15

**16** נְבִיָא טַר סַהֲדוּתָא לָא תַסְהִיד בְּהוֹן אֲרֵי לָא מְקַבְּלִין חֲתוֹם וְטַמַר אוֹרַיְתָא לָא צָבָן דְיֵלְפוּן בָהּ: ^is-8-16

**17** אֲמַר נְבִיָא עַל דָא צַלֵיתִי קֳדָם יְיָ דַאֲמַר לְסַלְקָא שְׁכִנְתֵּיהּ מִדְבֵית יַעֲקֹב וּבְעֵיתִי מִן קֳדָמוֹהִי: ^is-8-17

**18** הָא עַד דַאֲנָא קַיֵם וְעוּלֵימַיָא דִיהַב לִי יְיָ יִתְקַיְמוּן בָּנָא אָתִין וּמוֹפְתִין דַאֲמִירָן לְמֵיתֵי עַל יִשְׂרָאֵל דְאִם יֶחֱזוּן וִיתוּבוּן תִּבָטֵיל גְזֵירְתָּא דִי גְזָרָא עֲלֵיהוֹן דְיִגְלוּן מִלְאִתְחֲזָאָה קֳדָם יְיָ צְבָאוֹת דִי שְׁכִנְתֵּיהּ בְּטוּרָא דְצִיוֹן: ^is-8-18

**19** וַאֲרֵי יֵימְרוּן לְכוֹן עַמְמַיָא דְאַתּוּן בֵּינֵיהוֹן תְּבָעוּ מִן בִּדִין וּמִן זְכוּרוּ דִמְנַצְפִין וְדִמְנַהֲמִין הֲלָא כֵן אוֹרַח עַמְמַיָא פַלְחֵי טַעֲוָתָא עַמָא מִן טַעֲוָתֵיהּ תַּבְעִין חַיָא מִן מֵיתַיָא: ^is-8-19

**20** כְּדֵין תֵּימְרוּן לְהוֹן לְאוֹרַיְתָא דְאִתְיְהֵיבַת לָנָא וּלְסַהֲדוּ אֲנַחְנָא שָׁמְעִין אֶלָא תִגְלוּן לְבֵינֵי עַמְמַיָא וְיֵימְרוּן לְכוֹן כְּפִתְגָמָא הָדֵין מִכְּעַן לֵית לֵיהּ מַן דִשְׁחַר וְיַבְעִינֵיהּ: ^is-8-20

**21** וְיַעֲדֵי תַקְלָא בְּאַרְעָא וִיהֵי עָקָא וּכְפַן וִיהֵי אֲרֵי יֶחֱזֵי כְפַן וְסִיגוּף וְיִלוּט וְיִבְזֵי שׁוּם פְּתַכְרֵיהּ וְטַעֲוָתֵיהּ וְיִתְפְּנֵי לְעֵילָא לְמִיבְעֵי פּוּרְקַן בָּתַר דְתִתְחַתֵּם גְזֵירָתָא וְלָא יִכּוֹל: ^is-8-21

**22** וְסָעִיד מִיַתְבֵי אַרְעָא יִבְעֵי אֲרֵי יַיְתֵי עֲלוֹהִי עָקָא כְּפָן וְשַׁלְהֲבֵי עָקָא קְבֵל וּבַדוּר: ^is-8-22

**23** אֲרֵי לָא יִשְׁתַּלְהֵי כָּל דְיֵיתֵי לַאֲעָקָא לְהוֹן כְּעִידַן קֳדָמַי גְלוֹ עַם אֲרַע זְבוּלֻן וְעַם אֲרַע נַפְתָּלִי וּשְׁאַרְהוֹן מְלַךְ תַּקִיף יַגְלֵי עַל דְלָא אַדְכַּרוּ גְבוּרַת יַמָא וְנִסֵי יַרְדְנָא קְרַב כְּרַכֵּי עַמְמַיָא: ^is-8-23

## Capítulo 9

**1** עַמָא בֵּית יִשְׂרָאֵל דַהֲווֹ מְהַלְכִין בְּמִצְרַיִם כִּדְבְּקִבְלָא נְפָּקוּ לְמֶחֱזֵי נְהוֹר סַגִי יַתְבִין בְּאַרְעָא טוּלֵימוֹתָא נְהוֹרָא אַזְהַר עֲלֵיהוֹן: ^is-9-1

**2** אַסְגֵיתָא עַמָא בֵּית יִשְׂרָאֵל לְהוֹן אַסְגֵיתָא חֶדְוָא חֲדִיאוּ קֳדָמָךְ כְּחֶדְוַת נִצְחֵי קְרָב כְּמָא דַהֲווֹ חָדָן בְּפַלְגוּתְהוֹן בִּזְתָא: ^is-9-2

**3** אֲרֵי אַעְדֵיתָא יַת נִיר מָרְוָתִי וְיַת שׁוּלְטַן עַקְתֵיהּ שִׁלְטוֹן דַהֲוָת מְפַלַח בֵּיהּ אִיתְּבַר כְּיוֹם מִדְיָן: ^is-9-3

**4** אֲרֵי כָל מְסַבְהוֹן וּמִתַּנְהוֹן בִּרְשַׁע אִתְגְעָלוּ בְּחוֹבִין הָא כִכְסוּ דִמְלוּשָׁא בְדַם דְלָא דָכָן רִשְׁמֵי כִתְמָא מִנָהּ כֵּן כְּמָא דְלֵית בֵּיהּ צְרוֹךְ אֱלָהֵין לְאִתּוֹקָדָא בְנוּרָא כֵּן יִתֵּן עֲלֵיהוֹן עַמְמַיָא דְתַקִיפִין כְּאֶשְׁתָּא וְיִקְטְלוּנוּן: ^is-9-4

**5** אֲמַר נְבִיָא לְבֵית דָוִד אֲרֵי רָבֵי אִיתְיְלִיד לָנָא בַּר אִתְיְהַב לָנָא וְקַבֵל אוֹרַיְתָא עֲלוֹהִי לְמַטְרָהּ וְאִתְקְרֵי שְׁמֵיהּ מִן קֳדָם מַפְלִיא עֵצָה אֱלָהָא גִבָּרָא קַיָם לְעַלְמַיָא מְשִׁיחָא דִשְׁלָמָא יַסְגֵי עֲלָנָא בְּיוֹמוֹהִי: ^is-9-5

**6** סַגִי רְבוּ לְעָבְדֵי אוֹרַיְתָא וּלְנַטְרֵי שְׁלָמָא לֵית סוֹף עַל כּוּרְסֵיהּ דָוִד וְעַל מַלְכוּתֵיהּ לְאַתְקָנָא יָתָהּ וּלְמִבְנָא בְדִינָא וּבִזְכוּתָא מִכְּעַן וְעַד עָלְמָא בְּמֵימְרָא דַייָ צְבָאוֹת תִּתְעֲבֵיד דָא: ^is-9-6

**7** פִּתְגָמָא שְׁלַח יְיָ בִּדְבֵית יַעֲקֹב וְאִשְׁתְּמַע בְּיִשְׂרָאֵל: ^is-9-7

**8** וְאִתְרַבְרְבוּ עַמָא כוּלְהוֹן אֶפְרַיִם וְיָתֵיב שֹׁמְרוֹן בִּרְבוּ וּבִתְקוֹף לֵבָב לְמֵימָר: ^is-9-8

**9** רֵישַׁיָא גְלוּ וּלְטָבִין מִנְהוֹן נְמַנֵי נִכְסַיָא אִתְבְּזָזוּ וּדְשַׁפִּירִין מִנְהוֹן נִקְנֵי: ^is-9-9

**10** וְתַקֵיף יְיָ סַנָאָה רְצִין עֲלוֹהִי וְיַת בַּעֲלֵי דְבָבוֹהִי יְעָרֵר: ^is-9-10

**11** אֲרַם מִמַדִינְחָא וּפְלִשְׁתָּאֵי מִמַעֲרָבָא וּבְזוֹ יַת נִכְסֵי יִשְׂרָאֵל בְּכָל אֲתָר בְּכָל דָא לָא תָבוּ מֵחוֹבֵיהוֹן דִתוּב רוּגְזֵיהּ מִנְהוֹן וְעַד כְּעַן מַתְקְפִין מַרְדֵיהוֹן וְעוֹד מָחָתֵיהּ עֲתִידָא לְאִתְפְּרַע מִנְהוֹן: ^is-9-11

**12** וְעַמָא לָא תָבוּ לְפוּלְחַן מִן דְאַיְיתֵי עֲלֵיהוֹן מָחָא וְאוּלְפַן מִן קֳדָם יְיָ צְבָאוֹת לָא תְבָעוּ: ^is-9-12

**13** וְשֵׁיצֵי יְיָ מִיִשְׂרָאֵל רֵישׁ וְהֶגְמוֹן שִׁלְטוֹן וְאִטְרוֹן יוֹמָא חָד: ^is-9-13

**14** סָב וּנְסִיב אַפִּין הוּא רֵישָׁא וְסָפַר מַלִיף שְׁקַר הוּא חֲלָשָׁא: ^is-9-14

**15** וַהֲווֹ מְשַׁבְּחֵי עַמָא הָדֵין מַטְעָן וְרַבְרְבָנוֹהִי מְסַלְעֲמִין: ^is-9-15

**16** עַל כֵּן עַל עוּלֵימוֹהִי לָא יֶחְדֵי יְיָ וְעַל יַתְמוֹהִי וְעַל אַרְמְלָתוֹהִי לָא יְרַחֵם אֲרֵי כוּלְהוֹן חֲנִיפִין וּבִישִׁין וְכָל פּוּמְהוֹן מְמַלְלִין שְׁקַר בְּכָל דָא לָא תָבוּ מֵחוֹבֵיהוֹן דִיתוּב רוּגְזֵיהּ מִנְהוֹן וְעַד כְּעַן מַתְקְפִין מִרְדֵיהוֹן וְעוֹד מֶחֶתֵיהּ עֲתִידָא לְאִתְפְּרָעָא מִנְהוֹן: ^is-9-16

**17** אֲרֵי תַדְלִיק כְּאֶשְׁתָּא פּוּרְעֲנוּת חוֹבֵיהוֹן חַטָאַיָא וְחַיָבַיָא תְּשֵׁיצֵי וְתִשְׁלוֹט בִּשְׁאַר עַמָא וּתְשֵׁיצֵי סַגִי מַשִׁרְיָתָא: ^is-9-17

**18** בְּתַבְעוֹר מִן קֳדָם יְיָ צְבָאוֹת חֲרוֹכַת אַרְעָא וַהֲוָה עַמָא כִּיקֵידַת נוּר גְבַר עַל אֲחוּהִי לָא חָיְסִין: ^is-9-18

**19** וּבַז מִן דָרוֹמָא וּכְפֵין וְשֵׁיצֵי מִן צִפּוּנָא וְלָא שְׂבַע גְבַר נִכְסֵיהּ קָרִיבֵיהּ יִבְזוּן: ^is-9-19

**20** דְבֵית מְנַשֶׁה עִם דְבֵית אֶפְרַיִם וּדְבֵית אֶפְרַיִם עִם דְבֵית מְנַשֶׁה כַּחֲדָא יִתְחַבְּרוּן לְמֵיתֵי עַל דְבֵית יְהוּדָה בְּכָל דָא לָא תָבוּ מֵחוֹבֵיהוֹן דִיתוּב רוּגְזֵיהּ מִנְהוֹן וְעַד כְּעַן מַתְקְפִין מַרְדֵיהוֹן וְעוֹד מְחָתֵיהּ עֲתִידָא לְאִתְפְּרַע מִנְהוֹן: ^is-9-20

## Capítulo 10

**1** וַוי דְרַשְׁמִין רִשְׁמִין דְמֵינַס וּכְתַב דְלֵיאוּ כָּתְבִין: ^is-10-1

**2** לְאַסְטָאָה מִדִין מִסְכְּנִין וּלְמֵינַס מַה דִרָעָן מֵחֲשִׁיכֵי עַמָא בְּדִינָא לְמֶהֱוֵי אַרְמְלָן עֲדֵיהוֹן וְיַת נִכְסֵי יַתְמַיָא יִבְזוּן: ^is-10-2

**3** וּמַה תַּעְבְּדוּן לְיוֹמָא דְיִסְעֲרוּן עֲלֵיכוֹן חוֹבֵיכוֹן וּלְרִיגוּשׁ עָקָא מֵרָחִיק יֵיתֵי לְאָן תְּעַרְקוּן לְסָעִיד וְהֵיכָא תִשְׁבְּקוּן יְקָרְכוֹן: ^is-10-3

**4** בְּכֵן בַּר מִן אַרְעֲכוֹן אֲסִירִין תִּתְאַסְרוּן וּבַר מִקִרְוֵיכוֹן קְטִילִין תִּתְרְמוּן בְּכָל דָא לָא תָבוּ מֵחוֹבֵיהוֹן דִיתוּב רוּגְזֵיהּ מִנְהוֹן וְעַד כְּעַן מַתְקְפִין מָרְדֵיהוֹן וְעוֹד מָחָתֵיהּ עֲתִידָא לְאִתְפְּרָע מִנְהוֹן: ^is-10-4

**5** וַוי אַתּוּרָאָה שׁוּלְטַן רוּגְזִי וּמַלְאָךְ שָׁלִיחַ מִן קֳדָמַי עֲלֵיהוֹן בִּלְוָט: ^is-10-5

**6** בִּכְנֵישָׁא חֲנִיפָא אֲשַׁלְחִינֵיהּ וְעַל עַמָא דַעֲבָרוּ עַל אוֹרַיְתָא אֲפַקְדִינֵיהּ לְמִבַּז בִּזָא וּלְמֶעְדֵי עֲדָאָה וּלְשַׁוָיוּתֵיהּ לְדָיִישׁ כְּסִין שׁוּקִין: ^is-10-6

**7** וְהוּא לָא כֵן מְדַמֵי וְלִבֵּיהּ לָא כֵן מַחְשֵׁיב אֲרֵי לְשֵׁיצָאָה אֲמַר בְּלִבֵּיהּ וְלַאֲסָפָא עַמְמִין לָא בַּחֲיָס: ^is-10-7

**8** אֲרֵי יֵימַר הֲלָא כָל שִׁלְטוֹנָי כַּחֲדָא כְּמַלְכִין חֲשִׁיבִין קֳדָמַי: ^is-10-8

**9** הֲלָא כְּמָא דְכַרְכְּמִישׁ כְּבִישָׁא קֳדָמַי כֵּן כַּלְנוֹ אִם לָא כְּמָא דְאַרְפַּד מְסִירָא בִידִי כֵּן חֲמָת וּכְמָא דַעֲבָדִית לְדַמֶשֶׂק כֵּן אַעְבֵּיד לְשֹׁמְרוֹן: ^is-10-9

**10** כְּמָא דְאַשְׁכְּחַת יְדֵי מַלְכְוָן דְפַלְחָן לְטַעֲוָתָא וְצַלְמָנֵיהוֹן מִירוּשְׁלֵם וּמִיקָמָתָא דְשֹׁמְרוֹן: ^is-10-10

**11** הֲלָא כְּמָא דַעֲבָדִית לְשֹׁמְרוֹן וּלְטַעֲוָתָהָא כֵּן אַעְבֵיד לִירוּשְׁלֵם וּלְצַלְמָנַיָא דִי בָהּ: ^is-10-11

**12** וִיהֵי אֲרֵי יְשֵׁיצֵי יְיָ לְמֶעְבַּד יַת כָּל דַאֲמַר בְּטוּרָא דְצִיוֹן וּבִירוּשְׁלֵם אַסְעַר עַל עוֹבָדֵי רָם לִבָּא דְמַלְכָּא דְאַתּוּר וְעַל תּוּשְׁבְּחַת רְמוּת עֵינוֹהִי: ^is-10-12

**13** אֲרֵי אֲמַר בִּתְקוֹף יְדִי עֲבָדִית וּבְחוּכְמְתִי אֲרֵי סוּכְלְתָן אֲנָא וְאַגְלֵיתִי עַמְמַיָא מִמְדִינָא לִמְדִינָא וְקִרְוֵי תּוּשְׁבְּחַתְהוֹן בְּזֵיתִי וַאֲחָתֵית בִּתְקוֹף יַת יַתְבֵי כְּרַכִּין תַּקִיפִין: ^is-10-13

**14** וְאַשְׁכָּחֵית כְּקִנָה יְדֵי נִכְסֵי עַמְמַיָא וּכְמַכְנַשׁ בֵּיעִין שְׁבִיקִין כָּל דַיְרֵי אַרְעָא אֲנָא כְנֵישִׁית וְלָא הֲוָה נָטֵיל מִכָּא וְשָׁדֵי כָּא וּפְתַח פּוּמָא וּמְמַלֵיל מִלָא: ^is-10-14

**15** הֲאֶפְשַׁר דְיִשְׁתַּבַּח חוֹלִילָא עַל דְחָלִיל בֵּיהּ לְמֵימָר הָא אֲנָא חֲלִילַת אִם יִתְרַבְרַב מַסְרָא עַל דְנָגִיר בָהּ לְמֵימָר הֲלָא אֲנָא נַגָרִית כַּאֲרָמָא חוּטְרָא לְמִמְחֵי לָא חוּטְרָא מָחֵי אֱלָהֵן מַן דְמָחֵי בֵיהּ: ^is-10-15

**16** חֲלַף דְאִתְרַבְרַב מַלְכָּא דְאַתּוּר בְּכֵן יְשַׁלַח רִבּוֹן עַלְמָא יְיָ צְבָאוֹת בְּרַבְרְבָנוֹהִי מָחָא וּתְחוֹת מָנַי יְקָרְהוֹן מֵיקַד יֵיקְדוּן כִּיקֵידַת אֶשָׁא: ^is-10-16

**17** וִיהֵי מָרֵי נְהוֹרֵיהּ דְיִשְׂרָאֵל וְקַדִישֵׁיהּ מֵימְרֵיהּ תַּקִיף כְּאֶשְׁתָּא וּפִתְגָמוֹהִי כְשַׁלְהוֹבִיתָא וְיִקְטוֹל וִישֵׁיצֵי שִׁלְטוֹנוֹהִי וְטוּרְנוֹהִי בְּיוֹמָא חָד: ^is-10-17

**18** וִיקַר סַגִי מַשִׁרְיָתֵיהּ נַפְשֵׁיהוֹן עִם פִּגְרֵיהוֹן יִשֵׁיצֵי וִיהֵי תְּבִיר וַעֲרִיק: ^is-10-18

**19** וּשְׁאַר עָבְדֵי קְרָבֵיהּ יְסוּפוּן לְמֶהֱוֵי עַם דְמִנְיָן וּמַלְכוּ חֲלָשָׁא יִתְחַשְׁבוּן: ^is-10-19

**20** וִיהֵי בְּעִדָנָא הַהִיא לָא יוֹסְפוּן עוֹד שְׁאָרָא דְיִשְׂרָאֵל וְשֵׁיזְבַת בֵּית יַעֲקֹב לְאִיסְתַּמָכָא עַל עַמְמַיָא דַהֲווֹ מְפַלְחִין בְּהוֹן וְיִסְתַּמְכוּן עַל מֵימְרָא דַייָ קַדִישָׁא דְיִשְׂרָאֵל בִּקְשׁוֹט: ^is-10-20

**21** שְׁאָר דְלָא חֲטוּ וּדְתָבוּ מֵחֲטָאָה שְׁאָרָא דְבֵית יַעֲקֹב יְתוּבוּן לְמִפְלַח קֳדָם אֱלָהָא גִבָּרָא: ^is-10-21

**22** אֲרֵי אִם יְהֵי עַמָךְ יִשְׂרָאֵל סַגִי כְּחָלָא דְיַמָא שְׁאָר דְלָא חֲטוֹ וּדְתָבוּ מֵחֲטָאָה יִתְעַבְדוּן לְהוֹן גְבוּרָן דְמִתְגַבְּרִין וּמְדַבְּרָן בְּזָכוּ: ^is-10-22

**23** אֲרֵי גְמִירָא וְשֵׁיצָאָה יְיָ אֱלֹהִים צְבָאוֹת עָבַד עִם כָּל רַשִׁיעֵי בְּגוֹ אַרְעָא: ^is-10-23

**24** בְּכֵן כִּדְנַן אֲמַר יְיָ אֱלֹהִים צְבָאוֹת לָא תִדְחַל עַמִי יָתִיב צִיוֹן מֵאַתּוּרָא בְּשׁוּלְטָנֵיהּ יַמְחִינָךְ וּמַרְוָתֵיהּ יִרְמֵי עֲלָךְ כִּדְבְּאוֹרַח מִצְרָיִם: ^is-10-24

**25** אֲרֵי עוֹד צִבְחַר כִּזְעֵיר וִיסוּפוּן לְוָטַיָא מִנְכוֹן דְבֵית יַעֲקֹב וְרוּגְזֵי עַל עַמְמַיָא עָבְדֵי תִבְלָא לְשֵׁיצָיוּתְהוֹן: ^is-10-25

**26** וְיַיתֵי עֲלוֹהִי יְיָ צְבָאוֹת מְחָא כְּמָחַת מִדְיָן בִּשְׁקִיף עוֹרֵב וּמַרְוָתֵיהּ תֶּעְדֵי מִנְכוֹן כְּמָא דַעֲדַת מַרְוַת פַּרְעֹה עַל יַמָא וְיִתְעַבְדָן לְכוֹן גְבוּרָן כִּדְבְּאוֹרַח מִצְרָיִם: ^is-10-26

**27** וִיהֵי בְּעִדָנָא הַהִיא תֶּעְדֵי מַרְוָתֵיהּ מִנָךְ וְנִירֵיהּ מֵעַל צַוְרָךְ וְיִתְּבְרוּן עַמְמַיָא מִן קֳדָם מְשִׁיחָא: ^is-10-27

**28** אֲתָא עַל עַיָת עָבַר בְּמִגְרוֹן לְמִכְמַשׁ יְמַנֵי רַבָּנֵי מַשִׁרְיָתֵיהּ: ^is-10-28

**29** גָזוּ עֲבָרוּ יַרְדְנָא בְּגֶבַע בָּתוּ לְהוֹן אִתְבָּרוּ יָתְבֵי רָמָתָא אֱנַשׁ גִבְעַת שָׁאוּל עֲרָקוּ: ^is-10-29

**30** אָרִימוּ קָלֵיכוֹן אֱנַשׁ בַּת גַלִים אֲצִיתוּ דְיָתְבִין בְּלַיִשׁ דְדַיְרִין בַּעֲנִיָה עֲנָתוֹת: ^is-10-30

**31** אִתְבָּרוּ אֱנַשׁ מַדְמֵנָה יַתְבֵי גֵיבִים גְלוֹ: ^is-10-31

**32** עַד כְעַן יוֹמָא רַב וְסַגִי עִדַן לֵיהּ לְמֵיעַל הָא סַנְחֶרֶב (מַלְכָּא דְאַתּוּר נְטַל וַעֲבַר תְּלַת אַרְנִין וּדְבַר עִמֵיהּ אַרְבְּעִין אַלְפִין גוּסְפְּנִין דִדְהַב דִבְנֵי מַלְכִין קְטִירֵי תָגָא יַתְבִין בְּהוֹן וּדְבַר עִמֵיהּ מָאתָן אַלְפִין אֲחִידֵי סַיְפִין וְרוּמְחִין וּדְבַר עִמֵיהּ מָאתָן וְשִׁיתִּין אַלְפִין מְחַצְצֵי גִירִין גוּבְרִין דְרָהֲטִין קֳדָמוֹהִי מְאָה אַלְפִין אוּרְכָּא דְמַשִׁרְיָתֵיהּ אַרְבַּע מְאָה פַּרְסִין צַוָאר סוּסְוָתֵיהּ אַרְבְּעִין פַּרְסִין מִנְיָן מַשִׁרְיָתֵיהּ מָאתָן וְשִׁתִּין אַלְפִין רִיבּוֹא חָסֵר חַד וְכֵן אֲתוֹ עַל אַבְרָהָם כַּד רְמוֹ יָתֵיהּ לְגוֹ נוּרָא יְקֵדְתָּא וְכֵן עַתִידִין לְמֵיתֵי עִם גוֹג וּמָגוֹג כַּד יִשְׁלֶה עַלְמָא קִצֵי לְמִתְפַרְקָא מַשִׁרְיָתָא קַדְמֵיתָא כַּד עֲבַרוּ בְיַרְדְנָא שָׁתוּ מַיָא דַהֲווֹ בְיַרְדְנָא מַשִׁירְיָתָא תִנְיֵתָא כַּד עֲבָרוּ בְיַרְדְנָא חָפָרוּ בִירִין וְשָׁתוּ מַיָא) אֲתָא וְקָם בְּנוֹב קִרְיַת כַּהֲנַיָא לִקֳבֵיל שׁוּרָא דִירוּשְׁלֵם וְעָנֵי וַאֲמַר לְחַיָלוּתֵיהּ הָלָא דָא הִיא קַרְתָּה יְרוּשְׁלֵם דַעֲלָא אַרְגֵשִׁית כָּל מַשִׁרְיָתִי וַעֲלָהּ כְּבֵשִׁית כָּל מְדִינָתִי הָא הִיא זְעֵירָא וַחֲלָשָׁא מִכָּל כְּרַכֵּי עַמְמַיָא דִכְבֵישִׁית בִּתְקוֹף יְדִי עֲלָהּ קָם מָנִיד בְּרֵישֵׁיהּ מוֹבִּיל וּמַיְתֵי בִּידֵיהּ עַל טוּר בֵּית מַקְדְשָׁא דִי בְצִיוֹן וְעַל עֲזָרָתָא דְבִירוּשְׁלֵם: ^is-10-32

**33** הָא רִבּוֹן עַלְמָא יְיָ צְבָאוֹת רָמֵי קְטוֹל בְּמַשִׁרְיָתֵיהּ כִּבְעוֹט דְמִתְבָּעֵיט בְּמַעֲצַרְתָּא וְרָמֵי קוֹמָא יִתְקַטְפוּן וְתַקִיפַיָא יִמְאֲכוּן: ^is-10-33

**34** וְיִקְטֵיל גִבָּרֵי מַשִׁרְיָתֵיהּ דְמִתְגַבְּרִין כְּבַרְזְלָא וְעָבְדֵי קְרָבָא עַל אַרְעָא דְיִשְׂרָאֵל יִתְרְמוּן: ^is-10-34

## Capítulo 11

**1** וְיִפּוֹק מַלְכָּא מִבְּנוֹהִי דְיִשַׁי וּמְשִׁיחָא מִבְּנֵי בְנוֹהִי יִתְרַבֵּי: ^is-11-1

**2** וְתִשְׁרֵי עֲלוֹהִי רוּחַ נְבוּאָה מִן קֳדָם יְיָ רוּחַ חוּכְמָא וְסוּכְלְתָנוּ רוּחַ מְלַךְ וּגְבוּרָא רוּח מַדַע וּדְחַלְתָּא דַיָי: ^is-11-2

**3** וִיקָרְבִינֵיהּ לִדְחַלְתֵּיהּ יְיָ לָא לְחֵיזוּ עֵינוֹהִי יְהֵי דָאַן וְלָא לְמִשְׁמָע אוּדְנוֹהִי יְהִי מוֹכַח: ^is-11-3

**4** וְיָדִין בְּקוּשְׁטָא מִסְכֵּינִין וְיוֹכַח בְּהֵימְנוּתָא מַחֲשִׁיכֵי עַמָא דְאַרְעָא וְיַמְחֵי חַיָבֵי אַרְעָא בְּמֵימַר פּוּמֵיהּ וּבְמַמְלֵיל סִפְוָתֵיהּ יְהֵי מֵמִית אַרְמִילוֹס רַשִׁיעָא: ^is-11-4

**5** וִיהוֹן צַדִיקַיָא סְחוֹר סְחוֹר לֵיהּ וְעָבְדֵי הַמְנוּתָא מְקָרְבִין לֵיהּ: ^is-11-5

**6** בְּיוֹמוֹהִי דִמְשִׁיחָא דְיִשְׂרָאֵל יִסְגֵי שְׁלָמָא בְּאַרְעָא וְיָדוּר דֵיבָא עִם אִמְרָא וְנִמְרָא עִם גַדְיָא יִשְׁרֵי וְעֶגְלָא וְאַרְיָא וּפַטִים כַּחֲדָא וְיָנִיק זְעֵיר יְהֵי מְדַבֵּר לְהוֹן: ^is-11-6

**7** וְתוֹרָא וְדִיבָא יִרְעֲיָן כַּחֲדָא יִשְׁרוֹן בְּנֵיהוֹן וְאַרְיָא כְּתוֹרָא יֵכוּל תִּבְנָא: ^is-11-7

**8** וִיחַיִךְ יַנְקָא עַל חוֹר חִוֵי פֶתֶן וְעַל חֵיזוּ גִלְגְלֵי עֵינַי חִוֵי חוּרְמָן חֲסִילָא יְדוֹהִי יוֹשִׁיט: ^is-11-8

**9** לָא יִבְאֲשׁוּן וְלָא יְחַבְּלוּן בְּכָל טוּרָא דְקוּדְשִׁי אֲרֵי תִתְמְלֵי אַרְעָא לְמִידַע יַת דְחַלְתָּא דַייָ כְּמַיָא דִלְיַמָא חָפָן: ^is-11-9

**10** וִיהֵי בְּעִדָנָא הַהִיא בַּר בְּרֵיהּ דְיִשָׁי עֲתִיד דִיקוּם אָת לְעַמְמַיָא לֵיהּ מַלְכְּוָן יִשְׁתַּמְעוּן וִיהֵי אֲתַר בֵּית מֵישְׁרוֹהִי בִיקָר: ^is-11-10

**11** וִיהֵי בְּעִדָנָא הַהִיא יוֹסִיף יְיָ תִּנְיָנוּת גְבוּרְתֵּיהּ לְמִפְרוֹק יַת שְׁאָרָא דְעַמֵיהּ דְאִשְׁתָּאַר מֵאַתּוּר וּמִמִצְרַיִם וּמִפַּתְרוֹס מֵהוֹדוּ וּמֵעֵילָם וּמִבָּבֶל וּמֵחֲמָת וּמִנַגְוַת יַמָא: ^is-11-11

**12** וְיִזְקוֹף אָת לְעַמְמַיָא וְיַכְנֵישׁ מְבַדְרֵי יִשְׂרָאֵל וְגָלוּת יְהוּדָה יְקָרֵב מֵאַרְבַּע רוּחֵי אַרְעָא: ^is-11-12

**13** וְתֶעְדֵי קִנְאֲתָא דְבֵית אֶפְרַיִם וְדִמְעִיקִין לִדְבֵית יְהוּדָה יִשְׁתֵּיצוּן דְבֵית אֶפְרַיִם לָא יְקַנוּן בִּדְבֵית יְהוּדָה וּדְבֵית יְהוּדָה לָא יְעִיקוּן לִדְבֵית אֶפְרָיִם: ^is-11-13

**14** וְיִתְחַבְּרוּן כְּתָף חָד לְמִמְחֵי פְּלִשְׁתָּאֵי דִי בְּמַעֲרָבָא כַּחֲדָא יְבוֹזוּן יַת בְּנֵי מַדִינְחָא בֶּאֱדוֹם וּמוֹאָב יוֹשִׁיטוּן יְדֵיהוֹן וּבְנֵי עַמוֹן יִשְׁתְּמָעוּן לְהוֹן: ^is-11-14

**15** וְיַבֵּשׁ יְיָ יַת לִישָׁן יַמָא דְמִצְרַיִם וִירֵים מְחַת גְבוּרְתֵּיהּ עַל פְּרָת בְּמֵימַר נְבִיוֹהִי וְיַמְחִינֵיהּ לְשַׁבְעָא נַחְלִין וִיהָכוּן בֵּיהּ בְּסַנְדָלִין: ^is-11-15

**16** וּתְהֵי אוֹרַח כְּבִישָׁא לִשְׁאָרָא דְעַמֵיהּ דְיִשְׁתָּאַר מֵאַתּוּרָאָה כְּמָא דַהֲוַת לְיִשְׂרָאֵל בְּיוֹם מַסְקֵיהוֹן מֵאַרְעָא דְמִצְרָיִם: ^is-11-16

## Capítulo 12

**1** וְתֵימַר בְּעִדָנָא הַהִיא אוֹדִי קֳדָמָךְ יְיָ אֲרֵי עַל דְחָבֵית קֳדָמָךְ הֲוָה רוּגְזָךְ עֲלָי וּכְדוּ דְתָבֵית לְאוֹרַיְתָא יְתוּב רוּגְזָךְ מִנִי וּתְרַחֵם עֲלָי: ^is-12-1

**2** הָא עַל מֵימָר אֱלָהָא פּוּרְקָנִי אֲנָא רָחִיץ וְלָא אִזְדַעְזָא אֲרֵי תוּקְפִי וְתוּשְׁבַּחְתִּי דְחִילָא יְיָ אֲמַר בְּמֵימְרֵיהּ וְהַוָה לִי לְפָרִיק: ^is-12-2

**3** וּתְקַבְּלוּן אוּלְפַן חֲדַת בְּחֶדְוָא מִבְּחִירֵי צַדִיקַיָא: ^is-12-3

**4** וְתֵימְרוּן בְּעִדָנָא הַהִיא אוֹדוּ קֳדָם יְיָ צַלוּ בִּשְׁמֵיהּ חֲווּ בְּעַמְמַיָא עוֹבָדוֹהִי אִדְכַּרוּ אֲרֵי תַקִיף שְׁמֵיהּ: ^is-12-4

**5** שַׁבְּחוּ קֳדָם יְיָ אֲרֵי גְבוּרָן עֲבַד גַלְיָא דָא בְּכָל אַרְעָא: ^is-12-5

**6** בּוּעִי וְשַׁבְּחִי כְּנִשְׁתָּא דְצִיוֹן אֲרֵי רַבָּא אֲמַר לְאַשְׁרָאָה שְׁכִינְתֵּיהּ בְּגַוָךְ קַדִישָׁא דְיִשְׂרָאֵל: ^is-12-6

## Capítulo 13

**1** מַטֵל כָּס דִי לְוָט לְאַשְׁקָאָה יַת בָּבֶל דְאִתְנַבֵּי יְשַׁעְיָה בַּר אָמוֹץ: ^is-13-1

**2** עַל כְּרַכָּא דְיַתְבָא שְׁלֵיוָא זְקוּפוּ אָתָא אֲרִימוּ קָלָא לְהוֹן אֲנִיפוּ יַד וְיֵיעֲלוּן בְּתַרְעָהָא מִתְנַדְבִין: ^is-13-2

**3** אֲנָא פַקְּדִית לְמִזְמַנֵי אַף עַרְעֵית גִבָּרַי וְיִתְפָּרְעוּן מִנְהוֹן רוּגְזִי תּוּקְפִי וְתוּשְׁבַּחְתִּי: ^is-13-3

**4** קַל הֲמוֹן בְּטוּרַיָא דְמוּת עַם סַגִי קַל אִתְרְגוּשַׁת מַלְכְּוָן עַמְמַיָא דְמִתְכַּנְשִׁין יְיָ צְבָאוֹת מְמַנֵי מַשִׁרְיָן בִּקְרָבָא: ^is-13-4

**5** אָתָן מֵאַרְעָא רְחִיקָא מִסְיָפֵי אַרְעָא יְיָ וּמָנֵי כָס דִלְוָט קֳדָמוֹהִי לְחַבָּלָא כָּל רִשְׁעֵי אַרְעָא: ^is-13-5

**6** אַיְלִילוּ אֲרֵי קָרִיב יוֹמָא דַעֲתִיד לְמֵיתֵי מִן קֳדָם יְיָ כְּבִיזָא מִן קֳדָם שַׁדַי יֵיתִי: ^is-13-6

**7** עַל כֵּן כָּל יְדַיָא יִתְרַשְׁלוּן וְכָל לִבָּא דֶאֱנָשָׁא יִתְמְסֵי: ^is-13-7

**8** וְיִתְבַּהֲלוּן עָקָא וְחֶבְלִין יֶחְדוּנוּנוּן זִיעַ כְּלֵידָתָא יְזוּעוּן גְבַר לְחַבְרֵיהּ יִתְמְהוּן אַפֵּי שַׁלְהוֹבִין אַפֵּיהוֹן: ^is-13-8

**9** הָא יוֹמָא מִן קֳדָם יְיָ עֲתִיד לְמֵיתֵי אַכְזָרִי וְתַעֲבוֹר וּתְקוֹף רְגַז לְשַׁוָאָה אַרְעָא לְצָדוּ וְחַיָבָהָא יְשֵׁיצֵי מִנָהּ: ^is-13-9

**10** אֲרֵי כוֹכְבַי שְׁמַיָא וּכְסִלֵיהוֹן לָא יִזְהֲרוּן נְהוֹרֵיהוֹן וּקְבֵל שִׁמְשָׁא בְּמִפְקֵיהּ וְסִיהֲרָא לָא מִזְהַר נְהוֹרֵיהּ: ^is-13-10

**11** וְאַסְעַר עַל זְדַיְרִין בְּתֵבֵל בִּישְׁתָא וְעַל רַשִׁיעַיָא חוֹבֵיהוֹן וַאֲבַטֵיל רְבוּת רַשִׁיעִין וּתְקוֹף תַּקִיפִין אַמְאִיךְ: ^is-13-11

**12** אֲחַבֵּב דַחֲלַי מִדַהֲבָא דְמִתְיַקְרִין מִנֵיהּ בְּנֵי אֱנָשָׁא וְעָבְדֵי אוֹרַיְתָא מִמַסְנָנָא דְאוֹפִיר: ^is-13-12

**13** עַל כֵּן שְׁמַיָא אַזִיעַ וּתְזוּעַ אַרְעָא מֵאַתְרָהָא מִן קֳדָם יְיָ צְבָאוֹת וּבְיוֹם תְּקוֹף רוּגְזֵיהּ: ^is-13-13

**14** וִיהֵי כְּטַבְיָא מְפָרֵד וּכְעָאן וְלֵית דְמַכְנֵישׁ גְבַר לְעַמֵיהּ יִתְפְּנוּן וּגְבַר לְאַרְעֵיהּ יְעַרְקוּן: ^is-13-14

**15** כָּל דְיִשְׁתְּכַח בָּהּ יִתְקְטֵל וְכָל דְיֵעוּל לִכְרַכֵּי צִיָרָא יִתְקְטֵל בְּחַרְבָּא: ^is-13-15

**16** וְעוּלֵימֵיהוֹן יִטְרְפוּן לְעֵינֵיהוֹן יִתְבְּזִיזוּן בָּתֵּיהוֹן וּנְשֵׁיהוֹן יִשְׁתַּכְבָן: ^is-13-16

**17** הָא אֲנָא מַיְתֵי עֲלֵיהוֹן יַת מָדַי דִי בְּכַסְפָּא לָא מְטַקְסִין וְדַהֲבָא לָא מִתְרְעִין בֵּיהּ: ^is-13-17

**18** וְקַשְׁתָּתְהוֹן עוּלֵימִין יְבַזְעָן וְעַל וְלַד מָעִין לָא יְרַחֲמוּן עַל בְּנַיָא לָא תָחוֹס עֵינֵיהוֹן: ^is-13-18

**19** וּתְהֵי בָּבֶל דַהֲוַת מִלְקַדְמִין חֶדְוַת מַלְכְּוַן תּוּשְׁבָּחַת רְבוּת כַּסְדָאֵי כַּהֲפֵיכָתָא דַהֲפַךְ יְיָ יַת סְדוֹם וְיַת עֲמוֹרָה: ^is-13-19

**20** לָא תִתַּב לַעֲלַם וְלָא תִשְׁרֵי עַד דָר וְדָר לָא יִפְרוֹס תַּמָן עֲרָבִי מַשְׁכְּנֵיהּ וְרַעֲיָן לָא יִשְׁרוּן תַּמָן: ^is-13-20

**21** וְיִשְׁרוּן תַּמָן תַּמְוַן וְיִתְמְלוּן בָתֵּיהוֹן אוֹחִין וְיִשְׁרְיָן תַּמָן בְּנַת נַעֲמִין וְשֵׁידִין יְחַיְכוּן תַּמָן: ^is-13-21

**22** וִינַפְצוּן חֲתוּלִין בְּבִרְנְיָתְהוֹן וִירוּדוּן בְּבֵית מֵישְׁרֵי תַּפְנוּקֵיהוֹן וְקָרֵיב לְמֵיתֵי עִדָן תַּבְרָהּ דְבָבֶל וְיוֹמָהָא לָא יִתְרַחֲקּוּן: ^is-13-22

## Capítulo 14

**1** אֲרֵי יְרַחֵם יְיָ עַל דְבֵית יַעֲקֹב וְיִתְרְעֵי עוֹד בְּיִשְׂרָאֵל וְיִשְׁרִינוּן עַל אַרְעֲהוֹן וְיִתּוֹסְפוּן גִיוֹרִין עֲלֵיהוֹן וְיִסְתַּמְכוּן עַל בֵּית יַעֲקֹב: ^is-14-1

**2** וְיַדְבְּרִינוּן עַמְמִין וְיוֹבְלוּנוּן לְאַרְעֲהוֹן וְיַחְסְנוּן בֵּית יִשְׂרָאֵל עַל אֲרַע שְׁכִנְתָּא דַייָ לְעַבְדִין וּלְאַמְהָן וִיהוֹן שָׁבִין לְשׁוֹבֵיהוֹן וְיִפְלְחוּן בִּמְשַׁעְבְּדֵיהוֹן: ^is-14-2

**3** וִיהֵי בְּיוֹמָא דִינִיחַ יְיָ לָךְ מִצַעֲרָךְ וּמִמַרְוָתָךְ וּמִן פוּלְחָנָא קַשְׁיָא דְאִתְפְּלַח בָּךְ: ^is-14-3

**4** וְתִטוֹל מַתְלָא הָדֵין עַל מַלְכָּא דְבָבֶל וְתֵימַר אֵיכְדֵין בְּטֵילַת מַרְוַת מְשַׁעְבְּדָנָא סָף תְּקוֹף חַיָבָא: ^is-14-4

**5** תְּבַר יְיָ תְּקוֹף רַשִׁיעִין שׁוּלְטַן חַיָבִין: ^is-14-5

**6** דַהֲוָה מָחֵי עַמְמִין בִּתְקוֹף מְחָא דִי לָא פְּסִיק מַפְלַח בִּתְקוֹף עַמְמִין מַפְלַח וְלָא מְנָע: ^is-14-6

**7** נָחַת שְׁדוֹכַת כָּל אַרְעָא יַבְעוּ תּוּשְׁבְּחָא: ^is-14-7

**8** אַף שִׁלְטוֹנִין חֲדִיאוּ עֲלָךְ עַתִּירֵי נִכְסַיָא אָמְרִין מֵעִידַן דִשְׁכֵיבְתָּא לָא סְלִיק מְחַבְּלָא עֲלָנָא: ^is-14-8

**9** שְׁאוֹל מִלְרַע זָעַת לָךְ לִקֳדָמוּת מֵיתָךְ אֲעִירַת לָךְ גִבָּרִין כָּל עַתִּירֵי נִכְסַיָא אָקִימוּ מִכּוּרְסְוַתְהוֹן כָּל מַלְכֵי עַמְמַיָא: ^is-14-9

**10** כּוּלְהוֹן יְתִיבוּן וְיֵימְרוּן לָךְ אַף אַתְּ מְרַעְתָּא כְוָתָנָא לָנָא דְמִיתָא: ^is-14-10

**11** אִתְּחַת לִשְׁאוֹל יְקָרָךְ אִתְרְגוּשַׁת תּוּשְׁבְּחַת זְמָרָךְ תְּחוֹתָךְ יְשַׁווּן רִמָה וְעֵיל מִנָךְ רִיחֲשָׁא: ^is-14-11

**12** אֵיכְדֵין אִתְרְכִינְתָּא מִן רוּמָא דַהֲוֵיתָא זִיוְתָן בְּגוֹ בְְנֵי אֱנָשָׁא כְּכוֹכָב נוֹגְהָא בֵּין כּוֹכְבַיָא אִתְרַטֵישְׁתָּא לְאַרְעָא דַהֲוֵיתָא קְטוֹל בְּעַמְמַיָא: ^is-14-12

**13** וְאַתְּ אֲמַרְתְּ בְּלִבָּךְ לְרוּמָא אֶסַק עֵיל מִן עַמֵיהּ דֵאלָהָא אֲשַׁוֵי כוּרְסֵי מַלְכוּתִי וְאֶתֵּיב בְטוּר זְמַן בִּסְיָפֵי צִפּוּנָא: ^is-14-13

**14** אֶסַק עִלַוֵי כָל עַמָא אֶהִי עִילָאִי מִכּוּלְהוֹן: ^is-14-14

**15** בְּרַם לִשְׁאוֹל תִּתְחַת לִסְיָפֵי גוֹב בֵּית אַבְדָנָא: ^is-14-15

**16** חָזָךְ עֲלָךְ יְדוּקוּן בָּךְ יִסְתַּכְּלוּן וְיֵימְרוּן הָדֵין גַבְרָא אֲזִיעַ אַרְעָא אַצְדֵי מַלְכְּוָתָא: ^is-14-16

**17** שַׁוֵי תֵּבֵל כְּמַדְבְּרָא וְקִרְווֹהִי פִּגֵר לַאֲסִירוֹהִי לָא פְּתַח תַּרְעָא: ^is-14-17

**18** כָּל מַלְכֵי עַמְמַיָא כּוּלְהוֹן שָׁכְבִין בִּיקָר גְבַר בְּבֵית עַלְמֵיהּ: ^is-14-18

**19** וְאַתְּ אִתְרְכִיתְּנָא מִקִבְרָךְ כְּחָט טְמִיר חֲפֵי קְטִילִין מְטַעֲנֵי חֶרֶב נַחֲתִין לְגוֹב אַבְנֵי בֵּית אַבְדָנָא כִּפְגַר מְדַשְׁדָשׁ: ^is-14-19

**20** לָא תְהֵי כְּחַד מִנְהוֹן בִּקְבוּרָה אֲרֵי אַרְעָךְ חַבֵּילְתָּא וְעַמָךְ קָטֵילְתָּא לָא יִתְקַיֵים לַעֲלָם זֶרַע מַבְאָשִׁין: ^is-14-20

**21** אַתְקִינוּ לִבְנֵיהוֹן קִטוֹל בְּחוֹבַי אֲבָהַתְהוֹן דִלְמָא יְקוּמוּן וְיַחְסְנוּן אַרְעָא וְיִתְמְלוּן אַפֵּי תֵבֵל בְּעֵיל דְבָבוּ: ^is-14-21

**22** וְאִתְגְלֵי לְאִתְפְּרָעָא מִנְהוֹן אֲמַר יְיָ צְבָאוֹת וֶאֱשֵׁיצֵי לְבָבֶל שׁוּם וּשְׁאָר בַּר וּבַר בַּר אֲמַר יְיָ: ^is-14-22

**23** וַאֲשַׁוִינָהּ לִירוּתַת קוּפְדִין בֵּית צָדוּ בִּיצִין דְמַיָן וֶאֱהַמְמִינָהּ כְּמָא דִמְהַמְמִין בִּמְבִינָא וַאֲתַבְּבִינָהּ לְשֵׁיצָאָה אֲמַר יְיָ צְבָאוֹת: ^is-14-23

**24** קַיָם יְיָ צְבָאוֹת לְמֵימָר אִם לָא כְּמָא דַחֲשֵׁיבִית כֵּן תְּהֵא וּכְמָא דְיַעֲצִית הִיא תָקוּם: ^is-14-24

**25** לְמִתְבַּר אַתּוּרָאָה בְּאַרְעִי וְעַל טוּרֵי עַמִי אַדוֹשְׁשִׁינֵיהּ וְתֶעְדֵי מִנְהוֹן מַרְוָתֵיהּ וְנִירֵיהּ מֵעַל צַוְרֵיהוֹן יִתְפְּסַק: ^is-14-25

**26** דָא מַלְכָּא דִי מְלִיךְ עַל כָּל יַתְבֵי אַרְעָא וְדָא גְבוּרְתָּא דִי מְרַמְמָא דְשַׁלִיט עַל כָּל מַלְכְּוָתָא: ^is-14-26

**27** אֲרֵי יְיָ צְבָאוֹת מְלַךְ וּמַן יַעְדֵי וּגְבוּרְתֵּיהּ מְרַמְמָא וְלֵית דִיתִיבִינֵיהּ: ^is-14-27

**28** בְּשַׁתָּא דְמִית מַלְכָּא אָחָז הֲוָה מַטַל נְבוּאָתָא הָדָא: ^is-14-28

**29** לָא תֵיחְדוּן פְּלִשְׁתָּאֵי כּוּלְכוֹן אֲרֵי אִתְּבַּר שׁוּלְטַן דַהֲוָה מַפְלַח בְּכוֹן אֲרֵי מִבְּנֵי בְנוֹהִי דְיִשָׁי יִפּוֹק מְשִׁיחָא וִיהוֹן עוֹבָדוֹהִי בְּכוֹן כְּחֵיוֵי מַפְרִיחַ: ^is-14-29

**30** וְיִתְפַּרְנְסוּן חֲשֵׁיכֵי עַמָא וְעִנְוְתָנַיָא בְּיוֹמוֹהִי לְרוֹחֲצָן יִשְׁרוֹן וְיֵמִית בְּכַפְנָא בְּנֵךְ וּשְׁאַר עַמִיךְ יִקְטוֹל: ^is-14-30

**31** אֱלִילִי עַל תַּרְעָךְ צַוְחִי עַל קִרְוָךְ אִתְבַּרְתּוּן פְּלִשְׁתָּאֵי כּוּלְכוֹן אֲרֵי מִצִפּוּנָא פּוּרְעֲנוּתָא אָתֵי וְלֵית דִמְאַחַר בְּזִמְנוֹהִי: ^is-14-31

**32** וּמַה יְבַסְרוּן אִזְגַדֵי עַמְמַיָא אֲרֵי יְיָ שַׁכְלֵיל צִיוֹן וּבָהּ יִתְרַחֲצוּן חֲשִׁיכֵי עַמָא: ^is-14-32

## Capítulo 15

**1** מַטַל כָּס דִלְוָט לְאַשְׁקָאָה יַת מוֹאָב אֲרֵי בְּלֵילְיָא אִתְבְּזִיזַת לְחַיַת מוֹאָב וְאִינוּן דְמִיכִין וּבְלֵילְיָא אִתְכְּבֵישׁ כְּרַכָּא דְמוֹאָב וְאִינוּן רְדִימִין: ^is-15-1

**2** סְלִיקוּ לְבָתַּיָא דְדִיבוֹן לְבָמָתָא לְמִבְכֵּי עַל נְבוֹ וְעַל מֵידְבָא מוֹאֲבָאֵי מְיַלְלִין בְּכָל רֵישֵׁיהוֹן מְרָטָה וּבְכָל דְקַן גִלוּחַ: ^is-15-2

**3** בְּשׁוֹקֵיהוֹן יִסְרוּן סַקִין עַל אִיגָרֵיהוֹן וּבִרְחוֹבֵיהוֹן כּוּלְהוֹן מְיַלְלִין מְצַוְחִין וּבָכָן: ^is-15-3

**4** וּצְוָחוּ יַתְבֵי חֶשְׁבּוֹן וְאֶלְעָלֵה עַד יַהַץ אִשְׁתְּמַע קַלְהוֹן עַל כֵּן מְזַרְזֵי מוֹאָב מְיַלְלִין וְעַל נַפְשֵׁיהוֹן מְצַוְחִין: ^is-15-4

**5** בְּלִבְּהוֹן מוֹאֲבָאֵי יֵימְרוּן לְמַעֲרַק עַד צוֹעַר עֶגְלַת תִּלְתּוּת רַבְּתָא אֲרֵי בְמַסוּקִית לוּחִית בִּדְבָכָן יִסְקוּן בֵּיהּ אֲרֵי בְמָחוֹתִית חוֹרְנַיִם צִוְחַת תְּבִירֵי קְרָב יְבַסְרוּן: ^is-15-5

**6** אֲרֵי מֵי נִמְרִים לְצָדוּ יְהוֹן אֲרֵי יָבֵשׁ עִסְבָּא סַף דְתָאָה יְרוֹק לָא הֲוָה: ^is-15-6

**7** עַל כֵּן שְׁאָר נִכְסֵיהוֹן יִתְבַּזְזוּן וּתְחוּמְהוּן דְעַל יַמָא מַעַרְבָא יִתְנְסֵיב מִנְהוֹן: ^is-15-7

**8** אֲרֵי אַקְפַת צִוְחָתָא יַת תְּחוּם מוֹאָב עַד אֶגְלַיִם מְיַלְלִין וּבְאֵר אֵלִים מְצַוְחִין: ^is-15-8

**9** אֲרֵי מֵי דִימוֹן אִתְמְלִיאוּ דַם קְטוֹלִין אֲרֵי אֱמַנֵי עַל דִימוֹן כְּנִישַׁת מַשִׁירְיָן לְשֵׁיזָבַת מוֹאָב מֶלֶךְ בְּמַשִׁרְיָתֵיהּ יִסַק וּלְמִבָּז שְׁאָרָא דְאַרְעֲהוֹן: ^is-15-9

## Capítulo 16

**1** יְהוֹן מַסְקֵי מִסִין לִמְשִׁיחָא דְיִשְׂרָאֵל דְיִתְקוֹף עַל דַהֲווֹ בְּמַדְבְּרָא טוּר כְּנִשְׁתָּא דְצִיוֹן: ^is-16-1

**2** וִיהֵי כְעוֹפָא דְאַפְרָחוֹהִי מִקִנֵיהּ וִיטַלְטֵיל יִתַּפְקָן וִיהֶוְיָן בְּנַת מוֹאָב מְגִיזַן לְהוֹן לְאַרְנוֹן: ^is-16-2

**3** אִתְמְלִיכוּ מְלַךְ עֱבִידוּ עֵצָה שַׁוִיאוּ כְלֵילְיָא טוּלֵיךְ בִּימָמָא בְּגוֹ טִיהֲרָא טַמְרֵי מְטַלְטְלַיָא וּמְבַדְרַיָא לָא תִקְרְבוּן: ^is-16-3

**4** יִתְיַתְבוּן בִּיךְ מְטַלְטְלֵי מַלְכוּת מוֹאָב הֲוֵי סִתְרָא לְהוֹן מִן קֳדָם בְּזוֹזִין אֲרֵי סַף מֵעַיָקָא אִשְׁתֵּיצֵי בְזָזָא סָפוּ כָּל דַהֲווֹ דָיְשִׁין מִן אַרְעָא: ^is-16-4

**5** בְּכֵן מְשִׁיחָא דְיִשְׂרָאֵל יְתַקֵן בְּטוּב כּוּרְסוֹהִי וִיתֵיב עֲלוֹהִי בִקְשׁוֹט בְּקַרְתָּא דְדָוִד דָאִין וְתָבַע דִין וַעֲבַד קְשׁוֹט: ^is-16-5

**6** שְׁמַעְנָא רַבְרְבֵי מוֹאָב דְמִתְגָאָן לַחֲדָא יַקִירֵיהוֹן וּמְפַנְקֵיהוֹן וְגַוְתָנוֹתְהוֹן לָקֳבֵל פּוּרְעָנוּתְהוֹן לָא שָׁוֵי לְהוֹן: ^is-16-6

**7** בְּכֵן מְיַלְלִין מוֹאֲבָאֵי עַל מוֹאֲבָאֵי כּוּלְהוֹן מְצַוְחִין וּמְיַלְלִין עַל אֱנַשׁ כְּרַךְ תּוּקְפֵהוֹן דָוָן יֵמְרוּן בְּרַם כְּבִישִׁין: ^is-16-7

**8** אֲרֵי אִתְבְּזִיזָא מַשִׁרְיַת חֶשְׁבּוֹן אִתְקַטְלָא סִיעַת שִׂבְמָה מַלְכֵי עַמְמַיָא קְטִילוּ שִׁלְטוֹנֵיהוֹן עַד יַעְזֵר מְטוֹ טָעוֹ לְמַדְבְּרָא מְטַלְטִלֵיהוֹן גָזוּ עֲבַרוּ יַמָא: ^is-16-8

**9** עַל כֵּן כְּמָא דְאַיְתֵיתִי מַשִׁרְיָן עַל יַעְזֵר כֵּן אַיְתֵי קְטוֹלִין עַל שִׂבְמָא אֱרַוִינָךְ דִמְעָתָא חֶשְׁבּוֹן וְאֶלְעָלֵה אֲרֵי עַל חַצְדִיךְ וְעַל קִיטְפִיךְ בְּזוֹזִין נְפָלוּ: ^is-16-9

**10** וְתִתְכְּנֵישׁ בִיעַ וְחֶדְוָה מִן כַּרְמְלָא וּבְכַרְמַיָא לָא יְדוּצוּן וְלָא יְחַיְכוּן וַחֲמַר בְּמַעְצְרַיָא לָא יַעְצְרוּן עָצוֹרִין עָצוֹר אַבְטֵלִית: ^is-16-10

**11** עַל כֵּן מְעֵיהוֹן דְמוֹאֲבָאֵי כְּכִּנָרַיָא הָמָן וְלִבְּהוֹן עַל אֱנַשׁ כְּרַךְ תוּקְפֵיהוֹן דָוָן: ^is-16-11

**12** וִיהֵי אֲרֵי יֶחֱזֵי אֲרֵי יִלְאָה מוֹאָב עַל בָּמָתָא וְיֵעוּל לְבֵית טַעֲוָתֵיהּ לְמִבְעֵי וְלָא יִכּוּל: ^is-16-12

**13** דֵין פִּתְגָמָא דִי מַלֵיל יְיָ עַל מוֹאֲבָאֵי מִבְּכֵן: ^is-16-13

**14** וּכְעַן מַלֵיל יְיָ לְמֵימָר בִּתְלַת שְׁנִין כִּשְׁנֵי אֲגִירָא וְיֵסוּף יְקָרְהוֹן דְמוֹאֲבָאֵי בְּכֹל הֲמוֹן סַגְיָא וּשְׁאָר צִבְחַר כִּזְעֵיר יְסוּף כָּל יְקָרֵיהוֹן: ^is-16-14

## Capítulo 17

**1** מַטֵל כַּס דִלְוָט לְאַשְׁקָאָה יַת דַמֶשֶׂק הָא דַמֶשֶׂק מִתְעַדְיָא מִמַלְכוּ וּתְהֵי לִכְרַךְ מְחַמְרָא: ^is-17-1

**2** שְׁבִיקַן קִרְוֵיהוֹן חֲרָבוּ לְבֵית מִשְׁרֵי עֶדְרִין דְעָן יְהוֹן וְיִשְׁרוֹן וְלֵית דְמָנִיד: ^is-17-2

**3** וְיַבְטֵיל שׁוּלְטָן מֵאֶפְרַיִם וּמַלְכוּ מִדַמֶשֶׂק וּשְׁאָר יְחִידָאִין מֵאֲרַם וִיקָרְהוֹן כִּיקָר בְּנֵי יִשְׂרָאֵל יְהוֹן אֲמַר יְיָ צְבָאוֹת: ^is-17-3

**4** וִיהֵי בְּעִדָנָא הַהִיא יִמְאַךְ יְקָר יַעֲקֹב וְעוֹתֵר יְקָרֵיהּ יִגְלֵי: ^is-17-4

**5** וִיהֵי כְּמִכְנַשׁ חָצֵד קָמָה וְדַרְעֵיהּ שׁוּבְּלִין יַחֲצוֹד וִיהֵי כִמְלַקֵט שׁוּבְּלִין בְּמֵישַׁר גִבָּרַיָא: ^is-17-5

**6** וְיִשְׁתַּאֲרוּן בֵּיהּ עוֹלְלִין כְּבִיעוּר זֵיתָא תְּרֵין תְּלָתָא גַרְגְרִין בְּרֵישׁ עַנְפָא אַרְבְּעָא חַמְשָׁא בְסוֹכָא מֵרְדָא כֵּן יִשְׁתַּאֲרוּן יְחִידָאִין צַדִיקַיָא בְּגוֹ עַלְמָא בְּנֵי מַלְכְּוָתָא אֲמַר יְיָ אֱלָהָא דְיִשְׂרָאֵל: ^is-17-6

**7** בְּעִדָנָא הַהִיא יִסְתְּמֵיךְ אֱנָשָׁא לְפוּלְחַן עָבְדֵיהּ וְעֵינוֹהִי לְמֵימַר קַדִישָׁא דְיִשְׂרָאֵל יְסַבְּרוּן: ^is-17-7

**8** וְלָא יִסְתְּמֵיךְ עַל אֱגוֹרַיָא עוֹבַד יְדוֹהִי וּדְאַתְקְנָא אֶצְבְּעְתֵיהּ לָא יִתְקַיֵים וַאֲשֵׁרַיָא וַחֲנִיסְנְסַיָא: ^is-17-8

**9** בְּעִדָנָא הַהִיא יֶהֱוְיָן קִרְוֵי תוּקְפֵיהוֹן כִּכְרַךְ דַחֲרִיב וְאִתְחַמַר דִי אִשְׁתְּבֵיק מִן קֳדָם בְּנֵי יִשְׂרָאֵל וּתְהֵי לְצָדוּ: ^is-17-9

**10** אֲרֵי שְׁבַקְתְּ אֱלָהָא דְפוּרְקָנִיךְ וְדַחְלַת תַּקִיפָא דִי מֵימְרֵיהּ בְּסַעֲדָךְ לָא אִדְכַּרְתְּ בְּדִיל דְאַתְּ נְצִיבָא נִצְבָא בְּחִירָא וְעוֹבְדֵין מְקַלְקְלִין אַסְגֵית: ^is-17-10

**11** בַּאֲתַר דְאִתְקַדַשְׁתּוּן לְמֶהֱוֵי עַם תַּמָן קִלְקַלְתּוּן עוֹבָדֵיכוֹן וְאַף כַּד עַלְתּוּן לַאֲרַע בֵּית שְׁכִנְתִּי תַּמָן הֲוָה חֲזֵי לְכוֹן לְמִפְלַח שְׁבַקְתּוּן פּוּלְחָנִי וּפְלַחְתּוּן לְטַעֲוָתָא אַרְחֵיקְתּוּן תְּיוּבְתָּא עַד דִמְטָא יוֹם תְּבַרְכוֹן בְּכֵן הֲוָה כֵּיבְכוֹן לְמַפְחַת נְפָשׁ: ^is-17-11

**12** וַי הֲמוֹן עַמְמִין סַגִיאִין דִי כְמַהֲמֵי יַמָא הָמָן וְאִתְרְגוּשַׁת מַלְכְּוָן דִכְאִתְרְגוּשַׁת מַיִין תַּקִיפִין מִתְרַגְשִׁין: ^is-17-12

**13** מַלְכְּוָן דִכְאִתְרְגוּשַׁת מַיִין סַגִיאִין מִתְרַגְשִׁין וִיזוּף בֵּיהּ וְיֶעְרוּק מֵרָחִיק וִיתְרַדֵף כְּמוֹץ טוּרַיָא קֳדָם רוּחָא וּכְגַלְגְלָא קֳדָם עַלְעוּלָא: ^is-17-13

**14** לְעִדַן רַמְשָׁא וְהָא כִדְלָא הֲוָה עַד דְלָא צַפְרָא וְהָא כִדְלֵיתוֹהִי דֵין חוּלַק לְאָסְנָנָא וַעֲדַב לְבָזְזָנָא: ^is-17-14

## Capítulo 18

**1** וַי אַרְעָא דְאָתָן לָהּ בִּסְפִינָן מֵאַרְעָא רְחִיקָא וְקִלְעֵיהוֹן פְּרִיסָן כְּנִשְׁרָא דְטָאִיס בְּכַנְפוֹהִי דְמֵעִבַּר לְנַהֲרֵי הוֹדוּ: ^is-18-1

**2** דִמְשַׁלַח בְּיַמָא אִזְגַדִין וּבִדְגוּגִין עַל אַפֵּי מַיָא אֱזִילוּ אִזְגַדִין קַלִילִין לְוַת עַמָא אֲנִיסָא וּבְזִיזָא לְוַת עַמָא דִתְקַיף מִבְּכֵין וּלְהַלָא עַמָא אֲנִיסָא וּבְזִיזָא דְבָזוּ עַמְמַיָא אַרְעֵיהּ: ^is-18-2

**3** כָּל דְיָתְבִין בְּתֵבֵל וּדְשָׁרָן בְּאַרְעָא כְּמִזְקַף אָתָא עַל טוּרַיָא תֶחְזוּן אָתָא וּכְמִתְקַע שׁוֹפָרָא תִּשְׁמְעוּן פוּרְקַן: ^is-18-3

**4** אֲרֵי כִדְנַן אֲמַר יְיָ לִי אַנִיחַ לְעַמִי יִשְׂרָאֵל וְאַשְׁקֵיט לְהוֹן וְאֶתְרְעִי מִמְדוֹר קוּדְשִׁי לְאוֹטָבָא לְהוֹן בִּרְכָן וְנַחֲמָן אַיְתִי לְהוֹן בִּפְרִיעַ כִּשְׁחִין פָּצִיחַ עַל שֶׁמֶשׁ כַּעֲנָן טַל בִּשְׁחִין חֲצַד: ^is-18-4

**5** אֲרֵי עַד לָא יִמְטֵי זְמַן חַצְדָא אִלָנָא לְאַפְרָחָא וּבִסְרָא מִנֵהּ סְמָדָר וְיִקְטוֹל שִׁלְטוֹנֵי עַמְמַיָא בְּחַרְבָּא וְיַת תַּקִיפֵיהוֹן יַעְדֵי וְיֶעְבַּר: ^is-18-5

**6** יִשְׁתַּבְּקוּן כַּחֲדָא לְעוֹפָא דְטוּרַיָא וְלִבְעִירָא דְאַרְעָא בְּקַיְטָא יְהֵי שָׁרֵי עֲלוֹהִי כָּל עוֹפָא דִשְׁמַיָא וְכָל בְּעִירָא דְאַרְעָא עֲלוֹהִי יַעַבְּרוּן סִתְוָא: ^is-18-6

**7** בְּעִדָנָא הַהִיא יַיְתִינֵיהּ בְּתוּקְרַבְתָּא לִקֳדָם יְיָ צְבָאוֹת לְעַמָא אֲנֵיסָא וּבְזִיזָאוּ לְוַת עַמָא דְיִתְקֵף מִבְּכֵן וּלְהַלָא עַמָא אֲנִיסָא וּבָזִיזָא דְבַזוּ עַמְמַיָא אַרְעֵהּ לְאַתְרָא דְאִתְקְרֵי שְׁמָא דַייָ צְבָאוֹת דִשְׁכִנְתֵּהּ בְּטוּרָא דְצִיוֹן: ^is-18-7

## Capítulo 19

**1** מַטַל כַּס דִלְוָט לְאַשְׁקָאָה יַת מִצְרָאֵי הָא יְיָ מִתְגְלֵי בַּעֲנָן יְקָרֵהּ לְאִתְפְּרָעָא מִמִצְרַיִם וְיִתַּבְּרוּ טַעֲוַת מִצְרָאֵי מִן קֳדָמוֹהִי וְלִבָא דְמִצְרָאֵי יִתְמְסֵי בִּמְעֵיהוֹן: ^is-19-1

**2** וֶאֱגָרֵי מִצְרָאֵי בְּמִצְרָאֵי וִיגִיחוּן קְרָב גְבַר בַּאֲחוּהִי וּגְבַר בְּחַבְרֵהּ קְרִי בִּקְרִי וּמָלְכוּ בְמָלְכוּ: ^is-19-2

**3** וְתִתְמְסֵי רוּחָא דְמִצְרָאֵי בִּמְעֵיהוֹן וְחַכִּימֵיהוֹן אֱסַלְעֵם וְיִתְבְּעוּן מִן טַעֲוָן וּמִן חֲרָשִׁין וּמִן בִּידִין וּמִן זְכוּרוּ: ^is-19-3

**4** וְאֶמְסַר יַת מִצְרָאֵי בְּיַד רִבּוֹן קְשֵׁי וּמְלַךְ תַּקִיף יִשְׁלוֹט בְּהוֹן אֲמַר רִבּוֹן עַלְמָא יְיָ צְבָאוֹת: ^is-19-4

**5** וְיִצְדוּן מַיָא מִיַמָא וּנְהַרְהוֹן יֶחְרוֹב וְיִיבַשׁ: ^is-19-5

**6** וְיִצְדוּן נַהַרְוָתְהוֹן וְיִבְשׁוּן וְיֶחְרְבוּן נַהֲרֵיהוֹן עַמִיקַיָא קָנֵי וְגוֹמָא לָא יִסְקוּן: ^is-19-6

**7** וְיִיבַשׁ רוּבֵהּ דְנַהֲרָא וִיהֵי בְכֵיפֵי וְכָל בֵּית מִזְרַע נְהַרְהוֹן יִיבַשׁ וְיֶחֱרַב וְלָא יִצְמַח: ^is-19-7

**8** וְיִצְדוּן צַיְדֵי נוּנַיָא וְיִתְאַבְּלוּן כָּל דַהֲווֹ רָמָן בְּנַהֲרָא חַכְּתָא וּפַרְסֵי מַצְדָן עַל אַפֵּי מַיָא יִצְדוּן: ^is-19-8

**9** וְיִבְהֲתוּן פַּלְחֵי כִּתָּנָא דִסְרִיקִין וּמְחָן מִנֵהּ מַצְדָן: ^is-19-9

**10** וִיהֵי אֲתַר בֵּית שָׁתֵי מְחָא כְבִישִׁין אֲתַר דַהֲווֹ עָבְדִין סִכְרָא וְכָנְשִׁין מַיָא גְבַר לְנַפְשֵׁהּ: ^is-19-10

**11** בְּרַם אִטַפָּשׁוּ רַבְרְבַי טָאנֵס חַכִּימַיָא דְמַלְכוּהִי לְפַרְעֹה מְלַךְ דְטָעוּ אֵיכְדֵין תַּמְרוּן לְפַרְעֹה בְּנֵי חַכִּימִין אֲנַחְנָא וְאַתְּ בַּר מַלְכִין דְמִלְקַדְמִין: ^is-19-11

**12** אָן אִינוּן חַכִימָךְ וִיחַווּן כְּעַן לָךְ וְיֵדְעוּן מַה מְלַךְ יְיָ צְבָאוֹת עַל מִצְרָיִם: ^is-19-12

**13** אִטְפַּשׁוּ רַבְרְבֵי טָאנֵס טְעוֹ אֱנָשׁ מַפִיס אַטְעַיוּ יַת מִצְרָאֵי רַבָּנֵי פַלְכָהָא: ^is-19-13

**14** יְיָ רָמָא בֵינֵיהוֹן רוּחַ דְטָעוּ וְאַטְעִיאוּ יַת מִצְרַיִם בְּכָל עוֹבְדֵיהוֹן כְּמָא דְטָעֵי רַוְיָא וּמִדַשְׁדֵשׁ בְּתִיוּבֵהּ: ^is-19-14

**15** וְלָא יְהֵי לְמִצְרַיִם מַלְכָא דִמְלַךְ רֵישׁ וְהֶגְמוֹן שִׁלְטוֹן וְאִטְרוֹן: ^is-19-15

**16** בְּעִדָנָא הַהִיא יְהוֹן מִצְרָאֵי חַלָשִׁין כְּנִשִׁין וִיזוּעוּן וְיִתַּבְּרוּן מִן קֳדָם אֱרָמוּת גְבוּרְתָּא דַייָ צְבָאוֹת דְהוּא מֵרִים עֲלֵיהוֹן: ^is-19-16

**17** וּתְהֵי אַרְעָא דְבֵית יְהוּדָה לְמִצְרַיִם לְדַחֲלָא כָּל דְיִדְכַּר יָתָהּ לֵיהּ יְזוּעַ מִן קֳדָם מַלְכָא דַייָ צְבָאוֹת דְהוּא מְלִיךְ עֲלֵיהוֹן: ^is-19-17

**18** בְעִדָנָא הַהִיא יֶהֶוְיָן חֲמֵשׁ קִרְוִין בְּאַרְעָא דְמִצְרַיִם מְמַלְלָן מַמְלַל כְּנַעֲנָאָה וְקַיְמָן בִּשְׁמָא דַייָ צְבָאוֹת קַרְתָּא בֵית שֶׁמֶשׁ דַעֲתִידָא לְמֶחְרַב יִתְאַמַר הִיא חֲדָא מִנְהוֹן: ^is-19-18

**19** בְּעִדָנָא הַהִיא יְהֵי מַדְבְּחָא מְתַקֵן קֳדָם יְיָ בְּגוֹ אַרְעָא דְמִצְרַיִם וְקָמְתָא בִּסְטַר תְּחוּמָהּ קֳדָם יְיָ: ^is-19-19

**20** וִיהֵי לְאָת וּלְסָהִיד קֳדָם יְיָ צְבָאוֹת בְּאַרְעָא דְמִצְרַיִם אֲרֵי יְצַלוּן קֳדָם יְיָ מִן קֳדָם דָחֲקֵיהוֹן וִישַׁלַח לְהוֹן פָּרִיק וְדַיָן וִישֵׁיזְבִינוּן: ^is-19-20

**21** וְתִתְגְלֵי גְבוּרְתָּא דַייָ לְאוֹטָבָא לְמִצְרָאֵי וְיֵדְעוּן מִצְרָאֵי לְמִדְחַל מִן קֳדָם יְיָ בְּעִדָנָא הַהִיא וְיִפְלְחוּן בְּנִכְסַת קוּדְשִׁין וּבְקוּרְבָּנִין וִינַדְרוּן נִדְרִין קֳדָם יְיָ וִישַׁלְמוּן: ^is-19-21

**22** וְיִמְחֵי יְיָ יַת מִצְרַיִם מְחָא וְיַסִנוּן וִיתוּבוּן לְפוּלְחָנָא דַייָ וִיקַבֵּל צְלוֹתֵיהוֹן וְיַסֵי יַתְהוֹן: ^is-19-22

**23** בְּעִדָנָא הַהִיא תְּהֵי אוֹרַח כְבִישָׁא מִמִצְרַיִם לְאַתּוּר וִינוּחוּן אֲתּוּרָאֵי לְמִצְרָאֵי וּמִצְרָאֵי בְּאַתּוּרָאֵי וְיִפְלְחוּן מִצְרָאֵי יַת אַתּוּרָאֵי: ^is-19-23

**24** בְּעִדָנָא הַהִיא יְהֵי יִשְׂרָאֵל תְּלִיתָאָה לְמִצְרָאֵי וּלְאַתּוּרָאֵי בִּרְכָא בְּגוֹ דְאַרְעָא: ^is-19-24

**25** דְבָרְכֵהּ יְיָ צְבָאוֹת לְמֵימָר בְּרִיךְ עַמִי דְאַפְקֵית מִמִצְרַיִם דְעַל דְחָבוּ קֳדָמַי אַגְלֵיתִי יַתְהוֹן לְאַתּוּר וּכְדוּ דְתָבוּ מַתְקְרָן עַמִי וְאַחְסַנְתִּי יִשְׂרָאֵל: ^is-19-25

## Capítulo 20

**1** בְּשַׁתָּא דַאֲתָא תַרְתָּן לְאַשְׁדוֹד כַּד שְׁלַח יָתֵהּ סַרְגוֹן מַלְכָּא דְאַתּוּר וְאַגִיחַ קְרָבָא בְאַשְׁדוֹד וְכַבְּשָׁהּ: ^is-20-1

**2** בְּעִדָנָא הַהִיא גְזַר יְיָ בְּיַד יְשַׁעְיָה בַּר אָמוֹץ לְמֵימָר אֱזֵיל וְתֵיסַר סַקָא בְחַרְצָךְ וּמְסָנָךְ תִּשְׁלוֹף מֵעַל רִגְלָךְ וַעֲבַד כֵּן אָזַל פָחֵיחַ וְיָחֵף: ^is-20-2

**3** וַאֲמַר יְיָ כְּמָא דְהַלֵיךְ עַבְדִי יְשַׁעְיָהוּ פְחֵיחַ וְיָחֵיף תְּלַת שְׁנִין אָת וּמוֹפֵת עַל מִצְרָאֵי וְעַל כּוּשָׁאֵי: ^is-20-3

**4** כֵּן יְדַבֵּר מַלְכָּא דְאַתּוּר יַת שְׁבִי מִצְרַיִם וְיַת גָלוּת כּוּשׁ עוּלֵימִין וְסָבִין פְּחִיחִין וִיחֵיפִין וּגְסָן עֶרְיָה קְלָן מִצְרָיִם: ^is-20-4

**5** וִיתַּבְּרוּן וִיבְהֲתוּן מִכּוּשׁ בֵּית רוֹחְצָנֵיהוֹן וּמִן מִצְרַיִם תּוּשְׁבַּחְתְּהוֹן: ^is-20-5

**6** וְיֵמַר יָתֵיב נִסָא הָדֵין בְּעִדָנָא הַהִיא הַכְדֵין הֲוָה בֵית רוּחֲצָנָא דַהֲוֵינָא סְבִירִין לְמֶעְרוֹק לְתַמָן לְסָעִיד לְאִשְׁתֵּיזְבָא מִן קֳדָם מַלְכָּא דְאַתּוּר עַד כְּדוּן נַפְשֵׁהוֹן לָא שֵׁזִיבוּ וְאֵיכְדֵין נִשְׁתֵּזִיב אֲנָחְנָא: ^is-20-6

## Capítulo 21

**1** מַטַל מַשִׁרְיָן דְאָתְיָן מִמַדְבְּרָא כְּמֵי יַמָא דְנָגְדִין כְּעַלְעוֹלִין דְאָתָן בְּאוֹרַח דָרוֹמָא מַדְבְּרָא וְאַתְיָן מִמַדְבְּרָא מֵאַרְעָא דְאִתְעֲבִידָא בָּהּ חֲסִינִין: ^is-21-1

**2** אֲמַר נְבִיָא נְבוּאָה קָשְׁיָא אִתְחַוָאָה לִי אֲנִיסַיָא מִתְאַנְסִין וּבָזְזַיָא מִתְבַּזְזִין סַקוּ עֵילָמָאֵי תְקִיפוּ מְדָאֵי כָּל דַהֲווֹ מִתְאַנְחִין מִן קֳדָם מַלְכָּא דְבָבֶל אַנְחֵית לְהוֹן: ^is-21-2

**3** עַל כֵּן אִתְמְלִיאוּ חַרְצֵיהוֹן זִיעַיָא דַחֲלָא אֲחַדְתִּינוּן הָא כְּחֶבְלִין לְיָלֵידְתָּא אִטַפָּשׁוּ מִלְמִשְׁמַע טָעוּ מִלְמֶחֱזֵי: ^is-21-3

**4** טְעָה לִבְּהוֹן עָקָא וּבִיעוּתִין אַחֲדוּנוּן אֲתַר בֵּית רוֹחְצָנֵיהוֹן הֲוָה לְהוֹן לִתְבַר: ^is-21-4

**5** סַדַרוּ פָּתוֹרִין אֲקִימוּ סַכְוָאִין אֲכוֹלוּ שְׁתוּ קוּמוּ רַבְרְבַיָא מְרִיקוּ וְצַחְצַחוּ זְיָנָא: ^is-21-5

**6** אֲרֵי כִדְנַן אֲמַר לִי יְיָ אֱזֵיל אֲקֵים סַכְוָאָה דְיֶחֱזֵי חַוֵי: ^is-21-6

**7** וְיֶחֱזֵי רְתַךְ אֱנַשׁ וְעִמֵהּ זוֹג פָּרָשִׁים רָכֵב עַל חֲמַר רָכִב עַל גַמְלָא אֲמַר נְבִיָא אֲצֵיצִית אֲצָתָא וַחֲזֵית וְהָא מַשִׁרְיָן לַחֲדָא: ^is-21-7

**8** אֲמַר נְבִיָא קַל מַשִׁרְיָן דְאַתְיָן בְּסִיטוּנֵיהוֹן כְּאַרְיָא וְעַל סָכוּתָא קֳדָם יְיָ אֲנָא קָאִים תְּדִירָא בִּימָמָא וְעַל מַטַרְתִּי אֲנָא מְעַתַּד כָּל לֵילְיָא: ^is-21-8

**9** וְהָא דֵין אָתָא רְתַךְ אֱנַשׁ וְעִמֵיהּ זוֹג פָּרָשִׁין וְאָתִיב וַאֲמַר נְפַלַת וְאַף עֲתִידָא לְמִפַּל בָּבֶל וְכָל צַלְמֵי טַעֲוָתָהָא יְדַקְדְקוּן לְאַרְעָא: ^is-21-9

**10** מַלְכִין דְאוּמָנִין לְאַגָחָא קְרָבָא יֵיתוּן עֲלָהּ לְמִבְזָהָא כְּאִכָּרָא דְאוּמָן לְמֵידַשׁ יַת אִדְרָא אֲמַר נְבִיָא דִשְׁמַעֵית יַת קַל מֵימְרָא דַייָ צְבָאוֹת אֱלָהָא דְיִשְׂרָאֵל חַוֵיתִי לְכוֹן: ^is-21-10

**11** מַטַל כָּס דִלְוָט לְאַשְׁקָאָה יַת דוּמָה עֲלֵי אַכְלֵי מִן שְׁמַיָא נְבִיָא פָּרֵישׁ לְהוֹן יַת נְבוּאֲתָא נְבִיָא פָּרֵישׁ לְהוֹן מָה דַעֲתִיד לְמֵיתֵי: ^is-21-11

**12** אֲמַר נְבִיָא אִית אֲגַר לְצַדִיקַיָא וְאִית פּוּרְעֲנוּת לְרַשִׁיעַיָא אִם תַּיְבִין אַתּוּן תּוּבוּ עַד דְאַתּוּן יָכְלִין לְמֵגָתָב: ^is-21-12

**13** מַטַל כָּס דִלְוָט לְאַשְׁקָאָה יַת עֲרָבָאֵי בְּחוּרְשָׁא בְרַמְשָׁא יְבִיתִין שְׁיָרַת בְּנֵי דְדָן: ^is-21-13

**14** לְאַפֵּי צַחְיָא פּוּקוּ נַגְדִין דְמַיָא דְיָתְבֵי בְּאַרְעָא דְרוֹמָא לַחְמָא דְאַתּוּן אָכְלִין זַמִינוּ לִמְעַרְקַיָא: ^is-21-14

**15** אֲרֵי מִן קֳדָם קְטוֹל עֲרָקוּ מִן קֳדָם חַרְבָּא שְׁלִיפָא וּמִן קֳדָם קֶשֶׁת מְתִיחָא וּמִן קֳדָם תְּקוֹף קְרָבָא: ^is-21-15

**16** אֲרֵי כִדְנַן אֲמַר יְיָ לִי בְּסוֹף שְׁנַיָא כִשְׁנֵי אֲגִירָא וְיָסוּף כָּל יְקָרְהוֹן דַעֲרָבָאֵי: ^is-21-16

**17** וּתְקוֹף עָבְדֵי קְרָב גִבָּרֵי בְּנֵי עֲרָבָאֵי יִזְעֲרוּן אֲרֵי בְּמֵימְרָא דַייָ אֱלָהָא דְיִשְׂרָאֵל גְזִיר כֵּן: ^is-21-17

## Capítulo 22

**1** מַטַל נְבוּאֲתָא עַל קַרְתָּא דְיַתְבָא בְחֵילְתָא דְאִתְנַבִּיאוּ עֲלָהּ נְבִיַיָא מָה לְכוֹן כְּדֵין אֲרֵי סְלֵקְתּוּן כּוּלְכוֹן לְאִגָרַיָא: ^is-22-1

**2** מִן קֳדָם אִתְרְגוּשָׁא דְאִתְמְלִיאַת קַרְתָּא מְשַׁבַּחְתָּא כְּרַכָּא חֲדָאָה קְטִילַיִךְ לָא אִתְקְטִילוּ בְחַרְבָּא וְאַף בִּקְרָבָא לָא מִיתוּ: ^is-22-2

**3** כָּל שִׁלְטוֹנַיִךְ אִטַלְטַלוּ כַחֲדָא מִן קֳדָם מְתַח קַשְׁתָּא גְלוֹ כָּל דְאִשְׁתַּכַּח בִּיךְ אִיתְקְטְלוּ כַחֲדָא מֵרָחִיק עֲרַקוּ: ^is-22-3

**4** עַל כֵּן אֲמַרֵית שְׁבוּקוּ מִנִי אֶבְכֵּי בִמְרָר לָא תִתְבְּעִיתוּ לְנַחֲמוּתִי עַל תְּבַר כְּנִשְׁתָּא דְעַמִי: ^is-22-4

**5** אֲרֵי יוֹם רְגוּשׁ וְאִתְּדָשָׁא וּקְטוֹל קֳדָם יְיָ אֱלָהֵי צְבָאוֹת עַל קַרְתָּא דְיַתְבָא בְחֵילְתָא דְאִתְנַבִּיאוּ עֲלָהּ נְבִיַיָא מַבְלְשִׁין בָּתַּיָא מַקְפִין מִגְדְלַיָא בְּרֵישֵׁי טוּרַיָא: ^is-22-5

**6** וְעֵילֵמָאֵי נְטָלוּ זְיָן בִּרְתָךְ אֱנָשׁ וְעִמֵהּ זוֹג פָּרָשִׁין וְעַל שׁוּר דְבַקוּ תְרֵיסִין: ^is-22-6

**7** וַהֲוָה שְׁפַר מִשְׁרָךְ אִתְמְלִיאוּ רְתִיכִין וּפָרָשִׁין מְמַנָן עַל תַּרְעִין: ^is-22-7

**8** וְגַלֵי יַת מַטְמוֹרִית בֵּית יְהוּדָה וְאִסְתְּכֵי בְּעִדָנָא הַהִיא עַל זְיַן בֵּית גִנְזֵי מַקְדְשָׁא: ^is-22-8

**9** וְיַת פְּלוּגַת קַרְתָּא דְדָוִד חֲזֵיתוּן אֲרֵי סַגִיאַת וְכַנֵישְׁתּוּן יַת עַמָא לְמֵי בְרִיכְתָּא אַרְעִיתָא: ^is-22-9

**10** וְיַת בָּתֵּי יְרוּשְׁלֵם מְנִיתוּן וְתָרַעֲתּוּן בָּתַּיָא לְתַקָפָא שׁוּרָא: ^is-22-10

**11** וּמִקְוַיָא עֲבַדְתּוּן בֵּין שׁוּרַיָא לְמֵי בְּרֵכְתָּא עַתִּיקְתָּא וְלָא אִסְתַּכַּלְתּוּן בִּדְעָבְדָהּ וְדֵי בְרָאָהּ מִלְקָדְמִין לָא חֲזֵיתוּן: ^is-22-11

**12** וְאַכְלֵי נְבִיָא דַייָ אֱלֹהִי צְבָאוֹת בְּיוֹמָא הַהוּא לְמִבְכֵּי וּלְמִסְפֵּד וּלְגִזוּז רֵישׁ וּלְמֵיסַר סַקִין: ^is-22-12

**13** וְהָא בִּיַע וְחֶדְוָה אָמְרִין נִקְטוֹל תוֹרִין וְנִנְכַס עָאן נֵיכוּל בְּסַר וְנִשְׁתֵּי חֲמַר נֵיכוּל וְנִשְׁתֵּי מִדִנְמוּת לָא נְחֵי: ^is-22-13

**14** אֲמַר נְבִיָא בְאוּדְנִי הֱוֵיתִי שְׁמַע כַּד אִתְגְזַר דָא מִן קֳדָם יְיָ צְבָאוֹת אִם יִשְׁתְּבַק חוֹבָא הָדֵין לְכוֹן עַד דִי תְמוּתוּן מוֹתָא תִנְיָנָא אֲמַר יְיָ אֱלֹהִים צְבָאוֹת: ^is-22-14

**15** כִּדְנֵן אֲמַר יְיָ אֱלֹהִים צְבָאוֹת אֱתָא אֱזֵיל לְוַת פַרְנָסָא הָדֵין לְוַת שֶׁבְנָא דִי מְמַנָא עַל בֵּיתָא: ^is-22-15

**16** וְתֵימַר לֵיהּ מַה לָךְ כָּא מַה לָךְ כְּדֵין אֲרֵי אַתְקְנִית לָךְ כָּא אֲתַר אַתְקִין בְּרוּמָא אַתְרֵהּ שַׁוֵי בְּכֵיפָּא בֵּית מְדוֹרֵהּ: ^is-22-16

**17** הָא יְיָ מְטַלְטְלָךְ טִלְטוּל דְגַבְרָא וְתַחֲפִינָךְ בַּהֲתָא: ^is-22-17

**18** יַעְדֵי מִנָךְ יַת מִצְנֶפְתָּא וְיַקִיפוּנָךְ בַּעֲלֵי דְבַב כְּשׁוּר מַקַף וְיַגְלוּנָךְ לְאַרְעָא פְתַיוּת יְדַיִין תַּמָן תְּמוּת וּלְתַמָן רְתִיכֵי יְקָרָךְ יְתוּבוּן בְּקָלָן עַל דְלָא נְטַרְתָּא יְקָר בֵּית רִבּוֹנָךְ: ^is-22-18

**19** וְאַדְחִינָךְ מִמְקוֹמָךְ וּמִשַׁמוּשָׁךְ יְמַגְרִינָךְ: ^is-22-19

**20** וִיהֵי בְּעִדָנָא הַהִיא וְאַרְבֵּי לְעַבְדֵי לְאֶלְיָקִים בַּר חִלְקִיָהוּ: ^is-22-20

**21** וְאַלְבְּשִׁנֵיהּ כִּתּוּנָךְ וְהֶמְיָנָךְ אֲזַרְזִנֵהּ וְשׁוּלְטָנָךְ אֶתֵּן בִּידֵהּ וִיהֵי לְאַב לְיַתְבֵי יְרוּשְׁלֵם וּלְבֵית יְהוּדָה: ^is-22-21

**22** וְאֶתֵּן מַפְתֵּחַ בֵּית מִקְדְשָׁא וְשׁוּלְטַן בֵּית דָוִד וְיִפְתַּח וְלֵית דְאָחִיד וְיֵיחוֹד וְלֵית דְפָתַח: ^is-22-22

**23** וְאֶמַנִנֵיהּ אַמַרְכֶּל מְהֵימָן מְשַׁמֵשׁ בַּאֲתַר קַיָם וִיהֵי לְכוּרְסֵי יְקָר לְבֵית אֲבוּהִי: ^is-22-23

**24** וְיִסְתַּמְכוּן עֲלוֹהִי כָּל יַקִירֵי בֵית אָבוּהִי בְּנַיָא וּבְנֵי בְנַיָא מֵרַבְרְבַיָא וְעַד דְעַדְקַיָא מִכַּהֲנַיָא לָבְשֵׁי אֵפוֹדָא וְעַד בְּנֵי לֵוִי אֶחֲדֵי נִבְלַיָא: ^is-22-24

**25** בְּעִדָנָא הַהִיא אֲמַר יְיָ צְבָאוֹת יַעְדֵי אַמַרְכֶּל מְהֵימָן דִי מְשַׁמֵשׁ בַּאֲתַר קַיָם וְיִתְקַטֵף וְיִפוֹל וְתִבְטַל מְטַל נְבוּאֲתָא דִי עֲלוֹהִי אֲרֵי בְמֵימְרָא דַייָ גְזַר כֵּן: ^is-22-25

## Capítulo 23

**1** מַטָל כָּס דִלְוָט לְאַשְׁקָאָה יַת צוֹר אֵילִילוּ נָחֲתֵי סְפִינֵי יַמָא אֲרֵי אִתְבְּזִיזוּ מְחוֹזֵיהוֹן מִלְמֵיתֵי מֵאַרְעָא כִסְאֵי אָתֵי עֲלֵיהוֹן: ^is-23-1

**2** אִתְּבַּרוּ יָתְבֵי נִיסָא תַּגְרֵי צִידוֹן דַהֲווֹ עָדָן בְּיַמָא מַלוּךְ: ^is-23-2

**3** דַהֲוַת מְסַפְּקָא סְחוֹרָא לְעַמְמִין סַגִיאִין דְבַחֲצַד כְּנִישַׁת נַהֲרָא עֲלַלְתָּהּ נַהֲרָא סְחוֹרָא לְעַמְמַיָא: ^is-23-3

**4** בְּהִיתוּ צִידוֹנָאֵי אֲרֵי אֲמַר מְעַרְבָאָה דִי יָתֵיב בִּתְקוֹף יַמָא לְמֵימָר לְוַי לָא מַרְעֵית לָא אַעְדֵיתִי וְלָא רַבֵּיתִי עוּלֵמִין פַּנְקֵית בְּתוּלָן: ^is-23-4

**5** כְּמָא דִי שְׁמָעוּ לְמַחֲתָא דִלְקוֹ מִצְרָאֵי זָעוּ כַּד שְׁמַעוּ צוֹרָאֵי: ^is-23-5

**6** גְלוֹ לִמְדִינַת יַמָא אֵילִילוּ יָתְבֵי גִיסָא: ^is-23-6

**7** הֲהָדָא לְכוֹן תַּקִיפְתָּא צוֹר מִיוֹמֵי קֶדֶם מִלְקָדְמִין הֲווֹ מַיְתָן לָהּ תַּקְרוּבְתָּא מֵאֲרַע רְחִיקָא כְדוֹ לְאִתּוֹתָבָא הָא גַלְיָא: ^is-23-7

**8** מַן מְלִיךְ דָא עַל צוֹר דַהֲיַת מְמַלְכָּא מַלְכִין דִי תַגָרָהָא רַבְרְבִין שִׁלְטוֹנָאָה יְקִירֵי אַרְעָא: ^is-23-8

**9** יְיָ צְבָאוֹת מִלְכָהּ לְאַפָסָא יְקָר כָּל חֶדְוָתָא לְאַקָלָא כָּל יַקִירֵי אַרְעָא: ^is-23-9

**10** גְלָא מֵאַרְעִיךְ כְּמֵי נַהֲרָא עֲרוֹקִי לִמְדִינַת יַמָא לֵית תְּקוֹף עוֹד: ^is-23-10

**11** גְבוּרְתֵּהּ מְרַמְמָא עַל יַמָא לַאֲזָעָא מַלְכְּוָתָא יְיָ פַּקֵיד עַל כְּנַעֲנָאָה לְשֵׁיצָאָה תּוּקְפָאָה: ^is-23-11

**12** וַאֲמַר לָא תוֹסְפוּן עוֹד לְמִתְקַף דַהֲוֵיתוּן אָנְסִין לְעַמָא דִי בְצִידוֹן לְכִתִּים קוּמוּ גְלוֹ אַף לְתַמָן לָא יְהֵי לְכוֹן נְיָח: ^is-23-12

**13** הָא אַרְעָא כַּסְדָאֵי דֵין עַמָא כַּד לָא הֲוָה אַתּוּרָאָה שַׁכְלְלָהּ לְנַגְוַן אֲקִימוּ חֶזְוָתָהָא פַּגְרוּ בִרְנְיָתָהָא שַׁוְיוּהָא לִדְמְחַמְרָא: ^is-23-13

**14** אֵילִילוּ נָחֲתֵי סְפִינֵי יַמָא אֲרֵי אִתְבְּזִיזוּ מְחוֹזֵי תוּקְפֵכוֹן: ^is-23-14

**15** וִיהֵי בְּעִדָנָא הַהִיא וְתִתְרְחֵיק צוֹר שַׁבְעִין שְׁנִין כְּיוֹמֵי מַלְכָּא חַד מִסוֹף שַׁבְעִין שְׁנִין יְהֵי לְצוֹר כְּתוּשְׁבְּחַת נַפְקַת בָּרָא: ^is-23-15

**16** אִתְחַלֵיף יְקָרִיךְ אִטַלְטֵל לִמְדִינָא קַרְתָּא דִי הֲוֵת כְנַפְקַת בְּרָא אִתְרַחֲקַת הֲפוּכִי כִנָרַיִךְ לְאֶבְלָא וּזְמָרַיִךְ לְאִלְיָא מָאִים יֵעוּל דָכְרָנֵיךְ: ^is-23-16

**17** וִיהֵי מִסוֹף שַׁבְעִין שְׁנִין יֵעוּל דָכְרָנָהּ דְצוֹר קֳדָם יְיָ וּתְתוּב לְאַתְרָהּ וּתְהֵי מְסַפְּקָא סְחוֹרָא לְכָל מַלְכְּוַת עַמְמַיָא דִי עַל אַפֵּי אַרְעָא: ^is-23-17

**18** וִיהֵי סְחוֹרְתָּהּ וְאַגְרָהּ קוּדְשָׁא קֳדָם יְיָ לָא יִתְאַצֵר וְלָא יִתְגְנַז אֲרֵי לְדִמְשַׁמְשִׁין קֳדָם יְיָ יְהֵי אַגְרָה לְמֵיכַל לְמִסְבַּע וְלִכְסוּ דִיקָר: ^is-23-18

## Capítulo 24

**1** הָא יְיָ מַבֵּיז אַרְעָא וּמְסַר לָהּ לְסָנְאָה וְתַחְפֵּי בַהֲתָא אַפֵּי רַבְרְבָהָא עַל דַעֲבַרוּ עַל אוֹרַיְתָא וִיבַדַר יַת דְיָתְבִין בָּהּ: ^is-24-1

**2** וִיהֵי חִילוֹנָאָה כְּכַהֲנָא עַבְדָא כְּרִיבּוֹנֵהּ אַמְתָא כְּמֶרָתָהּ זָבְנָא כִּמְזַבְּנָא יָזְפָא כְּמוֹזְפָא רָשָׁא כְּמַן דְרָשֵׁי בֵיהּ: ^is-24-2

**3** אִתְבְּזָזָא תִּתְבְּזֵז אַרְעָא וְאִתְדָשָׁא תִּתְדָשׁ אֲרֵי יְיָ מַלֵל יַת פִּתְגָמָא הָדֵין: ^is-24-3

**4** אִתְאַבְּדַת חֲרוֹבַת אַרְעָא צְדִיאַת חֲרוֹבַת תֵּבֵל סְפוּ תְקוֹף עַמָא דְאַרְעָא: ^is-24-4

**5** וְאַרְעָא חָבַת תְּחוֹת יַתְבָהָא אֲרֵי עֲבַרוּ עַל אוֹרַיְתָא אַבְטִילוּ מוֹעֲדַיָא אַשְׁנִיאוּ קְיָמָא דִי מִן עַלְמָא: ^is-24-5

**6** עַל כֵּן מִן קֳדָם מוֹמֵי דִשְׁקַר חֲרוֹבַת אַרְעָא וּצְדִיאוּ דְיָתְבִין בָּהּ עַל כֵּן סָפוּ יָתְבֵי אַרְעָא וְאִשְׁתְּאַר אֱנָשָׁא כִּזְעֵיר: ^is-24-6

**7** אִתְאַבַּלוּ כָל שָׁתֵי חֲמַר אֲרֵי אִתְפְּרִיכוּ גוּפְנַיָא אִתְאֲנַחוּ כָּל חָדֵי לִבָּא: ^is-24-7

**8** בְּטֵלַת חֶדְוַת תּוּפִּין אִתְמְנַעַת אִתְרְגוּשַׁת תַּקִיפִין פִּסְקַת חֶדְוַת כִּנָרָא: ^is-24-8

**9** עַל יְדֵי זְמָר לָא יִשְׁתּוּן חֲמַר יֵימַר עֲתִּיקָא לְשָׁתוֹהִי: ^is-24-9

**10** אִתְּבַרַת קַרְתְּהוֹן צְדִיאַת אֲחִידוּ כָל בָּתַּיָא מִלְמֵעַל: ^is-24-10

**11** מְצַוְחִין עַל חַמְרָא בְּשׁוּקַיָא שְׁלֵימַת כָּל חֶדְוָתָא גְלָא בִּיעַ מִן אַרְעָא: ^is-24-11

**12** אִשְׁתְּאַר בְּקַרְתָּא צְדוֹ וְאִתְרְגוּשְׁתָּא בְפִגוּר תַּרְעִין: ^is-24-12

**13** אֲרֵי כְדֵין יִשְׁתְּאֲרוּן יְחִידָאִין צַדִיקַיָא בְגוֹ אַרְעָא בֵּינֵי מַלְכְּוָתָא כְּבִיעוּר זֵיתָא כְּעוֹלְלָן בָּתַר קָטַף: ^is-24-13

**14** אִנוּן יִרְמוֹן קָלֵיהוֹן יְשַׁבְּחוּן בְּמֵימְרָא דַייָ יִבְעוֹן כְּמָא דִבְעוֹ עַל גְבוּרָן דְאִתְעֲבִידָא לְהוֹן עַל יַמָא: ^is-24-14

**15** עַל כֵּן בְּמֵיתֵי נְהוֹרָא לְצַדִיקַיָא יִקְרוֹן קֳדָם יְיָ בְּנִיסֵי יַמָא יְהוֹן מוֹדָן וּמְבָרְכִין שְׁמָא דַייָ אֱלָהָא דְיִשְׂרָאֵל: ^is-24-15

**16** מִבֵּית מַקְדְשָׁא דְמִתַּמָן עֲתִיד לְמִפַּק חֶדְוָא לְכָל יַתְבֵי אַרְעָא תּוּשְׁבְּחָא שְׁמַעְנָא לְצַדִיקַיָא אָמַר נְבִיָא רָב אֲגַר לְצַדִיקַיָא לְרַשִׁיעַיָא אִתְגְלֵי לִי וַי לַאֲנוּסַיָא דְמִתְאַנְסִין וּלְבִזוּז בָּזְזִין דְהָא מִתְבָּזִין: ^is-24-16

**17** דַחֲלָא וְכוּמְצָא וּמְצָדָא עֲלָךְ יָתֵיב אַרְעָא: ^is-24-17

**18** וִיהֵי דְיֶעֱרוֹק מִן קֳדָם דַחֲלָא יִפּוֹל לְגוֹ כּוּמְצָא וְדִיַסֵק מִגוֹ כּוּמְצָא יִתְאַחַד בִּסְרִיגְתָּא אֲרֵי גְבוּרָן בִּשְׁמַיָא אִתְעֲבִידָא וְזָעוּ יְסוֹדֵי אַרְעָא: ^is-24-18

**19** מַזָע תְּזוּעַ אַרְעָא מֵנָד תָּנוּד אַרְעָא פְּרוֹק תִּתְפְּרַק אַרְעָא: ^is-24-19

**20** אִשְׁתְּדָאָה תִּשְׁתְּדֵי אַרְעָא כְּרַוְיָא וּתְהֵי אַזְלָא וְאַתְיָא כְּעַרְסְלָא וְיִתְקְפוּן עֲלָהּ חוֹבָהָא וְתִפּוֹל וְלָא תוֹסִיף לְמֵקָם: ^is-24-20

**21** וִיהֵי בְּעִדָנָא הַהִיא יַסְעַר יְיָ עַל חַלְוָתָא תוּקְפָא דְיָתְבִין בְּתוּקְפָא וְעַל מַלְכֵי בְּנֵי אֱנָשָׁא דְדָיְרִין עַל אַרְעָא: ^is-24-21

**22** וְיִכְנְשׁוּנוּן מִכְנַשׁ לְבֵית אַסִירֵי וִיעַנְגוּנוּן לְבֵית עַגְנָה וּמַסְגֵי יוֹמִין יֵעוּל דָכְרָנֵיהוֹן: ^is-24-22

**23** וְיִבְהֲתוּן דְפָלְחִין לְסִיהֲרָא וְיִתְכַּנְעוּן דְסָגְדִין לְשִׁמְשָׁא אֲרֵי תִתְגְלֵי גְבוּרְתָּא דַייָ צְבָאוֹת בְּטוּרָא דְצִיוֹן וּבִירוּשְׁלֶם וּקְדָם סָבֵי עַמֵהּ בִּיקָר: ^is-24-23

## Capítulo 25

**1** יְיָ אֱלָהַי אַתְּ אֲרוֹמְמִינָךְ אוֹדֵי שְׁמָךְ אֲרֵי עָבַדְתָּא פְרִישָׁן מִלְכִין דַאֲמַרְתָּא לְאַיְתָאָה מִלְקָדְמִין בְּכֵן אַיְתֵיתָא וְקַיַמְתָּא: ^is-25-1

**2** אֲרֵי שַׁוִיתָא קִרְוֵי פַצְחִין לְגַלִין כְּרַךְ תַּקִיף לְדִמְחַמְרָא בֵּית דַחֲלַת עַמְמַיָא בְּקַרְתָּא יְרוּשְׁלֵם לַעֲלָם לָא יִתְבְּנֵי: ^is-25-2

**3** עַל כֵּן יִקְרוּן קֳדָמָךְ עַם תַּקִיף קִרְיַת עַמְמִין חֲסִינִין יִדַחֲלוּן מִן קֳדָמָךְ: ^is-25-3

**4** אֲרֵי הֲוֵיתָא תְקוֹף לְמִסְכַּן סְעֵיד לַחֲשִׁיךְ בְּעִדַן עָקָא כְּמָא דְמִטַמְרָן מִן קֳדָם זַרְמִית כִּטְלַל מִשְׁרָב כֵּן מִלֵי רַשִׁיעַיָא לְצַדִיקַיָא כְּזַרְמִית בְּשָׁקְפָא בְּכוֹתֵל: ^is-25-4

**5** כִּשְׁרָב בְּאַרְעָא צַחְיָא אִתְרְגוּשַׁת תַּקִיפִין תְּמָאֵיךְ בִּטְלַל כֵּיף מַקַר בְּאַרְעָא מְשַׁלְחַיָא כֵן נְיַח רְוָחָא לְצַדִיקַיָא כַּד יִמְאֲכוּן רַשִׁיעַיָא: ^is-25-5

**6** וְיַעְבֵּד יְיָ צְבָאוֹת לְכָל עַמְמַיָא בְּטוּרָא הָדֵין שֵׁירוּ וְזִמְנָא מְדַמָן דְהִיא דִיקָר וּתְהֵי לְהוֹן לִקְלָן מִחָן חֵילָא מָחָן דְלָא יִשְׁתֵּיזְבוּן מִנְהוֹן מָחָן דִיסוּפוּן בְּהוֹן: ^is-25-6

**7** וְיִסְתְּלַעֲמוּן בְּטוּרָא הָדֵין אַפֵּי רַבָּא דְרַב עַל כָּל עַמְמַיָא וְאַפֵּי מַלְכָּא דְשַׁלִיט עַל כָּל מַלְכְּוָתָא: ^is-25-7

**8** יִתְנְשׁוּן מוֹתָא לְעַלְמִין וְיִמְחֵי יְיָ אֱלֹהִים דִמְעָתָא מֵעַל כָּל אַפַּיָא וַחֲסוּדֵי עַמֵיהּ יַעְדֵי מֵעַל כָּל אַרְעָא אֲרֵי בְּמֵימְרָא דַייָ גְזִיר כֵּן: ^is-25-8

**9** וְיֵימַר בְּעִדָנָא הַהִיא הָא אֱלָהָנָא דֵין דִי סְבַרְנָא לֵיהּ וְיִפְרְקִינָנָא דֵין יְיָ דַהֲוֵינָא מְסַבְּרִין לְמֵימְרֵהּ נְבוֹעַ וְנֶחֱדֵי בְּפוּרְקָנַהּ: ^is-25-9

**10** אֲרֵי תִתְגְלֵי גְבוּרְתָּא דַייָ בְּטוּרָא הָדֵין וְיִתְדָשׁוּן מוֹאֲבָאֵי בְּאַתְרֵיהוֹן כְּמָא דְמִתְּדָשׁ תִּבְנָא בְּטִינָא: ^is-25-10

**11** וְיַפְרֵיס מְחַת גְבוּרְתֵּהּ בֵּינֵיהוֹן כְּמָא דְמַפְרֵיס שַׁיְטָא לְמֵישַׁט וְיַמְאִיךְ יְקָרֵהּ עִם אַשְׁוַת יְדוֹהִי: ^is-25-11

**12** וּכְרַךְ תְּקוֹף כְּרַכֵּי עַמְמַיָא יְמַגֵר יִרְמֵי יִמְטֵי לְאַרְעָא עַד עַפְרָא: ^is-25-12

## Capítulo 26

**1** בְּעִדָנָא הַהִיא יְשַׁבְּחוּן תוּשְׁבַּחְתָּא חַדְתָּא בְּאַרְעָא דְבֵית יְהוּדָה קִרְיַת תּוּקְפָא לָנָא פוּרְקָן יִתְשָׂם עַל שׁוּרָהָא וְרַחֲמִין: ^is-26-1

**2** פְּתַחוּ תַּרְעַיָא וְיֵעוּל עַמָא זַכָּאָה דִי נְטָרוּ אוֹרַיְתָא בְּלֵבָב שָׁלֵם: ^is-26-2

**3** בְּלֵבָב שָׁלֵם נְטָרוּ שְׁלָמָא שְׁלָמָא יִתְעֲבֵיד לְהוֹן אֲרֵי בְמֵימְרָךְ אִתְרְחִיצוּ: ^is-26-3

**4** אִתְרְחִיצוּ עַל מֵימְרָא דַייָ לְעָלַם וּלְעָלְמֵי עָלְמַיָא בְּכֵן תִּתְפַרְקוּן בְּמֵימַר דְחִילָא דַייָ תַּקִיף עָלְמַיָא: ^is-26-4

**5** אֲרֵי אַמְאִיךְ יַתְבֵי רוּמָא קִרְיָא תַקִיפָא יַמְאֲכִינָא וְיַרְמִינָהּ עַד אַרְעָא יִמְטִינָהּ עַד עַפְרָא: ^is-26-5

**6** יְדוּשׁוּנָה רִגְלִין רִגְלֵי צַדִיקַיָא פַּרְסַת עִנְוְתָנַיָא חֲשִׁיכֵי עַמָא: ^is-26-6

**7** אוֹרְחַת צַדִיקַיָא כַּוָנָן אַף עֲבַדוּ אוֹרְחַת צַדִיקַיָא תְּתַקֵן: ^is-26-7

**8** אַף לְאוֹרַח דִינָךְ יְיָ סְבַרְנָא לִשְׁמָךְ וּלְדָכְרָנָךְ חֲמֵדַת נַפְשָׁנָא: ^is-26-8

**9** נַפְשִׁי מַחְמְדָא לְצַלָאָה קֳדָמָךְ בְּלֵילְיָא אַף רוּחִי בִמְעַי מְבָרְכָא לָךְ אֲרֵי כְּמָא דְדִינָךְ תַּקִין לְאַרְעָא קוּשְׁטָא יִתְאַלְפוּן לְמֶעְבַד דְדָיְרִין בְּתֵבֵל: ^is-26-9

**10** יְהַבְתָּא לְהוֹן אַרְכָּא לְרַשִׁיעַיָא אִם יְתוּבוּן לְאוֹרַיְתָךְ וְלָא תָבוּ כָּל יוֹמִין דַהֲווֹ קַיָמִין יַעְבְּדוּן קְשׁוֹט עַל אַרְעָא חֲווֹ שַׁקָרִין אַף אִינוּן לָא יֶחֱזוּן בְּתוּשְׁבְּחַת יְקָרָךְ יְיָ: ^is-26-10

**11** יְיָ כַּד תִּתְגְלֵי בִּגְבוּרְתָּךְ לְאוֹטָבָא לִדְחַלְתָּךְ לָא יִנְהַר לְסָנְאֵי עַמְךְ יֶחֱזוּן רַשִׁיעַיָא וְיִבְהֲתוּן פּוּרְעֲנוּת עַמָא תַחְפִּינוּן אַף אֶשְׁתָּא לְבַעֲלֵי דְבָבָךְ תְּשֵׁיצֵי: ^is-26-11

**12** יְיָ תְּתַקֵין שְׁלָמָא לָנָא אֲרֵי בְּכָל עִדָן חֲסֵיכְנָא מֵחוֹבָנָא אַתְּ עֲבֵיד עִמָנָא: ^is-26-12

**13** יְיָ אֱלָהָנָא שַׁלִיטוּ בָנָא עַמְמַיָא לְמֶהֱוֵי עֲלָנָא רִבּוֹנִין בַּר מִנָךְ בְּרַם בְּמֵימְרָךְ אֲנַחְנָא רְחִיצִין בִּשְׁמָךְ אֲנַחְנָא מוֹדָן: ^is-26-13

**14** אִינוּן פַּלְחִין לְמֵתִין דְלָא יֵחוּן לִגְבָּרֵהוֹן דְלָא יְקוּמוּן בְּכֵן כַּד תַּסְעַר עֲלֵיהוֹן חוֹבֵיהוֹן וּתְשֵׁיצִינוּן וְתוֹבִיד כָּל דָכְרָנְהוֹן: ^is-26-14

**15** אִתְגְלֵיתָא לְכַנָשָׁא מְבַדְרֵי עַמָךְ יְיָ אַף עָתִיד אַתְּ לְקָרָבָא גָלוּתְהוֹן לְאִתְגְלָאָה בִגְבוּרְתֵּךְ לְרַחָקָא כָּל רַשִׁיעַיָא לִגְהִנָם: ^is-26-15

**16** יְיָ בְּעָקָא הֲווֹ דְכִירִין לִדְחַלְתָּךְ בְּעָקַתְהוֹן הֲווֹ מַלְפִין אוּלְפַן אוֹרַיְתָךְ בַּחֲשָׁי: ^is-26-16

**17** כִּמְעַדְיָא דִמְטָא דִבְעִדָן מֵילְדָה זָיְעָא וּמְצַוְחָא בְּחֶבְלָהָא כֵּן הֲוֵינָא מִן קֳדָם דְחַבְנָא קֳדָמָךְ יְיָ: ^is-26-17

**18** אֲחַדְתָּנָא עָקָא כִּמְעַדְיָא דִמְטָת עִדָן מֵילְדָהּ קַלִיל כְּרוּחָא פּוּרְקַן לָא אַיְתִיאוּ אַרְעָא לָא עֲבַדוּ אַף פְּרִישָׁן לָא יָכְלִין לְמֶעְבַּד דְדָיְרִין בְּתֵבֵל: ^is-26-18

**19** אַתְּ הוּא מְחַיֵי מֵיתִין גַרְמֵי נְבֶלְתְּהוֹן אַתְּ מֵקִים יֵחוּן וִישַׁבְּחוּן קֳדָמָךְ כָּל דַהֲווֹ רְמָן בְּעַפְרָא אֲרֵי טַל נְהוֹר טַלָךְ לְעָבְדֵי אוֹרַיְתָךְ וְרַשִׁיעַיָא דִי יְהַבְתָּא לְהוֹן גְבוּרָא וְאִינוּן עֲבַרוּ עַל מֵימְרָךְ לִגְהִנָם תִּמְסַר: ^is-26-19

**20** אֱזֵיל עַמִי עֲבֵיד לָךְ עוֹבָדִין טָבִין דְיִגְנוּן עֲלָךְ בְּעִדַן עָקָא אִטַמַר כִּזְעֵיר זְמַן עַד דְיֶעְדֵי לְוָט: ^is-26-20

**21** אֲרֵי הָא יְיָ מִתְגְלֵי מֵאֲתַר שְׁכִנְתֵּהּ לְאַסְעָרָא חוֹב יָתֵיב אַרְעָא עֲלוֹהִי וּתְגַלֵי אַרְעָא עַל דַם זַכַּאי דְאִתְשֵׁיד בָּהּ וְלָא תְכַסֵי עוֹד עַל קְטִילָהָא: ^is-26-21

## Capítulo 27

**1** בְּעִדָנָא הַהִיא יַסְעַר יְיָ בְּחַרְבֵּהּ רַבְּתָא תַקִפְתָּא וַחֲסַנְתָּא עַל מַלְכָּא דְאִתְרַבְרַב כְּפַרְעֹה מַלְכָּא קַדְמָאָה וְעַל מַלְכָּא דְאִתְגָאֵי כְּסַנְחֶרִיב מַלְכָּא תִנְיָנָא וְיִקְטוֹל יַת מַלְכָּא דְתַקִיף כְּתַנִינָא דִי בְיַמָא: ^is-27-1

**2** בְּעִדָנָא הַהִיא כְּנִשְׁתָּא דְיִשְׂרָאֵל דְהִיא כְּכֶרֶם נְצִיב בְאַרְעָא טָבָא שַׁבַּחוּ לָהּ: ^is-27-2

**3** אֲנָא יְיָ נְטַר לְהוֹן קְיָם אֲבָהָתְהוֹן וְלָא אֱשֵׁיצִינוּן אֶלָא בִזְמַן דְאִינוּן מַרְגְזִין קֳדָמַי אֲנָא מַשְׁקֵי לְהוֹן כָּס פּוּרְעֲנוּתְהוֹן אִלוּלֵי חוֹבֵיהוֹן גָרְמִין לְאִתְפְּרַע מִנְהוֹן כְּבַר לֵילֵי וֵימָם מֵימְרִי מֵגִין עֲלֵיהוֹן: ^is-27-3

**4** הָא גְבוּרָן סַגִי קֳדָמַי הֲלָא אִם יְשַׁווּן בֵּית יִשְׂרָאֵל אֲפֵּיהוֹן לְמֶעְבַּד אוֹרַיְתָא אֶשְׁלַח רוּגְזִי וַחֲמָתִי בְּעַמְמַיָא דְמִתְגְרוּן בְּהוֹן וָאֱשֵׁיצִינוּן כְּמָא דִמְשֵׁיצֵי אֶשְׁתָּא הוֹבַאִי וּבוּר כַּחֲדָא: ^is-27-4

**5** אִם יִתְקְפוּן בְּפִתְגָמֵי אוֹרַיְתִי אִתְעֲבֵיד שְׁלָמָא לְהוֹן מִכְּעַן שְׁלָמָא יִתְעֲבֵיד לְהוֹן: ^is-27-5

**6** יִתְכַּנְשׁוּן מִבֵּינֵי גַלְוַתְהוֹן וִיתוּבוּן לְאַרְעֲהוֹן תַּמָן יִתְיְלִידוּן דְבֵית יַעֲקֹב יִפְשׁוּן וְיִסְגוּן דְבֵית יִשְׂרָאֵל וְיִמְלוּן אַפֵי תֵבֵל בְּנֵי בְנִין: ^is-27-6

**7** הַכְּמַחְתָּא דַהֲוָה מָחֵי מָחוֹהִי אִם כִּקְטוֹל קְטִילוֹהִי יִתְקְטֵיל: ^is-27-7

**8** בְּסָאתָא דַהֲוֵיתָא כְאֵיל בָּהּ יְכִילוּן לָךְ דַהֲוֵיתָא שָׁלַח וּמֵעִיק לְהוֹן הֲגֵי עֲלֵיהוֹן בְמִלָא מַתְקֵיף עֲלֵיהוֹן בְּיוֹם לְוָט: ^is-27-8

**9** בְּכֵן בְּדָא יִשְׁתְּבֵיקוּן חוֹבַי בֵּית יַעֲקֹב וְדֵין כָּל עוֹבָדֵי אַסְטִיוּת חוֹבוֹהִי בְּשַׁוְיוּתֵהּ כָּל אַבְנֵי אֱגוֹרָא כְּאַבְנָא גִיר מְנַפְצָן לָא יִתְקַיְמוּן אֲשֵׁרַיָא וְחַנִסְנְסַיָא: ^is-27-9

**10** אֲרֵי קַרְתָּא דַהֲוָת כְּרִיכָא בִּלְחוֹדָא תִּתַב תְּהֵא מְטַלְטְלָא וּשְׁבִיקָא כְּמַדְבְּרָא בָּהּ יְגִיחוּן צַדִיקַיָא וְיִבְזוּן יַת נִכְסָהָא וִיסוּפוּן מַשִׁרְיָתָהָא מִלְמִפָּק: ^is-27-10

**11** יִתְקַצַר חֵילֵיהוֹן וְיִבְהֲתוּן בְּעוֹבְדֵיהוֹן יִתַּבְּרוּן נְשַׁיָא עָלָן לְבֵית דְחַלְתְּהוֹן וּמַלְפָן יַתְהוֹן אֲרֵי לָא עַם סוּכְלְתָן אִינוּן עַל כֵּן לָא יְרַחֵם עֲלֵיהוֹן דְעַבְדִינוּן וּדְבָרָנוּן לָא יָחוּס עֲלֵיהוֹן: ^is-27-11

**12** וִיהֵי בְּעִדָנָא הַהִיא יִתְרְמוּן קְטִילִין קֳדָם יְיָ מִכֵּיף נַהֲרָא פְּרָת עַד נַחֲלָא דְמִצְרָיִם וְאַתּוּן תִּתְקָרְבוּן חַד לִסְטַר חַד בְּנֵי יִשְׂרָאֵל: ^is-27-12

**13** וִיהֵי בְּעִדָנָא הַהִיא יִתְקַע בְּשׁוֹפָרָא רַבָּא וְיֵיתוּן דִי גְלוֹ לְאַרְעָא דְאַתּוּר וּדְאִטַלְטָלוּ לְאַרְעָא דְמִצְרַיִם וְיִסְגְדוּן קֳדָם יְיָ בְּטוּרָא דְקוּדְשָׁא בִּירוּשְׁלֵם: ^is-27-13

## Capítulo 28

**1** וַי דִי יָהֵיב כִּתְרָא לְגֵיוְתָנָא טִפְשָׁא רַבָּא דְיִשְׂרָאֵל וְיָהֵב מִצְנַפְתָּא לְרַשִׁיעַיָא דְבֵית מַקְדְשָׁא תּוּשְׁבַּחְתֵּהּ דִי עַל רֵישׁ חֵילָא שְׁמֵינָא כְּתִישֵׁי חֲמָר: ^is-28-1

**2** הָא מָחָן תַּקִיפָן וַחֲסִינָן אַתְיָן מִן קֳדָם יְיָ כְּזַרְמִית בָּרָד כְּעַלְעוּל רוּחַ כְּזַרְמִית מַיָין תַּקִיפִין שָׁטְפִין כֵּן יֵתוּן עֲלֵיהוֹן עַמְמַיָא וְיִגְלוּנוּן מֵאַרְעֲהוֹן לְאַרְעָא אוֹחֲרִי בְּחוֹבַיָא דִי בִידֵהוֹן: ^is-28-2

**3** בְּרִגְלִין יִתְּדָשׁ כִּתְרָא דְגֵיוְתָנָא טִפְּשָׁא רַבָּא דְיִשְׂרָאֵל: ^is-28-3

**4** וִיהֵי דְיָהִיב מִצְנַפְתָּא לְרַשִׁיעַיָא דְבֵית מַקְדְשָׁא תּוּשְׁבַּחְתֵּהּ דִי עַל רֵישׁ חֵילָא שְׁמֵינָא כְּבִכּוּרָא עַד לָא קַיְטָא דְאִם יֶחֱזֵי דְחָזֵי יָתָהּ כְּאִלוּ הִיא בִּידֵהּ יְבַלְעִינָהּ: ^is-28-4

**5** בְּעִדָנָא הַהִיא יְהֵי מְשִׁיחָא דַייָ צְבָאוֹת לִכְלִילָא דְחֶדְוָא וּלְכֶתֶר דְתוּשְׁבָּחָא לִשְׁאָרָא דְעַמֵהּ: ^is-28-5

**6** לְמֵימָר קְשׁוֹט דְדִין לִדְיָתְבִין בְּבֵית דִינָא לְמִדָן דִין דִקְשׁוֹט וּלְמִתַּן נִצְחָנָא לִדְנָפְקִין בִּקְרָבָא לַאֲתָבוּתְהוֹן בִּשְׁלָם לְבָתֵּיהוֹן: ^is-28-6

**7** וְאַף אִלֵין בְּחַמְרָא רְווֹ וּבְעַתִּיקָא אִסְתַּלְעֲמוּ כַהֲנָא וְסָפַּר רְווֹ מִן עַתִּיק אִסְתַּלְעֲמוּ מִן חֲמַר טְעוֹ מִן עַתִּיק אִתְפְּנִיאוּ בָּתַר מֵיכַל בְּסִיס טְעוֹ דַיָנְהָא: ^is-28-7

**8** אֲרֵי כָל פָּתוֹרֵיהוֹן מְלָן מֵיכַל מִגְעַל וּמְשַׁקֵץ לֵית לְהוֹן אֲתַר דִי נָקִי מִן אוֹנָס: ^is-28-8

**9** לְמַן אִתְיְהִיבַת אוֹרַיְתָא וּמַן אִתְפְּקַד לְמִסְבַּר חוּכְמָא הֲלָא לְבֵית יִשְׂרָאֵל דִרְחִימִין מִכָּל עַמְמַיָא וַחֲבִיבִין מִכָּל מַלְכְּוָתָא: ^is-28-9

**10** אֲרֵי אִתְפַּקַדוּ לְמֶעְבַּד אוֹרַיְתָא וּמָא דְאִתְפַּקַדוּ לָא צְבִיאוּ לְמֶעְבַּד וְאִתְנַבִּיאוּ עֲלֵיהוֹן נְבִיַיָא דְאִם יְתוּבוּן יִשְׁתְּבֵק לְהוֹן וּלְמִלֵי נְבִיַיָא לָא קַבִּילוּ הַלִיכוּ בַּרַעֲוַת נַפְשְׁהוֹן וְלָא חֲמִידוּ לְמֶעְבַּד אוֹרַיְתִי סְבָרוּ דְיִתְקַיֵים לְהוֹן פּוּלְחַן טַעֲוָתָא וְלָא סְבָרוּ לְפוּלְחַן בֵּית מַקְדְשִׁי כִּזְעֵר הֲוָה בְּעֵינֵיהוֹן בֵּית מַקְדָשִׁי לְמִפְלַח תַּמָן כִּזְעֵיר בְּעֵינֵיהוֹן שְׁכִנְתִּי תַּמָן: ^is-28-10

**11** אֲרֵי בְּשִׁנוּי מַמְלֵל וּבְלִישָׁן תּוֹלְעֲבָא הֲווֹ מַלְעִגִין לְקָבֵיל נְבִיַיָא דְמִתְנַבָּן לְהוֹן עַמָא הָדֵין: ^is-28-11

**12** דְאָמְרִין לְהוֹן נְבִיַיָא דֵין בֵּית מַקְדְשָׁא פְּלָחוּ בֵיהּ וְדָא אַחְסָנַת בֵּית נְיָחָא וְלָא אָבוּ לְקַבָּלָא אוּלְפַן: ^is-28-12

**13** דֵין יְהֵי כָס פּוּרְעֲנוּתְהוֹן עַל דַעֲבָרוּ עַל פִּתְגָמָא דַייָ וְעַל דְאִתְפַּקָדוּ לְמֶעְבַּד אוֹרַיְתָא וּמָא דְאִתְפַּקַדוּ לָא צְבִיאוּ לְמֶעְבַּד בְּכֵן יִתְמַסְרוּן לְעַמְמַיָא דְלָא יְדָעוּ אוֹרַיְתָא עַל דְהַלִיכוּ בִרְעוּת נַפְשְׁהוֹן וְלָא חֲמִידוּ לְמֶעְבַּד רְעוּתִי בְּכֵן יְסַבְּרוּן לְסָעִיד בְּעִדָן דְאַיְתִי עֲלֵיהוֹן עָקָא וְלָא יְהֵי לְהוֹן סָעִיד וְסָמִיךְ עַל דַהֲוָה זְעֵיר בְּעֵינֵיהוֹן בֵּית מַקְדָשִׁי לְמִפְלָח תַּמָן בְכֵן יִשְׁתָּאֲרוּן כִּזְעֵיר בֵּינֵי עַמְמַיָא דְיִגְלוֹן לְתַמָן בְּדִיל דִיהָכוּן וְיִתְקְלוּן לַאֲחוֹרָא וְיִתַּבְּרוּן וְיִתַּצְדוּן וְיִתְאַחֲדוּן: ^is-28-13

**14** בְּכֵן קַבִּילוּ פִּתְגָמָא דַייָ גַבְרִין רַשִׁיעִין שִׁלְטוֹנֵי עַמָא הָדֵין דִי בִירוּשְׁלֵם: ^is-28-14

**15** אֲרֵי אֲמַרְתּוּן גְזַרְנָא קְיָם עִם קְטוֹלָא וְעִם מַחְבְּלָא עֲבַדְנָא שְׁלָמָא מְחַת סַנְאָה אֲרֵי תֵיתֵי עֲלֵיכוֹן כְּנַחַל מַגְבַּר דְאַתּוּן אָמְרִין לָא תֵיתֵי עֲלָנָא אֲרֵי שַׁוֵינָא בִּכְדִיב רָחֲצָנָנָא וּבְגִין שִׁקְרִין אִטַמַרְנָא: ^is-28-15

**16** בְּכֵן כִּדְנַן אֲמַר יְיָ אֱלֹהִים הָא אֲנָא מְמַנֵי בְצִיוֹן מֶלֶךְ מֶלֶךְ תַּקִיף גִיבַּר וְאֵימְתָן אַתְקְפִינֵהּ וְאַחְסְנִינֵהּ אֲמַר נְבִיָא וְצַדִיקַיָא דְהֵימָנוּ בְאִלֵין בְּמֵיתֵי עָקָא לָא יִזְדַעְזְעוּן: ^is-28-16

**17** וֶאֱשַׁוֵי דִנָא תַקִין דְאִטַמַרְתּוּן כְּחוּט בִּנְיָנָא וּזְכוּתָא כְּאֶבֶן מַשְׁקוּלְתָּא וְיִדְלַק רוּגְזִי בְּרוֹחֲצָן כִּדְבֵיכוֹן וְעַל דְאִטַמַרְתּוּן מִן קֳדָם מְעִיקָא יַתְכוֹן עַמְמַיָא יִגְלוֹן: ^is-28-17

**18** וִיבַטֵל קִיָמְכוֹן דְעִם קָטוֹלָא וּשְׁלָמְכוֹן דְעִם מְחַבְּלָא לָא יִתְקַיָם מְחַת סָנְאָה אֲרֵי תֵיתֵי עֲלֵיכוֹן כְּנַחַל מַגְבַּר וּתְחוֹן לְהוֹן לְדָיִשׁ: ^is-28-18

**19** בִּזְמַן מֶעֱדוֹהִי יְגַלֵי יַתְכוֹן אֲרֵי בִּצְפָר בִּצְפָר יֶעֱדִי בִּימָם וּבְלֵילִי וִיהֵי עַד לָא יִמְטֵי זְמַן לְוָטָא תִּסְתַּכְּלוּן בְּמִלֵי נְבִיַיָא: ^is-28-19

**20** אֲרֵי יִתְקַצַר חֵילֵיהוֹן מִשִׁעְבּוּד תַּקִיף וְשִׁלְטוֹן בַּבְלָאֵי מְעִיק יִסְגֵי מֵרְוָא: ^is-28-20

**21** אֲרֵי כְּמָא דְזָעוּ טוּרַיָא כַּד אִיתְגְלֵי יְקָרָא דַייָ בְּיוֹמֵי עוּזִיָה מַלְכָּא וּכְנִיסִין דַעֲבַד לִיהוֹשֻׁעַ בְּמֵישַׁר גִבְעוֹן לְאִתְפְּרַע מֵרַשִׁיעַיָא דַעֲבַרוּ עַל מֵימְרֵהּ כֵּן יִתְגְלֵי לְאִתְפְּרָעָא מִדְעָבְדִין עוֹבָדִין נוּכְרָאִין עוֹבָדֵיהוֹן וּמִדְפָלְחִין פּוּלְחַן טַעֲוָתָא פּוּלְחַנְהוֹן: ^is-28-21

**22** וּכְעַן לָא תִתְרַשְׁעוּן דִלְמָא יִתְקְפוּן יְסוּרֵיכוֹן אֲרֵי גְמִירָא וְשֵׁיצָאָה שְׁמָעִית מִן קֳדָם יְיָ אֱלֹהִים צְבָאוֹת עַל כָּל יָתְבֵי אַרְעָא: ^is-28-22

**23** אֲמַר נְבִיָא אֲצִיתוּ וּשְׁמַעוּ קָלִי אִתְפְּנוּ וְקַבִּילוּ לְמֵימְרִי: ^is-28-23

**24** בְּכָל עִדָן מִתְנַבָּן נְבִיַיָא לַאֲלָפָא מָאִים יִתְפַּתְּחָן אוּדְנֵי חַיָבַיָא וִיקַבְּלוּן אוּלְפַן: ^is-28-24

**25** הֲלָא אִם יְשַׁווּן בֵּית יִשְׂרָאֵל אַפֵיהוֹן לְמֶעְבַּד אוֹרַיְתָא וִיתוּב וְיַכְנֵישׁ יַתְהוֹן מִבֵּינֵי עַמְמַיָא דְאִינוּן מְבַדְרִין בֵּינֵיהוֹן הָא כְקִצְחָא וְכִכְמוֹנָא דְמִזְדְרִיק וְיַקְרֵיב יַתְהוֹן זַרְעֲיָן לְשִׁבְטֵיהוֹן הָא כְּזָרְעֵי חִטִין עַל בַּיִיר וּסְעוֹרִין עַל סוּמָנִין וְכוֹנְתִין עַל תְּחוּמִין: ^is-28-25

**26** הָא כָּל אִלֵין אוּלְפַן דְדִין דְיֵדְעוּן דִי אֱלָהָא מְחַוֵי לְהוֹן אוֹרְחָא דְתַקְנָא דִיהֲכוּן בָּהּ: ^is-28-26

**27** אֲרֵי לָא בְמוֹרִיגֵי בַּרְזְלָא מַדְרְכִין קִצְחָא וְגַלְגַלֵי עֶגְלָא עַל כַּמוֹנָא מְחַזְרִין אֲרֵי בְחוּטְרָא חָבְטִין קִצְחָא וְכַמוֹנָא בְמַחֲבוֹטָא: ^is-28-27

**28** יַת עִבּוּרָא מַדְרְכִין אַף יָתֵהּ אֲרֵי לָא לְעַלְמָא אַדְרָכָא יַדְרְכוּנֵהּ וּמְבַלְבֵל בְּגִלְגְלֵי עֶגְלָתֵהּ וּמַפְרֵישׁ יַת עִבּוּרָא וּמַפְרַח יַת דוּקָא: ^is-28-28

**29** אַף דָא מִן קֳדָם יְיָ צְבָאוֹת נַפְקָא דְאַתְקִין עַלְמָא בְּמַחְשָׁבַת דַעְתֵּהּ רַבְּתָא אַסְגֵי עוֹבָדֵי בְּרֵאשִׁית בְּסַגִי חוּכְמְתֵהּ: ^is-28-29

## Capítulo 29

**1** וַי מַדְבְּחָא מַדְבְּחָא דִבְנֵי בְקַרְתָּא דִי שְׁרָא בָהּ דָוִד מִן קֳדָם כְּנִישַׁת מַשִׁרְיָן דְמִתְכַּנְשִׁין עֲלָהּ שְׁנָא בִשְׁנָא בִּדְחַגִין יִבְטְלוּן: ^is-29-1

**2** וְעָאִיק לְקַרְתָּא דְמַדְבְּחָא בָהּ וּתְהֵי צַדְיָא וְרֵקַנְיָא וּתְהֵי מַקְפָא קֳדָמַי דַם קְטִילִין כְּאַקָפוּת מַדְבְּחָא דַם נִכְסַת קוּדְשַׁיָא בְּיוֹמָא דְחַגָא סְחוֹר סְחוֹר: ^is-29-2

**3** וְאַשְׁרֵי עֲלָיִךְ מַשִׁרְיָן וְאַבְנֵי עֲלָיִךְ כַּרְקוֹם וְאֶצְבּוֹר עֲלָיִךְ מְלֵיתָא: ^is-29-3

**4** וְתִמְאֲכִין מֵאַרְעָא תְמַלְלִין וּמֵעַפְרָא יִנְצְפָן מִלַיִךְ וִיהֵי כְּאוֹב מֵאַרְעָא קָלַיִךְ וּמֵעַפְרָא מִלַיִךְ יִנְצְפָן: ^is-29-4

**5** וִיהֵי כְּאָבָק דָקִיק הֲמוֹן מְבַדְרָיִךְ וּכְמוֹץ דְעָדִי אִתְרְגוּשָׁא תַּקִיפִין וִיהֵי בִּתְכֵּיף אִתְרְגוּשָׁא: ^is-29-5

**6** מִן קֳדָם יְיָ צְבָאוֹת תִּתְפַּקֵיד בְּרַעַם וּבְזִיעַ וְקַל סַגִי בְּעַלְעוֹל וּבְרוּחַ וְשַׁלְהוֹבֵי אֶשָׁא דִמְשֵׁיצַיָא: ^is-29-6

**7** וִיהֵי כְמֶחְלֵם הִרְהוּר לֵילֵי הֲמוֹן כָּל עַמְמַיָא דְמִתְכַּנְשִׁין עַל קַרְתָּא דְמַדְבְּחָא בָהּ וכָל מַשִׁרְיָתְהוֹן וְחֵילֵיהוֹן וְדִמְעִיקִין לְהוֹן: ^is-29-7

**8** וִיהֵי כְּמָא דִי יַחֲלוֹם כַּפְנָא וְהָא אָכֵיל וּמִתְעַר וַחֲסֵירָא נַפְשֵׁיהּ וּכְמָא דְיַחֲלוֹם צָחְיָא וְהָא שְׁתֵי וּמִתְעָר וְהָא מְשַׁלְחֵי וְנַפְשֵׁהּ מְשַׁלְהַיָא כֵּן יְהֵי הֲמוֹן כָּל עַמְמַיָא דְמִתְכַּנְשִׁין עַל טוּרָא דְצִיוֹן: ^is-29-8

**9** אִתְרְפוּ וּשְׁחוֹ אִשְׁתְּגִישׁוּ אִיזְדַמִימוּ וְאִשְׁתְּמָמוּ רְווֹ וְלָא מִן חֲמַר טְעוֹ וְלָא מִן עַתִּיק: ^is-29-9

**10** אֲרֵי רְמָא בֵינֵיכוֹן יְיָ רוּחַ דְטָעוּ וְאַטְמַר מִנְכוֹן יַת נְבִיַיָא וְיַת סַפְרַיָא וְיַת מַלְפַיָא דַהֲווֹ מַלְפִין לְכוֹן אוּלְפַן אוֹרַיְתָא טַמָר: ^is-29-10

**11** וַהֲוַת לְכוֹן נְבוּאַת כּוֹלָא כְּפִתְגָמֵי סִפְרָא דַחֲתִים דְאִם יִתְּנוּן יָתֵהּ לִדְיָדַע סִפְרָא לְמֵימַר קְרֵי כְעַן דֵין וְיֵימַר לֵית אֲנָא יָכִיל אֲרֵי חֲתִים הוּא: ^is-29-11

**12** וְיִתְיְהַב סַפְרָא לִדְלָא יָדַע סִפְרָא לְמֵימַר קְרֵי כְעַן דֵין וְיֵימַר לֵית אֲנָא יָדַע סִפְרָא: ^is-29-12

**13** וַאֲמַר יְיָ חֲלַף דְאִתְרַבְרַב עַמָא הָדֵין בְּפוּמְהוֹן וּבְסִפְוָתְהוֹן מְיַקְרִין קֳדָמַי וְלִבְּהוֹן אִתְרַחֵק מִדַחַלְתִּי וַהֲוַת דְחַלְתְהוֹן קֳדָמַי כְּתַפְקִידַת גַבְרִין מַלְפִין: ^is-29-13

**14** בְּכֵן הָא אֲנָא מוֹסִיף לְמִמְחֵי יַת עַמָא הָדֵין מָחָן מַפְרְשָׁן וְתֵיבַד חוּכְמְתָא מֵחַכִּימֵיהוֹן וְסֻכְלְתָנֻתָא מִסֻכָלְתָנֵיהֹן תִּטַמָר: ^is-29-14

**15** וַי דִמְדַמָן לְאִטַמָרָא עֵצָא מִן קֳדָם יְיָ וַהֲווֹ כִדְבְקִבְלָא עוֹבָדֵיהוֹן וְאָמְרִין לֵית דְחָזֵי לָנָא וְלֵית דְיָדַע בְּעוֹבָדָנָא: ^is-29-15

**16** הַלְמֶהְפַּךְ עוֹבָדֵיכוֹן אַתּוּן בָּעָן הָא כְמָא דְטִינָא בְּיַד פָּחֲרָא כֵּן אַתּוּן חֲשִׁיבִין קֳדָמַי הַאֶפְשַׁר דְיֵימַר טִינָא לְעָבְדֵיהּ לָא עֲבַדְתָּנִי וּבִרְיְתָא דְתֵימַר לְבָרָהָא לָא חַכֵּימְתָּא לִי: ^is-29-16

**17** הֲלָא עוֹד צִיבְחַר כִּזְעֵיר וִיתוּב לִבְנָן לְמֶהֱוֵי כְּכַרְמְלָא וְכַרְמְלָא קִרְוִין סַגִיאִין יְתִיב: ^is-29-17

**18** וְיִשְׁמְעוּן בְּעִדָנָא הַהִיא דִכְחַרְשִׁין מִלֵי סְפַר וּמִקְבֵיל וּמַחֲשׁוֹךְ עֵינֵי סָמָן יֶחְזְיָן: ^is-29-18

**19** וְיוֹסְפוּן מְקַבְּלֵי עוּלְבָן בְּמֵימְרָא דַייָ חֶדְוָא וַחֲשִׁיכֵי בְּנֵי אֱנָשָׁא בְּמֵימַר קַדִישָׁא דְיִשְׂרָאֵל יִבְעוּן: ^is-29-19

**20** אֲרֵי סָף מְעִיקָא וְאִשְׁתֵּיצֵי בָזְזָא וְסָפוּ כָּל דַהֲווֹ מְשַׁחֲרִין לְמֵינָס: ^is-29-20

**21** מְחַיְבִין בְּנֵי אֱנָשָׁא בְּמִלֵיהוֹן וְלִדְמוֹכַח לְהוֹן בֵּית דִינָא בְתַרְעָא פִתְגָמֵי אוֹרַיְתָא בָּעָן לֵיהּ תַּקָלָא וְאַסְטִיאוּ בִשְׁקַר דִין זַכָּאִין: ^is-29-21

**22** בְּכֵן כִּדְנַן אֲמַר יְיָ עַל בֵּית יַעֲקֹב דִפְרִיק יַת אַבְרָהָם לָא מִכְּעַן יִבַּהֲתוּן דְבֵית יַעֲקֹב וְלָא מִכְּעַן אֲפֵּיהוֹן יִשְׁתַּנוֹן: ^is-29-22

**23** אֲרֵי בְּמַחֲזוֹהִי גְבוּרָן דְאַעְבֵיד לִבְנוֹהִי טַבְוָת אַבְרָהָם לְזַרְעֵיהּ בַּתְרוֹהִי עַל אַרְעֲהוֹן בֵּינֵיהוֹן יְקַדְשׁוּן שְׁמִי וְיֵימְרוּן קַדִישׁ עַל קַדִישָׁא דְיַעֲקֹב וְעַל אֱלָהָא דְיִשְׂרָאֵל יֵימְרוּן תַּקִיף: ^is-29-23

**24** וְיֵדְעוּן דְלָא אֲלִיפוּ רוּחַ דְסוּכְלְתָנוּ וְדַהֲווֹ אָמְרִין לֵית כָּל אִלֵין יְקַבְּלוּן אוּלְפַן: ^is-29-24

## Capítulo 30

**1** וַי בְּנַיָא מְרוֹדַיָא אֲמַר יְיָ לְמֶעְבַּד עֵצָה וְלָא מִמֵימְרִי וּלְאִתְמַלָכָא מְלַךְ וְלָא שָׁאֲלִין בִּנְבִיֵי בְּדִיל לְאוֹסָפָא חוֹבִין עַל חוֹבֵי נַפְשְׁהוֹן: ^is-30-1

**2** דְאָזְלִין לְמֵיחַת לְמִצְרַיִם וּבְפִתְגָמֵי נְבִיֵי לָא שְׁאִילוּ לְאִתַּקָפָא בִּתְּקוֹף פַּרְעֹה וּלְאִתְרְחָצָא בִּטְלַל מִצְרָיִם: ^is-30-2

**3** וִיהֵי לְכוֹן תְּקוֹף פַּרְעֹה לְבַהֲתָא וְאִתְרָחֲצָנָא בִּטְלַל מִצְרַיִם לְאִתְכְּנִיעוּ: ^is-30-3

**4** אֲרֵי הֲווֹ בְטָאנֵיס רַבְרְבוֹהִי וְאִזְגַדוֹהִי עַד תַּחְפַּנְחֵס מְטוֹ: ^is-30-4

**5** כּוּלְהוֹן אָזְלִין לְמִבְהַת לְוַת עַמָא דְלָא יַהֲנוּן לְהוֹן לָא לְסָעִיד וְלָא לַהֲנָאָה אֲרֵי לְבַהֲתָא וְאַף לְחִסוּדִין: ^is-30-5

**6** מַטְלִין עַל בְּעִירְהוֹן בְּאוֹרַח דָרוֹמָא בַּאֲרַע עָקָא וְעִיוּק אֲתַר דְאַרְיָא בַר אַוְיְוָן וְחֵיוָן הוּרְמָנִין מַפְרְחִין נָטְלִין עַל כְּתַף עִילִין נִכְסֵיהוֹן וְעַל חִטוּרִיאַת גַמְלִין מָא דִבְאָצְרֵיהוֹן מוֹבְלִין לְעַם לָא יַהֲנוֹן לְהוֹן: ^is-30-6

**7** וּמִצְרָאֵי לְמָא וְרֵיקָנוּ סְעַדְהוֹן בְּכֵן עֲרַעָיַת מִנְהוֹן קְטִילִין זְמִינִין אַיְתֵי עֲלֵיהוֹן: ^is-30-7

**8** כְּעַן עוֹל כְּתַב עַל לוּחַ בֵינֵיהוֹן וְעַל שִׁיטִין דִסְפַר רָשׁוּם וּתְהִי לְיוֹם דִין לְסַהֲדוּ קֳדָמַי עַד עַלְמָא: ^is-30-8

**9** אֲרֵי עַם סַרְבָן אִינוּן בְנַיָא כַּדִיבַיָא בְּנַיָא לָא אֲבוּ לְקַבָּלָא אוּלְפָן אוֹרַיְתָא דַיָי: ^is-30-9

**10** דְאָמְרִין לִנְבַיָיא לָא תִתְנַבּוּן וּלְמַלְפַיָא לָא תַלְפוּן לָנָא אוּלְפַן אוֹרַיְתָא בְּסִימָן מַלִילוּ עִמָנָא אִשְׁתַּעוּ לָנָא שְׁנִין: ^is-30-10

**11** אַסְטְיוּנָא מֵאוֹרְחָא דְתַקְנָא אַבְטְלוּנָא מִמְסַרְתָּא אַרְחִיקוּ מִן קֳדָמָנָא יַת מֵימַר קַדִישָׁא דְיִשְׂרָאֵל: ^is-30-11

**12** בְּכֵן כִּדְנַן אָמַר קַדִישָׁא דְיִשְׂרָאֵל חֲלַף דְקַצְתּוּן בְּפִתְגָמָא הָדֵין וְאִתְרַחֵיצְתּוּן בְּשִׁקְרָא וּבְאוּנְסָא וְאִסְתְּמִכְתּוּן עֲלוֹהִי: ^is-30-12

**13** בְּכֵן יְהֵי לְכוֹן חוֹבָא הָדֵין כִּכְרַךְ דַחֲרוֹב וְאִתְחַמַר כְּשׁוּר מַתְקַף דְבִתְכֵּיף שָׁלוּ יֵיתֵי תַּבְרֵיהּ: ^is-30-13

**14** וְתַבְרָהּ כְּתִבוּר מַן דַחֲסַף דְפַחְרָא דְמִדַקַק לָא בַחֲיָס וְלָא מִשְׁתְּכַח בְּדִיקוּקֵיהּ חֲסַף לְמֶחְתֵי גוּר מִמַבְעוֹר וּלְמִדְלַח מַיִין מִפְצִיר: ^is-30-14

**15** אֲרֵי כִדְנַן אֲמַר יְיָ אֱלֹהִים קַדִישָׁא דְיִשְׂרָאֵל אֲמָרֵית דִי תְתוּבוּן לְאוֹרַיְתָא תְנוּחוּן לְאוֹרַיְתָא תְנוּחוּן וְתִתְפָּרְקוּן תִּשְׁקְטוּן וְתִשְׁרוּן לְרוֹחֲצָן תְּהוֹן גִבָּרִין וְלָא אֲבִיתוּן: ^is-30-15

**16** וַאֲמַרְתּוּן לָא אֱלָהֵין עַל סוּסְוָתָא נֶעְרוֹק וְעַל כֵּן תַּעַרְקוּן וְעַל קַלִילִין נִרְכּוּב עַל כֵּן יְהוֹן קַלִילִין רָדְפֵיכוֹן: ^is-30-16

**17** אַלְפָא חָד מִן קֳדָם מְזוֹפִית חַמְשָׁא תֶּעְרְקוּן עַד דְתִשְׁתַּאֲרוּן כְּכוֹעֲרָא עַל רֵישׁ טוּרָא וּבְאָתָא עַל רָמָתָא: ^is-30-17

**18** וּבְכֵן עֲתִיד יְיָ לְמֵיחָס עֲלֵיכוֹן וְתַקֵיף הוּא דִירַחֵם עֲלֵיכוֹן אֲרֵי אֱלָהָא עֲבִיד דִינָא יְיָ טוּבֵי צַדִיקַיָא דְמִסַבְּרִין לְפוּרְקָנֵהּ: ^is-30-18

**19** אֲרֵי עַמָא בְּצִיוֹן יָתֵיב בִּירוּשְׁלֵם מִבְכָּא לָא תִבְכֵּי רַחֲמָא יְרַחֵם עֲלָךְ קָל צְלוֹתָךְ יְקַבֵּל וְיַעְבֵּיד בָעוּתָךְ: ^is-30-19

**20** וִיהַב לְכוֹן יְיָ נִכְסֵי סַנְאָה וּבִזַת מְעִיקָא וְלָא יְסַלֵק עוֹד שְׁכִינְתֵּהּ מִבֵּית מַקְדְשָׁא וְיֶהְוְיָן עֵינָךְ חֶזְיָן יַת שְׁכִנְתִּי בְּבֵית מַקְדְשָׁא: ^is-30-20

**21** וְאוֹדְנָךְ יִשְׁמְעוּן פִּתְגָמָא מִבִּתְרָךְ לְמֵימָר הֲדָא אוֹרְחָא דְתַקְנָא הֲלִיכוּ בָהּ לָא תִסְטוּן מִנֵיהּ לְיַמִינָא וְלִסְמָאלָא: ^is-30-21

**22** וּתְסַאֲבוּן יַת חִפּוּי צַלְמֵי כַּסְפֵּיכוֹן וְיַת תִּקוּן מַתְּכַת דַהַבְכוֹן תַּרְחִיקִינוּן כְּמָא דִמְרַחֲקִין יַת טוּמְאֲתָא כֵּן תַּרְחִיקִינוּן: ^is-30-22

**23** וְיִתֵּן מְטַר זַרְעֵךְ דִי תִזְרַע יַת אַרְעָא וְעִבּוּרָא וַעֲלָלָא יִסְגֵי בְאַרְעָא וִיהֵי פַרְנוּס וְטָב וְיִתְפַּרְנְסוּן צַדִיקַיָא מִיגֵיתֵיהוֹן בְּעִדָנָא הַהִיא שְׁמֵן רַכִּיכִין וּפַטִימִין: ^is-30-23

**24** וְתוֹרַיָא וַחֲמָרַיָא דִי מְפַלְחִין בְּהוֹן יַת אַרְעָא בְּלִיל מְפַטֵם יֵכְלוּן דִי דְרָא בְרִיחֲתָא וּבִמְדֵירָא: ^is-30-24

**25** וִיהֵי עַל כָּל טוּר רָם וְעַל כָּל רָמָא מְנַטְלָא פַצִידִין נָגְדִין מַיִין תַּקָלָא לְמַלְכִין וּלְמַשִׁרְיַתְהוֹן בְּיוֹם קְטוּל רַב בְּמַפַּל רַבְרְבִין: ^is-30-25

**26** וִיהֵי נֵיהוֹר סִיהֲרָא כְּנֵיהוֹר שִׁמְשָׁא וְנֵיהוֹר שִׁמְשָׁא יְהֵי עֲתִיד לְאַנְהָרָא עַל חָד תְּלַת מְאָה אַרְבְּעִין וּתְלָתָא כְּנֵיהוֹר שַׁבְעַת יוֹמַיָא בְּיוֹמָא דְיָתִיב יְיָ יַת גַלְוַת עַמֵיהּ וּמְרַע מְחָתֵיהּ יָסֵי: ^is-30-26

**27** הָא שְׁמָא דַייָ מִתְגְלֵי כְמָא דְאִתְנַבִּיאוּ עֲלוֹהִי נְבִיָיא מִלְקַדְמִין תַּקִיף רוּגְזֵהּ וּקְשֵׁי מִלְסוֹבְרָא מִן קֳדָמוֹהִי עַל רַשִׁיעַיָא נְפַק לְוָט וּמֵימְרֵהּ כְּאֶשָׁא אָכְלָא: ^is-30-27

**28** וּמֵימְרֵהּ כְּנַחַל מַגְבַּר עַד צַוָאר תַּקִיפִין יִקְטֵיל לַאֲרָמָא עַמְמַיָא בְּרָמוּת רֵיקָנוּ וּזְמָם דְטָעוּ בְּלִיסַת עַמְמַיָא: ^is-30-28

**29** תּוּשְׁבְּחָא תְּהֵי לְכוֹן כְּלִילְיָא דְאִתְקַדֵשׁ בֵּיהּ חַגָא וְחֶדְוַת לִבָּא כְּמָא דְנָגִין בְּתוֹדָתָא בְּאַבּוּבָא לְמֵיעַל בְּטוּר קוּדְשָׁא דַייָ לְאִתְחֲזָאָה קֳדָם תַּקִיפָא דְיִשְׂרָאֵל: ^is-30-29

**30** וְיַשְׁמַע יְיָ יַת זִיו קַל מֵימְרֵהּ וּתְקוֹף דְרַע גְבוּרְתֵּהּ יְגַלֵי בִּתְקוֹף רְגַז וְשַׁלְהוֹבֵי אֶשָׁא דִמְשֵׁיצָא פְּסִילָן בַּדוּר וְזַרְמִית וְאַבְנִין דְבָרָד: ^is-30-30

**31** אֲרֵי מִקָל מֵימְרָא דַייָ מִתְּבַר אַתּוּרָאָה דִי דִי בְשׁוּלְטָן מָחֵי: ^is-30-31

**32** וִיהֵי כָּל מַעֲבַר רַבְרְבֵיהוֹן וְתַקִיפֵיהוֹן דִי יַנִיחַ יְיָ פּוּרְעֲנוּת גְבוּרְתֵּהּ בֵּינֵיהוֹן בְּתוּפִּין וּבְכִינוֹרִין יְשַׁבְּחוּן בֵּית יִשְׂרָאֵל וְעַל קְרָבָא תַקִיפָא דְיִתְעֲבֵּיד לְהוֹן בְּעַמְמַיָא: ^is-30-32

**33** אֲרֵי מְסִדְרָא מִן עַלְמִין לָקֳבֵיל חוֹבֵיהוֹן גֵהִנָם אַף הִיא מְלַךְ עָלְמַיָא אַתְקָנָא לַעֲמִיקָא וּלְאַפְתָּאָה מְדוּרָא דְאֶשְׁתָּא דָלְקָא בָהּ כַּד בָּאָעִין סַגִיאִין מֵימְרָא דַייָ כְּנַחַל מַגְבַּר גָפְרִית דָלְקָא בָהּ: ^is-30-33

## Capítulo 31

**1** וַי דְנַחֲתִין לְמִצְרַיִם לְסָעִיד וְעַל סוּסְוָתָא מִסְתַּמְכִין וּמִתְרַחֲצִין עַל רְתִיכַיָא אֲרֵי סַגִיאִין וְעַל פָּרָשַׁיָא אֲרֵי תַקִיפִין לַחֲדָא וְלָא אִסְתְּמִיכוּ עַל מֵימַר קַדִישָׁא דְיִשְׂרָאֵל וְאוּלְפַן מִן קֳדָם יְיָ לָא תְבָעוּ: ^is-31-1

**2** וְאַף הוּא בְּחוּכְמְתֵיהּ אַיְתֵי בִישְׁתָּא עַל דְעַבְדֵהּ וְיַת פִּתְגָמוֹהִי לָא בַטֵיל וַאֲקֵים עַל בֵית מַבְאֲשִׁין וְעַל דְסָעֲדִין לֵיאוּת שְׁקָר: ^is-31-2

**3** וּמִצְרַיִם אֱנַשׁ וְלָא רָב וְסוּסְוָתְהוֹן בְּסַר וְלָא רוּחַ וַיָי יָרִים מְחַת גְבוּרְתֵּהּ וְיִתְקַל סָעִיד וְיִפּוֹל סָעִיד וְכַחֲדָא כּוּלְהוֹן יִשְׁתֵּיצוּן: ^is-31-3

**4** אֲרֵי כִדְנַן אֲמַר יְיָ לִי כְּמָא דְמַכְלֵי אַרְיָא בַּר אַרְיָוָן עַל צֵידֵיהּ דְמִזְדַמְנִין עֲלוֹהִי דִיר רַעֲיָן מִקָלְהוֹן לָא אִתְבַּר וּמֵאִתְרְגוּשְׁתְּהוֹן לָא מִזְדַעְזַע כֵּן תִּתְגְלֵי מַלְכוּתָא דַייָ צְבָאוֹת לְמִשְׁרֵי עַל טוּרָא דְצִיוֹן וְעַל רָמָתָהּ: ^is-31-4

**5** כְּעוֹפָא דְטָאִים כֵּן תִּתְגְלֵי גְבוּרְתֵּהּ דַייָ צְבָאוֹת עַל יְרוּשְׁלֵם יָגֵין וִישֵׁיזֵיב יַצִיל וְיַעְדֵי: ^is-31-5

**6** תּוּבוּ לְאוֹרַיְתָא אֲרֵי אַסְנֵיתוּן לְמֶחְטֵי בְּנֵי יִשְׂרָאֵל: ^is-31-6

**7** אֲרֵי בְעִדָנָא הַהִיא יְרַחֲקוּן גְבַר טַעֲוַת כַּסְפְּהוֹן וְטַעֲוַת דְהַבְהוֹן דַעֲבָדוּ לְכוֹן יְדֵיכוֹן חוֹבָא: ^is-31-7

**8** וְיִפּוֹל אַתּוּרָאָה בְּחֶרֶב לָא אֱנַשׁ וְחֶרֶב לָא אֱנשׁ תְּשֵׁיצִינֵהּ וְיֶעְרוֹק לֵיהּ כְּמִן קֳדָם דְקַטְלִין בְּחַרְבָּא וְגִבְרוֹהִי לִתְּבַר יְהוֹן: ^is-31-8

**9** וְשִׁלְטוֹנוֹהִי מִן קֳדָם דַחֲלָא יֶעְדוּן וִיתַּבְרוּן מִן קֳדָם נִיסָא רַבְרְבוֹהִי אֲמַר יְיָ דְזֵיהוֹר לֵיהּ בְּצִיוֹן לְעָבְדֵי אוֹרַיְתָא וְתַנוּר בָּעֵיר לֵיהּ דְאֶשָׁא בִירוּשְׁלֵם לִדְעֲבָרוּ עַל מֵימְרֵהּ: ^is-31-9

## Capítulo 32

**1** הָא לְקוּשְׁטָא יִמְלוֹךְ מַלְכָּא וְצַדִיקַיָא לְמֶעְבַּד פּוּרְעֲנוּת דֵין מִן עַמְמַיָא יִתְרְבוּן: ^is-32-1

**2** וִיהוֹן צַדִיקַיָא דְמִיטַמְרִין מִן קֳדָם רַשִׁיעַיָא כְּמָא דְמִיטַמְרִין מִן קֳדָם זַרְמִית יְתוּבוּן וְיִתְרַבּוּן וְיִתְקַבֵּיל אוּלְפַנְהוֹן בִּפְרִיעַ כְּפַצִידֵי מַיָא דְנַגְדִין בְּאַרְעָא מְשַׁלְהֲיָא כִּטְלַל כֵּיף מְיַקֵר בְּאַרְעָא מְשַׁלְהַיָא: ^is-32-2

**3** וְלָא יִטַמְטְמַן עֵינֵי צַדִיקַיָא וְאוּדְנֵי מְקַבְּלֵי אוּלְפַן יְצִיתָן: ^is-32-3

**4** וּלְבַב מְהַרְהֲרִין יְסַבַּר לְמֵידַע וְלִישָׁנְהוֹן דַהֲוָה בְלִים יוֹחִי לְמַלָלָא בְּצַחְצְחָן: ^is-32-4

**5** לָא יִתְאֲמַר עוֹד לְרַשִׁיעַיָא צַדִיקַיָא וְלִדְעַבָרוּ עַל מֵימְרֵהּ לָא יִתְאַמַר תַּקִיפִין: ^is-32-5

**6** אֲרֵי רַשִׁיעַיָא רִשְׁעָה מְמַלְלִין וּבְלִיבְּהוֹן מִתְעַשְׁתִּין אוֹנֶס לְמֶעְבַּד שְׁקַר וּלְמַלָלָא קֳדָם יְיָ סַטְיָא לְשַׁלְהָאָה נֶפֶשׁ צַדִיקַיָא דִמְחַמְדִין לְאוּלְפָנָא הָא כְּכָפְנָא לְלַחְמָא וּפִתְגָמֵי אוֹרַיְתָא דְאִינוּן כְּמַיָא לְצַחָיָא מְדַמָן לְבַטָלָא: ^is-32-6

**7** וְרַשִׁיעַיָא דְעוֹבָדֵיהוֹן בִּישִׁין וְאִינוּן עַל עֵיצַת חֶטְאִין מִתְמַלְכִין לְחַבָּלָא עִנְוְתָנַיָא בְּמִלֵי שְׁקַר וּפִּתְגָמֵי חֲשִׁיכַיָא בְּדִינָא: ^is-32-7

**8** וְצַדִיקַיָא קוּשְׁטָא מִתְמַלְכִין וְאִינוּן עַל קוּשְׁטֵיהוֹן יִתְקַיְמוּן: ^is-32-8

**9** מְדִינָן דְיַתְבִין שְׁלֵיוָן קוּמָא שְׁמַעֲנָא קָלִי כְּרַכִּין דִי שְׁרָן לְרוֹחֲצָן אַצִיתָא לְמֵימְרִי: ^is-32-9

**10** יוֹמִין עִם שְׁנִין יְזוּעוּן דִי שָׁרָן לְרוֹחֲצָן אֲרֵי סַף עִבּוּרָא עֲלָלָא לֵית לְמִכְנַשׁ: ^is-32-10

**11** אִיתְּבַרוּ דְיַתְבִין שְׁלֵיוָן זָעוּ דִי שָׁרָן לְרוֹחֲצָן שְׁלָחוּ וְאִיתְעַרְטִלוּ וֶאֱסָרוּ עַל חַרְצִין: ^is-32-11

**12** עַל דַדִין סִפְּדִין עַל חַקְלֵי חֲמִידְתָּא עַל גוּפְנִיי טָעֲנִין: ^is-32-12

**13** עַל אַרְעָא דְעַמִי הוּבֵאִי וּבוּר תַּסִיק אֲרֵי עַל כָּל בָּתֵּי דַיִץ קִרְוָא תַּקִיפָא: ^is-32-13

**14** אֲרֵי בֵּית מַקְדְשָׁא חֲרוֹב הֲמוֹן קִרְוַיָא דַהֲוָאָה פַלְחִין בֵּיהּ צְרִיאָה בֵּית תָּקְפָנָא וּמַטְמוֹרָנָא אִתְבְּלֵשׁ וּכְרִי חֲרוֹב וּצְדִי עַד זְמַן אֲתַר דַהֲוָה בֵית חֶדְוָא וְחֵידוּ לְמַלְכַיָא כְדוֹ הֲוָה מִבַז לְמַשִׁרְיָן: ^is-32-14

**15** כָּל דְנָא עַד דְיֵיתֵי לָנָא רְוַח מִן קֳדָם דִשְׁכִנְתֵּהּ בִּשְׁמֵי מְרוֹמָא וִיהֵי מַדְבְּרָא לְכַרְמְלָא וְכַרְמְלָא קִירְוִין סַגִיאִין יְתִיב: ^is-32-15

**16** וְיִשְׁרוּן בְּמַדְבְּרָא עָבְדֵי דִינָא וְעָבְדֵי צְדַקְתָּא יַת כַּרְמְלָא יֵיתְבוּן: ^is-32-16

**17** וִיהוֹן עָבְדֵי צְדַקְתָּא שְׁלָם וּמְפַלְחֵי צְדַקְתָּא יִשְׁקְטוּן וְיִשְׁרוּן לְרוֹחֲצָן עַד עָלְמַיָא: ^is-32-17

**18** וְיֵתְבוּן עַמִי בִּמְדוֹרֵיהוֹן שְׁלָם וְעַל אַרְעֲהוֹן לְרוֹחֲצָן וּבְקִירְוֵיהוֹן שְׁלֵיוָן: ^is-32-18

**19** וְיֵחוֹת בַּרְדָא וְיִקְטֵיל מַשִׁרְיַת עַמְמַיָא פַּלְחֵי טַעֲוָתָא וְיִצְדוּן וִיסוּפוּן דָיְרֵיהוֹן: ^is-32-19

**20** טוּבֵיכוֹן צַדִיקַיָא עֲבַדְתּוּן לְכוֹן עוֹבָדִין טָבִין דְאַתּוּן דָמָן לִדְזַרְעִין עַל שַׁקְיָא מְשַׁלְחִין לְאַדְרָכָא בְּתוֹרַיָא וּלְמִכְנַשׁ בְּחַמְרַיָא: ^is-32-20

## Capítulo 33

**1** וַי דְאָתֵי לְמִבַז וְיָתָךְ לָא יִבְזוּן וּדְאָתֵי לְמֵינַס וְיָתָךְ לָא יֵינְסוּן כַּד תַּיְתֵי לְמִבַּז יִבְזוּנָךְ וְכַד תִּלְאֵי לְמֵינַס יַנְסוּנָךְ: ^is-33-1

**2** יְיָ רְחִים עִלָנָא לְמֵימְרָךְ סַבַּרְנָא הֱוֵי תוּקְפָנָא בְּכָל יוֹם אַף פּוּרְקָנָנָא בְּעִידַן עָקָא: ^is-33-2

**3** מִקַל הֲמוֹן אִתְבְּרוּ עַמְמַיָא מִסְגֵי גְבוּרָן אִתְבַּדָרוּ מַלְכְוָתָא: ^is-33-3

**4** וְיִכְנְשׁוּן בֵּית יִשְׂרָאֵל נִכְסֵי עַמְמַיָא סַנְאֵיהוֹן כְּמָא דְכִינְשִׁין יַת זַחְלָא וְאָזַן בְּמָאנֵי זְיָנָא כְּמָא דְאָזָן בְּזִירְקְתָא: ^is-33-4

**5** תַּקִיף יְיָ דְאַשְׁרֵי שְׁכִינְתֵּהּ בִּשְׁמֵי מְרוֹמָא דַאֲמַר לְמִמְלֵי צִיוֹן עָבְדֵי דִין דִקְשׁוֹט וּזְכוּ: ^is-33-5

**6** וִיהֵי מָא דַאֲמַרְתָּ לְאוֹטָבָא לִדְחַלְתָּךְ אַיְתֵיתָא וְקַיֵמְתָּא בְּעִידָנֵהּ תְקוֹף וּפוּרְקַן חוּכְמָתָא וּמַדַע לְדָחְלַיָא דַייָ אוֹצַר טוּבֵיהּ עֲתִיד: ^is-33-6

**7** הָא כַּד אִתְגְלֵי לְהוֹן יְצַוְחוּן בִּמְסַר אִיזְגַדֵי עַמְמַיָא דַאֲזָלוּ לְבַסָרָא שְׁלָם תָּבוּ לְמֶהֱוֵי בָכָן בִּמְרִיר נְפָשׁ: ^is-33-7

**8** צְדִיאוּ כִבְשַׁיָא פְּסָקוּ עָדֵי אוֹרְחָא עַל דְאַשְׁנִיאוּ קְיָמָא אִיתְרְחִיקוּ מִקִרְוֵיהוֹן לָא חֲשִׁיבוּ בְנֵי אֱנָשָׁא דְבִישְׁתָּא אַתְיָא עֲלֵיהוֹן: ^is-33-8

**9** אִיתְאַבְּלַת חֲרוֹבַת אַרְעָא יָבֵישׁ לִבְנָן נְתַר הֲוָה שָׁרוֹנָא כְּמֵישְׁרָא צְדֵי מַתְנַן וְכַרְמְלָא: ^is-33-9

**10** כְּעַן אֶתְגְלֵי אֲמַר יְיָ כְּעַן אֶתְרוֹמֵם כְּעַן אֶתְנַטָל: ^is-33-10

**11** אִתְעַשְׁתּוּן לְכוֹן עַמְמַיָא עַשְׁתּוֹנִין דִרְשַׁע עֲבַדְתּוּן לְכוֹן עוֹבָדִין בִּישִׁין בְּדִיל עוֹבָדֵיכוֹן בִּישַׁיָא מֵימְרִי כְּעַלְעוֹלָא לְקַשָׁא יְשֵׁיצֵי יַתְכוֹן: ^is-33-11

**12** וִיהוֹן עַמְמַיָא יְקֵידַת נוּר כּוּבִין מְפַסְכִין בְּנוּרָא יִתּוֹקְדוּן: ^is-33-12

**13** שְׁמָעוּ צַדִיקַיָא דִנְטָרוּ אוֹרַיְתָא מִלְקָדְמִין מָא דַעֲבָדִית דְעוּ חַיָבַיָא דְתָבוּ לְאוֹרַיְתִי קָרִיב גְבוּרְתִּי: ^is-33-13

**14** אִתְבָּרוּ בְצִיוֹן חַיָבִין דַחֲלָא אֲחַדְתִּינוּן לְרַשִׁיעַיָא דַהֲווּ מְגַנְבִין אוֹרְחַתְהוֹן אָמְרִין מַן יָדוּר לָנָא בְּצִיוֹן דְבָהּ זֵיהוֹר שְׁכִינְתֵּה כְּאֶשָׁא אָכְלָא מַן יִתּוֹתָב לָנָא בִירוּשְׁלֵם עַתִידִין רַשִׁיעַיָא לְאִתְדָנָא לְאִתְמְסָרָא לִגְהִנָם יְקֵדוּת עֲלָם: ^is-33-14

**15** אֲמַר נְבִיָא יַתְבוּן בָהּ צַדִיקַיָא כָּל דִמְהַלֵךְ בִּזְכוּ וּמְמַלֵיל כֵּיוָנָן  מִתְרַחֵק מִמָמוֹן דִשְׁקַר מַרְחֵיק נַפְשֵׁיהּ מִן אֲנוּסִין מְנַע יְדוֹהִי מִלְקַבָּלָא שׁוֹחְדָא מְטַמְטֵים אוּדְנֵהּ מִלְמִשְׁמַע בְּאַשְׁדֵי דַם זַכַּאי וְכָל עֵינוֹהִי מִלְמֶחְזֵי בְּעָבְדֵי בוּשׁ: ^is-33-15

**16** הוּא בַּאֲתַר רָם וּמְנַטֵל יְהֵי בֵית מַשְׁרוֹהִי בֵּית מַקְדְשָׁא תִּסְבַּע נַפְשֵׁיהּ מְזוֹנֵהּ מַסְפַּק מוֹהִי קַיָמִין כְּמַבּוּעַ דְמַיִין דְלָא פָּסְקִין מוֹהִי: ^is-33-16

**17** יַת יְקָר שְׁכִינַת מֶלֶךְ עָלְמַיָא בְּתוּשְׁבַּחְתֵּהּ יֶחֶזְיָן עֵינָךְ תִּסְתַּכֵּל וְתֶחֱזֵי בְּנָחְתֵי אֲרַע גֵהִנָם: ^is-33-17

**18** לִבָּךְ יַחְשָׁב רַבְרְבָן אֵיכָא סַפְרַיָא אֵיכָא רַבְרְבַיָא אֵיכָא חֲשָׁבַיָא יֵתוּן אִם יֵכְלוּן לְחַשָׁבָא מִנְיָן קְטִילֵי רֵישֵׁי מַשִׁרְיַת גִבָּרַיָא: ^is-33-18

**19** יַת מַרְוַת עַם תַּקִיף לָא תִכּוּל לְמֶחֱזֵי עַמָא דַהֲוָה עָמִיק מַמְלַלְהוֹן מִלְמִשְׁמַע מְלַעֲגִין בְּלִישָׁנְהוֹן מִדְלֵית בְּהוֹן סוּכְלְתָנוּ: ^is-33-19

**20** תֶּחֱזֵי בְּמַפַּלְתְּהוֹן צִיוֹן קִרְיַת זִמְנָנָא עֵינָךְ יֶחֱזְיָן בְּנֶחָמַת יְרוּשְׁלֶם בְּאַצְלָחוּתָא בִּשְׁלֵוָתָא בְּמַשְׁכְּנָא דְלָא מִתְפְּרַק וְלָא מִשְׁתַּלְפָן סִכּוֹהִי לַעֲלַם וְכָל אַטוֹנוֹהִי לָא יִתְפַסְקוּן: ^is-33-20

**21** אֲרֵי אֱלָהֵן מִתַּמָן תִּתְגְלֵי גְבוּרְתָּא דַייָ לְאוֹטָבָא לָנָא מֵאֲתַר נַפְקִין נַהֲרִין שָׁטְפִין פְּתָיוּת יְדִין דְלָא תֵיזֵיל בֵּיהּ סְפִינַת צַיָדִין וּבוּרְנִי רַבְּתָא לָא תְגוֹזִנֵהּ: ^is-33-21

**22** אֲרֵי יְיָ דַיָנָנָא דְאַפְקָנָא בִּגְבוּרְתֵּהּ מִמִצְרָיִם יְיָ מַלְפָנָא דִי הָב לָנָא אוּלְפַן אוֹרַיְתָא מִסִינַי יְיָ מַלְכָּנָא הוּא יִפְרְקִנָנָא וְיַעְבֵּיד לָנָא פּוּרְעֲנוּת דִין מִן מַשִׁירְיַת גוֹג: ^is-33-22

**23** בְּעִדָנָא הַהִיא יִתַּבְּרוּן עַמְמַיָא סְחוֹר סְחוֹר יְרוּשְׁלֶם מִתּוּקְפְהוֹן וִיהוֹן דָמָן לִסְפִינָא דְאִתְפַּסְקוּ חֲבָלָהָא וְלֵית לָהּ תְּקוֹף עַל תָּרְנְהוֹן דְאִתְפְּסִיק וְלָא אֶפְשַׁר לְמִפְרַס עֲלוֹהִי קְלַע בְּכֵן יְפַלְגוּן בֵּית יִשְׂרָאֵל נִכְסֵי עַמְמַיָא סְחוֹר סְחוֹר יְרוּשְׁלֶם סַגִיאוּת עָדֵי וּבוּז וַאֲפִילוּ יִשְׁתַּאֲרוּן בְּהוֹן עַוֵרִין וַחֲגִירִין אַף אִינוּן יְפַלְגוּן סַגִיאוּת עָדֵי וּבוּז: ^is-33-23

**24** וְלָא יֵימְרוּן מִכְּעַן לְעַמָא דְשָׁרָן סְחוֹר סְחוֹר אֲתִיב לִשְׁכִינְתָּא מִלְוַתְכוֹן אֲתָת עַלָנָא מְחַת מְרַע עַמָא בֵּית יִשְׂרָאֵל יִתְכַּנְשׁוּן וִיתוּבוּן לְאַרְעֲהוֹן שְׁבִיק לְחוֹבֵיהוֹן: ^is-33-24

## Capítulo 34

**1** אִתְקַרְבוּ עַמְמַיָא לְמִשְׁמַע וּמַלְכְּוָתָא אֲצִיתוּ תִּשְׁמַע אַרְעָא וּמְלָהָא תֵּבֵל וְכָל דְדָיְרִין בָּהּ: ^is-34-1

**2** אֲרֵי רְגַז מִן קֳדָם יְיָ עַל כָּל עַמְמַיָא וְרוּגְזָא עַל כָּל מַשִׁירְיָתֵיהוֹן חַיְבִינוּן מְסַרְנוּן לְקַטָלָא: ^is-34-2

**3** וּקְטִילֵיהוֹן יִתְרְמוּן וּפִגְרֵיהוֹן יִסַק תְּנָנְהוֹן וְיִתְיַמְסוּן טוּרַיָא מִדָמְהוֹן: ^is-34-3

**4** וְיִתְיַמְסוּן כָּל חֵילֵי שְׁמַיָא וְיִתְמְחוּן מִתְּחוֹת שְׁמַיָא כְּמָא דַאֲמִיר עֲלֵיהוֹן בְּסִפְרָא וְכָל מַשִׁירְיָתְהוֹן יְסוּפוּן כְמִיתַר טְרַף מִגֶפֶן וּכְנִבְלָא מִתְּאֵנָה: ^is-34-4

**5** אֲרֵי תִתְגְלֵי בִשְׁמַיָא חַרְבִּי הָא עַל אֱדוֹם תִּתְגְלֵי וְעַל עַמָא דְחַיָבִית לְדִינָא: ^is-34-5

**6** חַרְבָּא קֳדָם יְיָ אִיתְמְלִיאַת דַם אִדַהֲנַת מִתְּרַב מִדַם מַלְכִין וְשִׁלְטוֹנִין מִתְּרַב כָּלְיָת רַבְרְבִין אֲרֵי קְטָלָא קֳדָם יְיָ בְּבָצְרָה וְנִכְסָא סַגִיאָה בְּאַרְעָא דֶאֱדוֹם: ^is-34-6

**7** וְיִתְקַטְלוּן גִבָּרִין דְאַרְעָא חֲדָא עִמְהוֹן וְשִׁילְטוֹנִין עִם טוֹרְנִין וְתִרְוֵי אַרְעֲהוֹן מִדִמְהוֹן וְעַפְרְהוֹן מִתַּרְבְּהוֹן יִדְהָן: ^is-34-7

**8** אֲרֵי יוֹם פּוּרְעֲנוּתָא קֳדָם יְיָ שְׁנַת תוּשְׁלֵמָא לְמֶעְבַּד פּוּרְעֲנוּת דִין עוּלְבָּנָא דְצִיוֹן: ^is-34-8

**9** וְיִתְהַפְּכוּן נַחֲלָהָא לְזֵפָא וְעַפְרָא לְגוּפְרֵיתָא וּתְהֵי אַרְעָהּ לְזֵפָא בוֹעֵרָא: ^is-34-9

**10** לֵילֵי וִימָם לָא תִטְפֵי לַעֲלָם יִסַק תְּנָנָהּ מִדָר לְדָר תֶּחֱרוֹב לַעֲלָם עַלְמַיָא לֵית דִי עָדֵי בָּהּ: ^is-34-10

**11** וְיַחְסְנוּנָהּ קָתִין וְקִפּוֹדִין וְקִפוֹפִין וְעוֹרְבִין יִשְׁרָן בָּה וְיִתְנְגִיד עֲלָהּ חוּט דְחוּרְבָּנָא וּמִשְׁקַלְתָּא דְצַדְיוּתָא: ^is-34-11

**12** דַהֲווֹ אָמְרִין בְּנֵי חֵירִין אֲנַחְנָא וְלָא צְבָן לְקַבָּלָא אֲנַחְנָא וְלָא צְבָן לְקַבָּלָא עֲלֵיהוֹן מַלְכוּ וְכָל רַבְרָבָהָא יְהוֹן לִלְמָא: ^is-34-12

**13** וְיִסְקוֹן בִּרְנְיָתָהָא סִירִין קַרְסוּלִין וְחוֹחִין בִּתְקוֹף כְּרַכָּהָא וּתְהֵי מְדוֹר יְרוֹדִין אַתְרָא לְבַת נַעֲמָא: ^is-34-13

**14** וִיעַרְעָן תַּמְוָן בַּחְתוּלִין וְשֵׁידִין חַד עִם חַבְרֵהּ יְחַיְכוּן בְּרַם תַּמָן יִשְׁרְיָן לִילִין וְיִשְׁכְּחָן לְהֶן נְיָה: ^is-34-14

**15** תַּמָן תְּקַנִין קוּפְדָא וּתְשֵׁיזִיב וְקִירֵיהוֹן יְנַצְפוּן בְּטוּרָא בְּרַם לְתַמָן יִתְכַּנְשׁוּן דַיָתָא אִתְּתָא לְוַת חֲבֶרְתָּהּ: ^is-34-15

**16** תְּבָעוּ מֵעַל סִפְרָא דַייָ וּבְעוֹ חֲדָא מִנְהוֹן לָא שְׁנָת וְאִתְּתָא לַחֲבֶרְתָּהּ לָא עַכִּיבַת אֲרֵי בְּמֵימְרֵהּ יִתְכַּנְשִׁן וּבִרְעוּתֵהּ יִתְקָרְבָן: ^is-34-16

**17** וְהוּא בְמֵימְרֵהּ רְמָא לְהוֹן עַדְבָא וּבִרְעוּתֵהּ פְּלִיג לְהוֹן בְּחוּטָא עַד עַלְמָא יַחְסְנוּנָהּ לְדוֹר וָדוֹר יִשְׁרוֹן בָּהּ: ^is-34-17

## Capítulo 35

**1** יֶחְדוּן דְיַתְבִין בְּמַדְבְּרָא בְּאַרְעָא צִיחַיָא וְיִבְעוּן דְשָׁרָן בְּמֵישְׁרָא וְיִזְהֲרוּן כְּשׁוֹשַׁנְיָא: ^is-35-1

**2** מֵידָץ יְדוּצוּן וְיֶחְדוּן אַף בִּיעַ וְחֶדְוָא יְקַר לִבְנָן יִתְיְהֵיב לְהוֹן זִיו כַּרְמְלָא וְשָׁרוֹנָא בֵּית יִשְׂרָאֵל דִלְהוֹן אָמְרִין אִלֵין אִינוּן יֶחֱזוּן יְקָרָא דַייָ זִיו תּוּשְׁבַּחְתָּא דֶאֱלָהָנָא: ^is-35-2

**3** אֲמַר נְבִיָא תַּקִיפוּ יָדִין דִמְרַשְׁלָן וּרְכוּבִין דִרָעֲלָן חֲסִינוּ: ^is-35-3

**4** אֲמַרוּ לְדָמוֹחָן בְּלִבְּהוֹן לְמֶעְבַּד אוֹרַיְתָא תְּקָפוּ וְלָא תִדַחֲלוּן הָא אֶלָהָכוֹן לְמֶעְבַּד פּוּרְעֲנוּת דִין אִתְגְלֵי מָרֵי גְמַלְיָא יְיָ הִיא יִתְגְלֵי וְיִפְרְקִינְכוֹן: ^is-35-4

**5** בְּכֵן יִתְפַּתְּחָן עֵינֵי בֵּית יִשְׂרָאֵל דְאִינוּן כְּסָמָן מִן אוֹרַיְתָא וְאוּדְנֵיהוֹן דִכְּחַרְשִׁין לְקַבָּלָא לְמִלֵי נְבִיָא יְצִיתָן: ^is-35-5

**6** בְּכֵן בְּמֶחְזְהוֹן גַלְוָתָא דְיִשְׂרָאֵל דְמִתְכַּנְשִׁין וְסַלְקָן לְאַרְעֲהוֹן הָא כְּאַיָלִין קַלִילִין וְלָא לְאִתְעַכָּבָא וִישַׁבַּח לִישָׁנְהוֹן דַהֲוָה בְּלִים אֲרֵי בְּכֵן אִתְבְּזָעוּ בְמַדְבְּרָא מַיָא וְנַחֲלַיָא בְּמֵישְׁרָא: ^is-35-6

**7** וִיהֵי שְׁרוֹבָא לַאֲגַמִין דְמַיָן וּבֵית צָחְוָנָא לְמַבּוּעֵי מַיָא אֲתַר דַהֲוָה יְרוֹדִין שָׁרְיָן תַּמָן יִסְקוּן קָנֶה וְגוֹמָא: ^is-35-7

**8** וִיהֵי תַמָן כֵּבַשׁ אוֹרַח וְתִקוּן אוֹרְחָא דְקוּדְשָׁא יִתְקְרֵי לָהּ לָא יֶעְדוּן בֵּיהּ מְסָאֲבִין וְלָא יִפְסְקוּן עָדֵי אוֹרְחָא וּדְלָא אֲלִיפוּ לָא יִטְעוּן: ^is-35-8

**9** לָא יְהֵי תַמָן מֶלֶךְ מַבְאֵישׁ וְשִׁלְטוֹן מְעִיק לָא יְגוֹזִינֵהּ וְלָא יִשְׁתַּכְּחוּן תַּמָן וִיהָכוּן פְרִיקִין: ^is-35-9

**10** וּפְרִיקַיָא דַייָ יְתוּבוּן וְיַתְכַּנְשׁוּן מִבֵּינֵי גַלְוַתְהוֹן וְיָעַלוּן לְצִיוֹן בְּתוּשְׁבַּחְתָּא וְחֶדְוַת עֲלַם תְּהֵי לְהוֹן דִי לָא פַסְקָא וַעֲנַן יְקָר תְּהֵי מַטַל עַל רֵישֵׁיהוֹן בִּיעַ וְחֶדְוָא יִשְׁכְּחוּן וִיסוּף מִנְהוֹן מִבֵּית יִשְׂרָאֵל דְוָנָא וְתֵינָחָתָא: ^is-35-10

## Capítulo 36

**1** וַהֲוָה בְּאַרְבַּע עַסְרֵי שְׁנִין לְמַלְכָּא חִזְקִיָה סְלִיק סַנְחֶרִיב מַלְכָּא דְאַתּוּר עַל כָּל קִרְוַיָא דְבֵית יְהוּדָה כְּרִיכְתָּא וְאַחֲדִנוּן: ^is-36-1

**2** וּשְׁלַח מַלְכָּא דְאַתּוּר יַת רַבְשָׁקֵה מִלָכִישׁ לִירוּשְׁלֵם לְוַת מַלְכָּא חִזְקִיָה בְּמַשִׁרְיָת סַגִיאָן וְקָם בִּמְזִיקַת בְרֵיכְתָּא עִלִיתָא דִכְבִישׁ חֲקַל מִשְׁטַח קַצָרַיָא: ^is-36-2

**3** וּנְפַק לְוָתֵהּ אֱלְיָקִים בַּר חִלְקִיָה דִי מְמַנָא עַל בֵּיתָא וְשֶׁבְנָא סַפְרָא וְיוֹאָח בַּר אָסָף דִי מְמַנָא עַל דָכְרָנַיָא: ^is-36-3

**4** וַאֲמַר לְהוֹן רַבְשָׁקֵה אֲמָרוּ כְעַן לְחִזְקִיָה כִּדְנַן אֲמַר מַלְכָּא דְרַבְּתָנָא מַלְכָּא דְאַתּוּר מָה רוּחֲצָנָא הָדֵין דְאִיתְרַחֵיצְתָּא: ^is-36-4

**5** אֲמַרֵית בְּרַם בְּמַמְלֵל סִפְוָן בְּמֵלָךְ וּגְבוּרָא אַעְבֵּיד קְרָבָא כְּעַן עַל מַן אִיתְרַחֵיצְתָּא אֲרֵי מְרַדְתָּא בִּי: ^is-36-5

**6** הָא אִיצְרַחֵיצְתָּא עַל סֶמֶךְ קַנְיָא רְעִיעָא הָדֵין עַל פַּרְעֹה מַלְכָּא דְמִצְרַיִם דְאִם יִסְתְּמֵיךְ גַבְרָא עֲלוֹהִי וְיֵעוֹל בִּידֵהּ וִיבַזְעִינֵהּ כֵּן פַּרְעֹה מַלְכָּא דְמִצְרַיִם לְכָל דְמִתְרַחֲצִין עַלוֹהִי: ^is-36-6

**7** וַאֲרֵי תֵימְרוּן לִי עַל מֵימְרָא דַייָ אֱלָהָנָא אִתְרַחֵיצְנָא הֲלָא הוּא דְאַעְדִי חִזְקִיָה יַת בָמָתוֹהִי וְיַת אֱגְרוֹהִי וַאֲמַר לֶאֱנַשׁ יְהוּדָה וּלְיָתְבֵי יְרוּשְׁלֶם קֳדָם מַדְבְּחָא הָדֵין תִּסְגְדוּן: ^is-36-7

**8** וּכְעַן אִתְעָרֵב כְעַן עִם רִבּוֹנִי מַלְכָּא דְאַתּוּר וְאֶתֵּן לָךְ תְּרֵין אַלְפִין סוּסְוָן אִם תִּכּוּל לְמַנָאָה עֲלָךְ רָכְבִין עֲלֵיהוֹן: ^is-36-8

**9** וְאֵיכְדֵין אַתְּ מְדַמִי לַאֲתָבָא יַת אַפֵּי חַד מִשִׁלְטוֹנֵי עַבְדֵי רִיבּוֹנִי זְעֵרַיָא וְאִיתְרַחֵצְתָּא לָךְ עַל מִצְרָיִם לִרְתִיכִין וּלְפָרָשִׁין: ^is-36-9

**10** וּכְעַן הֲבַּר מִמֵימְרָא דַייָ סַלְקֵית לְאַרְעָא הָדָא לְחַבְּלוּתָא יְיָ אֲמַר לִי סַק עַל אַרְעָא הָדָא וְחַבְּלָהּ: ^is-36-10

**11** וַאֲמַר אֶלְיָקִים וְשֶׁבְנָא וְיוֹאָח לְרַבְשָׁקֵה מַלֵיל כְּעַן עִם עַבְדָךְ אֲרָמִית אֲרֵי שָׁמְעִין אֲנַחְנָא וְלָא תְמַלֵיל עִמָנָא יְהוּדִית קֳדָם עַמָא דִי עַל שׁוּרָא: ^is-36-11

**12** וַאֲמַר רַבְשָׁקֵה הַלְוַת רִבּוֹנָךְ וַעֲלָךְ שַׁלְחַנִי רִבּוֹנִי לְמַלָלָא יַת פִּתְגָמַיָא הָאִלֵין הֲלָא עַל גַבְרַיָא דְיַתְבִין עַל שׁוּרָא לְמֵיכַל יַת מַפְקַתְהוֹן וּלְמִשְׁתֵּי יַת מֵימֵי רִגְלֵיהוֹן בִּצְיָרָא עִמְכוֹן: ^is-36-12

**13** וְקָם רַבְשָׁקֵה וְאַכְלֵי בְקַל רַב יְהוּדִית וַאֲמַר שְׁמָעוּ יַת פִּתְגָמָא מַלְכָּא דְרַבְּתָנָא מַלְכָּא דְאַתּוּר: ^is-36-13

**14** כִּדְנַן אֲמַר מַלְכָּא לָא יִטְעֵי לְכוֹן חִזְקִיָה אֲרֵי לָא יִכוּל לְשֵׁיזָבָא יַתְכוֹן: ^is-36-14

**15** וְלָא יַרְחִיץ יַתְכוֹן חִזְקִיָה עַל מֵימְרָא דַייָ לְמֵימָר שֵׁיזָבָא יְשֵׁזְבָנָנָא יְיָ לָא תִּתְמְסַר קַרְתָּא הָדָא בְּיַד מַלְכָּא דְאַתּוּר: ^is-36-15

**16** לָא תְקַבְּלוּן מִן חִזְקִיָה אֲרֵי כִדְנַן אֲמַר מַלְכָּא דְאַתּוּר עַבִידוּ עִמִי שְׁלָמָא וּפוּקוּ לְוָתִי וֶאֱכוּלוּ גְבַר פֵּרֵי גוּפְנוֹהִי וּגְבַר פֵּרֵי תֵינוֹהִי וּשְׁתוּ גְבַר מֵי גוּבֵהּ: ^is-36-16

**17** עַד מֵיתָא וְאֶדְבַּר יַתְכוֹן לְאַרְעָא טָבָא כְּאַרְעָכוֹן אֲרַע עִבּוּר וַחֲמַר אֲרַע חֶקְלִין וְכַרְמִין: ^is-36-17

**18** דִלְמָא יַטְעֵי יַתְכוֹן חִזְקִיָה לְמֵימָר יְיָ יְשֵׁזְבָנָנָא הֲשֵׁיזְבָא דַחֲלַת עַמְמַיָא גְבַר יַת אַרְעֵהּ מִיַד מַלְכָּא דְאַתּוּר: ^is-36-18

**19** אָן דַחֲלַת חֲמָת וְאַרְפָּד אָן דַחֲלַת סְפַרְוָיִם וַאֲרֵי שֵׁיזָבוּ יַת שֹׁמְרוֹן מִן יְדִי: ^is-36-19

**20** מַן בְּכָל דַחֲלַת מְדִינָתָא הָאִלֵין דְשֵׁיזָבוּ יַת אַרְעֲהוֹן מִן יְדִי אֲרֵי יְשֵׁיזִיב יְיָ יַת יְרוּשְׁלֵם מִן יְדִי: ^is-36-20

**21** וּשְׁתִיקוּ וְלָא אָתִיבוּ יָתֵהּ פִּתְגָמָא אֲרֵי תַפְקִידַת מַלְכָּא הִיא לְמֵימָר לָא תֵתִיבוּנֵהּ: ^is-36-21

**22** וַאֲתָא אֶלְיָקִים בַּר חִלְקִיָה דִי מְמַנָא עַל בֵיתָא וְשֶׁבְנָא סַפְרָא וְיוֹאָח בַּר אָסָף דִי מְמַנָא עַל דָכְרָנַיָא לְוַת חִזְקִיָה כַּד מְבַזְעִין לְבוּשֵׁיהוֹן וְחַוִיאוּ לֵיהּ יַת פִּתְגָמֵי רַבְשָׁקֵה: ^is-36-22

## Capítulo 37

**1** וַהֲוָה כַּד שְׁמַע מַלְכָּא חִזְקִיָהוּ בְזַע יַת לְבוּשׁוֹהִי וְאִתְכַּסֵי בְּסַקָא וְעַל לְבֵית מַקְדְשָׁא דַיָי: ^is-37-1

**2** וּשְׁלַח יַת אֶלְיָקִים דִי מְמַנָא עַל בֵּיתָא וְיַת שֶׁבְנָא סַפְרָא וְיַת סָבֵי כַּהֲנַיָא כַּד מְכַסָן סַקְיָא לְוַת יְשַׁעְיָהוּ בַּר אָמוֹץ נְבִיָא: ^is-37-2

**3** וְאָמְרוּ לֵיהּ כִּדְנַן אֲמַר חִזְקִיָה יוֹם עָקָא וְחִיסוּדִין וְנִיאוּצָא יוֹמָא הָדֵין אֲרֵי אֲקֵיפְתָּנָא עָקָא כְּאִתָּא דְיָתְבָא עַל מַתְבְּרָא וְחֵיל לֵית לָהּ לְמֵילַד: ^is-37-3

**4** מָאִים שְׁמִיעַ קֳדָם יְיָ אֱלָהָךְ יַת פִּתְגָמֵי רַבְשָׁקֵה דְשַׁלְחֵהּ מַלְכָּא דְאַתּוּר רִבּוֹנֵהּ לְחַסָדָא עַמָא דַייָ קְיָמָא וְיַעְבֵּיד פּוּרְעֲנוּתָא עַל כָּל פִּתְגָמַיָא דְשָׁמְעִין קֳדָם אֱלָהָךְ וְתִתְחַנֵן בִּצְלוֹ עַל שְׁאָרָא דְאִשְׁתְּאַר: ^is-37-4

**5** וַאֲתוֹ עַבְדֵי מַלְכָּא חִזְקִיָה לְוַת יְשַׁעְיָה: ^is-37-5

**6** וַאֲמַר לְהוֹן יְשַׁעְיָה כְּדֵין תֵּימְרוּן לְרִיבּוֹנְכוֹן כִּדְנַן אֲמַר יְיָ לָא תִדְחַל מִן קֳדָם פִּתְגָמַיָא דִי שְׁמַעְתָּא דְחַסְדוּ עוּלֵימֵי מַלְכָּא דְאַתּוּר קֳדָמָי: ^is-37-6

**7** הָא אֲנָא יָהֵיב בֵיהּ רוּחָא וְיִשְׁמַע בְּשׂוֹרָא וִיתוּב לְאַרְעֵהּ וְאִפְלִינֵהּ בְּחַרְבָּא בְּאַרְעֵהּ: ^is-37-7

**8** וְתַב רַבְשָׁקֵה וְאַשְׁכַּח יַת מַלְכָּא דְאַתּוּר מֵגִיחַ קְרָבָא עַל לִבְנָה אֲרֵי שְׁמַע אֲרֵי נְטַל מִלָכִישׁ: ^is-37-8

**9** וּשְׁמַע עַל תִּרְהָקָה מַלְכָּא דְכוּשׁ לְמֵימָר נְפַק לְאַגָחָא קְרָבָא עִמָךְ וּשְׁמָע וּשְׁלַח אִזְגַדִין לְוַת חִזְקִיָה לְמֵימָר: ^is-37-9

**10** כְּדֵין תֵּימְרוּן לְחִזְקִיָהוּ מְלַךְ שִׁבְטָא דְבֵית יְהוּדָה לְמֵימָר לָא יַטְעִינָךְ אֱלָהָךְ דִי אַתְּ רָחֵיץ בֵּיהּ לְמֵימָר לָא תִתְמְסַר יְרוּשְׁלֵם בְּיַד מַלְכָּא דְאַתּוּר: ^is-37-10

**11** הָא אַתְּ שְׁמַעְתָּא דַעֲבָדוּ מַלְכֵי אַתּוּר לְכָל מְדִינָתָא לְגַמָרוּתְהוֹן וְאַתְּ מְדַמֵי לְאִשְׁתֵּיזָבָא: ^is-37-11

**12** הֲשֵׁיזָבָא יַתְהוֹן דַחֲלַת עַמְמַיָא דְחַבִּילוּ אֲבָהָתִי יַת גוֹזָן וְיַת חָרָן וְרֶצֶף וּבְנֵי עֶדֶן דְבִתְלַשָׂר: ^is-37-12

**13** אָן מַלְכָּא דַחֲמָת וּמַלְכָּא דְאַרְפָּד וּמַלְכָּא דִלְקַרְתָּא סְפַרְוָיִם הֲלָא טַלְטְלִינוּן וְאַגְלִיאִינוּן: ^is-37-13

**14** וּנְסִיב חִזְקִיָה יַת אִגַרְתָּא מִיַד אִזְגַדַיָא וּקְרָא חֲדָא מִנְהוֹן וּסְלִיק לְבֵית מַקְדְשָׁא דַייָ וּפַרְסֵהּ חִזְקִיָה קֳדָם יְיָ: ^is-37-14

**15** וְצַלִי חִזְקִיָה קֳדָם יְיָ לְמֵימָר: ^is-37-15

**16** יְיָ אֱלָהָא צְבָאוֹת אֱלָהָא דְיִשְׂרָאֵל דִשְׁכִינְתֵּהּ שַׁרְיָא עֵיל מִן כְּרוּבַיָא אַתָּה הוּא יְיָ וְלֵית בַּר מִנָךְ לְכָל מַלְכְּוַת אַרְעָא אַתְּ עֲבַדְתָּ יַת שְׁמַיָא וְיַת אַרְעָא: ^is-37-16

**17** גְלֵי קֳדָמָךְ יְיָ וְדוּן וּשְׁמִיעַ קֳדָמָךְ יְיָ וְאִתְפְּרַע וַעֲבֵיד פּוּרְעַן עַל כָּל פִּתְגָמֵי סַנְחֵרִיב דִשְׁלַח לְחַסָדָא עַמָא דַייָ קְיָמָא: ^is-37-17

**18** בְּקוּשְׁטָא יְיָ אַחְרִיבוּ מַלְכֵי אַתּוּר יַת כָּל מְדִינָתָא וְיַת אַרְעֲהוֹן: ^is-37-18

**19** וּמוֹקְדִין יַת טַעֲוַתְהוֹן בְּנוּרָא אֲרֵי לָא טַעֲוָן דְאִית בְּהוֹן צְרוֹךְ אִינוּן אֱלָהֵין עוֹבַד יְדֵי אֱנָשָׁא אָעָא וְאַבְנָא וְאַבְּדוּנוּן: ^is-37-19

**20** וּכְעַן יְיָ אֱלָהָנָא פְּרוּקְנָא מִן יְדֵהּ וְיֵדְעוּן כָּל מַלְכְּוַת אַרְעָא אֲרֵי אַתְּ יְיָ לֵית בַּר מִנָךְ: ^is-37-20

**21** וּשְׁלַח יְשַׁעְיָה בַּר אָמוֹץ לְוַת חִזְקִיָה לְמֵימָר כִּדְנַן אֲמַר יְיָ אֱלָהָא דְיִשְׂרָאֵל דִבְעֵיתָא מִן קֳדָמַי עַל סַנְחֵרִיב מַלְכָּא דְאַתּוּר: ^is-37-21

**22** דֵין פִּתְגָמָא דִי מַלֵיל יְיָ עֲלוֹהִי מְבַסְרָא עֲלָךְ מְמִיקָא עֲלָךְ מַלְכוּת כְּנִשְׁתָּא דְצִיוֹן בַּתְרָךְ רֵישֵׁיהוֹן מְנִידִין עַמָא דְבִירוּשְׁלֵם: ^is-37-22

**23** יַת מַן חַסַדְתָּא וְיַת מַן אִתְרָחַבְתָּא וְקָדָם מַן אֲרֵימָתָא קָלָא וּזְקֵפְתָּא לְרוּמָא עֵינָךְ וַאֲמַרְתָּא מִלִין דְלָא כַּשְׁרִין קֳדָם קַדִישָׁא דְיִשְׂרָאֵל: ^is-37-23

**24** בְּיַד עַבְדָךְ חִסַדְתָּ עַמָא דַייָ וַאֲמַרְתָּ בִּסְגִיאוּת רְתִיכֵי אֲנָא סַלְקֵית לִתְקוֹף כְּרַכֵּיהוֹן וְאַף אֵיחוּד בֵּית מַקְדַשֵׁהוֹן וְאֶקְטוֹל שְׁפַר גִבָּרֵיהוֹן מִבְחַר שִׁלְטוֹנֵיהוֹן וְאֶכְבּוֹשׁ קִרְיַת תּוּקְפֵיהוֹן וֶאֱשֵׁיצֵי סַגִי מַשִׁרְיָתֵהוֹן: ^is-37-24

**25** אֲנָא הֲוֵיתִי חָפֵיר גוּבִין וְשָׁתֵי מַיָן וּטְפָחֵית בְּפַרְסַת רִגְלֵי עַמָא דְעִמִי כָּל מֵי נַהֲרִין עֲמִיקִין: ^is-37-25

**26** הֲלָא שְׁמַעְתָּא מִלְקַדְמִין מָא עֲבָדִית לְפַרְעֹה מַלְכָּא דְמִצְרַיִם וְאַף עֲלָךְ אִתְנַבִּיאוּ נְבִיֵי יִשְׂרָאֵל וְלָא תַבְתָּא וְדָא חַזְיָא קֳדָמַי מִיוֹמֵי קֳדָם לְמֶעְבַּד לָךְ וְאַף אַתְקֵנְתָּא כְּעַן אַיְתֵיתָה וְדָא הֲוָת לָךְ לְתַקָלָא עַל דַהֲוָאָה קֳדָמָךְ כְּאִתְרְגוּשַׁת גַלִין דִשְׁחוֹ קִרְוִין כְּרִיכָן: ^is-37-26

**27** וְיָתְבֵיהוֹן אִתְקַצֵר חֵילֵיהוֹן אִתְבָּרוּ וּבְהִיתוּ הֲווֹ כְּעֵשֶׂב חַקְלַיָא וִירוֹק דִתְאָה כְּעֵשֶׂב אִגָרַיָא דִשְׁלוֹק עַד לָא מָטֵא לְמֶהֱוֵי שׁוּבְּלִין: ^is-37-27

**28** וּמַתְבָךְ בְעֵיצָה וּמַקְפָךְ לְבָרָא לְאַגָחָא קְרָבָא וּמֵיתְיָךְ לְאַרְעָא דְיִשְׂרָאֵל גְלֵי קֳדָמַי וְיַת דְאַרְגֵיזְתָּא קֳדָמַי גְלֵי: ^is-37-28

**29** חֲלַף דְאַרְגֵזְתָּא עַל מֵימְרִי וְאִתְרְגוּשְׁתָּךְ סְלִיקַת לִקֳדָמָי וַאֲשַׁוֵי שֵׁירִין בְּלִיסָתָךְ וּזְמַם בְּסִפְוָתָךְ וַאֲתֵיבִנָךְ בְּאוֹרְחָא דַאֲתֵיתָא בָהּ: ^is-37-29

**30** וְדֵין לָךְ אָתָא אֲכוֹל בְּשַׁתָּא הָדָא כַּתִּין וּבְשַׁתָּא תִּנְיֵתָא כַּתְכַּתִּין וּבְשַׁתָּא תְּלִיתָאָה זִרְעוּ וַחֲצוֹדוּ וְצוּבוּ כַרְמִין וֶאֱכוּלוּ אִבְּהֶן: ^is-37-30

**31** וְיָסְפוּן מְשֵׁזְבַיָא דְבֵית יְהוּדָה דְאִשְׁתָּאֲרוּן כְּאִילָן דִמְשַׁלַח שׁוֹרְשׁוֹהִי מִלְרַע וּמֵרִים נוֹפֵהּ לְעֵילָא: ^is-37-31

**32** אֲרֵי מִירוּשְׁלֵם יִפְקוּן שְׁאָר צַדִיקַיָא וְשֵׁיזְבַת מְקִימֵי אוֹרַיְתָא מִטוּרָא דְצִיוֹן בְּמֵימְרָא דַייָ צְבָאוֹת תִּתְעֲבֵיד דָא: ^is-37-32

**33** בְּכֵן כִּדְנָן אֲמַר יְיָ עַל מַלְכָּא דְאַתּוּר לָא יֵעוּל לְקַרְתָּא הָדָא וְלָא יַקְשֵׁית תַּמָן נִיר וְלָא יְקַדְמִינֵהּ בִּתְרֵיסִין וְלָא יִצְבּוֹר עֲלָה מִלֵיתָא: ^is-37-33

**34** בְּאוֹרְחָא דַאֲתָא בָה יְתוּב וּלְקַרְתָּא הָדָא לָא יֵעוּל אֲמַר יְיָ: ^is-37-34

**35** וְאַגֵין עַל קַרְתָּא הָדָא לְמִפְרְקָהּ בְּדִיל מֵימְרִי וּבְדִיל דָוִד עַבְדִי: ^is-37-35

**36** וּנְפַק מַלְאָכָא דַייָ וּקְטַל בְּמַשְׁרִית אַתּוּרָאָה מְאָה וְתַמְנָן וְחַמְשָׁא אַלְפִין וְאַקְדִימוּ בְצַפְרָא וְהָא כוּלְהוֹן פִּגְרִין מֵתִין: ^is-37-36

**37** וּנְטַל וַאֲזַל וְתַב סַנְחֵרִיב מַלְכָּא דְאַתּוּר וִיתֵיב בְּנִינְוֵה: ^is-37-37

**38** וַהֲוָה הוּא סָגִיד בֵּית נִסְרוֹךְ טַעֲוָתֵהּ וְאַדַרְמֶלֶךְ וְשַׁרְאֶצַר בְנוֹהִי קַטְלוֹהִי בְּחַרְבָּא וְאִינוּן אִשְׁתֵּזֵבוּ לְאַרְעָא קַרְדוּ וּמְלַךְ אַסַרְחַדוֹן בְּרֵיהּ תְּחוֹתוֹהִי: ^is-37-38

## Capítulo 38

**1** בְּיוֹמַיָא הָאִנוּן מָרַע חִזְקִיָה לִמְמָת וַאֲתָא לְוָתֵהּ יְשַׁעְיָהוּ בַר אָמוֹץ נְבִיָא וַאֲמַר לֵיהּ כִדְנַן אֲמַר יְיָ פַּקֵד עַל אֱנַשׁ בֵּיתָךְ אֲרֵי מָאִת אַתְּ וְלָא תֵיהֵי מִמַרְעָךְ: ^is-38-1

**2** וְאַסְחַר חִזְקִיָהוּ אַפּוֹהִי לְכוֹתֵל בֵּית מַקְדְשָׁא וְצַלִי קֳדָם יְיָ: ^is-38-2

**3** וַאֲמַר קַבֵּל בָּעוּתִי יְיָ אִדְכַּר כְּעַן יַת דִי פְלָחִית קֳדָמָךְ בִּקְשׁוֹט וּבְלֵב שָׁלֵם וּדְתַקִין בְּעֵינָךְ עַבְדִית וּבְכָא חִזְקִיָה בְּכִיא סַגִיאָה: ^is-38-3

**4** וַהֲוָה פִתְגָמֵי נְבוּאָה מִן קֳדָם יְיָ עִם יְשַׁעְיָה לְמֵימָר: ^is-38-4

**5** אֱזֵיל וְתֵימַר לְחִזְקִיָה כִּדְנַן אֲמַר יְיָ אֱלָהֵיהּ דְדָוִד אָבוּךְ שְׁמִיעַ קֳדָמַי צְלוֹתָךְ גַלְיָא קֳדָמַי דִמְעֲתָךְ הָא אֲנָא מוֹסִיף עַל יוֹמָךְ חֲמֵשׁ עַסְרֵי שְׁנִין: ^is-38-5

**6** וּמִיַד מַלְכָּא דְאַתּוּר אֲשֵׁיזְבִינָךְ וְיַת קַרְתָּא הָדָא וְאַגִין עַל קַרְתָּא הָדָא: ^is-38-6

**7** וְדֵין לָךְ אָתָא מִן קֳדָם יְיָ דְיַעְבֵּיד יְיָ יַת פִּתְגָמָא הָדֵין דִי מַלֵיל: ^is-38-7

**8** הָא אֲנָא מֵתִיב יַת טוּל אֶבֶן שְׁעַיָא דְנָחְתַת בְּמַסְקָנָא דְאָחָז שִׁמְשָׁא לַאֲחוֹרוֹהִי עֲסַר שְׁעָן וְתַב שִׁמְשָׁא עֲסַר שְׁעָן בְּצוּרַת אֶבֶן שְׁעַיָא דְנָחֲתַת: ^is-38-8

**9** כְּתַב אוֹדָאָה עַל נִיסָא דְאִתְעַבֵיד לְחִזְקִיָה מְלַךְ שִׁבְטָא דְבֵית יְהוּדָה כַּד מְרַע וְאִתְּסֵי מִמַרְעֵהּ: ^is-38-9

**10** אֲנָא אֲמָרֵית בִּדְוָן יוֹמֵי אֱהַךְ בְּתַרְעֵי שְׁאוֹל עַל דָכְרָנִי לְטַב אִתּוֹסַף עַל שְׁנָי: ^is-38-10

**11** אֲמָרֵית לָא אִתְחַזֵי עוֹד קֳדָם דְחֵילָא דַייָ בְּאַרְעָא בֵית שְׁכִינְתֵּהּ דִי בָה אֲרִיכוּת חַיָא וְלָא אֶפְלַח קֳדָמוֹהִי עוֹד בְּבֵית מַקְדְשָׁא דְמִתַּמָן עֲתִיד לְמִפַּק חֶדְוָא לְכָל יַתְבֵי אַרְעָא מִלְמֵידַר בִּירוּשְׁלֵם קַרְתָּא דְקוּדְשָׁא מְדוֹרֵי פְּסָק: ^is-38-11

**12** מִבְּנֵי דָרִי אִתְנְטִילוּ יוֹמֵי אִתְקַצִיצוּ וּגְלוּ מִנִי אִתְכְּפִילוּ כְּמַשְׁכְּנָא דְרָעֵי אִתְקְפָדוּ כְּנַחַל נַדְדָאִין חַיַי מִיקָר מַלְכוּתִי אֲנָא גָּלֵי יְמָמָא וְלֵילְוָתִי שְׁלִימוּ: ^is-38-12

**13** נַהֲמִית עַד צַפְרָא כְּאַרְיָא דְנָהֵים וְתָבַר גַרְמַי חֵיוָתָא כֵּן מִתַּבְּרִין מִן קֳדָם דְוָנָא כָּל גַרְמֵי יְמָמַי וְלֵילְוָתִי שְׁלִימוּ: ^is-38-13

**14** כְּסוּסְיָא דַאֲחִיד וּמְנַצֵיף כֵּן נְצֵיפַת וְנַהֲמֵית כְּיוֹנָה זְקָפִית עֵינַי דְיֵיתֵי לִי רְוַח מִן קֳדָם דִשְׁכִינְתֵּהּ בִשְׁמֵי מְרוֹמָא יְיָ קַבֵּיל צְלוֹתִי עֲבֵיד בָּעוּתִי: ^is-38-14

**15** מָה אֲמַלֵיל תּוּשְׁבַּחְתָּא וְאֵימַר קֳדָמוֹהִי וְהוּא אַסְגֵי טַבְוָן לְמֶעְבַּד עִמִי מָה אֶפְלַח וַאֲשַׁלֵים קֳדָמוֹהִי כָּל שְׁנַיָא דְאוֹסִיף עַל חַיַי וְשֵׁיזֵיב מִמְרִיר נַפְשִׁי: ^is-38-15

**16** יְיָ עַל כָּל מֵיתַיָא אֲמַרְתָּא לְאַחָיָאָה וּקְדָם כּוּלְהוֹן אַחְיֵיתָא רוּחִי וְאַחְיֵיתָנִי וְקַיֵימְתָּנִי: ^is-38-16

**17** הָא לְעָבְדֵי אוֹרַיְתָא סַגִי שְׁלָמָא קָדָמָךְ וְאַתְּ מַיְיתֵי מְרִירָא לְרַשִׁיעַיָא בְּכֵן כַּד יְדָעִית יוֹם מוֹתִי שְׁפָכִית דִמְעֲתִי בִּצְלוֹ קֳדָמָךְ מַר לִי סַגִי וְאַתְּ אִתְרְעֵיתָא בְּחַיֵי בְּדִיל דְלָא לְחַבָּלָא נַפְשִׁי אֲרֵי אַרְחֵיקְתָּא מִן קֳדָמָךְ כָּל חֲטָאָי: ^is-38-17

**18** אֲרֵי לָא דְבִשְׁאוֹל מוֹדַן קֳדָמָךְ מֵיתַיָא לָא מְשַׁבְּחִין לָךְ לָא מְסַבְּרִין נַחְתֵי גוּב בֵּית אָבְדָנָא לְפוּרְקָנָךְ: ^is-38-18

**19** דְחַי חַי יוֹדֵי קֳדָמָךְ כְּוָתִי יוֹמָא הָדֵין אֲבָהָן לִבְנֵיהוֹן יְחַווּן גְבוּרְתֵּיךְ וְיוֹדוּן לְמֵימָר דְכָל אִילֵין קְשׁוֹט: ^is-38-19

**20** יְיָ לְמִפְרְקָנָא אֲמַר יְיָ וְנִגוּן תּוּשְׁבַּחְתֵּהּ נְנַגֵן כָּל יְמֵי חַיָנָא עַל בֵּית מַקְדְשָׁא דַיָי: ^is-38-20

**21** וַאֲמַר יְשַׁעְיָהוּ יִסְבוּן דְבֵילַת תֵּינִין וִישׁוֹרְטוּן עַל שִׁיחֲנָא וְאִתַּסֵי: ^is-38-21

**22** וַאֲמַר חִזְקִיָה מָה אָת אֲרֵי אֶסַק לְבֵית מַקְדְשָׁא דַיָי: ^is-38-22

## Capítulo 39

**1** בְּעִידָנָא הַהִיא שְׁלַח מְרוֹדַךְ בַּלְאֲדָן בַּר בַּלְאֲדָן מַלְכָּא דְבָבֶל אִיגְרִין וְקוּרְבְּנִין לְוַת חִזְקִיָה כַּד שְׁמַע אֲרֵי מְרַע וְאִתַּסֵי: ^is-39-1

**2** וַחֲדֵי עֲלֵיהוֹן חִזְקִיָה וְאַחְזִנוּן יַת בֵּית גִנְזוֹהִי יַת כַּסְפָּא וְיַת דַהֲבָא וְיַת בּוּסְמָנָא וְיַת מִשְׁחָא טָבָא וְיַת כָּל בֵּית מְנוֹהִי וְיַת כָּל דְאִישְׁתַּכַח בְּגִנְזוֹהִי לָא הֲוָה מִדַעַם דְלָא אַחֲזִינוּן חִזְקִיָהוּ בְּבֵיתֵהּ וּבְכָל שׁוּלְטָנֵהּ: ^is-39-2

**3** וַאֲתָא יְשַׁעְיָה נְבִיָא לְוַת מַלְכָּא חִזְקִיָה וַאֲמַר לֵיהּ מָה אֲמָרוּ גַבְרַיָא הָאִלֵן וּמְנַן אֲתוֹ לְוָתָךְ וַאֲמַר חִזְקִיָה מֵאַרְעָא רְחִיקָא אֲתוֹ לְוָתִי מִבָּבֶל: ^is-39-3

**4** וַאֲמַר מָה חֲזוֹ בְּבֵיתָךְ וַאֲמַר חִזְקִיָה יַת כָּל דִי בְּבֵיתִי חֲזוֹ לָא הֲוָה מִדָעַם דְלָא אַחְזִיתִינוּן בְּגִנְזָי: ^is-39-4

**5** וַאֲמַר יְשַׁעְיָה לְחִזְקִיָה קַבֵּיל פִּתְגָמָא דַייָ צְבָאוֹת: ^is-39-5

**6** הָא יוֹמַיָא אָתָן וְיִתְנַטֵיל כָּל דִי בְּבֵיתָךְ וְדִי גְנָזוּ אֲבָהָתָךְ עַד יוֹמָא הָדֵין וְיִתּוֹבַל לְבָבֶל לָא יִשְׁתָּאַר מִדַעַם אֲמַר יְיָ: ^is-39-6

**7** וּמִבְּנָךְ דְיִפְקוּן מִנָךְ דְתוֹלִיד יַדְבְּרוּן וִיהוֹן רַבְרְבִין בְּהֵיכָלָא מַלְכָּא דְבָבֶל: ^is-39-7

**8** וַאֲמַר חִזְקִיָה לִישַׁעְיָה תַּקִין פִּתְגָמָא דַייָ דְמַלֵילְתָּא וַאֲמַר אֲרֵי יְהֵי שְׁלַם וּקְשׁוֹט בְּיוֹמָי: ^is-39-8

## Capítulo 40

**1** נְבִיַיָא אִתְנַבִּיאוּ תַנְחוּמִין עַל עַמִי אֲמַר אֱלָהָכוֹן: ^is-40-1

**2** מַלִילוּ עַל לִבָּא דִירוּשְׁלֵם וְאִתְנַבּוּ עֲלָהּ אֲרֵי עֲתִידָא דְתִתְמְלֵי מֵעַם גַלְוָתָהָא אֲרֵי אִישְׁתְּבִיקוּ לָהּ חוֹבָהָא אֲרֵי קַבִּילַת כָּס תַּנְחוּמִין מִן קֳדָם יְיָ כְּאִלוּ לָקַת עַל חַד תְּרֵין בְּכָל חַטָאתָהָא: ^is-40-2

**3** קַל דְמַכְלֵי בְּמַדְבְּרָא פַּנוּ אוֹרַח מִן קֳדָם עַמָא דַייָ כְּבִישָׁא בְּמֵישְׁרָא כִּבְשִׁין קֳדָם כְּנִשְׁתָּא דֶאֱלָהָנָא: ^is-40-3

**4** כָּל חֵילַיָא יְרָאמוּן וְכָל טוּר וְרָמָא יִמְאֲכוּן וִיהֵי כִפְלָא לְמֵישְׁרָא וּבֵית גִדוּדִין לְבִקְעָה: ^is-40-4

**5** וְיִתְגְלֵי יְקָרָא דַייָ וְיֶחֱזוּן כָּל בְּנֵי בִשְׂרָא כַּחֲדָא אֲרֵי בְמֵימְרָא דַייָ גְזַר כֵּן: ^is-40-5

**6** קַל דַאֲמַר אִתְנַבֵּי וּמְתֵיב וַאֲמַר מָה אִתְנַבֵּי כָּל רַשִׁיעַיָא כְּעִשְׂבָּא וְכָל תּוּקְפְהוֹן כְּמוֹצָא דְחַקְלָא: ^is-40-6

**7** יָבֵשׁ עִשְׂבָּא נְתַר נִצֵיהּ אֲרֵי רוּחָא מִן קֳדָם יְיָ נְשָׁבַת בֵּיהּ בְּכֵן כְּעִשְׂבָּא חֲשִׁיבִין רַשִׁיעַיָא בְּעַמָא: ^is-40-7

**8** מִית רַשִׁיעַיָא אֲבָדוּ עֶשְׁתּוֹנוֹהִי וּפִּתְגָמָא דְאֶלָהָנָא קַיָם לְעָלְמִין: ^is-40-8

**9** עַל טוּר רָם סַקוּ לְכוֹן נְבִיַיָא דִי מְבַשְׂרִין לְצִיוֹן אֲרִימוּ בְחֵילָא קָלְכוֹן דִי מְבַשְׂרִין לִירוּשְׁלֵם אֲרִימוּ לָא תִדְחֲלוּן אֲמָרוּ לְקִרְוַיָא דְבֵית יְהוּדָה אִתְגְלִיאַת מַלְכוּתָא דֶאֱלָהָכוֹן: ^is-40-9

**10** הָא יְיָ אֱלֹהִים בִּתְקוֹף מִתְגְלֵי וּתְקוֹף דְרַע גְבוּרְתֵּהּ שַׁלְטָא קֳדָמוֹהִי הָא אֲגַר עָבְדֵי מֵימְרֵהּ עִמֵהּ דְכָל עוֹבָדֵיהוֹן גְלַן קֳדָמוֹהִי: ^is-40-10

**11** כְּרָעַיָא דְעֶדְרֵהּ רָעֵי בְּדַרְעֵהּ מַכְנַשׁ אִמְרִין וּבְחֵינֵהּ מְסוֹבַר רַכִּיכִין מֵינִיקָתָא בְּנִיחַ מְדַבָּר: ^is-40-11

**12** מַן אֲמַר אִלֵין קַיָם אֲמַר וַעֲבֵד דְכָל מֵי עַלְמָא חֲשִׁיבִין קֳדָמוֹהִי כְּטִפָּא בִשְׁעוֹלָא וּמִשְׁחַת שְׁמַיָא כְּאִלוּ בְּזֵירְתָא מְתַקְנִין וְעַפְרָא דְאַרְעָא כְּאִלוּ בִּמְכִילָא אִתְכַּל וְטוּרַיָא כְּאִלוּ מַתְקַל תַּקִילִין וְרָמָתָא כַּד בְּמוֹזְנַיָא: ^is-40-12

**13** מַן תַּקִין יַת רוּחַ קוּדְשָׁא בְּפוּם כָּל נְבִיַיָא הֲלָא יְיָ וְצַדִיקַיָא עָבְדֵי מֵימְרֵהּ פִּתְגָמֵי רְעוּתֵהּ הוֹדְעִינוּן: ^is-40-13

**14** לְהוֹן דִבְעוֹן מִן קֳדָמוֹהִי אֲסַבַּר חוּכְמָא וְאַלְפִינוּן אוֹרַח דְדִין וִיהַב לִבְנֵיהוֹן אוֹרַיְתָא וְאוֹרַח דְסוּכְלְתָנוּ לִבְנֵי בְנֵיהוֹן הוֹדְעִינוּן: ^is-40-14

**15** הָא עַמְמַיָא כְּטִפָּא מִדוּל וּכְעִיוּל מוֹזְנַיָא חֲשִׁיבִין הָא נַגְוָתָא כְּדוֹקָא דְפָרַח: ^is-40-15

**16** וְאִילָנֵי לִבְנָן לָא יְסַפְקוּן לְאַדְלָקָא וְחֵיוָתָא דְבָהּ לֵית הִיא כְּמִיסַת לַעֲלָתָא: ^is-40-16

**17** כָּל עַמְמַיָא כִּלְמָא עוֹבָדֵיהוֹן גְמִירָא וְשֵׁיצָאָה אִינוּן חֲשִׁיבִין קֳדָמוֹהִי: ^is-40-17

**18** וּלְמַן אַתּוּן מְדַמִין קֳדָם אֵל וּמַה דְמוּת אַתּוּן מְסַדְרִין קֳדָמוֹהִי: ^is-40-18

**19** הָא צִלְמָא נַגְרָא עֲבֵיד וְקֵינָאָה בִּדְהַב מְחַפֵּי לֵיהּ וְשַׁלְשְׁלַן דִכְסַף קֵינָאָה מְאָחֵיד לֵיהּ: ^is-40-19

**20** אוֹרָן בָּרֵי אָעָא דְלָא אָחִיד בֵּיהּ רִקְבָא בָּחַר נַגַר אוּמַן בְּעֵי לֵיהּ לְאַתְקָנָא צְלַם דְלָא יִצְטְלֵי: ^is-40-20

**21** הֲלָא יְדַעְתּוּן הֲלָא שְׁמַעְתּוּן הֲלָא אִיתְחַוָאָה מִן אַוְלָא עוֹבַד סִדְרֵי בְרֵאשִׁית לְכוֹן הֲלָא תִּסְתַּכְּלוּן לְמִדְחַל קֳדָם מִן דִבְרָא יְסוֹדֵי אַרְעָא: ^is-40-21

**22** דְאַשְׁרֵי בִּתְקוֹף רוּמָא שְׁכִינַת יְקָרֵהּ וְכָל יַתְבֵי אַרְעָא חֲשִׁיבִין קֳדָמוֹהִי כְּקַמְצִין דְמָתַח כִּזְעֵיר שְׁמַיָא וּפַרְסִינוּן כְּמַשְׁכַּן יְקָרָא לְבֵית שְׁכִינְתָּא: ^is-40-22

**23** דִמְסַר שִׁלְטוֹנִין לְחוּלְשָׁא דַיָנֵי אַרְעָא כִּלְמָא עֲבֵיד: ^is-40-23

**24** אֲפִילוּ יִפְשׁוּן אֲפִילוּ יִסְגוּן אֲפִילוּ יִתְרַבּוּן בְּאַרְעָא בְנֵיהוֹן וְאַף רוּגְזֵהּ יְשַׁלַח בְּהוֹן וְיִבְהֲתוּן וּמֵימְרֵהּ כְּעַלְעֵילָא לְקַשָׁא יְדַבֵּר יַתְהוֹן: ^is-40-24

**25** וּלְמַן תְּדַמוּן קֳדָמַי וּתְשַׁווֹן יֵימַר קַדִישָׁא: ^is-40-25

**26** זְקוּפוּ לְרוּמָא עֵינֵיכוֹן וַחֲזוּ לְמִדְחַל קֳדָם מַן דִבְרָא אִלֵין דְאַפֵּיק בְּמִנְיָן חֵילֵי שְׁמַיָא לְכוּלְהוֹן בְּשִׁמְהָן קָרֵי מַסְגֵי גְבוּרָן וּתְקוֹף חֵיל חַד מִסִדְרֵהּ לָא מִתְעַכָּב: ^is-40-26

**27** לְמָה תֵימַר יַעֲקֹב וּתְמַלֵיל יִשְׂרָאֵל מְטַמְרָא אוֹרְחִי מִן קֳדָם יְיָ וּמִן קֳדָם אֱלָהִי דִינִי יְעָדֵי: ^is-40-27

**28** הֲלָא יְדַעְתָּא אִם לָא שְׁמַעְתָּא אֱלָהָא עַלְמָא יְיָ דִי בְרָא יְסוֹדֵי אַרְעָא לָא בַעֲמַל וְלָא בְלֵיאוּ לֵית סוֹף לְסוּכְלְתָנוּתֵיהּ: ^is-40-28

**29** דִיהַב לְצַדִיקַיָא דִמְשַׁלְהַן לְפִתְגָמֵי אוֹרַיְתָא חוּכְמָא וּדְלֵית לְהוֹן תְּקוֹף נִכְסִין מַסְגֵי: ^is-40-29

**30** וְיִשְׁתַּלְהוּן עוּלֵימִין חַיָבִין וְיִלְאוּן וּרְוָקֵי רַשִׁיעַיָא אִיתְּקָלָא יִתְקְלוּן: ^is-40-30

**31** וּדְסַבָּרוּ לְפוּרְקָנָא דַייָ יִתְכַּנְשׁוּן מִבֵּינֵי גָלוּתְהוֹן וְיוֹסְפוּן חֵיל וְיִתְחַדְתּוּן לְעוּלֵימַתְהוֹן כְּצִימוּחַ דְסָלֵיק עַל גַדְפֵי נִשְׁרִין יְרַהֲטוּן וְלָא יִלְאוּן יַהֲכוּן וְלָא יִשְׁתַּלְהוּן: ^is-40-31

## Capítulo 41

**1** אֲצִיתוּ לְמֵימְרִי נַגְוָן וּמַלְכְּוָן יוֹסְפוּן חֵיל יִתְקָרְבוּן בְּכֵן יְמַלְלוּן כַּחֲדָא לְדִינָא נִתְקְרָב: ^is-41-1

**2** מַן אַיְתֵי בִגְלַאי מִמַדִינְחָא אַבְרָהָם בְּחִיר צַדִיקַיָא בִּקְשׁוֹט קַרְבֵהּ לְאַתְרֵהּ מְסַר קֳדָמוֹהִי עַמְמִין וּמַלְכִין תַּקִיפִין תְּבַר רְמָא כְּעַפְרָא קָטוֹלִין קֳדָם חַרְבֵּהּ כְּקַשָׁא רְדוֹפִין קֳדָם קַשְׁתֵּהּ: ^is-41-2

**3** רְדָפִינוּן עֲדָא שְׁלָם חַיָלַת אוֹרַח בְּרִגְלוֹהִי לָא עֲלָת: ^is-41-3

**4** מַן אֲמַר אִלֵין קַיָם אֲמַר וַעֲבִיד וְסִדַר דָרַיָא מִלְקָדְמִין אֲנָא יְיָ בָּרֵית עַלְמָא מִבְּרֵאשִׁית אַף עַלְמֵי עָלְמַיָא דִילִי אִינוּן בַּר מִנִי לֵית אֱלָהָא: ^is-41-4

**5** חֲזוֹ נַגְוָתָא וִידַחֲלוּן דְבִסְיָפֵי אַרְעָא יְזוּעוּן יִתְקַרְבוּן וְיֵיתוּן: ^is-41-5

**6** גְבַר יַת חַבְרֵהּ יִסְעֲדוּן וְלַאֲחוֹהִי יֵימַר תַּקִיף: ^is-41-6

**7** הֲלָא יְבַהֲתוּן בְּעוֹבָדֵיהוֹן דְמַתְקֵיף נַגָרָא עִם קֵינָאָה מָחֵי בְּפַטִישָׁא עִם דִמְטַפַּח בְקוּרְנְסָא זִמְנָא אֲמַר עַל דִבְקָא תַּקִין הוּא וּמַתְקֵיף לֵיהּ בְמַסְמְרִין דְלָא יִצְטְלֵי: ^is-41-7

**8** וְאַתְּ יִשְׂרָאֵל עַבְדִי יַעֲקֹב דְאִתְרְעֵיתִי בָּךְ זַרְעֵהּ דְאַבְרָהָם רְחִימִי: ^is-41-8

**9** דְקָרֵיבְתָּךְ מִזַרְעִית אַרְעָא וּמִמַלְכְּוָתָא בְּחַרְתָּךְ וַאֲמָרֵית לָךְ עַבְדִי אַתְּ אִתְרְעֵיתִי בָּךְ וְלָא אַרְחֵקִינָךְ: ^is-41-9

**10** לָא תִדְחַל אֲרֵי בְסַעֲדָךְ מֵימְרִי לָא תִתְּבַר אֲרֵי אֲנָא אֱלָהָךְ אִתְקְפִינָךְ אַף אֶסְעַדִינָךְ אַף אַחֲדִינָךְ בִּימִין קוּשְׁטִי: ^is-41-10

**11** הָא יִבָּהֲתוּן וְיִתְכַּנְעוּן כָּל עַמְמַיָא דַהֲווֹ מִתְגָרִין בָּךְ יְהוֹן כִּלְמָא וְיֵבְדוּן אֱנָשֵׁי דִינָךְ: ^is-41-11

**12** תַּבְעִינוּן וְלָא תַשְׁכְּחִינוּן לְאַנְשֵׁי מַצוּתָךְ יְהוֹן כִּלְמָא וּכְלָא מִדָעַם גַבְרִין דַהֲווֹ מִתְגָרִין לְמֶעְבַּד עִמָךְ קְרָב: ^is-41-12

**13** אֲרֵי אֲנָא יְיָ אֱלָהָךְ מַתְקֵיף יְמִינָךְ דַאֲמָרִית לָךְ לָא תִדְחַל מֵימְרִי בְסַעֲדָךְ: ^is-41-13

**14** לָא תִדַחְלוּן שִׁבְטַיָא דְבֵית יַעֲקֹב זַרְעִיתָא דְיִשְׂרָאֵל מֵימְרִי בְסַעֲדְכוֹן אֲמַר יְיָ וּפָרִיקְכוֹן קַדִישָׁא דְיִשְׂרָאֵל: ^is-41-14

**15** הָא שַׁוִיתֵיכוֹן לְמוֹרַג תַּקִיף חֲדַת מָלֵי סִמְפּוֹרִין תְּקָטֵיל פַּלְחֵי כּוֹכְבַיָא וּתְשֵׁיצֵי וּמַלְכוּתָא כְּמוֹצָא תְשַׁוֵי: ^is-41-15

**16** תְּדִרִינוּן וְרוּחָא תִטְלוּנוּן וּמֵימְרֵהּ כְּעַלְעוֹלָא לְקַשָׁא יְבַדֵר יַתְהוֹן וְאַתְּ תְּבוּעַ בְּמֵימְרָא דַייָ בְּקַדִישָׁא דְיִשְׂרָאֵל תִּשְׁתַּבַּח: ^is-41-16

**17** עִנְוְתָנַיָא וַחֲשִׁיכַיָא דִמְחַמְדִין לְאוּלְפָנָא הָא כְּצַחְיָא לְמַיָא וְלָא מְשַׁכְּחִין רוּחֵיהוֹן בְּסִגוּפָא מְשַׁלְהַיָא אֲנָא יְיָ אֲקַבֵּיל צְלוֹתְהוֹן אֱלָהָא דְיִשְׂרָאֵל לָא אֲרַחֵיקִנוּן: ^is-41-17

**18** אֲקָרֵב גָלוּתְהוֹן מִבֵּינֵי עַמְמַיָא וְאֶדְבְּרִינוּן בְּאוֹרַח תַקָנָא וְאֶפְתַּח לְהוֹן עַל נַגְדִין נַהֲרִין וּבְגוֹ מַשִׁרְיָן מַבּוּעִין אֲשַׁוֵי מַדְבְּרָא לַאֲגַמִין דְמַיָן וַאֲרַע בֵּית צַחְוָנָא לְמַבּוּעֵי מַיָא: ^is-41-18

**19** אֶתֵּן בְּמַדְבְּרָא אַרְזִין שִׁיטִין וַהֲדַסִין וְאָעִין דִמְשַׁח אֱרַבֵּי בְמֵישְׁרָא בּוּרְוָן מוּרְנְיָן וְאֶשְׁכְּרוֹעִין כַּחֲדָא: ^is-41-19

**20** בְּדִיל דְיֶחֱזוּן וְיֵדְעוּן וִישַׁווּן דְחַלְתִּי עַל לִבְּהוֹן וְיִסְתַּכְּלוּן כַּחֲדָא אֲרֵי גְבוּרְתָא דַייָ עֲבָדַת דָא וְקַדִישָׁא דְיִשְׂרָאֵל בְּרָא יָתָהּ: ^is-41-20

**21** קְרִיבוּ דִינְכוֹן אֲמַר יְיָ אָעִילוּ חֶזְוַתְכוֹן אֲמַר מַלְכֵּיהּ דְיַעֲקֹב: ^is-41-21

**22** יִתְקָרְבוּן וִיחַווּן לָנָא יַת דְעַרְעִינָנָא קַדְמֵיתָא מַה אִינוּן הֲווֹ וּנְשַׁוֵי לִבְּנָא וְנֵדָע סוֹפְהוֹן אוֹ דַעֲתִידִין לְמֵיתֵי בַּסְרוּנָא: ^is-41-22

**23** חֲווֹ דְאַתְיָן לְסוֹפָא וְנִדַע אִם לְטַעֲוָן דְאִית בְּהוֹן צְרוֹךְ אַתּוּן פָּלְחִין אִם יָכְלִין אִינוּן לְאֵיטָבָא וּלְאַבְאָשָׁא וְנִסְתַּכֵּיל וְנֵידוֹן כַּחֲדָא: ^is-41-23

**24** הָא אַתּוּן לְמָא וְעוֹבָדֵיכוֹן לָא מִדָעַם תּוֹעֵיבָא דְאַתְרְעִיתוּן בֵּיהּ לְכוֹן: ^is-41-24

**25** אַיְתֵיתֵי בִּגְלַאִי מְלַךְ דְתַקִיף מֵרוּחַ צִפּוּנָא וְיֵיתֵי כְּמִפַּק שִׁמְשָׁא בִּגְבוּרְתֵּהּ מִמַדִנְחָא אַגְבְּרִינֵהּ בִּשְׁמִי וְיֵיתִי וְיֵדוּשׁ שִׁלְטוֹנֵי עַמְמַיָא כְּמָא דְדָיְשִׁין יַת עַפְרָא וּכְפַחְרָא דְעָרִיךְ יַת טִינָא: ^is-41-25

**26** מַן חַוֵי מִן אַוְלָא וְנֵדַע וּמִלְקָדְמִין וְנֵימַר קְשׁוֹט אַף לֵית דִי מְחַוֵי אַף לֵית דִמְבַסֵר אַף לֵית דְשָׁמַע לְמִילֵיכוֹן: ^is-41-26

**27** פִּתְגָמֵי נֶחְמָתָא דְאִתְנַבִּיאוּ נְבִיָיא מִלְקָדְמִין עַל צִיוֹן הָא אֲתוֹ וְלִירוּשְׁלֵם מְבַסֵר אֶתֵּן: ^is-41-27

**28** וּגְלֵי קֳדְמַי וְלֵית גְבַר דְלֵיהּ עוֹבָדִין טָבִין וּמֵאִלֵין לֵית דְמָלִיךְ מֵילַךְ וּשְׁאִילְתִּינוּן אִם יְתוּבוּן פִּתְגָם: ^is-41-28

**29** הָא כוּלְהוֹן לְמָא וְלָא מִדָעַם עוֹבָדֵיהוֹן בִּזָא וּתְבִרָא עֶשְׁתּוֹנֵיהוֹן: ^is-41-29

## Capítulo 42

**1** הָא עַבְדִי מְשִׁיחָא אֶקְרְבִינֵהּ בְּחִירִי דְאִתְרְעֵי בֵּיהּ מֵימְרִי אֶתֵּן רוּחָא דְקוּדְשִׁי עֲלוֹהִי דִינִין לְעַמְמִין יְגַלֵי: ^is-42-1

**2** לָא יִצְוַח וְלָא יַכְלֵי וְלָא יְרִים לְבָרָא קָלֵהּ: ^is-42-2

**3** עִנְוְתָנַיָא דְאִינוּן דָמָן לְקַנְיָא רְעִיעַ לָא יִתַּבְּרוּן וַחֲשִׁיכַיָא דִכְבוּצִין עַמִי לָא יִטְפוּן לְקוּשְׁטָא יַפֵיק דִינָא: ^is-42-3

**4** לָא יַלְהֵי וְלָא יִלְאֵי עַד דְיַתְקֵן בְּאַרְעָא דֵינָא וּלְאוֹרַיְתֵהּ נַגְוָן יְכַתְּרוּן: ^is-42-4

**5** כִּדְנַן אֲמַר יְיָ אֱלָהּ עַלְמָא יְיָ דִי בְרָא שְׁמַיָא וּתְלָנוּן שַׁכְלִיל אַרְעָא וְדַיְרָהָא יָהֵיב נִשְׁמְתָא לְעַמָא דִי עֲלָהּ וְרוּחַ לְדִמְהַלְכִין בָּהּ: ^is-42-5

**6** אֲנָא יְיָ רַבִּיתָךְ בִּקְשׁוֹט וְאַתְקְפֵית בִּידָךְ וְאַתְקְנִינָךְ וְאֶתְּנִינָךְ לִקְיַם עַם לְנֵיהוֹר עַמְמִין: ^is-42-6

**7** לְפַתָּחָא עֵינֵי בֵּית יִשְׂרָאֵל דְאִינוּן כְּסָמָן מִן אוֹרַיְתָא לְאַפָקָא נַלְוַתְהוֹן מִבֵּינֵי עַמְמַיָא דְאִינוּן דָמָן לַאֲסִירִין וּלְמִפְרַקְהוֹן מִשִׁעְבּוּד מַלְכְּוָתָא דְאִינוּן עֲנִינִין כַּאֲסִירֵי קְבָל: ^is-42-7

**8** אֲנָא יְיָ הוּא שְׁמִי וִיקָרִי דְאִתְגְלֵיתִי עֲלֵיכוֹן לְעַם אוֹחֲרָן לָא אֶתֵּן וְתוּשְׁבַּחְתִּי לְפַלְחֵי צַלְמַיָא: ^is-42-8

**9** קַדְמָיָתָא הָא אֲתָאָה וְחַדְתָּן אֲנָא מְחַוֵי עַד לָא אַתְיַן אֶבְסַר יַתְכוֹן: ^is-42-9

**10** שַׁבָּחוּ קֳדָם יְיָ תּוּשְׁבַּחְתָּא חַדְתָּא אֱמָרוּ תּוּשְׁבַּחְתֵּהּ מִסְיָפֵי אַרְעָא נַחֲתֵי יַמָא וּמְלָאָהּ נַגְוָן וְיָתְבֵיהוֹן: ^is-42-10

**11** יְשַׁבַּח מַדְבְּרָא וְקִרְוִין דְיַתְבִין בֵּיהּ פְּצִיחִין יָתְבִין מִדְבַּר עַרְבָאִי יְשַׁבְּחוּן מֵיתַיָא כַּד יִפְקוּן מִבָּתֵּי עַלְמֵיהוֹן מְרֵישֵׁי טוּרַיָא יְרִימוּן קָלְהוֹן: ^is-42-11

**12** יְשַׁווּן קֳדָם יְיָ יְקָרָא וְתוּשְׁבַּחְתֵּהּ בְּנַגְוָן יְחַווּן: ^is-42-12

**13** יְיָ לְמֶעְבַּד גְבוּרָן אִתְגְלֵי לְמֶעְבַּד גְבוּרָא מִתְגְלֵי בִּרְגַז בְּמִלוּל אַף בְּזִיעַ עַל בַּעֲלֵי דְבָבוֹהִי מִתְגְלֵי בִּגְבוּרְתֵּהּ: ^is-42-13

**14** יְהָבִית לְהוֹן אַרְכָּא מֵעַלְמָא דְאִם יְתוּבוּן לְאוֹרַיְתָא וְלָא תָבוּ כְּחַבְלִין עַל יְלִידְתָּא יִתְגְלֵי דִינִי עֲלֵיהוֹן יִצְדוּן וִיסוּפוּן כַּחֲדָא: ^is-42-14

**15** אַחֲרִיב טוּרִין וְרָמָן וְכָל עִסְבֵּיהוֹן אֲיַבֵּשׁ וַאֲשַׁוֵי נַהֲרִין לְנַגְוָן וַאֲגַמִין אֲיַבֵּשׁ: ^is-42-15

**16** וָאֱדַבֵּר לְבֵית יִשְׂרָאֵל דְדָמִין כְּסָמָן בְּאוֹרַח דְלָא יְדָעוּ בִּשְׁבִילִין דְלָא אֲלִיפוּ אַדַרְכִינוּן אֲשַׁוֵי קְבַל קֳדָמֵיהוֹן לִנְהוֹר וְכַפְלָא לְמֵישְׁרָא אִלֵין פִּתְגָמַיָא אַעְבְדִינוּן וְלָא אַרְחִיקִינוּן: ^is-42-16

**17** יִסְתַּחֲרוּן לַאֲחוֹרָא יִבַּהֲתוּן בַּהֲתָא פַלְחֵי צַלְמַיָא דְאָמְרִין לִצְלַם מַתְּכָא אַתּוּן טַעֲוָתָנָא: ^is-42-17

**18** רַשִׁיעַיָא דְאִינוּן כְּחֵרְשִׁין הֲלָא אוּדְנִין לְכוֹן שְׁמָעוּ וְחַיָבַיָא דְאִינוּן כְּסָמָן הֲלָא עַיְנִין לְכוֹן אִסְתַּכָּלוּ וַחֲזוֹ: ^is-42-18

**19** הֲלָא אִם יְתוּבוּן רַשִׁיעַיָא יִתְקְרוֹן עַבְדֵי וְחַיָבַיָא דִנְבִיֵי שְׁלָחִית עֲלֵיהוֹן אֶלָא רַשִׁיעַיָא עֲתִידִין לְאִשְׁתַּלָמָא פּוּרְעֲנוּת חוֹבֵיהוֹן בְּרַם אִם יְתוּבוּן יִתְקְרוֹן עַבְדַיָא דַיָי: ^is-42-19

**20** חֲזֵיתוּן סַגִיאָן וְלָא נְטַרְתּוּן אִתְפַּתָּחָא אוּדְנֵיכוּן וְלָא קַבֵּילְתּוּן אוּלְפַן: ^is-42-20

**21** יְיָ רָעֵי בְּדִיל לְזַכָּאוּתֵהּ יִשְׂרָאֵל וְרַבֵּי לְעָבְדֵי אוֹרַיְתֵהּ וְיַתְקֵיף יַתְהוֹן: ^is-42-21

**22** וְהוּא עַם בָּזִיז וַאֲנִיס אִתְחַפִיאוּ בַהֲתָא עוּלֵימִין כּוּלְהוֹן וּבְבָתֵּי יְסוּרִין עֲנִינִין הֲווֹ לַעֲדִי וְלֵית דִמְשֵׁיזֵיב לְבִזָא וְלֵית דַאֲמַר אֲתֵיב: ^is-42-22

**23** מַן בְּכוֹן יָצֵית דָא יְקַבֵּל וִיסַבַּר לְסוֹפָא: ^is-42-23

**24** מַן מְסַר לַעֲדֵי יַעֲקֹב וְיִשְׂרָאֵל לִבְזוֹזִין הֲלָא יְיָ מִן קֳדָם דְחָבוּ קֳדָמוֹהִי וְלָא אֲבוּ לְמֵיהָךְ בְּאוֹרְחָן דְתַקְנָן קֳדָמוֹהִי וְלָא קַבִּילוּ אוּלְפָן אוֹרַיְתֵהּ: ^is-42-24

**25** וּשְׁפַךְ עֲלֵיהוֹן חֵימַת רוּגְזֵהּ וּתְקוֹף עָבְדֵי קְרָבֵהּ אַיְתִי עֲלֵיהוֹן וּקְטָלוּ בְהוֹן מִסְחוֹר סְחוֹר וְלָא יְדַעוּ וְשַׁלִיטוּ בְהוֹן וְלָא שַׁוִיאוּ דְחַלְתֵּהּ עַל לִבָּא: ^is-42-25

## Capítulo 43

**1** וּכְעַן כִּדְנַן אֲמַר יְיָ דִבְרָאָךְ יַעֲקֹב וּדְאַתְקְנָךְ יִשְׂרָאֵל לָא תִדְחַל אֲרֵי פְרִיקְתָּךְ רַבִּיתָךְ בִּשְׁמָךְ דִילִי אַתְּ: ^is-43-1

**2** אֲרֵי בְקַדְמֵיתָא כַּד עֲבַרְתּוּן בְיַמָא דְסוּף מֵימְרִי הֲוָה בְּסַעְדְכוֹן פַּרְעֹה וּמִצְרָאֵי דְסַגִיאִין כְּמֵי נַהֲרָא לָא יְכִילוּ לְכוֹן וְאַף בְּתִנְיָנֵיתָא כַּד תַּהֲכוּן לְבֵינֵי עַמְמַיָא דְתַקִיפוּן כְּאֶשְׁתָּא לָא יִכְלוּן לְכוֹן וּמַלְכְּוָן דַחֲסִינָן כְּשַׁלְהוֹבִיתָא לָא יְשֵׁיצוּן יַתְכוֹן: ^is-43-2

**3** אֲרֵי אֲנָא יְיָ אֱלָהָךְ קַדִישָׁא דְיִשְׂרָאֵל פַּרְקָךְ יְהָבֵית חֲלִיפָךְ מִצְרָאֵי כּוּשׁ וּסְבָא תְּחוֹתָךְ: ^is-43-3

**4** מִדְאַתְּ חֲבִיב קֳדָמַי אִתְיְקַרְתָּא וַאֲנָא רְחִימְתָּךְ וּמְסַרֵית עַמְמַיָא תְּחוֹתָךְ וּמַלְכְּוָתָא חֲלַף נַפְשָׁךְ: ^is-43-4

**5** לָא תִדְחַל אֲרֵי בְסַעְדָךְ מֵימְרִי מִמַדִינְחָא אַיְתִי בְנָךְ וּמִמַעֲרְבָא אֱקָרֵיב גַלְוָתָךְ: ^is-43-5

**6** אֲמַר לְצִפוּנָא אַיְתָא וּלְדָרוֹמָא לָא תְעַכֵּב אַיְתוּ בָנַי מֵרָחִיק וְגַלְוַת עַמִי מִסְיָפֵי אַרְעָא: ^is-43-6

**7** כָּל דָא בְּדִיל אֲבָהַתְכוֹן צַדִיקַיָא דְאִתְקְרֵי שְׁמִי עֲלֵיהוֹן וְלִיקָרִי בְרֵיתִינוּן אַתְקְנִית גַלְוַתְהוֹן אַף עֲבָדֵית לְהוֹן נִסִין: ^is-43-7

**8** דְאַפֵּיק עַמָא מִמִצְרַיִם דְאִינוּן כְּסָמִי וְעַיְנִין לְהוֹן וּכְחַרְשִׁין וְאוּדְנִין לְהוֹן: ^is-43-8

**9** כָּל עַמְמַיָא יִתְכַּנְשׁוּן כַּחֲדָא וְיִתְקַרְבוּן מַלְכְּוָן מַן בְּהוֹן יְחַוֵי דָא וְקַדְמָיָתָא יְבַסְרוּנָנָא יִתְּנוּן סַהֲדֵיהוֹן וְיִזְכּוּן וְיִשְׁמְעוּן וְיֵימְרוּן קְשׁוֹט: ^is-43-9

**10** אַתּוּן סַהֲדִין קֳדָמַי אֲמַר יְיָ וְעַבְדִי מְשִׁיחָא דְאִתְרְעֵתִי בֵיהּ בְּדִיל דְתִידְעוּן וּתְהֵימְנוּן קֳדָמָי וְתִסְתַּכְּלוּן אֲרֵי אֲנָא הוּא דְמִלְקַדְמִין אַף עַלְמֵי עַלְמַיָא דִילִי אִינוּן וּבַר מִנִי לֵית אֱלָהּ: ^is-43-10

**11** אֲנָא אֲנָא יְיָ וְלֵית בַּר מִנִי פָּרִיק: ^is-43-11

**12** אֲנָא חֲוֵיתִי לְאַבְרָהָם אֲבוּכוֹן מָה דַעֲתִיד לְמֵיתָא אֲנָא פְּרָקִית יַתְכוֹן מִמִצְרָיִם כְּמָא דְקַיְמִית לֵיהּ בֵּין בִּתְרַיָא וַאֲנָא אַשְׁמְעֵית יַתְכוֹן אוּלְפַן אוֹרַיְתִי מִסִינַי וְעַד אַתּוּן קַיָמִין וְלֵית בְּכוֹן נוּכְרִי וְאַתּוּן סָהֲדִין קֳדָמַי אֲמַר יְיָ וַאֲנָא אֱלָהָא: ^is-43-12

**13** אַף מַעַלְמָא אֲנָא הוּא וְלֵית דְמִן יְדִי מְשֵׁיזֵיב אַעַבְדִינָהּ וְלָא אֲתֵיבִינָהּ: ^is-43-13

**14** כִּדְנַן אֲמַר יְיָ פָרִיקְכוֹן קַדִישָׁא דְיִשְׂרָאֵל בְּדִיל חוֹבֵיכוֹן אַגְלֵיתִי יַתְכוֹן לְבָבֶל וְאַחֲתֵית בִּמְשׁוֹטִין כּוּלְהוֹן וְכַסְדָאֵי בִּסְפִינַי תּוּשְׁבַּחְתְּהוֹן: ^is-43-14

**15** אֲנָא יְיָ קַדִישְׁכוֹן דִבְרָאֵי לְיִשְׂרָאֵל מַלְכְּכוֹן: ^is-43-15

**16** כִּדְנַן אֲמַר יְיָ דְאַתְקֵין בְּיַמָא אוֹרְחָא וּבְמַיִין תַּקִיפִין שְׁבִילָא: ^is-43-16

**17** דְאַפֵיק רְתִיכִין וְסוּסְוָן מַשִׁרְיָן וְעַם סַגִי כַּחֲדָא אִתְבְּלָעוּ וְלָא קָמוּ דְעִיכוּ כְּבוּצָא עַמִי טְפוֹ: ^is-43-17

**18** לָא תִדְכְּרוּן קַדְמָיָתָא וּדְמִן אַוְלָא לָא תִסְתַּכְּלוּן: ^is-43-18

**19** הָא אֲנָא עָבִיד חַדְתָּא וּכְעַן תִּתְגְלֵי הֲלָא תֵידְעוּנָהּ אַף אַשַׁוֵי בְמַדְבְּרָא אוֹרַח בְּצַדְיוּתָא נַהַרְוָן: ^is-43-19

**20** יְיַקְרוּן קֳדָמַי כַּד אַיְתֵב מְדִינָן דְצַדְיָן אֲתַר דַהֲוָאָה שָׁרְיָן יְרוּדִין וּבְנָת נַעֲמִין אֲרֵי יְהָבִית בְּמַדְבְּרָא מַיָא נַהֲרִין בְּצַדְיוּתָא לְאַשְׁקָאָה גַלְוַת עַמִי דְאִתְרְעֵיתִי בָהּ: ^is-43-20

**21** עַמָא דֵין אַתְקְנֵית לְפוּלְחָנִי בְתוּשְׁבַּחְתִּי יְהוֹן מִשְׁתָּעָן: ^is-43-21

**22** אֱמִיר עַל יְדֵי נְבִיַיָא וְלָא בְּפּוּלְחָנִי עַרְעִיתוּן דְבֵית יַעֲקֹב אֲרֵי לָאֵיתוּן בְּאוּלְפַן אוֹרַיְתִי יִשְׂרָאֵל: ^is-43-22

**23** לָא אַיְתֵיתָא קֳדָמַי אִמְרִין לְעָלְתָא וְנִכְסַת קוּדְשָׁךְ לָא יַקַרְתָּא קֳדָמַי לָא אַסְגֵיתִי עֲלָךְ בְּקוּרְבָּנִין וְלָא אַתְקְפֵית עֲלָךְ בִּלְבוֹנְתָּא: ^is-43-23

**24** לָא זְבֵינְתָּא קֳדָמַי בִּכְסַף קָנִי בְּסָם וּתְרַב נִכְסַת קוּדְשָׁךְ לָא דְהֵינְתָּא עַל מַדְבְּחִי בְּרַם אַסְגֵיתָא קֳדָמַי בְּחוֹבָךְ אַתְקֵפְתָּא קֳדָמַי בַּעֲוָיָתָךְ: ^is-43-24

**25** אֲנָא הוּא שָׁבֵיק לְחוֹבָךְ בְּדִיל שְׁמִי וְחֶטְאָךְ לָא יִדְכְּרוּן: ^is-43-25

**26** אֱמַר כְּעַן נְדוֹן כַּחֲדָא אִשְׁתָּעֵי אַתְּ בְדִיל אִם תִּכּוּל וְתִזְכֵּי: ^is-43-26

**27** אֲבוּךְ קַדְמָאָה חָטָא וּמַלְפָךְ מְרַדוּ בְמֵימְרִי: ^is-43-27

**28** וְאַפֵּיס רַבְרְבֵי קוּדְשָׁא וְאֶמְסַר לְקַטָלָא יַעֲקֹב וְיִשְׂרָאֵל לְחִסוּדִין: ^is-43-28

## Capítulo 44

**1** וּכְעַן שְׁמַע יַעֲקֹב עַבְדִי וְיִשְׂרָאֵל דְאִתְרְעֵיתִי בֵיהּ: ^is-44-1

**2** כִּדְנַן אֲמַר יְיָ דְעַבְדָךְ וּדְאַתְקְנָךְ מִמְעִין יְסַעְדִינָךְ לָא תִדְחַל עַבְדִי יַעֲקֹב וְיִשְׂרָאֵל דְאִתְרְעִיתִי בֵיהּ: ^is-44-2

**3** אֲרֵי כְמָא דְמִתְיַהֲבִין מַיָא עַל אֲרַע בֵּית צַחֲוָנָא וּמִתְנַגְדִין עַל יַבֶּשְׁתָּא כֵּן אֶתֵּן רוּחַ קוּדְשִׁי עַל בְּנָךְ וּבִרְכָתִי עַל בְּנֵי בְנָךְ: ^is-44-3

**4** וְיִתְרַבּוּן צַדִיקַיָא רַכִּיכִין וּמְפַנְקִין כְּלַבְלַבֵי עֲסַב כְּאִילָן דִמְשַׁלַח שָׁרְשׁוֹהִי עַל נַגְדִין דְמַיִין: ^is-44-4

**5** דֵין יֵימַר מִדָחֲלַיָא דַייָ אֲנָא וְדֵין יְצַלֵי בְשׁוּם יַעֲקֹב וְדֵין יְקָרֵיב קוּרְבָּנֵהּ קֳדָם יְיָ וּבִשְׁמָא דְיִשְׂרָאֵל יִתְקְרֵי: ^is-44-5

**6** כִּדְנַן אֲמַר יְיָ מַלְכָּא דְיִשְׂרָאֵל וּפַרְקֵהּ יְיָ צְבָאוֹת אֲנָא הוּא דְמִלְקַדְמִין אַף עַלְמֵי עָלְמַיָא דִילִי אִינוּן וּבַר מִנִי לֵית אֱלֶהּ: ^is-44-6

**7** וּמַן כְּוָתִי דִין עַרְעִינָהּ וִיחַוִינָהּ וִיסַדְרִינָהּ קֳדָמַי מִשַׁוָיוּתִי עַמָא דְמִן עַלְמָא וּדְאָתְיָן וְדַעֲתִידִין לְמֵיתֵי יְחַווּן לָנָא: ^is-44-7

**8** לָא תִדַחֲלוּן וְלָא תִתַּבְּרוּן הֲלָא מִבְּכֵן בְסַרְתָּךְ וְחַוֵיתִי וְאַתּוּן סָהֲדִין קֳדָמַי הֲאִית אֱלָהָא בַּר מִנִי וְלֵית דְתַקִיף אֱלָהֵן דְמִן קֳדָמַי מִתְיְהַב לֵיהּ תְּקוֹף: ^is-44-8

**9** עַבְדֵי צַלְמַיָא כּוּלְהוֹן לְמָא וּפָלְחֵיהוֹן דְלָא יַהֲנוּן לְהוֹן וְסָהֲדִין אִינוּן בְּנַפְשָׁתֵיהוֹן דְלָא חָזָן וְלָא יָדְעִין בְּדִין דְיִבַּהֲתוּן: ^is-44-9

**10** מַן עֲבַד דַחֲלָא וְצַלְמָא אַתִיךְ בְּדִיל דְלָא לַהֲנָאָה: ^is-44-10

**11** הָא כָּל פָּלְחֵיהוֹן יִבָּהֲתוּן וְאוּמָנִין עוּבְדָנִין מִבְּנֵי אֱנָשָׁא יִתְכַּנְסוּן כּוּלְהוֹן יְקוּמוּן יִתַּבְּרוּן יִבַהֲתוּן כַּחֲדָא: ^is-44-11

**12** נַפְחָא מִבַּרְזְלָא חֲצִינָא עָבֵיד וּנְפַח נוּר בְּשִׁיחוּרִין וּבְמַקוּבִין מַתְקֵיף לֵיהּ וְעָבִיד לֵיהּ בִּתְקוֹף חֵילֵהּ דְאִם יִכְפַּן עַבְדֵהּ וְלָא יֵיכוּל לָא יְהֵי בֵיהּ חֵיל וְאִם יִצְחֵי וְלָא יִשְׁתֵּי מַיָא יְהֵי מְשַׁלְהֵי: ^is-44-12

**13** נַגָר אָעִין נָפֵיץ בְּחוּטָא מְסַר לֵיהּ בְּמַשְׁקוּלְתָּא מְגַזֵי לֵיהּ בְּאִזְמֵילַיָא וּבִנְצוּרִין מְאַחֵיד לֵיהּ וְעָבֵיד לֵיהּ כִּדְמוּת גְבַר כְּתוּשְׁבְּחַת אִתְּתָא לְמִיתַּב בְּבֵיתָא: ^is-44-13

**14** לְמִקַץ לֵיהּ אַרְזִין וּנְסִיב תְּרֵז וּבְלוּט וּמַתְקֵיף לֵיהּ בַּאֲעֵי חוּרְשָׁא נְצַב אוּרְנָא וּמִטְרָא יְרַבֵּי: ^is-44-14

**15** וֶהֱוֵי לֶאֱנָשָׁא לְאַדְלָקָא וּנְסֵיב מִנְהוֹן וּשְׁחֵין אַף אֲזָא וְאָפָא לְחֵם אַף עָבְדֵהּ דַחֲלָא וּסְגֵיד אִתְּכֵהּ צַלְמָא וּבְעָא מִנֵהּ: ^is-44-15

**16** פַּלְגֵהּ אוֹקִיד בְּנוּרָא עַל פַּלְגֵהּ בִּסְרָא אָכִיל טְוָא טָוִי וּסְבַע אַף שְׁחִין וַאֲמַר אָח שַׁחֵינִית חֲזֵיתִי נוּר: ^is-44-16

**17** וּשְׁאָרֵהּ לְדַחֲלָא עָבַד לְצַלְמָא סְגִיד לֵיהּ וְאֶשְׁתַּעְבֵּד לֵיהּ וּבְעָא מִנֵהּ וַאֲמַר שֵׁיזְבָנִי אֲרֵי דְחַלְתִּי אָתְּ: ^is-44-17

**18** לָא יָדְעוּן וְלָא מִסְתַּכְּלִין אֲרֵי מְטַמְטְמָן מִלְמֶחֱזֵי עֵינֵיהוֹן מִלְאִסְתַּכָּלָא בְּלִבְּהוֹן: ^is-44-18

**19** וְלָא מֵתִיב לְלִבֵּהּ וְלָא מַדַע וְלָא סוּכְלְתָנוּ לְמֵימַר פַּלְגֵהּ אוֹקֵידַת בְּנוּרָא וְאַף אֲפִיתִי עַל גוּמְרוֹהִי לְחֵם טְוֵית בִּסְרָא וַאֲכַלֵית וּשְׁאֵרֵהּ לְתוֹעֵבָא אַעְבֵּיד לְיִבְלֵי אָעָא אֶסְגוֹד: ^is-44-19

**20** הָא דְחַלְתָּא פַלְגֵהּ קִטְמָא לִבֵּהּ שַׁטְיָא אַטְעֲיֵהּ וְלָא יְשֵׁיזֵיב יַת נַפְשֵׁהּ וְלָא יֵימַר הֲלָא שִׁקְרָא עֲבָדֵית בִּימִינִי: ^is-44-20

**21** אִדְכַּר אִלֵין יַעֲקֹב וְיִשְׂרָאֵל אֲרֵי עַבְדִי אַתְּ אַתְקֵינְתָּךְ לְמֶהֱוֵי עֲבֵיד פְּלַח קֳדָמַי אַתְּ יִשְׂרָאֵל לָא תִתְנְשֵׁי דְחַלְתִּי: ^is-44-21

**22** מְחֵיתִי כְעֵיבָא חוֹבָךְ וְכַעֲנָן עֲדֵי כָּל חֶטְאָךְ תּוּב לְפוּלְחָנִי אֲרֵי פְרַקְתָּךְ: ^is-44-22

**23** שַׁבַּחוּ שְׁמַיָא אֲרֵי עֲבַד יְיָ פוּרְקַן לְעַמֵהּ יַבִּיבוּ יְסוֹדֵי אַרְעָא בּוּעוּ טוּרַיָא תּוּשְׁבַּחְתָּא חוּרְשָׁא וְכָל אִילָנַיָא דְבֵהּ אֲרֵי פְרַק יְיָ יַעֲקֹב וּבְיִשְׂרָאֵל יִשְׁתַּבַּח: ^is-44-23

**24** כִּדְנַן אֲמַר יְיָ דְפַרְקָךְ וּדְאַתְקְנָךְ מִמְעַיִין אֲנָא יְיָ עָבֵיד כּוֹלָא תְּלֵית שְׁמַיָא בְּמֵימְרִי שַׁכְלְלֵית אַרְעָא בִּגְבוּרְתִּי: ^is-44-24

**25** מְבַטֵל אֶתְוָת בַּדִין וְקִסוּמִין מְשַׁגֵשׁ מַתִיב חַכִּימָא לַאֲחוֹרָא וְדַעְתְּהוֹן מְקַלְקֵל: ^is-44-25

**26** מְקַיֵם פִּתְגָמֵי עַבְדוֹהִי צַדִיקַיָא וּמְלַךְ שְׁלוּחוֹהִי מַשְׁלִים דַאֲמַר לִירוּשְׁלָם תִּתּוֹתַב וּלְקִרְוַיָא דְבֵית יְהוּדָה יִתְבַּנְיָן וְחָרְבָתָהָא אֲקוֹמֵם: ^is-44-26

**27** דַּאֲמַר עַל בָּבֶל תֶּחְרוֹב וְנַהֲרָתָא אֲיַבֵּשׁ: ^is-44-27

**28** דַאֲמַר עַל כּוֹרֶשׁ לְמִתַּן לֵיהּ מַלְכוּ וְכָל רְעוּתִי יְקַיֵם וְלִדְאֲמַר לִירוּשְׁלֶם תִּתְבְּנֵי וְהֵיכְלָא יִשְׁתַּכְלֵל: ^is-44-28

## Capítulo 45

**1** כִּדְנַן אֲמַר יְיָ לִמְשִׁיחֵהּ לְכוֹרֶשׁ דְאַתְקְפֵית בִּימִינֵהּ לְמִמְסַר קֳדְמוֹהִי עַמְמִין וְחַרְצֵי מַלְכִין אַשְׁרֵי לְפַּתָּחָא קֳדָמוֹהִי דָשִׁין וְתַרְעִין לָא יִתְאַחָדוּן: ^is-45-1

**2** מֵימְרִי קֳדָמָךְ יְהָךְ וְשׁוּרַיָא אֲכַבֵּשׁ דָשִׁין דִנְחָשׁ אֱתַּבֵר וְעַבְרִין דְבַרְזֶל אֲקַצֵץ: ^is-45-2

**3** וְאֶתֵּן לָךְ אוֹצְרִין דַחֲשׁוֹךְ וְסִימָן דְמִטַמְרָן בְּדִיל דְתֵידַע אֲרֵי אֲנָא יְיָ דְרַבֵּיתִי בִשְׁמָךְ אֱלָהָא דְיִשְׂרָאֵל: ^is-45-3

**4** בְּדִיל עַבְדִי יַעֲקֹב וְיִשְׂרָאֵל בְּחִירִי וּקְרֵית לָךְ בִּשְׁמָךְ אַתְקֵינְתָּךְ וְלָא יְדַעְתָּא לְמִדְחַל קֳדָמַי: ^is-45-4

**5** אֲנָא יְיָ וְלֵית עוֹד וּבַר מִנִי לֵית אֱלָהָא סְעַדְתִּיךְ וְלָא יָדַעְתָּא לְמִדְחַל קֳדָמַי: ^is-45-5

**6** בְּדִיל דְיֵדְעוּן מִמַדְנַח שִׁמְשָׁא וּמִמַעַרְבָא אֲרֵי לֵית בַּר מִנִי אֲנָא יְיָ וְלֵית עוֹד: ^is-45-6

**7** דְאַתְקִין נְהוֹר וּבָרֵי חֲשׁוֹךְ עֲבֵיד שְׁלָם וּבָרֵי בִישׁ אֲנָא יְיָ עָבֵיד כֹּל אִלֵין: ^is-45-7

**8** יְשַׁמְשׁוּן שְׁמַיָא מִלְעֵלָא וַעֲנָנַיָא יִגְדוּן טוּבָא תִּתְפְּתַח אַרְעָא וְיֵחוּן מֵתַיָא וּזְכוּתָא תִתְגְלֵי כַּחֲדָא אֲנָא יְיָ בְּרֵיתִינוּן: ^is-45-8

**9** וַי דִי מִדַמֵי לְמֵידָן לִקֳבֵל פִּתְגָמֵי בָרְיֵהּ וְרָחַץ דְיוֹטְבִין לֵיהּ צַלְמֵי פַחֲרָא דְעָבְדִין מֵעֲפַר אַדְמָתָא הֲאֶפְשַׁר דְיֵימַר טִינָא לְעָבְדֵהּ לָא עֲבַדְתַּנִי וְעוֹבָדָךְ לֵית יְדִין לֵיהּ: ^is-45-9

**10** וַי דַאֲמַר לְאָב מַה תּוֹלִיד וּלְאִתְּתָא מַה תֶּעְדִין: ^is-45-10

**11** כִּדְנַן אֲמַר יְיָ קַדִישָׁא דְיִשְׂרָאֵל וּדְאַתְקְנֵהּ אַתְיָא דַעֲתִידִין לְמֵיתֵי אַתּוּן שָׁאֲלִין מִן קֳדָמַי עַל עַמִי וְעַל עוֹבַד גְבוּרְתִּי תְּפַקְדוּנַנִי: ^is-45-11

**12** אֲנָא בְּמֵימְרִי עֲבַדֵת אַרְעָא וֶאֱנָשָׁא עֲלָהּ בְּרִיתִי אֲנָא בִּגְבוּרְתִּי תְּלֵית שְׁמַיָא וְכָל חֵילֵיהוֹן שֵׁכְלֵילִית: ^is-45-12

**13** אֲנָא אַיְתִינֵהּ בִּגְלֵי בִקְשׁוֹט וְכָל אוֹרְחָתֵהּ אֲתַקֵן הוּא יִבְנֵי קַרְתִּי וְגַלְוַת עַמִי יְשַׁלַח לָא בְדָמִין וְלָא בְּמָמוֹן אֲמַר יְיָ צְבָאוֹת: ^is-45-13

**14** כִּדְנַן אֲמַר יְיָ לֵיאוּת מִצְרַיִם וְתֵגָרֵי כוּשׁ וֶאֱנָשֵׁי סְבָא גַבְרִין דִסְחוֹרָא עֲלָךְ יֶעְדוּן וְדִילָךְ יְהוֹן בָּתַר פִּתְגָמָךְ יְהָכוּן בְּשַׁלְשְׁלָן יֶעְדוּן וְלִיךְ יִסְגְדוּן מִנִיךְ יִבְעוּן וְיוֹדוּן לְמֵימַר בְּקוּשְׁטָא בִיךְ אֱלָהָא וְלֵית עוֹד אֱלָהָא בַּר מִנָךְ: ^is-45-14

**15** בְּקוּשְׁטָא אַתְּ אֱלָהָא אַשְׁרֵיתָא בִּתְקוֹף רוּמָא שְׁכִנְתָּךְ אֱלָהָא דְיִשְׂרָאֵל פָּרִיק: ^is-45-15

**16** בְּהִיתוּ וְאַף אִתְכַּנִעוּ כּוּלְהוֹן כַּחֲדָא הֲלִיכוּ בְּאִתְכַּנְעוּ פָּלְחֵי צַלְמַיָא: ^is-45-16

**17** יִשְׂרָאֵל יִתְפְּרִיק בְּמֵימְרָא דַייָ פּוּרְקָן עָלְמַיָא לָא תִבְהֲתוּן וְלָא תִתְכַּנְעוּן לַעֲלַם וּלְעַלְמֵי עָלְמַיָא: ^is-45-17

**18** אֲרֵי כִדְנַן אֲמַר יְיָ דִי בְרָא שְׁמַיָא הוּא אֱלֹהִים דְשַׁכְלִיל אַרְעָא וְעָבְדָהּ הוּא אַתְקְנָהּ לָא לְרֵיקָנוּ בְרָהּ אֱלָהֵין לְאַסְגָאָה עֲלָהּ בְּנֵי אֱנָשָׁא אַתְקְנָא אֲנָא יְיָ וְלֵית עוֹד: ^is-45-18

**19** לָא בְסִתְרָא מַלְלֵית בַּאֲתַר אַרְעָא קָבֵל וְלָא אֲמָרֵית לְזַרְעָא דְבֵית יַעֲקֹב לְרֵיקָנוּ תְּבַעוּ דְחַלְתִּי אֲנָא יְיָ מְמַלֵל קְשׁוֹט מְחַוֵי כֵּיוְנָן: ^is-45-19

**20** אִתְכְּנִישׁוּ וֶאֱתוּ אִתְקְרָבוּ כַחֲדָא מְשֵׁיזְבֵי עַמְמַיָא לָא יָדְעִין דְנָסְבִין יַת אָעֵי צַלְמֵיהוֹן וּבְעָן מִן דַחֲלָא דְלָא יִפְרוֹק: ^is-45-20

**21** חַווֹ וְאִתְקְרָבוּ אַף אִתְמְלִיכוּ כַּחֲדָא מִן בְּסַר דָא מִלְקַדְמִין מִבְּכֵן חַוְיָהּ הֲלָא אֲנָא יְיָ וְלֵית עוֹד אֱלָהּ בַּר מִנִי אֱלָהּ דְזַכֵּי וּפָרִיק לֵית אֶלָא אֲנָא: ^is-45-21

**22** אִתְפְּנוּ לְמֵימְרִי וְאִתְפְּרִיקוּ כָּל דְבִסְיָפֵי אַרְעָא אֲרֵי אֲנָא אֱלָהָא וְלֵית עוֹד: ^is-45-22

**23** בְּמֵימְרִי קַיְמֵת נְפַק מִן קֳדָמַי בִּזְכוּ פִּתְגָם וְלָא יְבַטֵל אֲרֵי קֳדָמַי תִּכְרַע כָּל בֶּרֶךְ תְּקַיֵם כָּל לִישָׁן: ^is-45-23

**24** בְּרַם בְּמֵימְרָא דַייָ עֲלֵי אֲמַר לְאַיְתָאָה זַכְוָן וּתְקוֹף בְּמֵימְרֵהּ יוֹדוּן וְיִבְהַתוּן בְּטַעֲוָתְהוֹן כָּל עַמְמַיָא דַהֲווֹ מִתְגָרִין בְּעַמֵהּ: ^is-45-24

**25** בְּמֵימְרָא דַייָ יִזְכּוּן וְיִשְׁתַּבְּחוּן כָּל זַרְעָא דְיִשְׂרָאֵל: ^is-45-25

## Capítulo 46

**1** חֲמִיט בֵּל אִתְקְטֵף נְבוֹ הֲווֹ צַלְמָנֵיהוֹן דְמוּת חֵיוָא וּבְעִירָא מַטוּלֵי טַעֲוָתְהוֹן יַקִירִין עַל נָטְלֵיהוֹן וְאִנוּן מְשַׁלְהַיָן: ^is-46-1

**2** אִתְקְצִיצוּ וְאִתְקְטִפוּ כַּחֲדָא וְלָא יָכִילוּ לְשֵׁיזָבָא נַטְלֵיהוֹן וּפִלְחֵיהוֹן בְּשִׁבְיָא אֲזָלוּ: ^is-46-2

**3** קַבִּילוּ לְמֵימְרִי דְבֵית יַעֲקֹב וְכָל שְׁאָרָא דְבֵית יִשְׂרָאֵל דִרְחִימִין מִכָּל עַמְמַיָא וַחֲבִיבִין מִכָּל מַלְכְּוָתָא: ^is-46-3

**4** וְעַל עַלְמָא אֲנָא הוּא וְעַד עֲלָם עַלְמַיָא מֵימְרִי קַיָם אֲנָא בָרֵית כָּל אֱנָשָׁא וַאֲנָא בַדְרֵית יַתְהוֹן לְבֵינֵי עַמְמַיָא אַף אֲנָא אֶשְׁבּוֹק לְחוֹבֵיהוֹן וְאֶסְלַח: ^is-46-4

**5** לְמַן תְּדַמוּן קֳדָמַי וּתְשַׁווּן וּתְכַוְנוּן קֳדָמַי בִּקְשׁוֹט: ^is-46-5

**6** הָא עַמְמַיָא גָבָן דְהַב מִכִּיס וְכַסְפָא בְּמֹאזְנַיָא תַּקְלִין אָגְרִין קִינָאָה וְעָבֵיד לֵיהּ דַחֲלָא סָגְדִין אַף מִשְׁתַּעְבְּדִין: ^is-46-6

**7** נַטְלִין לֵיהּ עַל כַּתְפֵּיהוֹן סַבְלִין לֵיהּ מַחֲתִין לֵהּ בְּאַתְרֵהּ וְקָאֵים מֵאַתְרֵהּ לָא אֶפְשַׁר לֵיהּ דִינוּד אַף יִבְעֵי מִנֵהּ לָא יְתִיבִינֵהּ מַעַקְתֵהּ לָא יִפְרְקִנֵהּ: ^is-46-7

**8** אַדְכָּרוּ דָא וְאִתַּקָפוּ וַאֲתִיבוּ מְרוֹדִין עַל לֵב: ^is-46-8

**9** אִדְכַּרוּ קַדְמְיָתָא דְמִן עַלְמָא אֲרֵי אֲנָא אֱלָהּ וְלֵית עוֹד אֱלָהּ בַּר מִינִי: ^is-46-9

**10** מְחַוֵי מִן אַוְלָא לְסוֹפָא וּמִלְקַדְמִין דְלָא אִתְעֲבִידָא אֲמַר מִלְכִי יִתְקַיֵם וְכָל רְעוּתִי אַעְבֵּד: ^is-46-10

**11** דַאֲמַר לְכַנָשָׁא גַלְוָתָא מִמַדִינְחָא לְאַיְתָאָה בִגְלֵי כְעוֹף קַלִיל מַאֲרַע רְחִיקָא בְּנֵי אַבְרָהָם רְחִימִי אַף מַלְלֵית אַף אַיְתִינָהּ אַף אַתְקֵינְתָּא אַף אַעְבְּדִינָהּ: ^is-46-11

**12** קַבִּילוּ לְמֵימְרִי תַּקִיפֵי לִבָּא דִרְחִיקִין מִזְכוּתָא: ^is-46-12

**13** קְרִיבָא זַכְוָתִי לָא תִתְרַחֵק וּפוּרְקָנִי לָא יִתְעַכֵּב וְאֶתֵּן בְּצִיוֹן פָּרִיק לְיִשְׂרָאֵל תּוּשְׁבַּחְתִּי: ^is-46-13

## Capítulo 47

**1** חוּתִי וְתִיבִי עַל עַפְרָא מַלְכּוּ כְּנִשְׁתָּא דְבָבֶל תִּיבִי לְאַרְעָא לֵית כּוּרְסֵי יְקָר מַלְכוּת כַּשְׂדָאֵי אֲרֵי לָא תוֹסִיפִין דְיִקְרוּן לָךְ רַכִּיבָא וּמְפַנְקָא: ^is-47-1

**2** קַבִּילִי מְרוֹעָא וְעוּלִי בְשִׁעְבּוּד גְלָא יְקַר מַלְכוּתִיךְ אִתְּבַּרוּ שִׁלְטוֹנִיךְ אִתְבַּדְרוּ עַם מַשִׁרְיָתֵיךְ גְלוֹ כְמֵי נַהֲרָא: ^is-47-2

**3** תִּתְגְלֵי בַּהֲתָתִיךְ אַף יִתְחֲזֵי קְלָנִיךְ פּוּרְעֲנוּת גְמִירָא אִתְפְּרַע מִינִיךְ וַאֲשַׁנֵי דִינִיךְ מִבְּנֵי אֱנָשָׁא: ^is-47-3

**4** פָּרְקָנָא יְיָ צְבָאוֹת שְׁמֵהּ קַדִישָׁא דְיִשְׂרָאֵל: ^is-47-4

**5** תְּבִי שַׁתְקָא וְעוּלֵי בְקִבְלָא יְקַר מַלְכוּת כַּסְדָאֵי אֲרֵי לָא תּוֹסִיפִין דְיִקְרוֹן לִיךְ תְּקֵיפַת מַלְכְּוָן: ^is-47-5

**6** רְגֵיזִית עַל עַמִי אַפֵיסִית אַחְסַנְתִּי וּמְסַרְתִּינוּן בִידָךְ לָא אִתְמַלֵית עֲלֵיהוֹן רַחֲמִין עַל סָבָא אַתְקֵיפְתָּא מַרְוָתִיךְ לַחְדָא: ^is-47-6

**7** וַאֲמַרְתְּ לַעֲלָם אֱהֵי תַקִיפַת מַלְכְּוָן עַד לָא שַׁוִית אִלֵין עַל לִבִּיךְ לָא אִדְכַּרְתְּ לְסוֹפָא: ^is-47-7

**8** וּכְעַן שְׁמַעִי דָא מְפַנֶקְתָּא דְיָתְבָא לְרָחֲצָן דְאָמְרָא בְּלִבָּהּ אֲנָא וְלֵית בַּר מִינִי עוֹד לָא אֵיתֵיב אַרְמְלוּ וְלָא אֵדַע תִּיכְלוּ: ^is-47-8

**9** וְיָתְיָן לִיךְ תַּרְתֵּין אִלֵין זְמַן בְּיוֹמָא חַד תְּכַל וְאַרְמְלוּ כִּדְשָׁלְמָן יֵיתוּן עֲלָךְ בִּסְגִיאוּת חָרָשָׁךְ בִּתְקוֹף קְסָמָךְ לַחֲדָא: ^is-47-9

**10** וְאִתְרְחֵיצְתְּ בְּבִישְׁתִּיךְ אֲמַרְתְּ לֵית דְחָזֵי לִי חוּכְמְתִיךְ וּמַדְעִיךְ הִיא קַלְקַלְתִיךְ וַאֲמַרְתְּ בְּלִבֵּיךְ אֲנָא וְלֵית בַּר מִינִי עוֹד: ^is-47-10

**11** וְתֵיתֵי עֲלָךְ בִּישְׁתָּא לָא תֵדְעִין לְמִבְעֵי עֲלָהּ וְתִיפּוֹל עֲלָךְ עָקָא לָא תִיכְּלִין לְאַעְדָיוּתָהּ וְתֵיתֵי עֲלָךְ בִּתְכֵּיף אִתְרְגוּשָׁא לָא תִידְעִין: ^is-47-11

**12** קוּמִי כְעַן בְּקִסוּמִיךְ וּבְסַגְיוּת חָרָשִׁיךְ דַהֲוֵית מִתְעַסְקָא בְּהוֹן מִיַנְקוּתִיךְ מָאִים תִּכְלִין לַהֲנָאָה מָאִים תִּכְלִין לְמִתְקַף: ^is-47-12

**13** לָאֵית בִּסְגִיאוּת מַלְכַּךְ יְקוּמוּן כְּעַן וְיִפְרְקוּנִיךְ דְמַסְכִּין לְמַזָלַת שְׁמַיָא וּדְחָזָן בְּכוֹכְבַיָא מְהוֹדְעִין זִמְנַיָא מַטְעָן לִיךְ לְמֵימָר כֵּן עֲתִיד לְמֵיתֵי עֲלָךְ יְרַח בִּירָח: ^is-47-13

**14** הָא הֲווֹ חֲלָשִׁין כְּקַשָׁא עַמְמַיָא דְתַקִיפִין כְּאֶשְׁתָּא שֵׁיצִיאוּנוּן לָא יְשֵׁיזְבוּן יַת נַפְשְׁהוֹן מִיַד קָטוֹלִין לֵית שְׁאָר וּמְשֵׁיזֵיב אַף לָא אֲתַר לְאִשְׁתֵּיזָבָא בֵיהּ: ^is-47-14

**15** כֵּן הֲווֹ בִיךְ עוֹבָדֵי שְׁקָרַיִךְ דַהֲוֵית מִתְעַסְקָא בְּהוֹן מִיַנְקוּתִיךְ שִׁלְטוֹנַי תּוּקְפִיךְ גְבַר לָקֳבֵיל אַפּוֹהִי גְלוּ לֵית דְפָרִיק לִיךְ: ^is-47-15

## Capítulo 48

**1** שְׁמָעוּ דָא בֵית יַעֲקֹב דָמִתְקְרָן בִּשְׁמָא דְיִשְׂרָאֵל וּמִזַרְעִית יְהוּדָא נְפַקוּ דִגְזַר לְהוֹן קְיָם בִּשְׁמָא דַייָ אֱלָהָא דְיִשְׂרָאֵל לָא יִפְסֵיק דָכְרָנֵיהוֹן הֲלָא קַיָם מֵימְרֵהּ בִּקְשׁוֹט וּבְזָכוּ: ^is-48-1

**2** אֲרֵי בְקַרְתָּא דְקוּדְשָׁא חוּלָקְהוֹן וְעַל אֱלָהָא דְיִשְׂרָאֵל רוֹחֲצָנְהוֹן יְיָ צְבָאוֹת שְׁמוֹ: ^is-48-2

**3** קַדְמֵיתָא מִבְּכֵן חַוֵתִי וּמִמֵימְרִי נְפַקָא וּמְסַרְתִּינוּן בִּתְכֵיף עֲבַדְתִּינוּן וַאֲתָאָה: ^is-48-3

**4** גְלֵי קֳדָמַי דְאַתְּ סַרְבָן וְקָשֵׁי כְּבַרְזְלָא קָדְלָךְ וּבֵית עֵינָךְ חֲסִין כִּנְחָשָׁא: ^is-48-4

**5** וְחַוֵיתִי לָךְ מִבְּכַן עַד לָא יֵיתְיָן בְּסַרְתָּךְ דִלְמָא תֵימַר דְחַלְתִּי עֲבַדְתִּינוּן וְצַלְמִי וּמַתָּכִי אַתְכִינוּן: ^is-48-5

**6** שְׁמַעְתָּא הָא אִתְגְלִיאַת לְכָל עַמָא מַה דְאִתְגְלִיאַת לְכוֹן וְאַתּוּן הֲלָא תְחַווּן בְּסַרְתָּךְ חַדְתָּן מִכְּעַן וּנְטִירַן וְלָא יְדַעְתִּינוּן: ^is-48-6

**7** כְּעַן אִתְבְּרִיאָה וְלָא מִבְכֵן וּקְדָם יוֹם מֵיתֵיהוֹן וְלָא בְסַרְתִּינוּן דִלְמָא תֵימַר הָא יְדַעְתִּינוּן: ^is-48-7

**8** אַף לָא שְׁמַעְתְּ לְמִלֵי נְבִיַיָא אַף לָא קַבֵּילְתָּא אוּלְפַן אוֹרַיְתָא אַף לְפִתְגָמֵי בִּרְכַּן וּלְוָטִין קְיָמִי דַאֲקֵמִית עִמְכוֹן בְּחוֹרֵב לָא אַרִיכֵינְתָּא אוּדְנָךְ לְקַבָּלָא אֲרֵי גְלֵי קֳדָמַי דְשַׁקָרָא תְשַׁקֵר וּמְרוֹד מִמְעַיִן יִתְקְרֵי לָךְ: ^is-48-8

**9** בְּדִיל שְׁמִי אַרְחֵיק רוּגְזִי וְתוּשְׁבַּחְתִּי אָקִים לָךְ בְּדִיל דְלָא לְשֵׁיצָיוּתָךְ: ^is-48-9

**10** הָא צְרַפְתָּךְ וְלָא בִּכְסַף בְּחַרְתָּךְ בִּדְחוֹק מִסְכֵּינוּ: ^is-48-10

**11** בְּדִיל שְׁמִי בְּדִיל מֵימְרִי אַעְבֵּיד דְלָא יִתָּחָל וִיקָרִי דְאִתְגְלֵתִי עֲלֵיכוֹן לְעַם אוֹחֲרָן לָא אֶתֵּן: ^is-48-11

**12** קַבִּילוּ לְמֵימְרִי דְבֵית יַעֲקֹב וְיִשְׂרָאֵל מְזַמְנָא אֲנָא הוּא אֲנָא הוּא דְמִלְקָדְמִין אַף עַלְמֵי עַלְמַיָא דִילִי אִינוּן וּבַר מִנִי לֵית אֱלָהָא: ^is-48-12

**13** אַף בְּמֵימְרִי שַׁכְלֵילִית אַרְעָא וּבִגְבוּרְתִּי תָּלֵית שְׁמַיָא קְרֵית אֲנָא לְהוֹן קָמוּ כַּחֲדָא: ^is-48-13

**14** אִתְכְּנָשׁוּ כוּלְהוֹן וּשְׁמָעוּ מַן בְּהוֹן חַוִי יַת אִלֵין יְיָ דְרַחֵם לֵיהּ לְיִשְׂרָאֵל יַעְבֵּיד רְעוּתֵהּ בְּבָבֶל וּתְקוֹף דְרַע גְבוּרְתֵּהּ יַגְלֵי בְכַסְדָאֵי: ^is-48-14

**15** אֲנָא בְּמֵימְרִי גְזָרִית קְיָם עִם אַבְרָהָם אֲבוּכוֹן אַף רַבִּיתֵהּ אָעִילְתֵּהּ לְאַרַע בֵּית שְׁכִינְתִּי וְאַצְלַח יַת אוֹרְחֵהּ: ^is-48-15

**16** אִתְקְרָבוּ לְמֵימְרִי שְׁמָעוּ דָא לָא מִן אַוְלָא בְּסִתְרָא מַלְלֵית מֵעִדַן דְאִתְפְּרִישׁוּ עַמְמַיָא מִדְחַלְתִּי תַּמָן אַבְרָהָם אֲבוּכוֹן קָרִיבְתֵּהּ לְפוּלְחָנִי אֲמַר נְבִיָא וּכְעַן יְיָ אֱלֹהִים שַׁלְחַנִי וּמֵימְרֵהּ: ^is-48-16

**17** כִּדְנַן אֲמַר יְיָ פְּרִיקָךְ קַדִישָׁא דְיִשְׂרָאֵל אֲנָא יְיָ אֱלָהָךְ מַלֵיף לָךְ לַהֲנָאָה מְחַוֵי לָךְ בְּאוֹרַח דִתְהָךְ: ^is-48-17

**18** אִילוּ אֲצִיתָא לְפִקוּדַי וַהֲוֵי פוֹן כִּשְׁפַע נְהַר פְּרָת שְׁלָמָךְ וּזְכוּתָךְ כְּגַלֵי יַמָא: ^is-48-18

**19** וַהֲווֹ פּוֹן סַגִין כְּחָלָא דְיַמָא בְּנָךְ וּבְנֵי בְנָךְ כְּפֵּירוּדוֹהִי לָא יִפְסוֹק וְלָא יִשְׁתֵּצֵי שְׁמֵיהּ דְיִשְׂרָאֵל מִן קֳדָמַי לַעֲלַם: ^is-48-19

**20** פּוּקוּ מִבָּבֶל עֲרוּקוּ מִמְדִינַת אֲרַע כַּסְדָאֵי בְּקַל תּוּשְׁבַּחְתָּא חַווּ וּבַסַרוּ דָא אַפְקוּהָא עַד סְיָפֵי אַרְעָא אֱמָרוּ פְּרַק יְיָ עַבְדוֹהִי דְבֵית יַעֲקֹב: ^is-48-20

**21** וְלָא אַצְחֵינוּן בְּחָרְבָתָא דַבְּרִינוּן מַיָא מִטוּנְרָא אַפִּיק לְהוֹ וּבְזַע טִינְרָא וּנְגוּדוּ מַיָא: ^is-48-21

**22** לֵית שְׁלָם אֲמַר יְיָ לְרַשִׁיעַיָא: ^is-48-22

## Capítulo 49

**1** קַבִּילוּ נַגְוָן לְמֵימְרִי וְאַצִיתוּ מַלְכְּוָן מֵרָחִיק יְיָ עַד לָא הֲוֵיתִי זַמְנַנִי מִמְעֵי אִמִי אִדְכַּר שְׁמִי: ^is-49-1

**2** וְשַׁוִי פִּתְגָמוֹהִי בְּפוּמִי כַּחֲרַב חֲרִיפָא בִּטְלַל גְבוּרְתֵּהּ אָגִין עָלַי וְשַׁוְיַנִי כְּגִיר בְּחִיר דִי בְּבֵית אֲזֵינִין מִסַתָּר: ^is-49-2

**3** וַאֲמַר לִי עַבְדִי אַתְּ יִשְׂרָאֵל דְבָךְ אֶשְׁתַּבָּח: ^is-49-3

**4** וַאֲנָא אָמָרֵית לְרֵיקָנוּ לָאֵיתִי לִלְמָא וְלָא מִדָעַם חֵילֵי שֵׁיצֵיתִי בְּרַם דִינִי גְלֵי קֳדָם יְיָ וַאֲגַר עוֹבָדִי קֳדָם אֱלָהִי: ^is-49-4

**5** וּכְעַן אֲמַר יְיָ דְאַתְקְנַנִי מִמְעַיִן לְמֶהֱוֵי עָבֵיד פַלָח קָדָמוֹהִי לַאֲתָבָא דְבֵית יַעֲקֹב לְפוּלְחָנֵהּ וְיִשְׂרָאֵל לִדְחַלְתֵּהּ יִתְקְרַב וְיַקִירְנָא קֳדָם יְיָ וּמֵימַר אֱלָהִי הֲוָה בְסַעֲדִי: ^is-49-5

**6** וַאֲמַר הַזְעֵיר לְכוֹן דְאַתּוּן מִתְקְרַן עַבְדַי לַאֲקָמָא יַת שִׁבְטֵי יַעֲקֹב וְגַלְוַת יִשְׂרָאֵל לַאֲתָבָא וְאֶתְּנִינָךְ לְנֵיהוֹר עַמְמִין לְמֶהֱוֵי פּוּרְקָנִי עַד סְיָפֵי אַרְעָא: ^is-49-6

**7** כִּדְנַן אֲמַר יְיָ פַּרְקֵהּ דְיִשְׂרָאֵל קַדִישֵׁהּ לְדִבְּסִירִין בֵּינֵי עַמְמַיָא לְדִמְטַלְטְלִין בֵּינֵי מַלְכְּוָתָא לִדְהֲווֹ עָבְדִין לְשִׁלְטוֹנִין לְהוֹן מַלְכִין יֶחְזוּן וִיקוּמוּן רַבְרְבִין וְיִסְגְדוּן בְּדִיל יְיָ דִמְהֵימָן קַדִישָׁא דְיִשְׂרָאֵל וְאִתְרְעֵי בָךְ: ^is-49-7

**8** כִּדְנַן אֲמַר יְיָ בְּעִידַן דְאַתּוּן עָבְדִין רְעוּתִי אֲנָא מְקַבֵּיל צְלוֹתְכוֹן וּבְיוֹם עָקָא אֲנָא מְקַיֵם פּוּרְקַן וְסָעֵיד לְכוֹן וְאֶתְקְנִינָךְ וְאֶתְּנִינָךְ לִקְיַם עַם לַאֲקָמָא צַדִיקַיָא דְשָׁכְבִין בְּעַפְרָא לְאַחְסָנָא יְרוּתָן דְצָדְיָן: ^is-49-8

**9** לְמֵימָר לִדְאֲסִירִין בֵּינֵי עַמְמַיָא פּוּקוּ וְלִדְעַגִינִין בֵּינֵי מַלְכְּוָתָא כַּד בְּקִבְלָא אִתְגְלוּ לְנֵיהוֹר עַל אוֹרְחָן יִשְׁרוּן וּבְכָל נֶגְדֵין בֵּית מֵישְׁרֵיהוֹן: ^is-49-9

**10** לָא יִכְפְנוּן וְלָא יִצְחוּן וְלָא יִלְקִינוּן שְׁרָבָא וְשִׁמְשָׁא אֲרֵי דַעֲתִיד לְרַחֲמָא עֲלֵיהוֹן יְדַבְּרִינוּן וְעַל מַבּוּעֵי מַיִין יַשְׁרִינוּן: ^is-49-10

**11** וַאֲשַׁוֵי כָּל טוּרַיָא כְּבִישִׁין קֳדָמֵיהוֹן כְּאוֹרַח וְכִבְשַׁיָא יְרוּמוּן: ^is-49-11

**12** הָא אִלֵין מֵרָחִיק יֵיתוֹן וְהָא אִלֵין מִצִפּוּנָא וּמִמַעֲרְבָא וְאִלֵין מֵאֲרַע דָרוֹמָא: ^is-49-12

**13** שַׁבָּחוּ שְׁמַיָא וּבוּעִי אַרְעָא וְדוּצוּ טוּרַיָא תּוּשְׁבַּחְתָּא אֲרֵי עֲתִיד יְיָ לְנַחֲמָא עַמֵיהּ וְעַל עִנְוְתָנוֹהִי יְרַחֵם: ^is-49-13

**14** וַאֲמַרֵת צִיוֹן סַלֵיק שְׁכִינְתֵּהּ יְיָ מִנִי וַיָי רַחֲקָנִי: ^is-49-14

**15** הַאֶפְשַׁר דְתִתְנְשֵׁי אִתְּתָא בְּרָהּ מִלְרַחָמָא עַל בַּר מְעָהָא מְתִיבָא כְּנִשְׁתָּא דְיִשְׂרָאֵל וַאֲמַרַת אִם לֵית קֳדָמוֹהִי אִתְנַשָׁאָה דִלְמָא לָא מִתְנַשֵׁי לִי יַת דַעֲבָדִית עֵגֶל דִדְהַב אֲמַר לָהּ נְבִיָא אַף אִלֵין אִתְנַשְׁיָן מְתִיבָא וְאֶמְרָה לֵיהּ אִם אִית קֳדָמוֹהִי אִתְנְשָׁאָה דִלְמָא מִתְנְשֵׁי לִי יַת דַאֲמָרִית בְּסִינַי נַעְבֵּד וּנְקַבֵּל מֵיתִיב וְאָמַר לָהּ מֵימְרִי לָא יְרַחֲקִינָךְ: ^is-49-15

**16** הָא כִּדְעַל יְדִין אַתְּ צַיְרָא קֳדָמָי שׁוּרָךְ לְקִבְלִי תְּדִירָא: ^is-49-16

**17** יוֹחוּן בְנַיְכִי חָרְבָתַיִךְ מְפַגְרָךְ וּמְחַרְבָּךְ מִנִיךְ יִגְלוֹן: ^is-49-17

**18** זְקוּפִי יְרוּשְׁלֵם סְחוֹר סְחוֹר עֵינָךְ וַחֲזָא כָּל בְּנֵי עַם גַלְוָתִיךְ מִתְכַּנְשִׁין וְאָתָן לְגַוִיךְ קְיַם אֲנָא אֲמַר יְיָ אֲרֵי כוּלְהוֹן לִיךְ כִּלְבוּשׁ דִיקָר וְעוֹבָדֵיהוֹן בְּגַוִיךְ כְּקִישׁוּט כַּלָתָא: ^is-49-18

**19** אֲרֵי חָרְבָתַיִךְ וְצַדְיוּתִיךְ וַאֲרַע מְפַגְרוּתִיךְ אֲרֵי כְעַן תִּדַחֲקוּן מִיָתִיב וְיִתְרַחֲקוּן מְסַלְעֲמָךְ: ^is-49-19

**20** מִכְּעַן יֵימְרוּן חַד חַד בְּגַוִיךְ בְּנֵי עַם גַלְוָתִיךְ עָק לִי אַתְרָא רְוַח לִי וְאֵיתִיב: ^is-49-20

**21** וְתֵימְרִין בְּלִבִּיךְ מַן רַבִּי לִי יַת אִלֵין וַאֲנָא תִכְלָא וִיחִידָא גַלְיָא וּמְטַלְטְלָא וְאִלֵין מַן רַבִּי הָא אֲנָא אִשְׁתַּאֲרֵית בִּלְחוֹדִי אִלֵין הֵיכָא הֲווֹ: ^is-49-21

**22** כִּדְנַן אֲמַר יְיָ אֱלֹהִים הָא אֶגְלֵי בְּעַמְמַיָא גְבוּרְתִי וְעַל מַלְכְּוָתָא אֲרִים נִסִי וְיֵיתוּן בְנָךְ בְּצִיבִין וּבְנָתָךְ עַל פַּרְוָן יִתְנַטְלָן: ^is-49-22

**23** וִיהוֹן מַלְכַיָא תּוּרְבְּיָנָךְ וּמַלְכְּוַתְהוֹן יְשַׁמְשׁוּנִיךְ עַל אַפֵּיהוֹן עַל אַרְעָא יִשְׁתַּטְחוּן לְמִבְעֵי מִנִיךְ וַעֲפַר רִגְלָךְ יְלַחֲכוּן וְתֵידְעִין אֲרֵי אֲנָא יְיָ דְלָא יִבְהֲתוּן צַדִיקַיָא דִמְסַבְרִין לְפוּרְקָנִי: ^is-49-23

**24** הֲיִתְנְסֵיב מִגָבָּרָא עֲדִי וְאִם דִשְׁבוֹ זַכָּאִין יִשְׁתַּזֵיב: [ת"א] אֲמָרֵת יְרוּשְׁלֵם הַאֶפְשַׁר דְיִתְנְסֵיב מֵעֵשָׂו רַשִׁיעָא דַאֲמִיר עֲלֵהּ דְצַדִיקַיָא הוּא יִשְׁתֵּיזֵיב: ^is-49-24

**25** אֲרֵי כִדְנַן אֲמַר יְיָ אַף דִשְׁבוֹ גִבָּרִין אָתִיב וְדַעֲדוֹ תַקִיפִין אֱשֵׁיזֵיב וְיַת פּוּרְעֲנוּתִיךְ אֲנָא אִתְפְּרַע וְיַת בְּנָךְ אֲנָא אֶפְרוֹק: [ת"א] אֲרֵי כִדְנַן אֲמַר יְיָ אַף עֲדָאָה דַעֲדָא מִנִיךְ עֵשָׂו גִבָּרָא יִתְנְסֵב מִנֵהּ וְשִׁבְיָא דִשְׁבָא מִנִיךְ יִשְׁמָעֵאל גֵיוְתָנָא דַאֲמִיר עֲלֵהּ עָרוֹד בֶּאֱנָשָׁא יִשְׁתֵּיזֵיב וְיַת פּוּרְעֲנוּתִיךְ אֲנָא אִתְפְּרַע וְיַת בְּנָךְ אֲנָא אֶפְרוֹק: ^is-49-25

**26** וְאֶתֵּן יַת בְּסַר דַהֲווֹ מוֹנָן לִיךְ מֵיכַל לְכָל עוֹפָא דִשְׁמַיָא וּכְמָא דְמִתְרַוָן מֵחֲמַר מְרֵית כֵּן חַיַת בְּרָא מִדִמְהוֹן תִּתְרַוֵי וְיֵדְעוּן כָּל בִּסְרָא אֲרֵי אֲנָא יְיָ פָּרְקִיךְ וּמְשֵׁיזְבִיךְ תַּקִיפָא דְיַעֲקֹב: ^is-49-26

## Capítulo 50

**1** כִּדְנַן אֲמַר יְיָ אֵידָא הִיא אִגְרַת פִּטוּרִין דִיהָבֵית לִכְנִשְׁתְּכוֹן אֲרֵי אִתְרַחֲקַת אוֹ מִן גְבַר דְלֵהּ חוֹבָא קֳדָמַי דְזַבְּנֵית יַתְכוֹן לֵהּ הָא בְחוֹבֵיכוֹן אִזְדַבַּנְתּוּן וּבְמָרְדֵיכוֹן אִתְרַחֲקַת כְּנִשַׁתְכוֹן: ^is-50-1

**2** מָא דֵין שְׁלִיחַת נְבִיֵי וְלָא תָבוּ אִתְנַבִּיאוּ וְלָא קַבִּילוּ הַאִתְקְפָדָא אִתְקְפָדַת גְבוּרְתִּי מִלְמִפְרַק וְאִם לֵית קֳדָמַי חֵיל לְשֵׁיזָבָא הָא בִמְזוֹפִיתִי אַחֲרִיב יַמָא אֱשַׁוֵי נַהֲרִין מַדְבְּרָא יִסְרוֹן נוּנֵיהוֹן מִבְּלִי מַיָא וִימוּתוּן בְּצַחוּתָא: ^is-50-2

**3** אֲכַסֵי שְׁמַיָא כִּדְבְּקַבְלָא וּבְסַקָא אֲשַׁוֵי כְּסוּתְהוֹן: ^is-50-3

**4** יְיָ אֱלֹהִים יְהַב לִי לְשַׁן דְמַלְפִין לְהוֹדָעָא אַלְפָא לְצַדִיקַיָא דִמְשַׁלְהָן לְפִתְגָמֵי אוֹרַיְתָא חוּכְמָא בְכֵן בִּצְפַר בִּצְפַר מַקְדִים לְשַׁלָחָא נְבִיאוֹהִי מָאִים יִתְפַּתְחַן אוּדְנֵי חַיָבַיָא וִיקַבְּלוּן אוּלְפַן: ^is-50-4

**5** יְיָ אֱלֹהִים שָׁלָחַנִי לְאִתְנַבָּאָה וַאֲנָא לָא סְרֵיבֵית לַאֲחוֹרָא לָא אִסְתַּחֲרֵית: ^is-50-5

**6** גַבֵּי יְהָבֵית לְמָחָן וְלִיסְתֵּי לְמָרְטָן אַפִּי לָא טַמְרֵית מֵאִתְכְּנָעוּ וָרוֹק: ^is-50-6

**7** וַיָי אֱלֹהִים סָעִיד לִי עַל כֵּן לָא אִתְכְּנָעִית עַל כֵּן שַׁוֵיתִי אַפִּי תַקִיפִין כְּטִינָרָא וְיָדַעֲנָא אֲרֵי לָא אִתְבְּהֵית: ^is-50-7

**8** קְרִיבָא זְכוּתִי מַן יְדִין עִמִי נְקּוּם כַּחֲדָא מִן בְּעֵיל דִינִי יִתְקְרֵיב לְוָתִי: ^is-50-8

**9** הָא יְיָ אֱלֹהִים סָעִיד לִי מַן הוּא דִי יְחַיְבִינַנִי הָא כוּלְהוֹן כִּלְבוּשָׁא דִבְלִי וּכְעָשָׁא אָכִיל לֵהּ: ^is-50-9

**10** (אֲמַר נְבִיָא עֲתִיד קוּדְשָׁא בְּרִיךְ הוּא לְמֶהֱוֵי אֲמַר לְעַמְמַיָא) מַן בְּכוֹן מִדַחֲלַיָא דַייָ דִי שְׁמַע בְּקַל עַבְדֵהּ נְבִיָא דַעֲבַד אוֹרַיְתָא בְעָקָא כְּגִבַּר דִמְהַלֵךְ בְּקָבְלָא וְלֵית זְהוֹר לֵהּ מִתְרְחִיץ בִּשְׁמָא דַייָ וּמִסְתְּמִיךְ עַל פּוּרְקָנָא דֶאֱלָהֵהּ: ^is-50-10

**11** (מְתִיבִין עַמְמַיָא וְאָמְרִין קֳדָמוֹהִי רִבּוֹנָנָא לָא אֶפְשַׁר לָנָא לְמֶעְסַק בְּאוֹרַיְתָא אֲרֵי כָּל יוֹמָנָא אִתְגְרֵינָא דֵין עִם דֵין בִּקְרָבָא וְכַד נְצַחְנָא דֵין לְדֵין אוֹקֵידְנָא בָתֵּיהוֹן וּשְׁבִינָא טַפְלְהוֹן וְנִכְסֵיהוֹן וּבַהֲדָא גַוְנָא שְׁלִימוּ יוֹמָנָא וְלָא אֶפְשַׁר לָנָא לְמֶעְסַק בְּאוֹרַיְתָא מְתִיב קוּדְשָׁא בְרִיךְ הוּא וַאֲמַר לְהוֹן) הָא כּוּלְכוֹן מְגָרֵן בְּאֶשְׁתָּא מַתְקְפֵי חֶרֶב אֱזִילוּ פִּילוּ בְּאֶשְׁתָּא דִגְרֵיתוּן וּבְחַרְבָּא דִתְקֵיפְתּוּן מִמֵימְרִי הֲוַת דָא לְכוֹן לְתַקְלוּתְכוֹן תְּחוּבוּן: ^is-50-11

## Capítulo 51

**1** קַבִּילוּ לְמֵימְרִי רָדְפֵי קוּשְׁטָא דְבָעָן אוּלְפַן מִן קֳדָם יְיָ אִסְתַּכָּלוּ דִי בַּחֲצִיבָא מִטִינָרָא אִתְחָצַבְתּוּן וְכִפְסוּלָא דְמִגוּב רֵיקָן אִתְפְסִלְתּוּן: ^is-51-1

**2** אִסְתַּכָּלוּ בְּאַבְרָהָם אֲבוּכוֹן וּבְשָׂרָה דְאַעְדִיאַתְכוֹן אֲרֵי חַד הֲוָה אַבְרָהָם יְחִידִי בְּעַלְמָא קָרֵיבְתֵּהּ לְפוּלְחָנִי וּבֵרַכְתֵּהּ וְאַסְגֵיתֵהּ: ^is-51-2

**3** אֲרֵי עֲתִיד יְיָ לְנַחֲמָא צִיוֹן לְנַחֲמָא כָּל חָרְבָתָהָא וִישַׁוֵי מַדְבְּרָהָא כְּעֵדֶן וּמֵישְׁרָאָה כְּגִינְתָא דַייָ בִּיעַ וְחֶדְוָא יִשְׁתְּכַח בָּהּ מַעֲלֵי תוֹדָתָא וְקַל דִמְשַׁבְּחִין: ^is-51-3

**4** קַבִּילוּ לְמֵימְרִי עַמִי וּכְנִשְׁתִּי לְפוּלְחָנִי אֲצִיתָא אֲרֵי אוֹרַיְתָא מִן קֳדָמַי תִּיפּוֹק וְדִינַי כְּנֵיהוֹר לֵהּ עַמְמִין אֲגַלֵי יִשְׁתַּבְּחוּן: ^is-51-4

**5** קְרִיבָא זְכוּתִי נְפַק פּוּרְקָנִי וּבִתְקוֹף דְרַע גְבוּרְתִּי עַמְמַיָא יִתְדְנוּן לְמֵימְרִי נַגְוָן יְסַבְּרוּן וְלִיתְקוֹף דְרַע גְבוּרְתִּי יִכְתְּרוּן: ^is-51-5

**6** זְקִיפוּ לִשְׁמַיָא עֵינֵיכוֹן וְאִסְתַּכָּלוּ בְאַרְעָא מִלְרַע אֲרֵי שְׁמַיָא כִּתְנָנָא דְעָדִי כֵן יֶעְדוּ וְאַרְעָא כִּכְסוּתָא דְבָלְיָא כֵּן תִּבְלֵי וְיָתְבָהָא אַף אִינוּן הָכֵן יְמוּתוּן וּפוּרְקָנִי לַעֲלַם יְהֵי וְזָכוּתִי לָא תִתְעַכָּב: ^is-51-6

**7** קַבִּילוּ לְמֵימְרִי יָדְעֵי קוּשְׁטָא עַמָא דְאוּלְפַן אוֹרַיְתִי בְּלִבְּהוֹן לָא תִדְחֲלוּן מֵחִיסוּדֵי בְנֵי אֱנָשָׁא וּמֵאִתְרַבְרְבוּתְהוֹן לָא תִתַבְרוּן: ^is-51-7

**8** אֲרֵי בִלְבוּשָׁא דְאָכִיל לֵהּ עָשָׁא וּכְעִמְרָא דְאָחֵיד בֵהּ רוּקְבָא וְזָכוּתִי לַעֲלַם תְהֵי וּפוּרְקָנִי לְדָר דָרִין: ^is-51-8

**9** אִתְגְלָא לִבְשִׁי תְקוֹף גְבוּרָא מִן קֳדָם יְיָ אִתְגְלָא כְּיוֹמֵי קֳדָם דָרַיָא דְמִלְקָדָמִין הֲלָא בְדִילָךְ כְּנִשְׁתָּא דְיִשְׂרָאֵל תְּבָרֵית גִבָרַיָא שֵׁיצֵיתִי פַּרְעֹה וּמַשִׁרְיָתֵהּ דַהֲווּ תַּקִיפִין כְּתַנִינָא: ^is-51-9

**10** הֲלָא בְדִילָךְ כְּנִשְׁתָּא דְיִשְׂרָאֵל אַחְרְבֵית יַמָא מֵי תְהוֹם רַבָּה שַׁוֵיתִי עוּמְקֵי יַמָא אוֹרַח לְמֵיגָז מְשֵׁיזְבַיָא: ^is-51-10

**11** וּפְרִיקַיָא דַייָ יִתְכַּנְשׁוּן מִבֵּינֵי גַלְוַתְהוֹן וְיַעֲלוּן לְצִיוֹן בְּתוּשְׁבַּחְתָּא וְחֶדְוַת עֲלָם תְּהֵי לְהוֹן דְלָא פָסְקָה וַעֲנַן יְקַר יְהֵי מַטֵיל עַל רֵישֵׁיהוֹן בִּיעַ וְחֶדְוָה יִשְׁכְּחוּן וְיֵסוּף מִנְהוֹן מִבֵּית יִשְׂרָאֵל דָווֹנָא וְתֵינַחְתָּא: ^is-51-11

**12** אֲנָא אֲנָא הוּא מְנַחֶמְכוֹן מִמַן אַתּוּן דַחֲלִין מֵאֱנָשָׁא דְמָאֵית וּמִבַּר אֱנָשָׁא דִי כְעִסְבָּא חֲשִׁיב: ^is-51-12

**13** וְאִתְנְשֵׁיתָא פּוּלְחָנָא דַייָ דְעָבְדָךְ דִתְלָא שְׁמַיָא וְשַׁכְלֵיל אַרְעָא וּדְחַלְתָּא תְדִירָא כָּל יוֹמָא מִן קֳדָם חֲמַת מְעִיקָא כְּמָא דִמְתַקְנִין לְחַבָּלָא וּכְעַן אָן הִיא חֲמַת דִמְעִיקָא: ^is-51-13

**14** מוֹחִי פּוּרְעֲנוּתָא לְאִתְגְלָאָה וְלָא יְמוּתוּן צַדִיקַיָא לְחַבֵּל וְלָא יַחְסְרוּן מְזוֹנֵיהוֹן: ^is-51-14

**15** וַאֲנָא יְיָ אֱלָהָךְ דִנְזֵיף בְּיַמָא וְהָמָן גַלוֹהִי יְיָ צְבָאוֹת שְׁמֵהּ: ^is-51-15

**16** וְשַׁוֵיתִי פִּתְגָמֵי נְבוּאָתִי בְּפוּמָךְ וּבִטְלַל גְבוּרְתִּי אַגְנֵית עֲלָךְ לְקַיָמָא עַמָא דַאֲמִיר עֲלֵיהוֹן דְיִסְגוּן כְּכוֹכְבֵי שְׁמַיָא וּלְשַׁכְלָלָא כְנִשְׁתָּא דַאֲמִיר עֲלֵיהוֹן דְיִסְגוּן כְּעַפְרָא דְאַרְעָא וּלְמֵימַר לִדְדָיְרִין בְּצִיוֹן עַמִי אַתּוּן: ^is-51-16

**17** אִתְרַבָּא אִתְרַבָּא קוּמִי יְרוּשְׁלֵם דְקַבֵּילְתְּ מִן קֳדָם יְיָ יַת כָּסָא דְחֵימְתֵהּ יַת פַּיְלֵי כָּסָא דִלְוָטָא שְׁתֵית אַעְרֵית: ^is-51-17

**18** לֵית דִמְנַחֵם לָהּ מִכָּל בְּנִין דִילֵידַת וְלֵית דְמַתְקִיף בִּידָהּ מִכָּל בְּנִין דְרַבִּיאַת: ^is-51-18

**19** תַּרְתֵּין עָקָן אָתָאָה עֲלָךְ יְרוּשְׁלֵם לָא יְכֵילֵית לְמֵיקָם כַּד אַרְבַּע יֵיתוּן עֲלָךְ בִּיזָא וּתְבָרָא וְכַפְנָא וְחַרְבָּא לֵית דִי מְנַחֲמֵיךְ אֱלָהֵין אֲנָא: ^is-51-19

**20** בְּנַיִךְ יְהוֹן מִטָרְפִין רָמָן בְּרֵישׁ כָּל שׁוּקַיָא כְּמִזְרָקֵי מְצַדָן מְלַן חֵימְתָא מִן קֳדָם יְיָ מְזוֹפִיתָא מִן קֳדָם אֱלָהָיִךְ: ^is-51-20

**21** בְּכֵן שִׁמְעִי כְעַן דָא מְטַלְטַלְתָּא דְרַוְיָא מִן עָקָא וְלָא מִן חֲמָר: ^is-51-21

**22** כִּדְנַן אֲמַר רִבּוֹנִיךְ יְיָ וֵאלָהָיִךְ דַעֲתִיד לְמֶעְבַּד פּוּרְעֲנוּת דִין עַמֵהּ הָא קַבֵּלִית מִן יְדִיךְ יַת כָּסָא דִלְוָטָא יַת פַּיְלֵי כָסָא דְחֵימְתִי לָא תוֹסִיפִין לְמִשְׁתָּהּ עוֹד: ^is-51-22

**23** וְאֶמְסְרִינָהּ בְּיַד דַהֲווֹ מוֹנָן לִיךְ דַהֲווֹ אָמְרִין לְנַפְשֵׁיךְ אַמְאִיכִי וְנֶעְדֵי וְאַמְאֵיכְתְּ כְּאַרְעָא יְקָרִיךְ וַהֲוֵית כְּשׁוּק לְעָדָן: ^is-51-23

## Capítulo 52

**1** אִתְגְלָא אִתְגְלָא לִבְשִׁי תוּקְפֵךְ צִיוֹן לִבְשִׁי לְבוּשִׁי תּוּשְׁבַּחְתִּיךְ יְרוּשָׁלַםִ קַרְתָּא דְקוּדְשָׁא אֲרֵי לָא יוֹסְפוּן וְיֶעְדוּן בִּיךְ עוֹד עָרְלִין וּמְסַאֲבִין: ^is-52-1

**2** אִתְנַפַּצִי מֵעָפְרָא קוּמִי תְבִי עַל כּוּרְסֵי יְקָרָא יְרוּשְׁלֵם אִתְפְּסָקוּ חִנְקֵי צַוְרֵיכוֹן שְׁבִיָא כְּנִשְׁתָּא דְצִיוֹן: ^is-52-2

**3** אֲרֵי כִדְנָן אֲמַר יְיָ מַגָן אִזְדַבִּנְתּוּן וְלָא בִכְסַף תִּתְפַּרְקוּן: ^is-52-3

**4** אֲרֵי כִדְנַן אֲמַר יְיָ אֱלֹהִים לְמִצְרַיִם נְחַת עַמִי בְקַדְמֵיתָא לְאִתּוֹתָבָא תַמָן וְאַתּוּרָאָה בִּלְמָא אַנְסֵיהּ: ^is-52-4

**5** וּכְעַן עֲתִידְנָא לְמִפְרַק אֲמַר יְיָ אֲרֵי אִזְדַבַּן עַמִי מַגָן עַמְמַיָא דִשְׁלִיטוּ בְהוֹן מִשְׁתַּבְּחִין אֲמַר יְיָ וּתְדִירָא כָּל יוֹמָא עַל פּוּלְחָן שְׁמִי מַרְגְזִין: ^is-52-5

**6** בְּכֵן יִתְרַבָּא בְעַמְמַיָא שְׁמִי בְּכֵן בְּעִידָנָא הַהִיא תֵּידְעוּן אֲרֵי אֲנָא הוּא דְמַלְלֵית וּמֵימְרִי קַיָם: ^is-52-6

**7** מַה יָאֲוָן עַל טוּרֵי אַרְעָא דְיִשְׂרָאֵל רִגְלֵי מְבַסֵר מַשְׁמַע שְׁלָם מְבַסֵר טַב מַשְׁמַע פּוּרְקָן אֲמַר לִכְנִשְׁתָּא דְצִיוֹן אִיתְגְלִיאַת מַלְכוּתָא דֶאֱלָהָיִךְ: ^is-52-7

**8** קַל פַּרְנָסַיִךְ דִמְרִימִין קָלְהוֹן כַּחֲדָא מְשַׁבְּחִין אֲרֵי בְעֵינֵיהוֹן יֶחֱזוּן גְבוּרָן דִי עֲבַד יְיָ כַּד יְתִיב שְׁכִנְתֵּהּ לְצִיוֹן: ^is-52-8

**9** בּוּעוּ וְשַׁבַּחוּ כַּחֲדָא חָרְבַת יְרוּשְׁלֵם אֲרֵי עֲתִיד יְיָ לְנַחְמָא עַמֵהּ פָּרִיק יְרוּשְׁלֶם: ^is-52-9

**10** גַלֵא יְיָ יַת דְרַע קוּדְשֵׁהּ לְעֵינֵי כָּל עַמְמַיָא וְיֶחֱזוּן כָּל דְבִסְיָפֵי אַרְעָא יַת פּוּרְקָנָא דֶאֱלָהָנָא: ^is-52-10

**11** אִתְפְּרַשׁוּ אִתְפְּרַשׁוּ פּוּקוּ מִתַּמָן בִּמְסָאָב לָא תִקְרְבוּן פּוּקוּ מִגַוָהּ אִתְבְּחָרוּ נַטְלֵי מָנֵי בֵית מַקְדְשָׁא דַיָי: ^is-52-11

**12** אֲרֵי לָא בִּבְהִילוּ תִּפְּקוּן מִבֵּינֵי עַמְמַיָא וּבְעֵירוֹקֵי לָא תִתּוֹבְלוּן לְאַרְעֲכוֹן אֲרֵי מְדַבֵּר קֳדָמֵיכוֹן יְיָ וַעֲתִיד לְכַנָשָׁא גַלְוַתְכוֹן אֱלָהָא דְיִשְׂרָאֵל: ^is-52-12

**13** הָא יַצְלַח עַבְדִי מְשִׁיחָא יְרוּם וְיִסְגֵי וְיִתְקוֹף לַחֲדָא: ^is-52-13

**14** כְּמָא דִסְבַרוּ לֵיהּ בֵּית יִשְׂרָאֵל יוֹמִין סַגִיאִין דַהֲוָה חֲשִׁיךְ בֵּינֵי עַמְמַיָא חֶזְוֵהוֹן וְזִיוְהוֹן מִבְּנֵי אֱנָשָׁא: ^is-52-14

**15** כֵּן יְבַדַר עַמְמִין סַגִיאִין עֲלוֹהִי יִשְׁתְּקוּן מַלְכִין יְשַׁווּן יְדֵיהוֹן עַל פּוּמְהוֹן אֲרֵי דְלָא אִשְׁתָּעִיאוּ לְהוֹן חֲזוֹ וּדְלָא שְׁמָעוּ אִסְתַּכֵּלוּ: ^is-52-15

## Capítulo 53

**1** מַן הֵימִין לִבְסוֹרְתָּנָא דָא וּתְקוֹף דְרַע גְבוּרְתָּא דַייָ כְּדוּן עַל מַן אִתְגְלִיאַת: ^is-53-1

**2** וְיִתְרְבָא צַדִיקָא קֳדָמוֹהִי הָא כְלַבְלְבִין דְפָרְחִין וּכְאִילָן דִמְשַׁלַח שׁוֹרְשׁוֹהִי עַל נַגְדִין דְמַיִין כֵּן יִסְגוֹן תּוּלְדַת קוּדְשָׁא בְּאַרְעָא דַהֲוַת צְרִיכָא לֵיהּ לָא חִיזוּ חוּלָא חֶזְוֵיהּ וְלָא אֵימְתֵהּ אֵימַת הֶדְיוֹט וִיהֵי זִיו קוּדְשָׁא זִיוֵיהּ דְכָל דְיַחְזִינֵיהּ יִסְתַּכֵּל בֵּיהּ: ^is-53-2

**3** בְּכֵן יְהֵי לְבוּסְרָן וְיִפְסִיק יְקָר כָּל מַלְכְּוָתָא יְהוֹן חֲלָשִׁין וְדָוָן הָא כֶּאֱנַשׁ כֵּיבִין וּמְזוּמַן לְמַרְעִין וּכְמָא דַהֲוַת מְסַלְקָא אַפֵּי שְׁכִנְתָּא מִנָנָא בְסִירִין וְלָא חֲשִׁיבִין: ^is-53-3

**4** בְּכֵן עַל חוֹבָנָא הוּא יִבְעֵי וַעֲוָיָתָנָא בְּדִילֵהּ יִשְׁתַּבְקוּן וַאֲנַחְנָא חֲשִׁיבִין כְּתִישִׁין מָחָן מִן קֳדָם יְיָ וּמְעַנָן: ^is-53-4

**5** וְהוּא יִבְנֵי בֵּית מַקְדְשָׁא דְאִתְּחַל בְּחוֹבָנָא אִתְמְסַר בַּעֲוָיָתָנָא וּבְאוּלְפְנֵהּ שְׁלָמָא יִסְגֵי עֲלָנָא וְכַדְנָצֵית לְפִתְגָמוֹהִי חוֹבָנָא יִשְׁתַּבְּקוּן לָנָא: ^is-53-5

**6** כּוּלָנָא כְּעָנָא אִתְבַּדַרְנָא גְבַר לָקֳבֵיל אוֹרְחֵהּ גְלֵינָא וּמִן קֳדָם יְיָ הֲוָת רַעֲוָא לְמִשְׁבַּק חוֹבֵי כוּלָנָא בְדִילֵיהּ: ^is-53-6

**7** בְּעֵי וְהוּא מִתְּתָב וְעַד לָא פְּתַח פּוּמֵיהּ מִתְקַבֵּל תַּקִיפֵי עַמְמַיָא כְּאִמְרָא לְנִכְסְתָא יִמְסַר וְכִרְחֵלָא דְקָדָם גָזְזָהָא שָׁתְקָא וְלֵית לְקִיבְלֵהּ דְפָּתַח פּוּמֵהּ מְמַלֵיל מִלָא: ^is-53-7

**8** מִיסוּרִין וּמִפּוּרְעֲנוּת יְקָרֵיב גַלְוָתָנָא וּפְרִישָׁן דְיִתְעַבְדָן לָנָא בְּיוֹמוֹהִי מַן יִכּוּל לְאִשְׁתְּעָאָה אֲרֵי יַעְדֵי שׁוּלְטָן עַמְמַיָא מֵאַרְעָא דְיִשְׂרָאֵל חוֹבִין דְחָבוּ עַמִי עַד לְוַתְהוֹן יִמְטוֹ: ^is-53-8

**9** וְיִמְסַר יַת רַשִׁיעַיָא לְגֵהִנָם וְיַת עֲתִּירֵי נִכְסַיָא דַאֲנַסוּ בְּמוֹתָא דְאָבַדְנָא בְּדִיל דְלָא יִתְקַיְמוּן עָבְדֵי חֶטְאָה וְלָא יְמַלְלוּן נִכְלִין בְּפוּמְהוֹן: ^is-53-9

**10** וּמִן קֳדָם יְיָ הֲוָת רַעֲוָא לְמִצְרַף וּלְדַכָּאָה יַת שְׁאָרָא דְעַמֵהּ בְּדִיל לְנַקָאָה מֵחוֹבִין נַפְשֵׁיהוֹן יֶחֱזוּן בְּמַלְכוּת מְשִׁיחֵיהוֹן יִסְגוּן בְּנִין וּבְנָן יוֹרְכוּן יוֹמִין וְעָבְדֵי אוֹרַיְתָא דַייָ בִּרְעוּתֵהּ יִצְלְחוּן: ^is-53-10

**11** מִשִׁעְבּוּד עַמְמַיָא יְשֵׁיזֵיב נַפְשְׁהוֹן יֶחֱזוּן בְּפּוּרְעֲנוּת סַנְאֵיהוֹן יִסְבְּעוּן מִבִּזַת מַלְכֵיהוֹן בְּחוּכְמְתֵהּ יְזַכֵּי זַכָּאִין בְּדִיל לְשַׁעְבָּדָא סַגִיאִין לְאוֹרַיְתָא וְעַל חוֹבֵיהוֹן הוּא יִבְעֵי: ^is-53-11

**12** בְּכֵן אֲפַלֵיג לֵיהּ בִּזַת עַמְמִין סַגִיאִין וְיַת נִכְסֵי כְּרַכִּין תַּקִיפִין יְפַלֵג עֲדָאָה חֲלַף דִמְסַר לְמוֹתָא נַפְשֵׁהּ וְיַת מְרוֹדַיָא שַׁעְבַּד לְאוֹרַיְתָא וְהוּא עַל חוֹבִין סַגִיאִין יִבְעֵי וְלִמְרוֹדַיָא יִשְׁתְּבֵיק בְּדִילֵהּ: ^is-53-12

## Capítulo 54

**1** שַׁבַּחִי יְרוּשְׁלֶם דַהֲוַת כְּאִתָּא עֲקָרָה דְלָא יְלֵידַת בּוּעִי תוּשְׁבַּחְתָּא וְדוּצִי דַהֲוָת כְּאִתָּא דְלָא עֲדִיאַת אֲרֵי סַגִיאִין יְהוֹן בְּנֵי יְרוּשְׁלֶם צְדִיתָא מִבְּנֵי כְרַכָּא יְתִיבְתָּא אֲמַר יְיָ: ^is-54-1

**2** אַפְתִּי אֲתַר בֵּית מֵישְׁרָךְ וּמִקִרְוֵי אַרְעִיךְ יָתְבֵי לָא תִמְנְעִין אַסְגָא עַם מַשִׁרְיָתִיךְ וְשִׁלְטוֹנָיִךְ תַּקִיפִי: ^is-54-2

**3** אֲרֵי לְדָרוֹמָא וּלְצִפּוּנָא תִּתְקְפִין וּבְנָךְ עַמְמִין יֵירְתוּן וְקִרְוִין דְצַדְיָן יֵיתְבוּן: ^is-54-3

**4** לָא תִדְחֲלִין אֲרֵי לָא תִבְהֲתִין וְלָא תִתְכַּנְעִין אֲרֵי לָא תִתְכַּלְמִין אֲרֵי בַהֲתַת עוּלֵמוּתִיךְ תִּתְנְשִׁין וְחִיסוּדֵי אַרְמְלוּתִיךְ לָא תִדְכְּרִין עוֹד: ^is-54-4

**5** אֲרֵי מָרִיךְ דְעַבְדִיךְ יְיָ צְבָאוֹת שְׁמֵהּ וּפָרְקִיךְ קַדִישָׁא דְיִשְׂרָאֵל אֱלָהּ כָּל אַרְעָא יִתְקְרֵי: ^is-54-5

**6** אֲרֵי כְאִתָּא שְׁבִיקָא וְעָיְקַת רוּחַ עַרְעָךְ שְׁכִנְתָּא דַייָ וּכְאִתַּת עוּלֵמִין דְאִתְרַחֲקַת אֲמַר אֱלָהָיִךְ: ^is-54-6

**7** בְּשָׁעָה זְעֵירָא רְחַקְתִּיךְ וּבְרַחֲמִין סַגִיאִין אֲקָרֵב גַלְוָתָךְ: ^is-54-7

**8** בִּרְגַז זְעֵיר סַלְקִית אַפֵי שְׁכִנְתִּי זְמַן זְעֵירָא מִנִיךְ וּבְטַבְוַת עֲלָם דְלָא פְסָקָן אֲרַחֵם עֲלָךְ אֲמַר פָּרְקִיךְ יְיָ: ^is-54-8

**9** כְּיוֹמֵי נֹחַ דָא קֳדָמַי דְקַיְמֵית בְּמֵימְרִי דְלָא יֶעְדוּן מֵי טוּפָנָא דַהֲווֹ בְּיוֹמֵי נֹחַ עוֹד עַל אַרְעָא כֵּן קַיְמִית בְּמֵימְרִי דְלָא יֵחוֹל רוּגְזִי עֲלָךְ וְלָא אֶזוֹף בִּיךְ: ^is-54-9

**10** אֲרֵי טוּרַיָא יֶעְדוּן וְרָמָתָא יִתְפַּרְקוּן וְטוּבִי מִנִיךְ יְרוּשְׁלֵם לָא יֶעְדֵי וּקְיַם שְׁלָמִי לָא יִתְרְחַק אֲמַר דְעָתִיד לְרַחֲמָא עֲלָךְ יְיָ: ^is-54-10

**11** חֲשִׁיבָתָא מְקַבְּלָא עוּלְבַּן קַרְתָּא דְאָמְרִין עֲלָה עַמְמַיָא לָא תִתְנְחֵם הָא אֲנָא כָּבֵשׁ בִצְדִידָא אַבְנֵי רִצְפָּתִיךְ וַאֲשַׁכְלְלִינִיךְ בְּאַבְנִין טָבִין: ^is-54-11

**12** וֶאֱשַׁוֵי בְמַרְגְלִין אָעָךְ וְתַרְעַיִךְ לְאַבְנֵי גְמַר וְכָל תְּחוּמִיךְ לְאַבְנֵי צְרוֹךְ: ^is-54-12

**13** וְכָל בָּנַיִךְ אַלְפִין בְּאוֹרַיְתָא דַייָ וְסַגֵי יְהֵי שְׁלָם בְּנָךְ: ^is-54-13

**14** בְזָכוּתָא תִּתַּקְנִין אִתְרַחֲקִי מֵעוּשְׁקָא אֲרֵי לָא תִדְחֲלִין וּמִתְּבִירָא אֲרֵי לָא יֵעוּל עֲלָךְ: ^is-54-14

**15** הָא אִתְכַּנָשָׁא יִתְכַּנְשׁוּן לִיךְ גַלְוַת עַמִיךְ לְסוֹפָא מַלְכֵי עַמְמַיָא דְמִתְכַּנְשִׁין לַאֲעָקָא לִיךְ יְרוּשְׁלֵם בְּגַוִיךְ יִתְרְמוּן: ^is-54-15

**16** הָא אֲנָא בָּרֵית נַפָּחָא נָפַח נוּר בִּשְׁחוֹרִין וּמַפִּיק מָנָא לְצוֹרְכֵהּ וַאֲנָא בָּרֵית מְחַבְּלָא לְחַבָּלָא: ^is-54-16

**17** כָּל זַיִן דְיִתַּקַן עֲלַךְ יְרוּשְׁלֵם לָא יַצְלַח וְכָל לִישָׁן דִיקוּם עִמָךְ לְדִינָא תְּחַיְבִינֵהּ דָא אַחְסָנַת עֲבָדַיָא דַייָ וְזַכְוָתֵיהוֹן מִן קֳדָמַי אֲמַר יְיָ: ^is-54-17

## Capítulo 55

**1** וַי כָּל דְצָבִי לְמֵילָף יֵיתֵי וְיֵלֵף וּדְלֵית לֵיהּ כְּסַף אֱתוֹ שְׁמָעוּ וַאֲלִיפוּ וֶאֱתוֹ שְׁמָעוּ בְלָא בְדָמִין וּבְלָא בְּמָמוֹן אוּלְפַן דְטַב מַחֲמָר וּמֵחָלָב: ^is-55-1

**2** לְמָא תִתְקְלוּן כַּסְפְּכוֹן בְּלָא לְמֵיכַל וְלֵאוּתְכוֹן בְּלָא לְמִשְׂבַּע קַבִּילוּ קַבְּלָא לְמֵימְרִי וֶאֱכוּלוּ דְטַב וְתִתְפַּנֵק בְּדִדְהֵין נַפְשְׁכוֹן: ^is-55-2

**3** אַרְכִינוּ אוּדְנֵיכוֹן וְקַבִּילוּ לְמֵימְרִי שְׁמָעוּ וְתִתְקַיֵם נַפְשְׁכוֹן וְאֶגְזַר לְכוֹן קְיַם עֲלָם טַבְוַת דָוִד דִמְהֵימְנָן: ^is-55-3

**4** הָא רַב לְעַמְמַיָא מַנִיתֵהּ מְלַךְ וְשַׁלִיט עַל כָּל מַלְכְּוָתָא: ^is-55-4

**5** הָא עַם דְלָא תֵידַע יִפְלְחִינָךְ וְעַם דְלָא יֵדְעוּךְ יִרְהֲטוּן לְאַסָקָא לָךְ מִסִין בְּדִיל יְיָ אֱלָהָךְ וּלְקַדִישָׁא דְיִשְׂרָאֵל אֲרֵי שַׁבְּחָךְ: ^is-55-5

**6** תְּבָעוּ דְחַלְתָּא דַייָ עַד דְאַתּוּן חַיִין בְּעוֹ מִן קֳדָמוֹהִי עַד דְאַתּוּן קַיָמִין: ^is-55-6

**7** יַשְׁבִּיק רַשִׁיעָה אוֹרְחֵהּ דְרִשְׁעָא וּגְבַר אָנֵיס עֶשְׁתּוֹנוֹהִי וִיתוּב לְפוּלְחָנָא דַייָ וִירַחֵם עֲלוֹהִי וְלִדְחַלְתָּא דֶאֱלָהָנָא אֲרֵי מַסְגֵי לְסַלָחָא: ^is-55-7

**8** אֲרֵי לָא מַחְשְׁבָתַי מַחְשָׁבָתְכוֹן וְלָא אוֹרְחָתְכוֹן תַּקָנָן כְּאוֹרְחַת טוּבִי אֲמַר יְיָ: ^is-55-8

**9** אֲרֵי כְמָא דְרָמִין שְׁמַיָא מִן אַרְעָא כֵּן תַּקְנָן אוֹרְחָתַי מֵאוּרְחַתְכוֹן וּמַחֲשְׁבָתִי תַּקְנָן מִמַחְשְׁבָתְכוֹן: ^is-55-9

**10** אֲרֵי כְּמָא דְנָחֵית מִטְרָא וְתַלְגָא מִן שְׁמַיָא וּלְתַמָן לָא אֶפְשַׁר לֵיהּ דִיתוּב אֱלָהֵין מְרַוֵי יַת אַרְעָא וּמַרְבֵּי לָהּ וּמוֹעִילָהּ וְיָהַב בַּר זַרְעָא כְּמִסַת לְזָרֵעַ וְלַחְמָא כְּמִסַת לְמֵיכָל: ^is-55-10

**11** כֵּן הֲוֵי פִּתְגָם טוּבִי דְנָפֵק מִן קֳדָמַי לָא אֶפְשַׁר דְיִתוּב לִקְדָמַי רֵיקָן אֱלָהֵן עָבַד יַת דְרָעֵינָא וּמַצְלַח לִדְשָׁלַחְנָא לֵיהּ: ^is-55-11

**12** אֲרֵי בְחֶדְוָא תִפְקוּן מִבֵּינֵי עַמְמַיָא וּבִשְׁלָמָא תִּתּוֹבְלוּן לְאַרְעֲכוֹן טוּרַיָא וְרָמָתָא יְבוּעוּן קֳדָמֵיכוֹן תּוּשְׁבְּחָא וְכָל אִילָנֵי חַקְלָא יִשְׁעֲנוּן בְּעַנְפֵיהוֹן: ^is-55-12

**13** חֲלַף רַשִׁיעַיָא וַחֲלַף חַיָבַיָא יִתְקַיְמוּן דַחֲלֵי חֶטְאָה וִיהֵי קֳדָם יְיָ לְשׁוּם לְאָת עֲלַם דְלָא יִפְסוֹק: ^is-55-13

## Capítulo 56

**1** כִּדְנַן אֲמַר יְיָ טַרוּ דִינָא עֲבִידוּ צִדְקָתָא אֲרֵי קָרִיב פּוּרְקָנִי לְמֵיתֵי וּזְכוּתִי לְאִתְגְלָאָה: ^is-56-1

**2** טוּבֵי אֱנָשׁ דְיַעְבַּד דָא וּבַר אֱנָשָׁא דְיִתְקֵף בָּהּ יִטַר שַׁבְּתָא מֵאַחֲלוּתֵהּ וְיִטֵר יְדוֹהִי מִלְמֶעְבַּד כָּל דְבִישׁ: ^is-56-2

**3** וְלָא יֵימַר בַּר עַמְמִין דְמִתּוֹסַף עַל עַמָא דַייָ לְמֵימָר אַפְרָשָׁא יִפְרְשִׁנַנִי יְיָ מֵעַל עַמֵהּ וְלָא יֵימַר סָרִיסָא הָא אֲנָא חֲשִׁיב כְּאָע יָבֵישׁ: ^is-56-3

**4** אֲרֵי כִדְנַן אֲמַר יְיָ לְסָרִיסַיָא דְיִטְרוּן יַת יוֹמֵי שַׁבַּיָא דִילִי וּמִתְרָעָן בִּדְצָבֵנָא וּמַתְקְפִין בִּקְיָמִי: ^is-56-4

**5** וְאֶתֵּן לְהוֹן בְּבֵית מַקְדְשִׁי וּבַאֲרַע בֵּית שְׁכִנְתִּי אֲתַר וְשׁוּם דְטַב מִבְּנִין וּמִבְּנָן שׁוּם עֲלַם אֶתֵּן לְהוֹן דְלָא יִפְסוֹק: ^is-56-5

**6** וּבְנֵי עַמְמַיָא דְמִתּוֹסְפִין עַל עַמֵהּ דַייָ לְשַׁמָשׁוּתֵהּ וּלְמִרְחַם יַת שְׁמָא דַייָ לְמֶהֱוֵי לֵיהּ לְעָבְדִין כָּל דְיִטַר שַׁבְּתָא לְאַחֲלוּתֵהּ וּמַתְקְפִין בִּקְיָמִי: ^is-56-6

**7** וְאַיְתִינוּן לְטוּרָא דְקוּדְשִׁי וְאַחֲדִינוּן בְּבֵית צְלוֹתִי עַלְוַתְהוֹן וְנִכְסַת קוּדְשֵׁיהוֹן יִתַּסְקוּן לְרַעֲוָא עַל מַדְבְּחִי אֲרֵי בֵית מַקְדְשִׁי בֵית צְלוֹ יִתְקְרֵי לְכָל עַמְמַיָא: ^is-56-7

**8** אֲמַר יְיָ אֱלֹהִים דַעֲתִיד לְכַנָשָׁא מְבַדְרֵי יִשְׂרָאֵל עוֹד אֲקָרֵב גַלְוַתְהוֹן לְכַנָשָׁא יַתְהוֹן: ^is-56-8

**9** כָּל מַלְכֵי עַמְמַיָא דְמִתְכַּנְשִׁין לַאֲקָעָא לִיךְ יְרוּשְׁלֵם בְּגַוִיךְ יִתְרְמוּן יְהוֹן לְמֵיכַל לְחַיַת בְּרָא תִּשְׂבַּע מִנְהוֹן חֵיוַת חוּרְשָׁא: ^is-56-9

**10** סַכְוָאֵיהוֹן סָמָן כּוּלְהוֹן לָא יָדְעִין מִדַעַם כּוּלְהוֹן כַּלְבִין חַרְשִׁין לָא יָכְלִין לְמִנְבַּח נַיְמִין שָׁכְבִין רַחֲמִין לְמִדְמָךְ: ^is-56-10

**11** וְכַלְבַיָא תַקִיפֵי נַפְשָׁן לָא יָדְעִין לְמִשְׂבַּע וְאִינוּן מַבְאֲשִׁין לָא יָדְעִין לְאִסְתַּכָּלָא כּוּלְהוֹן גְבַר לְקָבֵל אוֹרְחֵהּ גְלוֹ גְבַר לְמִבַּז מָמוֹנֵהּ דְיִשְׂרָאֵל: ^is-56-11

**12** אָמְרִין אֱתוֹ וְנִסַב חֲמַר וְנִתְרְוֵי מִן עַתִּיק וּתְהֵי שֵׁירוּתָנָא דִמְחָר טָבָא מִדְיוֹמָא דֵין רַבָּא סַגִיאָה לַחֲדָא: ^is-56-12

## Capítulo 57

**1** צַדִיקַיָא מַיְתִין וְלֵית אֱנַשׁ דִמְשַׁוִי דְחַלְתִּי עַל לֵב וְגַבְרֵי גַמְלֵי חִסְדָא מִתְכַּנְשִׁין וְלָא מִסְתַּכְּלִין אֲרֵי מִן קֳדָם בִּישְׁתָּא דַעֲתִידָא לְמֵיתֵי מִתְכַּנְשִׁין צַדִיקַיָא: ^is-57-1

**2** יְהָכוּן שְׁלָם יְנוּחוּן עַל אֲתַר בֵּית מִשְׁכָּבֵיהוֹן עָבְדֵי אוֹרַיְתֵהּ: ^is-57-2

**3** וְאַתּוּן אִתְקְרָבָא הַלְכָא עַם דָרָא דְעוֹבָדֵיהוֹן בִּישִׁין דְמִנִצְבַת קוּדְשָׁא נִצְבַתְהוֹן וְאִינוּן מְנַאֲפִּין וּמְזַנָן: ^is-57-3

**4** עַל מַן אַתּוּן מִתְפַּנְקִין וְקָדָם מַן תִּפְתְּחוּן פּוּמְכוֹן תִּסְגוּן לְמַלָלָא רַבְרְבָן הֲלָא אַתּוּן יַלְדֵי מְרוֹד זַרְעָא שִׁקְרָא: ^is-57-4

**5** דְפַלְחִין לְטַעֲוָתָא תְּחוֹת כָּל אִילַן עַבּוּף נִכְסֵי יִנְקַיָא בְּנַחֲלַיָא תְּחוֹת שְׁקִיפֵי כֵיפַיָא: ^is-57-5

**6** בִּשְׁעִיעוּת כֵּיף נַחֲלָא חוּלָקִיךְ אַף תַּמָן אִינוּן עַדְבָךְ אַף לְהוֹן נְסֵיכְתְּ נַסְכִין אֲסֵיקְתְּ קוּרְבָּנִין הַעַל אִלֵין יְתוּב מֵימְרִי: ^is-57-6

**7** עַל טוֹר רָם וּמְנַטֵל שַׁוֵית אֲתַר בֵּית מֵישְׁרִיךְ אַף לְתַמָן סְלֵיקְתָּ לְדַבָּחָא דְבָח: ^is-57-7

**8** וַאֲחוֹרֵי דֶשֶׁא וּמְזוּזָתָא שַׁוֵית דוּכְרָן טַעֲוָתִיךְ הֲוֵית דַמְיָא לְאִתְּתָא דִרְחִימָא עַל בַּעֲלָהּ וּטְעַת בָּתַר נוּכְרָאִין אַפְתֵּית אֲתַר בֵּית מֵישְׁרָךְ וְגָזַרְתְּ לִיךְ מִנְהוֹן קְיַם רְחֵימְתְּ אֲתַר בֵּית מַשְׁכַּבְהוֹן אֲתַר בְּחַרְתְּ: ^is-57-8

**9** כַּד עֲבַדְתְּ לִיךְ אוֹרַיְתָא אַצְלַחְתְּ בְּמַלְכוּתָא וְכִדְאַסְגֵית לִיךְ עוֹבָדִין טָבִין סַגִיאָה מַשִׁרְיָתִיךְ וּשְׁלַחְתְּ אִזְגַדָךְ עַד מֵרָחִיק וְאַמְאֵיכְתְּ תַּקִיפֵי עַמְמַיָא עַד לִשְׁאוֹל: ^is-57-9

**10** בְּסַגִיאוּת אוֹרְחָתִיךְ לָאֵית לָא אֲמַרְתְּ לְמִתַּב נִכְסִין סַגִיאִין אַסְגֵית עַל כֵּן לָא סַבַּרְתְּ לְמֵיתָב: ^is-57-10

**11** וְיַת מַן יְצֵיפְתְּ וְקָדָם מַן דְחֵילְתְּ אֲרֵי אַסְגֵית לְמַלָלָא כַדְבִין וּפוּלְחָנִי לָא אַדְכַּרְתְּ וְלָא שַׁוֵית דְחַלְתִּי עַל לִבִּיךְ הֲלָא אֲנָא יְהָבִית אַרְכָּא מֵעַלְמָא דְאִם תְּתוּבִין לְאוֹרַיְתָא וְלִקֳדָמַי לָא תַבְתְּ: ^is-57-11

**12** אֲנָא חֲוֵיתִי לָךְ עוֹבְדִין טְבִין דְאִינוּן זַכְוָן לִיךְ וְאַתְּ אַסְגֵית לִיךְ עוֹבָדִין בִּישִׁין דְלָא יִחֲנוּן לִיךְ: ^is-57-12

**13** אַצְוָחִי כְעַן אִם יִפְרְקוּנִיךְ עוֹבָדֵי שִׁקְרִין דַהֲוֵית מִתְעַסְקָא בְהוֹן מִיַנְקוּתִיךְ וְיַת כּוּלְהוֹן יִטוֹל רוּחָא יְהוֹן כִּלְמָא וּדְרָחֵיץ עַל מֵימְרִי יַחְסִין אַרְעָא וְיֵירַת טוּרָא דְקוּדְשִׁי: ^is-57-13

**14** וְיֵימַר אַלִיפוּ וְאַזְהָרוּ אַפְנוֹ לֵב עַמָא לְאוֹרַח תִּקָנָא סְלִיקוּ תַקְלַת רַשִׁיעַיָא מֵאוֹרַח כְּנִשְׁתָּא דְעַמִי: ^is-57-14

**15** אֲרֵי כִדְנַן אֲמַר רָמָא וּמְנַטְלָא דְשָׁרֵי בִשְׁמַיָא וְקַדִישׁ שְׁמֵהּ בְּרוּמָא שְׁרֵי וְקַדִישָׁא שְׁכִנְתֵּהּ אֲמַר לְמִפְרַק לִתְבִירֵי לִבָּא וּלְמַכִּיכֵי רוּחָא לְקַיָמָא רוּחַ מַכִּיכִין וּלְמִסְעַד לֵב תְּבִירִין: ^is-57-15

**16** אֲרֵי לָא לְעַלְמָא אִתְפְּרַע בְּדִין וְלָא לְאַפְרֵשׁ יְהֵי רוּגְזִי אֲרֵי רוּחִי מֵתַיָא אֲנָא עֲתִיד לַאֲתָבָא וְנִשְׁמָתָא אֲנָא עֲבָדֵית: ^is-57-16

**17** בְּחוֹבֵי מָמוֹנְהוֹן דַאֲנָסוּ הֲוָה רוּגְזִי עֲלֵיהוֹן וְאַלְקֵיתִינוּן סַלֵיקִית שְׁכִנְתִּי מִנְהוֹן וְטַלְטֵלְתִּינוּן בַּדְרֵית גַלְוַתְהוֹן עַל דְטָעוּ בָתַר הִרְהוּר לִבְּהוֹן: ^is-57-17

**18** אוֹרַח תְּיוּבְתְּהוֹן גַלְיָא קֳדָמַי וְאֶשְׁבּוֹק לְהוֹן וַאֲרַחֵם עֲלֵיהוֹן וַאֲשַׁלֵם תַּנְחוּמִין לְהוֹן וּלְמִתְאַבְּלִין עֲלֵיהוֹן: ^is-57-18

**19** דִבְרָא מַמְלַל סִפְוָן בְּפוּם כָּל אֱנָשָׁא אֲמַר נְבִיָא שְׁלָמָא יִתְעֲבֵד לְצַדִיקַיָא דִנְטָרוּ אוֹרַיְתִי מִלְקָדְמִין וּשְׁלָמָא יִתְעֲבֵד לְתָבַיָא דְתָבוּ לְאוֹרַיְתָא קָרִיב אֲמַר יְיָ וְאֶשְׁבּוֹק לְהוֹן: ^is-57-19

**20** וְרַשִׁיעַיָא כְּיַמָא דִטְרִיד דְבָעֵי לְמֵינַח וְלָא יָכִיל וְעָבְדִין מוֹהִי סִין וְטִין: ^is-57-20

**21** לֵית שְׁלָמָא אֲמַר אֱלָהּ לְרַשִׁיעַיָא: ^is-57-21

## Capítulo 58

**1** נְבִיָא אַכְלֵי בִגְרוֹנָךְ לָא תִמְנַע כְּקַל שׁוֹפָרָא אֲרֵים קָלָךְ וְחַוֵי לְעַמִי מִרְדֵיהוֹן וּלְבֵית יַעֲקֹב חוֹבֵיהוֹן: ^is-58-1

**2** וְקָדָמַי יוֹם יוֹם אוּלְפַן תָּבְעִין כְּאִלוּ לְמֵידַע אוֹרְחָן דְתַקְנָן קֳדָמַי צָבָן כְּעַמָא דְזָכוּ עֲבַד וּמִדִין אֱלָהֵהּ לָא אִתְרַחֵק שַׁאֲלִין מִן קֳדָמַי דִין וּקְשׁוֹט כְּאִלוּ לְאִתְקְרָבָא לִדְחַלְתָּא דַייָ צָבָן: ^is-58-2

**3** אָמְרִין לְמָא אֲנַחְנָא צַיְמִין וּקְדָמָךְ גְלֵי מְסַגְפִין נַפְשָׁתָנָא וּקְדָמָךְ יְדִיעַ נְבִיָא אֲמַר לְהוֹן הָא בְיוֹם תַּעֲנִיתְכוֹן אַתּוּן תָּבְעִין צָרְכֵיכוֹן וְכָן תַּקְלַתְכוֹן אַתּוּן מְקָרְבִין: ^is-58-3

**4** הֵן לְתַחֲרוּ וּלְמַצוּ אַתּוּן צַיְמִין וּלְמִמְחֵי בְּכוּרְמֵיזָא דְרִשְׁעָא לָא תִתְעֲנוּן תַּעֲנִין כְּאִלֵין לְאַשְׁמָעָא בִמְרוֹמָא קָלְכוֹן: ^is-58-4

**5** הַהָדָא הוּא תַּעֲנִיתָא דְרָעִינָא בָהּ יוֹמָא דִמְסַגֵף אֱנָשָׁא נַפְשֵׁהּ כָּפֵיף רֵישֵׁה כְאַגְמוֹן כָּפֵיף וְעַל סַקָא וְקִיטְמָא בָּאֵית הַלְדָא אַתּוּן קְרַן תַּעֲנִית וְיוֹמָא דְרַעֲוָא בֵיהּ מִן קֳדָם יְיָ: ^is-58-5

**6** הֲלָא דָא הִיא תַעֲנֵיתָא דְרָעֵינָא בָהּ פְּרִדוּ כְּנִישַׁת רִשְׁעָא שְׁרוֹ קִטְרֵי כִתְבֵי דִין מַסְטֵי וּפַטָרוּ דַהֲווֹ אֲנוּסִין בְּנֵי חוֹרִין וְכָל דִין מַסְטֵי תְּסַלְקוּן: ^is-58-6

**7** הֲלָא תְפַרְנֵס לְכַפְנָא מִלַחְמֵךְ וַחֲשִׁיבִין מְטַלְטְלִין תָּעֵיל לְגוֹ בֵיתָא אֲרֵי תֱחֶזֵי עַרְטִילָאָה וּתְכַסִינֵהּ וּמִקָרִיב בִּשְׂרָךְ לָא תִכְבּוֹשׁ עֵינָךְ: ^is-58-7

**8** בְּכֵן יִתְגְלֵי כִּשְׁפַּרְפָּרָא נְהוֹרָךְ וְאַסוּת מַחֲתָךְ בִּפְרִיעַ תִּיסָק וִיהָכוּן קֳדָמָךְ זַכְוָתָךְ בִּיקָר מִן קֳדָם יְיָ תִתְכְּנִישׁ: ^is-58-8

**9** בְּכֵן תְּצַלִי וַיָי יְקַבֵּל צְלוֹתָךְ תִּבְעֵי מִן קֳדָמוֹהִי וְיַעְבֵּד בָעוּתָךְ אִם תַּעְדֵי מִבֵּינָךְ אַסְטָיוּת דִין מִרְמַז בְּאֶצְבַּע וּמַלֵילָא מִלִין דְאוֹנֵס: ^is-58-9

**10** וְתִתְפַּח קֳדָם כַּפְנָא נַפְשָׁךְ וּנְפַשׁ מְסַגְפָא תִּשְׂבַּע וְיִדְנַח בַּחֲשׁוּכָא נְהוֹרָךְ וְקִבְלָךְ יְהֵי כְטִהֲרָא: ^is-58-10

**11** וִידַבְּרִינָךְ יְיָ תְּדִירָא וְיִשְׂבַּע בִּשְׁנֵי בְּצוֹרְתָא נַפְשָׁךְ וְגוּפָךְ וְחַיֵי בְחַיֵי עַלְמָא וּתְהֵי נַפְשָׁךְ מַלְיָא תַפְנוּקִין כְּגִנַת שַׁקְיָא דִמְרַוְיָא וּכְמַבּוּעַ דְמַיָין דְלָא פַּסְקִין מוֹהִי: ^is-58-11

**12** וְיִבְנוֹן מִנָךְ חָרְבַת עֲלַם יְסוֹדֵי דַר וְדַר תְּקוֹמֵם וְיִקְרוּן לָךְ מְקַיֵים אוֹרְחָא דְתַקְנָא מֵתִיב רַשִׁיעַיָא לְאוֹרַיְתָא: ^is-58-12

**13** אִם תְּתִיב מִשַׁבַּתָא רִגְלָךְ לְמֶעְבַּד צוֹרְכָךְ בְיוֹמָא דְקוּדְשִׁי וּתְעָרַע לְשַׁבְּתָא בְּתַפְנוּקִין לְקַדִישָׁא דַייָ תְּיַקַר וּתְיַקַר קֳדָמוֹהִי מִלְמֶעְבַּד אוֹרְחָךְ מִלְסַפְקָא צוֹרְכָךְ וּמַלָלָא מִלִין דְאוֹנָס: ^is-58-13

**14** בְכֵן תִּתְפַּנַק קֳדָם יְיָ וְיַשְׁרִינָךְ עַל תּוּקְפֵי אַרְעָא וְיוֹכְלִינָךְ פֵּרֵי אַחְסָנַת יַעֲקֹב אֲבוּךְ אֲרֵי בְּמֵימְרָא דַייָ גְזִיר כֵּן: ^is-58-14

## Capítulo 59

**1** הָא לָא מִקְפֵּידוּת יָדָא מִן קֳדָם יְיָ לֵית אַתּוּן מִתְפָּרְקִין וְלָא מִדְיַקַר קֳדָמוֹהִי מִלְמִשְׁמַע לָא מִתְקַבְּלָא צְלוֹתְכוֹן: ^is-59-1

**2** אֱלָהֵן חוֹבֵיכוֹן הֲווֹ מַפְרְשִׁין בֵּינֵיכוֹן לְבֵין אֱלָהָכוֹן וַחֲטָאֵיכוֹן גְרָמוּ לְסַלָקָא אַפֵּי שְׁכִנְתָּא מִנְכוֹן מִלְקַבָּלָא צְלוֹתְכוֹן: ^is-59-2

**3** אֲרֵי יְדֵיכוֹן שׁוּטְפִין בְּדַם זַכַּאי וְאֶצְבְּעַתְכוֹן בְּחוֹבִין סִפְוַתְכוֹן מְמַלְלִין שְׁקַר לִישַׁנְכוֹן נִכְלִין מְחַשֵׁב: ^is-59-3

**4** לֵית דִמְצַלֵי בִקְשׁוֹט וְלֵית דְמִתְדַן בְּהֵימְנוּתָא מִתְרַחֲצִין עַל לְמָא וּמְמַלְלִין שְׁקַר מוֹחָן וּמַפְקִין מִלִבְּהוֹן מִלִין דְאוֹנָס: ^is-59-4

**5** הָא כְבֵיעֵי חֵיוִי חוּרְמְנִין מְפַרְתִין וּכְקַוִין דְעַכּוֹבִיתָא מָחַיָא דְמַן דְאָכִיל מִבֵּיעֵיהוֹן מָאֵית וּמְשַׁחְנָן וּמַפְקָן חֵיוָן חוּרְמְנִין מְפַרְתִין: ^is-59-5

**6** הָא כְקַוִין דְעַכּוֹבִיתָא דְלָא כַשְׁרִין לְאִתְכַּסָאָה כֵּן לֵית הֲנָאָה בְּעוֹבָדֵיהוֹן דְרַשִׁיעַיָא עוֹבָדֵיהוֹן עוֹבָדֵי אוֹנֶס וְלֵיאוּת שְׁקַר בִּידֵהוֹן: ^is-59-6

**7** רַגְלֵיהוֹן לְמֶעְבַּד דְבִישׁ רַהֲטִין וּמוֹחִין לְמִשְׁפַּךְ דַם זַכַּאי עֶשְׁתּוֹנֵיהוֹן עֶשְׁתּוֹנֵי אוֹנָס בִּזָא וּתְבָרָא בְּכִבְשֵׁיהוֹן: ^is-59-7

**8** אוֹרַח שְׁלָמָא לָא יָדְעִין וְלֵית דִינָא בִּמְהָכֵיהוֹן שְׁבִילֵיהוֹן עֲקִימוּ לְהוֹן כָּל דְדָרִיךְ בְּהוֹן לָא יְדַע שְׁלָמָא: ^is-59-8

**9** עַל כֵּן אִתְרָחַק דִינָא מִנָנָא וְלָא מְעַרְעָן לָנָא זַכְוָן סַבַּרְנָא לְנֵיהוֹר וְהָא חֲשׁוֹךְ לְזֵיהוֹר וְהָא כִדְבְּקַבְלָא אֲנַחְנָא מְהַלְכִין: ^is-59-9

**10** נְמַשְׁמֵשׁ כְּסָמָן כּוּתְלִין וְכִדְלֵית לְהוֹן עַיְנִין נְמַשְׁמֵשׁ אִתְקֵילָנָא בְטִיהֲרָא כְּמָא דְמִתַּקְלִין בְּקִבְלָא אִתְאֲחַד בְּאַפָּנָא כְּמָא דַאֲחִידִין קִבְרַיָא בְּאַפֵּי מֵתַיָא: ^is-59-10

**11** עַסֵינָא מִן קֳדָם בַּעֲלֵי דְבָבָנָא דְמִתְכַּנְשִׁין עֲלָנָא כְּדוּבִין כּוּלָנָא וּכְיוֹנִין נָהָמָא נָהֵימְנָא סַבַּרְנָא לְדִינָא וְלֵית לְפוּרְקָנָא אִתְרְחֵק מִנָנָא: ^is-59-11

**12** אֲרֵי סַגִיאִין חוֹבָנָא קֳדָמָךְ וְחַטָאנָא אַסְהִידוּ בָנָא אֲרֵי חוֹבָנָא גְלַן לָנָא זַעֲוָיָתָנָא יְדַעְנָא לְהוֹן: ^is-59-12

**13** מְרֵידְנָא וְכַדִיבְנָא בְּמֵימְרָא דַייָ וְאִסְתְּחַרְנָא לְאַחוֹרָא מִבָּתַר פּוּלְחָנָא דֶאֱלָהָנָא וַהֲוֵינָא מְמַלְלִין שְׁקַר וְסַטְיָא מוֹחַן וּמַפְקִין מִלִבְּהוֹן פִּתְגָמֵי שְׁקָר: ^is-59-13

**14** וְאִסְתְּחַר לַאֲחוֹרָא עָבְדֵי דִינָא וְעָבְדֵי זְכוּתָא מֵרָחִיק קָמִין אֲרֵי אִתְקִילוּ עַבְדֵי קוּשְׁטָא וְעָבְדֵי הֵימְנוּתָא לָא יָכְלִין לְאִתְגַלָאָה: ^is-59-14

**15** וַהֲווֹ עָבְדֵי קוּשְׁטָא מְטַמְרִין וּדְסָטָן מִבִּישׁ מִתְבַּזְזִין וּגְלֵי קֳדָם יְיָ וּבְאֵישׁ קֳדָמוֹהִי אֲרֵי לֵית דִינָא: ^is-59-15

**16** וּגְלֵי קֳדָמוֹהִי דְלֵית גְבַר דְלֵיהּ עוֹבָדִין טָבִין וִידִיעַ קֳדָמוֹהִי וְלֵית אֱנַשׁ דִיקוּם וְיִבְעֵי עֲלֵיהוֹן וּפַרְקִינוּן בִּדְרַע תּוּקְפֵהּ וּבְמֵימָר רְעוּתִי סַעְדִינוּן: ^is-59-16

**17** אִתְגְלֵי לְמֶעְבַּד זַכְוָן לְעַמֵהּ תְּקוֹף וּפוּרְקָן אַיְתֵי בְמֵימְרֵהּ לְדַחְלוֹהִי וְיִתְגְלֵי לְמֶעְבַּד לְאִתְפְּרָעָא בִתְקוֹף מְסַנְאֵי עַמֵהּ וִיתַב נִקְמָא לְבַעֲלֵי דְבָבוֹהִי: ^is-59-17

**18** מָרֵי גַמְלַיָא הוּא גִמְלָא יְשַׁלֵם פּוּרְעֲנוּתָא לְסָנְאוֹהִי גִמְלָא לְבַעֲלֵי דְבָבוֹהִי לְנַנְוָתָא גִמְלָא יְשַׁלֵם: ^is-59-18

**19** וְיִדְחֲלוּן מִמַעֲרְבָא יַת שְׁמָא דַייָ וּמִמַדְנַח שִׁמְשָׁא יַת יְקָרֵהּ אֲרֵי יֵיתוּן כִּשְׁפַע נְהַר פְּרָת מְעִיקָן בְּמֵימְרָא דַייָ יִתַּבְּרוּן: ^is-59-19

**20** וְיֵיתֵי לְצִיוֹן פְרִיק וְלַאֲתָבָא מְרוֹדַיָא דְבֵית יַעֲקֹב לְאוֹרַיְתָא אֲמַר יְיָ: ^is-59-20

**21** וַאֲנָא דֵין קְיָמִי עִמְהוֹן אֲמַר יְיָ רוּחַ קוּדְשִׁי דַעֲלָךְ וּפִתְגָמֵי נְבוּאָתִי דְשַׁוֵתִי בְּפוּמָךְ לָא יֶעְדוּן מִפּוּמָךְ וּמִפּוּם בְּנָךְ וּמִפּוּם בְּנֵי בְנָךְ אֲמַר יְיָ מִכְּעַן וְעַד עַלְמָא: ^is-59-21

## Capítulo 60

**1** קוּמִי אַנְהָרִי יְרוּשְׁלֵם אֲרֵי מְטָא זְמַן פּוּרְקָנִיךְ וִיקָרָא דַייָ עֲלָךְ יִתְגְלִי: ^is-60-1

**2** אֲרֵי הָא חֲשׁוֹכָא יַחְפֵּי אַרְעָא וְקִבְלָא לְמַלְכְּוָתָא וּבִיךְ יִשְׁרֵי שְׁכִנְתָּא דַייָ וִיקָרֵהּ עֲלָךְ יִתְגְלֵי: ^is-60-2

**3** וִיהָכוֹן עַמְמִין לִנְהוֹרִיךְ וּמַלְכַיָא לִקְבֵל זְהוֹרִיךְ: ^is-60-3

**4** זְקוּפִי יְרוּשְׁלֵם סְחוֹר סְחוֹר עֵינָךְ וְחַזֵי כָּל בְּנֵי עַם גַלְוָתָךְ דְמִתְכַּנְשִׁין וְאָתָן לְגַוִיךְ בְּנָךְ מֵרָחִיק יֵיתוּן וּבְנָתָךְ עַל גִסְסִין יִתְנַסְבָן: ^is-60-4

**5** בְּכֵן תֶּחֱזִין וּתְנַהֲרִין וְתִדְחֵלִין וְיִפְתִּי לִבִּיךְ בְּדַחֲלַת חֶטְאִין אֲרֵי יִתְחֲלֵיף לִיךְ עוֹתַר מַעַרְבָא נִכְסֵי פַּלְחֵי כּוֹכְבַיָא יִתְעֲלוּן לְגַוִיךְ: ^is-60-5

**6** שְׁיָרֵת עַרְבָאֵי תַּחֲפֵי סַחֲרָנִיךְ הוֹגְנֵי מִדְיָן וְהוֹלַד כּוּלְהוֹן מִשְׁבָא יֵיתוּן דְהַב וּלְבוֹנָה יְהוֹן טְעִינִין וּדְאָתָן עִמְהוֹן בְּתוּשְׁבַּחְתָּא דַייָ יְהוֹן מִשְׁתְּעָן: ^is-60-6

**7** כָּל עָאן עֲרָבָאֵי יִתְכַּנְשִׁין לְגַוִיךְ דִכְרֵי נְבָיוֹת יְשַׁמְשׁוּנִיךְ יִתַּסְקוּן לְרַעֲוָא עַל מַדְבְּחִי וּבֵית תּוּשְׁבַּחְתִּי אֲשַׁבֵּח: ^is-60-7

**8** מַן אִלֵין דְאָתָן בִּגְלֵי כַּעֲנָנִין קַלִילִין וְלָא אִתְעַכָּבָא גַלְוָתָא דְיִשְׂרָאֵל דְמִתְכַּנְשִׁין וְאַתְיָן לְאַרְעֲהוֹן הָא כְיוֹנִין דְתַיְבָן לְגוֹ שׁוֹבְכֵיהוֹן: ^is-60-8

**9** אֲרֵי לְמֵימְרִי נַגְוָן יְסַבְּרוּן וְנַחֲתֵי סְפִינֵי יַמָא אַיְדָא פַרְסָא קַלְעָהָא בְקַדְמֵיתָא לְאַיְתָאָה בְּנָךְ מֵרָחִיק כַּסְפֵּהוֹן וּדְהַבְהוֹן עִמְהוֹן לִשְׁמָא דַייָ אֱלָהָךְ וּלְקַדִישָׁא דְיִשְׂרָאֵל אֲרֵי שַׁבְּחָךְ: ^is-60-9

**10** וְיִבְנוֹן בְּנֵי עַמְמַיָא שׁוּרָךְ וּמַלְכֵיהוֹן יְשַׁמְשׁוּנִיךְ אֲרֵי בְרוּגְזִי אַלְקֵיתִיךְ וּבִרְעוּתִי אֲרַחֵם עֲלָךְ: ^is-60-10

**11** וְיִתְפַּתְּחוּן תַּרְעָךְ תְּדִירָא יֵימָם וְלֵילֵי לָא יִתְאַחֲדוּן לַאֲעָלָא לְגַוִיךְ נִכְסֵי עַמְמַיָא וּמַלְכֵיהוֹן זְקִיקִין: ^is-60-11

**12** אֲרֵי עַם וּמַלְכוּ דְלָא יִפְלְחוּנִיךְ יְרוּשְׁלֵם יֵיבְדוּן וְעַמְמַיָא אִשְׁתֵּיצָאָה יִשְׁתֵּיצוּן: ^is-60-12

**13** יְקַר לִבְנָן לְגַוִיךְ יִתְעַל בִּירְוַן מוֹרְנְיָן וְאֶשְׁכַּרְעִין כַּחֲדָא לְשַׁבְּחָא אֲתַר בֵּית מַקְדְשִׁי וַאֲתַר בֵּית אַשְׁרָיוּת שְׁכִנְתִּי אֲיַקֵר: ^is-60-13

**14** וִיהָכוּן לְגַוִיךְ כְּפִיפִין בְּנֵי מְשַׁעְבְּדַיִךְ וְיִשְׁטַתְּחוּן לְמִבְעֵי מִנִיךְ עַל פַּרְסַת רִגְלִיךְ כָּל דַהֲווֹ מַרְגְזִין לִיךְ וְיִקְרוֹן לִיךְ קַרְתָּא דַייָ צִיוֹן דְאִתְרְעֵי בָהּ קַדִישָׁא דְיִשְׂרָאֵל: ^is-60-14

**15** חֲלַף דַהֲוֵית שְׁבִיקָא וּמְטַלְטְלָא וְלֵית דְעָדֵי וַאֲשַׁוִינָךְ לִיקַר עֲלַם בֵית דִיץ דָר וְדָר: ^is-60-15

**16** וְתִסְבְּעִין נִכְסֵי עַמְמַיָא וּבְבִזַת מַלְכִין תִּתְפַּנְקִין וְתֵידְעִין אֲרֵי אֲנָא יְיָ פָּרְקִיךְ וּמְשֵׁיזְבִיךְ תַּקִיפָא דְיַעֲקֹב: ^is-60-16

**17** חֲלַף נְחָשָׁא דִבְזוֹ מִנִיךְ יְרוּשְׁלֵם אַיְתֵי דַהֲבָא וַחֲלַף בַּרְזְלָא אַיְתֵי כַסְפָּא וַחֲלַף אָעַיָא נְחָשָׁא וַחֲלַף אַבְנַיָא בַּרְזְלָא וַאֲשַׁוֵי פַּרְנָסָךְ שְׁלַם וְשִׁלְטוּנַיִךְ בְּזָכוּ: ^is-60-17

**18** לָא יִשְׁתְּמַע עוֹד חִיטְפָא בְּאַרְעִיךְ בִּזָא וּתְבִירָא בִּתְחוּמִיךְ וִיעַרְעוּן פּוּרְקַן עַל שׁוּרָךְ וְעַל תַּרְעָךְ יְהוֹן מְשַׁבְּחִין: ^is-60-18

**19** לָא תִצְטַרְכִין לְנֵיהוּר שִׁמְשָׁא בִּימָמָא וְאַף לָא לְזֵיהוּר סִיהֲרָא בְּלֵילְיָא וִיהֵי לִיךְ יְיָ לְנֵיהוֹר עֲלָם וֶאֱלְהָךְ לְתוּשְׁבַּחְתִּיךְ: ^is-60-19

**20** לָא תְבַטֵל עוֹד מַלְכוּתִיךְ וִיקָרִיךְ לָא יֶעְדִי אֲרֵי יְיָ יְהֵי לִיךְ לְנֵיהוֹר עֲלָם וְיִשְׁלְמוּן יוֹמֵי אֶבְלַיִךְ: ^is-60-20

**21** וְעַמִיךְ כּוּלְהוֹן זַכָּאִין לַעֲלַם יַחְסְנוּן אַרְעָא נִיצְבָא דְחֶדְוָתִי עוֹבַד גְבוּרְתִּי לְאִשְׁתַּבָּחָא: ^is-60-21

**22** דִזְעֵיר בְּהוֹן יְהֵי לְאַלָפָא וּדְחַלָשׁ לְעַם תַּקִיף אֲנָא יְיָ בְּזִמְנָהּ אַיְתִינָהּ: ^is-60-22

## Capítulo 61

**1** אֲמַר נְבִיָא רוּחַ נְבוּאָה מִן קֳדָם יְיָ אֱלֹהִים עֲלַי חֲלַף דְרַבֵּי יָתִי יְיָ לְבַשָׂרָא עִנְוְתָנַיָא שַׁלְחַנִי לְתַקָפָא לִתְבִירֵי לִבָּא לְמִקְרֵי לְדִשְׁבַן חֵירוּ וְלִדְאֲסִירִין אִתְגְלוּ לְנֵיהוֹר: ^is-61-1

**2** לְמִקְרֵי שְׁנַת רַעֲוָא קֳדָם יְיָ וְיוֹם פּוּרְעֲנוּתָא קֳדָם אֱלָהָנָא לְנַחָמָא כָּל אֲבֵלַיָא: ^is-61-2

**3** לְשַׁוָאָה לַאֲבֵילֵי צִיוֹן לְמִתַּן לְהוֹן כְּלִיל חֲלַף קְטַם מְשַׁח דְחֶדְוָה חֲלַף אֶבְלָא רוּחַ מְשַׁבָּחָא חֲלַף רוּחֲהוֹן דַהֲוָת עַמְיָא וְיִקְרוֹן לְהוֹן רַבְרְבֵי קוּשְׁטָא עַמֵהּ דַייָ לְאִשְׁתַּבָּחָא: ^is-61-3

**4** וְיִבְנוֹן חָרְבַת עֲלָם צַדְיָת קַדְמָאֵי יְקוֹמְמוּן וִיחַדְתּוּן קִירְוִין דַהֲוָאָה חָרְבָּן צַדְיָא דָר וְדָר: ^is-61-4

**5** וִיקוּמוּן נוּכְרָאִין וְיִרְעוּן עָנְכוֹן וּבְנֵי עַמְמַיָא אִכָּרֵיכוֹן וּמְפַלְחֵי כַּרְמֵיכוֹן: ^is-61-5

**6** וְאַתּוּן כַּהֲנַיָא דַייָ תִּתְקְרוּן דִמְשַׁמְשִׁין קֳדָם אֱלָהָנָא יִתְאֲמַר לְכוֹן נִכְסֵי פַּלְחֵי כּוֹכְבַיָא תֵּיכְלוּן וּבִיקָרְהוֹן תִּתְפַּנְקוּן: ^is-61-6

**7** חֲלַף דִבְהַתְהוּן וְאִתְכְּנַעְתּוּן עַל חַד תְרֵין בְּטַבְוָן דַאֲמָרֵית לְכוֹן אַיְתֵי לְכוֹן וְיִתְבָּהֲתוּן עַמְמַיָא דַהֲווֹ מִשְׁתַּבְּחִין בְּחוּלַקְהוֹן בְּכֵן בְּאַרְעֲהוֹן עַל חַד תְּרֵין יַחְסְנוּן חֶדְוַת עֲלָם תְּהִי לְהוֹן: ^is-61-7

**8** אֲרֵי אֲנָא יְיָ רָחֵימְנָא דִינָא מְרַחֵק קֳדָמַי שִׁקְרָא וְאוֹנָסָא וְאֶתֵּן אֲגַר עוֹבָדֵיהוֹן בִּקְשׁוֹט וּקְיַם עֲלַם אֶגְזַר לְהוֹן: ^is-61-8

**9** וְיִתְרַבּוּן בְּעַמְמַיָא בְנֵיהוֹן וּבְּנֵי בְנֵיהוֹן בְּגוֹ מַלְכְּוָתָא כָּל חֶזְאֵיהוֹן יִשְׁתְּמוֹדְעִינוּן אֲרֵי אִינוּן זַרְעָא דְבָרְכֵהּ יְיָ: ^is-61-9

**10** אֲמָרַת יְרוּשְׁלֵם מֶחְדָא אֶחְדֵי בְּמֵימְרָא דַייָ תְּבוּעַ נַפְשִׁי בְּפוּרְקָנָא דֶאֱלָהִי אֲרֵי אַלְבְּשַׁנִי לְבוּשִׁין דְפוּרְקַן מְעִין דִזְכוּ עִטְפַנִי כַּחֲתָנָא דְמִצְלַח בִּגְנוּנֵהּ וּכְכַהֲנָא רַבָּא דְמַתְקַן בִּלְבוּשׁוֹהִי וּכְכַלְתָא דְמִתְקַשְׁטָא בְתִיקוּנָהָא: ^is-61-10

**11** אֲרֵי כְאַרְעָא דְמַפְקָא צִמְחָהּ וּכְגִנַת שַׁקְיָא דְזֵירוּעָהָא מְרַבְיָא כֵּן יְיָ אֱלֹהִים יִגְלֵי זְכוּתָא וְתוּשְׁבַּחְתָּא דִירוּשְׁלֵם לָקֳבֵל כָּל עַמְמַיָא: ^is-61-11

## Capítulo 62

**1** עַד דְאַעְבֵּד פּוּרְקַן לְצִיוֹן לָא אָנִיחַ לְעַמְמַיָא וְעַד דְאַיְתֵי נְחָמָא לִירוּשְׁלֵם לָא אַשְׁקֵט לְמַלְכְּוָתָא עַד דְיִתְגְלֵי כִּשְׁפַרְפָרָא נְהוֹרָא וּפוּרְקָנָא כְּבָעִיר יִבְעָר: ^is-62-1

**2** וְיֶחְזוּן עַמְמַיָא זְכוּתִיךְ וְכָל מַלְכַיָא יְקָרִיךְ וְיִקְרוֹן לִיךְ שְׁמָא חַדְתָּא דִי בְמֵימְרֵהּ דַייָ יִפְרְשִׁינָהּ: ^is-62-2

**3** וּתְהוֹן כְּלִיל דְחֶדְוָא קֳדָם יְיָ וּכְתַר דְתוּשְׁבְּחָא קֳדָם אֱלָהָיִךְ: ^is-62-3

**4** לָא יִתְאֲמַר לִיךְ עוֹד שְׁבִיקָא וּלְאַרְעִיךְ לָא יִתְאֲמַר עוֹד צַדְיָא אֲרֵי לִיךְ יִתְקְרֵי עָבְדֵי רְעוּתִי בָה וּלְאַרְעִיךְ יָתְבָא אֲרֵי תְהֵי רַעֲוָא מִן קֳדָם יְיָ בִיךְ וְאַרְעֵיךְ תִּתְיַתָב: ^is-62-4

**5** אֲרֵי כְמָא דְמִתְיַתַּב עוּלֵים עִם בְּתוּלְתָּא כֵּן יִתְיַתְבוּן בְּגַוַיְכִי בְּנַיְכִי וּכְמָא דְחָדֵי חֲתָנָא עִם כַּלְתָא יֶחְדֵי עֲלָךְ אֱלָהָיִךְ: ^is-62-5

**6** הָא עַל עוֹבָדֵי אֲבָהָתָךְ צַדִיקַיָא קַרְתָּא דִירוּשְׁלֵם מְתַקְנִין נַטְרִין קֳדָמַי כָּל יְמָמָא וְכָל לֵילְיָא תְּדִירָא לָא פָּסְקִין מִתְאֲמַר דָכְרָן טַבְוָתִיךְ קֳדָם יְיָ לָא פָסֵיק לְכוֹן: ^is-62-6

**7** וְלָא יִפְסוֹק דָכְרַנְהוֹן מִן קָדָמוֹהִי עַד דִיתַקֵן וְעַד דִישַׁוֵי יַת יְרוּשְׁלֵם תּוּשְׁבַּחְתָּא בְּאַרְעָא: ^is-62-7

**8** קַיָם יְיָ בִּימִינֵהּ וּבִדְרַע תּוּקְפֵהּ אִם אֶתֵּן יַת עִבּוּרִיךְ עוֹד מֵיכַל לְבַעֲלֵי דְבָבֵיךְ וְאִם יִשְׁתּוּן בְּנֵי עַמְמַיָא חַמְרִיךְ דִלְאֵית בֵּיהּ: ^is-62-8

**9** אֲרֵי דְכַנְשׁוֹהִי לְעִבּוּרָא יֵיכְלוּנֵהּ וִישַׁבְּחוּן קֳדָם יְיָ וּדְעַצְרוֹהִי לְחַמְרָא יִשְׂתּוּנֵהּ בְּדָרַת קוּדְשִׁי: ^is-62-9

**10** אֲמַר נְבִיָא עֲבָרוּ וְתוּבוּ בְּתַרְעַיָא אַפְנוֹ לֵב עַמָא לְאוֹרַח תַּקְנָא בַּסְרוּ בְּשׂוּרָן טָבָן וְנֶחָמָן לְצַדִיקַיָא דִסְלִיקוּ הִירְהוּר יִצְרָא דְהוּא כְּאֶבֶן תַּקְלָא אֲרִימוּ אָתָא עַל עַמְמַיָא: ^is-62-10

**11** הָא יְיָ אַשְׁמַע לִסְיָפֵי אַרְעָא אֱמָרוּ לִכְנִשְׁתָּא דְצִיוֹן דָא פָרְקִיךְ מִתְגְלֵי הָא אֲגַר עָבְדֵי מֵימְרֵהּ עִמֵהּ וְכָל עוֹבָדֵיהוֹן גְלַן קֳדָמוֹהִי: ^is-62-11

**12** וְיִקְרוֹן לְהוֹן עַמָא דְקוּדְשָׁא פְּרִיקַיָא דַייָ וְלִיךְ יִתְקְרֵי תְבִיעֲתָא קַרְתָּא דְלָא אִתְרְחָקַת: ^is-62-12

## Capítulo 63

**1** מַן אֲמַר אִלֵין עָתִיד לְאַיְתָאָה מָחָא עַל אֱדוֹם פּוּרְעָנָא תַקִיפָא עַל בָּצְרָה לְמֶעְבַּד פּוּרְעֲנוּת דִין עַמֵהּ כְּמָא דְקַיֵים לְהוֹן בְּמֵימְרֵהּ אֲמַר הָא אֲנָא מִתְגְלֵי כְּמָא דְמַלֵלִית בְּזָכוּ סַגְיָא קֳדָמַי חֵיל לְמִפְרַק: ^is-63-1

**2** מָא דֵין יִסְמְקוּן טוּרִין מִדַם קְטִילִין וּמֵישְׁרִין יִפְקוּן כַּחְמַר בְּמַעְצְרָא: ^is-63-2

**3** הָא כְּבִיעוּט דְמִתְבָּעֵיט בְּמַעְצְרָא כֵּן יִסְגֵי קְטוֹל בְּמַשִׁרְיַת עַמְמַיָא וְלָא יְהֵי לְהוֹן תְּקוֹף קֳדָמַי וְאֶקְטְלִינוּן בְּרוּגְזִי וַאֲדוּשִׁינוּן בְּחַמְתִי וְאֶתְבַּר תַּקִיפֵיהוֹן קֳדָמַי וְכָן חַכִּימֵיהוֹן אֱסַלְעִים: ^is-63-3

**4** אֲרֵי יוֹם פּוּרְעֲנוּתָא קֳדָמַי וּשְׁנַת פּוּרְקַן עַמִי מְטָת: ^is-63-4

**5** וּגְלֵי קֳדָמַי וְלֵית גְבַר דְלֵיהּ עוֹבָדִין טָבִין וִידִיַע קֳדָמַי וְלֵית אֱנַשׁ דִיקוּם וְיִבְעֵי עֲלֵיהוֹן וּפְרַקְתִּינוּן בִּדְרַע תּוּקְפִי וּבְמֵימַר רְעוּתִי סְעַדְתִּינוּן: ^is-63-5

**6** וַאֲקַטֵל עַמְמַיָא בְּרוּגְזִי וַאֲדוֹשְׁשִׁינוֹן בְּחֵימְתִי וְאֶרְמֵי לַאֲרַע אַרְעִיתָא קְטִילֵי גִבָּרֵיהוֹן: ^is-63-6

**7** אֲמַר נְבִיָא טִיבוּתָא דַייָ אֲנָא מַדְכַּר תּוּשְׁבַּחְתָּא דַייָ כְּעַל כָּל דְגַמְלָנָא יְיָ וְסַגִי טוּבֵהּ לְבֵית יִשְׂרָאֵל דְגַמְלִינוּן כְּרַחֲמוֹהִי וּכְסַגְיוּת טוּבֵהּ: ^is-63-7

**8** וַאֲמַר בְּרַם עַמִי אִינוּן בְּנַיָא דְלָא יְשַׁקְרוּן וַהֲוָה מֵימְרֵהּ לְהוֹן פָּרִיק: ^is-63-8

**9** בְּכָל עִדַן דְחָבוּ קֳדָמוֹהִי לְאַיְתָאָה עֲלֵיהוֹן עָקָא לָא אָעִיק לְהוֹן וּמַלְאַךְ שְׁלִיחַ מִן קֳדָמוֹהִי פְרֵיקִינוּן בְּרַחֲמָתֵהּ וּבִמְחָסֵהּ עֲלֵיהוֹן הָא שֵׁיזְבִינוּן וְנַטְלִינוּן וְסוֹבְרִינוּן כָּל יוֹמֵי עַלְמָא: ^is-63-9

**10** וְאִינוּן סָרִיבוּ וְאַרְגִיזוּ עַל מֵימַר נְבִיֵי קוּדְשֵׁהּ וְאִתְהַפֵּךְ מֵימְרֵהּ לְהוֹן לִבְעֵיל דְבַב הוּא אַגִיחַ קְרָבָא בְּהוֹן: ^is-63-10

**11** וְחָס עַל יְקַר שְׁמֵהּ בְּדִיל דוּכְרָן טַבְוָתֵהּ דְמִן עַלְמָא גְבוּרָן דַעֲבַד עַל יְדֵי מֹשֶׁה לְעַמֵהּ דִלְמָא יֵימַר אָן דְאַסְקִינוּן מִן יַמָא אָן דְדַבְּרִינוּן בְּמַדְבְּרָא כְּרַעֲיָא לְעָנֵהּ אָן דְאַשְׁרֵי בֵינֵיהוֹן יַת מֵימַר נְבִיֵי קוּדְשֵׁהּ: ^is-63-11

**12** דַבֵּר לְיַמִינָא דְמֹשֶׁה דְרַע תּוּשְׁבַּחְתֵּהּ בְּזַע מֵי יַמָא דְסוּף מִן קֳדָמֵיהוֹן לְמֶעְבַּד לֵיהּ שׁוּם עֲלָם: ^is-63-12

**13** דַבְּרִינוּן בֵּין תְּחוֹמַיָא כְּסוּסְיָא דִי בְמַדְבְּרָא לָא מַתְקַל כֵּן אַף אִינוּן לָא אִתְקִילוּ: ^is-63-13

**14** כִּבְעִירָא דִי בְּמֵישְׁרָא מַדְבְּרָא מֵימְרָא דַייָ דַבְּרִינוּן כֵּן דִבַּרְתֵּהּ לְעַמָךְ לְמֶעְבַּד לָךְ שׁוּם דְתוּשְׁבְּחָא: ^is-63-14

**15** אִסְתְּכֵי מִן שְׁמַיָא וְאִתְגְלֵי מִמְדוֹר קוּדְשָׁךְ וְתוּשְׁבַּחְתָּךְ אָן פּוּרְעֲנוּתָךְ וְגִבַּרְוָתָךְ הֲמוֹן טַבְוָתָךְ וְסַגְיוּת רַחֲמָךְ עֲלַי יֶחְסְנוּן: ^is-63-15

**16** אֲרֵי אַתְּ הוּא דְרַחֲמָךְ עֲלָנָא סַגִיאִין כְּאָב עַל בְּנִין אֲרֵי אַבְרָהָם לָא אַסְקָנָא מִמִצְרַיִם וְיִשְׂרָאֵל לָא עָבַד לָנָא פְּרִישָׁן בְּמַדְבְּרָא אַתְּ הוּא יְיָ וְרַחְמָךְ עֲלָנָא סַגִיאִין כְּאָב עַל בְּנִין פִּרְקְנָא מַעֲלַם שְׁמָךְ: ^is-63-16

**17** לְמָה תְרַחֲקִינָנָא יְיָ לְמִטְעֵי מֵאוֹרְחָן דְתַקְנָן קֳדָמָךְ כְּעַמְמַיָא דְלֵית לְהוֹן חוּלַק בְּאוּלְפַן אוֹרַיְתָךְ לָא יִתְפְּנֵי לִבָּנָא מִדְחַלְתָּךְ אֲתֵיב שְׁכִנְתָּךְ לְעַמָךְ בְּדִיל עַבְדָךְ צַדִיקַיָא דְקַיֵמְתָּא לְהוֹן בְּמֵימְרָךְ לְמֶעְבַּד בֵּינֵיהוֹן שִׁבְטֵי אַחְסַנְתָּךְ: ^is-63-17

**18** בִּזְעֵיר דִירִיתוּ עַמָא דְקוּדְשָׁךְ בַּעֲלֵי דְבָבָנָא דוֹשִׁישׁוּ מַקְדָשָׁךְ: ^is-63-18

**19** הָא אֲנַחְנָא עַמָךְ דְמִן עַלְמָא לָא לְעַמְמַיָא יְהַבְתְּ אוּלְפַן אוֹרַיְתָךְ לָא אִתְקְרֵי שְׁמָךְ עֲלֵיהוֹן לָא לְהוֹן אַרְכֵינְתָּא שְׁמַיָא אִתְגְלֵיתָא מִן קֳדָמָךְ טוּרַיָא זָעוּ: ^is-63-19

## Capítulo 64

**1** כַּד שְׁלַחְתָּא רוּגְזָךְ כְּאֶשְׁתָּא בְּיוֹמֵי אֵלִיָהוּ אִתְמַסְיָא יַמָא מַיָא מְלָחֲכָא אֶשְׁתָּא לְהוֹדִיעַ שְׁמָךְ לְסַנְאֵי עַמָךְ מִן קֳדָמָךְ עַמְמַיָא זָעוּ: ^is-64-1

**2** בְּמַעְבְּדָךְ פְּרִישָׁן לָא סַבַּרְנָא לְהוֹן אִתְגְלִיתָא מִן קֳדָמָךְ טוּרַיָא זָעוּ: ^is-64-2

**3** וּמֵעַלְמָא לָא שְׁמַעְתְּ אוֹדֶן קַל גְבוּרָן לָא אֲצֵיתַת לְמִלוּל זִיעַ עַיִן לָא חָזַת מָא דַחֲזוֹ עַמָךְ שְׁכִינַת יְקָרָךְ יְיָ אֲרֵי לֵית בַּר מִנָךְ דְאַתְּ עֲתִיד לְמֶעְבַּד לְעַמָךְ צַדִיקַיָא דְמִן עַלְמָא דִמְסַבְּרִין לְפוּרְקָנָךְ: ^is-64-3

**4** מִתְעַרְעִין קֳדָמָךְ עוֹבָדֵי אַבְהָתָנָא צַדִיקַיָא דַחֲדִיא לְמֶעְבַּד רְעוּתָךְ בִּקְשׁוֹט וּבְזָכוּ בְּאוֹרַח טוּבָךְ וְרַחֲמָךְ הֲווֹ דְכִירִין לִדְחַלְתָּךְ הָא בְּכָל עִדַן דַהֲוָה רְגַז מִן קֳדָמָךְ עֲלָנָא עַל דְחַבְנָא בְהוֹן בְּעוֹבָדֵי אֲבָהָתָנָא צַדִיקַיָא דְמִן עַלְמָא אֲנַחְנָא מִתְפָּרְקִין: ^is-64-4

**5** וַהֲוֵינָא כִמְסָאָב כּוּלָנָא וְכִלְבוּשׁ מְרָחֵק כָּל זַכְוָתָנָא וּנְתַרְנָא כְּמִתַּר טְרַף כּוּלָנָא וּבְחוֹבָנָא כְּרוּחָא אִתְנְטֵילְנָא: ^is-64-5

**6** וְלֵית דְמָצְלֵי בִשְׁמָךְ מִתְרְעֵי לְאַתְקָפָא בִדְחַלְתָּךְ אֲרֵי סְלֵיקְתָּא אַפֵּי שְׁכִנְתָּךְ מִנָנָא וּמְסַרְתָּנָא בְּיַד חוֹבָנָא: ^is-64-6

**7** וְאַתְּ יְיָ רַחֲמָךְ עֲלָנָא סַגִיאִין כְּאַב עַל בְּנִין אֲנַחְנָא טִינָא וְאַתְּ בְּרֵיתָנָא וְעוֹבַד גְבוּרְתָּךְ כּוּלָנָא: ^is-64-7

**8** לָא יְהֵי רְגַז מִן קֳדָמָךְ יְיָ בָּנָא עַד לַחֲדָא לָא לְעַלְמָא תִדְכַּר חוֹבִי הָא גְלֵי קֳדָמָךְ דְעַמָךְ אֲנַחְנָא כּוּלָנָא: ^is-64-8

**9** קִרְוֵי קוּדְשָׁךְ הֲוָאָה מַדְבְּרָא צִיוֹן מַדְבְּרָא הֲוָת וִירוּשְׁלֵם צַדְיָא: ^is-64-9

**10** בֵּית קוּדְשָׁנָא וְתוּשְׁבַּחְתָּנָא אֲתַר דִפְלָחוּ קֳדָמָךְ אֲבְהָתָנָא הֲוָה לִיקֵידַת נוּר וְכָל בֵּית רַנְגָנָא הֲוָה לְחָרְבָּא: ^is-64-10

**11** הַעַל אִלֵין תִּתְחַסָן יְיָ וְאַתְּ יָהֵיב אַרְכָּא לְרַשִׁיעַיָא דִמְשַׁעְבְּדִין בָּנָא עַד עַלְמָא: ^is-64-11

## Capítulo 65

**1** אִשְׁתְּאֵילִית בְּמֵימְרִי לִדְלָא שְׁאִילוּ מִן קֳדָמַי תְּבָעֵית אוּלְפַן אוֹרַיְתִי לִדְלָא תְּבָעוּ דְחַלְתִּי אֲמָרֵית הָא אֲנָא מִשְׁתָּאֵיל תְּדִירָא כָּל יוֹמָא לְעַם דְלָא מְצַלֵי בִשְׁמִי: ^is-65-1

**2** שְׁלָחִית נְבִיאֵי כָּל יוֹמָא לְעַמָא מְסָרְבָנָא דְאָזְלִין בְּאוֹרַח דְלָא תַקְנָא בָּתַר עֶשְׁתּוֹנֵיהוֹן: ^is-65-2

**3** עַמָא דְמַרְגְזִין עַל מֵימְרִי קֳדָמַי תְּדִירָא דָבְחִין בְּגִנָן טַעֲוָתָא וּמַסְקִין בּוּסְמַיָא עַל לִבְנַיָא: ^is-65-3

**4** דְיָתְבִין בְּבָתַּיָא דְבָנָן מֵעֲפַר קִבְרַיָא וְעִם פִּגְרֵי בְּנֵי אֱנָשָׁא דַיְרִין דְאָכְלִין בְּשַׂר חֲזִירָא וּרְטַב פִּגוּל בְּמַנֵיהוֹן: ^is-65-4

**5** דְאָמְרִין רָחֵיק לְהָלָא לָא תִקְרַב בִּי אֲרֵי דָכֵינָא מִנָךְ אִלֵין רוּגְזֵיהוֹן כִּתְנָנָא קֳדָמַי פּוּרְעֲנוּתְהוֹן בְּגֵיהִנָם דְאֶשְׁתָּא דְלָקָא בָהּ כָּל יוֹמָא: ^is-65-5

**6** הָא כְתִיבָא קֳדָמַי לָא אֶתֵּן לְהוֹן אַרְכָּא בְּחַיַיָא אֱלָהֵן אֲשַׁלֵם לְהוֹן פּוּרְעֲנוּת חוֹבֵיהוֹן וְאֶמְסוֹר לְמוֹתָא תִּנְיָנָא יַת גְוִיַתְהוֹן: ^is-65-6

**7** חוֹבֵיכוֹן וְחוֹבֵי אֲבָהַתְכוֹן גְלָן קֳדָמַי כַּחֲדָא אֲמַר יְיָ דַאֲסִיקוּ בוּסְמִין עַל טוּרַיָא וְעַל רְמָתָא חֲסִידוּ קֳדָמַי וְאֶתֵּן אֲגַר עוֹבָדֵיהוֹן בְּקַדְמֵיתָא עַל חֵיקְהוֹן: ^is-65-7

**8** כִּדְנַן אֲמַר יְיָ כְּמָא דְאִשְׁתְּכַח נֹחַ זַכַּאי בְּדָרָא דְטוֹפָנָא וַאֲמָרֵית דְלָא לְחַבְּלוּתֵהּ בְּדִיל לְקַיָמָא עַלְמָא מִנֵיהּ כֵּן אַעְבֵּיד בְּדִיל עַבְדֵי צַדִיקַיָא בְּדִיל דְלָא לְחַבָּלָא כֻּלָא: ^is-65-8

**9** וְאַפֵיק מִיַעֲקֹב זַרְעָא וּמִיהוּדָה יָרֵית טוּרֵי וְיַחְסְנוּנָהּ בְּחִירִי וְעַבְדֵי צַדִיקַיָא יֵשְׁרוּן תַּמָן: ^is-65-9

**10** וִיהֵי שָׁרוֹנָא לְבֵית מֵישְׁרֵי עֶדְרִין דְעָן וּמֵישַׁר עָכוּר לְבֵיתָא רַבָּעָה בַּקְרָן דְתוֹרִין לְעַמִי דִתְבָעוּ דְחַלְתִּי: ^is-65-10

**11** וְאַתּוּן בֵּית יִשְׂרָאֵל שְׁבַקְתּוּן פּוּלְחָנָא דַייָ אִתְנְשֵׁיתוּן יַת פּוּלְחַן טוּרָא דְקוּדְשִׁי דִמְסַדְרִין לְטַעֲוָן פְּתוֹרִין וּמְמַזְגִין לִדְחַלְתְּהוֹן אֲגָנִין: ^is-65-11

**12** וְאֶמְסַר יַתְכוֹן לְחַרְבָּא וְכוּלְכוֹן לְקַטָלָא תִתְמַסְרוּן חֲלַף דִשְׁלָחֵית נְבִיֵי וְלָא תַבְתּוּן אִתְנַבִּיאוּ וְלָא קַבֵּילְתּוּן וַעֲבַדְתּוּן דְבִישׁ קֳדָמַי וּבִדְלָא צְבִינָא אִתְרְעֵיתוּן: ^is-65-12

**13** בְכֵן כִּדְנַן אֲמַר יְיָ אֱלֹהִים הָא עַבְדֵי צַדִיקַיָא יֵכְלוּן וְאַתּוּן רַשִׁיעַיָא תִּכְפְּנוּן הָא עַבְדֵי צַדִיקַיָא יִשְׁתּוּן וְאַתּוּן רַשִׁיעַיָא תִּצְחוֹן הָא עַבְדֵי צַדִיקַיָא יֶחְדוֹן וְאַתּוּן רַשִׁיעַיָא תִּבְהֲתוּן: ^is-65-13

**14** הָא עַבְדֵי צַדִיקַיָא יְשַׁבְּחוּן מִטוּב לֵב וְאַתּוּן תִּצַוְחוּן מִכְּאֵב לֵב וּמִתְּבַר רוּחַ תְּיַלְלוּן: ^is-65-14

**15** וְתִשְׁבְּקוּן שׁוּמְכוֹן לְקַיָמָא לִבְחִירִי וִימִיתְכוֹן יְיָ אֱלֹהִים מוֹתָא תִנְיָנָא וּלְעַבְדוֹהִי צַדִיקַיָא יִקְרֵי שְׁמָא אוֹחֲרָנָא: ^is-65-15

**16** דִמְבָרֵךְ בְּאַרְעָא יְבָרֵךְ בֶּאֱלָהָא קַיָמָא וְדִמְקַיֵם בְּאַרְעָא יְקַיֵם בֶּאֱלָהָא קַיָמָא אֲרֵי יִתְנַשְׁיָן עָקָתָא קַדְמְיָתָא וַאֲרֵי מְסַתְּרָן מִן קֳדָמַי: ^is-65-16

**17** אֲרֵי הָא אֲנָא בְרָא שְׁמַיָא חַדְתִּין וְאַרְעָא חַדְתָּא וְלָא יְדַכְּרוּן קַדְמְיָתָא וְלָא יִתַּסְקוּן עַל לֵב: ^is-65-17

**18** אֱלָהֵין יֶחְדוּן וִיבוּעוּן בַּעֲלַם עָלְמַיָא דַאֲנָא בָרֵי אֲרֵי הָא אֲנָא בָרֵי יַת יְרוּשְׁלֵם בִּיעָא וְעַמָהּ חָדֵי: ^is-65-18

**19** וַאֲבוּעַ בִּירוּשְׁלֵם וְיֶחְדוּן בָהּ עַמִי וְלָא יִשְׁתְּמַע בָּהּ עוֹד קַל דְבָכָן וְקַל דִמְצַוְחִין: ^is-65-19

**20** וְלָא יְהֵי מִתַּמָן עוֹד יָנִיק יוֹמִין וְסָבָא דְלָא יַשְׁלַם יַת יוֹמוֹהִי אֲרֵי דְחַיֵיב עוֹלֵים בַּר מְאָה שְׁנִין יְהֵי מָאֵית וּדְחָטֵי בַּר מְאָה שְׁנִין יִתְּרָךְ: ^is-65-20

**21** וְיִבְנוֹן בָּתִּין וְיִתְבוּן וְיִצְבוּן כַּרְמִין וְיֵכְלוּן אִבְּהוֹן: ^is-65-21

**22** לָא יִבְנוֹן וְאָחְרִין יָתְבוּן לָא יִצְבוּן וְאוֹחֲרָנִין יֵכְלוּן אֲרֵי כְיוֹמֵי אִילָן חַיַיָא יוֹמֵי עַמִי וְעוֹבֵד יְדֵיהוֹן יְבַלוּן בְּחִירָי: ^is-65-22

**23** לָא יֶחְלוּן לְרֵיקָן וְלָא יִרְבּוּן לְמוֹתָא אֲרֵי זַרְעָא דְבָרְכֵיהּ יְיָ אִינוּן וּבְנֵי בְנֵיהוֹן עִמְהוֹן: ^is-65-23

**24** וִיהֵי עַד לָא יִצְלוּן קֳדָמַי וַאֲנָא אֲקַבֵּל צְלוֹתְהוֹן עַד לָא יִבְעוֹן מִן קֳדָמַי אַעְבֵּיד בָּעוּתְהוֹן: ^is-65-24

**25** דֵיבָא וְאִמְרָא יִרְעוּן כַּחֲדָא וְאַרְיָא כְּתוֹרָא יֵיכוּל תִבְנָא וְחִוְיָא עַפְרָא מְזוֹנֵיהּ לָא יִבְאֲשׁוּן וְלָא יְחַבְּלוּן בְּכָל טוּרָא דְקוּדְשִׁי אֲמַר יְיָ: ^is-65-25

## Capítulo 66

**1** כִּדִנַן אֲמַר יְיָ שְׁמַיָא כוּרְסֵי יְקָרֵי וְאַרְעָא כְּבַשׁ קֳדָמַי אֵידֵין בֵּיתָא דְתִבְנוֹן קֳדָמַי וְאֵידֵין אֲתַר בֵּית אַשְׁרָיוּת שְׁכִנְתִּי: ^is-66-1

**2** וְיַת כָּל אִלֵין גְבוּרְתִי עֲבָדַת וַהֲלָא הֲוָאָה כָל אִלֵין אֲמַר יְיָ וּבְדֵין רַעֲוָא קֳדָמַי לְאִסְתַּכָּלָא בֵּיהּ בִּדְעַנְוְתָן וּמַכִּיךְ רוּחַ וּמִשְׁתְּוֵי לִקֳבֵל פִתְגָמִי: ^is-66-2

**3** נָכֵיס תּוֹרָא כְּקָטִיל גְבַר דָבַח אִימַר כְּנָקֵיף כְּלֵב מַסְקֵי קוּרְבַּן דַם חֲזִירָא קוּרְבַּן מַתְּנַתְהוֹן מַתְּנַת אוֹנָס אַף אִינוּן אִתְרְעִיאוּ בְּאוֹרְחַתְהוֹן וּבְשִׁיקוּצֵיהוֹן נַפְשֵׁהוֹן אִתְרְעִיאַת: ^is-66-3

**4** אַף אֲנָא אֶצְבֵּי בְתַבְרֵהוֹן וּמִמַה דְיָצְפָן לָא יִשְׁתֵּיזְבוּן חֲלַף דִשְׁלָחֵית נְבִיֵי וְלָא תָבוּ אִתְנַבִיאוּ וְלָא קַבִּילוּ וַעֲבָדוּ דְבִישׁ קֳדָמַי וּבִדְלָא צְבִינָא אִתְרְעִיאוּ: ^is-66-4

**5** קַבִּילוּ פִּתְגָמָא דַייָ צַדִיקַיָא דְמִשְׁתְּוָן לִקֳבֵיל פִּתְגָמֵי רְעוּתֵיהּ אָמְרִין אֲחֵיכוֹן סַנְאֵיכוֹן מֵרַחֲקֵיכוֹן בְּדִיל שְׁמִי יִסְגֵי יְקָרָא דַייָ וְנֶחֱזֵי בְחֶדְוַתְכוֹן וְאִינוּן יִבְהֲתוּן: ^is-66-5

**6** קַל אִתְרְגוֹשָׁא מֵקַרְתָּא דִירוּשְׁלֵם קָלָא מַהֵיכְלָא קַל מֵימְרָא דַייָ דִמְשַׁלֵים גַמְלָא לְבַעֲלֵי דְבָבוֹהִי: ^is-66-6

**7** עַד לָא מֵיתֵי עָקָא לָהּ תִּתְפְּרִיק עַד לָא יֵיתֵי לָהּ זִיעַ בְּחֶבְלִין עַל יְלִידָה יִתְגְלֵי מַלְכָּהּ: ^is-66-7

**8** מַן שְׁמַע כַּחֲדָא מַן חֲזָא כְּאִלֵין הָאֶפְשַׁר דְתִתְעֲבֵיד אַרְעָא בְּיוֹמָא חָד אִם יִתְבְּרֵי עַמָא זְמַן חֲדָא אֲרֵי עֲתִידָא דְתִתְנְחֵים צִיוֹן וְתִתְמְלֵי מֵעַם שְׁבִי גַלְוָתָהָא: ^is-66-8

**9** אֲנָא אֱלָהָא בְּרִית עַלְמָא מִבְּרֵאשִׁית אֲמַר יְיָ אֲנָא בְרֵית כָל אֱנָשָׁא אֲנָא בַדְרֵית יַתְהוֹן לְבֵינֵי עַמְמַיָא אַף אֲנָא עֲתִיד לְכַנָשָׁא גַלְוָתִיךְ אֲמַר אֱלָהָיִךְ: ^is-66-9

**10** חֲדוֹ בִירוּשְׁלֵם וּבוּעוּ בָהּ כָּל רָחֲמָהָא דוּצוּ עִמָהּ דַיִץ כָּל דַהֲווֹ מִתְאַבְּלִין עֲלָה: ^is-66-10

**11** בְּדִיל דְתִתְפַּנְקוּן וְתִשְׂבְּעוּן מִבִּזַת תַּנְחוּמָתָהָא בְּדִיל דְתִשְׁתּוּן וְתִתְרַווֹן מַחֲמַד יְקָרָהּ: ^is-66-11

**12** אֲרֵי כִדְנַן אֲמַר יְיָ הָא אֲנָא מַיְתִי לָהּ כִּשְׁפַע נְהַר פְּרָת שְׁלַם וְכִנְחַל מַגְבַּר יְקַר עַמְמַיָא וְתִתְפַּנְקוּן עַל גִסְסִין תִּתְנַטְלוּן וְעַל רְכוּבִין תִּתְרַבּוּן: ^is-66-12

**13** כִּגְבַר דְאִמֵיהּ מְנַחֲמָא לֵיהּ כֵּן מֵימְרִי יְנַחֵים יַתְכוֹן וּבִירוּשְׁלֵם תִּתְנַחֲמוּן: ^is-66-13

**14** וְתֶחֱזוּן וְיֶחְדֵי לִבְּכוֹן וּגְוִיַתְכוֹן כְּדִתְאִין יִזְהֲרוּן וְתִתְגְלֵי גְבוּרְתָּא דַייָ לְאוֹטָבָא לְעַבְדוֹהִי צַדִיקַיָא וְיֵתֵי לְוָט לְבַעֲלֵי דְבָבוֹהִי: ^is-66-14

**15** אֲרֵי הָא יְיָ בְאֶשְׁתָּא מִתְגְלֵי וּכְעַלְעוּלִין רְתִיכוֹהִי לַאֲתָבָא בִּתְקוֹף רוּגְזֵיהּ וּמְזוֹפִיתֵיהּ בְּשַׁלְהוֹבִית אֶשְׁתָּא: ^is-66-15

**16** אֲרֵי בְּאֶשְׁתָּא עֲתִיד יְיָ לְמִידַן וּבְחַרְבֵּיהּ יַת כָּל בִּשְׂרָא וְסַגִיאִין קְטִילַיָא קֳדָם יְיָ: ^is-66-16

**17** דְמִזְדַמְנִין וְדִמְדַכָּן לְגִנָן דְטַעֲוָתָא סִיעָא בָּתַר סִיעָא אָכְלֵי בְּשַׂר חֲזִירָא וְשִׁקְצָא וְעַכְבְּרָא כַּחֲדָא יְסוּפוּן אֲמַר יְיָ: ^is-66-17

**18** וּקֳדָמַי גְלַן עוֹבָדֵיהוֹן וְעֶשְׁתּוֹנֵיהוֹן עֲתִידָנָא לְכַנָשָׁא יַת כָּל עַמְמַיָא אוּמַיָא וְלִישָׁנַיָא וְיֵתוּן וְיֶחְזוּן יַת יְקָרִי: ^is-66-18

**19** וַאֲשַׁוֵי בְהוֹן אָתָא וַאֲשַׁלַח מִנְהוֹן מְשֵׁיזְבִין לְבֵינֵי עַמְמַיָא לִמְדִינַת יַמָא פּוּלָאֵי וְלוּדָאֵי דְנַגְדִין וּמָחָן בְּקַשְׁתָּא לִמְדִינַת תּוּבַל וְיָוָן נַגְוָתָא רְחִיקָן דְלָא שְׁמָעוּ יַת שְׁמַע גְבוּרְתִי וְלָא חֲזוֹ יַת יְקָרִי וְיַחְווּן יַת יְקָרִי בְּעַמְמֵיָא: ^is-66-19

**20** וְיֵיתוּן יַת כָּל אֲחֵיכוֹן מִכָּל עַמְמַיָא קוּרְבָּנָא קֳדָם יְיָ בְסוּסְוָן וּבִרְתִיכִין וּבִרְחֵילִין וּבְכִדְנְוָן וּבְכִרְכְּרָן וּבְתוּשְׁבְּחָן עַל טוּרָא דְקוּדְשָׁא אֲמַר יְיָ כְּמָא דְיֵיתוּן בְּנֵי יִשְׂרָאֵל יַת קוּרְבָּנָא בְּמָנָא דְכֵי לְבֵית מַקְדְשָׁא דַיָי: ^is-66-20

**21** וְאַף מִנְהוֹן אֲקָרֵב לְמֶהֱוֵי כַהֲנַיָא וְלֵוָאֵי אֲמַר יְיָ: ^is-66-21

**22** אֲרֵי כְּמָא דִשְׁמַיָא חַדְתִּין וְאַרְעָא חַדְתָּא דַאֲנָא עָבִיד קַיְמִין קֳדָמַי אֲמַר יְיָ כֵּן יִתְקַיֵם זַרְעֲכוֹן וְשׁוּמְכוֹן: ^is-66-22

**23** וִיהֵי בִּזְמַן רֵישׁ יְרַח בִּירַח וּבִזְמַן שַׁבָּא בְּשַׁבָּא יֵיתוּן כָּל בִּשְׂרָא לְמִסְגַד קֳדָמַי אֲמַר יְיָ: ^is-66-23

**24** וְיִפְקוּן וְיֶחְזוּן בְּפִגְרֵי גַבְרַיָא חַיָבַיָא דִמְרָדוּ בְמֵימְרִי אֲרֵי נִשְׁמַתְהוֹן לָא יְמוּתוּן וְאֶשְׁתְּהוֹן לָא תִטְפֵי וִיהוֹן מִתְדָנִין רַשִׁיעַיָא בְּגֵיהִנָם עַד דְיֵימְרוּן עֲלֵיהוֹן צַדִיקַיָא מִיסַת חֲזֵינָא: ^is-66-24